An Punto-de-Vista kan Biblia

Droga Para sa Kasiraman—Taano ta Dai?

“AN COCAINA . . . seguro iyo an pinakasuwabe sa bawal na mga drogang ginagamit nin dakol ngonyan . . . asin masiramon.”

Iyan an sabi ni Dr. Peter Bourne kan 1974. Pakalihis nin apat na taon bilang an konsehero sa pagpalakaw sa salud sa White House para ki Presidente Jimmy Carter, si Dr. Bourne napiritan na magdemetir huli sa mga sumbong na paggamit nin bawal na droga. Kapareho nin dakol pang iba, seguro an paghona nia ikapangangatanosan nia an paggamit nin droga para sa kasiraman.

Kaidto an cocaina pasil na makua nin siisay man sa haros saen man​—sa mga groseri, salon, asin sa mga nagpapapedido sa koreo. Kaidtong mga taon nin 1880 asin 1890, iyan puwedeng sigarilyohon sa porma nin mga sigarilyong dahon nin coca. Iniinom iyan sa laen-laen na arak asin soft drink. Pati an popular na Ingles na sekreta sa estorya na si Sherlock Holmes ilinaladawan na naggagamit nin cocaina “tolong beses kada aldaw sa dakol na bulan.”​—The Sign of Four, ni Sir Arthur Conan Doyle.

An cocaina pinahahalagahan huli sa abilidad kaiyan na magpaomay asin inomaw bilang bolong sa kolog nin payo, usol, sipon, asin kolog nin ngipon. Idto nagin an bolong sa gabos para sa mga masa. Halimbawa, kan 1884 an hoben pang si Sigmund Freud nagsurat: “Binalo ko an epektong ini nin coca, na nakahahale sa gutom, pagtungka, asin kapagalan asin pinakokosog an saro para sa intelektuwal na trabaho, mga pirang dosenang beses sa sakong sadiri . . . An enot na pagtomar o minsan an paorootrong pagtomar nin coca mayo nin ibinubungang dai mapogolan na pagmawot na gamiton pa an pampabagsik na iyan.”​—Über Coca.

Kan mga taon na nakaagi, ginibo an kaagid na mga komento manongod sa marihuana, na nagtulod sa pirang tawo na maniwala na an paggamit nin droga dai nakakaano. Minsan siring, ngonyan makakabasa kamo nin tambak na medikal na ebidensia na nagsasabi kan kabaliktaran. An totoo, an paggamit nin droga arog kan marihuana, cocaina, crack (sarong klase nin cocaina), heroina, amphetamine, asin barbiturato nakararaot na gayo sa hawak.

Nakararaot Asin Nakagagadan na mga Epekto

Sinasabi nin mga parasiyasat na an mga paragamit nin marihuana makakalaom sa mas saradit na omboy, mas dakol na aksidente, asin naraot na mga pulmon. An cocaina asin an kinua dian na crack ikinonektar sa sobrang pagkadiskompiado asin iba pang mga sintomas nin pagkakapay, makuring kamondoan, dai pakatorog, kadaihan nin ganang magkakan, seksuwal na pagkainutil, grabeng init nin payo, mga pag-atake nin helang, atake sa puso, mga lugad sa kublit o darakulang lapak, pagkawara nin mga takyag saka tabay asin moro, mga depekto pagkamundag, mga impeksion sa respiratoryo, pagkawara nin pagparong, asin kagadanan. Sono sa sarong parasurat sa siensia, “kun an paggamit nin cocaina kun bados sarong helang, an epekto kaiyan sa mga omboy ibibilang na nasyonal na krisis sa salud.”

An pirang klase nin mga nagdodroga namemeligro man na gayo na magka-AIDS. Asin an dakol na problema sa salud iinasosyar sa pag-abuso sa mga drogang sintetiko, arog baga kan mga amphetamine, barbiturato, trangkilayser, asin mamahalon na mga droga hale sa ibang nasyon.

