Ini an Aldaw nin Kaligtasan!

“Uya! Ngonyan an espesyalmenteng panahon nin pag-ako. Uya! Ngonyan an aldaw nin kaligtasan.”—2 CORINTO 6:2.

 1. Ano an kaipuhan para sa aprobadong kamugtakan sa atubangan nin Dios asin ni Cristo?

SI Jehova nagtalaan nin aldaw nin paghokom para sa katawohan. (Gibo 17:31) Tangani na iyan magin aldaw nin kaligtasan para sa sato, kaipuhan niato an aprobadong kamugtakan sa atubangan nia asin kan saiyang nombradong Hokom, si Jesu-Cristo. (Juan 5:​22) An siring na kamugtakan naghahagad nin gawe-gawe na kaoyon kan Tataramon nin Dios asin nin pagtubod na nagtutulod sa sato na tabangan an iba na magin tunay na mga disipulo ni Jesus.

 2. Taano ta siblag sa Dios an kinaban nin katawohan?

² Huli sa minanang kasalan, an kinaban nin katawohan siblag sa Dios. (Roma 5:​12; Efeso 4:​17, 18) Kun siring, an satong mga hinuhulitan magkakamit sana nin kaligtasan kun sinda makiulian sa saiya. Lininaw ini ni apostol Pablo sa pagsurat sa mga Kristiano sa Corinto. Siyasaton niato an 2 Corinto 5:10–6:​10 tanganing helingon niato kun ano an sinabi ni Pablo manongod sa paghokom, pakiulian sa Dios, asin kaligtasan.

“Kami Padagos na Nangongombensir sa mga Tawo”

 3. Paano si Pablo ‘padagos na nangombensir sa mga tawo,’ asin taano ta maninigo na gibohon niato ini ngonyan?

³ Ikinonektar ni Pablo an paghokom sa paghuhulit kan sia sumurat: “Kita gabos dapat na mahayag sa atubangan kan trono nin paghokom kan Cristo, tanganing an lambang saro magkamit kan saiyang premyo para sa mga bagay na ginibo paagi sa hawak, segun sa mga bagay na saiyang ginibo, baga man iyan marahay o marigsok. Kun siring, sa pakaaram kan takot sa Kagurangnan, kami padagos na nangongombensir sa mga tawo.” (2 Corinto 5:​10, 11) An apostol ‘padagos na nangombensir sa mga tawo’ paagi sa paghuhulit kan maogmang bareta. Kumusta man kita? Mantang kita napapaatubang sa katapusan kan maraot na palakaw na ini nin mga bagay, maninigo na gibohon niato an bilog niatong makakaya na kombensiron an iba na gibohon an mga lakdang na kaipuhan tanganing makamtan an paborableng paghokom ni Jesus asin an pag-aprobar kan Burabod nin kaligtasan, si Jehova Dios.

4, 5. (a) Taano ta dai niato maninigong ipamansag an satong mga nagibo sa paglilingkod ki Jehova? (b) Paano na si Pablo namansag “para sa Dios”?

⁴ Minsan siring, kun binendisyonan nin Dios an satong ministeryo, dai kita maninigong mamansag. Sa Corinto an nagkapira maabhaw huli sa kapalangkawan sa sainda man sana o sa ibang tawo, sa siring ginigikanan nin mga pagkabaranga sa kongregasyon. (1 Corinto 1:​10-​13; 3:​3, 4) Nananabihan an situwasyon na ini, si Pablo nagsurat: “Dai kami nagrerekomendar giraray kan samong sadiri sa saindo, kundi nagtatao sa saindo nin pan-agyat sa pamamansag kun manongod sa samo, tangani na kamo magkaigwa nin simbag sa mga namamansag huli sa panluwas na itsura alagad bakong huli sa puso. Huli ta kun kami raot an isip, iyan para sa Dios; kun kami marahay an isip, iyan para sa saindo.” (2 Corinto 5:​12, 13) An mga mapaabaw-abaw dai interesado sa pagkasararo asin espirituwal na ikararahay kan kongregasyon. Gusto nindang mamansag huli sa panluwas na mga itsura imbes na tabangan an mga kapagtubod na makapatalubo nin marahay na puso sa atubangan nin Dios. Huli kaini, sinagwe ni Pablo an kongregasyon asin sa huri sinabi: “Sia na namamansag, mamansag sia ki Jehova.”​—2 Corinto 10:17.

