“Siisay an Nakakaaram kan Pag-iisip ni Jehova?”

“‘Siisay an nakakaaram kan pag-iisip ni Jehova, tanganing sia makapagtokdo sa [Saiya]?’ Alagad kita igwa nanggad kan pag-iisip ni Cristo.”—1 COR. 2:16.

1, 2. (a) Sa ano nadedepisilan an dakol na tawo? (b) Ano an kaipuhan tang girumdomon manongod sa pag-iisip niato asin ni Jehova?

NADEPISILAN ka na daw na saboton an pag-iisip nin iba? Tibaad ika nag-agom kasuarin pa sana, asin sa pagmate mo dai mo aram kun paano lubos na masasabotan an pag-iisip kan saimong agom. Sa katunayan, an mga lalaki asin babae magkalaen kun mag-isip patin magtaram. Iyo, sa nagkapirang kultura, an mga lalaki asin babae talagang nagtataram nin magkalaen na dialekto nin sarong lenguahe! Apuera kaini, an pagkakalaen sa kultura asin lenguahe puedeng magresulta sa laen-laen na pag-iisip asin paggawe. Minsan siring, mantang mas namimidbid mo an iba, mas nagdadakol man an saimong oportunidad na magpoon nang masabotan an saindang pag-iisip.

² Kun siring, dai kita maninigong magngalas na an satong pag-iisip laen nanggad ki Jehova. Paagi sa saiyang propeta na si Isaias, sinabi ni Jehova sa mga Israelita: “An saindong mga kaisipan bakong an sakong mga kaisipan, minsan an sakong dalan bakong an saindong dalan.” Dangan, sa pag-ilustrar kan katunayan na iyan, si Jehova nagsabi pa: “Kun paanong an kalangitan mas halangkaw kisa sa daga, siring man an sakong mga dalan mas halangkaw kisa sa saindong mga dalan, asin an sakong mga kaisipan kisa sa saindong mga kaisipan.”—Isa. 55:8, 9.

 3. Ano an duwang paagi na mapagmamaigotan tang magin ‘dayupot ki Jehova’?

³ Pero, nangangahulogan daw ini na dai na niato maninigong pagmaigotan na saboton an pag-iisip ni Jehova? Dai. Minsan ngani nungka tang masasabotan nin lubos an bilog na kaisipan ni Jehova, dinadagka pa man giraray kita kan Biblia na magin ‘dayupot ki Jehova.’ (Basahon an Salmo 25:14; Talinhaga 3:32.) An sarong paagi na kita magigin mas harani ki Jehova iyo an pagpahalaga asin pagtaong atension sa saiyang mga aktibidad na nakasurat sa saiyang Tataramon, an Biblia. (Sal. 28:5) An saro pang paagi iyo an pag-aram kan “pag-iisip ni Cristo,” na “ladawan kan Dios na dai naheheling.” (1 Cor. 2:16; Col. 1:15) Paagi sa pagtagama nin panahon tanganing pag-adalan an mga pagkasaysay sa Biblia asin horophoropon iyan, masasabotan niato an mga kualidad asin pag-iisip ni Jehova.

Mag-ingat sa Salang Tendensia

4, 5. (a) Anong salang tendensia an kaipuhan tang likayan? Ipaliwanag. (b) Ano an nagin salang pag-iisip kan mga Israelita?

⁴ Mantang hinohorophorop niato an mga aktibidad ni Jehova, kaipuhan tang likayan an tendensia na husgaran an Dios basado sa mga pamantayan nin tawo. Nasambitan an tendensiang ini sa mga tataramon ni Jehova sa Salmo 50:21: “Inimahinar mo na ako magigin nanggad siring sa saimo.” Siring kaiyan an sinabi nin sarong iskolar sa Biblia labing 175 taon na an nakaagi: “An mga tawo may tendensiang husgaran an Dios basado sa sadiri nindang mga pamantayan asin mag-isip na dapat man niang sunodon an mga ley na sinusunod ninda.”

