Mga Hobenes​—Ano an Pinag-aaabot Nindo?

“Dumulag ka sa mga horot na konektado sa pagkabarobata, kundi pag-aaboton mo an katanosan, pagtubod, pagkamoot, katoninongan, kaibanan kaidtong mga nag-aapod sa Kagurangnan gikan sa malinig na puso.”​—2 TIMOTEO 2:22.

 1. Ano an linalaoman niato sa kairiba niatong hobenes?

“AN MGA Saksi ni Jehova,” sabi kan Suecong peryodikong Pentecostal na Dagen (An Aldaw), “minakompuwesto sa grupo na nakakukua kan pinakadakol na bagong miembro taon-taon asin igwa kan pinakadakulang grupo nin mga hobenes.” Tibaad kaiba kamo sa grupong ini nin malinig, matatakton sa Dios na mga hobenes. Tibaad pinadakula kamo sa Kristianong dalan poon sa pagkaomboy, o tibaad kamo mismo an nakadangog asin nag-ako sa mensahe kan Kahadean. Sa arin man na kamugtakan, naoogma kaming makaibanan kamo. Asin linalaom mi na kamo masunod sa dalan nin katanosan, arog kan maimbod na mga hobenes na Kristiano kan enot na siglo. Tibaad tamang-tama saindo an mga tataramon ni apostol Juan: “Kamo makosog asin an tataramon nin Dios nagdadanay dian sa saindo patin nadaog nindo an maraot.”​—1 Juan 2:14.

 2. Anong mga bagay an puwedeng magpadepisil kan pagsunod sa matanos na dalan sa panahon kan “pagbukad nin pagkabarobata”?

² An dakol​—iyo, an mayoriya—​sa Kristianong mga hobenes ngonyan nakapaninindogan sa mga impluwensia kan kinaban. Alagad tibaad marisa nindo na bakong pasil an pagdadanay sa siring na dalan. Kun kamo nasa “pagbukad nin pagkabarobata,” puwede kamong madaog nin bago asin makosogon na mga emosyon. (1 Corinto 7:36) Kadungan kaiyan, tibaad nakamamate kamo nin nag-oorog na mga paninimbagan sa eskuwelahan, sa harong, asin sa kongregasyon. Igwa pa nin pangigipit gikan ki Satanas na Diablo mismo. Desididong dayaon an pinakadakol na mahihimo, sinasalakay nia an garo baga madaling mabiktima​—arog kan ginibo nia sa tatamnan nin Eden. Kaidto, isinentro nia an saiyang nakadadarang pandadaya, bako sa matua, mas may kaaraman na si Adan, kundi sa mas hoben asin dai pang kabatidan na babae, si Eva. (Genesis 3:​1-5) Pakalihis nin mga siglo, ginamit ni Satanas an kaagid na mga taktika sa bagong kongregasyon nin mga Kristiano sa Corinto. Sabi ni apostol Pablo: “Ako natatakot na tibaad, siring na nadaya kan halas si Eva paagi sa katusohan kaiyan, maraot an saindong isip parayo sa sinseridad asin kalinigan na para kan Cristo.”​—2 Corinto 11:3.

3, 4. Ano an pirang kasangkapan na ginagamit ni Satanas na Diablo sa pagdaya sa mga hobenes, asin may anong posibleng resulta?