⁵ Bako daw na si Pablo mismo namansag? Tibaad iyan an paghona nin nagkapira huli sa sinabi nia manongod sa pagigin sarong apostol. Alagad kaipuhan na sia mamansag “para sa Dios.” Namansag sia manongod sa saiyang mga kredensial bilang apostol, tangani na an mga taga Corinto dai bumaya ki Jehova. Ginibo ini ni Pablo tangani na ibalik sinda sa Dios ta dinadara sinda sa salang direksion nin falsong mga apostol. (2 Corinto 11:​16-​21; 12:​11, 12, 19-​21; 13:10) Pero, si Pablo bakong daing ontok sa paghihingoa na gulaton an iba kan saiyang mga nagibo.​—Talinhaga 21:4.

Itinutulod daw Kamo kan Pagkamoot ni Cristo?

 6. Paano kita maninigong maapektaran kan pagkamoot ni Cristo?

⁶ Bilang tunay na apostol, si Pablo nagtokdo sa iba manongod sa atang na pantubos ni Jesus. Iyan nagkaepekto sa buhay ni Pablo, ta sia nagsurat: “Itinutulod kami kan pagkamoot na yaon sa Cristo, huli ta iyo ini an samuyang paghokom, na an sarong tawo nagadan para sa gabos; kaya, kun siring, an gabos nagadan; asin sia nagadan para sa gabos tanganing idtong mga nabubuhay dai na mabuhay para sa sainda man sana, kundi para sa saiya na nagadan para sa sainda asin binuhay liwat.” (2 Corinto 5:​14, 15) Kanigoan na pagkamoot an ipinaheling ni Jesus sa pagtao kan saiyang buhay para sa sato! Daing duwa-duwa na iyan maninigong magin nagtutulod na puersa sa satong buhay. An pagpasalamat ki Jesus sa pagtao kan saiyang buhay para sa sato maninigong magpahiro sa sato sa maigot na aktibidad sa pagbalangibog kan maogmang bareta kan kaligtasan na itinao ni Jehova paagi sa saiyang namomotan na marhay na Aki. (Juan 3:​16; ikomparar an Salmo 96:2.) Itinutulod daw kamo “kan pagkamoot na yaon sa Cristo” na magkaigwa nin maigot na kabtang sa paghuhulit kan Kahadean asin paggibo nin disipulo?​—Mateo 28:​19, 20.

 7. Ano an boot sabihon kan ‘dai pagmidbid sa siisay man segun sa laman’?

⁷ Paagi sa paggamit kan saindang buhay sa paagi na nagpapaheling nin pagpasalamat sa ginibo ni Cristo para sa sainda, an mga linahidan ‘dai na nabubuhay para sa sainda man sana, kundi para sa saiya.’ “Bilang resulta,” sabi ni Pablo, “magpoon ngonyan dai mi na minimidbid an siisay man segun sa laman. Dawa kun namidbid mi si Cristo segun sa laman, tunay nanggad na ngonyan bako nang siring an pagkamidbid mi sa saiya.” (2 Corinto 5:16) An mga Kristiano dapat na dai paghelingon an mga tawo sa paaging sa laman, na tibaad ipinaoorog an mga Judio sa mga Hentil o an mga mayaman sa dukha. An mga linahidan ‘dai minimidbid an siisay man segun sa laman,’ ta an mahalaga an saindang espirituwal na relasyon sa mga kapagtubod. An mga ‘nakamidbid ki Cristo segun sa laman’ bako sanang an mga tawo na nakaheling ki Jesus kan sia yaon pa digdi sa daga. Dawa kun an nagkapira na naglalaom sa Mesiyas pinagheling kaidto si Cristo segun sa saiyang pagigin laman, dai na ninda dapat na gibohon iyan. Itinao nia an saiyang hawak bilang pantubos asin sia binuhay liwat bilang espiritung nagtatao nin buhay. An iba na ibabangon pasiring sa langitnon na buhay babayaan an saindang hawak na laman na kasuarin man dai naheling si Jesu-Cristo sa laman.​—1 Corinto 15:​45, 50; 2 Corinto 5:​1-5.

