“Kun an saro na dai nin pagtubod sumuway, pabayaan siang sumuway; an tugang na lalaki o an tugang na babae mayo sa kaoripnan sa siring na mga kamugtakan, kundi inapod kamo nin Dios sa katoninongan.”​—1 CORINTO 7:15.

4. (a) Sumaryohon sa halipot an isinabi ni Pablo sa may agom na mga Kristiano sa 1 Corinto 7:10-16. (b) Noarin masasabing: “Inapod kamo nin Dios sa katoninongan”?

⁴ Arog kan sinabi sa sinusundan na artikulo, sinadol ni apostol Pablo an mga mag-agom na Kristiano na dai pagbayaan an saindang agom. (1 Corinto 7:10-16) Huli sa mga tataramon ni Pablo, kun an agom na dai nin pagtubod magdesisyon na magdanay na kasaro kan saiyang Kristianong agom, an may pagtubod maninigong maghingoa na tabangan sia sa espirituwal. (1 Pedro 3:1-4) An pagkakombertir nia dakula an magigibo tanganing an harong magin lugar nin kapahingaloan asin katoninongan. Pero kun an dai nin pagtubod makosogon an pagtumang sa pagtubod kan saiyang agom na may pagtubod kaya sia magdesisyon na bumulag, ano an magigibo kan Kristiano? Kun probaran kan may pagtubod na piriton siang dai humale, tibaad gibohon kan dai nin pagtubod na magin sobra kasakit an kamugtakan kaya an Kristiano biyong mawawaran nin katoninongan. Kaya para sa ikatotoninong, puwedeng pabayaan kan may pagtubod na humale an dai nin pagtubod. (Mateo 5:9) Solamente kun an agom na dai nin pagtubod humale na masasabi: “Inapod kamo nin Dios sa katoninongan.” An mga tataramon na ini dai puwedeng gamiton tanganing tawan nin katanosan an pagbubulag nin mag-agom na Kristiano sa mga dahelan na bakong Makakasuratan o daing gayo mahalaga.

5. Anong mga hapot an maninigong horophoropon niato ngonyan?

⁵ An lambang pagbubulag o diborsio may indibiduwal na mga dahelan, asin mayo nin “pormula” na totoo sa gabos na kaso. Alagad anong mga problema an tibaad atubangon nin sarong Kristiano na buminulag o diborsiado? Ano daw an magigibo manongod dian? Asin paano makakatabang an iba?

Emosyonal o Seksuwal na mga Pangangaipo

6. Kun manongod sa mga problema, ano an masasabi manongod sa pagbubulag o diborsio?

⁶ Mareresolberan nin pagbulag o diborsio na itinotogot kan Kasuratan an nagkapirang problema. Alagad sa pundamental an siring na mga aksion nagbubunga nin pagsalida nin sarong grupo nin mga problema sa iba. Halimbawa, an sarong Kristianang diborsiada nagsabi: “Dai ako makapagpogol na pasalamatan si Jehova na ngonyan toninong na ako. Pero inadmitir nia: “Bakong madali an pagpadakula sa mga aki bilang nagsosolong magurang. Asin kun beses puwede kang mapungaw na gayo asin mamondo. Minsan sa seksuwal na paagi iyan bakong pasil. An saro kaipuhan na makibagay sa biyo nanggad na napapalaen na buhay.”a

7. Taano ta maninigong mag-ingat na horophoropon nin Kristiano an mga ibubunga nin pagbubulag asin diborsio?

⁷ Kun siring, kun makakapamili an Kristiano, maninigo na maingat niang horophoropon an posibleng mga ibunga nin pagbubulag o diborsio. Halimbawa, horophoropon an emosyonal na mga pangangaipo, tibaad an pagmawot nin sarong babae na may makaibaibang lalaki. (Ikomparar an Genesis 3:16.) An sarong diborsiada tibaad makosog an paglaom na maagom liwat. An iba gustong makabutas sa sarong problemadong pag-agoman, pero andam daw sindang akoon an posibilidad na tibaad mayo sinda nin oportunidad na maagom liwat?

8. (a) Huli sa 1 Corinto 7:11, Ano an maninigong mapagngayongayong horophoropon nin nagbulag na mga Kristianong mag-agom? (b) Anong mga pangangaipo an dai maninigong pasaditon kun hinohorophorop an pagbubulag o diborsio?