³ Ngonyan, tibaad maghadit man sa saindo an saindong Kristianong mga magurang. Bakong huli ta iniisip ninda na may hilig kamo sa karatan, kundi aram ninda sa saindang eksperyensia na an mga hobenes nangorognang madaling mabiktima kan “tusong mga gibo” ni Satanas. (Efeso 6:​11, nota sa ibaba) Imbes na magin makatatakot, an mga siod ni Satanas ginigibong nakaaakit, magayon paghelingon. An telebisyon magayonon an pagkakapasale sa materyalismo, hayag na marhay na sekso, klaro an pagkaladawan na kadahasan, asin espiritismo bilang aling-alingan. An hoben na mga isip puwedeng mapano nin mga bagay na bako nanggad na ‘totoo, seryoso, matanos, malinig, asin makawiwili.’ (Filipos 4:8) An impluwensia nin kairiba saro pang makosog na kasangkapan ni Satanas. An kairiba puwede kamong piriton na umarog sa saindang pamumuhay, gubing, asin pag-alinyar. (1 Pedro 4:​3, 4) An kolumnista sa peryodikong si William Brown nagkomento: “Kun igwa nin saro, sekular na Dios para sa tin-edyer iyan an Dios nin pag-arog. . . . Para sa mga tin-edyer an pagigin napapalaen kapaladan na mas grabe sa kagadanan.” An sarong daragitang Saksi sa Italia nagtuga: “Nasopog akong ipaaram sa mga kaklase ko na ako Saksi. Asin huling aram ko na dai naoogma sako si Jehova, ako mamondo asin napupungaw.”

⁴ Dai kamo padaya​—gusto ni Satanas na darahon kamo sa kapahamakan. An dakol na hobenes sa kinaban mawawaran kan saindang buhay sa dakulang kahorasaan ta itinogot ninda na sinda madaya. (Ezequiel 9:6) An solamenteng paagi na makaligtas pag-aaboton an tama.

Mag-ingat sa Maraot na Pag-iriba

5, 6. (a) An hoben na si Timoteo napaatubang sa anong mga angat mantang nag-iistar sa Efeso? (b) Ano an hatol ni Pablo ki Timoteo?

⁵ Iyan an pinakaubod kan hatol na itinao ni apostol Pablo sa hoben na si Timoteo. Sa laog nin labing sampulong taon, si apostol Pablo inibanan ni Timoteo sa saiyang mga biyahe sa pagmimisyonero. Kan panahon na si Timoteo naglilingkod sa paganong siudad nin Efeso, si Pablo nasa Romanong bilanggoan na naghahalat na gadanon. Mantang nagdadangadang an panahon kan saiyang kagadanan, daing duwa-duwa na si Pablo naghahadit kun ano an mangyayari ki Timoteo. An Efeso siudad na bantog sa kayamanan kaiyan, inmoralidad, asin marigsok na aling-alingan, asin si Timoteo mawawaran na kan tabang kan saiyang namomotan na maestro.

⁶ Kaya sinuratan ni Pablo an saiyang “namomotan na aki” nin arog kaini: “Ngonyan sa sarong dakulang harong igwa nin mga lalagan bako sanang nin bulawan asin pirak kundi pati kahoy asin dalipay, asin an iba para sa kagalang-galang na kagamitan pero an iba man para sa kagamitan na mayong kagalangan. Kaya, kun an siisay man lumikay sa mga nahuhuri, sia magigin lalagan para sa kagalang-galang na kagamitan, pinakangbanal, nagagamit kan saiyang kagsadiri, andam manongod sa gabos na marahay na gibo. Kaya, dumulag ka sa mga horot na konektado sa pagkabarobata, kundi pag-aaboton mo an katanosan, pagtubod, pagkamoot, katoninongan, kaibanan kaidtong mga nag-aapod sa Kagurangnan gikan sa malinig na puso.”​—2 Timoteo 1:​2; 2:​20-22.

 7. (a) Ano an ‘mga lalagan na mayong kagalangan’ na ipinatanid ni Pablo? (b) Paano ikaaaplikar nin mga hobenes ngonyan an mga tataramon ni Pablo?

⁷ Kaya pinatanidan ni Pablo si Timoteo na minsan sa mga kapwa Kristiano tibaad may ‘mga lalagan na mayong kagalangan’​—mga tawong bakong tama an gawe. Ngonyan kun an pakiiiba sa nagkapirang linahidan na Kristiano puwedeng makaraot ki Timoteo, gurano pa daw na an pakiiiba sa mga kinabanon makararaot sa sarong hoben na Kristiano ngonyan! (1 Corinto 15:33) Ini dai nangangahulogan na dai kamo magigin makikatood sa saindong mga kaeskuwela. Alagad maninigo kamong mag-ingat na dai sumobra an pakiiiba sa sainda, dawa kun garo kamo may beses na nagigin parasolosolo. Ini puwedeng magin depisil na marhay. An sabi nin sarong daragitang taga-Brazil: “Depisil iyan. Permi akong iniimbitaran kan mga kaeskuwela ko na magduman sa mga parti asin lugar na sala sa hobenes na Kristiano. Sabi ninda: ‘Ano! Dai ka maduman? Rungaw ka!’”

