“Magin Malaad sa Espiritu”

“Dai kamo maghinugak sa saindong gibohon. Magin malaad sa espiritu. Magpaoripon ki Jehova.”—ROMA 12:11.

 1. Taano ta an mga Israelita nag-atang nin mga hayop asin nagtao nin iba pang dolot?

PINAPAHALAGAN ni Jehova an gikan sa boot na mga atang kan saiyang mga lingkod tanganing ipahayag an saindang pagkamoot sa saiya asin an saindang pagpasakop sa saiyang kabotan. Kan suanoy na mga panahon, inako nia an manlaenlaen na atang na hayop asin iba pang dolot. Ginigibo ini segun sa Ley ni Moises kan mga Israelita na gustong magkamit nin kapatawadan sa mga kasalan asin magpahayag kan saindang pagpasalamat. Sa Kristianong kongregasyon, bakong kahagadan ni Jehova na kita magdolot nin siring na pormal asin materyal na mga atang. Minsan siring, sa kapitulo 12 kan saiyang surat sa mga Kristiano sa Roma, ipinapaheling ni apostol Pablo na kita inaasahan pa man giraray na magdolot nin mga atang. Helingon niato kun paano.

Sarong Atang na Buhay

 2. Bilang mga Kristiano, paano kita namumuhay, asin ano an kalabot digdi?

² Basahon an Roma 12:1, 2. Sa naenot na kabtang kan saiyang surat, malinaw na ipinaheling ni Pablo na an linahidan na mga Kristiano, baga man Judio o Hentil, ipinahayag na matanos sa pagheling nin Dios paagi sa pagtubod, bakong sa mga gibo. (Roma 1:16; 3:20-24) Sa kapitulo 12, ipinaliwanag ni Pablo na maninigong ipaheling kan mga Kristiano an saindang pagpasalamat paagi sa mapagsakripisyong pamumuhay. Tanganing magibo iyan, dapat niatong bagohon an satong isip. Huli sa minanang pagkabakong sangkap, kita sakop kan “ley nin kasalan asin nin kagadanan.” (Roma 8:2) Kun siring, kaipuhan kitang “magin bago sa puersa na nagpapahiro sa [satong] isip,” paagi sa biyong pagbago sa satong mga tendensia. (Efe. 4:23) An siring na biyong pagbago puede sanang mangyari sa tabang nin Dios asin kan saiyang espiritu. Nangangaipo man iyan nin seryosong paghihingoa niato, na ginagamit an satong “kakayahan na mangatanosan.” Nangangahulogan iyan na ginigibo niato an satong pinakamakakaya na dai “magpamolde sa sistemang ini nin mga bagay” kaiba an maraot na moral, hababaon na klase nin aling-alingan, asin biribid na kaisipan kaiyan.—Efe. 2:1-3.

 3. Taano ta nakikikabtang kita sa Kristianong mga aktibidad?

³ Inaagda man kita ni Pablo na gamiton an satong “kakayahan na mangatanosan” tanganing mapatunayan niato sa satong sadiri kun ano “an marahay asin inaako patin sangkap na kabotan nin Dios.” Taano ta nagbabasa kita kan Biblia aroaldaw, naghohorophorop sa binasa niato, namimibi, nag-aatender sa Kristianong mga pagtiripon, asin nakikikabtang sa paghuhulit kan maogmang bareta kan Kahadean? Huli daw ta iyan an isinasadol sa sato kan mga magurang sa kongregasyon? Totoo, nagpapasalamat kita sa nakakatabang na mga pagirumdom kan kamagurangan. Alagad nakikikabtang kita sa Kristianong mga aktibidad huli ta pinapahiro kita kan espiritu nin Dios na ipaheling an satong odok sa pusong pagkamoot ki Jehova. Apuera kaini, kita personalmenteng kombensido na an paggibo kan siring na mga aktibidad kabotan nin Dios para sa sato. (Zac. 4:6; Efe. 5:10) Nagtatao sa sato nin dakulang kagayagayahan asin pagkakontento an pakaaram na paagi sa pamumuhay bilang tunay na Kristiano, puede kitang akoon nin Dios.

Laen-Laen na Balaog

4, 5. Paano maninigong gamiton kan Kristianong kamagurangan an saindang mga balaog?

