Bagong mga Linalang!

AN MADONONG na si Hadeng Salomon sarong beses nagsabi: “Mayo nin ano man na bago sa sirong kan aldaw.” (Eclesiastes 1:9) Totoo iyan sa pisikal na kinaban na iniistaran niato, alagad kumusta man an mahiwas na lugar kan espirituwal na mga linalang ni Jehova? Duman sa lugar na idto, an saro na orog na dakula ki Salomon, an totoo, iyo an pinakadakulang tawong nabuhay kasuarin pa man, nagin pambihirang bagong linalang. Paano ini nangyari?

Kan taon 29 kan satong Komon na Kapanahonan, an sangkap na tawo, si Jesus, nagpresentar mismo na pabautismo ki Juan sa Salog nin Jordan. “Kan mabautismohan na si Jesus tolos man naghawas sa tubig; asin, uya! an kalangitan nagkaburukasan, asin naheling nia an espiritu nin Dios na nag-iibaba siring sa salampati asin nagtogdon sa saiya. Uya! May nadangog man na tingog sa langit na nagsasabi: ‘Ini an sakong Aki, an namomotan, na sakong inooyonan.’” (Mateo 3:​16, 17) Kaya, an tawong si Cristo Jesus iyo an enot sa bagong mga linalang, na linahidan sa pag-otob sa kabotan nin Dios. Kan huri, basado sa saiyang kagadanan bilang atang, si Jesus nagin Parapangoltanan nin bagong tipan sa pag-oltanan nin Dios asin nin piling grupo nin mga tawo. An kada saro digdi nagin “bagong linalang,” na pinaniaki kan espiritu nin Dios sa sarong langitnon na paglaom, na may paglaom na maghade kaiba ni Jesus sa saiyang langitnon na Kahadean.​—2 Corinto 5:17; 1 Timoteo 2:​5, 6; Hebreo 9:15.

Sa nag-aging mga siglo, an linahidan, pinaniaki sa espiritung mga Kristianong ini tinipon na makasaro ni Cristo bilang an tunay na Kristianong kongregasyon, na bagong linalang man mismo. Iyan inapod nin Dios hale sa kinaban na ini para sa sarong katuyohan, siring kan sinasabi ni apostol Pedro: “Kamo ‘rasang pinili, sarong makahadeng pagkasaserdote, banal na nasyon, banwaan para sa espesyal na pagkasadiri, tanganing ipahayag nindo an mga kamurawayan’ kan saro na nag-apod sa saindo hale sa kadikloman pasiring sa saiyang makangangalas na liwanag.” (1 Pedro 2:9) Kapareho ni Cristo Jesus, an enot na bagong lalang nin Dios, an suminunod na bagong linalang na ini may pangenot na obligasyon na maghulit kan maogmang bareta. (Lucas 4:​18, 19) Bilang indibiduwal, an mga miembro kaiyan, na sa katapustapusi magigin 144,000, dapat na “magsolog kan bagong pagkatawo na linalang oyon sa kabotan nin Dios sa tunay na katanosan asin kaimbodan.” (Efeso 4:24; Kapahayagan 14:​1, 3) Hinahagad kaini na saindang pataluboon “an bunga kan espiritu,” na isinabi sa Galacia 5:​22, 23, asin maimbod na asikasohon an mga trabaho ninda bilang lingkod.​—1 Corinto 4:2; 9:16.

Kumusta man an bagong linalang na ini sa modernong mga panahon? Kan taon 1914, siring kan ipinaheheling kan iskedyul kan Biblia, naotob an mga tataramon sa Kapahayagan 11:15: “An kahadean kan kinaban nagin nang kahadean kan satong Kagurangnan [si Jehova] asin kan saiyang Cristo, asin sia maghahade sagkod lamang.” An enot na ginibo ni Cristo bilang an bagong patukawon na Hade iapon si Satanas asin an saiyang anghel na mga demonyo hale sa langit pasiring sa palibot kan daga. Huli kaini “herak man kan daga,” huli sa enot na guerra mundial asin sa kaibang mga kasakitan.​—Kapahayagan 12:​9, 12, 17.