8, 9. (a) Paano an pakiiiba, minsan sa garo baga marahay na mga kinabanon, nagtatao nin peligro sa sarong Kristiano? (b) Saen kamo makanonompong nin marahay na mga katood?

⁸ An ibang kinabanon na hobenes tibaad garo baga marahay ta dai sinda nagsisigarilyo, naggagamit nin maraot na pagtaram, o naggigibo nin inmoral na sekso. Pero kun dai sinda nag-aaabot sa katanosan madali kamong maimpluwensiahan kan saindang makalaman na kaisipan asin mga gawe. Apuwera kaiyan, gurano an pagkakapareho nindo sa mga daing pagtubod? (2 Corinto 6:​14-16) Tara, an espirituwal na mga pamantayan na namomotan nindo “kamangmangan” sana para sa sainda! (1 Corinto 2:14) Mapagdadanay daw nindo an pakikikatood sainda na dai ikinokompromiso an saindong mga prinsipyo?

⁹ Kaya likayan an maraot na kairiba. Makiasosyar sana sa espirituwal an kaisipan na mga Kristiano na talagang namomoot ki Jehova. Mag-ingat pati sa hobenes sa kongregasyon na negatibo o paratatsar. Mantang kamo nagtatalubo sa espirituwal, posibleng maliwat an gusto nindong magin katood. Sabi nin sarong daragitang Saksi: “Nagkakaigwa ako nin bagong mga katood sa laen-laen na kongregasyon. Huli kaiyan narealisar ko na dai nanggad kaipuhan an kinabanon na mga katood.”

Pagdulag sa Salang mga Horot

10, 11. (a) Ano an boot sabihon kan “dumulag ka sa mga horot na konektado sa pagkabarobata”? (b) Paano an saro puwedeng ‘dumulag sa pakikisaro’?

¹⁰ Sinadol man ni Pablo si Timoteo na “dumulag ka sa mga horot na konektado sa pagkabarobata.” Kun kamo hoben pa, an kamawotan na magin popular, mag-ogma, o mapanigoan an seksuwal na mga horot puwedeng magin makosogon. Kun dai popogolan, an siring na mga horot puwedeng magdara saindo sa kasalan. Kaya sinabi ni Pablo na dumulag sa nakararaot na mga horot​—na dumalagan parayo na garo baga nakataya an saindong buhay.a

¹¹ Halimbawa, an seksuwal na horot nagdara sa dakol na hoben na Kristiano sa espirituwal na kalaglagan. Kaya may marahay na dahelan na sinasabi sato kan Biblia na “dumulag kamo sa pakikisaro.” (1 Corinto 6:18) Kun an sarong lalaki asin babae nag-iilusyonan, nagdi-date, ikaaaplikar ninda an prinsipyong ini paagi sa paglikay sa nakasusugot na mga kamugtakan​—arog kan sinda sanang duwa sa apartment o nakaparadang kotse. An pagpaiba sa tsaperon tibaad garo baga lihis na sa uso, pero iyan puwedeng magtao nin tunay na proteksion. Asin minsan ngani an pirang kapahayagan nin pagkamoot tibaad puwede man, kaipuhan na magbugtak nin rasonableng mga limitasyon tanganing malikayan an marigsok na gawe. (1 Tesalonica 4:7) An pagdulag sa pakikisaro kabale man an paglikay sa mga pelikula o pasale sa TV na tibaad makapukaw sa salang horot. (Santiago 1:​14, 15) Kun basta na sana lumaog sa isip nindo an inmoral na mga kaisipan, liwaton an tema sa isip nindo. Mamasyar; magbasabasa; magtrabaho sa harong. An pamibi mapuwersang marhay na pantabang sa bagay na ini.​—Salmo 62:8.b