⁴ Basahon an Roma 12:6-8, 11. Ipinaliwanag ni Pablo na “manlaenlaen an satong balaog sono sa dai na kutana maninigong kabootan na itinao sa sato.” An nagkapira sa mga balaog na sinambit ni Pablo—an pagsadol, pangengenot—nangorognang para sa Kristianong kamagurangan, na sinasadol na mangenot “nin odok sa boot.”

⁵ Sinabi ni Pablo na an iyo man sanang pagigin odok sa boot na iyan maninigong marisa sa kun paano an mga paraataman naglilingkod bilang mga paratokdo asin nagsasagibo nin ‘ministeryo.’ Garo baga ipinapaheling kan konteksto na an boot sabihon digdi ni Pablo iyo an ‘ministeryo’ na ginigibo sa laog kan kongregasyon, o kan “sarong hawak.” (Roma 12:4, 5) An ministeryong iyan kapareho kan nasambitan sa Gibo 6:4, na dian an apostol nagsabi: “Idudusay niamo an samong sadiri sa pamibi asin sa ministeryo kan tataramon.” Ano an kalabot sa siring na ministeryo? Ginagamit kan Kristianong kamagurangan an saindang mga balaog sa pagparigon sa mga miembro kan kongregasyon. Ipinapaheling ninda na ‘ginigibo ninda an ministeryong ini’ kun sinda odok na nagtatao sa kongregasyon nin paggiya asin instruksion basado sa Tataramon nin Dios paagi sa saindang may pamibing pag-adal, pagsiyasat, pagtokdo, asin pagsongko bilang pastor. Maninigong sadiosan na gamiton kan mga paraataman an saindang mga balaog asin “may kaogmahan” na asikasohon an mga karnero.—Roma 12:7, 8; 1 Ped. 5:1-3.

 6. Paano niato masusunod an itinaong hatol sa Roma 12:11, na iyo an pinakatemang teksto sa artikulong ini?

⁶ Si Pablo nagsabi pa: “Dai kamo maghinugak sa saindong gibohon. Magin malaad sa espiritu. Magpaoripon ki Jehova.” Kun marisa niato na may tendensia kitang maghinugak sa satong ministeryo, tibaad kaipuhan niatong bagohon an satong ugale sa pag-adal saka mas maigot asin mas parateng mamibi na hinahagad an espiritu ni Jehova, na makakatabang sa sato na labanan an ano man na pagigin gabinhod asin ikabalik an satong kaigotan. (Luc. 11:9, 13; Kap. 2:4; 3:14, 15, 19) Pinakosog kan banal na espiritu an enot na mga Kristiano na magtaram manongod sa “makangangalas na mga bagay nin Dios.” (Gibo 2:4, 11) Kaagid kaiyan, puede kitang pahiroon kaiyan na magin maigot sa ministeryo, na “magin malaad sa espiritu.”

Kapakumbabaan Asin Kababaan nin Boot

 7. Taano ta maninigo kitang maglingkod na may kapakumbabaan asin kababaan nin boot?

⁷ Basahon an Roma 12:3, 16. Dahel sa “dai na kutana maninigong kabootan” ni Jehova kaya igwa kita kan mga balaog na nasa sato. Si Pablo nagsabi sa iba pang kabtang: “An samong pagigin biyong kualipikado hale sa Dios.” (2 Cor. 3:5) Kun siring, dai niato maninigong omawon an satong sadiri. Maninigong mapakumbaba niatong midbidon na an ano man na puedeng kapangganahan niato sa satong ministeryo resulta kan bendisyon nin Dios, bakong kan satong sadiring kakayahan. (1 Cor. 3:6, 7) Kaoyon kaini, si Pablo nagsabi: “Sinasabihan ko an lambang saro dian sa saindo na dai mag-isip dapit sa saiyang sadiri nin orog kisa sa dapat isipon.” Kaipuhan na kita igwa nin paggalang sa sadiri asin makamate nin kagayagayahan asin pagkakontento sa satong paglilingkod sa Kahadean. Minsan siring, an pagigin hababa an boot, o pakaaram kan satong mga limitasyon, maolang sa sato na ipirit an sadiri niatong opinyon. Imbes, gusto niato na ‘mag-isip sa paagi na igwa nin toltol na isip.’

