LEKSIYON 19
An Mga Saksi ni Jehova Daw Tunay na mga Kristiyano?
Bilang mga Saksi ni Jehova, nagtutubod kami na tunay kaming mga Kristiyano. Taano? Pag-isipan an basehan kan samong mga paniniwala, an samong daing kaagid na pangaran, saka an pagkamuot mi sa lambang saro.
1. Sain ibinabase kan mga Saksi ni Jehova an saindang mga paniniwala?
Sinabi ni Jesus: ‘An tataramon nin Diyos katotoohan.’ (Juan 17:17) Arog ni Jesus, pirming ibinabase kan mga Saksi ni Jehova an saindang mga paniniwala sa Tataramon nin Diyos. Pag-isipan an kasaysayan kan Mga Saksi ni Jehova na dating inaapod na Mga Estudyante sa Bibliya. Sa mga huring taon kan ika-19 siglo, pinunan kan sarong grupo nin sinserong mga tawo na siyasaton na marhay kun ano talaga an itinutukdo kan Bibliya. Diyan ninda ibinase an saindang mga paniniwala, dawa ngani ibang-iba iyan sa mga doktrina kan simbahan. Dangan, pinunan nindang sabihon sa iba an mga katotoohan sa Bibliya na nanudan ninda.a
2. Taano ta inaapod kaming Mga Saksi ni Jehova?
Inaapod ni Jehova an saiyang mga parasamba na saiyang mga saksi huling sinasabi ninda an katotoohan manungod sa saiya. (Hebreo 11:4–12:1) Halimbawa, kan suanoy na mga panahon, sinabi nin Diyos sa saiyang mga lingkod: “Kamo an sakuyang mga saksi.” (Basahon an Isaias 43:10.) Si Jesus inapod na “an Maimbod na Saksi.” (Kapahayagan 1:5) Kaya kan 1931, pinili mi an pangaran na Mga Saksi ni Jehova. Ipinag-oorgulyo mi an samong pangaran.
3. Paano inaarog si Jesus kan mga Saksi ni Jehova sa pagpahiling nin pagkamuot?
Namumutan na marhay ni Jesus an saiyang mga disipulo asin ibinilang sinda na mga kapamilya niya. (Basahon an Marcos 3:35.) An Mga Saksi ni Jehova man sarong pambilog na kinaban na pamilya na nagkakasararo. Kaya tugang an apod mi sa lambang saro. (Filemon 1, 2) Sinusunod mi man an pagbuot na ini: “Magkaigwa kamo nin pagkamuot sa bilog na kasararuan nin magturugang.” (1 Pedro 2:17) Ipinapahiling kan mga Saksi ni Jehova an pagkamuot na iyan sa dakul na paagi, arog kan pagtabang mi sa samong mga kapagtubod sa bilog na kinaban sa oras nin pangangaipo.
ARAMON PA
Aramon pa an kasaysayan kan Mga Saksi ni Jehova saka an iba pang patunay na kami tunay na mga Kristiyano.
Ibinabase sa Bibliya kan tunay na mga Kristiyano an saindang mga paniniwala asin sinasabi man ninda iyan sa iba
4. Ibinabase mi sa Bibliya an samong mga paniniwala
Sinabi ni Jehova na maabot an panahon na lalong magigin malinaw an satong pakasabot sa Bibliya. Basahon an Daniel 12:4 asin an nota sa ibaba, dangan pag-ulayan an hapot na ini:
Ano an “magigin abunda” sa mga lingkod nin Diyos mantang padagos nindang sinisiyasat an Bibliya?
Aramon kun paano pinag-adalan nin sarong grupo nin mga estudyante sa Bibliya, kaiba diyan si Charles Russell, an Tataramon nin Diyos. I-play an VIDEO, dangan pag-ulayan an hapot na ini:
Sa video, paano pinag-adalan ni Charles Russell saka kan saiyang mga kapwa Estudyante sa Bibliya an Tataramon nin Diyos?
Aram mo daw?
Kun minsan, may ginigibo kaming pagliliwat sa nagkapirang paniniwala mi. Taano? Kun paanong mas malinaw na nahihiling an sarong tanawon mantang mas nagsisirang an aldaw, tinatabangan nin Diyos an saiyang mga lingkod na mas malinaw na masabutan an saiyang Tataramon sa paglihis nin panahon. (Basahon an Talinhaga 4:18.) Kaya dawa ngani dai nagbabago an Bibliya, binabago mi an samong mga paniniwala mantang mas malinaw ming nasasabutan an mga katotoohan sa Bibliya.
