Magdanay na Dayupot ki Jehova

“Magmaigot sa pamibi.”​—ROMA 12:12.

1. Ano an kabotan ni Jehova manongod sa pamibi, asin anong sadol an itinao ni apostol Pablo manongod sa pamibi?

SI Jehova iyo an “Dios na nagtatao nin paglaom” sa gabos sa saiyang maimbod na banwaan. Bilang an “Paradangog nin pamibi,” hinihinanyog nia an saindang mga pag-arang nin tabang tanganing maabot an magayagayang paglaom na ibinugtak nia sa saindang atubangan. (Roma 15:13; Salmo 65:2) Asin paagi sa saiyang Tataramon, an Biblia, dinadagka nia an gabos niang lingkod na dumolok sa saiya sa ano man na oras na boot ninda. Sia perming yaon, na nagmamawot na akoon an saindang mga kahaditan sa kairairaromi kan saindang boot. An totoo, sinasadol nia sinda na “magmaigot sa pamibi” asin “mamibi nin daing ontok.”a (Roma 12:12; 1 Tesalonica 5:17) Kabotan ni Jehova na an gabos na Kristiano daing ontok na mag-apod sa saiya sa pamibi, na ilinuluwas sa saiya an gabos na laog kan saindang puso asin ginigibo iyan sa ngaran kan saiyang namomotan na Aki, si Jesu-Cristo.​—Juan 14:​6, 13, 14.

2, 3. (a) Taano ta sinadol kita nin Dios na “magmaigot sa pamibi”? (b) Ano an garantiya niato na boot nin Dios na kita mamibi?

² Taano ta tinatawan kita nin Dios kan sadol na ini? Huli ta an mga problema asin paninimbagan sa buhay puwedeng makapagabat nin labi-labi sa sato kaya puwedeng malingawan na niatong mamibi. O tibaad dai na niato makaya an mga problema asin umontok na kita sa paggayagaya sa paglaom asin sa pamimibi. Huli sa mga bagay na ini, kaipuhan niato an mga pagirumdom na nagsasadol sato na mamibi asin makidayupot na marhay sa gikanan nin tabang asin karangahan, si Jehova na satuyang Dios.

³ An disipulong si Santiago nagsurat: “Rumani kamo sa Dios, asin sia marani sa saindo.” (Santiago 4:8) Iyo, an Dios bakong halangkawon ni harayoon tanganing madangog an satuyang mga kapahayagan sa saiya, sa ibong kan satong bakong sangkap na kamugtakan bilang tawo. (Gibo 17:27) Saro pa, sia bakong indiperente asin daing pagmakolog. Sabi kan salmista: “An mga mata ni Jehova nakatorohok sa mga matanos, asin an saiyang mga talinga nagdadangog sa saindang mga pag-agrangay.”​—Salmo 34:15; 1 Pedro 3:12.

4. Paano ikaiilustrar an pag-atento ni Jehova sa pamibi?

⁴ Si Jehova nangingimbitar sato na mamibi. Ikakokomparar niato ini sa sarong katiriponan na dian nag-oorolay-olay an nagkapira. Yaon kamo duman, na naghihinanyog sa mga sinasabi nin iba. An katongdan nindo paramasid. Pero may nag-atubang saindo, sinabi an saindong ngaran, asin ipinatungkol sa saindo an saiyang mga tataramon. Ini nakaaapod kan saindong atension sa espesyal na paagi. Kaagid kaiyan, an Dios perming nagtatao nin atension sa saiyang banwaan, saen man sinda. (2 Cronica 16:9; Talinhaga 15:3) Kaya nadadangog nia an satong mga tataramon, na garo may pagprotehir asin interes na nagmamasid. Pero kun inaapod niato an ngaran nin Dios sa pamibi, naaapod an saiyang atension, asin sia ngonyan nakatorohok sa sato sa espisipikong paagi. Paagi sa saiyang kapangyarihan, kaya nganing marisa asin masabotan ni Jehova an dai ikinasasabing pakimaherak nin tawo na idinodolot sa natatagong kairaroman kan saiyang puso asin isip. Ipinanunuga sato nin Dios na sia marani sa gabos na odok na nag-aapod sa saiyang ngaran asin naghihingoang makidayupot sa saiya.​—Salmo 145:18.

