An Punto-de-Vista kan Biblia

May Panahon daw na Nagigin Makatanosan an Pakisuway Sibil?

“KUN naheheling mo an sadiri mong kahimanwa na linulugos asin ginagadan,” sabi nin sarong 30 anyos nang misyonerong Katoliko, “kun naheheling mo an mga bilog na banwaan na pinahahale nin mga soldados, asin an mga aki na pinipirit na magsoldado hale sa saindang harong, asin kun maaraman mo na an 2 porsiento kan populasyon kontrolado na an tres-kuwarto sa kayamanan, dai puwedeng italbong mo an saimong payo sa Biblia asin dai pag-intindihon an mga katunayan.”—Samo an italiko.

Kun kamo nasa lugar kan misyonerong ini, ano an gigibohon nindo? Umiba sa sarong matoninong na demonstrasyon o pagwelga? Ano kun ini dai magtao kan kinakaipuhan na pagliliwat? Magigin makatanosan na daw an kadahasan? Rebolusyon o kudeta? Ano an irinirekomendar nin “espirituwal na mga namomoon” ngonyan? Helinga an mga baretang ini:

◻ An sarong klerigo sa Nicaragua nagsabi na sia naglilingkod sa Dios paagi sa paglilingkod sa banwaan asin sa rebolusyon.

◻ Sa Pilipinas an sarong ministro pinaluwas sa nasyon huli sa pagsutsot nin politikal na kariribokan asin paglaladawan ki Jesus bilang sarong rebelde.

◻ An mga padi asin madre nakikampi sa mga gerilya sa paghihingoa na ibagsak an sarong gobyerno sa Central America.

An saindang mga gawe nagtatao nin makosog asin klarong mensahe: An pakisuway sibil makatanosan o ibinibilang pa nganing obligasyon Kristiano. Alagad totoo daw ini, dawa kun an mga motibo asin pasohan sinsero asin nakatatabang sa kapwa? Ano an punto-de-vista kan Biblia?

‘Pagtumang sa Dios’?

An Dios igwa nin klarong palakaw mapadapit sa mga gobyerno o autoridad nin tawo. An Biblia nagsasabi: “Mayo nin kapangyarihan na dai itinogot nin Dios; an nagdadanay na mga kapangyarihan nagtitirindog sa saindang relatibong mga kamugtakan na itinogot nin Dios.” Iyo, si Jehova Dios igwa kan kinakaipuhan na kapangyarihan na magsalang makilabot o tapuson an arin man na kapangyarihan sa arin man na panahon. Kun sinda nagpupunsionar, iyan huli ta itinogot nia iyan.—Roma 13:1.

Pakasabihan kan katunayan na ini, an teksto nagsasabi pa: “Kaya an minatumang sa kapangyarihan minatumang sa areglo nin Dios; an mga minatumang kaiyan mag-aako nin silot sa sainda man sana.” (Roma 13:2) Huli sa mga tataramon na ini, an saro daw na Kristiano makapagsasabi sono sa konsensia na sia ‘naglilingkod sa Dios paagi sa paglilingkod sa sarong rebolusyon’? An saro daw ‘minatumang sa Dios’ sa pakikikabtang, o minsan pagsuportar, sa mga aktibidad na direktang nag-aangat sa nag-eeksister na kapangyarihan nin gobyerno?

Helingon niato an kasaysayan sa Biblia para sa simbag. Kaidtong katapusan kan ikapitong siglo B.C.E., tinogotan ni Jehova an Imperyo nin Babilonya na dominaron an Israel, na ginigibo si Zedequias nin Jerusalem na nasasakopan na hade. Alagad, pakalihis nin walong taon na pagpasakop, si Zedequias nagmawot na labanan an siring na areglo. Nagpatabang sia sa Egipto. Dai na nia totogotan an ibang kapangyarihan—na pagano pati—na magdominar sa banwaan nin Dios. Garo baga malinig an saiyang mga motibo. Pero, ano an punto-de-vista dian nin Dios? Si Zedequias daw magigin “parapakilaban para sa libertad” na aprobado nin Dios? Bako! Huli ta sa pagrebelde tumang sa Babilonya, nagrerebelde man sia tumang sa Dios. Huli sa pagrebeldeng ini, ipinagboot ni Jehova na si Zedequias magagadan na bihag sa Babilonya.—2 Hade 24:17-20; Ezequiel 17:15, 16.

