Mapuersa sa Ibong nin mga Kaluyahan

PUEDE kamong madaog kan saindong mga kaluyahan. An mga iyan garo mga linta kun minakapot. Tibaad isipon nindo na nungka nindo iyan na mapapangganahan, o hinohona nindo na kulang kamo nin kakayahan, na ikinokomparar an saindong sadiri sa iba asin isinasaboot na mas marahay sinda kisa saindo. Siring man, tibaad may nakakapaluya kamong helang na minaubos kan saindong kosog asin entusiasmo sa buhay. Ano man an dahelan, tibaad sa pagmate nindo mayo na kamo nin maluluwasan. Puede na an magin pagmate nindo kapareho kan ki Job, na nagsabi sa Dios: “O itago mo logod ako sa Sheol, na ingatan mo ako sagkod na mawara an saimong kaanggotan, na tawan mo ako nin talaan na panahon asin girumdomon mo ako!”​—Job 14:13.

Paano kamo makakahale sa siring na pagkadesesperar? Minsan ngani tibaad depisil iyan, kinakaipuhan na dai nguna nindo isipon an saindong mga problema. Halimbawa, puede nindong isip-isipon an ipinasabong na mga hapot ni Jehova sa saiyang maimbod na lingkod na si Job: “Haen ka kan lalangon ko an daga? Magsabi ka, kun igwa ka nin pakasabot. Siisay an nagbugtak kan mga sokol kaiyan, kun baga nakakaisi ka, o siisay an naghignit kan panokol kaiyan?” (Job 38:4, 5) Mantang hinohorophorop niato an kahulogan kan mga hapot na iyan, posibleng marhay na napapahiro kita na rekonoseron an nakakalabing kadonongan asin kapangyarihan ni Jehova. Saiyang tinotogotan na magpadagos an presenteng kamugtakan kan kinaban sa marahay na dahelan.

“Sarong Tunok sa Laman”

Saro pang maimbod na lingkod an nakiolay ki Jehova na haleon an “sarong tunok sa laman,” sarong problemang dai nahahale. Si apostol Pablo tolong beses na nakimaherak sa Dios na mawara logod sa saiya an kasakitan na ini. Ano man idto, siring sa nakakairitar na tunok, posible na nawara an kagayagayahan ni Pablo sa paglilingkod ki Jehova huli kaini. Iinagid ini ni Pablo sa daing ontok na pagtampal sa saiya. An simbag ni Jehova: “An sakuyang dai na kutana maninigong kabootan igo na para sa saimo; huli ta an sakuyang puersa sinasangkap sa kaluyahan.” Dai hinale ni Jehova an tunok na iyan sa laman. Kinaipuhan ni Pablo na makipagtusayan dian, alagad idinagdag nia: “Kun noarin ako maluya, saka man ako mapuersa.” (2 Cor. 12:7-10) Ano an boot niang sabihon?

An problema ni Pablo dai milagrosong nawara. Sa ibong kaiyan, dai sia kaini naolang sa paggibo nin pambihirang mga bagay sa paglilingkod ki Jehova. Si Pablo nanarig ki Jehova para sa suporta asin daing ontok na naghagad kan saiyang tabang. (Fil. 4:6, 7) Sa paghinanapos kan saiyang buhay sa daga, si Pablo nakasabi: “Nakipaglaban ako kan marahay na pakilaban, natapos ko an paorumbasan, naingatan ko an pagtubod.”​—2 Tim. 4:7.

Naggagamit si Jehova nin bakong sangkap na mga tawo sa paggibo kan saiyang kabotan sa ibong kan saindang mga pagkukulang asin mga problema, asin tama sana na mapasaiya an onra. Makakatao sia sa sainda nin paggiya asin kadonongan tanganing makayanan an saindang mga kadepisilan asin mapagdanay an saindang kagayagayahan sa paglilingkod sa saiya. Iyo, puede niang gamiton an bakong sangkap na mga tawo tanganing makagibo nin darakulang bagay sa ibong kan saindang mga kaluyahan.

Sinabi ni Pablo kun taano ta dai hinale nin Dios an saiyang tunok sa laman: “Tanganing dai ako magpalangkaw nin labi-labi.” (2 Cor. 12:7) An “tunok” ni Pablo nagpagirumdom sa saiya kan saiyang mga limitasyon asin nagtabang sa saiya na papagdanayon an mapakumbabang pagmansay sa saiyang sadiri. Kaoyon iyan kan itinokdo ni Jesus: “An siisay man na nagpapalangkaw kan saiya man sana ibababa, asin an siisay man na nagpapakumbaba sa saiya man sana ilalangkaw.” (Mat. 23:12) An mga kasakitan puedeng magtokdo sa mga lingkod nin Dios nin kapakumbabaan asin makatabang sa sainda na marealisar na tanganing makatagal nin maimbod kaipuhan nindang manarig ki Jehova. Sa siring, arog kan apostol, ‘ikakapaghambog ninda si Jehova.’​—1 Cor. 1:31.

