“Lubos Mong Otobon an Saimong Ministeryo”

“Lubos mong gibohon an saimong paglilingkod.”​—2 TIMOTEO 4:​5, Byington.

1, 2. Minsan ngani mga paraebanghelyo an gabos na Kristiano, ano an kahagadan kan Kasuratan sa kamagurangan?

SARO daw kamong parabalangibog kan Kahadean? Kun iyo, magpasalamat kamo ki Jehova Dios sa marahayon na pribilehiong ini. Saro daw kamong magurang sa kongregasyon? Dugang pang pribilehio iyan hale ki Jehova. Alagad nungka niatong paglingawan na bakong an sekular na edukasyon ni an abilidad na pagigin matibay magtaram an nagpapagin kualipikado sa siisay man sa sato para sa ministeryo o para sa pangangataman sa kongregasyon. Si Jehova an nagpapagin biyong kualipikado sa sato para sa ministeryo, asin huling an nagkapirang lalaki sa tahaw niato nakakaabot sa espesipikong mga kahagadan kan Kasuratan kaya may pribilehio sindang maglingkod bilang mga paraataman.​—2 Corinto 3:​5, 6; 1 Timoteo 3:1-7.

² Ginigibo kan gabos na nagdusay na Kristiano an gibohon nin mga paraebanghelyo, alagad an mga paraataman, o kamagurangan, an nangorognang kaipuhan na magpaheling nin marahay na halimbawa sa ministeryo. An kamagurangan na “nagmamaigot sa pagtaram asin pagtokdo” namamangno nin Dios asin ni Cristo, saka kan mga kapwa Saksi ni Jehova. (1 Timoteo 5:17; Efeso 5:23; Hebreo 6:10-12) Sa gabos na kamugtakan, an pagtotokdo nin sarong magurang sa kongregasyon dapat na magin nakararahay sa espirituwal, ta sinabihan ni apostol Pablo an paraataman na si Timoteo: “Madatong an panahon na dai na sinda matagal sa ikararahay na katokdoan, kundi, oyon sa saindang sadiring mga mawot, matipon sinda nin mga paratokdo tanganing pagirokon an saindang mga talinga; asin irarayo ninda an saindang talinga sa katotoohan, mantang sinda makiling sa falsong mga estorya. Pero ika, papagdanayon mo an toltol na pag-iisip sa gabos na bagay, tioson mo an karatan, gibohon mo an gibohon nin sarong paraebanghelyo, lubos mong otobon an saimong ministeryo.”​—2 Timoteo 4:3-5.

 3. Ano an kaipuhan na gibohon tanganing an falsong mga katokdoan dai magsapeligro sa espirituwalidad kan kongregasyon?

³ Tanganing masierto na an falsong mga katokdoan dai magsapeligro sa espirituwalidad kan kongregasyon, dapat na sunodon nin sarong paraataman an hatol ni Pablo: “Magin seryoso sa gabos na bagay, . . . lubos mong gibohon an saimong paglilingkod.” (2 Timoteo 4:​5, Byington) Iyo, kaipuhan nin sarong magurang sa kongregasyon na ‘lubos na otobon an saiyang ministeryo.’ Dapat niang gibohon iyan nin kompleto o lubos. An sarong magurang sa kongregasyon na lubos na ginigibo an saiyang ministeryo nagtatao nin tamang atension sa gabos niang paninimbagan, na mayong pinapabayaan o bakong kompleto an ginigibo. An siring na lalaki fiel dawa sa saradit na bagay.​—Lucas 12:48; 16:10.

 4. Ano an makatatabang sa sato tanganing lubos na maotob an satong ministeryo?

⁴ An lubos na pag-otob kan satong ministeryo dai pirmeng nagkakaipo nin dagdag na panahon, alagad talagang nagkakaipo iyan nin tamang paggamit nin panahon. An pagigin balanse asin regular puedeng makatabang sa gabos na Kristiano na maotob an mga kalabot sa ministeryo. Tanganing magkaigwa sia nin orog na panahon sa paglilingkod sa langtad, kaipuhan nin sarong magurang sa kongregasyon an marahay na personal na pag-organisar tanganing balansehon an saiyang iskedyul asin aramon kun ano an idedelegar patin kun paano iyan gigibohon. (Hebreo 13:17) Naturalmente, ginigibo man nin sarong respetadong magurang sa kongregasyon an saiyang sadiring kabtang, arog ni Nehemias, na personal na nakikabtang sa pagtogdok liwat kan mga lanob kan Jerusalem. (Nehemias 5:16) Asin an gabos na lingkod ni Jehova maninigong makikabtang nin regular sa paghuhulit kan Kahadean.​—1 Corinto 9:16-18.