⁵ Kaipuhan kitang mag-ingat na an satong pagmansay dapit ki Jehova dai maimpluwensiahan kan sadiri tang mga pamantayan asin kamawotan. Taano ta mahalaga ini? Bueno, mantang pinag-aadalan niato an Kasuratan, an nagkapira sa mga ginibo ni Jehova tibaad garo baga bako gayong tama basado sa satong limitado asin bakong sangkap na pagmansay. Arog kaiyan an nagin pag-iisip kan suanoy na mga Israelita asin sala an nagin kongklusyon ninda mapadapit sa pagtratar sa sainda ni Jehova. Mangnoha an sinabi sa sainda ni Jehova: “Kamo siertong masabi: ‘An dalan ni Jehova bakong tama.’ Dangoga tabi, O kamag-anakan nin Israel. Bako daw na tama an sadiri kong dalan? Bako daw na an mga dalan nindo an bakong tama?”—Ezeq. 18:25.

 6. Anong leksion an nanodan ni Job, asin paano kita makikinabang sa eksperyensia nia?

⁶ An sarong mahalagang paagi na malikayan an silo na husgaran si Jehova basado sa sadiri tang mga pamantayan iyo na akoon na an satong pagmansay limitado asin kun beses talagang sala. Kaipuhan kaidto ni Job na manodan an leksion na ini. Kan sia nagsasakit, si Job nawaran nin paglaom asin medyo sadiri na sana nia an pigparaisip. Nalingawan nia an mas importanteng mga isyu. Alagad mamomoton siang tinabangan ni Jehova na pahiwason an pagmansay nia. Paagi sa labing 70 laen-laen na hapot ki Job, na mayo siang nasimbag, idinoon ni Jehova na limitado an pakasabot ni Job. Nagpakumbaba si Job asin liniwat an pagmansay nia.—Basahon an Job 42:1-6.

Pagkaigwa kan “Pag-iisip ni Cristo”

 7. Taano an pagsiyasat sa mga aktibidad ni Jesus ta nakakatabang sa sato na masabotan an pag-iisip ni Jehova?

⁷ Sangkap na inarog ni Jesus an saiyang Ama sa gabos na sinabi asin ginibo nia. (Juan 14:9) Kun siring, an pagsiyasat sa mga aktibidad ni Jesus nakakatabang sa sato na masabotan an pag-iisip ni Jehova. (Roma 15:5; Fil. 2:5) Siyasaton niato ngonyan an duwang pagkasaysay sa Ebanghelyo.

8, 9. Arog kan yaon sa Juan 6:1-5, anong situwasyon an nagin dahelan kaya naghapot si Jesus ki Felipe, asin taano ta naghapot sia?

⁸ Imahinara an pangyayaring ini. Harani na kaidto an Paskua kan 32 C.E. Hale pa sana an mga apostol ni Jesus sa pambihirang paghuhulit sa bilog na Galilea. Huling pagal sinda dahel sa gabos na aktibidad na ini, dinara sinda ni Jesus sa sarong napapasuway na lugar sa amihanan-sirangan na baybayon kan Dagat nin Galilea. Minsan siring, rinibo an nagsunod sa sainda duman. Pagkatapos na an kadaklan na ini paomayan asin tokdoan ni Jesus nin dakol na bagay, nagkaigwa nin problema. Paano makakakua nin kakanon an gabos na tawong ini sa napapasuway na marhay na lugar na idto? Huling aram ni Jesus an pangangaipong iyan, hinapot nia si Felipe, na taga duman sa lugar na idto: “Saen kita mabakal nin mga tinapay na makakakan kan mga ini?”—Juan 6:1-5.