Simbag na Oyon sa Katuyohan nin Dios

5. (a) Ano an ipinaririsa kan hatol na “magmaigot sa pamibi” manongod sa satong mga pamibi? (b) Paano sinisimbag nin Dios an mga pamibi?

⁵ An hatol na magmaigot sa pamibi nagpaparisa na may beses na tibaad itogot ni Jehova na kita haloy-haloy na daing ontok na mamibi manongod sa sarong bagay bago mahayag an saiyang simbag. Tibaad may tendensia pa ngani kitang mapagal sa pakimaherak sa Dios para sa pabor o mamomoton na kabootan na garo baga kaipuhan na marhay pero naaatraso. Kaya, ipinakikiolay sato ni Jehova Dios na dai padara sa siring na tendensia kundi padagos na mamibi. Maninigo na kita magpadagos na makimaherak sa saiya manongod sa satong mga kahaditan, na nagkokompiar na saiyang iginagalang an satong pamibi asin paninigoan an tunay niatong pangangaipo, bako sanang an nabilog sa satong isip. Daing duwa-duwa na tinitimbang ni Jehova Dios an satong mga kahagadan sono sa saiyang katuyohan. Halimbawa, an iba tibaad apektado kan satong kahagadan. Puwede niatong ibaing an bagay sa ama na an aki naghagad saiya nin bisikleta. Aram kan ama na kun ibabakal nia nin bisikleta an aking iyan, an saro pa niang aki mahagad man. Mantang an sarong aki tibaad akion pa para sa bisikleta, tibaad magdesisyon an ama na dai bumakal sa panahon na iyan. Sa kaagid na paagi, sa liwanag kan saiyang katuyohan asin iskedyul sa mga bagay, an satong langitnon na Ama nagdedesisyon kun ano an tunay na pinakamarahay para sa sato asin sa iba.​—Salmo 84:​8, 11; ikomparar an Habacuc 2:3.

6. Anong ilustrasyon an itinao ni Jesus manongod sa pamibi, asin ano an ipinaheheling kan kaigotan sa pamibi?

⁶ Marahay na mangnohon an ilustrasyon na itinao ni Jesus manongod sa pangangaipo kan saiyang mga disipulo na “danay na mamibi asin dai manluya.” An sarong balo, na dai nagkamit nin hustisya, nagmaigot sa saiyang paghagad sa sarong hokom na tawo sagkod na sa katapustapusi nag-ako sia nin hustisya. Idinugang ni Jesus: “Sierto nanggad, kun siring, dai daw papangyayarihon nin Dios na magibo an hustisya para sa saiyang mga pinili?” (Lucas 18:​1-7) An pagmamaigot sa pamibi nagpapaheling kan satong pagtubod, kan satong pagsarig ki Jehova, kan satong pagmawot na magdanay na dayupot sa saiya asin ipahayag an satong pakimaherak, na ipinamamahala sa saiya an resulta.​—Hebreo 11:6.

Mga Halimbawa nin Pagdadanay na Dayupot ki Jehova

7. Paano niato maaarog an pagtubod ni Abel sa pagdadanay na dayupot ki Jehova?

⁷ An Biblia abunda sa mga tala nin pamibi na ipinahayag nin mga lingkod nin Dios. An mga ini “isinurat sa pagtokdo sato, tanganing paagi sa satong pakatagal asin sa karangahan hale sa Kasuratan magkaigwa kita nin paglaom.” (Roma 15:4) Naparirigon an satong paglaom kan pagkonsiderar niato sa pirang halimbawa nin mga nagdanay na dayupot ki Jehova. Si Abel nagdolot nin inaakong atang sa Dios, asin minsan ngani mayo nin natatalang pamibi, daing duda na sia nakimaherak ki Jehova sa pamibi na akoon logod an saiyang dolot. An Hebreo 11:4 nagsasabi: “Huli sa pagtubod si Abel nagdolot nin atang sa Dios na orog na mahalaga kisa ki Cain, na paagi sa pagtubod na iyan nag-ako sia nin patotoo na sia matanos.” Aram ni Abel an panuga nin Dios sa Genesis 3:​15, pero kun ikokomparar sa aram na niato ngonyan, kakadikit kan aram nia. Pero, si Abel naghiro oyon sa kaaraman na nasa saiya. Kaya ngonyan, an iba sa bagong mga interesado sa katotoohan nin Dios mayo pa nin dakol na kaaraman, pero sinda namimibi asin ginagamit sa pinakamarahay na paagi an kaaraman ninda, arog ni Abel. Iyo, sinda minahiro oyon sa pagtubod.

