Mga Kristiano​—Ipag-orgolyo Nindo Kun Siisay Kamo!

“Sia na naghahambog, ipaghambog nia si Jehova.”​—1 CORINTO 1:31.

 1. Anong tendensia an risang-risa sa aktitud kan mga tawo sa relihion?

“APATEISMO.” Ginamit kasuarin pa sana nin sarong komentarista sa mga bagay-bagay sa relihion an tataramon na iyan tanganing iladawan an paninindogan nin dakol na tawo sa saindang pagtubod. Sia nagpaliwanag: “An pinakadakulang pangyayari sa modernong relihion bako man talagang sa relihion​—iyan iyo an aktitud na angay na ikakaladawan bilang ‘apateismo.’” Sa pagdetalye, tinawan nia nin kahulogan an apateismo bilang “dai pangungunlabot nin saro sa sadiring relihion.” Dakol na tawo, an sabi nia, “an nagtutubod sa Dios . . . ; bako sana sindang interesadong gayo manongod sa saiya.”

 2. (a) Taano ta bakong makangangalas na an mga tawo nagin indiperente sa espirituwal? (b) An pagkaindiperente nag-aatubang nin anong peligro sa tunay na mga Kristiano?

² An tendensiang ini na pagigin indiperente dai ipinagngangalas kan mga estudyante sa Biblia. (Lucas 18:8) Asin kun mapadapit sa relihion sa pankagabsan, an siring na kadaihan nin interes dapat na laoman. An falsong relihion ilinagalag asin sinudya an katawohan sa halawig nang panahon. (Kapahayagan 17:​15, 16) Minsan siring, para sa tunay na mga Kristiano, an lakop na espiritu nin pagigin daing kaganagana asin kadaihan nin kaigotan nag-aatubang nin peligro. Dai kita puedeng magin indiperente manongod sa satong pagtubod asin mawaran nin kaigotan sa paglilingkod sa Dios asin sa katotoohan sa Biblia. Si Jesus nagpatanid tumang sa arog kaiyan na pagigin gabinhod kan saiyang patanidan an mga Kristiano kan enot na siglo na nag-iistar sa Laodicea: “Ika bakong malipot ni mainit. Kutana ika malipot o mainit. . . . Ika gabinhod.”​—Kapahayagan 3:​15-​18.

Pakamansay sa Kun Siisay Kita

 3. Anong mga aspekto kan saindang midbidan an ikakapag-orgolyo kan mga Kristiano?

³ Tanganing malabanan an espirituwal na pagkaindiperente, kaipuhan na malinaw na mamansayan kan mga Kristiano kun siisay sinda, asin dapat nindang ipag-orgolyo nin rasonable an saindang napapalaen na midbidan. Bilang mga lingkod ni Jehova asin mga disipulo ni Cristo, maheheling niato sa Biblia an mga paglaladawan sa kun siisay kita. Kita “mga saksi” ni Jehova, “mga kapwa trabahador nin Dios,” mantang aktibo niatong ihinihiras an ‘maogmang bareta’ sa iba. (Isaias 43:10; 1 Corinto 3:9; Mateo 24:14) Kita mga tawo na ‘nagkakaminorootmootan.’ (Juan 13:34) An tunay na mga Kristiano mga indibiduwal na “huli sa paggamit kan saindang kakayahan nin pagmansay napatuod na mamidbid kun ano an tama sagkod an sala.” (Hebreo 5:14) Kita “mga ilaw sa kinaban.” (Filipos 2:15) Pinagmamaigotan niato na “papagdanayon na marahay an [satong] gawe-gawe sa tahaw nin mga nasyon.”​—1 Pedro 2:​12; 2 Pedro 3:​11, 14.

 4. Paano madedeterminaran nin sarong parasamba ki Jehova kun ano an dai nia ginigibo?

⁴ Aram man kan tunay na mga parasamba ki Jehova kun ano an dai ninda ginigibo. “Sinda bakong kabtang kan kinaban,” kun paanong an saindang Namomoon, si Jesu-Cristo, bakong kabtang kan kinaban. (Juan 17:16) Nagdadanay sindang siblag sa “mga nasyon,” na “nasa kadikloman sa isip, asin siblag sa buhay na gikan sa Dios.” (Efeso 4:​17, 18) Bilang resulta, an mga parasunod ni Jesus ‘isinisikwal an kabikoan asin an kinabanon na mga mawot asin namumuhay na may toltol na isip asin katanosan patin diosnon na debosyon sa tahaw kan presenteng sistemang ini nin mga bagay.’​—Tito 2:12.