12. Paano kamo makanonood na ikaongis an maraot? Iilustrar.

¹² Orog sa gabos, kaipuhan na makanood kamong ikaongis, ikasurang, asin ikabalde an maraot. (Salmo 97:10) Paano nindo ikaoongis an tibaad sa primero nakaoogma o nakawiwili? Paagi sa paghorophorop sa mga resulta! “Dai kamo padaya: An Dios dai maoolog-olog. Huli ta an ano man na itinatanom nin tawo, iyan man sana an saiyang aanihon; huli ta an nagtatanom sa laman mag-aani man nin pagkatunaw sa laman.” (Galacia 6:​7, 8) Kun nasusugotan na padara sa horot, isipon an mas mahalagang resulta​—kun paano ini makakokolog ki Jehova Dios. (Ikomparar an Salmo 78:41.) Isipon man an posibilidad nin dai ginustong pagbabados o pakakua nin helang, arog kan AIDS. Horophoropa an emosyonal na kakologan asin pagkawara nin paggalang sa sadiri na aagihan nindo. Tibaad igwa man nin haloyan na mga resulta. An sarong Kristiana nag-admitir: “Kami mag-agom nakidorog sa iba bago kami nagkamidbidan. Minsan pareho na kami Kristiano ngonyan, an nakaagi niamong pakikidorog gikanan nin pag-iiwal asin pag-imon sa samong pag-agoman.” Dai man paglingawan an pagkawara kan saindong teokratikong mga pribilehiyo o an posibilidad na matiwalag sa Kristianong kongregasyon! (1 Corinto 5:​9-13) Mababawi daw sa siring kadakulang kapierdihan an ano man na madalion sanang kaalingan?

Pag-aabot sa Dayupot na Relasyon ki Jehova

13, 14. (a) Taano ta bako pang igo an dumulag sa maraot? (b) Paano magigibo nin saro na ‘pag-aaboton an pakamidbid ki Jehova’?

¹³ Alagad bako pang igo an dumulag sa maraot. Si Timoteo sinadol man na “pag-aaboton mo an katanosan, pagtubod, pagkamoot, katoninongan.” Ini nagsusuherir nin maigot na paghiro. Si propeta Oseas nakimaherak man sa bakong maimbod na nasyon nin Israel: “Madia kamo, banwaan, asin bumalik kita ki Jehova . . . Pag-aaaboton niato an pakamidbid ki Jehova.” (Oseas 6:​1-3) Kamo daw mismo guminibo na kan siring na pag-aabot? An kalabot dian labi pa sa pag-atender sana sa pagtiripon asin pag-iba sa saindong mga magurang sa paglilingkod sa langtad. An sarong Kristiana nagtuga: “Pinadakula ako kan sakong mga magurang sa katotoohan, asin aki pa akong nabautismohan. . . . Bihira akong mapalta sa pagtiripon asin nungka na may napaltahan na bulan sa paglilingkod, pero nungka akong nakapatalubo nin dayupot na personal na relasyon ki Jehova.”

¹⁴ An saro pang hoben nag-admitir na dai man nia namidbid si Jehova bilang Katood asin Ama, na an mas pagheling nia saiya impersonal na Espiritu. Naholog sia sa inmoralidad asin nagin inang daing agom sa edad na 18. Dai kamo masala nin arog kaiyan! “Pag-aaboton niato an pakamidbid ki Jehova,” arog kan isinadol ni Oseas. Paagi sa pamibi asin paglakaw aroaldaw kaiba ni Jehova, puwede sia nindong gibohon na katood na pinagkokompiaran. (Ikomparar an Miqueas 6:​8; Jeremias 3:4.) “Sia bakong harayo sa lambang saro sa sato” kun sia hahanapon niato. (Gibo 17:27) Kaya kaipuhan an regular na programa nin personal na pag-adal sa Biblia. An siring na rutina dai kaipuhan na magin sobra kadetalyado o komplikado. “Aroaldaw binabasa ko an Biblia nin mga 15 minutos,” sabi nin sarong daragita na an ngaran Melody. Magtagama nin oras sa pagbasa kan kada luwas kan An Torrengbantayan asin Awake! Mag-andam para sa pagtiripon kan kongregasyon tangani kamong ‘makasadol sa iba sa pagkamoot asin sa marahay na mga gibo.’​—Hebreo 10:​24, 25.