 8. Paano an mga indibiduwal nagin “kasaro ni Cristo”?

⁸ Kaolay pa man giraray an mga linahidan, idinugang ni Pablo: “Kun an siisay man kasaro ni Cristo, sia bagong linalang; an daan na mga bagay nag-agi na, uya! nagkaigwa nin bagong mga bagay.” (2 Corinto 5:17) An pagigin “kasaro ni Cristo” nangangahulogan nin pakisumaro sa saiya. (Juan 17:21) An relasyon na ini nangyari para sa tawong iyan kan sia dagkahon ni Jehova parani sa saiyang Aki asin pinaniaki an tawong iyan paagi sa banal na espiritu. Bilang pinaniaki nin espiritung aki nin Dios, sia “bagong linalang” na may esperansang makaiba ni Cristo sa langitnon na Kahadean. (Juan 3:​3-8; 6:​44; Galacia 4:​6, 7) An linahidan na mga Kristianong iyan tinawan nin marahayon na pribilehio sa paglilingkod.

“Makiulian Kamo sa Dios”

 9. Ano an ginibo nin Dios tangani na magin posible an pakiulian sa saiya?

⁹ Abaa kapinaboran ni Jehova an “bagong linalang”! Sabi ni Pablo: “An gabos na bagay gikan sa Dios, na nagpangyaring kita makiulian sa saiya paagi ki Cristo asin nagtao sa sato kan ministeryo nin pakiulian, arin na baga, na an Dios paagi ki Cristo nagpapangyari na an sarong kinaban makiulian sa saiya, na dai sinisingil sa sainda an saindang mga kalapasan, asin ipinaniwala nia sa samo an tataramon kan pakiulian.” (2 Corinto 5:​18, 19) An katawohan nagin siblag sa Dios poon kan magkasala si Adan. Alagad si Jehova may pagkamoot na iyo an nangenot sa pagbukas kan dalan nin pakiulian paagi sa atang ni Jesus.​—Roma 5:​6-​12.

10. Kiisay ipinaniwala ni Jehova an ministeryo nin pakiulian, asin ano an ginibo ninda tangani na iyan maotob?

¹⁰ Ipinaniwala ni Jehova sa mga linahidan an ministeryo nin pakiulian, kaya nasabi ni Pablo: “Kami kun siring mga embahador na karibay ni Cristo, na garo baga an Dios nakikimaherak paagi sa samo. Bilang mga karibay ni Cristo kami nakikimaherak: ‘Makiulian kamo sa Dios.’” (2 Corinto 5:20) Kan suanoy na mga panahon, sa pangenot isinusugo an mga embahador sa mga panahon nin pagkakalaban tanganing helingon kun baga puedeng malikayan an guerra. (Lucas 14:​31, 32) Mantang an makasalan na kinaban nin katawohan siblag sa Dios, isinugo nia an saiyang linahidan na mga embahador tanganing ipaaram sa mga tawo an saiyang mga kondisyon sa pakiulian. Bilang mga karibay ni Cristo, nakikimaherak an mga linahidan: “Makiulian kamo sa Dios.” An pakimaherak na ini maheherakon na sadol na makipagkatoninongan sa Dios asin akoon an kaligtasan na pinapangyayari nia paagi ki Cristo.

11. Paagi sa pagtubod sa pantubos, siisay sa katapustapusi an nakaaabot sa matanos na kamugtakan sa atubangan nin Dios?

¹¹ An gabos na tawo na nagtutubod sa pantubos puedeng makiulian sa Dios. (Juan 3:​36) Sabi ni Pablo: “An saro [si Jesus] na dai nakakamidbid nin kasalan ginibo niang [ni Jehova] magin kasalan para sa sato, tangani kitang magin an katanosan nin Dios paagi sa saiya.” (2 Corinto 5:21) An sangkap na tawong si Jesus iyo an dolot manongod sa kasalan para sa gabos na gikan ni Adan na ilinigtas sa katambay na pagigin makasalan. Sinda nagigin “katanosan nin Dios” paagi ki Jesus. An katanosan na ini, o matanos na kamugtakan sa atubangan nin Dios, enot na nakakamtan kan 144,000 na kaibang paramana ni Cristo. Sa laog kan saiyang Sangribong Taon na Paghade, an matanos na kamugtakan bilang sangkap na mga tawo makakamtan kan daganon na mga aki kan Amang Daing Sagkod, si Jesu-Cristo. Sinda saiyang dadarahon sa matanos na kamugtakan na may pagkasangkap tangani na sinda magin fiel sa Dios asin mag-ako kan balaog na buhay na daing katapusan.​—Isaias 9:6; Kapahayagan 14:1; 20:​4-6, 11-​15.