 5. Ano an maninigong magin saboot niato manongod sa ministeryo?

⁵ Kanigoan kagayagaya kan sugo sa sato bilang mga parabalangibog kan naestablisar nang langitnon na Kahadean! Sierto nanggad na pinahahalagahan niato an satong pribilehio na magkaigwa nin kabtang sa paghuhulit kan maogmang bareta sa gabos na ineerokan na daga bago dumatong an katapusan. (Mateo 24:14) Minsan ngani kita bakong sangkap, puede kitang maenkaminar kan mga tataramon ni Pablo: “Igwa kami kan kayamanan [na ministeryong] ini sa mga lalagan na gibo sa dalipay, tanganing an puersa na labi sa ordinaryo magin sa Dios asin bakong an gikan mismo sa samo.” (2 Corinto 4:7) Iyo, puede kitang magtao nin kawiliwiling paglilingkod​—alagad solamente paagi sa tao nin Dios na kosog asin kadonongan.​—1 Corinto 1:26-31.

Pagpabanaag kan Kamurawayan nin Dios

 6. Ano an nagin kalaenan kan natural na Israel asin kan espirituwal na Israel?

⁶ Nagtataram manongod sa linahidan na mga Kristiano, sinabi ni Pablo na an Dios an “nagpagin biyong kualipikado sa samo na magin mga ministro nin sarong bagong tipan.” Ipinaheheling kan apostol an kalaenan kan bagong tipan na ginibo sa espirituwal na Israel paagi ki Jesu-Cristo asin kan daan na tipan nin Ley na ginibo sa natural na Israel paagi ki Moises. Idinagdag ni Pablo na kan maghilig si Moises sa Bukid nin Sinai dara an mga tabla nin gapo na nasusuratan kan Sampulong Togon, maliwanagon an saiyang lalauogon kaya dai iyan maturuhokan kan mga Israelita. Pero pag-abot nin panahon, may mas seryosong nangyari huli ta “nguminurol an saindang mga kakayahan nin pag-isip” asin nasukloban an saindang puso. Minsan siring, kun minabalik ki Jehova na may bilog na pusong debosyon, an suklob nahahale. Nagtataram naman manongod sa ministeryong itinao sa mga nasa bagong tipan, si Pablo nagsasabi: “Kita gabos, . . . nagpapabanaag na siring sa mga salming kan kamurawayan ni Jehova paagi sa mga lalauogon na daing tahob.” (2 Corinto 3:6-8, 14-18; Exodo 34:29-35) An “ibang karnero” ni Jesus ngonyan may pribilehio man na ipabanaag an kamurawayan ni Jehova.​—Juan 10:16.

 7. Paano ikapababanaag nin mga tawo an kamurawayan nin Dios?

⁷ Paano ikapababanaag kan makasalan na mga tawo an kamurawayan nin Dios, mantang mayo nin tawo na makakaheling sa saiyang lalauogon asin mabubuhay? (Exodo 33:20) Bueno, apuera sa personal na kamurawayan ni Jehova, yaon man an saiyang mamuraway na katuyohan na ibindikar an saiyang soberaniya paagi kan saiyang Kahadean. An mga katotoohan may koneksion sa Kahadean kabtang kan “makangangalas na mga bagay nin Dios” na pinonan na ibalangibog kan mga binuboan kan banal na espiritu kan Pentecostes 33 C.E. (Gibo 2:11) Paagi sa paggiya kan espiritu, lubos nindang maootob an ministeryong ipinagkatiwala sa sainda.​—Gibo 1:8.

 8. Kun mapadapit sa ministeryo, ano an determinadong gibohon ni Pablo?

⁸ Determinado si Pablo na dai pagtogotan na may makaolang sa saiya sa lubos na pag-otob sa saiyang ministeryo. Sia nagsurat: “Mantang igwa kami kan ministeryong ini sono sa pagkaherak na ipinaheling sa samo, dai kami minasuko; kundi isinikwal niamo an rirong na mga bagay na maninigong ikasupog, na dai naglalakaw na may katusohan, ni sinasalakan man an tataramon nin Dios, kundi paagi sa paghayag kan katotoohan nagrerekomendar kan samong sadiri sa lambang konsensia nin tawo sa pagheling nin Dios.” (2 Corinto 4:​1, 2) Paagi sa inaapod ni Pablo na “ministeryong ini,” nahahayag an katotoohan asin mahiwas na napapalakop an espirituwal na liwanag.