8. Taano ta makasisierto kita na si Abraham nagdanay na dayupot ki Jehova, asin anong hapot an maninigong ihapot niato sa satong sadiri?

⁸ An saro pang maimbod na lingkod nin Dios iyo si Abraham, an “ama kan gabos na igwa nin pagtubod.” (Roma 4:11) Ngonyan, orog kisa kasuarin pa man, kaipuhan niato an marigon na pagtubod, asin kaipuhan na kita mamibi na may pagtubod, arog ni Abraham. An Genesis 12:8 nagsasabi na sia nagtogdok nin altar “ki Jehova asin nagpoon na mag-apod sa ngaran ni Jehova.” Midbid ni Abraham an ngaran nin Dios asin ginamit iyan sa pamibi. Paorootro siang odok na nagmaigot sa pamibi, na nag-aapod “sa ngaran ni Jehova na Dios na daing kapinonan asin daing katapusan.” (Genesis 13:4; 21:33) Si Abraham nag-aapod sa Dios sa pagtubod na ikinabantog nia. (Hebreo 11:​17-19) An pamibi nakatabang ki Abraham na padagos na maggayagaya nin makuri sa paglaom sa Kahadean. Inaarog daw niato an halimbawa ni Abraham sa pagmamaigot sa pamibi?

9. (a) Taano ta may dakulang pakinabang sa banwaan nin Dios ngonyan an mga pamibi ni David? (b) Ano an tibaad ibunga kan satong pamimibi arog ni David tanganing magdanay na dayupot ki Jehova?

⁹ Si David pambihira kun manongod sa pagmamaigot sa pamibi, asin an saiyang mga salmo nag-iilustrar kun maninigong magin ano an mga pamibi. Halimbawa, an mga lingkod nin Dios puwedeng mamibi para sa mga bagay na arog nin kaligtasan o pagkakalda (3:​7, 8; 60:5), paggiya (25:​4, 5), proteksion (17:8), kapatawadan sa mga kasalan (25:​7, 11, 18), asin dalisay na puso (51:10). Kan nasasakitan si David, sia namibi: “Papaggayagayaha an kalag kan saimong oripon.” (86:4) Puwede man kitang mag-arang nin kagayagayahan sa puso, sa pakaaram na minamawot ni Jehova na kita maggayagaya sa satong paglaom. Si David nagdanay na dayupot ki Jehova asin namibi: “An sakuyang kalag dayupot na nagsusunod sa saimo; an too mong kamot marigon na nangangapot sa sako.” (63:8) Kita daw magdadanay na dayupot ki Jehova, arog ni David? Kun iyo, tatabangan man nia kita.

10. May panahon na ano an nagin salang kaisipan kan salmistang si Asaf, alagad ta ano an narealisar nia?

¹⁰ Tangani kitang magdanay na dayupot ki Jehova, kaipuhan na likayan niatong mauri sa mga maraot huli sa saindang daing iniintindi asin materyalistikong pamumuhay. May panahon na an salmistang si Asaf nagsaboot na daing halaga an maglingkod ki Jehova, huli ta an mga maraot “nasa kapasilan sagkod noarin pa man.” Pero, namansayan nia na sala an saiyang pangangatanosan asin na an mga maraot nasa “dagang mahalnas.” Narealisar nia na mayo nin maorog pa sa pagdadanay na dayupot ki Jehova, asin ipinahayag nia sa Dios an saiyang saboot nin arog kaini: “Ako danay na nasa kaibanan mo; kinapotan mo an too kong kamot. Huli ta, uya! an mismong minaharayo sa saimo magkakaparara. . . . Alagad kun para sa sako, an pagrani sa Dios marahay para sa sako. Ibinugtak ko sa Soberanong Kagurangnan na Jehova an sakuyang pailihan, tanganing ipahayag an gabos mong mga gibo.” (Salmo 73:​12, 13, 18, 23, 27, 28) Imbes na mauri sa daing iniintinding buhay kan mga maraot, kan mga tawong daing paglaom, arogon niato si Asaf sa pagdadanay na dayupot ki Jehova.