Pero, sa ibong nin aram na mga peligro, an mga tawo nasusugotan pa man giraray na probaran an droga. An kaswal na mga paragamit nawiwiling marhay sa siring na mga droga. Minsan siring, tunay na marhay an mga peligro. Iyan garo pagpadiretso nin sarong tangker nin krudo pasiring sa lunod na ragit​—segurado an kapahamakan.

An Saindong Hawak​—“Buhay na Atang”

An prinsipyong ipinahayag ni apostol Pablo sa Roma 12:​1 may mapuwersang koneksion sa bagay na ini. Iyan nagsasabi: “Kaya ako nakikimaherak sa saindo huli sa mga pagkaherak nin Dios, mga tugang, na idolot nindo an saindong mga hawak na siring sa buhay na atang, banal, maaako nin Dios, sarong banal na paglilingkod na may kakayahan na mangatanosan.” An mga Kristiano kaipuhan na magdolot nin mas makahulogan na mga atang kisa mga atang na hayop na hinahagad sa suanoy na nasyon nin Israel.

Mahalagang mangnohon an paggamit ni Pablo sa Griegong ekspresyon na trinadusir na “buhay na atang, banal” (thy·siʹan zoʹsan ha·giʹan). Sono sa laen-laen na iskolar sa Biblia, an mga terminong ini nagkakaigwa kan minasunod na kahulogan: An Israelita nagdodolot nin gadan na atang. Iyan dai na ikadodolot liwat. Kabaliktaran, an Kristiano kaipuhan na idolot an saiyang sadiri kaiba an gabos niang kosog na “buhay.” (An pormang berbo sa Griego na trinadusir na “buhay” kun beses puwedeng mangahulogan na “mabuhay na marahay an salud.”) Asin kun paanong an Israelita pinangaladan na magdolot nin pilay o may diperensia sa ano man na paagi, an Kristiano idinodolot sa Dios an saiyang pinakamarahay na mga kakayahan. Asin mantang an hawak kan Kristiano nagigin instrumento kan saiyang mga hiro, an gabos niang gibo asin kaisipan kaiba an instrumento kaiyan​—an saiyang hawak​—kaipuhan na idusay sana sa Dios. Ini nagigin akto nin lubos na pagdusay. Mayo na sia nin ibang hinahagad sa saiyang sadiri. Kun siring, an saiyang buhay, bakong rituwal, an tunay na atang.

Kun siring, sinasadol ni Pablo an mga Kristiano kan enot na siglo, mantang sinda buhay pa sa daga, na gamiton an saindang kosog, an saindang salud, asin an ano man na kakayahan o balaog ninda sa bilog na kalag na paglilingkod sa Dios. (Colosas 3:23) Kaipuhan na itao ninda ki Jehova an pinakamarahay na ikadodolot ninda sa pisikal asin mental. Ikaoogma nin Dios an siring na mga atang.

Minsan siring, ano daw an magigin saboot nin Dios kun sinda tuyong naggibo nin mga bagay na nakapaluluya sa saindang pisikal asin mental na kakayahan patin nakakapalipot pa sa saindang buhay? Bobooton daw nin mga Kristiano na lapason an pagboot asin isapeligro an pagpababa kan saindang halaga sa ministeryo nin Dios? An marigsok na mga gibo puwedeng magdiskuwalipikar sa sainda bilang mga ministro asin magbunga pa ngani kan pagtiwalag sa sainda sa Kristianong kongregasyon.​—Galacia 5:​19-21.

Ngonyan, kausohan sa bilog na kinaban na an mga tawo mag-abuso sa droga. Puwede daw na an saro gumamit nin siring na mga droga para sa kasiraman asin ikadolot pa man giraray an saiyang hawak bilang “buhay na atang, banal, maaako nin Dios”? Bako sanang medikal na pagsiyasat asin dai mabilang na mga eksperyensia sa kapahapahamak na mga resulta kundi pati an mga prinsipyo sa Biblia nagtatao nin malinaw na simbag​—dai!

“The Opium Smoker”​—ni N. C. Wyeth, 1913