9, 10. Paano posibleng ikapabanaag an kamurawayan ni Jehova?

⁹ Mapadapit sa Gikanan kan pisikal asin espirituwal na liwanag, si Pablo nagsurat: “An Dios iyo an nagsabi: ‘Sumirang an liwanag hale sa kadikloman,’ asin sia suminirang sa satong puso tanganing iyan magliwanag sa mamuraway na kaaraman dapit sa Dios paagi sa lalauogon ni Cristo.” (2 Corinto 4:6; Genesis 1:2-5) Huling tinawan kita kan dai masokol na pribilehio nin pagigin mga ministro nin Dios, papagdanayon niato an satong sadiri na malinig tanganing ikapabanaag niato siring sa mga salming an kamurawayan ni Jehova.

¹⁰ An mga indibiduwal na nasa espirituwal na kadikloman dai makakaheling kan kamurawayan ni Jehova o kan banaag kaiyan ki Jesu-Cristo, an Moises na Orog na Dakula. Alagad bilang mga lingkod ni Jehova, inaako niato an mamuraway na liwanag gikan sa Kasuratan asin ipinababanaag iyan sa iba. Tanganing dai malaglag an mga yaon ngonyan sa espirituwal na kadikloman, kaipuhan ninda an liwanag hale sa Dios. Kun siring, may dakulang kagayagayahan asin kaigotan na kuyogon niato an pagboot nin Dios na pasirangon sa kadikloman an liwanag para sa ikamumuraway ni Jehova.

Pasirangon an Saindong Liwanag sa mga Pag-adal sa Biblia

11. Ano an sinabi ni Jesus manongod sa pagpasirang kan satong liwanag, asin ano an sarong paagi nin paggibo kaini sa satong ministeryo?

¹¹ Sinabi ni Jesus sa saiyang mga parasunod: “Kamo iyo an liwanag kan kinaban. An siudad dai matatago kun namumugtak sa itaas nin bukid. An mga tawo minasolo nin ilawan asin ibinubugtak iyan, bakong sa irarom kan basket na takadan, kundi sa ibabaw kan bugtakan nin ilaw, asin iyan nakaliliwanag sa gabos na nasa harong. Kaagid kaiyan pasiranga an saindong liwanag sa atubangan nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” (Mateo 5:14-16) An satong marahay na paggawe puedeng magpangyari sa iba na pamurawayon an Dios. (1 Pedro 2:12) Asin an laen-laen na aspekto kan satong pag-ebanghelyo nagtatao sa sato nin dakol na oportunidad na pasirangon an satong liwanag. An saro sa satong pangenot na mga obheto iyo na ipabanaag an espirituwal na liwanag hale sa Tataramon nin Dios paagi sa pamamayo nin epektibong mga pag-adal sa Biblia. Importanteng marhay na paagi ini nin lubos na pag-otob sa satong ministeryo. Anong mga suhestion an puedeng makatabang sa sato na makapamayo nin mga pag-adal sa Biblia na nagpapahiro sa puso kan mga naghahanap kan katotoohan?

12. Ano an koneksion kan pamibi sa pamamayo nin mga pag-adal sa Biblia?

¹² An pamibi ki Jehova mapadapit digdi nagpapaheling kan satong odok na pagmawot na magkaigwa nin mga inaadalan sa Biblia. Nagpapaheling man iyan na nasasabotan niato an kahalagahan nin pagtabang sa iba na magkaigwa kan kaaraman dapit sa Dios. (Ezequiel 33:7-9) Seguradong sisimbagon ni Jehova an satong mga pamibi asin bebendisyonan an satong sadiosan na mga paghihingoa sa ministeryo. (1 Juan 5:​14, 15) Alagad dai kita namimibi na makakua sana nin inaadalan sa Biblia. Pagkatapos na maestablisar niato an pag-adal, an pamibi asin paghorophorop mapadapit sa espesipikong mga pangangaipo kan inaadalan sa Biblia makatatabang sa sato na mapamayohan nin epektibo an kada sesyon.​—Roma 12:12.

13. Ano an puedeng makatabang sa sato na makapamayo nin epektibong mga pag-adal sa Biblia?

¹³ Tanganing makapamayo nin epektibong mga pag-adal sa Biblia, dapat kitang mag-andam na marhay para sa kada sesyon. Kun sa pagmate niato medyo kulang kita nin kakayahan, tibaad makatabang na marhay na obserbaran kun paano pinangengenotan kan paraataman sa Pag-adal sa Libro kan Kongregasyon an pagtokar kan leksion sa kada semana. Kun beses, tibaad magigibo niatong umiba sa mga parahayag kan Kahadean na nagkaigwa na nin marahay na mga resulta sa pamamayo nin mga pag-adal sa Biblia. Siempre, an aktitud asin pamamaagi nin pagtotokdo ni Jesu-Cristo an nangorognang dapat niatong estudyaran.