“An Espesyalmenteng Panahon nin Pag-ako”

12. Anong mahalagang ministeryo an ginigibo kan mga embahador asin sugo ni Jehova?

¹² Para sa kaligtasan, kita dapat na gumibo nin aksion kaoyon kan mga tataramon ni Pablo: “Sa paggibo sa kaibanan nia [ni Jehova], nakikimaherak man kami sa saindo na dai nindo akoon an dai na kutana maninigong kabootan nin Dios asin lipasan an katuyohan kaiyan. Huli ta sia nagsasabi: ‘Sa panahon nin pag-ako dinangog taka, asin sa aldaw nin kaligtasan tinabangan taka.’ Uya! Ngonyan an espesyalmenteng panahon nin pag-ako. Uya! Ngonyan an aldaw nin kaligtasan.” (2 Corinto 6:​1, 2) An linahidan na mga embahador ni Jehova asin an saiyang mga sugo, an “ibang karnero,” dai inaako an dai na kutana maninigong kabootan kan saindang langitnon na Ama asin linilipasan an katuyohan kaiyan. (Juan 10:16) Paagi sa saindang tanos na gawe-gawe asin maigot na ministeryo sa “panahon [na ini] nin pag-ako,” hinihingoa nindang kamtan an pabor nin Dios asin pinaaaram an mga nag-iistar sa daga na ini “an aldaw nin kaligtasan.”

13. Ano an pinakapunto kan Isaias 49:​8, asin paano iyan enot na naotob?

¹³ Kinokotar ni Pablo an Isaias 49:​8, na nagsasabi: “Ini an isinabi ni Jehova: ‘Sa panahon nin marahay na boot sinimbag taka, asin sa aldaw nin kaligtasan tinabangan taka; asin iningatan taka tanganing ikatao taka bilang tipan para sa banwaan, tanganing hirahayon an daga, tanganing papangyarihon an pagkasadiri giraray sa daing tawong minanang mga rogaring.’” An hulang ini enot na naotob kan an mga taga Israel pinatalingkas sa pagkabihag sa Babilonya asin sa huri nagpuli sa saindang tinuboan na daga na daing tawo.​—Isaias 49:​3, 9.

14. Paano an Isaias 49:8 naotob sa kaso ni Jesus?

¹⁴ Sa dagdag pang kaotoban kan hula ni Isaias, itinao ni Jehova an saiyang “lingkod” na si Jesus bilang ‘liwanag kan mga nasyon, tanganing an pagliligtas nin Dios umabot sagkod sa kaporoporohi kan daga.’ (Isaias 49:​6, 8; ikomparar an Isaias 42:​1-4, 6, 7; Mateo 12:​18-​21.) An “panahon nin marahay na boot,” o “panahon nin pag-ako,” minalataw na aplikado ki Jesus kan sia yaon digdi sa daga. Sia namibi, asin “sinimbag” sia nin Dios. Idto nagin “aldaw nin kaligtasan” para ki Jesus huli ta sia nagpadanay nin sangkap na integridad asin sa siring “nagin responsable sa daing katapusan na kaligtasan sa gabos na nagkukuyog sa saiya.”​—Hebreo 5:​7, 9; Juan 12:​27, 28.

15. Poon kasuarin na an espirituwal na mga Israelita naghingoa na mapatunayan na maninigo sa dai na kutana maninigong kabootan nin Dios, asin may anong obheto?

¹⁵ Iinaaplikar ni Pablo an Isaias 49:8 sa linahidan na mga Kristiano, na nakikimaherak sa sainda na ‘dai paglipasan an katuyohan kan dai na kutana maninigong kabootan nin Dios’ paagi sa dai paghihingoang kamtan an saiyang marahay na boot durante kan “panahon nin pag-ako” asin “aldaw nin kaligtasan” na saiyang itinatao. Idinugang ni Pablo: “Uya! Ngonyan an espesyalmenteng panahon nin pag-ako. Uya! Ngonyan an aldaw nin kaligtasan.” (2 Corinto 6:2) Poon kan Pentecostes 33 C.E., an espirituwal na mga Israelita naghingoa na mapatunayan na maninigo sa dai na kutana maninigong kabootan nin Dios tangani na an “panahon nin pag-ako” magin “aldaw nin kaligtasan” para sa sainda.