 5. Ano an ipinapakahulogan kan sadol na ‘ipaghambog si Jehova’?

⁵ An satong malinaw na pakamansay sa satong midbidan asin sa satong relasyon sa Soberanong Namamahala kan uniberso nagmomotibar sa sato na ‘ipaghambog si Jehova.’ (1 Corinto 1:31) Anong klaseng paghambog iyan? Bilang tunay na mga Kristiano, ipinag-oorgolyo niato na si Jehova an satong Dios. Sinusunod niato an konseho na: “An nananagsag dapit sa saiya man sana managsag dapit sa saiya man sana huli kan mismong bagay na ini, an pagkaigwa nin pakarorop asin an pagkaigwa nin kaaraman dapit sa sako, na ako si Jehova, an Saro na naggigibo nin mamomoton na kabootan, hustisya asin katanosan sa daga.” (Jeremias 9:24) ‘Ipinaghahambog’ niato an pribilehio na mamidbid an Dios asin ginagamit nia kita tanganing tabangan an iba.

An Angat

 6. Taano ta masakit para sa nagkapira an pagpapadanay nin malinaw na pakamansay sa saindang midbidan bilang mga Kristiano?

⁶ Totoo, an pagpapadanay nin malinaw na pakamansay sa satong napapalaen na midbidan bilang mga Kristiano bakong pirmeng pasil. Nagigirumdoman nin sarong hoben na lalaki na pinadakula bilang sarong Kristiano na sa kadikit na panahon naeksperyensiahan nia an pagigin nasa espirituwal na kaluyahan: “Kun minsan, namamatean ko na dai ko aram kun taano ta saro ako sa Mga Saksi ni Jehova. Natokdoan ako nin katotoohan poon sa pagkaomboy. Kun beses iniisip ko na saro sana man ining establisado asin rekonosidong relihion.” Tibaad tinogotan nin iba na an saindang midbidan maimpluwensiahan kan kinaban nin aling-alingan, mga babasahon asin brodkast, asin kan presenteng bakong diosnon na pananaw sa buhay. (Efeso 2:​2, 3) Tibaad kun minsan maeksperyensiahan nin nagkapirang Kristiano an mga panahon nin pagduda sa sadiri asin pag-ebalwar giraray kan saindang mga prinsipyo sa buhay asin pasohan.

 7. (a) Anong klaseng pagsiyasat sa sadiri an angay para sa mga lingkod nin Dios? (b) Saen nakatago an peligro?

⁷ Sala daw nanggad na siyasaton nin maingat an satong sadiri sa panapanahon? Bako. Tibaad nagigirumdoman nindo na inenkaminar ni apostol Pablo an mga Kristiano na padagos na siyasaton an saindang sadiri: “Padagos na baloon kun baga kamo nasa pagtubod, padagos na patunayan kun ano man nanggad kamo.” (2 Corinto 13:5) Nag-eenkaminar digdi an apostol nin kapakipakinabang na paghihingoa na hanapon kun tibaad nagkaigwa nin ano man na kaluyahan sa espirituwal, sa katuyohan na gumibo nin kinakaipuhan na mga lakdang tanganing itanos iyan. Sa pag-analisar kun baga sia nasa pagtubod, kaipuhan na determinaran nin sarong Kristiano kun baga an saiyang mga tataramon asin gibo kaoyon kan hinihingako niang pagtubod. Minsan siring, kun mapapasala, magigin daing kahulogan asin nakakagadan sa espirituwal an pagsiyasat sa sadiri na nagpapahiro sa sato na aramon an satong “midbidan” o hanapon an mga simbag na mayong koneksion sa relasyon niato ki Jehova o sa Kristianong kongregasyon.a Nungka tang gugustohon na ‘mag-agi nin pagkabagbag may labot sa satong pagtubod’!​—1 Timoteo 1:19.

Bako Kitang Libre sa mga Angat

8, 9. (a) Paano ipinahayag ni Moises an saiyang mga pakamate nin pagduda sa sadiri? (b) Ano an ginibo ni Jehova mapadapit sa mga pagduwaduwa ni Moises? (c) Ano an epekto sa saindo kan mga pagpakosog liwat sa boot ni Jehova?

