“Kamo Binakal”

“Kamo binakal. Sa gabos na paagi, pamurawaya an Dios dian sa saindong hawak.”—1 CORINTO 6:20.

1, 2. (a) Ano an nagbukas kan “dalan hale sa kagadanan”? (b) Ano an kinaipuhan na gibohon tanganing gibohon na balido nin legal an atang ni Cristo, siring kan ipinanganino nin ano?

“AN TUNAY na Dios para sa sato Dios nin mga pagliligtas,” sabi kan salmista, “asin sadiri ni Jehova na Soberanong Kagurangnan an mga dalan hale sa kagadanan.” (Salmo 68:20) An atang ni Jesu-Cristo iyo an nagbukas kan dalan na iyan. Alagad tanganing magin balido nin legal an atang na iyan, si Cristo kaipuhan na personal na umatubang sa Dios mismo.

² Ini ipinanganino kan Aldaw nin Pagtubos na an halangkaw na saserdote minalaog sa Kabanalbanale. (Levitico 16:12-15) “Minsan siring,” an isinurat ni apostol Pablo, “kan si Cristo dumatong bilang halangkaw na saserdote . . . , sia luminaog na dara, bako, bakong an dugo nin mga kanding asin nin mga ogbon na baka, kundi an sadiri niang dugo, nin makasaro manongod sa gabos na panahon sa banal na lugar asin nakakua nin daing katapusan na kaligtasan para sa sato. Huli ta si Cristo naglaog, bakong sa banal na lugar na ginibo nin mga kamot, na inarog sa tunay, kundi sa langit mismo, tanganing tumindog sa atubang nin Dios para sa sato.”—Hebreo 9:11, 12, 24.

An Puwersa nin Dugo

3. (a) Ano an pagheling sa dugo kan mga parasamba ki Jehova, asin taano? (b) Ano an nagpapaheling na an dugo may legal na puwersa na tumubos sa mga kasalan?

³ Ano an kabtang kan dugo ni Cristo sa satong kaligtasan? Poon kan mga aldaw ni Noe, ibinilang na nin tunay na mga parasamba na banal an dugo. (Genesis 9:4-6) An dugo may mahalagang kabtang sa proseso nin buhay, ta sinasabi kan Biblia na “an kalag [o buhay] kan laman yaon sa dugo.” (Levitico 17:11) Kaya hinagad kan Pagboot ni Moises na kun iinaatang an sarong hayop, an dugo kaiyan ibubo sa atubangan ni Jehova. Kun minsan an dugo ibinubugtak man sa ibabaw kan mga sungay kan altar. Malinaw, an nakatutubos na puwersa nin sarong atang nasa dugo kaiyan. (Levitico 8:15; 9:9) “Haros gabos na bagay nalilinig nin dugo sono sa Pagboot, asin kun dai nin pagpabolos nin dugo dai nin kapatawadan.”—Hebreo 9:22.

4. (a) Ano an katuyohan na naotob kan paglimitar nin Dios sa paggamit nin dugo? (b) Ano an makahulogan sa paagi nin paggadan ki Jesus?

⁴ Kaya bakong makangangalas na sa irarom kan Pagboot, an ano man na salang paggamit sa dugo pinadudusahan nin kagadanan! (Levitico 17:10) Aram niato gabos na kun an sarong bagay ginibong pambihira, o limitadong marhay sa paggamit, minalangkaw an halaga kaiyan. An pangangalad ni Jehova sa paggamit kaiyan sineguro na an dugo ibilang na, bakong may ordinaryong halaga, kundi mahal, mahalaga. (Gibo 15:29; Hebreo 10:29) Ini kaoyon sa mamuraway na katuyohan para sa dugo ni Cristo. Angay nanggad, sia nagadan sa paagi na nagpangyaring ibubo an saiyang dugo. Kaya, risa na si Cristo bako sanang iinatang an saiyang hawak na tawo kundi ibunubo an saiyang kalag, iinatang an saiya mismong buhay bilang sangkap na tawo! (Isaias 53:12) Dai iwinara ni Cristo an legal na katanosan sa buhay na iyan huli sa pagkabakong sangkap, kaya an saiyang ibinubong dugo may dakulang halaga asin ikapepresentar sa atubangan nin Dios para sa katubosan kan mga kasalan nin tawo.

