Dai nin Makakapaglingkod sa Duwang Kagurangnan

1-3. (a) Anong mga problema sa pinansiyal an inaatubang kan dakul ngunyan, asin paano iyan pinupurbaran na resolberan kan nagkapira? (Hilingon an ritrato sa kapinunan kan artikulo.) (b) Ano an mga ikinakahadit kan mga magurang na nag-iisip magtrabaho sa ibang nasyon kun dapit sa pagpadakula nin aki?

“AN AGOM kong si James nagpupuli aroaldaw hali sa trabaho na pagal-pagal, pero kulang an ginaganar niya para sa pang-aroaldaw ming mga pangangaipo,” an sabi ni Marilyn.a “Gusto kong mapagian an saiyang pasan asin makatabang na maibakal an aki ming si Jimmy nin nagkapirang magagayon na gamit arog kan sa mga kaeskuwela niya.” Gusto man ni Marilyn na matabangan an iba pa niyang kapamilya asin makatipon nin kuwarta na magagamit ninda sa puturo. Dakul sa mga katuod niya an nagtrabaho sa ibang nasyon tanganing magganar nin dakul na kuwarta. Pero kan inisip-isip niya man na magtrabaho harayo sa saiyang pamilya, magkasalak na emosyon an namatian niya. Taano?

² Natatakot nanggad si Marilyn na bayaan an namumutan niyang marhay na pamilya asin an marahay nindang espirituwal na rutina. Pero, nangatanusan siya na an iba nagtrabaho man sa ibang nasyon sa laog nin dikit na panahon, asin garo baga nagdanay man na makusog sa espirituwal an saindang pamilya. Pero iniisip-isip niya kun paano niya mapapadakula si Jimmy kun yaon siya sa harayo. Magigin mapanggana daw siya sa pagtabang na mapadakula an aki niya ‘sa pagsagwi asin sa hatol’ ni Jehova paagi sa Internet?—Efe. 6:4.

³ Naghagad nin paggiya si Marilyn. Habo kan agom niya na maghali siya, pero sinabi kan agom niya na dai niya siya pupugulan. Sinadol siya kan mga elder asin kan iba pa sa kongregasyon na dai maghali, pero sinabihan siya kan nagkapirang sister na magtrabaho sa ibang nasyon. “Kun namumutan mo an saimong pamilya, mahali ka,” an sabi ninda sa saiya. “Makakapaglingkod ka pa man giraray ki Jehova.” Dawa ngani naghahadit siya, nagpaaram si Marilyn ki James asin Jimmy asin naghali tanganing magtrabaho sa ibang nasyon. “Dai man ako mawawara nin haloy,” an pangako niya.

 4. Taano ta dakul an nagpapasiring sa ibang lugar, asin sa parati, siisay an nag-aataman sa mga aki ninda?

⁴ Habo ni Jehova na an mga lingkod niya mamuhay sa grabeng kadukhaan, asin an pagbalyo sa ibang lugar iyo an saro sa haluyon nang mga remedyo sa kadukhaan. (Sal. 37:25; Tal. 30:8) Tanganing malikayan an grabeng gutom, isinugo sa Ehipto kan patriyarkang si Jacob an saiyang mga aking lalaki tanganing magbakal nin kakanon.b (Gen. 42:1, 2) Ngunyan, an kadaklan sa mga nagpapasiring sa ibang lugar asin binabayaan an saindang pamilya dai man nakakaeksperyensiya nin grabeng gutom. Minsan siring, tibaad kaipuhan nindang magtrabaho huli sa dakulaon na utang. An iba nagmamawot sanang umasenso an pamilya ninda. Tanganing makamtan an mga kamawutan na iyan sa sarong nagluluyang ekonomiya, dakul an nagdesisyon na magtrabaho harayo sa pamilya ninda, sa laog man o sa luwas kan saindang nasyon. Sa parati, iwinawalat ninda an saindang mga aking menor-de-edad sa saindang agom, mas matuang aki, lolo saka lola, iba pang paryente, o mga katuod. Minsan ngani namumundo sindang bayaan an agom o mga aki ninda, naghuhuna an dakul na nagtatrabaho sa ibang nasyon na mayo na sindang ibang mapagpipilian.