‘Pagrekomendar kan Satong Sadiri Bilang mga Ministro nin Dios’

16. Sa irarom nin anong masakit na mga kamugtakan na irinekomendar ni Pablo an saiyang sadiri bilang ministro nin Dios?

¹⁶ An nagkapira na asosyado sa kongregasyon sa Corinto dai napatutunayan kaidto na maninigo sa dai na kutana maninigong kabootan nin Dios. Binalobagi ninda si Pablo sa paghihingoa na raoton an saiyang autoridad bilang apostol, minsan ngani linikayan nia an ‘pagtao nin ano man na dahelan nin pagkasingkog.’ Tunay nanggad na irinekomendar nia an saiyang sadiri bilang ministro nin Dios paagi “sa pagtagal nin dakol, sa mga kahorasaan, sa mga pangangaipo, sa mga kasakitan, sa mga paghampak, sa mga bilanggoan, sa mga karibokan, sa mga pagpagal, sa mga bangging daing torog, sa mga panahon na daing pagkakan.” (2 Corinto 6:​3-5) Sa huri, nangatanosan si Pablo na kun ministro an saiyang mga kalaban, sia “mas pambihira nanggad na siring” huli sa pagdusa nin mas dakol na pagkabilanggo, paghampak, peligro, asin kakulangan sa ikabubuhay.​—2 Corinto 11:​23-27.

17. (a) Paagi sa pagpaheling nin anong mga kualidad na ikarerekomendar niato an satong sadiri bilang ministro nin Dios? (b) Ano an “mga armas nin katanosan”?

¹⁷ Arog ni Pablo asin kan saiyang kairiba, puede niatong irekomendar an satong sadiri bilang ministro nin Dios. Paano? Paagi “sa kadalisayan,” o kabinian, asin paagi sa paggawe kaoyon sa tamang kaaraman sa Biblia. Ikarerekomendar niato an satong sadiri paagi “sa pakatios,” na mapasensiang tinatagalan an sala o pagprobokar, asin paagi “sa kabootan” mantang ginigibo niato an mga bagay na nakatatabang sa iba. Dugang pa, ikarerekomendar niato an satong sadiri bilang mga ministro nin Dios paagi sa pag-ako kan paggiya kan saiyang espiritu, na nagpapaheling nin “pagkamoot na mayo nin pagsaginsagin,” nagtataram kan totoo, asin nagsasarig sa saiya para sa kosog na otobon an ministeryo. Interesante nanggad, pinatunayan man ni Pablo an saiyang pagigin ministro “paagi sa mga armas nin katanosan sa toong kamot asin sa wala.” Sa ralaban kan suanoy, an toong kamot parateng nagkakapot kan espada mantang an wala kapot an kalasag. Sa espirituwal na pakikilaban tumang sa falsong mga paratokdo, si Pablo dai naggamit nin mga armas kan makasalan na laman​—an katusohan, panloloko, pandadaya. (2 Corinto 6:​6, 7; 11:​12-​14; Talinhaga 3:​32) Sia naggamit nin matanos na “mga armas,” o paagi, sa pagpaoswag kan tunay na pagsamba. Maninigo na iyo man kita.

18. Kun kita ministro nin Dios, paano kita magawe?

¹⁸ Kun kita ministro nin Dios, magawe kita na kapareho ni Pablo asin kan saiyang mga katabang. Magawe kita siring sa mga Kristiano baga man iginagalang o dai. An maraot na mga bareta manongod sa sato dai mapaontok sa satong paghuhulit, ni magigin man kitang mapaabaw-abaw kun nababareta sa paborableng paagi. Kita mataram kan katotoohan asin tibaad mamidbid huli sa diosnon na mga gibo. Kun nasa nakagagadan na peligro sa pananalakay kan kaiwal, kita magtitiwala ki Jehova. Asin aakoon niato an disiplina na may pagpasalamat.​—2 Corinto 6:​8, 9.