11. Taano ta marahay na halimbawa si Daniel sa pagdadanay na dayupot ki Jehova, asin paano niato sia maaarog?

¹¹ Si Daniel desididong nagmaigot sa pamibi, dawa sa atubang kan peligro na iholog sa lungib nin mga leon huli sa paglapas sa opisyal na mga pangangalad na mamibi. Alagad si Jehova “nagsugo kan saiyang anghel asin pinintoan an ngoso kan mga leon,” na ilinigtas si Daniel. (Daniel 6:​7-10, 22, 27) Dakulaon an bendisyon ki Daniel huli sa saiyang pagmamaigot sa pamibi. Kita man daw nagmamaigot sa pamibi, nangorogna kun napapaatubang sa pagtumang sa satong paghuhulit kan Kahadean?

Si Jesus, an Satong Arogan

12. (a) Sa kapinonan kan saiyang ministeryo, anong halimbawa an itinao ni Jesus mapadapit sa pamibi, asin paano ini mapakikinabangan nin mga Kristiano? (b) Ano an ihinahayag kan arogan na pamibi ni Jesus manongod sa pamibi?

¹² Sa mismong kapinonan kan saiyang ministeryo sa daga, si Jesus maheheling na namimibi. An saiyang pamimibi mantang binabautismohan nagtao nin marahay na halimbawa sa mga binabautismohan sa tubig sa modernong mga panahon. (Lucas 3:​21, 22) An saro puwedeng arangon an tabang nin Dios na maotob an isinisimbolo kan bautismo sa tubig. Tinabangan man ni Jesus an iba na dumolok ki Jehova sa pamibi. Sarong beses na si Jesus yaon sa sarong lugar na namimibi, an saro sa saiyang mga disipulo nagsabi sa saiya pagkatapos: “Kagurangnan, tokdoi kaming mamibi.” Dangan isinabi ni Jesus an inaapod nin kadaklan na arogan na pamibi, na dian ipinaheheling kan pagkasunodsunod nin tema na maninigong ipaorog an ngaran asin katuyohan nin Dios. (Lucas 11:​1-4) Kaya, sa satong mga pamibi kaipuhan na papagdanayon niato an malinaw na kaisipan asin pagkatimbang, na dai napababayaan an “orog na mahalagang mga bagay.” (Filipos 1:​9, 10) Siyempre, may mga panahon nin espesyal na pangangaipo o kun kaipuhan na asikasohon an sarong espisipikong problema. Arog ni Jesus, an mga Kristiano puwedeng dumolok sa Dios sa pamibi sa paghagad nin kosog na maotob an mga asignasyon o maatubang an partikular na mga pagbalo o peligro. (Mateo 26:​36-44) An totoo, puwedeng iiba sa personal na mga pamibi an haros gabos na kabtang nin buhay.

13. Paano ipinaheling ni Jesus an halaga nin pamimibi para sa iba?

¹³ Sa saiyang marahay na halimbawa, ipinaheling ni Jesus an halaga nin pamimibi para sa iba. Aram nia na an saiyang mga disipulo ikaoongis asin paglalamagon, arog nia. (Juan 15:​18-20; 1 Pedro 5:9) Kaya hinagad nia sa Dios na ‘bantayan sinda huli sa maraot.’ (Juan 17:​9, 11, 15, 20) Asin huling aram an espesyal na pagbalo na maabot ki Pedro, sia sinabihan nia: “Nakimaherak na ako para sa saimo na an saimong pagtubod dai madaog.” (Lucas 22:32) Kapakipakinabang nanggad kun kita man magmamaigot sa pamimibi para sa satong mga tugang, na iniisip an iba asin bako sanang an sadiri niatong mga problema asin interes!​—Filipos 2:4; Colosas 1:​9, 10.