Itinatagong mga Kaluyahan

An nagkapira tibaad may mga kaluyahan na dai ninda naaaraman o na nag-aalangan sindang rekonoseron. Halimbawa, an saro tibaad sobra an pagkompiar, na nananarig sa saiyang sadiring kakayahan. (1 Cor. 10:12) An saro pang kaluyahan na lakop sa bakong sangkap na mga tawo iyo an pagmawot na magin prominente.

Si Joab, na nagin heneral kan hukbo ni Hadeng David, makosog an boot, determinado, asin mapamaagi. Pero, si Joab nakakomiter nin magabat na kasalan na nagpaparisa nin mapangahas, ambisyosong espiritu. May karingisan niang ginadan an duwang heneral nin hukbo. Enot, ginadan nia si Abner huli sa pamamalos. Sa huri, sa pagsagin tinataratara an pinsan niang si Amasa, kinaptan ni Joab kan too niang kamot an barabas ni Amasa na garo nia ini hahadokan dangan sinaksak nia ini kan espada na nasa wala niang kamot. (2 Sam. 17:25; 20:8-10) Si Joab sinalidahan na ni Amasa bilang heneral nin hukbo asin ginamit nia an oportunidad na ini tanganing haleon an saiyang karibal, sa paglaom gayod na ikakabalik sia sa pagigin heneral. Maheheling nindo na dai kinontrol ni Joab an saiyang espiritu, kaiba an saiyang maimot na ambisyon. Guminawe siang may karingisan na mayong ipinaparisang pagbasol. Kan si Hadeng David madali nang magadan, pinagbotan nia an saiyang aking si Salomon na siertohon na mapadusahan si Joab sa saiyang karatan.​—1 Ha. 2:5, 6, 29-35.

Maninigo nanggad na dai kita magpadaog sa satong salang mga pagmawot; mahihimo niatong kontrolon an satong mga kaluyahan. Enot, kaipuhan niatong rekonoseron asin admitiron an mga iyan. Dangan makakagibo na kita nin aksion na mapangganahan an mga iyan. Makakapamibi kita nin regular ki Jehova, na hinahagad an saiyang tabang na madaog an mga kaluyahan na iyan. Mapag-aadalan man niato nin maigot an saiyang Tataramon, na naghahanap nin mga paagi na malabanan an siring na mga inklinasyon. (Heb. 4:12) Tibaad kinakaipuhan na padagos niatong paglabanan an satong mga pagkukulang asin dai panluyahan nin boot. An pakikipaglaban na ini tibaad magpadagos sagkod na kita bakong sangkap. Rinekonoser ini ni Pablo sa saiyang sadiring kamugtakan, na nagsurat: “An boot ko, ini dai ko ginigibo; alagad an ikinakaongis ko iyo an ginigibo ko.” Pero, arog kan aram nindo, ini dai basta na sana inako ni Pablo, na garo baga dai nia kayang kontrolon an saiyang mga ginigibo. Al kontraryo, padagos siang nakipagtusayan sa saiyang mga kaluyahan, na nananarig sa tabang nin Dios paagi ki Jesu-Cristo. (Roma 7:15-25) Sa iba pang kabtang, si Pablo nagsabi: “Linalanog ko an sakong hawak asin inooripon iyan, tanganing, pakatapos na ako makapaghulit sa iba, ako mismo dai isikwal sa ano man na paagi.”​—1 Cor. 9:27.

An mga tawo may tendensia na manarahotan. Puede niatong mapaglabanan iyan paagi sa pagkultibar kan punto de vista ni Jehova, na sinusunod an sadol ni Pablo sa mga Kristiano: “Ikasurang nin makuri an maraot, mangapot sa marahay.” (Roma 12:9) Sa satuyang pakikipaglaban na mapangganahan an satong mga kaluyahan, mangangaipo kita nin pagkasadiosan, pagmamaigot, asin pagdisiplina sa sadiri. Si David nakiolay ki Jehova: “Dalisaya an sakong mga bato asin an sakong puso.” (Sal. 26:2) Aram nia na kaya nin Dios na husgaran nin daing kasalasala an satong pinakahararom na mga inklinasyon asin magtao sa sato nin tabang kun kinakaipuhan niato iyan. Kun kita maghihimate sa paggiyang itinatao ni Jehova paagi sa saiyang Tataramon asin banal na espiritu, may magigibo kitang pag-oswag tanganing mapangganahan an satong mga pagkukulang.

Tibaad an nagkapira napupurisaw sa mga problema na sa paghona ninda dai ninda kayang atubangon na sinda sana. An kamagurangan sa kongregasyon siertong makakatao nin mamomoton na tabang asin pamparigon sa boot. (Isa. 32:1, 2) Alagad madonong na magkaigwa nin realistikong mga linalaoman. An nagkapirang problema mayo nin kompletong solusyon sa presenteng sistemang ini nin mga bagay. Minsan siring, dakol an nakanood na makayanan an mga iyan, asin nagkaigwa sinda nin nakakakontentong buhay huli kaiyan.