⁸ An mga Kristiano daw na nakakaeksperyensia kun minsan nin pagduda sa sadiri maninigong mag-isip na nasudya sinda? Siempre dai! Sa katunayan, mararanga sinda sa pakaaram na an siring na mga pagmate bako nang bago. Naeksperyensiahan iyan kan maimbod na mga saksi nin Dios sa nakaaging mga panahon. Kuanon tang halimbawa si Moises, na nagpaheling nin ekstraordinaryong pagtubod, kaimbodan, asin debosyon. Kan asignaran nin garo baga dakulaon na trabaho, may pag-alangan na naghapot si Moises: “Siisay man ako?” (Exodo 3:11) Minalataw na an simbag na nasa isip nia iyo an, ‘Dai akong halaga!’ o ‘Dai akong kakayahan!’ An nagkapirang aspekto kan kamugtakan ni Moises tibaad iyo an nagpangyari sa saiya na makamate na kulang an saiyang kakayahan: Kabilang sia sa sarong nasyon nin mga oripon. Hinaboan sia kan mga Israelita. Bako siang matibay magtaram. (Exodo 1:​13, 14; 2:​11-​14; 4:10) Saro siang pastor, sarong okupasyon na ikinakasurang na marhay kan mga Egipcio. (Genesis 46:34) Bakong makangangalas na inisip nia na bako siang angay na magin parakalda kan inooripon na banwaan nin Dios!

⁹ Inasegurar liwat ni Jehova si Moises paagi sa pagtao sa saiya nin duwang mapuersang panuga: “Ako makakaibanan mo, asin ini an tanda para sa saimo na ako an nagsugo sa saimo: Pakaluwasan mo kan banwaan hale sa Egipto, kamo maglilingkod sa tunay na Dios sa bukid na ini.” (Exodo 3:12) Sinasabihan nin Dios an nagduduwaduwa niang lingkod na magdadanay Siang nasa kaibanan nia. Dugang pa, ipinaparisa ni Jehova na siertong ililigtas nia an saiyang banwaan. Sa bilog na kasaysayan, itinao nin Dios an kaagid na mga panuga nin pagsuportar. Halimbawa, paagi ki Moises sinabihan nia an nasyon kan Israel kan sinda malaog na sa Dagang Panuga: “Magmakosog an boot asin magpakakosog kamo. . . . Si Jehova na saimong Dios iyo an naglalakaw kaiba mo. Dai ka nia babayaan ni papabayaan man nin biyo.” (Deuteronomio 31:6) Inasegurar man ni Jehova si Josue: “Mayo nin siisay man an makakatindog sa atubangan mo sa gabos na aldaw kan saimong buhay. . . . Masasakaibanan mo man ako. Dai taka babayaan ni papabayaan man nin biyo.” (Josue 1:5) Asin nanunuga sia sa mga Kristiano: “Sa ano man na paagi dai taka babayaan ni sa ano man na paagi papabayaan taka.” (Hebreo 13:5) An pagkaigwa kan siring kakosog na suporta maninigong magpangyari sa sato na ipag-orgolyo an pagigin Kristiano!

10, 11. Paano natabangan an Levitang si Asaf na papagdanayon an tamang aktitud dapit sa halaga kan saiyang paglilingkod ki Jehova?

¹⁰ Mga limang siglo pakalihis kan panahon ni Moises, sarong maimbod na Levita na an ngaran Asaf an prangkang nagsurat mapadapit sa saiyang mga pagduda manongod sa halaga kan pagmamaigot na mamuhay nin tanos. Mantang nagmamaigot sia sa paglilingkod sa Dios sa ibong nin mga pagbalo asin sugot, naheling ni Asaf an nagkapira na nagtutuya sa Dios na nagigin orog na makapangyarihan asin asensado. Paano naapektaran si Asaf? “Kun manonongod sa sakuya, an sakong mga bitis haros nagtalikod na,” an inadmitir nia. “Kadikit na sanang mapadalinas an sakuyang mga lakad. Huli ta nauri ako sa mga hambogon, kun naheheling ko an katoninongan kan mga maraot.” Nagpoon siang magduda sa halaga kan pagigin parasamba ki Jehova. “Tunay na basang sana an paglinig ko sa sakuyang puso asin an paghanaw ko kan sakuyang mga kamot sa inosensia,” an inisip ni Asaf. “Asin ako dinadamat sa bilog na aldaw.”​—Salmo 73:​2, 3, 13, 14.