Ini nagserbi man na paisi sa mga natatada kan bagong linalang digdi sa daga na sinda dapat na makikabtang sa pag-otob kan hula ni Jesus: “An maogmang baretang ini kan [napatindog nang] kahadean ihuhulit sa bilog na inierokan na daga para sa pagpatotoo sa gabos na nasyon; dangan madatong an katapusan.” Ano an “katapusan” na iyan? Ipinaliwanag ni Jesus: “Sa panahon na iyan magkakaigwa nin dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray. Sa katotoohan, kun dai pahalipoton an mga aldaw na iyan, mayong laman na makaliligtas; alagad huli sa mga pinili an mga aldaw na iyan pahahalipoton.”​—Mateo 24:​3-14, 21, 22.

Pinahiro kan espiritu ni Jehova an mga linahidan na idto sa saiyang bagong linalang na magmasibot sa pinakamahiwas na kampanya nin paghuhulit na nangyari sa dagang ini. Poon sa pirang ribo kan 1919, an kabilangan kan mahihigos na parabalangibog na ini kan Kahadean nagin mga 50,000 kaidtong kabangaan kan mga taon 1930. Siring sa ihinula, “an saindang tingog nakalakop sa bilog na daga, asin an saindang mga tataramon sagkod sa kaporoporohi kan ineerokan na daga.”​—Roma 10:18.

An mga natatada sana daw sa bagong linalang an titiponon para sa kaligtasan? Bako, ta sinabi kan hula na popogolan kan mga anghel nin Dios an mga doros kan dakulang kahorasaan sagkod na matapos an pagtipon bako sanang kan palangit na espirituwal na mga Israelitang ini kundi nin iba pa, nin “sarong dakulang kadaklan, na dai nin siisay man na makabibilang, hale sa gabos na nasyon asin tribo asin banwaan patin tataramon.” Ano daw an kaaabtan ninda? Tara, maruluwas sinda “sa dakulang kahorasaan” na ligtas tanganing magkamit nin buhay na daing katapusan sa paraisong daga!​—Kapahayagan 7:​1-4, 9, 14.

Makaoogma, an dakulang kadaklan na ini, na tinipon sa mga 229 kadagaan, nagin nang haros 4,500,000 na aktibong Saksi. Dakol pa an minaabot, arog kan ipinaririsa kan nag-atender na 11,431,171 sa Memorial kan kagadanan ni Jesus kan Abril 17 kaining nakaaging taon. Sa minilyon na ini, 8,683 sana, na naghihingakong kabilang sa mga natatada sa daga kan bagong linalang, an nakikabtang sa mga emblema kan Memorial. An mga kaiba sa sadit na grupong ini nungka na makakayang gibohon, kun sinda sana, an mahiwas na paghuhulit ngonyan. An minilyon na minakompuwesto sa dakulang kadaklan ngonyan nagtatabang sa sainda sa paghaman sa gibohon. (Sofonias 3:9) Dugang pa, an natokdoan nin marhay na mga miembro kan dakulang kadaklan ngonyan naggigibo nin administratibo asin iba pang responsableng trabaho kaiba kan linahidan na Namamahalang Grupo nin espirituwal na Israel, kun paanong an mga Netinim na bakong Israelita nagtrabaho kaiba kan mga saserdote sa paghirahay kan mga lanob nin Jerusalem.​—Nehemias 3:​22-26.

Paglalang nin “Bagong Kalangitan Asin Sarong Bagong Daga”

Kanigoan na kagayagayahan an kaiba sa pagtipon na ini! An nangyayari siring nanggad sa isinabing mangyayari ni Jehova: “Uya ako naglalalang nin bagong kalangitan asin sarong bagong daga; asin an dating mga bagay dai na magigirumdoman, ni masabong pa iyan sa puso. Alagad ta maggayagaya kamo, kamong banwaan, asin mag-orogma kamo sagkod lamang sa sakong linalalang. Huli ta uya linalalang ko an Jerusalem na magin dahelan nin kaogmahan asin an saiyang banwaan na magin dahelan nin kagayagayahan. Asin mag-oogma ako sa Jerusalem asin maggagayagaya sa sakong banwaan; asin dai na madadangog sa saiya an tingog nin tinangis o an tingog nin inagrangay.” (Isaias 65:​17-19) An bagong kalangitan na linalang ni Jehova sa katapustapusi bibilogon ni Cristo Jesus asin kan 144,000 na binuhay liwat na mga miembro kan bagong linalang na binakal sa katawohan sa nakaaging 19 siglo. Iyan orog nanggad na mamuraway kisa ano man na daganon na gobyerno na nagsakop sa literal na Jerusalem, dawa kaidtong kaaldawan ni Salomon. Kaiba dian an Bagong Jerusalem, sarong langitnon na siudad, na ilinaladawan an nagkikilyab na kagayonan sa Kapahayagan kapitulo 21.

