An Sasarong Selebrasyon

An selebrasyon na ini iinintrodusir ni Jesus kan aldaw na nagadan sia. Ginirumdom nia an Judiong kapiyestahan kan Paskua kaiba kan saiyang mga apostol. Dangan ipinasa nia sainda an pira sa daing lebadurang tinapay kan Paskua, na nagsasabing: “Ini nangangahulogan kan sakong hawak na itatao manongod sa saindo.” Dangan, ipinasa ni Jesus an sarong kopa nin arak, na nagsasabing: “An kopang ini nangangahulogan kan bagong tipan paagi sa sakong dugo, na papabuloson manongod sa saindo.” Sinabi man nia: “Padagos nindong gibohon ini sa paggirumdom sa sako.” (Lucas 22:​19, 20; 1 Corinto 11:​24-26) An selebrasyon na ini inaapod na Pamanggihan kan Kagurangnan, o an Memorial. Iyan an solamenteng selebrasyon na ipinagboot ni Jesus na selebraron kan saiyang mga parasunod.

Dakol na iglesya an nagsasabi na ginigibo ninda an pagselebrar na ini kadungan kan gabos nindang iba pang kapiyestahan, pero an kadaklan ginigirumdom iyan na laen sa paaging ipinagboot ni Jesus. Tibaad an pinakarisang pagkakalaen iyo an pagkaparate kan selebrasyon. An ibang iglesya siniselebrar iyan bulan-bulan, serosemana, aroaldaw pa ngani. Ini daw an intension ni Jesus kan sabihan nia an saiyang mga parasunod: “Padagos nindong gibohon ini sa paggirumdom sa sako”? Nagsasabi an The New English Bible: “Gibohon nindo ini bilang girumdoman (sa Ingles, “memorial”) sa sako.” (1 Corinto 11:​24, 25) Gurano kaparate na siniselebrar an memorial o an anibersaryo? Sa parate, sarong beses sana sa sarong taon.

Girumdomon man na si Jesus pinonan an pagselebrar na ini dangan nagadan sa petsa kan Judiong kalendaryo na Nisan 14.a Iyan an aldaw kan Paskua, an kapiyestahan na nagpapagirumdom sa mga Judio kan dakulang pagligtas na naeksperyensiahan ninda sa Egipto kan ika-16 na siglo B.C.E. Kan panahon na idto, an pag-atang nin sarong kordero nagresulta sa kaligtasan kan Judiong panganay, mantang an anghel ni Jehova ginadan an gabos na panganay kan Egipto.​—Exodo 12:​21, 24-27.

Paano ini nakatatabang sa satong pakasabot? Bueno, an Kristianong si apostol Pablo nagsurat: “Si Cristo na satuyang paskua iinatang na.” (1 Corinto 5:7) An kagadanan ni Jesus sarong mas dakulang atang sa Paskua, na nagtatao sa katawohan kan oportunidad sa orog kadakulang kaligtasan. Kaya, para sa mga Kristiano, an Memorial kan kagadanan ni Cristo sinalidahan an Judiong Paskua.​—Juan 3:16.

An Paskua taonan na selebrasyon. Kun siring, makatanosan na an Memorial iyo man. An Paskua​—an aldaw na nagadan si Jesus—​perming nangyayari sa ika-14 aldaw kan Judiong bulan na Nisan. Kaya an kagadanan ni Cristo maninigong girumdomon sarong beses kada taon sa aldaw kan kalendaryo na katangod kan Nisan 14. Ngonyan na 1994 an aldaw na iyan Sabado, Marso 26, pagkasolnop kan aldaw. Alagad, taano an mga iglesya nin Kakristianohan ta dai ini ginibo na aldaw para sa espesyal na pagselebrar? An halipot na pagsiyasat sa historya masimbag sa hapot na iyan.