5, 6. (a) Ano an itinukdo ni Jesus manungod sa kaugmahan asin seguridad? (b) Tinukduan ni Jesus an saiyang mga parasunod na ipamibi an anong materyal na mga bagay? (c) Sa anong paagi kita binebendisyunan ni Jehova?

⁵ Kan panahon ni Jesus, dakul man an dukha asin daing sukat, asin tibaad naghuhuna sinda na magigin mas maugma asin tiwasay sana sinda kun dakul an kuwarta ninda. (Mar. 14:7) Pero habo ni Jesus na ibugtak kan mga tawo an saindang paglaom sa temporaryong mga bagay. Gusto niyang manarig sinda sa Gikanan nin nagdadanay na kayamanan—si Jehova. Ipinaliwanag ni Jesus sa saiyang Sermon sa Bukid na an tunay na kaugmahan asin seguridad dai nakadepende sa materyal na mga bagay, ni sa sadiri niyatong mga paghihinguwa, kundi sa pakikikatuod ta sa satong langitnon na Ama.

⁶ Sa saiyang modelong pamibi, tinukduan kita ni Jesus na ipamibi, bako an pinansiyal na seguridad ta, kundi an satong pang-aroaldaw na pangangaipo, an satong ‘kakanon sa aroaldaw.’ Idinuon niya sa mga nagdadangog sa saiya: ‘Dai kamo magtipon nin mga kayamanan sa kinaban. Kundi magtipon kamo sa saindo nin mga kayamanan sa langit.’ (Mat. 6:9, 11, 19, 20) Makakapagtiwala kita na bebendisyunan kita ni Jehova arog kan ipinanuga niya. An bendisyon nin Diyos bakong basta sana pagpahiling nin pag-uyon kundi minahiro siya tanganing itao an talagang kaipuhan ta. Tunay nanggad, an solamenteng paagi na makamtan an tunay na kaugmahan asin seguridad iyo na magtiwala sa satong mapagmakulog na Ama imbes na sa kuwarta.—Basahon an Mateo 6:24, 25, 31-34.

 7. (a) Kiisay itinao ni Jehova an responsabilidad nin pagpadakula sa mga aki? (b) Taano ta an mga magurang kaipuhan na magkatabang sa pagpadakula kan saindang mga aki?

⁷ Kaiba sa ‘paghanap nguna sa katanusan nin Diyos’ an pagkaigwa kan pagmansay ni Jehova kun dapit sa mga obligasyon sa pamilya. An Ley ni Moises igwa kan prinsipyong ini na aplikado sa mga Kristiyano: Kaipuhan na itao kan mga magurang an espirituwal na pagsasanay sa sadiri nindang mga aki. (Basahon an Deuteronomio 6:6, 7.) Itinao nin Diyos an responsabilidad na ini sa mga magurang, bako sa mga lolo asin lola, o sa kiisay pa man. Sinabi ni Hading Solomon: ‘Paghinanyog, sakuyang aki, kan ipinaghuhulit kan saimong ama, dai mo pagbasang-basangon an pasunod kan saimong ina.’ (Tal. 1:8) Gusto ni Jehova na an mga magurang parehong presente sa paggiya asin pagtukdo sa saindang mga aki. (Tal. 31:10, 27, 28) An kadaklan sa nanunudan kan mga aki sa mga magurang ninda, lalo na sa espirituwal na mga bagay, hali sa nadadangog ninda sa aroaldaw na ipinapakipag-ulay kan saindang mga magurang manungod ki Jehova asin sa pag-obserbar sa mismong halimbawa ninda.