14. Paano niato naaaraman na si Jesus nagdanay na dayupot na gayo ki Jehova sa bilog niang ministeryo sa daga, asin paano niato sia maaarog?

¹⁴ Sa bilog niang ministeryo, si Jesus nagmaigot sa pamibi, na nagdadanay na dayupot ki Jehova. (Hebreo 5:​7-10) Si apostol Pedro, sa Gibo 2:​25-28, kinotar an Salmo 16:8 asin iinaaplikar iyan sa Kagurangnan na si Jesu-Cristo: “Si David nagtataram mapadapit sa saiya, ‘Si Jehova danay na nasa atubang kan sakong mga mata; huli ta sia yaon sa sakong too tanganing ako dai noarin man matanyog.” Magigibo man niato an arog kaiyan. Puwede niatong ipamibi na an Dios magin dayupot sa sato, asin ikapaheheling niato an satong pagsarig ki Jehova paagi sa danay na pagbugtak sa saiya paagi sa satong isip sa atubang kan satong mga mata. (Ikomparar an Salmo 110:5; Isaias 41:​10, 13.) Sa siring malilikayan niato an gabos na klaseng kasakitan, huli ta tatabangan kita ni Jehova, asin nungka na kita magrurupaydupay.

15. (a) Mapadapit sa ano na dai kita noarin man maninigong magkulang sa pagmamaigot sa pamibi? (b) Anong patanid an itinao manongod sa satong pagpapasalamat?

¹⁵ Logod dai kita noarin man magkulang sa pagpasalamat ki Jehova para sa gabos niang karahayan sa sato, iyo, an “labi-labing dai na kutana maninigong kabootan nin Dios,” na dian kaiba an balaog kan saiyang Aki bilang pantubos na atang sa satong mga kasalan. (2 Corinto 9:​14, 15; Marcos 10:45; Juan 3:16; Roma 8:32; 1 Juan 4:​9, 10) Iyo, sa ngaran ni Jesus, ‘danay na magpasalamat para sa gabos na bagay sa satong Dios asin Ama.’ (Efeso 5:​19, 20; Colosas 4:2; 1 Tesalonica 5:18) Kaipuhan kitang magmaan na dai pabayaan na umalsom an satong pagpasalamat sa mga bagay na nasa sato huli ta preokupado kitang marhay sa kun ano an mayo sato o sa satong personal na mga problema.

Pagbugtak kan Satong Pasan ki Jehova

16. Kun may problemang nakariribok sa sato, ano an maninigo niatong gibohon?

¹⁶ An kaigotan sa pamibi nagpapaheling kan satong hararom na debosyon. Kun kita nag-aapod sa Dios, marahay an epekto sa sato dawa bago umabot an simbag hale sa saiya. Kun may problema na nagpaparibok sa satong isip, makapagdadanay kitang dayupot ki Jehova paagi sa pagsunod sa hatol na: “Bugtakan an saimong pasan ki Jehova mismo, asin sia matabang sa saimo.” (Salmo 55:22) Paagi sa pagbugtak kan satong mga pasan​—mga kapurisawan, kahaditan, kamondoan, pagkatakot, asin iba pa—​sa Dios, na may lubos na pagtubod sa saiya, aakoon niato an kalmadong puso, “an katoninongan nin Dios na minalampas sa gabos na kaisipan.”​—Filipos 4:​4, 7; Salmo 68:19; Marcos 11:24; 1 Pedro 5:7.