19. Paano posible na ‘payamanon an dakol’ sa espirituwal na paagi?

¹⁹ Tinatapos an saiyang paliwanag manongod sa ministeryo nin pakiulian, si Pablo nagtaram manongod sa saiya man sana asin sa saiyang kairiba “siring sa nagmomondo alagad pirmeng naggagayagaya, siring sa dukha alagad nagpapayaman sa dakol, siring sa mayong-mayo alagad kagsadiri kan gabos na bagay.” (2 Corinto 6:10) Minsan ngani an mga ministrong idto may dahelan na ipagmondo an saindang makuring mga sakit, sinda may panlaog na kagayagayahan. Sinda dukha sa materyal, alagad sinda ‘nagpayaman sa dakol’ sa espirituwal na paagi. Sa katunayan, sinda “kagsadiri kan gabos na bagay” ta an saindang pagtubod nagtao sa sainda nin espirituwal na kayamanan​—pati kan esperansang magin langitnon na mga aki nin Dios. Asin sinda may mabungang marhay saka maogmang buhay bilang Kristianong mga ministro. (Gibo 20:35) Arog ninda, kita puedeng ‘magpayaman sa dakol’ paagi sa pakikikabtang sa ministeryo nin pakiulian ngonyan mismo​—sa aldaw na ini nin kaligtasan!

Magtiwala sa Pagliligtas ni Jehova

20. (a) Ano an odok sa boot na kamawotan ni Pablo, asin taano ta mayo nin panahon na dapat sayangon? (b) Ano an nagsesenyalar kan aldaw nin kaligtasan na kinabubuhayan niato ngonyan?

²⁰ Kan isurat ni Pablo an ikaduwa niang surat sa mga taga Corinto kaidtong mga 55 C.E., mga 15 taon na sana an natatada para sa Judiong palakaw nin mga bagay. Odok sa boot na gusto kan apostol na an mga Judio saka Hentil makiulian sa Dios paagi ki Cristo. Idto aldaw nin kaligtasan, asin mayo nin panahon na dapat sayangon. Bueno, kita yaon man sa kaparehong pagtatapos nin palakaw nin mga bagay poon kan 1914. An lakop sa globong paghuhulit kan Kahadean na ginigibo ngonyan nagsesenyalar na ini aldaw nin kaligtasan.

21. (a) Anong teksto kan taon an napili para sa 1999? (b) Ano an maninigo na ginigibo niato sa aldaw na ini nin kaligtasan?

²¹ An mga tawo sa gabos na nasyon kaipuhan na makadangog manongod sa probisyon nin Dios para sa kaligtasan paagi ki Jesu-Cristo. Mayo nin panahon na mag-atraso. Si Pablo nagsurat: “Uya! Ngonyan an aldaw nin kaligtasan.” An mga tataramon na iyan sa 2 Corinto 6:2 iyo an magigin teksto kan taon 1999 kan Mga Saksi ni Jehova. Tamang-tama, ta napapaatubang kita sa sarong bagay na mas grabe nanggad kisa sa pagkalaglag nin Jerusalem asin kan templo kaiyan! Yaon na sa enotan an katapusan kan enterong palakaw na ini nin mga bagay, na kalabot an gabos digdi sa daga. Ngonyan na​—bakong sa aga—​an panahon na gumibo nin aksion. Kun kita nagtutubod na an kaligtasan ki Jehova, kun kita namomoot sa saiya, asin kun pinahahalagahan niato an buhay na daing sagkod, dai niato lilipasan an katuyohan kan dai na kutana maninigong kabootan nin Dios. May odok sa pusong kamawotan na tawan nin onra si Jehova, patutunayan niato paagi sa tataramon asin sa gibo na talagang isinasaboot niato kun kita minakagsing: “Uya! Ngonyan an aldaw nin kaligtasan.”

Ano an Isisimbag Nindo?

◻ Taano ta mahalagang marhay an pakiulian sa Dios?

◻ Sairisay an embahador asin sugo na naggigibo kan ministeryo nin pakiulian?

◻ Paano niato ikarerekomendar an satong sadiri bilang ministro nin Dios?

◻ Ano an kahulogan para sa saindo kan teksto kan taon 1999 kan Mga Saksi ni Jehova?

[Mga retrato sa pahina 17]

Arog ni Pablo, kamo daw maigot na naghuhulit asin tinatabangan an iba na makiulian sa Dios?

Estados Unidos

Pransia

Cote d’Ivoire

[Retrato sa pahina 18]

Sa aldaw na ini nin kaligtasan, saro daw kamo sa kaburonyogan na nakikiulian ki Jehova Dios?