8, 9. (a) Anong mga pagbabago an parating nangyayari kun an sarong magurang harayo sa pamilya? (b) Ano an nagigin danyos kun bakong magkaibanan an mga magurang asin mga aki?

⁸ Bago magpasiring sa ibang nasyon, pinupurbaran man kan mga gustong magtrabaho duman na turutimbangon an kalabot na mga peligro asin sakripisyo, pero pira sana an patiinot na nakakahiling kan gabos na magigin resulta kan pagbaya ninda sa saindang pamilya. (Tal. 22:3)c Pagkahali tulos ni Marilyn, namatian niya an grabeng kulog na maparayo sa pamilya. Arog man kaiyan an namatian kan agom asin aki niya. Pirmi siyang hinahapot kan aki pang si Jimmy: “Ta’no ta binayaan mo po ako?” Asin kan an plano ni Marilyn na siya mawawara sana nin pirang bulan nagin nang mga taon, nahiling niya an nakakapurisaw na mga pagbabago sa saiyang pamilya. Si Jimmy dai na nagpaparagirong asin nagrarayo na an buot sa saiya. Mamundo niyang nagigirumduman, “Nawara an pagpadangat niya sa sako.”

⁹ Kun an mga magurang asin mga aki bakong magkairiba bilang sarong pamilya, puwedeng maapektaran an saindang emosyon asin pamantayan sa moral.d Mantang mas sadit an mga aki asin naghahaloy an pagkasuway ninda sa magurang, mas grabe man an nagigin danyos. Ipinaliwanag ni Marilyn ki Jimmy na para man sa kapakinabangan kaini an pagsakripisyo niya. Pero para ki Jimmy, garo baga inabandonar siya kan saiyang ina. Kan primero, ikinaanggot niya an pagkawara kan saiyang ina. Pero kan huri, pag minabisita si Marilyn, ikinakaanggot na niya an presensiya kaini. Arog kan dakul na aking binayaan kan magurang, para ki Jimmy naiwara na kan saiyang ina an deretso kaini na kuyugon asin padangaton ni Jimmy.—Basahon an Talinhaga 29:15.e

10. (a) Paano makakaapektar sa mga aki an pagtao nin materyal na mga regalo karibay kan presensiya nin magurang? (b) Ano an kulang kun hinihinguwa nin sarong magurang na padakulaon an saiyang aki mantang siya nasa harayo?

¹⁰ Minsan ngani pinagmamaigutan ni Marilyn na hipnuan an pagigin harayo niya ki Jimmy paagi sa pagpadara nin kuwarta asin mga regalo, nahihiling niyang irinarayo niya sa saiya an buot kan aki niya, asin dai tinutuyong tinutukduan ini na inuton an materyal na mga bagay imbes na an espirituwal na mga bagay asin an pamilya. (Tal. 22:6) “Dai ka na magpuli,” an sabi ni Jimmy sa saiya. “Basta may padara ka pirming regalo.” Narealisar ni Marilyn na dai niya mapapadakula an aki niya paagi sa surat, pag-apod sa telepono, o pakikipag-video chat. Sabi niya: “Dai mo makukugos o mahahadukan sa Internet an saimong aki.”

11. (a) Paano maaapektaran an mag-agom kun magkarayo sinda huli sa trabaho? (b) Paano narealisar nin sarong sister na dapat siyang magpuli sa pamilya niya?