Garantiya kan Suporta ni Jehova

Ano man an mga problema na satong inaatubang sa masakit na mga panahon na ini, makakasierto kita na gigiyahan asin sususteniran kita ni Jehova. An Biblia nagsasadol sa sato: “Kun siring, magpakumbaba kamo sa irarom kan poderosong kamot nin Dios, tanganing ilangkaw nia kamo sa itinalaan na panahon; mantang itinatao nindo an gabos nindong kahaditan sa saiya, huli ta sia may pagmakolog sa saindo.”​—1 Ped. 5:6, 7.

Kan maaraman ni Kathy, na dakol nang taon na naglilingkod sa Bethel, na an saiyang agom may Alzheimer’s disease, helang na nagpapaluya kan isip, dai nia hinona na makakaya niang atubangon an mga kadepisilan na ibubunga kan helang na iyan. An pagngayongayo ki Jehova para sa kadonongan asin emosyonal na kosog kinaipuhan aroaldaw. Mantang an kamugtakan kan saiyang agom luway-luway na naggagrabe, an mamomoton na mga tugang na lalaki nagtao nin panahon na aramon kun paano aatubangon an helang na iyan asin an may pagmakolog na mga tugang na babae nagtao nin emosyonal na suporta. An mga Kristianong ini kabtang kan nakakapakosog na suporta na itinatao ni Jehova, asin naataman ni Kathy an saiyang agom sagkod na ini magadan pakalihis nin mga 11 taon. Sia nagsabi: “Odok sa puso asin may pagluha kong pinapasalamatan si Jehova para sa gabos niang tabang; iyan an nakatao sako nin danay na kosog. Dai ko aram na posible palan na padagos na magibo an sakong paninimbagan sa halawigon na panahon mantang nanluluya na akong marhay huli sa labi-labing kapagalan!”

Tabang na Mapangganahan an Itinatagong mga Kaluyahan

Kun namamatean nin mga indibiduwal na bako sindang maninigo, tibaad isipon ninda na dai hihinanyogon ni Jehova an saindang pag-arang sa panahon kan saindang kasakitan. Kun siring, marahay nanggad na horophoropon an sinabi ni David kan makamate sia nin pagbasol sa seryosong kasalan na naginibo ninda ni Bat-seba: “An pusong nalugadan asin ronot, O Dios, dai mo duduhagion.” (Sal. 51:17) Sinsero an pagsolsol ni David, kaya aram nia na sia makakadolok sa Dios patin makakalaom sa saiyang pagkaherak. Ipinabanaag ni Jesus an mapagmakolog na espiritu ni Jehova. Iinaplikar kan kagsurat kan Ebanghelyo na si Mateo an mga tataramon ni Isaias ki Jesus: “Mayong nalanog na gaho na saiyang roronoton, asin mayong nagbabagang linong mitsa na saiyang paparongon.” (Mat. 12:20; Isa. 42:3) Mantang nasa daga, ipinaheling ni Jesus an pagmalasakit para sa mga hamak asin inaapi. Sabi ngani, dai nia tinapos an natatadang buhay nin saro na nakakaagid sa mitsa nin lampara na madali nang maparong. Imbes, mapagpadangat niang inataman an mga nagdudusa tanganing makabalik an garo baga laad kan saindang buhay. Arog sia kaiyan kaidto kan sia nasa kaibanan nin mga tawo. Dai daw kamo nagtutubod na arog pa giraray kaiyan si Jesus asin na nakakapakidamay pa sia sa saindong mga kaluyahan? Mangnoha na ipinaparisa kan Hebreo 4:15 na sia an Saro na “makakapakidamay sa satong mga kaluyahan.”

Kan magsurat mapadapit sa saiyang “tunok sa laman,” sinabi ni Pablo na an kapangyarihan kan Cristo nagin “siring sa sarong tolda” sa ibabaw nia. (2 Cor. 12:7-9) Namatean nia an proteksion nin Dios paagi ki Cristo, kun paanong namamatean nin sarong tawong nasa tolda na protektado sia sa kamugtakan kan panahon. Arog ni Pablo, dai kita kaipuhan na magpadaog sa satong mga kaluyahan asin problema. Tanganing magdanay na makosog sa espirituwal, puede niatong gamiton an gabos na probisyon na itinatao sa sato ni Jehova paagi sa saiyang daganon na organisasyon. Puede niatong gibohon an gabos na posible sa tawo dangan maglaom ki Jehova na may lubos na garantiya na saiyang gigiyahan an satong mga lakdang. Huli sa pakaeksperyensia kun paano an kapangyarihan nin Dios naghihipno tanganing makayanan niato an satong mga kaluyahan, makakapagsabi kita nin arog kan sinabi ni Pablo: “Kun noarin ako maluya, saka man ako mapuersa.”​—2 Cor. 12:10.

[Ritrato sa pahina 3]

Si Pablo padagos na namibi ki Jehova na giyahan sia sa paghaman kan saiyang ministeryo

[Ritrato sa pahina 5]

Ipinagkatiwala ni Hadeng David ki Joab an hukbo

[Ritrato sa pahina 5]

Guminibo nin aksion si Joab tanganing haleon an karibal niang si Amasa

[Ritrato sa pahina 6]

An kamagurangan nagtatao nin mamomoton na paggiya basado sa Kasuratan na makakatabang sa sato na makayanan an satong mga problema