‘Ihayag an Saindong Pag-oswag’

“Ngonyan na ako dakula na, binayaan ko na an mga ugale nin sarong omboy.”—1 CORINTO 13:11.

1. Paano na an pagtalubo patotoo sa pagkamakangangalas nin mga linalang?

GIKAN sa sarong sogok na sadit-sadit kaya iyan maheheling sana sa irarom nin mikroskopyo, an balyena puwedeng dumakula sa pagigin hayop na labing 30 metros an laba asin labing 80 toneladas an pisada. Siring man, gikan sa saro sa kasaditsaditing tulang, an higanteng kahoy na sequoia puwedeng tumubo na labing 90 metros kalangkaw. Tunay nanggad, an pagdakula saro sa mga ngangalasan sa buhay. Arog kan sabi ni apostol Pablo, kita puwedeng magtanom asin magbaribi, pero “an Dios [an] nagpapatubo kaiyan.”​—1 Corinto 3:7.

2. Anong klaseng pagtalubo an ihinula sa Biblia?

² Pero igwa nin saro pang klase nin pagtubo na arog man kaiyan kamakangangalas. Iyan an ihinula ni propeta Isaias: “An sadit mismo magigin sangribo, asin an sadangoton magigin makosog na nasyon. Ako mismo, si Jehova, maparikas kaiyan sa kapanahonan kaiyan.” (Isaias 60:22) An hulang ini mapadapit sa pagtalubo kan banwaan nin Dios, asin iyan nagkakaigwa nin mayor na kaotoban sa satong kaaldawan.

3. Paano ipinaheling kan report sa 1991 taon nin paglilingkod na pinaririkas ni Jehova an gibohon kan saiyang banwaan?

³ An report kan 1991 taon nin paglilingkod sa pankinaban na gibo kan mga Saksi ni Jehova nagpapaheling na an kabilangan kan mga parahayag kan Kahadean nakaabot sa bagong pinakahalangkaw na bilang na 4,278,820, asin 300,945 gabos an nabautismohan kan taon na idto. Huli sa paglaog nin kadakol na bagohan, nabilog an 3,191 bagong kongregasyon, kaiba an katimbang na bilang nin bagong mga sirkito asin distrito. Iyan labing walong bagong kongregasyon kada aldaw, haros sarong bagong sirkito kada duwang aldaw. Kanigoan kamakangangalas na pag-oswag! Malinaw na pinaririkas ni Jehova an mga bagay, asin an saiyang bendisyon nasa mga paghihingoa kan saiyang banwaan.​—Salmo 127:1.

Panahon Para sa Pagsiyasat sa Sadiri

4. Anong mga hapot an dapat na pag-olayan mantang tinatanaw niato an ngapit?

⁴ Minsan ngani nakaoogmang paghelingon, an bendisyon na ini may kaibang nagkapirang paninimbagan. Igwa daw nin bastanteng maygurang asin andam na mga indibiduwal na mag-aasikaso sa espirituwal na mga pangangaipo kan gabos na bagohan na ini? Mantang tinatanaw niato an ngapit, nakatatarantang isipon kun pirang payunir, ministeryal na lingkod, kamagurangan, asin nagbibiyaheng paraataman an kakaipuhanon tanganing mangataman sa pagtalubo asin paghiwas, saka kun pirang boluntaryong mga trabahador an kaipuhan sa mga sangang opisina asin Erokan nin Bethel sa palibot kan kinaban na magsusuportar sa gibohon na iyan. Saen daw mahale an kadakol na tawong ini? Daing duwa-duwa na mahiwas an anihon. Alagad sairisay ngonyan an nasa kamugtakan na mangataman sa gabos na trabahador na kaipuhan sa pag-ani kan anihon na iyan?​—Mateo 9:​37, 38.

5. Ano an kamugtakan sa nagkapirang lugar huli sa marikas na pagtalubo?

⁵ Halimbawa, may nag-abot na report na sa nagkapirang kabtang kan kinaban, may mga kongregasyon na sagkod sa sanggatos an parahayag kan Kahadean na pinaglilingkodan sana nin sarong magurang kaiba an saro o duwang ministeryal na lingkod. Kun beses an sarong magurang kaipuhan na maglingkod sa duwang kongregasyon. Sa ibang lugar dakulaon an pangangaipo para sa kuwalipikadong Kristianong mga ministro na mangengenot sa mga pag-adal sa Biblia kaya kaipuhan na an mga bagohan ibugtak sa lista nin mga naghahalat na adalan. Sa iba pang lugar, marikason an pagkabilog nin bagong mga kongregasyon kaya tolo, apat, o lima pa nganing kongregasyon an naggagamit nin sarong Kingdom Hall. Tibaad naheheling nindo an arog kaining pag-oswag sa saindong lugar.