⁹ Taano ta ihinapot ini ni Jesus ki Felipe? Namomroblema daw si Jesus kun ano an gigibohon nia? Dai. Ano talaga an nasa isip nia? Si apostol Juan, na yaon man duman, nagpaliwanag: ‘Sinabi ini ni Jesus tanganing baloon sia, huling aram nia mismo an gigibohon nia.’ (Juan 6:6) Binalo digdi ni Jesus an pag-oswag sa espirituwal kan mga disipulo nia. Paagi sa hapot na ini, nakua nia an atension ninda asin tinawan nia sinda nin oportunidad na ipahayag an saindang pagtubod sa kaya niang gibohon. Alagad napalampas ninda an oportunidad na ini asin ipinaheling ninda na limitado talaga an saindang pagmansay. (Basahon an Juan 6:7-9.) Dangan ipinaheling ni Jesus na may kaya siang gibohon na dai ngani ninda naisip. Milagroso niang pinakakan an rinibong nagugutom na idto.—Juan 6:10-13.

10-12. (a) Taano ta dai tolos itinao ni Jesus an hinahagad kan babaeng Griego? Ipaliwanag. (b) Ano an pag-oolayan niato ngonyan?

¹⁰ An pagkasaysay na ini makakatabang sa sato na masabotan an pag-iisip ni Jesus sa saro pang pangyayari. Dai nahaloy, pagkapakakan sa dakulang grupong ini nin mga tawo, si Jesus asin an mga apostol nagpaamihanan, sa luwas kan teritoryo kan Israel, sagkod sa Tiro asin Sidon. Mantang yaon duman, nanompongan ninda an sarong babaeng Griego na nakimaherak ki Jesus na paomayan an saiyang aking babae. Kan primero, dai inintindi ni Jesus an babae. Alagad kan sia magparapirit, sinabi ni Jesus sa saiya: “Pabayae nguna na mabasog an mga aki, huli ta bakong maninigo na kuanon an tinapay kan mga aki asin iapon iyan sa mga ido.”—Mar. 7:24-27.

¹¹ Taano ta kan primero nagsayuma si Jesus na tabangan an babaeng ini? Binabalo daw ni Jesus an babaeng ini, arog ki Felipe, tanganing maaraman kun ano an magigin reaksion nia, na tinatawan nin oportunidad na ipaheling an pagtubod nia? An tono kan boses ni Jesus, minsan ngani dai ihinayag sa teksto, dai nakadesganar sa babae. Nagin maboot an saiyang pagkomparar paagi sa paggamit kan tataramon na “mga ido.” Kaya, si Jesus garo baga siring sa sarong magurang na may intension na itao an hinahagad kan saiyang aki, alagad dai nia nguna ipinaparisa iyan tanganing baloon an pagigin determinado kan aki. Ano man an dahelan, kan ipahayag kan babae an pagtubod nia, gikan sa boot na itinao ni Jesus an hinahagad nia.—Basahon an Marcos 7:28-30.

¹² An duwang pagkasaysay na ini sa Ebanghelyo nagtatao sa sato nin mahalagang marhay na pakasabot sa “pag-iisip ni Cristo.” Pag-olayan niato ngonyan kun paano an mga pagkasaysay na ini makakatabang sa sato na orog na masabotan an sadiring pag-iisip ni Jehova.

An Pagtratar ni Jehova ki Moises

13. Paano nakakatabang sa sato an pakasabot sa pag-iisip ni Jesus?

¹³ An pakasabot sa pag-iisip ni Jesus nakakatabang sa sato na masabotan an mga teksto na tibaad depisil saboton. Halimbawa, pag-isipan an sinabi ni Jehova ki Moises pagkagibo kan mga Israelita nin bulawan na ogbon na baka na sasambahon. An Dios nagsabi: “Hineling ko an banwaan na ini asin uya ini banwaan na matagas an liog. Kaya ngonyan pabayae ako, tanganing maglaad sa sainda an sakong kaanggotan asin pohoon ko sinda, asin pabayae ako na gibohon takang sarong dakulang nasyon.”—Ex. 32:9, 10.