5. (a) Ano an dinara ni Cristo sa langit, asin taano? (b) Paano narisa na inako nin Dios an atang ni Cristo?

⁵ Dai puwedeng darahon ni Cristo an saiyang literal na dugo sa langit. (1 Corinto 15:50) Imbes, dinara nia an isinimbolo kan dugong iyan: an legal na halaga kan saiyang iinatang na sangkap na buhay na tawo. Sa atubangan nin Dios, saiyang ikapepresentar nin pormal an buhay na iyan bilang pantubos na karibay nin makasalan na katawohan. An pag-ako ni Jehova sa atang na iyan nahayag kan Pentecostes 33 C.E., kan an banal na espiritu umabot sa 120 disipulo sa Jerusalem. (Gibo 2:1-4) Garo baga rogaring na ngonyan ni Cristo an rasa nin tawo paagi sa pagbakal. (Galacia 3:13; 4:5; 2 Pedro 2:1) Kaya, an mga pakinabang sa pantubos puwede nang bumolos sa katawohan.

An Enot na mga Nakinabang sa Pantubos

6. Anong mga areglo an ginibo nin Dios para sa pag-aplikar kan mga pakinabang sa pantubos ni Cristo?

⁶ Minsan siring, ini dai nangahulogan na an katawohan tatawan nin biglang pagkasangkap sa pisikal, ta sagkod na dai nahahale an makasalan na naturalesa nin tawo, dai puwede an pisikal na pagkasangkap. (Roma 7:18-24) Paano asin noarin mahahale an pagigin makasalan? Enot inareglo nin Dios na an 144,000 na langitnon na ‘mga saserdote kan satuyang Dios magsakop bilang hade sa daga’ kaiba ni Cristo Jesus. (Kapahayagan 5:9, 10; 7:4; 14:1-3) Paagi sa sainda an mga pakinabang na itinatao kan pantubos luway-luway na iaaplikar sa katawohan sa laog nin sangribong taon.—1 Corinto 15:24-26; Kapahayagan 21:3, 4.

7. (a) Ano an bagong tipan, sairisay an kalabot dian, asin ano an katuyohan kaiyan? (b) Taano ta kaipuhan na mangyari an kagadanan tanganing magin posible an bagong tipan, asin ano an kabtang kan dugo ni Cristo?

⁷ Sa pag-andam kaiyan, an 144,000 na mga hade-saserdote “binakal hale sa katawohan.” (Kapahayagan 14:4) Ini ginibo paagi sa “bagong tipan.” An tipan na ini sarong kontrata sa pag-oltanan ni Jehova Dios asin kan espirituwal na Israel nin Dios tanganing an mga miembro kaiyan maglingkod na hade asin saserdote. (Jeremias 31:31-34; Galacia 6:16; Hebreo 8:6-13; 1 Pedro 2:9) Pero, paano magigin posible an tipan sa pag-oltanan nin Dios asin nin tawong bakong sangkap? Ipinaliwanag ni Pablo: “Kun igwa nin tipan [sa pag-oltanan nin Dios asin nin bakong sangkap na tawo], an kagadanan kan tawong nakipagtipan kaipuhan na mangyari. Huli ta an tipan balido huli sa gadan na mga biktima, huli ta iyan daing kakosogan sa ano man na panahon mantang buhay pa an tawong nakipagtipan.”—Hebreo 9:16, 17.

8, 9. Paano konektado an pantubos sa bagong tipan?

⁸ Kaya, an pantubos na atang pundamental sa bagong tipan, na an Tagapag-oltanan iyo si Jesus. Si Pablo nagsurat: “Igwa nin sarong Dios, asin sarong tagapag-oltanan sa tahaw nin Dios asin nin mga tawo, an sarong tawo, si Cristo Jesus, na nagtao kan saiyang sadiri bilang katimbang na pantubos para sa gabos—iyo ini an kaipuhan na patotoohan sa saiyang sadiring panahon.” (1 Timoteo 2:5, 6) An mga tataramon na iyan espesyalmenteng aplikado sa 144,000, na iyo an pinakipagtipanan kan bagong tipan.

