An Kristianong Jubileo Maabot sa Kulminasyon sa Milenyo

 1. Ano an dai hiningoang ibalik kan mga Judio sa Republika nin Israel, asin taano?

MINSAN sa Republika nin Israel (na napundar kan 1948), an dakol na Judio na ibinibilang an sadiri na sakop kan Pagboot ni Moises dai man ibinalik an pagselebrar kan taon nin Jubileo. Asin magkakaigwa nin dakol na komplikasyon kun poprobaran ninda. May ibubungang grabeng problema sa ekonomiya, ta napapalabot an mga diretso sa rogaring. An Republika nin Israel dai nag-ookupar sa bilog na daga na pinag-erokan kan suanoy na 12 tribo. Mayo man nin templo na may halangkaw na saserdote gikan sa tribo ni Levi, ta nawara na an mga midbidan sa tribo kan banwaan.

 2. Paano an nagkapirang Kristiano nagpoon nang magselebrar nin Jubileo na ipinanganino kan sa suanoy na Israel?

² Alagad ano ngonyan an kamugtakan niato kun dapit sa mga bendisyon nin pagselebrar nin Jubileo? Magigirumdoman niato na an suanoy na Jubileo kapiyestahan na taon nin katalingkasan—an mga Israelitas na ipinabakal an sadiri sa kaoripnan nabubutasan asin an mga dagang minana isinusulit. (Levitico 25:8-54) Sa sinusundan na artikulo, nasabotan niato na an areglong ini natapos kaiba kan tipan nin Pagboot ni Moises kan 33 C.E. (Roma 7:4, 6; 10:4) Dangan ipinaotob an bagong tipan na paagi kaiyan puwedeng patawadon nin Dios an mga kasalan nin mga may pagtubod, lahidan sinda nin banal na espiritu, asin amponon sinda bilang mga aki na dadarahon sa langit. (Hebreo 10:15-18) Alagad an mga nakikinabang nin siring sa areglong ini kan bagong tipan “sadangoton na aripompon” nin 144,000 “na binakal hale sa daga.” Kun siring paano an minilyon na ibang maimbod na mga Kristiano magkakamit nin katalingkasan na ipinanganino kan Jubileo?—Lucas 12:32; Kapahayagan 14:1-4.

Sarong Atang Para sa Gabos!

 3. Gurano kaepektibo asin nagdadanay an atang ni Jesus?

³ Kaidtong mga panahon bago-Kristiano, an mga pakinabang sa taonan na Aldaw nin Pagtubos naglalawig sana nin sarong taon. An mga pakinabang sa pantubos na atang kan Kagurangnan na Jesu-Cristo nagpapadagos, daing sagkod. Kaya an antitipikong Halangkaw na Saserdote, si Jesus, dai na kaipuhan na magin tawo giraray, iatang an sadiri, dangan bumuwelta sa langit tanganing ipresentar an halaga kan atang na iyan taon-taon sa Kabanalbanale ni Jehova Dios. Arog kan sabi kan Kasuratan: “Si Cristo, ngonyan na binuhay na sia liwat hale sa mga gadan, dai na magagadan; an kagadanan dai na makadadaog sa saiya.”—Roma 6:9; Hebreo 9:28.

4, 5. (a) Ano an nagin bunga kan pag-aplikar kan atang ni Jesus poon kan Pentecostes 33 C.E.? (b) Ano an nagpaparisa na an saiyang atang iaaplikar nin mas mahiwas?

⁴ Kaya, sa mga taon poon kan Pentecostes 33 C.E., mantang an mga may pagtubod nagin pinaniaki sa espiritung mga disipulo kan pinamuraway na Kagurangnan na Jesus, pinonan nindang selebraron an Kristianong Jubileo. Oras na ‘makatalingkas na sa ley nin kasalan asin nin kagadanan,’ sinda nagkakamit nin nakakapabagsik na katalingkasan. (Roma 8:1, 2) Ibinalangibog man ninda an Kristianong mensahe tanganing an iba pa mapatawad sa saindang mga kasalan, lahidan, asin magin espirituwal na mga aki nin Dios. Alagad ini daw nangangahulogan na kun an saro dai kabilang sa grupong iyan na limitado sa 144,000, dai na sia magkakamit nin magayagayang katalingkasan ngonyan?