 8. Paano niato malilikayan na ‘mag-isip na kita mismo may pagmansay’?

⁸ Kamangmangan na ipaghambog niato an satong sadiring mga nagibo. ‘An Dios an nagpapatubo.’ (1 Cor. 3:7) Si Pablo nagsabi na an Dios nagtatao sa lambang miembro kan kongregasyon nin sarong “sokol nin pagtubod.” Imbes na mag-isip na kita nakakalabi, maninigo niatong midbidon na an nagigibo nin iba depende sa sokol nin pagtubod ninda. Si Pablo nagsabi pa: “Mag-isip kamo manongod sa iba na siring kan sa saindong sadiri.” Sa saro pa sa saiyang mga surat, sinasabihan kita kan apostol na ‘dai maggibo nin ano man huli sa pagpasuruhay o huli sa sobrang pagpaimportante sa sadiri, kundi may kababaan nin isip na ibinibilang na an iba mas halangkaw kisa sa saindo.’ (Fil. 2:3) Kaipuhan an tunay na kapakumbabaan asin odok na paghihingoa na midbidon na minsan paano an kada saro sa satong mga tugang nakakalabi sa sato. Huli sa kapakumbabaan, dai niato ‘iisipon na kita mismo may pagmansay.’ Minsan ngani an nagkapira tibaad magin garo sikat huli sa mga pribilehio nin espesyal na paglilingkod, an gabos makakamate nin hararom na kagayagayahan sa paggibo nin “hababang mga bagay,” hamak na mga gibohon na sa parate dai naririsa nin mga tawo.—1 Ped. 5:5.

An Satong Kristianong Pagkasararo

 9. Taano ta ikinomparar ni Pablo sa mga kabtang nin hawak an mga Kristianong pinaniaki nin espiritu?

⁹ Basahon an Roma 12:4, 5, 9, 10. An linahidan na mga Kristiano ikinomparar ni Pablo sa mga kabtang nin hawak na naglilingkod nin sararo sa pangengenot kan saindang Payo, si Cristo. (Col. 1:18) Ipinagirumdom nia sa mga Kristianong pinaniaki nin espiritu na an sarong hawak igwa nin dakol na kabtang na laen-laen an pagpunsionar asin na sinda, “minsan ngani dakol, saro sanang hawak na kasaro ni Cristo.” Sa kaagid na paagi, sinadol ni Pablo an linahidan na mga Kristiano sa Efeso: “Paagi sa pagkamoot kita magtalubo sa gabos na bagay sa saiya na iyo an payo, si Cristo. Gikan sa saiya an bilog na hawak, paagi sa pagkasorogpon na may pagkaoroyon asin pagpangyaring magtarabangan paagi sa lambang pagsokmolan na nagtatao kan kinakaipuhan, sono sa pagpunsionar kan kanya-kanyang kabtang segun sa tamang sokol, nagbubunga kan pagtalubo kan hawak para sa pagkosog mismo kaiyan sa pagkamoot.”—Efe. 4:15, 16.

10. Anong autoridad an maninigong midbidon kan “ibang mga karnero”?

¹⁰ Minsan ngani an “ibang mga karnero” bakong kabtang kan hawak ni Cristo na kompuesto nin dakol na kabtang, dakol an manonodan ninda sa ilustrasyon na ini. (Juan 10:16) Sinabi ni Pablo na ‘ipinasakop ni Jehova an gabos na bagay sa irarom kan mga bitis ni Cristo, asin ginibo siang payo kan gabos na bagay sa kongregasyon.’ (Efe. 1:22) Ngonyan, an ibang mga karnero kabtang kan “gabos na bagay” na ipinasakop ni Jehova sa pamamayo kan saiyang Aki. Kabilang man sinda sa mga “rogaring” na ipinagkatiwala ni Cristo sa saiyang “maimbod asin mapagmansay na oripon.” (Mat. 24:45-47) Kun siring, an mga may daganon na paglaom maninigong midbidon si Cristo bilang saindang Payo asin magin mapagpasakop sa maimbod asin mapagmansay na oripon saka sa Namamahalang Grupo kaiyan patin sa mga lalaking ninombrahan bilang mga paraataman sa kongregasyon. (Heb. 13:7, 17) Nakakakontribwir ini sa Kristianong pagkasararo.