⁸ Si Pablo nagsurat: “Kun sia nanggad bumulag, dai sia magpaagom o kun dai makipaghusay sa saiyang agom.” (1 Corinto 7:11) Paagi sa paghihingoa, tibaad posible na an sarong babae “makipaghusay” sa saiyang agom o ‘makipag-uli’ sa saiya. Kun nagbulag an mag-agom na Kristiano, maninigo nindang tawan nin seryoso nanggad, mapagngayongayong paghorophorop an paghusay. Saro pa, dai ninda maninigong lingawan an bagay na an seksuwal na horot puwedeng magtao nin peligro. Ano daw an magigin pagheling sa sainda nin Dios kun an dai ninda pakapaghusay magbunga nin pagkaholog sa inmoralidad? Nag-iilustrar kan peligrong ini an eksperyensia nin sarong babaeng bautisado. Pakatapos nin diborsio, nagpoon siang makipag-date sa sarong lalaking kinabanon, dai nahaloy nagbados, asin natiwalag. Minsan ngani kan huri sia nakabalik, an saiyang eksperyensia nagdodoon kan pangangaipo na magmaan asin mapagngayongayong manarig ki Jehova tanganing malikayan an ‘pagkakasala tumang sa Dios.’ (Genesis 39:7-12) Malinaw man na an emosyonal asin seksuwal na mga pangangaipo dai maninigong pasaditon kun enot pa sanang hinorophorop an pagbulag o diborsio.

Puwedeng Inaan an Kapungawan

9. Paano niato puwedeng tabangan an Kristianong bulag sa agom o diborsiado tanganing mapaglabanan an kapungawan?

⁹ Kun dai malilikayan an pagbubulag o diborsio, kaipuhan na atubangon an ibubungang mga problema. Halimbawa, an kapungawan seryosong problema para sa nagkapirang bulag sa agom o diborsiadong Kristiano. Ano daw an magigibo digdi nin iba? Bueno, an kamagurangan sa kongregasyon asin an iba pa puwedeng magpaheling nin espirituwal na interes sa siring na mga tawo, na hinihingoang pakosogon sinda. (Ikomparar an 1 Tesalonica 5:14.) Kaiba sa iba pang bagay, tibaad paminsanminsan puwede niatong imbitaran an mga tawong ini asin an saindang mga aki sa satong harong para sa simple sanang pagkakan asin nakapagpapakosog na orolay kaiba kan satong pamilya. Dai kaipuhan na mag-andam nin bangkete, ta “orog na marahay an kakanon na gulay na igwa nin pagkamoot kisa bakang pinataba sa sabsaban asin may kaibang pagkaongis.” (Talinhaga 15:17) Puwedeng iiba sa bangging iyan an pag-estorya nin mga eksperyensia sa ministeryo o pangrupong pag-adal bilang pag-andam para sa Kristianong pagtiripon.

10, 11. (a) Sa ano pang ibang paagi matatabangan an Kristianong bulag sa agom o diborsiado? (b) Ano an dahelan na mag-ingat?

¹⁰ An pag-imbitar sa magurang na diborsiado o bulag sa agom asin sa saiyang mga aki na umiba sa saindong pamilya sa ministeryo sa langtad puwede man na makatabang sainda na maatubang an kapungawan.” Siyempre, an iba dai makasasalida sa nawarang magurang, pero an sarong diborsiadang Kristiana nagsabi: “An mga kasakitan sa pagpadakula sa sakong mga aki na mayo nin lalaki sa harong guminian na gayo huli sa tabang nin kamagurangan asin mga lingkod sa kongregasyon na naghingoang makahipno sa praktikal na mga paagi.

¹¹ Pero may dahelan na mag-ingat. An sarong tugang na babae nag-admitir: “Mantang an aki ko daing ama, an sarong tugang na lalaki mabooton na nagpaheling nin interes sa saiya. . . . Naheling ko kun gurano sia kaboot asin kamatinao sa sakong aki, asin nagpoon na tumubo sako an salang mga horot. Garo idto si David na tinubuan nin salang horot para sa bagay na bakong saiya.” (2 Samuel 11:1-4) Minsan ngani dai nangyaring seksuwal na inmoralidad, ikinasopog kan babaeng ini an saiyang mga kaisipan asin nan-aakit na mga aksion, naghagad nin tawad ki Jehova, asin pinutol an pakikiasosyar sa tugang. Ini nag-iilustrar nanggad kan pangangaipo na isikwal an salang mga horot asin “likayan an ano man na klase nin karatan!​—1 Tesalonica 5:22, The New American Bible; Galacia 5:24.

12. An saro puwedeng inaan an saiyang kapungawan paagi sa anong positibong hiro?

¹² An kapungawan puwedeng mainaan kan paggibo nin mga bagay para sa iba. “Kun ika sibot sa paghihingoang makiasosyar asin tumabang sa iba, mayo nin lugar para sa pagkaherak sa sadiri asin kapungawan,” sabi nin sarong tugang na babae na naputol an relasyon sa agom. An siring na “paghihingoang makiasosyar” nin sarong bulag na agom o diborsiado puwedeng kaiba an pag-imbitar sa sarong pamilya sa saiyang harong para sa sarong banggi nin nakapakokosog sa espirituwal na asosasyon. Kun ini bihirang magin posible huli sa pinansial o ibang dahelan, puwede nindong bisitahon asin pakosogon an mga naghehelang o iba pa. Tibaad matabangan man nindo an mga gurang na sa saindang panananaod o iba pang trabaho. Tumabang sa siring na mga paagi, asin magkakaigwa kamo nin orog na ebidensia na “igwang orog na kaogmahan sa pagtao kisa pag-ako.”​—Gibo 20:35.