6. Taano ta napapanahon na siyasaton niato an satong sadiri?

⁶ Ano an ipinaheheling sato kan mga bagay na ini? Na huli sa mga panahon, kita gabos kaipuhan na siyasaton an satong mga kamugtakan tanganing helingon kun baga ginagamit niato sa pinakamarahay an satong panahon asin mga rogaring tanganing masimbag an pangangaipo. (Efeso 5:​15-17) Si apostol Pablo nagsurat sa mga Kristianong Hebreo kan enot na siglo: “Huli ta, sa katotoohan, minsan ngani kaipuhan na kamo mga paratokdo na huli sa panahon, nangangaipo pa giraray kamo nin may magtokdo sa saindo poon sa kapinonan kan simpleng mga bagay kan banal na mga kapahayagan nin Dios; asin nagin kamo siring sa mga nangangaipo nin gatas, asin bakong kakanon na matagas.” (Hebreo 5:12) Arog kan ipinaririsa kan mga tataramon na iyan, an indibiduwal na mga Kristiano kaipuhan man na magtalubo. Asin yaon an tunay na peligro na an saro magdanay na omboy sa espirituwal imbes na umoswag pasiring sa Kristianong pagkamaygurang. Kaoyon kaini, sinasadol kita ni Pablo: “Padagos na baloon kun baga kamo nasa pagtubod, padagos na patunayan kun ano man nanggad kamo.” (2 Corinto 13:5) Siniyasat daw nindo an saindong sadiri tanganing helingon kun kamo nagtatalubo sa espirituwal poon kan kamo bautismohan? O dai daw kamo naghihiro? Alagad paano iyan maririsa?

“Mga Ugale nin Sarong Omboy”

7. Tanganing mahayag an espirituwal na pag-oswag, ano an dapat niatong gibohon?

⁷ “Kan ako omboy pa, nagtataram ako kaidto siring sa omboy, nag-iisip siring sa omboy, nangangatanosan siring sa omboy; alagad ngonyan na ako dakula na, binayaan ko na an mga ugale nin sarong omboy,” sabi ni apostol Pablo. (1 Corinto 13:11) Sa espirituwal na pagtalubo, kaidto kita gabos siring sa aki sa satong isip asin hiro. Minsan siring, tanganing mahayag an pag-oswag, kaipuhan na haleon niato an “mga ugale nin sarong omboy,” arog kan sabi ni Pablo. Ano an nagkapira sa mga ugaleng ini?

8. Sono sa mga tataramon ni Pablo sa Hebreo 5:​13, 14, ano an sarong ugale nin espirituwal na omboy?

⁸ Enot, helinga an mga tataramon ni Pablo sa Hebreo 5:​13, 14: “An lambang nagkakakan nin gatas dai pang kinabatidan sa tataramon nin katanosan, huli ta sia omboy pa. Alagad an matagas na kakanon para sa mga maygurang, duman sa mga tawo na huli sa paggamit kan saindang kakayahan nin pagmansay napatood na mamidbid kun ano an tama asin sala.” Kamo daw ‘may kinabatidan sa tataramon nin katanosan’? May igo daw kamong kaaraman sa Tataramon nin Dios, an Biblia, tanganing makayang gamiton iyan na “mamidbid kun ano an tama asin sala”? Sinabi ni Pablo na iyan kayang gibohon nin mga maygurang ta sinda dayaday na nagkakakan nin “matagas na kakanon.” Kaya, an pagmawot o pagkaamante nin saro sa matagas na espirituwal na kakanon marahay na tanda kun baga an saro nagtalubo na sa espirituwal o nagdadanay na omboy sa espirituwal.