Itao an Saindong Puso sa Saindong mga Magurang

15. (a) Taano ta kun beses depisil an pagkuyog sa mga magurang? (b) Taano an pagkuyog ta parateng sa ikararahay kan hoben?

¹⁵ An mga magurang na matatakton sa Dios puwedeng gikanan nin tunay na tabang asin pagsuportar. Alagad mangnoha an dapat nindong gibohon: “Magin makinuyog sa saindong mga magurang na nasa Kagurangnan, huli ta ini matanos: ‘Tawan mo nin onra an saimong ama asin an saimong ina’; na iyo an enot na pagboot na may panuga: ‘Tanganing iyan magdolot nin karahayan sa saimo asin ika magdanay nin haloy sa daga.’” (Efeso 6:​1-3) Totoo, nagkakaedad na kamo asin posibleng gusto nindo nin orog na katalingkasan. Tibaad mas naririsa man nindo an mga pagkukulang kan saindong mga magurang. “An satuyang amang tawo,” an inadmitir ni apostol Pablo, “makagigibo sana kan pinaghohona nindang pinakamarahay.” (Hebreo 12:​10, The Jerusalem Bible) Pero, sa kahaloyan, sa ikararahay pa man giraray nindo na kumuyog sa sainda. An saindong mga magurang namomotan kamo asin midbid kamo nin orog sa kiisay pa man. Minsan tibaad dai kamo perming oyon sa sainda, sa parate nasa puso ninda an pinakaikararahay nindo. Taano ta lalabanan nindo an mga paghihingoa ninda na padakulaon kamo “sa disiplina asin pagtatanos nin isip ni Jehova”? (Efeso 6:4) Totoo nanggad, mangmang sana an “nagbabasangbasang sa disiplina kan saiyang ama.” (Talinhaga 15:5) An madonong na hoben mimidbidon an kapangyarihan kan saiyang mga magurang asin mapaheling nin tamang paggalang.​—Talinhaga 1:8.

16. (a) Taano ta bakong madonong na itago nin mga hobenes an mga problema sa saindang mga magurang? (b) Ano an puwedeng gibohon nin mga hobenes tanganing rumahay an pakikomunikar sa saindang mga magurang?

¹⁶ Kaiba dian an pagtaram nin katotoohan sa saindong mga magurang, na pinaaaram sinda kun kamo nagkakaproblema, arog baga kan dai nahahaleng mga pagduda manongod sa katotoohan o pagkaholog sa kustionableng gawe. (Efeso 4:25) An pagtago sa mga magurang kan nakariribok sa isip na mga kamugtakan na siring kaiyan nagbubunga nin mas dakol na problema. (Salmo 26:4) Totoo, an ibang magurang daing gayo naghihingoang makikomunikar. “An sakuyang ina nungka na tuminukaw asin kinaolay ako,” an reklamo nin sarong daragita. “Nungka akong nagkakosog nin boot na isabi an sakong nasa boot ta natatakot akong tatsaran nia.” Kun kamo nasa kaparehong situwasyon, madonong na pumili nin tamang panahon na ipaaram sa saindong mga magurang an nasa boot nindo. “Aki ko, tawan sako an saimong puso,” an sadol kan Talinhaga 23:26. Pagmaigotan na ipakipag-olay sa sainda nin dayaday an saindong mga pinaghahaditan, bago lumataw an magagabat na problema.

Padagos na Pag-aaboton an Katanosan!