11. Sa ano nakabasar an satong pagkasararo, asin ano pang ibang hatol an itinao ni Pablo?

¹¹ An siring na pagkasararo nakabasar sa pagkamoot, an “sangkap na bogkos nin pagkasararo.” (Col. 3:14) Sa Roma kapitulo 12, idinoon ini ni Pablo, na nagsasabi na an satong pagkamoot maninigong ‘mayo nin pagsaginsagin’ asin “sa pagkamoot na sa magturugang” maninigong igwa kita nin “mamomoton na kapadangatan sa lambang saro.” Nagbubunga ini nin paggalang sa lambang saro. An apostol nagsabi: “Sa pagtao nin onra sa lambang saro mangenot kamo.” Siempre, an pagkamoot dai niato dapat ipareho sa pagkasentimental. Maninigo niatong gibohon an gabos na makakaya niato na papagdanayon na malinig an kongregasyon. Sa pagtao kan saiyang hatol dapit sa pagkamoot, sinabi pa ni Pablo: “Ikasurang nin makuri an maraot, mangapot sa marahay.”

An Dalan nin Pagkamapag-istimar

12. Kun dapit sa pagpaheling nin pagkamapag-istimar, ano an manonodan niato sa mga Kristiano sa suanoy na Macedonia?

¹² Basahon an Roma 12:13. An pagkamoot niato sa satong mga tugang mapahiro sa sato na ‘maghiras sa mga banal sono sa saindang mga pangangaipo’ asin segun sa satong kakayahan. Dawa kun kita dukha, puede niatong ihiras kun ano an yaon sa sato. Kan magsurat manongod sa mga Kristiano sa Macedonia, si Pablo nagsabi: “Sa panahon nin dakulang pagbalo sa irarom nin kasakitan an abunda nindang kagayagayahan asin an saindang grabeng kadukhaan pinaabunda an mga kayamanan kan saindang pagigin buka an palad. Huli ta ini sono sa talagang kakayahan ninda, iyo, nagpapatotoo ako, labi pa sa talagang kakayahan ninda, mantang sinda sa sadiri nindang kagustohan padagos na nakimaherak sa samo na may grabeng pagngayongayo para sa pribilehio na maboot na pagtao asin para sa kahirasan sa ministeryong itinalaga para sa mga banal [sa Judea].” (2 Cor. 8:2-4) Minsan ngani sinda mismo dukha, an mga Kristiano sa Macedonia bukang marhay an palad. Ibinibilang nindang pribilehio an paghiras sa saindang daing sukat na mga tugang sa Judea.

13. Ano an boot sabihon kan ‘sundan an dalan nin pagkamapag-istimar’?

¹³ An mga tataramon na ‘sundan an dalan nin pagkamapag-istimar’ traduksion nin sarong pananaram sa Griego na nangangahulogan na pagpaheling nin inisyatiba. An pananaram na iyan trinadusir kan The New Jerusalem Bible na “humanap nin mga oportunidad na magin mapag-istimar.” Kun beses, an pagigin mapag-istimar ipinapaheling paagi sa pag-imbitar sa iba sa pagkakan, asin kaomaw-omaw iyan kun ginigibo na may pagkamoot. Alagad kun mapaheling kita nin inisyatiba, makakahanap kita nin dakol na iba pang paagi nin pagigin mapag-istimar. Halimbawa, kun dai kita makakaimbitar sa iba sa pagkakan huli sa kamugtakan niato sa pinansial o salud, an pag-alok nin simpleng meryenda saro man na paagi nin pagpaheling nin pagigin mapag-istimar.

14. (a) Hale sa anong mga termino an Griegong termino na trinadusir na “pagkamapag-istimar”? (b) Sa ministeryo, paano niato ikakapaheling an satong pagmalasakit sa mga dayo?