¹¹ Paano inatubang ni Asaf an nakakapurisaw na mga emosyon na ini? Nenegaran daw nia iyan? Dai. Ipinahayag nia iyan sa pamibi sa Dios, siring kan maheheling niato sa ika-73 na Salmo. Ginibo ni Asaf an makahulogan na pagbabago sa saiyang aktitud kan magbisita sia sa santuaryo kan templo. Mantang yaon duman, narealisar nia na an debosyon sa Dios iyo pa man giraray an pinakamarahay na dapat gibohon. Pakatapos na makabalik an saiyang pagpapahalaga sa espirituwal na mga bagay, nasabotan nia na ikinakaongis ni Jehova an karatan asin na sa itinalaan na panahon an mga maraot papadusahan. (Salmo 73:17-​19) Sa paggibo kaiyan, pinalinaw ni Asaf an pakamansay nia sa saiyang midbidan bilang pribilehiadong lingkod ni Jehova. Sinabi nia sa Dios: “Ako danay na nasa kaibanan mo; kinapotan mo an too kong kamot. Paagi kan saimong hatol gigiyahan mo ako, asin pagkatapos dadarahon mo pa ngani ako sa kamurawayan.” (Salmo 73:​23, 24) Ipinag-orgolyo giraray ni Asaf an saiyang Dios.​—Salmo 34:2.

Malinaw an Pakamansay Ninda sa Saindang Midbidan

12, 13. Magtao nin mga halimbawa nin mga personahe sa Biblia na ipinag-orgolyo an saindang relasyon sa Dios.

¹² An sarong paagi na magin malinaw an satong pakamansay sa satong Kristianong midbidan iyo an pagsiyasat asin pag-arog sa pagtubod kan maimbod na mga parasamba, na sa ibong nin kasakitan tunay na ipinag-orgolyo an saindang relasyon sa Dios. Estudyare si Jose, an aking lalaki ni Jacob. Sa hoben pang edad, may katraydoran siang ipinabakal bilang sarong oripon asin dinara sa Egipto, ginatos na kilometro an rayo sa saiyang ama na matatakton sa Dios asin mga kamugtakan na laen na marhay sa mamomoton, mapagsuportar na kamugtakan kan saiyang harong. Mantang nasa Egipto, mayong tawo na mahahagadan ni Jose nin diosnon na sadol, asin kinaipuhan niang atubangon an masakit na mga situwasyon na buminalo sa saiyang moral na gawe-gawe asin pagsarig sa Dios. Minsan siring, malinaw niang ginibo an odok na paghihingoa na papagdanayon an malinaw na pakamansay sa saiyang midbidan bilang lingkod nin Dios, asin nagdanay siang maimbod sa aram niang tama. Ipinag-orgolyo nia an pagigin parasamba ki Jehova dawa sa masakit na mga kamugtakan, asin dai sia naglikay na ipahayag an saiyang namamatean.​—Genesis 39:​7-​10.

¹³ Pakalihis nin walong siglo, an sarong bihag na daragitang Israelita na nagin oripon kan heneral nin Siria na si Naaman dai nalingawan an saiyang midbidan bilang parasamba ki Jehova. Kan magkaigwa nin oportunidad, pusoan siang nagtao nin marahay na patotoo para ki Jehova kan ipamidbid nia si Eliseo bilang propeta kan tunay na Dios. (2 Hade 5:​1-​19) Dakol na taon pakatapos kaiyan, an hoben na si Hadeng Josias, apisar na nasa maraot na mga kamugtakan, ipinaotob an panhaloyan na relihiosong mga pagbabago, hinirahay an templo nin Dios, asin ibinalik an nasyon sa pagsamba ki Jehova. Ipinag-orgolyo nia an saiyang pagtubod asin pagsamba. (2 Cronica, kapitulo 34, 35) Si Daniel asin an saiyang tolong Hebreong kairiba sa Babilonya nungkang liningawan an saindang midbidan bilang mga lingkod ni Jehova, asin dawa napaatubang sa pangigipit asin sugot, pinapagdanay ninda an saindang integridad. Malinaw nanggad, ipinag-orgolyo ninda an pagigin mga lingkod ni Jehova.​—Daniel 1:​8-​20.

Ipag-orgolyo Kun Siisay Kamo

14, 15. Ano an kalabot sa paghambog sa satong midbidan bilang Kristiano?

¹⁴ Nagin mapanggana an mga lingkod na ini nin Dios huling pinatalubo ninda an kapakipakinabang na pakamate nin pag-orgolyo sa saindang kamugtakan sa atubangan nin Dios. Kumusta man kita ngonyan? Ano an kalabot sa paghambog sa satong midbidan bilang Kristiano?

¹⁵ Sa pangenot, kabale digdi an hararom na pag-apresyar sa pagigin kabilang sa banwaan na inaapod sa ngaran ni Jehova, na igwa kan saiyang bendisyon asin pag-oyon. An Dios dai nin pagduwaduwa kun sairisay an sadiri nia. Si apostol Pablo, na nabuhay sa kapanahonan na igwa nin darudakulang karibarawan sa relihion, nagsurat: “Midbid ni Jehova an mga sadiri nia.” (2 Timoteo 2:​19; Bilang 16:5) Ipinag-oorgolyo ni Jehova an “mga sadiri nia.” Sinabi nia: “An nagtitikwil sa saindo nagtitikwil sa basilig kan sakong mata.” (Zacarias 2:8) Malinaw nanggad, namomotan kita ni Jehova. Bilang balos, an satong relasyon sa saiya maninigong nakabasar sa hararom na pagkamoot sa saiya. Si Pablo nagsabi: “Kun an siisay man namomoot sa Dios, an sarong ini midbid nia.”​—1 Corinto 8:3.