⁹ Kan an Dios makipagtipan sa Israel sa laman, idto dai nagin balido nin legal sagkod na dai ibinubo an dugo nin hayop bilang atang. (Hebreo 9:18-21) Siring man, tanganing magkaigwa nin puwersa an bagong tipan, kaipuhan na paboloson ni Cristo an “dugo kan tipan.” (Mateo 26:28; Lucas 22:20) Mantang si Cristo naglingkod kapwa bilang Halangkaw na Saserdote asin “tagapag-oltanan nin sarong bagong tipan,” iinaplikar nin Dios an halaga kan dugo ni Jesus sa mga pinalalaog sa bagong tipan, na legal na iinaatribuwir sa sainda an pagigin makatanosan bilang tawo. (Hebreo 9:15; Roma 3:24; 8:1, 2) Sa siring ikalalaog sinda nin Dios sa bagong tipan bilang langitnon na mga hade-saserdote! Bilang saindang Tagapag-oltanan asin Halangkaw na Saserdote, tinatabangan sinda ni Jesus sa pagpapadanay sa malinig na kamugtakan sa atubangan nin Dios.—Hebreo 2:16; 1 Juan 2:1, 2.

Pagtipon kan mga Bagay sa Ibabaw nin Daga

10, 11. (a) Paano an pantubos nakaaabot sa iba pa laen sa linahidan na mga Kristiano? (b) Sairisay an dakulang kadaklan, asin ano an kamugtakan ninda sa atubangan nin Dios?

¹⁰ An linahidan sana daw na mga Kristiano an makakanamit nin pakabutas paagi sa pantubos, an kapatawadan kan saindang mga kasalan? Bako, an Dios nakikipag-uli sa gabos na iba pang bagay sa pakikipagkatoninongan paagi sa dugo na pinabolos sa hariging pasakitan, arog kan ipinaririsa kan Colosas 1:14, 20. Kalabot digdi an mga bagay sa kalangitan (an 144,000) saka an mga bagay sa ibabaw kan daga. An ikaduwa iyo an mga nalilinya para sa daganon na buhay, mga tawong magkakamit nin sangkap na buhay sa Paraiso sa ibabaw kan daga. Nangorogna poon kan 1935 na ginibo an durungan na paghihingoa na tiriponon an mga iyan. Inaapod sinda kan Kapahayagan 7:9-17 na “sarong dakulang kadaklan” na utang an saindang kaligtasan sa Dios asin sa Kordero. Kaipuhan pa sindang makaligtas sa “dakulang kahorasaan” asin ‘giyahan sa mga burabod nin tubig nin buhay,’ ta ipinaheheling kan Kapahayagan 20:5 na an mga siring magigin biyong buhay, may sangkap na buhay na tawo, sa katapusan kan Sangribong Taon na Paghade ni Cristo. An mga makapapasar sa ultimong pagbalo sa saindang pagkasangkap bilang tawo ipahahayag na matanos para sa buhay na daing katapusan sa daga.—Kapahayagan 20:7, 8.

¹¹ Minsan siring, sa preliminaryong paagi, an dakulang kadaklan “hinugasan [na] an saindang mga gubing asin pinaputi iyan sa dugo kan Kordero.” (Kapahayagan 7:14) Si Cristo dai minahiro bilang Tagapag-oltanan kan bagong tipan para sa sainda, pero sinda nakikinabang sa tipan na ini paagi sa ginigibo kan Kahadean nin Dios. Minsan siring, si Cristo minahiro bilang Halangkaw na Saserdote para sa sainda, na paagi sa saiya si Jehova puwede asin talagang iinaaplikar an pantubos sagkod na sinda ngonyan ipinahayag na matanos bilang mga katood nin Dios. (Ikomparar an Santiago 2:23.) Sa laog kan Milenyo, sinda luway-luway na “bubutasan hale sa kaoripnan nin kalapaan [sagkod na sa katapustapusi sinda] magkakaigwa kan mamuraway na katalingkasan kan mga aki nin Dios.”—Roma 8:21.