5. Namumuhay kami kauyon kan samong pangaran
Taano ta pinili ming apudon na Mga Saksi ni Jehova? I-play an VIDEO, dangan pag-ulayan an hapot.
Taano ta angay an pangaran na Mga Saksi ni Jehova?
Taano ta nagpili si Jehova nin mga tawo na magin mga saksi niya? Huling ipapamidbid ninda siya bilang an tunay na Diyos. Kadakul kaya nin salang mga tukdo manungod sa saiya. Pag-isipan an duwa sana sa mga iyan.
Itinutukdo kan nagkapirang relihiyon sa mga miyembro ninda na gusto nin Diyos na maggamit sinda nin mga imahen para sambahon siya. Totoo daw iyan? Basahon an Levitico 26:1, dangan pag-ulayan an mga hapot na ini:
Anong katotoohan an sinasabi kaiyan? Ano an paghiling ni Jehova sa mga imahen?
May mga lider nin relihiyon na nagtutukdo na si Jesus iyo an Diyos. Totoo daw iyan? Basahon an Juan 20:17, dangan pag-ulayan an mga hapot na ini:
Anong katotoohan an sinasabi kaiyan? An Diyos daw saka si Jesus saro sana?
Ano an namamati mo na nagsugo si Jehova kan saiyang mga Saksi para ihulit an katotoohan manungod sa saiya asin sa Aki niya?
6. Namumutan mi an lambang saro
Ikinukumparar kan Bibliya an mga Kristiyano sa manlain-lain na parte kan hawak. Basahon an 1 Corinto 12:25, 26, dangan pag-ulayan an mga hapot na ini:
Ano an dapat na gibuhon kan tunay na mga Kristiyano pag nagsasakit an mga kapwa ninda Kristiyano?
Ano an narisa mo sa mga Saksi ni Jehova sa pagpahiling ninda nin pagkamuot sa lambang saro?
Pag may mga Saksi ni Jehova na nagsasakit sa sarong lugar, nagtatabang tulos an mga kapwa ninda Saksi sa bilog na kinaban. Para mahiling an sarong halimbawa, i-play an VIDEO. Dangan pag-ulayan an hapot.
Paano pinapatunayan kan ginigibong pag-ayuda kan mga Saksi ni Jehova na namumutan ninda an lambang saro?
An tunay na mga Kristiyano nagpapahiling nin pagkamuot sa mga nangangaipo
MAY MGA NAGSASABI: “Bago pa man sanang relihiyon an Mga Saksi ni Jehova.”
Puon pa kasuarin inapod ni Jehova na mga saksi an saiyang mga parasamba?
SUMARYO
An mga Saksi ni Jehova tunay na mga Kristiyano. Saro kaming pamilya nin mga parasamba na nakaistar sa manlain-lain na parte kan kinaban. Ibinabase mi sa Bibliya an samong mga paniniwala asin sinasabi sa iba an katotoohan manungod ki Jehova.
Rebyu
Taano ta pinili ming apudon na Mga Saksi ni Jehova?
Paano mi ipinapahiling na namumutan mi an lambang saro?
Sa hiling mo, tunay na mga Kristiyano daw an mga Saksi ni Jehova?
HILINGON MAN
Aramon pa an manungod sa samong kasaysayan.
Hilingon an sarong halimbawa kun paano ihinahayag kan mga Saksi ni Jehova an salang mga tukdo.
Pinapamuraway kan Banwaan nin Diyos an Saiyang Pangaran (7:08)
Aramon an simbag sa mga tibaad hapot mo manungod sa Mga Saksi ni Jehova.
“Parating mga Ihinahapot Manungod sa Mga Saksi ni Jehova” (web page)
Angguton si Stephen sa mga iba an lahi asin talagang kinukulgan niya sinda. Aramon kun ano an nahiling niya sa mga Saksi ni Jehova kaya napahiro siyang magbago.
“Lalong Napaparaot an Buhay Ko” (An Torrengbantayan, Hulyo 1, 2015)
a Puon pa kan 1879, padagos na itinatampok kan samong panginot na babasahon, An Torrengbantayan, an mga katotoohan sa Bibliya.