16, 17. Taano ta ikakapag-orgolyo kan mga Kristiano, hoben asin gurang, an saindang espirituwal na mana?

¹⁶ Maninigong siyasaton kan mga hoben na pinadakula bilang mga Saksi ni Jehova kun baga an saindang midbidan bilang Kristiano orog na nagkokosog huli sa personal na relasyon sa Dios. Dai sinda puedeng magdepende sana sa pagtubod kan saindang mga magurang. Mapadapit sa kada lingkod nin Dios, si Pablo nagsurat: “Sa saiyang sadiring kagurangnan sia nagtitindog o napupukan.” Huli kaini, nagpadagos si Pablo: “An lambang saro sa sato maninimbag sa Dios para sa saiyang sadiri.” (Roma 14:​4, 12) Siempre pa, an paramas sanang pag-ako sa paagi nin pagsamba kan saindong mga magurang dai makakasustenir sa dayupot, panhaloyan na relasyon ki Jehova.

¹⁷ Sa bilog na kasaysayan, nagkaigwa nin halawig na linya nin mga saksi ni Jehova. Nagpoon iyan sa maimbod na tawong si Abel​—mga 60 siglo na an nakaagi​—sagkod sa “dakulang kadaklan” nin modernong mga Saksi asin padagos sa kaburunyogan nin mga parasamba ki Jehova na magkakamit nin daing katapusan na ngapit. (Kapahayagan 7:9; Hebreo 11:4) Kita an pinakahuri sa halabang linyang ini nin maimbod na mga parasamba. Kanigoan kaabunda kan satong espirituwal na mana!

18. Paano kita isinisiblag sa kinaban paagi kan satong mga prinsipyo sa buhay asin pamantayan?

¹⁸ Kabale man sa satong midbidan bilang Kristiano an mga prinsipyo sa buhay, kualidad, pamantayan, asin karakteristiko na nagpapamidbid sa sato bilang mga Kristiano. Iyan iyo an “Dalan,” an solamenteng mapangganang paagi nin pamumuhay asin nin pagpaogma sa Dios. (Gibo 9:2; Efeso 4:​22-​24) ‘Sinisierto kan mga Kristiano an gabos na bagay’ asin ‘pinapangaptan nin higot an marahay’! (1 Tesalonica 5:21) Igwa kita nin malinaw na pakasabot sa dakulang pagkakalaen kan Kristianismo asin kan kinaban na siblag sa Dios. Malinaw na ilinalaen ni Jehova an tunay na pagsamba sa falso. Paagi sa propeta niang si Malaquias, sinabi nia: “Maheheling nanggad giraray nindo an kalaenan kan matanos asin maraot, kan naglilingkod sa Dios asin kan dai naglingkod sa saiya.”​—Malaquias 3:18.

19. An tunay na mga Kristiano nungka na magigin ano?

¹⁹ Mantang mahalagang marhay sa ribaraw na kinaban na ini an ipaghambog si Jehova, ano an makakatabang sa sato na papagdanayon an kapakipakinabang na pag-orgolyo sa satong Dios asin an malinaw na pakamansay sa satong midbidan bilang Kristiano? Manonompongan an nakakatabang na mga suhestion sa sunod na artikulo. Mientras na ineestudyaran ini, makakasierto kamo sa bagay na ini: An tunay na mga Kristiano nungkang magigin biktima nin “apateismo.”

[Nota sa Ibaba]

Nagigirumdoman daw Nindo?

• Paano magigibo kan mga Kristiano na ‘ipaghambog si Jehova’?

• Ano an nanodan nindo sa halimbawa ni Moises asin Asaf?

• Siisay na mga personahe sa Biblia an ipinag-orgolyo an saindang paglilingkod sa Dios?

• Ano an kalabot sa paghambog niato sa satong midbidan bilang Kristiano?

[Ritrato sa pahina 14]

Sa laog nin kadikit na panahon, si Moises nakamate nin pagduda sa sadiri

[Mga Ritrato sa pahina 15]

Ipinag-orgolyo kan dakol na suanoy na lingkod ni Jehova an saindang napapalaen na midbidan