13. Ano an saro pang pantabang sa paghale sa kapungawan?

¹³ An saro pang pantabang sa pagkahale nin kapungawan iyo an regular na pagsadiring boot na umiba sa mga kapagtubod sa paghuhulit kan Kahadean. “Kun beses, talagang napupungaw ako sa agom,” an inadmitir nin sarong tugang na babae, “alagad paagi sa nadugangan na paglilingkod ko sa langtad asin sa bagong libertad na makiasosyar sa mga tugang na lalaki asin babae, an mga panahon na ini bihirang marhay asin halipot sana.” An regular na pagharongharong puwedeng gumiya sa mga pagdalaw liwat asin pag-adal sa Biblia kaiba nin mga interesado, na an iba tibaad magin nagdusay na mga lingkod ni Jehova. Siyempre, an paghale sa kapungawan bakong iyo an dahelan niato sa pakikikabtang sa ministeryo, alagad iyan puwedeng magin sarong epekto kan magayagaya asin maogmang aktibidad na ini.​—Talinhaga 10:22.

14. Anong mga aktibidad an maninigong magkaigwa nin marahay na epekto sa mga Kristianong bulag sa agom o diborsiado?

¹⁴ An gabos na banwaan ni Jehova makikinabang sa espirituwal sa pakikikabtang sa ministeryo, pagpartisipar sa Kristianong mga pagtiripon, asin ‘paghanap nguna sa Kahadean.’ (Mateo 6:33) Mantang an nakararahay na mga aktibidad na ini may marahay na epekto sa mga lingkod ni Jehova sa pankagabsan, an mga gibong iyan puwede man na magpakosog sa mga Kristianong bulag sa agom o diborsiado. Dai, an mga aktibidad na ini dai makareresolber sa gabos nindang problema, pero iyan maninigong makapakarhay sa saindang punto-de-vista.

An Pamibi May Mahalagang Kabtang

15. Ano an puwedeng magin kabtang nin pamibi sa buhay kan mga kaipuhan na makibagay sa pagsosolo liwat?

¹⁵ An sarong tugang na Kristiana na kinaipuhan na makibagay sa pagsosolo liwat natabangan paagi sa “pagigin sibot sa paglilingkod sa langtad . . . asin sa pagsongko sa mga may helang, gurang na, asin inaktibo.” Alagad idinugang nia: “Basta ako mapungaw, nanonongko ako asin namimibi para sa kosog, sa pakaaram na si Satanas sibot-sibot.” Iyo, an odok sa pusong pamibi mahalaga tanganing mapagdanay an integridad sa Dios. Puwedeng iiba sa mga pamibi nin mga Kristianong bulag sa agom o diborsiado an paghagad sa espiritu ni Jehova asin sa bunga kaiyan na pagpopogol sa sadiri tanganing mapogolan an seksuwal na mga horot. (Lucas 11:13; Galacia 5:22, 23; Colosas 3:5, 6) Dugang pa, mantang an pagdedesisyon na dati ginigibo nin agom na lalaki puwedeng magin problema nin pirang babaeng bulag sa agom o diborsiada, tibaad kaipuhan man na arangon ninda an tabang nin Dios sa pagdedesisyon nin madonong asin pag-atubang sa laen-laen na mga pagbalo.—Santiago 1:2-8.

16. Mapadapit sa pagbulag o diborsio, ano an masasabi manongod sa mga pakamate nin kasalan?

¹⁶ An pakamate nin kasalan puwedeng magtao nin kasakitan. An sarong Kristiano nag-admitir: “An kasalan na namamatean mo sa panahon nin diborsio, dawa kun bakong ika an may kasalan, puwedeng magin makosogon.” Siyempre, an pakamate nin kasalan natural sana kun nangyari an pagbubulag o diborsio huli ta an saro daing katanosan na nagsayumang otobon an mga obligasyon sa agom. (1 Corinto 7:3-5) Alagad kun an pagbubulag o diborsio nangyari huli sa Makakasuratan na dahelan pakalihis nin mapagngayongayong paghorop-horop, tama sana na arangon an tabang ni Jehova na mapaglabanan an dai dapat na mga pakamate nin kasalan. Puwedeng idagdag na an kamagurangan sa kongregasyon maninigong magmaan na an itaong hatol basado sa Biblia asin dai pagpagabaton an saindang hatol sa paagi na an Kristiano pinamamate nin kasalan manongod sa pagkua o pagtogot sa pagbubulag o diborsio na itinotogot kan Biblia.