¹⁴ Kalabot sa pagkamapag-istimar an satong pagmansay. An Griegong termino na trinadusir na “pagkamapag-istimar” hale sa duwang termino na nangangahulogan na “pagkamoot” asin “estranghero.” Ano an saboot niato sa mga estranghero, o dayo? Tunay nanggad na nagsusunod sa dalan nin pagkamapag-istimar an mga Kristiano na nagmamaigot na mag-adal nin ibang lenguahe tanganing ikahulit an maogmang bareta sa mga dayo na nagbalyo sa teritoryo kan saindang kongregasyon. Siempre, dakol sa sato an mayo sa kamugtakan na mag-adal nin ibang lenguahe. Pero, gabos kita puedeng magkaigwa nin makahulogan na kabtang sa pagtabang sa mga dayo paagi sa paggamit na marhay kan satong buklet na Good News for People of All Nations, na igwa nin mensahe sa Biblia sa dakol na lenguahe. Nagkaigwa na daw kamo nin marahay na mga resulta sa paggamit kan buklet na ini sa ministeryo?

Pakikipagkapwa

15. Paano ipinaheling ni Jesus paagi sa halimbawa an itinaong hatol sa Roma 12:15?

¹⁵ Basahon an Roma 12:15. An hatol ni Pablo sa bersikulong ini puedeng sumaryohon sa mga tataramon na: Magpaheling nin empatiya. Kaipuhan na kita makanood na saboton asin mamatean man an namamatean nin iba, baga man iyan kagayagayahan o kamondoan. Kun kita malaad sa espiritu, maririsa an sato man na kagayagayahan o pagmalasakit. Kan an 70 disipulo ni Cristo magbalik na magayagaya hale sa paghuhulit asin isaysay an marahay na mga resulta kan saindang gibohon, si Jesus mismo “naggayagaya nin labi-labi sa banal na espiritu.” (Luc. 10:17-21) Sia naggayagaya man. Sa ibong na lado, si Jesus ‘nakitangis sa mga tawong nagtatangis’ kan magadan an saiyang katood na si Lazaro.—Juan 11:32-35.

16. Paano kita makakapaheling nin pakikipagkapwa, asin siisay an nangorognang kaipuhan na magpaheling kaiyan?

¹⁶ Gusto niatong sunodon an halimbawa ni Jesus sa pagpaheling nin empatiya. Kun an sarong kapwa Kristiano naggagayagaya, gusto niatong makigayagaya man sa saiya. Siring man, maninigo kitang magin mapagrisa sa mga kakologan asin kamondoan kan satong mga tugang. Sa parate, makakatao kita nin dakulang kaginhawahan sa satong mga kapagtubod na nagsasakit nin kolog sa emosyon kun matao kita nin panahon na maghinanyog sa sainda na may tunay na simpatiya. Asin kun beses, tibaad mamatean niato na natutudok na gayo an satong puso kaya napapaluha kita huli sa tunay na empatiya. (1 Ped. 1:22) Maninigong sunodon nangorogna kan kamagurangan an hatol na itinao ni Pablo dapit sa pagpaheling nin empatiya.

17. Ano an nanodan niato sagkod sa puntong ini sa Roma kapitulo 12, asin ano an pag-oolayan sa sunod na artikulo?

¹⁷ An napag-olayan niato sagkod sa puntong ini na mga bersikulo sa Roma kapitulo 12 nagtao sa sato nin hatol na puedeng iaplikar sa satong personal na buhay bilang mga Kristiano asin sa satong relasyon sa mga tugang niato. Sa sunod na artikulo, sisiyasaton niato an natatada pang mga bersikulo kan kapitulong ini, na nagtotokar kun paano niato maninigong mansayon asin trataron an mga nasa luwas kan Kristianong kongregasyon, kaiba an mga nagtutumang asin nagpepersegir sa sato.

Bilang Repaso

• Paano niato ipinapaheling na kita “malaad sa espiritu”?

• Taano ta maninigong may kapakumbabaan asin kababaan nin boot na paglingkodan niato an Dios?

• Sa anong mga paagi ikakapaheling niato an empatiya asin pagmalasakit sa mga kapagtubod?

[Mga Ritrato sa pahina 4]

Taano ta nakikikabtang kita sa Kristianong mga aktibidad na ini?

[Ritrato sa pahina 6]

Paano puedeng makikabtang an lambang saro sa sato sa pagtabang sa mga dayo na makanood manongod sa Kahadean?