9. Paano na an espirituwal na apetito nin saro tanda nin saiyang espirituwal na pag-oswag?

⁹ Kun siring, kumusta an saindong espirituwal na apetito? Ano an pagmansay nindo sa abundang suplay nin espirituwal na kakanon na dayaday na itinatao ni Jehova paagi sa mga publikasyon na basado sa Biblia asin sa Kristianong mga pagtiripon saka asamblea? (Isaias 65:13) Daing duwa-duwa na dakula an kagayagayahan nindo kun ilinuluwas an bagong mga publikasyon sa taonan na pandistritong mga kombension. Pero ano an ginigibo nindo dian pakapuli nindo? Ano an ginigibo nindo kun minaabot an bagong luwas kan magasin na Torrengbantayan o Magmata!? Tinatawan daw nindo nin panahon na basahon an mga publikasyon na ini, o pigburubuklit sana nindo iyan tanganing helingon an tampok na mga kabtang dangan idinudugang na iyan sa iba pa sa saindong bugtakan nin libro? Puwede man na palatawon an kaagid na mga hapot mapadapit sa Kristianong mga pagtiripon. Kamo daw dayaday na nag-aatender sa gabos na pagtiripon? Kamo daw nag-aandam para kaiyan saka nakikakabtang dian? Minalataw na an iba naholog sa maluyang mga ugale sa espirituwal na pagkakan, na sa ibabaw sana an nababasa asin garo baga naghihidale sa pagkakan. Ibang-iba an salmista, na nagsabi: “Kanigoan an sakong pagkamoot sa saimong pagboot! Sa bilog na aldaw iyan sakong pinaghohorophorop.” Dugang pa, si Hadeng David nagsabi: “Pamumurawayon taka sa dakulang kongregasyon; sa tahaw kan dakulang banwaan oomawon taka.” (Salmo 35:18; 119:97) Malinaw na an sokol kan satong pag-apresyar sa espirituwal na mga probisyon tanda kan satong espirituwal na pag-oswag.

10. Anong ugale nin espirituwal na omboy an ipinaririsa sa Efeso 4:14?

¹⁰ Sinabi ni Pablo an saro pang ugale nin espirituwal na omboy kan sia magpatanid: “Dai na kita magin mga omboy, na inaanod nin mga alon asin ipinapadpad nin lambang doros nin katokdoan huli sa kadayaan nin mga tawo, huli sa katusohan sa pagpakana nin karatan.” (Efeso 4:14) Siring sa aram na marhay nin mga magurang, an mga aki nag-uusyoso sa gabos na bagay. Sa sarong lado ini marahay na ugale ta iyan nagpapangyari sainda na mag-imbestigar asin makanood patin luway-luway na tumalubo sa pagkamaygurang. Minsan siring, an peligro nasa saindang pagigin madaling malingling nin sunod-sunod na bagay. Mas grabe pa, huli sa kakulangan nin kabatidan, an pag-usyosong ini sa parate dinadara sinda sa grabeng problema, na isinasapeligro pa ngani an saindang sadiri asin an iba. Ini totoo man sa espirituwal na mga omboy.

11. (a) Ano an nasa isip ni Pablo sa paggamit kan mga tataramon na “lambang doros nin katokdoan”? (b) Anong ‘mga doros’ an napaaatubang sa sato ngonyan?

¹¹ Alagad ano an nasa isip ni Pablo kan sia magsabi na an espirituwal na mga omboy ipinapadpad nin “lambang doros nin katokdoan”? Digdi, an “doros” trinadusir hale sa termino sa Griego na aʹne·mos, na manongod dian an International Critical Commentary nagkomento na iyan malinaw na “pinili na angay sa ideya nin pagpabarobago.” Ini ipinag-iilustrar na marhay kan sumunod na mga tataramon ni Pablo na, “huli sa kadayaan nin mga tawo.” An terminong “kadayaan” sa orihinal na tataramon sa pundamental nangangahulogan “dados” o “pagkawat nin dados,” an boot sabihon, pagsugal. An punto iyo na permi kitang napaaatubang sa bagong mga ideya asin gibo na garo dai nakaaano, nakatetentar, kapakipakinabang pa ngani. Sa pangenot an mga tataramon ni Pablo minaaplikar sa mga bagay na konektado sa satong pagtubod​—mga mobimiento na pagsararoon an mga iglesya, mga causang sosyal asin politikal, asin iba pang arog kaini. (Ikomparar an 1 Juan 4:1.) Pero totoo man an prinsipyong iyan mapadapit sa pabarobagong mga uso asin moda kan kinaban​—mga estilo, aling-alingan, pagkakan, pagpabagsik sa salud o ehersisyo, asin iba pa. Huli ta kulang nin kabatidan asin marahay na paghusgar, an espirituwal na omboy tibaad malingling nin sobra sa siring na mga bagay asin sa siring maolang sa espirituwal na pag-oswag asin sa pag-otob sa mas mahahalaga niang Kristianong mga obligasyon.​—Mateo 6:​22-25.