14. Ano an nagin reaksion ni Moises sa mga tataramon ni Jehova?

¹⁴ An pagkasaysay nagsasabi pa: “Pinalumoy ni Moises an lalawgon ni Jehova na saiyang Dios asin nagsabi: ‘Taano, O Jehova, ta maglalaad an saimong kaanggotan sa saimong banwaan na ilinuwas mo sa daga nin Egipto paagi sa dakulang kapangyarihan asin makosog na kamot? Taano ta sasabihon kan mga Egipcio, “Dahel sa maraot na intension kaya ilinuwas nia sinda tanganing gadanon sinda sa kabukidan asin pohoon sinda sa ibabaw kan daga”? Bayae an saimong naglalaad na kaanggotan asin magbasol ka sa kapahamakan na inisip mo tumang sa saimong banwaan. Girumdoma si Abraham, Isaac asin Israel na saimong mga lingkod, na pinanugaan mo, na sinabi mo sa sainda, “Papadakolon ko an saindong banhi siring kan mga bitoon sa kalangitan, asin an bilog na dagang ini na pinili ko itatao ko sa saindong banhi, tanganing magin sadiri nanggad ninda ini sagkod sa panahon na daing talaan.”’ Asin nagbasol si Jehova sa kapahamakan na sinabi niang gigibohon sa saiyang banwaan.”—Ex. 32:11-14.a

15, 16. (a) Anong oportunidad an nabuksan para ki Moises huli sa sinabi ni Jehova? (b) Sa anong paagi “nagbasol” si Jehova?

¹⁵ Kaipuhan daw talagang itanos ni Moises an pag-iisip ni Jehova? Dai nanggad! Minsan ngani sinabi ni Jehova an iniisip niang gibohon, bako ini an pangultimong paghokom nia. Digdi, garo man sana binabalo ni Jehova si Moises, kun paanong kan huri binalo man ni Jesus si Felipe asin an babaeng Griego. Tinawan si Moises nin oportunidad na ipahayag an pagmansay nia.b Ninombrahan ni Jehova si Moises bilang parapangoltanan sa Israel asin sa Saiya Mismo, saka iginalang ni Jehova an pagnombra Nia ki Moises sa katongdan na iyan. Mapadaog daw si Moises sa pagkadesganar? Gagamiton daw ni Moises an oportunidad na ini tanganing dagkahon si Jehova na lingawan na an Israel asin gumibo nin dakulang nasyon hale sa mga magikan mismo ki Moises?

¹⁶ Ihinayag kan reaksion ni Moises an saiyang pagtubod asin pagtiwala sa hustisya ni Jehova. Ipinaheling man kan reaksion nia na bakong mahalaga an sadiri niang interes, kundi an ngaran ni Jehova. Habo niang mapakaraot iyan. Paagi kaiyan, ipinaheling ni Moises na nasabotan nia an “pag-iisip ni Jehova” mapadapit sa bagay na ini. (1 Cor. 2:16) Ano an nagin resulta? Huling si Jehova bako pa man desididong umaksion, sia “nagbasol” segun sa ipinasabong na pagkasaysay. Sa Hebreo, an ekspresyon na ini nagpapaheling sana na dai pinangyari ni Jehova an kapahamakan na sinabi nia na iniisip niang ipaabot sa bilog na nasyon.

An Pagtratar ni Jehova ki Abraham

17. Paano si Jehova nagpaheling nin dakulang pasensia kun dapit sa ikinakahadit ni Abraham?

¹⁷ An saro pang halimbawa kun paano si Jehova nagtatao nin oportunidad sa saiyang mga lingkod na ipahayag an saindang pagtubod asin pagtitiwala iyo an may koneksion sa pakiolay ni Abraham mapadapit sa Sodoma. Sa pagkasaysay na iyan, nagpaheling si Jehova nin dakulang pasensia paagi sa pagtogot ki Abraham na magpalataw nin walong sunod-sunod na hapot. Sa sarong kabtang kaiyan, si Abraham odok na nakiolay: “Dai ko man lamang pinaghona dapit sa saimo na ika naghihiro sa paaging ini na gadanon an matanos na tawo kaiba kan maraot tanganing an mangyayari sa matanos na tawo kapareho kan nangyayari sa maraot! Iyan dai ko man lamang pinaghona dapit sa saimo. Dai daw magibo kan tama an Hokom kan bilog na daga?”—Gen. 18:22-33.