12. Basado sa ano na an Dios nagkaigwa nin relasyon sa maimbod na mga tawo kan mga panahon antes-Kristiano?

¹² Kun manongod sa saindang kamugtakan sa atubangan nin Dios, tibaad garo baga an dakulang kadaklan daing gayong kalaenan sa antes-Kristianong mga parasamba. Minsan siring, an tratamiento nin Dios sa ikaduwa mantang tinatanaw an maabot na probisyon na pantubos. (Roma 3:25, 26) Nakamtan ninda an kapatawadan sa saindang mga kasalan sa probisyonal sanang paagi. (Salmo 32:1, 2) Imbes na biyong haleon sa sainda an “pakamate sa mga kasalan,” an mga atang na hayop “nagpagirumdom sa mga kasalan.”—Hebreo 10:1-3.

13. Ano an mga bentaha niato sa antes-Kristianong mga lingkod nin Dios?

¹³ Laen man para sa tunay na mga Kristiano ngonyan. Sinda nagsasamba basado sa sarong pantubos na binayadan na! Paagi sa saindang Halangkaw na Saserdote, sinda ‘minadolok na may katalingkasan sa pagtaram sa trono nin dai na kutana maninigong pagkaherak.’ (Hebreo 4:14-16) An pakipag-uli sa Dios bakong linalaoman sanang pangyayari kundi presenteng katunayan! (2 Corinto 5:20) Kun sinda nagkakasala, puwede sindang mag-ako nin tunay na kapatawadan. (Efeso 1:7) Sinda nagkakamit nin tunay na nalinigan na konsensia. (Hebreo 9:9; 10:22; 1 Pedro 3:21) An mga bendisyon na ini panamit sa mamuraway na katalingkasan kan mga aki nin Dios na kakamtan kan mga lingkod ni Jehova sa ngapit!

An Rarom kan Kadonongan asin Pagkamoot nin Dios

14, 15. Paano itinatampok kan pantubos an dai marorop na kadonongan ni Jehova, saka an saiyang katanosan asin pagkamoot?

¹⁴ An pantubos kanigoan kamakangangalas na balaog gikan ki Jehova! Iyan madaling masabotan, pero may igong rarom tanganing hangaan kan pinakamadonong. An pagrepaso niato sa mga paagi nin pagpunsionar kan pantubos haros dai ngani nahiro an ibabaw. Pero, kita minakaragsing kaiba ni apostol Pablo: “O an rarom kan mga kayamanan asin kadonongan patin kaaraman nin Dios! Dai nanggad marorop an saiyang mga paghokom asin dai nanggad masusog an saiyang mga dalan!” (Roma 11:33) Ikinapaheling an kadonongan ni Jehova ta nahimo niang kapwa iligtas an katawohan asin ibindikar an saiyang soberaniya. Paagi sa pantubos, “an katanosan nin Dios ihinayag . . . ibinugtak [si Cristo] nin Dios bilang dolot nin pantubos paagi sa pagtubod sa saiyang dugo.”—Roma 3:21-26.

¹⁵ Dai matatatsaran an Dios sa pagpatawad sa mga kasalan na naginibo kan mga nakaagi kan antes-Kristianong mga parasamba. Dugang pa, dai matatatsaran si Jehova sa pagpahayag sa mga linahidan na matanos bilang saiyang mga aki o sa dakulang kadaklan bilang saiyang mga katood. (Roma 8:33) Sa dakulang kalugihan nia, an Dios nagin biyong legal, o matanos, sa saiyang mga gibo, na biyong pinatutunayan na sala an putik na paghihingako ni Satanas na si Jehova sarong hadeng bakong makatanosan! An daing kapasloan na pagkamoot nin Dios sa saiyang mga linalang ikinapaheling man na dai mapagdududahan.—Roma 5:8-11.

16. (a) Sa anong paagi na an pantubos nakahusay sa isyu manongod sa integridad kan mga lingkod nin Dios? (b) Paano an pantubos nagtatao sato nin pasisikadan sa pagtubod sa nagdadangadang na bagong kinaban nin katanosan?