⁵ Makahulogan sa bagay na ini an mga tataramon ni apostol Pablo sa Roma 8:19-21: “An odok na paglaom kan linalang naghahalat para sa kapahayagan kan mga aki nin Dios. Huli ta an linalang ipinasakop sa kasayangan [huling makasalan asin dai kayang haleon an kasalan].” Dangan idinoon ni Pablo na igwa nin “paglaom na an linalang mismo bubutasan man hale sa kaoripnan nin kalapaan asin magkakaigwa kan mamuraway na katalingkasan kan mga aki nin Dios.” Kun siring, an katalingkasan na iyan bakong limitado sa mga nagigin “aki nin Dios” sa langit. Iyan pinatutunayan kan pamilyar na mga tataramon sa Juan 3:16. Asin, arog kan sinabi na, an linahidan na apostol na si Juan nagsabi na si Cristo nagadan “para sa satong mga kasalan, alagad bako sanang kan sa sato kundi siring man kan sa bilog na kinaban.”—1 Juan 2:2.

1919—Enot na Katalingkasan

6, 7. Poon kan 1919, anong klaseng katalingkasan an ibinalangibog, asin taano ta nangorogna poon kaidto?

⁶ Sa modernong mga panahon an mga linahidan na nagseselebrar sa Kristianong Jubileo nagpapahayag nin nakapatatalingkas na maogmang bareta, nangorogna poon kan 1919. ‘Taano ta poon kaidto?’ tibaad isipon nindo kun mas huri kamong namundag. Helingon niato, na ginigirumdom na napapalabot an pagkakamit nindo nin katalingkasan.

⁷ Sa laog nin mga dekada bago an petsang iyan, an mga linahidan ni Jehova nagpublikar nin mga katotoohan sa Biblia, arog baga kan sa bantog na serye na Studies in the Scriptures (1886-1917). Nagwaras man sinda nin dakol na pulyeto asin pampleta na pano nin impormasyon. Kan Guerra Mundial I, nag-abot an pagtumang, pagbalo asin pagpili, asin pagluya kan saindang mga aktibidad. Alagad kan 1919 an linahidan na natatada nagluwas na may nabagong kaigotan sa pagbalangibog kan mga katotoohan sa Biblia. Kun paanong si Jesus nakapagsabi kan 30 C.E. na sia linahidan tanganing maghulit nin “katalingkasan sa mga nabihag asin sa pagpabuklat sa mga mata kan mga bilanggo,” iyo man an mga linahidan na ini sa modernong aldaw. Pakalihis nin maogmahon na kombension kan Setyembre 1-7, 1919,a sinda maigot na nag-abante sa paghuhulit nin mga katotoohan na nakapatalingkas sa dai mabilang na mga tawo.—Lucas 4:18.

8, 9. Sa anong sentido na nakabutas an dakol, asin anong mga pantabang an ginamit sa pagbalangibog kan katalingkasan na iyan?

⁸ Halimbawa, helinga an pantabang sa pag-adal kan Biblia na The Harp of God (1921), na nag-atubang nin mahahalagang katotoohan na garo iyan sampulong kuwerdas nin arpa. Inadmitir kan libro na “dakol an natakot na mag-adal sa Biblia” huli sa doktrina na “an padusa sa mga maraot . . . daing katapusan na pasakit o pagpadusa sa sarong impierno na naglalaad nin dai mapaparong na kalayo asin asupre.” An mga parabasa sa haros 6,000,000 na kopya kan librong ini nakaaram na an doktrinang ini “dai puwedeng magin totoo huli sa kisuerra apat na separado asin laen na dahelan: (1) huli ta iyan bakong rasonable; (2) huli ta iyan kontra sa hustisya; (3) huli ta iyan kontra sa prinsipyo nin pagkamoot; asin (4) huli ta iyan biyong bakong sono sa Kasuratan.” Maiimahinar nindo kun guranong katalingkasan an itinao kaiyan para sa mga tawo na nagdakula na may takot sa daing sagkod na pasakit sa impierno o sa kasakitan sa purgatoryo!

⁹ Iyo, an maigot na paghuhulit nin katotoohan sa Biblia kan mga linahidan na ini nakapatalingkas sa mga tawo sa bilog na kinaban na oripon nin falsong mga katokdoan, superstisyon, asin bakong makakasuratan na mga gawe (arog baga kan pagsamba sa mga apoon, pagkatakot sa mga impakto o maraot na mga espiritu, asin pinansial na pag-aprobetsar kan klero). An mismong mga titulo kan nagkapira sa mga pantabang sa pag-adal kan Biblia nagpaparisa kan nakapatatalingkas na impluwensia kaiyan sa minilyon.b Kaya nagin totoo an mga tataramon ni Jesus, kan sia magsabi na an saiyang mga disipulo ‘magibo nin mga gibo na orog’ kisa ginibo nia. (Juan 14:12) Kun ikokomparar sa preliminaryong espirituwal na pagtao nin katalingkasan na ginibo ni Jesus sa paghuhulit nin “katalingkasan sa mga nabihag,” an mga lingkod nin Dios sa modernong panahon nakagibo nin orog pa—na inabot an minilyon sa bilog na kinaban.