17, 18. Ano an makatatabang sa hoben na magpadagos sa saiyang pag-aabot sa katanosan?

¹⁷ Sa paghinanapos kan ikaduwa niang surat, sinadol ni Pablo si Timoteo: “Ika magpadagos sa mga bagay na saimong nanodan asin nakombensir na paniwalaan.” (2 Timoteo 3:14) Iyan man an dapat nindong gibohon. Dai togotan an siisay man o ano pa man na tentaran kamong pumondo sa saindong pag-aabot sa katanosan. An kinaban ni Satanas​—sa ibong kan gabos na pan-akit kaiyan—​pano-pano nin karatan. Sa dai na mahahaloy iyan asin an gabos na kabtang kaiyan paparaon. (Salmo 92:7) Magin determinado na dai malaglag kadamay kan grupo ni Satanas.

¹⁸ Sa katuyohan na iyan, kaipuhan na permi nindong siyasaton an saindong mga pasohan, kamawotan, asin interes. Ihapot sa sadiri, ‘Pinapagdadanay ko daw an halangkaw na mga pamantayan sa pagtaram asin paggawe kun dai ako naheheling kan sakong mga magurang asin kan mga miembro nin kongregasyon? Anong klaseng mga katood an pinipili ko? An kinabanon daw na mga kaedad ko an nagdidikta kan sakong gubing asin pag-alinyar? Anong mga pasohan an ibinugtak ko para sa sakong sadiri? An sakuya daw na puso nasa bilog na panahon na ministeryo​—o sa sarong karera sa magagadan nang palakaw nin mga bagay ni Satanas?’

19, 20. (a) Taano ta dai maninigong isipon nin sarong hoben na dai nia kaya an mga kahagadan ni Jehova? (b) Anong mga probisyon an maaaprobetsaran nin mga hobenes?

¹⁹ Tibaad naheheling nindo an pangangaipo na liwaton an saindong kaisipan. (2 Corinto 13:11) Dai nindo isipon na iyan dai nindo kaya. Girumdoma, si Jehova dai naghahagad saindo nin sobra sa rasonable. An hapot ni propeta Miqueas: “Anong balos an hinahagad saimo ni Jehova kundi na gumibo ka nin hustisya asin mamoot sa kabootan asin na magin hababa an boot sa paglakaw sa kaibahan kan saimong Dios?” (Miqueas 6:8) Ini dai magigin depisilon kun aaprobetsaran nindo an mga probisyon ni Jehova sa pagtabang saindo. Magin dayupot sa saindong mga magurang. Dayaday na makiasosyar sa Kristianong kongregasyon. Sa partikular, pagmaigotan na makamidbid an kamagurangan sa kongregasyon. Sinda nagmamakolog sa saindong ikararahay asin puwedeng gikanan nin pagsuportar asin pagranga. (Isaias 32:2) Orog sa gabos, pataluboon an dayupot, mainit na relasyon ki Jehova Dios. Sia matao saindo kan kosog asin pagmawot na pag-aaboton an tama!

²⁰ Pero an ibang hobenes pinaluluya an saindang mga paghihingoang tumalubo sa espirituwal paagi sa paghinanyog sa nakararaot na musika. An minasunod na artikulo magtatao nin espesyal na atension sa temang ini.

[Mga Nota sa Ibaba]

Nagigirumdoman daw Nindo?

◻ Taano an mga hobenes ta nangorognang madaling mabiktima kan “tusong mga gibo” ni Satanas?

◻ Taano ta peligroso an dayupot na pakiaasosyar sa kinabanon na mga hobenes?

◻ Paano kamo puwedeng dumulag sa seksuwal na inmoralidad?

◻ Paano nindo mapagmamaigotan na maabot an dayupot na relasyon ki Jehova?

◻ Taano ta mahalagang makikomunikar sa saindong mga magurang?

[Ritrato sa pahina 16]

An mga nag-iilusyonan madonong na nagmiminidbidan sa mga kamugtakan, siring sa pag-iskeyting sa yelo, na dai sinda isinisiblag sa ibang tawo