12. Paano napapalaen an mga aki sa mga nasa edad na kun dapit sa paninimbagan?

¹² An saro pang ugale nin mga aki iyo an daing ontok na pagkaipo ninda nin tabang asin atension. Sinda dai nakamamate ni nagririsa sa mga paninimbagan; an pagkaaki iyo an panahon sa buhay na haros gabos kaogmahan asin kawat sana. Arog kan sabi ni Pablo, sinda ‘nagtataram siring sa omboy, nag-iisip siring sa omboy, nangangatanosan siring sa omboy.’ Linalaoman ninda na may mag-aasikaso sa sainda. Masasabi man iyan manongod sa espirituwal na omboy. Kun an bagohan minatao kan enot niang pahayag sa Biblia o minapoon sa ministeryo sa langtad, an espirituwal na magurang naoogmang gibohon an gabos sa pagtabang. Ano an nangyayari kun an bagohan nagpapadagos na magsarig sa siring na tabang asin dai kayang akoon an paninimbagan na asikasohon an sadiri? Malinaw na iyan tanda nin kakulangan nin pag-aplikar sa sadiri.

13. Taano ta dapat na makanood an kada saro na pasanon an sadiri niang pasan?

¹³ Sa bagay na ini girumdoma an hatol ni apostol Pablo na minsan ngani kita maninigong “padagos na magturowangan sa pagabat sa lambang saro,” pero “an lambang saro magpapasan kan saiyang sadiring pasan.” (Galacia 6:​2, 5) Siyempre, kaipuhan an panahon asin paghihingoa tanganing an saro makanood na isaabaga an Kristianong mga paninimbagan, asin iyan tibaad mangahulogan nin pagsasakripisyo sa nagkapirang bagay. Minsan siring, magabat na sala an pagtogot na an saro masibot na marhay sa mga kaalingan asin kaogmahan sa buhay, baga man iyan pag-aling-aling, mga pagbiyahe, mga bagong luwas na kasangkapan, o pati an dai kinakaipuhan na pagtrabaho, kaya an saro garo baga miron na sana, na daing pagmawot na dugangan an saiyang kabtang sa paggibo nin mga disipulo o maghingoang kamtan an espirituwal na pag-oswag asin paninimbagan. “Magin kamong mga paragibo kan tataramon, asin bakong mga paradangog sana, na dinadaya an saindong sadiri nin putik na pangangatanosan,” an sadol ni disipulo Santiago.​—Santiago 1:22; 1 Corinto 16:13.

14. Taano ta dai kita maninigong makontento sa pagpaheling kan mga ugale nin espirituwal na omboy?

¹⁴ Iyo, kadakol kan mga ugaleng madaling marisa na ilinalaen an aki sa nasa edad na. Pero an mahalaga, arog kan sabi ni Pablo, iyo na kita luway-luway na haleon an mga ugale nin sarong omboy asin dumakula. (1 Corinto 13:11; 14:20) Ta kun dai, tibaad kita magin kulang-kulang sa espirituwal na sentido. Alagad paano daw makaooswag? Ano an kalabot sa pagpapadanay nin espirituwal na pagtalubo pasiring sa pagkamaygurang?

Kun Paano Nahahayag an Pag-oswag

15. Ano an pundamental na mga tangga sa proseso nin pagtalubo?

¹⁵ Bueno, paano nangyayari an pagtalubo sa naturalesa? “An kada indibiduwal minapoon na mabuhay bilang sarong selula,” an paliwanag kan The World Book Encyclopedia. “An selula ilinalaog an materyales asin ginigibo iyan na materyales sa pagtogdok na kaipuhan kaiyan sa pagtalubo. Kaya, an sarong selula minadakula gikan sa laog. An selulang ini puwedeng dumakol asin mabanga tanganing mabilog an ibang selula. An proseso nin pagtogdok, pagdakol, asin pagbanga pagtalubo.” An mahalagang bagay na dapat mangnohon digdi iyo na an pagtalubo nangyayari gikan sa laog. Kun kinakakan an tamang pagkakan, tinutunaw, asin ginagamit, an resulta pagtalubo. Ini malinaw na maheheling sa omboy na bagong mamundag. Arog kan aram niato, an bagong mamundag daing ontok na nagsusupsup nin espesyal an pagkagibong kakanon, an gatas, na mayaman sa taba asin protina, an materyales na kaipuhan sa pagtalubo. An resulta? An pagtalubo kan omboy kun sa gabat asin langkaw sa enot na taon nungka na napapantayan sa arin pa man na ibang taon nin normal na pagtalubo sa bilog na buhay kaiyan.