10. Taano ta makalalaom kita na an dugang pa asin orog na dakulang katalingkasan makakamtan?

¹⁰ Alagad girumdomon na kan enot na siglo nagpoon an dugang pang pagkatalingkas kan Pentecostes 33 C.E. Duman an Kristianong Jubileo nagpoon para sa “sadangoton na aripompon” na patatawadon sa saindang mga kasalan, na minagiya pasiring sa saindang pagigin “mga aki nin Dios” sa langit. Kumusta man sa satong panahon? An minilyon daw na ibang maimbod na Kristiano puwedeng makabutas sa pagkaoripon sa kasalan asin sa siring magselebrar nin dakulang Jubileo? Iyo, asin ipinarisa ini ni apostol Pedro kan sia magtaram manongod sa “panahon nin pagbabalik kan gabos na bagay na isinabi nin Dios paagi sa ngoso kan saiyang banal na mga propeta kan suanoy na panahon.”—Gibo 3:21.

Sarong Jubileo Para sa Minilyon

11. Paano an Levitico kapitulo 25 nagsusuherir na makalalaom kita sa katalingkasan na bako sanang para sa espirituwal na Israel?

¹¹ Mahalagang mangnohon na makaduwa sa Levitico kapitulo 25 ipinagirumdom sa mga Israelitas na sa punto-de-vista ni Jehova sinda saiyang “mga oripon” na kinalda nia hale sa Egipto. (Bersikulo 42 asin 55) An kapitulong ini sa Jubileo nasasabihan man an “mga nakikihimanwa” asin ‘estranghero sa tanga ninda.’ An mga iyan katimbang ngonyan kan “dakulang kadaklan” na nakiiiba sa espirituwal na mga Israelitas sa pagbalangibog kan Kristianong maogmang bareta.

12. Poon kan 1935, ano an maogmang nangyayari?

¹² Poon kan 1935 dinara kan “marahay na pastor” na si Jesu-Cristo sa aktibong pakikiasosyar sa linahidan na natatada an mga inapod niang “ibang karnero.” An mga ini kaipuhan na “darahon” nia, asin sinda magigin “sarong aripompon” na sakop nin “sarong pastor.” (Juan 10:16) An “ibang karnero” may kabilangan na ngonyan na minilyon. Kun kabilang kamo sa maogmang kadaklan na iyan, kamo ibinibilang nang matanos bilang katood nin Dios, asin bilang kabtang kan mga linalang na tawo, kamo naglalaom na ‘mabutasan hale sa kaoripnan nin kalapaan’ sa nagdadangadang na “mga panahon nin pagbabalik kan gabos na bagay” sa daga. Ini bakong paglaom na napasala sana.—Roma 8:19-21; Gibo 3:20, 21.

13. Anong partikular na bendisyon an maninigo niatong marisa na nangyayari pakalihis kan “dakulang kahorasaan”?

¹³ Pagkaheling ni apostol Juan sa 144,000 na nagkakamit kan Kristianong Jubileo na may langitnon na kaaabtan, ilinadawan nia an “dakulang kadaklan,” na an sabi: “An mga ini an nagluwas sa dakulang kahorasaan, asin hinugasan ninda an saindang mga gubing asin pinaputi iyan sa dugo kan Kordero. Kaya ngani sinda yaon sa atubang kan trono nin Dios; asin sinda nagtatao sa saiya nin banal na paglilingkod aldaw asin banggi sa saiyang templo.”—Kapahayagan 7:14, 15.

14, 15. Taano an mga kabilang sa “dakulang kadaklan” ta may espesyal na dahelan na maggayagaya ngonyan?

¹⁴ Dawa ngonyan, bago an dakulang kahorasaan, an mga ini naggigibo na nin pagtubod sa pinabolos na dugo ni Cristo asin sa siring nakikinabang sa saiyang kagadanan bilang atang. Naggagayagaya man sinda sa pakatalingkas sa Dakulang Babilonya, sa pagkaigwa nin marahay na konsensia sa atubangan ni Jehova Dios, asin sa saindang pribilehiyo na makikabtang sa kaotoban kan Mateo 24:14 paagi sa paghuhulit kan maogmang bareta kan Kahadean bago dumatong an katapusan.