¹⁶ An paagi na itinao an pantubos nakahusay man sa mga isyu may labot sa integridad kan mga lingkod nin Dios. An pagkuyog sana ni Jesus nakagibo na kaiyan. (Talinhaga 27:11; Roma 5:18, 19) Alagad ta idugang pa dian an pamumuhay nin 144,000 na Kristiano na, sa ibong kan pagtumang ni Satanas, nagmamaimbod sagkod sa kagadanan! (Kapahayagan 2:10) Pinapangyayari kan pantubos para sa mga ini na akoon bilang saindang balos an inmortalidad—buhay na dai malalaglag! (1 Corinto 15:53; Hebreo 7:16) Ginigibo kaining makangingisi an paghihingako ni Satanas na an mga lingkod nin Dios dai mapaniniwalaan! An pantubos nagtao man sato nin marigon na pasisikadan sa pagtubod sa mga panuga nin Dios. Maheheling niato an sarong estruktura nin pagliligtas na “legal na pinasikad” sa atang na pantubos. (Hebreo 8:6) Kaya garantisado an sarong bagong kinaban na may katanosan!—Hebreo 6:16-19.

Dai Pagbasangbasangon an Katuyohan Kaiyan

17. (a) Paano ipinaheheling nin iba na binabasangbasang ninda an katuyohan kan pantubos? (b) Ano an makamomotibar sato na magdanay na malinig sa moral?

¹⁷ Tanganing makinabang sa pantubos, kaipuhan na an saro kumua nin kaaraman, gumibo nin pagtubod, asin mamuhay sono sa mga pamantayan kan Biblia. (Juan 3:16; 17:3) Alagad ta pipira sana an gustong gumibo kaiyan. (Mateo 7:13, 14) Minsan sa tahaw nin tunay na mga Kristiano, an iba tibaad “akoon an dai na kutana maninigong pagkaherak nin Dios pakatapos basangbasangon sana iyan.” (2 Corinto 6:1) Halimbawa, sa nag-aging mga taon rinibo an natiwalag huli sa kasalan sa sekso. Sayang huli sa ginibo para sa sato ni Jehova asin ni Cristo! Bako daw na an pagpahalaga sa pantubos maninigong magpahiro sa saro na likayan an pagigin “nakalingaw sa paglinig sa saiya kan saiyang mga kasalan kaidto”? (2 Pedro 1:9) Kun siring, angay sana na ipinagirumdom ni Pablo sa mga Kristiano: “Kamo binakal. Sa gabos na paagi, pamurawaya an Dios dian sa saindong hawak.” (1 Corinto 6:20) An paggirumdom digdi nagtatao sato nin makosog na motibasyon na magdanay na malinig sa moral!—1 Pedro 1:14-19.

18. Paano an Kristiano na naholog sa magabat na kasalan makaaaprobetsar pa man giraray sa pantubos?

¹⁸ Ano kun an saro naholog na sa magabat na kasalan? Maninigo niang aprobetsaran an kapatawadan na pinapangyayari kan pantubos, na inaako an tabang nin mamomoton na mga paraataman. (Santiago 5:14, 15) Dawa kun kaipuhan an makosog na disiplina, an nagsosolsol na Kristiano maninigong dai manluya huli sa pagtatanos na iyan. (Hebreo 12:5) Nasa sato an makangangalas na garantiyang ini sa Biblia: “Kun ituga niato an satong mga kasalan, sia maimbod asin matanos tanganing ipatawad sa sato an satong mga kasalan asin linigan kita sa gabos na kabikoan.”—1 Juan 1:9.

19. Ano an puwedeng magin punto-de-vista nin Kristiano sa saiyang kasalan na nangyari bago manodan an katotoohan?

¹⁹ Kun beses an mga Kristiano pinanluluyahan na gayo nin boot huli sa nakaaging kasalan. “Bago kami nakalaog sa katotoohan,” an isinurat nin sarong tugang na pinanluluyahan nin boot, “kami mag-agom nagka-genital herpes. Kun beses an pagmate mi maramog, na garo baga kami bakong ‘angay’ sa malinig na organisasyon ni Jehova.” Totoo, dawa pagkatapos na magin Kristiano, an iba tibaad magsakit huli sa nakaaging mga sala. (Galacia 6:7) Pero, mayo nin dahelan na an saro makamateng sia maramog sa pagheling ni Jehova kun sia nagsolsol na. “An dugo kan Cristo” kayang “makalinig kan satong mga konsensia hale sa gadan na mga gibo.”—Hebreo 9:14.