Iniingatan kan “Katoninongan nin Dios”

17. Ano an makakatabang sa gabos na Kristiano na magin maogma asin marigon sa maribok na kinaban na ini?

¹⁷ An mga Kristianong bulag sa agom o diborsiado parateng may pambihirang mga problema. Pero, sa limitadong sokol, “an siring man na mga pagtios nangyayari sa bilog na kasararoan nin [satong] mga tugang sa kinaban.” (1 Pedro 5:6-11) Halimbawa, an paglamag nakakaapektar sa gabos na naglilingkod ki Jehova, asin an kadaklan na Kristiano napapaatubang sa mga problema sa pinansial o sa salud, mga pagkabigo, sugot asin iba pa. Kun siring, kapareho nin ibang saksi ni Jehova, an Kristianong bulag sa agom o diborsiado kaipuhan na padagos na panigoan an espirituwal na mga pangangaipo paagi sa pag-adal sa Biblia, regular na pag-atender sa mga pagtiripon, aktibong ministeryo sa langtad, kompletong buhay sa banal na paglilingkod, asin daing ontok na pamibi tanganing makapagdanay na dayupot ki Jehova. (Mateo 5:3) An dai pakagibo kaiyan magsasapeligro kan espirituwalidad nin siisay man na Kristiano mantang an ‘paghanap nguna sa Kahadean’ nagtatao sa lambang maimbod na saksi ni Jehova nin dakulang kaogmahan asin karigonan sa maribok na kinaban na ini.

18. Anong mga hapot asin paghiro an maninigong odok na horophoropon nin mga Kristianong bulag sa agom?

¹⁸ An satong espirituwal na karigonan depende sa personal na pag-aplikar kan Tataramon nin Dios. Kun siring, kun kamo Kristiano na bulag sa agom na dusay man sa Dios, isinapuso daw nindo an hatol ni Pablo sa 1 Corinto 7:10-16? Nangorogna kun nahaloyhaloy na an pagbubulag, marahay na ipamibi nindo nin odok an pakikihusay. Puwede man nindong ihapot sa saindong sadiri: Ano an linalaoman sa sako ni Jehova bilang may agom? Bako daw na an Kristianong mga mag-agom maninigong ioyon an saindang buhay sa banal na mga kahagadan para sa mga nagpakasal? Posible daw na dai mi nakakamtan an bendisyon ni Jehova huli ta nagkukulang kaming igalang an samong mga sinumpaan sa kasal? Isip-isipa an karahayan na tibaad ibunga kun kamo mapakumbabang mag-oolay sa mga bagay, odok na mamimibi, asin maigot na maghihingoa na iaplikar an Tataramon nin Dios sa saindong buhay. Marahayon nanggad kun maresolberan nindong duwa an mga problema nindo mag-agom asin mag-iba giraray sa harong na may kapahingaloan asin katoninongan!

19. Sono sa Filipos 4:6, 7, anong napakahalagang bagay an puwedeng kamtan nin gabos na lingkod ni Jehova?

¹⁹ An gabos na maimbod na lingkod ni Jehova nagkakaipo asin puwedeng magkamit nin sarong bagay na napakahalaga—“an katoninongan nin Dios na minalampas sa gabos na kaisipan.” Bilang mga Kristiano, puwede niatong kamtan an napakahalagang katoninongan na ini kun kukuyugon niato an mga tataramon ni Pablo: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip sa paagi ni Cristo Jesus.”​—Filipos 4:6, 7.

20. (a) Ano an “katoninongan nin Dios”? (b) Ano man an kamugtakan niato kun manongod sa agom, ano an maninigo niatong gibohon?

²⁰ An katoninongan na iyan itinao nin Dios na katrangkilohan asin pagkakalma, minsan sa tahaw kan pinakamasakit na kamugtakan. Iyan gikan sa dayupot na relasyon ki Jehova asin sa pakaaram na ginigibo niato an ikinaoogma kan saiyang mga mata. An mga igwa kan “katoninongan nin Dios” tinotogotan an saiyang espiritu na magmotibar sa sainda, asin dai sinda nadadaog nin kahaditan. Taano? Huli ta aram ninda na mayo nin ano man na na tinotogotan na mangyari sa sainda na dai itinotogot nin Dios. (Efeso 4:30; ikomparar an Gibo 11:26.) Kaya baga man kita daing agom o may agom, bulag sa agom o diborsiado, mahalon niato “an katoninongan nin Dios.” Asin magkaigwa logod kita nin panarig na arog ki David, na nagsabi: “Sa katoninongan ako mahigda asin matotorog, huli ta ika sana, O Jehova, an nagpapaontok sa sako sa katiwasayan.”​—Salmo 4:8.