¹¹ Naapektaran man an relasyon ni Marilyn ki Jehova asin sa agom niyang si James. An panahon niya sa pakikiasosyar sa kongregasyon asin sa ministeryo limitado sana sa sarong aldaw kada semana o kulang pa, asin kaipuhan pa niyang labanan an pang-aakit kan saiyang amo na makipagsekso. Huling mayo nin agom na mapagsasabihan nin problema, si Marilyn asin si James parehong nahulog an buot sa iba asin dikit pang makagibo nin seksuwal na imoralidad. Narealisar ni Marilyn na dawa ngani pareho sindang dai nakakomiter nin pagsambay, dai ninda nasusunod an pagbuot kan Bibliya na paniguan an emosyonal asin seksuwal na pangangaipo kan lambang saro huling magkarayo sinda. Dai ninda magigibong sabihon sa kada saro an biglang naisip ninda, o maghilingan saka magngiritan ano man na oras, ni magkaputan nin kamot, mamumuton na magkugusan, o may kadayuputan na ipahayag an ‘pagkamuot,’ o itao an ‘nanunungod’ sa saindang agom. (Awit ni Sal. 1:2; 1 Cor. 7:3, 5) Asin dai ninda lubos na masasamba si Jehova kaiba an aki ninda. “Kan madangog ko sa sarong kumbensiyon na mahalagang marhay an regular na pampamilyang pagsamba tanganing makaligtas kami sa dakulang aldaw ni Jehova, nasabutan ko na kaipuhan kong magpuli,” an nagigirumduman ni Marilyn. “Dapat kong pakarhayon giraray an sakong espirituwalidad asin buhay pampamilya.”

12. Anong sadol sa Kasuratan an puwedeng itao sa mga harayo sa pamilya ninda?

¹² Iba-iba an mga reaksiyon sa desisyon ni Marilyn na magpuli sa pamilya niya. Tinawan siya nin komendasyon kan mga elder sa kongregasyon na inaasosyaran niya sa ibang nasyon huli sa saiyang kusog nin buot asin pagtubod. Pero an nagkapira na arog man niyang binayaan an agom asin pamilya dai uyon sa desisyon niya. Imbes na arugon an marahay na halimbawa niya, pinurbaran pa nindang disganaron siya. “Dai mahaloy, mabalik ka giraray digdi,” an sabi ninda. “Paano kamo mabubuhay kun mapuli ka?” Imbes na magkomento nin nakakadisganar, an mga kapwa Kristiyano maninigong magsadol sa ‘mga aki pang babayi na mamuot sa saindang mga agom na lalaki, na mamuot sa saindang mga aki, na magin mga paragibo sa harong,’ an sadiri nindang harong, ‘tanganing an tataramon nin Diyos dai malanghadan.’—Basahon an Tito 2:3-5.

13, 14. Taano ta nangangaipo nin pagtubod an pag-inot ki Jehova kisa sa mga inaasahan kan pamilya? Iilustrar.

¹³ Dakul na nagtatrabaho sa ibang nasyon an nagdakula sa kultura na iniinot an tradisyon asin obligasyon sa pamilya, lalo na an sa mga magurang. Pagpahiling nanggad nin pagtubod an dai pagsunod nin sarong Kristiyano sa popular na kaugalian o mga kahagadan kan pamilya tanganing mapaugma si Jehova.

¹⁴ Konsideraron an istorya ni Carin: “Kan ipangaki ko si Don, kaming mag-agom nagtatrabaho sa ibang nasyon, asin nag-aadal pa sana ako kan Bibliya. Inaasahan kan gabos na kapamilya ko na ipupuli ko si Don para padakulaon kan mga magurang ko sagkod na magin asensado na kami.” Kan iinsistir ni Carin na siya mismo an mapadakula ki Don, inapod siyang hugakon kan mga paryente asin agom niya asin pinagngisihan siya huling inisip ninda na habo na niyang magtrabaho. “An totoo, kan mga panahon na idto, inisip ko na mayo man nin maraot kun iwawalat ko si Don sa mga magurang ko nin pirang taon,” an sabi ni Carin. “Pero aram ko na an pagpadakula sa aki mi itinao ni Jehova sa samo na mga magurang niya.” Kan magbados giraray si Carin, pinirit siya kan agom niyang bakong Saksi na ipalaglag an aki. An marahay na desisyon ni Carin kan inot nagpakusog kan saiyang pagtubod, kaya marigon giraray siyang nanindugan ki Jehova. Ngunyan, maugma sindang mag-agom kaiba an saindang mga aki huling nagdanay sinda gabos na magkairibanan. Kun nagtugot si Carin na padakulaon kan iba an saro o an duwa niyang aki, tibaad iba nanggad an nagin resulta.