17. Paano niato kakamtan an katoninongan nin Dios?

¹⁷ Minaabot daw nin bigla an katoninongan na ini nin Dios? Minsan ngani tibaad makaginhawa tolos kita, an isinabi ni Jesus manongod sa pamimibi para sa banal na espiritu totoo man digdi: “Padagos kamong maghagad, asin iyan itatao sa saindo; padagos kamong maghanap, asin iyan makukua nindo; padagos kamong magtoktok, asin iyan bubukasan para sa saindo.” (Lucas 11:​9-13) Mantang an banal na espiritu iyo an paagi na satong hinahale an kapurisawan, kaipuhan na magmaigot kita sa paghagad kan katoninongan nin Dios asin kan saiyang tabang mapadapit sa satong mga pasan. Makasisierto kita na paagi sa pagmamaigot sa pamibi, kakamtan niato an minamawot na kaginhawahan asin pagkakalmado sa puso.

18. Ano an ginigibo ni Jehova para sa sato kun dai niato aram nin eksakto kun ano an ipamimibi sa sarong situwasyon?

¹⁸ Alagad ano kun dai niato aram nin eksakto kun ano an ipamimibi niato? An satong panlaog na mga agrangay parateng dai ikinakapahayag huli ta dai niato lubos na nasasabotan an satong kamugtakan, o dai niato aram kun ano an iaatubang ki Jehova. Digdi makapangongoltanan an banal na espiritu para sa sato. Si Pablo nagsurat: “An problema sa kun ano an maninigo niatong ipamibi siring sa pangangaipo niato dai niato aram, alagad an espiritu mismo nakikimaherak sa sato paagi sa mga pag-agrangay na dai masabi.” (Roma 8:26) Paano? Sa Tataramon nin Dios yaon an ipinasabong na mga hula asin pamibi na may koneksion sa satong situwasyon. Itinotogot nia na an mga ini iyo an garo mangoltanan para sa sato. Inaako nia an mga ini bilang iyo an aarangon niato kun aram ta sana an kahulogan kaiyan sa kaso niato, kaya inootob nia iyan.

An Pamibi Asin Paglaom Magpapadagos

19. Taano ta magpapadagos sagkod lamang an pamibi asin paglaom?

¹⁹ An pamibi sa satong langitnon na Ama magpapadagos sagkod lamang, nangorogna mapadapit sa pagpapasalamat sa bagong kinaban asin sa gabos na bendisyon kaiyan. (Isaias 65:24; Kapahayagan 21:5) Magpapadagos man kitang maggayagaya sa paglaom, ta magdadanay sagkod lamang an paglaom. (Ikomparar an 1 Corinto 13:13.) Dai niato kayang imahinaron kun anong bagong mga bagay an paluluwason ni Jehova kun sia mayo na sa irarom kan sadiri niang ibinugtak na kapahingaloan nin Sabbath mapadapit sa daga. (Genesis 2:​2, 3) Sagkod lamang, may tagama siang mamomoton na mga sorpresa sa saiyang banwaan, asin an ngapit may tagamang makangangalas na mga bagay para sa sainda sa pag-otob kan saiyang kabotan.

20. Ano an maninigong magin determinasyon niato, asin taano?

²⁰ Mantang nasa enotan niato an siring kaogmang paglaom, kita logod gabos magdanay na dayupot ki Jehova paagi sa pagmamaigot sa pamibi. Logod dai kita noarin man umontok sa pagpasalamat sa satong langitnon na Ama para sa gabos na bendisyon sa satuya. Sa igong panahon an satong mga linalaoman magayagayang maootob, na labi pa sa naimahinar o hinahalat niato, huli ta si Jehova “makagigibo nin labi kaorog sa gabos na bagay na satong hinahagad o naiisip.” (Efeso 3:20) Kaya, huli kaini, itao niato an gabos na kaomawan asin kamurawayan patin pasasalamat sagkod lamang ki Jehova na satuyang Dios, an “Paradangog nin pamibi”!

[Nota sa Ibaba]

Ano an Isisimbag Nindo?

◻ Taano ta kaipuhan kitang magmaigot sa pamibi?

◻ Ano an nanonodan niato sa mga halimbawa sa pamibi kaidtong panahon bago Kristiano?

◻ Ano an itinotokdo sato kan halimbawa ni Jesus manongod sa pamibi?

◻ Paano niato ikabubugtak an satong mga pasan ki Jehova asin may anong resulta?