An Bagong Jerusalem iyo an espirituwal na nobya ni Cristo, an saiyang 144,000 na linahidan na mga parasunod, na minaiba sa saindang Nobyo sa langit pagkagadan ninda asin pagkabuhay liwat sa espirituwal. Ilinaladawan sinda sa Kapahayagan 21:​1-4 na “naghihilig hale sa langit hale sa Dios,” an boot sabihon, ginagamit nia sa pagpaabot nin mga bendisyon sa katawohan digdi sa daga. Sa paaging ini naootob an hula: “Uya! An tabernakulo nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”

Makapagpapasalamat nanggad kita sa paglalang nin Dios kan bagong kalangitan na iyan! Bakong arog kan temporaryo, maraot na mga paghade na haloyon nang nandadamat sa katawohan, an areglong ini nin Dios sa paggobyerno magigin permanente. An bagong linalang asin an saindang espirituwal na aki, an dakulang kadaklan, nag-oogma sa dugang pang panuga nin Dios: “‘Huli ta kun paanong an bagong kalangitan asin an bagong daga na sakuyang gigibohon nagdadanay sa atubang ko,’ sabi ni Jehova, ‘siring man an saindong banhi asin an saindong ngaran magdadanay.’”​—Isaias 66:22.

“An bagong daga” mapoponan sa aking ini kan mga linahidan sa bagong linalang. Iyan an bago, matatakton sa Dios na sosyedad nin tawo digdi sa daga. An pagkaongis, krimen, kadahasan, karatan, asin inmoralidad sa sosyedad nin tawo ngonyan tunay na nagdodoon kan pangangaipo nin lubos na pagliwat sa bagong sosyedad sa daga, na nagpupunsionar sa paggiya kan maboot na bagong kalangitan. Iyan an katuyohan ni Jehova. Kun paanong linalang nia an bagong kalangitan, linalalang man nia an bagong daga paagi sa pagtipon sa dakulang kadaklan bilang an nukleo nin matoninong na pambagong kinaban na sosyedad. An sosyedad sanang ini an ililigtas na buhay “sa dakulang kahorasaan.”​—Kapahayagan 7:14.

Ano an malalaoman niato pakalihis kan dakulang kahorasaan? Sa pakikipag-olay sa saiyang mga apostol, an mga enot sa makompuwesto sa bagong kalangitan na maghahade sa bagong daga, si Jesus nanuga: “Sa katotoohan sinasabi ko sa saindo, Sa paglalang liwat, kun an Aki nin tawo magtukaw na sa saiyang mamurawayon na trono, kamo na nagsurunod sako matukaw man kamo sa doseng trono.” (Mateo 19:28) An gabos na 144,000 sa Bagong Jerusalem na ini makiiiba ki Jesus sa paghokom sa katawohan. Sa panahon na iyan sasalidahan nin pagkamoot an kapasloan asin pagkaongis bilang pundasyon kan sosyedad nin tawo. Hahaleon an mga sa tribo, sa rasa, asin nasyonalistikong mga problema. Luway-luway na ibabalik nin pagkabuhay liwat an mga namomotan. An binilyon na maimbod na katawohan magigin sarong dakula, sararong pamilya, na pinarahay tanganing mabuhay nin daing katapusan sa daga na ginibong paraiso.

Ini labi pa sa Utopia o Shangri-la (iniimahinar sanang mga lugar na duman sangkap an buhay). Iyan permanenteng linalang​—“bagong kalangitan asin sarong bagong daga na satong hinahalat oyon sa saiyang panuga, asin dian an katanosan an magdadanay”! (2 Pedro 3:13) Tunay na ini makangangalas na paglaom, pambihirang panuga kan saro na nagsabi, “Uya! ginigibo kong bago an gabos na bagay,” asin idinugang an nakapupukaw nin pagtubod na mga tataramon na: “An mga tataramon na ini maimbod asin totoo.”​—Kapahayagan 21:5.