15, 16. (a) Isaysay an eksperyensiya nin sarong sister na ipinaataman sa iba. (b) Taano ta dai niya iyan ginibo sa sadiri niyang aki?

¹⁵ Si Vicky, na sarong Saksi, nagsabi: “Sa laog nin pirang taon, pinadakula ako kan sakong lola mantang an nguhod kong tugang na babayi kaiba kan mga magurang ko. Kan makaibanan ko giraray an mga magurang ko, nagbago na an namamatian ko sa sainda. An tugang ko dai nag-aalangan na sabihon sa sainda an nasa buot niya, kuguson sinda, asin magin dayupot sa sainda. Harayo an buot ko sa mga magurang ko, asin maski kan ako adulto na, nasasakitan akong ipahiling sa sainda an totoo kong namamatian. Inasegurar ming magtugang an samong mga magurang na aatamanon mi sinda kun gurang na sinda. Pero gigibuhon ko iyan huli ta obligasyon ko iyan, mantang an tugang ko aatamanon sinda huli sa pagkamuot.”

¹⁶ “Ngunyan, gusto kan sakong ina na darahon ko sa saiya an aki kong babayi tanganing siya an magpadakula, arog kan ginibo niya kan darahon niya ako sa saiyang ina. Mataktika akong nagsayuma,” an sabi ni Vicky. “Gusto ming mag-agom na padakulaon an samong aki sa dalan ni Jehova. Asin habo kong rauton an magigin relasyon ko sa aki ko.” Nanudan ni Vicky na an solamenteng paagi na magin mapanggana iyo na inuton si Jehova asin an mga prinsipyo Niya kisa sa pinansiyal na mga pasuhan asin inaasahan kan pamilya. Malinaw na sinabi ni Jesus: ‘Dai nin siisay man na makakapaglingkod sa duwang kagurangnan,’ sa Diyos asin sa Kayamanan.—Mat. 6:24; Ex. 23:2.

17, 18. (a) An mga Kristiyano pirming may anong pagpipilian? (b) Anong mga hapot an tutukaron ta sa sunod na artikulo?

¹⁷ Nangako an satong Ama, si Jehova, na tatabangan niya kitang makua an mga bagay na talagang kaipuhan niyato kun iinuton ta sa satong buhay an Kahadian asin an saiyang katanusan. (Mat. 6:33) Kaya, pirming may pagpipilian an tunay na mga Kristiyano. Nanunuga si Jehova na matao siya nin ‘luluwasan’ asin dai niyato kaipuhan na ikompromiso an mga prinsipyo sa Bibliya, ano man na kadipisilan an mapaatubang sa sato. (Basahon an 1 Corinto 10:13.) Si Jehova ‘mahiro para sa sato’ kun kita ‘matiyagang mahalat’ sa saiya asin kun kita ‘masarig sa saiya’ paagi sa pagpamibi para sa kadunungan saka paggiya, asin paagi sa pagsunod kan saiyang mga pagbuot asin prinsipyo. (Sal. 37:5, 7, NW) Bebendisyunan niya an sinserong mga paghihinguwa ta na siya sana an paglingkudan bilang an tunay na Kagurangnan. Kun siya an iinuton ta, gigibuhon niyang “mapanggana” an satong buhay.—Ikumparar an Genesis 39:3.f

¹⁸ Ano an puwedeng gibuhon tanganing mapakarhay an nagin danyos kan pagigin harayo sa lambang saro? Anong praktikal na mga lakdang an puwedeng gibuhon tanganing matawan nin materyal na pangangaipo an satong pamilya na dai na kaipuhan pang magrayo sa sainda? Asin paano niyato mamumuton na madadagka an iba na magdesisyon nin tama sa bagay na ini? Tutukaron sa sunod na artikulo an mga hapot na ini.