¹⁵ Minsan siring, kumusta man an paglaom kan dakulang kadaklan na makatalingkas sa minanang kasalan asin pagkabakong sangkap? Harani na daw an panahon na iyan? May marahay na dahelan kita sa pagtubod na kaibanan pa niato an iba sa kapag-arakian nin katawohan na ihinula ni Jesu-Cristo na dai malihis sagkod na maotob an gabos na ihinula. (Mateo 24:34) Kaya, an katapusan kan “pagtatapos kan palakaw nin mga bagay” seguradong haranihon na.—Mateo 24:3.

Tampok na mga Kabtang kan Kristianong Jubileo

16. Ano an kamugtakan niato sa pagkaotob kan katuyohan nin Dios, asin ano an natatagama sa ngapit?

¹⁶ “An ralaban kan dakulang aldaw nin Dios na Makakamhan sa gabos” nagdadangadang na, asin an natatada sa “sadangoton na aripompon,” saka an “dakulang kadaklan” kan saindang maimbod na kairiba magdadanay sa integridad ki Jehova Dios asin naglalaom sa pagkakamit nin banal na proteksion. May kaigotan nindang inaantisipar an mapanronot na pagdaog ni Jehova sa gabos na hukbo kan kaiwal, para sa pagkabindikar sa saiya bilang an Unibersal na Soberano. Ini magigin tampok nanggad na kabtang kan saindang pagkakamit nin Kristianong katalingkasan!—Kapahayagan 16:14; 19:19-21; Habacuc 2:3.

17. Paano an minilyon pa mag-aako nin katalingkasan sa sarong dakulang Jubileo?

¹⁷ An paghade kan mapangganang Hadeng Jesu-Cristo sa nalinigan nang daga masunod, na naestablisar giraray an unibersal na soberaniya ni Jehova, asin si Jesu-Cristo an biyong namamahala sa daga bilang Hade nin mga hade asin Kagurangnan nin mga kagurangnan. Dangan direkta niang iaaplikar an merito kan saiyang atang sa minilyon na tawo, kaiba na an binuhay liwat na mga gadan, na nagtutubod asin boluntad na nag-aako kan kapatawadan sa mga kasalan na itatao nin Dios paagi ki Cristo. Ini mahahayag sa pagpahid nin Dios sa “gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.” (Kapahayagan 21:3, 4) Kun iyan bakong tunay na katalingkasan, ano pa?

18. Kabaing kan sarong kabtang kan suanoy na Jubileo, ano an mangyayari sa daga sa bagong palakaw?

¹⁸ Dugang pa, an daga dai na pamamahalaan, aatian, asin raraoton nin paslong mga indibiduwal, korporasyon, asin gobyerno nin tawo. (Kapahayagan 11:18) Imbes, iyan isusulit sa tunay na mga parasamba. Itatao sainda an makawiwiling trabaho na makikabtang sa literal na pag-otob sa hula ni Isaias: “Sinda siertong magtotogdok nin mga harong asin mag-oontok sinda dian; asin siertong magtatanom sinda nin mga ubasan asin kakakanon ninda an bunga kaiyan. Dai sinda magtotogdok asin iba an mag-oontok; dai sinda matanom asin iba an makakan . . . Dai sinda magpapagal na mayong kapakanan, ni mangangaki man sinda para sa karibokan; huli ta sinda an mga aki na kompuwesto kan mga pinili ni Jehova.” (Isaias 65:21-25) Sa katapusan kan Milenyal na Paghade, an gabos na gira nin minanang kasalan asin pagkabakong sangkap napara na asin an mga maimbod nin Dios sa daga magseselebrar kan lubos na kulminasyon na matatapusan kan Jubileo. Kaya an katalingkasan na ipinanganino kan Jubileo nahaman na.—Efeso 1:10.

Pakalihis kan Milenyal na Kulminasyon kan Jubileo

19, 20. Paano si Satanas asin an mga demonyo maprobar na olangon an mga bendisyon na bunga kan Milenyal na Jubileo, alagad may anong resulta?

¹⁹ Ihinuhula kan Kapahayagan 20:1-3 na si Satanas na Diablo, poon nin mga demonyo, daing magiginibo sa laog kan sangribong taon na paghade ni Cristo sa katawohan. Kun, sa katapusan kan Milenyo, an Diablo asin an saiyang mga demonyo togotan na lumuwas sa halipot na panahon, maheheling kan maraot na mga espiritung ini an daga, bakong sa kamugtakan na binayaan ninda, kundi bilang dai ikaladawan, magayon, panglobong paraiso. Maheheling ninda an daga na iniistaran kan maimbod na “dakulang kadaklan” asin kan binilyon na mga tawong binuhay liwat na para sa sainda si Jesu-Cristo nagadan bilang pantubos na atang. Sa katapusan kan Milenyo, naotob na kan Kristianong Jubileo an katuyohan kaiyan na lubos na ikatalingkas an katawohan sa mga epekto nin kasalan. (Roma 8:21) Makasosopog nanggad para sa siisay man na probaran na raoton an marahay na kamugtakan na iyan! Alagad sa pagtogot kan makakamhan sa gabos na Dios, an Diablo magibo nin ultimong pagprobar na gibohon ini, asin sia masalakay na may desesperadong kapaitan. Ini an nasusurat sa Kapahayagan 20:7-10, 14:

²⁰ “Ngonyan pakatapos tolos kan sangribong taon, si Satanas paluluwason sa saiyang bilanggoan, asin sia maluwas tanganing mandaya sa mga nasyon sa apat na kanto kan daga, ki Gog asin Magog, tanganing tiriponon sinda para sa ralaban. An kabilangan kan mga ini siring kadakol kan mga baybay kan dagat. Asin sinda nagturukad sa kahiwasan kan daga asin pinalibotan ninda an kampo kan mga banal asin an mahal na siudad. Alagad an kalayo naholog hale sa langit asin tinunaw sinda. Asin an Diablo na nandadaya sa sainda iinapon sa danaw nin kalayo asin asupre.”

21. Pagkatapos kan Kristianong Jubileo kadungan kan Milenyo, anong reaksion kan langitnon na mga aki nin Dios an magpapagirumdom kan Job 38:7?

²¹ An tunay na katalingkasan, na pinapangyari kan areglo nin Jubileo, padagos na kakamtan sa gabos na lugar; an gabos na linalang magigin talingkas asin mag-oomaw sa Saro na solamenteng nagdadara kan ngaran na Jehova. (Salmo 83:18) Iyan magigin totoo mantang padagos na inootob ni Jehova an saiyang mga katuyohan sa bilog na uniberso. Kan lalangon an daga, bago ibugtak dian an katawohan, “an mga bitoon nin kaagahan maogmang nagkururahaw, asin an gabos na aki nin Dios nagkururahaw sa pag-omaw” sa magayon na naheling ninda. (Job 38:7) Gurano pa na sinda orog na magibo kaiyan kun maheling na an daga pano nin mga lalaki asin babae na nagpaheling asin pinatunayan an lubos nindang pagdusay asin integridad sa Dios na makakamhan sa gabos.

22. Ano an maninigong magin kaisipan niato, kaoyon sa sadol na nasa Salmo 150:1-6?

²² Mantang nakonsiderar na an gabos na bagay sa liwanag kan nakasusulang sirang sa Kasuratan, mayo kita nin ibang magigibo kundi boluntad na maggayagaya kaiba kan kalangitan asin magsabi, Aleluya! Ini an sadol sa sato na konklusyon sa librong Mga Salmo: “Aleluya. Omawa nindo an Dios sa Saiyang santuaryo; omawa nindo Sia sa langit, an Saiyang kuta. Omawa nindo Sia huli sa Saiyang makakamhan na mga gibo; omawa nindo Sia huli sa Saiyang labi-labing kadakulaan. Omawa nindo Sia paagi sa mga pagpatanog sa amodyong; omawa nindo Sia paagi sa arpa asin lira. Omawa nindo Sia paagi sa pandereta asin bayle; omawa nindo Sia paagi sa laud asin plauta. Omawa nindo Sia paagi sa nag-aaningal na mga simbalo; omawa nindo Sia paagi sa maugong na mga simbalo. An gabos logod na naghahangos mag-omaw sa KAGURANGNAN. Aleluya.”—Salmo 150:1-6, Tanakh Bible (1985), Jewish Publication Society of America.

[Mga Nota sa Ibaba]

Ano an Isisimbag Nindo?

◻ Sa ano nakabutas an mga disipulo ni Jesus kan Pentecostes 33 C.E., na nagin tanda kan kapinonan nin ano para sa sainda?

◻ Taano ta may dahelan na maglaom sa katalingkasan na orog kisa nangyari kan enot na siglo?

◻ Anong klaseng katalingkasan an nangyayari poon kan 1919?

◻ Paano asin noarin makikinabang an “ibang karnero” sa dakulang Jubileo?

◻ Pakalihis kan kulminasyon kan Jubileo, ano an magigin kamugtakan kan daga?

[Ritrato sa pahina 15]

An katalingkasan ibinalangibog sa Cedar Point, kan 1919

[Ritrato sa pahina 16]

An “ibang karnero” nakikikabtang sa Milenyal na Jubileo