18. Ano an manonodan niato sa pagtratar ni Jehova ki Abraham?

¹⁸ Sa pagkasaysay na ini, ano an manonodan niato manongod sa pag-iisip ni Jehova? Tanganing makapagdesisyon nin tama, kaipuhan daw ni Jehova na makipangatanosan sa saiya si Abraham? Dai. An totoo, sa kapinonan pa sana, puede na kutanang sabihon ni Jehova an mga dahelan kun taano ta iyan an nagin desisyon nia. Alagad paagi sa mga hapot na ini, tinawan ni Jehova si Abraham nin panahon na akoon an desisyon asin masabotan an Saiyang pag-iisip. Nakatabang man ini ki Abraham na masabotan an rarom kan pagkaherak asin hustisya ni Jehova. Iyo, trinatar ni Jehova si Abraham bilang katood.—Isa. 41:8; Sant. 2:23.

Mga Leksion Para sa Sato

19. Paano niato maaarog si Job?

¹⁹ Ano an nanodan niato manongod sa “pag-iisip ni Jehova”? Kaipuhan tang togotan an Tataramon nin Dios na tawan kita nin tamang pakasabot sa pag-iisip ni Jehova. Dai niato noarin man maninigong husgaran si Jehova basado sa satong limitadong pagmansay, mga pamantayan, asin pag-iisip. Si Job nagsabi: “[An Dios] bakong tawo na arog ko na masisimbag ko, na puede kaming magkomprontahan sa husgado.” (Job 9:32) Arog ki Job, kun nasasabotan niato an pag-iisip ni Jehova, napapahiro nanggad kitang magsabi: “Uya! Ini an mga gilid kan saiyang mga dalan, asin hinghing sana nin sarong bagay an nadangog dapit sa saiya! Alagad manongod sa saiyang makosog na dagoldol siisay an makakasabot?”—Job 26:14.

20. Ano an maninigo tang gibohon kun may naagihan kitang teksto na depisil saboton?

²⁰ Mantang binabasa niato an Kasuratan, ano an maninigo tang gibohon kun may naagihan kitang teksto na depisil saboton, nangorogna kun mapadapit sa pag-iisip ni Jehova? Kun dai pa man giraray kita nakakakua nin malinaw na simbag pagkasiyasat niato, puede tang mansayon ini bilang pagbalo sa satong pagtitiwala ki Jehova. Girumdomon na kun beses may mga teksto na nagtatao sa sato nin oportunidad na ipahayag an satong pagtubod sa mga kualidad ni Jehova. Mapakumbaba niatong akoon na dai niato nasasabotan an gabos na ginigibo nia. (Ecl. 11:5) Kun siring, mapapahiro kitang mag-oyon sa mga tataramon na ini ni apostol Pablo: “O an rarom kan mga kayamanan asin kadonongan patin kaaraman nin Dios! Dai nanggad marorop an saiyang mga paghokom asin dai nanggad masusog an saiyang mga dalan! Huli ta ‘siisay an nakakaaram kan pag-iisip ni Jehova, o siisay an nagin saiyang parahatol?’ O, ‘Siisay an enot na nagtao sa saiya, kaya iyan kaipuhan na bayadan sa saiya?’ Huli ta an gabos na bagay gikan sa saiya asin paagi sa saiya patin para sa saiya. Mapasaiya an kamurawayan sagkod lamang. Amen.”—Roma 11:33-36.

[Mga Nota sa Ibaba]

Nagigirumdoman daw Nindo?

• Ano an makakatabang sa sato na likayan an tendensia na husgaran si Jehova basado sa sadiri tang mga pamantayan?

• Paano an pakasabot sa mga ginibo ni Jesus makakatabang sa sato na magin ‘dayupot ki Jehova’?

• Anong mga leksion an nanodan nindo sa pakikipag-olay ni Jehova ki Moises asin ki Abraham?

[Mga Ritrato sa pahina 5]

Sa pagtratar ni Jehova ki Moises asin Abraham, ano an manonodan niato manongod sa Saiyang pag-iisip?