20. Paano an pagtubod sa pantubos makahahale sa Kristiano nin dai kinakaipuhan na pakamate nin kasalan?

²⁰ Iyo, an pagtubod sa pantubos makatatabang na mahale sato an dai kinakaipuhan na mga pakamate nin kasalan. Inadmitir nin sarong hoben na tugang na babae: “Nakikipaglaban ako sa maramog na ugale nin masturbasyon sa laog na nin 11 taon. Sarong beses haros naghale na ako sa kongregasyon, sa paghona na noarin man dai bobooton ni Jehova na an siring kamakababaldeng tawo makadigta sa saiyang kongregasyon.” Alagad kaipuhan na girumdomon niato, si Jehova “marahay asin andam na magpatawad” basta kita maimbod na nakikipaglaban tumang sa karatan, na dai napadadaog dian!—Salmo 86:5.

21. Paano an pantubos maninigong makaapektar sa satong punto-de-vista sa mga nagkasala sa sato?

²¹ An pantubos maninigo man na may labot sa satong pagtratar sa iba. Halimbawa, ano an reaksion nindo kun may nagkakasala saindong kapwa nindo Kristiano? Kamo daw bulaos na nagpapaheling nin arog-Cristong pagpapatawad? (Lucas 17:3, 4) Kamo daw “may maboot na pagkaherak, na lubos na nagpapatarawadtawad [sa iba] siring na an Dios man lubos na nagpatawad saindo paagi ki Cristo”? (Efeso 4:32) O kamo daw may tendensiang magtanom nin mga maraot na boot o pinatutubo an pagsentir? Tunay na iyan pagbasangbasang sa pantubos.—Mateo 6:15.

22, 23. (a) Ano an maninigong magin epekto kan pantubos sa satong mga pasohan asin estilo nin pamumuhay? (b) Ano an maninigong magin desisyon nin gabos na Kristiano manongod sa pantubos?

²² Ultimo, an pag-apresyar sa pantubos maninigong magkaigwa nin hararom na epekto sa satong mga pasohan asin estilo nin pamumuhay. Sabi ni Pablo: “Kamo binakal; umontok na kamo sa pagigin oripon nin mga tawo.” (1 Corinto 7:23) An ekonomiko daw na mga pangangaipo—harong, trabaho, kakanon, gubing—iyo pa man giraray an sentro kan saindong buhay? O hinahanap daw nindo nin enot an Kahadean, na nagtutubod sa panuga nin Dios na tatagamahan kamo? (Mateo 6:25-33) Posible daw na kamo nagpapaoripon sa saindong among pero dai nakatatao nin bastanteng lugar para sa teokratikong mga aktibidad? Girumdoma, si Cristo “itinao an saiyang sadiri para sa sato tanganing . . . makalinig para sa saiya man sana nin sarong banwaan na magigin saiyang sadiri, maigot sa marahay na mga gibo.”—Tito 2:14; 2 Corinto 5:15.

²³ “Salamat sa Dios paagi ki Jesu-Cristo” para sa daing kabaing na balaog na ini—an pantubos! (Roma 7:25) Logod noarin man dai niato basangbasangon an pantubos kundi togotan na iyan magin tunay na puwersa sa satong buhay. Sa isip, sa tataramon, asin sa gibo, logod permi niatong pamurawayon an Dios, na may pagpapasalamat na ginigirumdom na kita binakal.

Mga Hapot sa Repaso

◻ Taano ta ibinibilang na banal an dugo, asin paano iprenesentar an dugo ni Cristo sa atubangan ni Jehova duman sa langit?

◻ Ano an nagin kabtang kan dugo ni Cristo sa pag-aprobar sa bagong tipan?

◻ Paano an pantubos nagtatao nin pakinabang sa mga linahidan asin sa dakulang kadaklan?

◻ Paano niato ikapaheheling na dai niato binabasangbasang an katuyohan kan pantubos?

[Retrato para sa pahina 14]

An nakatutubos na puwersa nin sarong atang nasa dugo kaiyan

[Retrato para sa pahina 15]

An saro na nag-aapresyar sa pagpapatawad nin Dios andam na patawadon an iba