16. Anong klaseng pagtalubo an naheheling sa kadaklan na bagong estudyante sa Biblia, asin paano iyan nagigin posible?

¹⁶ Dakula an manonodan niato sa natural na prosesong ini nin pagtalubo na ikaaaplikar niato sa satong espirituwal na pag-oswag poon sa pundamental na mga bagay pasiring sa pagkamaygurang. Enot sa gabos, kaipuhan an dagos-dagos na programa nin pagkakan. Girumdoma kaidtong enot kamong pumoon na mag-adal sa Biblia. Kun kapareho kamo nin kadaklan, posible na haros mayo kamong kaaram-aram manongod sa Tataramon nin Dios. Alagad ta serosemana nag-adal kamo sa saindong leksion asin nag-adal kamo sa Biblia, asin sa halipot sanang panahon, nasabotan nindo an gabos na pundamental na katokdoan kan Kasuratan. Iyan, akoon nindo, pambihirang pagtalubo, asin gabos iyan bunga nin dayaday na pagkakan sa Tataramon nin Dios!

17. Taano ta kaipuhan an regular na programa nin espirituwal na pagkakan?

¹⁷ Alagad kumusta man ngonyan? Sinusunod pa daw nindo an regular na programa nin pagkakan? Dai noarin man maninigong isipon nin saro na huli sana ta an saro nabautismohan na, dai na kaipuhan an regular asin sistematikong pag-adal sa pagkakan nin masustansiang espirituwal na kakanon. Minsan ngani maygurang nang Kristianong paraataman si Timoteo, sinadol sia ni Pablo: “Maghorophorop ka sa mga bagay na ini; ipanongod mo dian an bilog mong buhay, tanganing an saimong pag-oswag mahayag sa gabos.” (1 Timoteo 4:15) Gurano pa daw na iyan kaipuhan na gibohon kan lambang saro sa sato! Kun interesado kamo na mahayag an saindong espirituwal na pag-oswag, kaipuhan an siring na mga paghihingoa.

18. Paano nahahayag an espirituwal na pag-oswag nin saro?

¹⁸ An paghayag kan pag-oswag nin saro dai nangangahulogan nin paggibo nin espesyal na paghihingoa na ipagpasikat an aram nin saro o pahangaon an iba. Si Jesus nagsabi: “Kamo iyo an ilaw nin kinaban. An siudad dai matatago kun namumugtak sa ibabaw nin bukid” asin, “gikan sa kapanoan kan puso nagtataram an ngoso.” (Mateo 5:14; 12:34) Kun an satong puso asin isip pano kan mararahay na bagay sa Tataramon nin Dios, dai kitang maginibo kundi ihayag ini sa satong ginigibo asin sinasabi.

19. Ano an maninigong magin determinado kitang gibohon mapadapit sa satong espirituwal na pag-oswag, asin tinatanaw an anong resulta?

¹⁹ Kaya, an hapot: Kamo daw regular na nag-aadal kan Biblia asin nag-aatender sa Kristianong mga pagtiripon tanganing kumakan kan masustansiang materyal na makatatabang sa saindong panlaog, espirituwal na pagtalubo? Dai kamo makontento sa pagigin daing girong na miron pag-abot sa espirituwal na pagtalubo. Gumibo nin positibong mga tangga tanganing masierto na lubos nindong pinakikinabangan an abundang espirituwal na kakanon na itinatao ni Jehova. Kun kamo tawo na ‘an kaogmahan yaon sa ley ni Jehova, asin sa saiyang ley kamo nagbabasa aldaw asin banggi,’ masasabi man manongod sa saindo: “Sia nanggad magigin siring sa kahoy na itinanom sa kataed nin mga sapa, na namumunga sa kapanahonan kaiyan asin dai naaalang an mga dahon kaiyan, asin an gabos niang ginigibo mapakakarhay.”​—Salmo 1:​2, 3.

Masisimbag daw Nindo?

◻ Taano ta napapanahon na siyasaton an satong espirituwal na pag-oswag?

◻ Paano an espirituwal na pagtalubo konektado sa espirituwal na apetito?

◻ Ano an boot sabihon kan “lambang doros nin katokdoan”?

◻ Taano ta dapat na pasanon kan kada saro an saiyang sadiring pasan?

◻ Paano nagigibo an espirituwal na pag-oswag?

[Ritrato sa pahina 22]

Tinatawan daw nindo nin panahon an pagbasa sa mga publikasyon na basado sa Biblia?