An kaso ni Zedequias dai nasosolo. Paorootrong ipinaheling nin kasaysayan na an pakisuway sibil, dawa kun marahay an intension, dai makapagtatao nin nagdadanay na solusyon sa mga problema nin tawo. An totoo iyo na an mga rebelyon asin rebolusyon parateng nagpapagrabe sa situwasyon. Sa dakol na kaso, pakalihis kan garo baga kapangganahan nin rebolusyon, an mga “parakalda” mismo sa huri nagkakasala nin tiraniya asin pan-aapi. Pag-abot nin panahon, an bagong kapag-arakian nin inaaping banwaan nagrerebelde. An siring na maraot na pagpabalikbalik sana nin mga pangyayari naeksperyensiahan sa dakol na nasyon. Halimbawa, an sarong nasyon sa South America bago pa sanang umagi sa ika-189 kudeta sa laog nin 154 taon!

Pagkasudya nin Tawo—Taano?

Taano ta dai nakakalda nin sinserong mga tawo an katawohan sa pag-aprobetsar asin pan-aapi? Huli ta mayo sinda nin duwang bagay—kadonongan asin kapangyarihan. Bakong makangangalas na an Biblia nagpapatanid sato: “Dai ka manarig sa mga prinsipe, ni sa aki kan daganon na tawo, na dian mayo nin kaligtasan.”—Salmo 146:3.

Bilang ilustrasyon, ipamugtak na kamo nasa ospital na naghahalat na operaran. Nagkukurahaw kamo sa kolog asin sakit. Sa panale, an sarong dyanitor na minaagi nadangog kamo, nagkua nin scalpel, asin nag-opresir kan saiyang tabang na itao an kinakaipuhan na pakaginhawa. Totogotan daw sia nindo na operaran kamo? Siyempre dai! Taano? Huli ta an saiyang pagkamoot asin pagkaherak dai minakuwalipikar sa saiya para sa siring kadepisil na trabaho. An saiyang gigibohon mapagrabe sana sa saindong kasakitan, na ibinubugtak pa kamo sa peligrong ikagagadan. An siring na gawe magigin pangahas asin iresponsable nanggad patin nag-iignoro sa bagay na may itinalaan na panahon para sa pag-operar nin kuwalipikadong siruhano. Mas magigin marahay pa para sa saiya na pasarigon na sana an saindong boot na maabot na an tabang.

Siring man, an tunay na mga Kristiano ngonyan dai nakikiayon sa pakisuway sibil. Hinahalat ninda an aldaw asin oras na umabot an kuwalipikadong pakikilabot nin Dios. Solamente sia an may kadonongan asin kapangyarihan na tumao nin nagdadanay na solusyon sa katawohan. Paagi sa saindang paghuhulit, an mga Saksi ni Jehova pinasasarig an boot kan mga nagtitios nin inhustisya na an siring na kaginhawahan madali nang umabot.—Isaias 9:6, 7; 11:3-5.

Mientras tanto, puwede niatong gamiton an ano man na legal asin matoninong na paagi na maestablisar asin ipagdepensa an satong mga diretso asin makaginhawa sa pan-aapi. Alagad kun ini masudya, sala na gumamit nin pakisuway sibil. Kaya, si apostol Pablo naghatol: “Siring sa makakaya nindo, makipagkatoninongan sa gabos na tawo. Dai kamo magbalos, mga namomotan, kundi magtao nin lugar sa karatan; huli ta nasusurat: ‘Sako an pagbalos; ako an mabalos, sabi ni Jehova.’” An tunay asin makinuyog na mga Kristiano isinasapuso an madonong na hatol na ini.—Roma 12:18, 19.

[Picture Credit Line sa pahina 11]

Reuters/Bettmann Newsphotos