14. Paano niato matataros an puso nin sarong inaadalan sa Biblia?

¹⁴ Naogmang marhay si Jesus sa paggibo kan kabotan kan saiyang langitnon na Ama asin sa pakikipag-olay sa iba manongod sa Dios. (Salmo 40:8) Sia mahoyo asin nagin mapanggana sa pagtaros sa puso kan mga naghinanyog kaidto sa saiya. (Mateo 11:28-30) Kun siring, magmaigot kita na taroson an puso kan satong mga inaadalan sa Biblia. Tanganing magibo niato iyan, kaipuhan kitang mag-andam para sa kada pag-adal na nasa isip an partikular na mga pangangaipo kan inaadalan. Halimbawa, kun hale sia sa kultura na bakong pamilyar sa Biblia, tibaad kaipuhan niato siang kombensiron na totoo an Biblia. Kun siring kaiyan, siempre kaipuhan niatong bumasa nin dakol na teksto asin ipaliwanag iyan.

Tabangan an mga Inaadalan na Masabotan an mga Ilustrasyon

15, 16. (a) Paano niato matatabangan an sarong inaadalan na dai nasasabotan an sarong ilustrasyon na ginamit sa Biblia? (b) Ano an puede niatong gibohon kun an saro sa satong mga publikasyon naggagamit nin sarong ilustrasyon na depisil masabotan nin sarong inaadalan sa Biblia?

¹⁵ An sarong inaadalan sa Biblia tibaad bakong pamilyar sa sarong partikular na ilustrasyon na ginamit sa Kasuratan. Halimbawa, tibaad dai nia masabotan an boot sabihon ni Jesus kan magtaram sia manongod sa pagbugtak nin lampara sa kandelero. (Marcos 4:​21, 22) An sinasabi ni Jesus sarong suanoy na lamparang de lana na may naglalaad na mitsa. An siring na lampara ilinalaag sa ibabaw nin sarong espesyal na bugtakan asin sa siring naiilawan an sarong lugar kan harong. Tibaad kaipuhan an pagsiyasat sa temang “Lamp” asin “Lampstand” sa publikasyon na arog baga kan Insight on the Scriptures tanganing gibohon na malinaw an ilustrasyon ni Jesus.a Alagad nakakokontento nanggad na magduman sa inaadalan sa Biblia na may preparado nang paliwanag na masasabotan asin aapresyaron kan inaadalan!

¹⁶ An sarong pantabang sa pag-adal sa Biblia tibaad gumamit nin ilustrasyon na depisil masabotan kan sarong inaadalan. Tawan nin panahon na ipaliwanag iyan, o gumamit nin ibang ilustrasyon na may parehong kahulogan. Tibaad idinodoon nin sarong publikasyon na an marahay na kapadis asin koordinadong paghihingoa mahalaga sa pag-agom. Tanganing iilustrar ini, tibaad sambiton an sarong lalaki na minalabyog hale sa sarong trapesio, binutasan iyan, asin nagdedepende sa pagsalo sa saiya nin saro pang sirkero. Bilang opsion, an pangangaipo nin sarong marahay na kapadis asin pagkoordinar nin paghihingoa tibaad puedeng iilustrar paagi sa kooperasyon nin mga trabahador paagi sa pagpasapasa kan mga kahon kun nagdidiskarga sa sarong baroto.

17. Ano an manonodan niato ki Jesus manongod sa mga ilustrasyon?

¹⁷ An paggamit nin ibang ilustrasyon puedeng mangaipo nin patienot na pag-andam. Pero, saro iyan na paagi nin pagpaheling kan satong personal na interes sa sarong inaadalan sa Biblia. Naggamit si Jesus nin simpleng mga ilustrasyon tanganing linawon an depisil na mga pinag-oolayan. An saiyang Sermon sa Bukid nagtatao nin mga halimbawa kaini, asin ipinaheheling kan Biblia na an saiyang pagtotokdo nagkaigwa nin marahay na epekto sa mga nagdadangog sa saiya. (Mateo 5:1–​7:29) Mapasensiang ipinapaliwanag ni Jesus an mga bagay huli ta igwa sia nin odok na interes sa iba.​—Mateo 16:5-12.

18. Ano an isinusuherir mapadapit sa mga teksto na sitado sa satong mga publikasyon?

¹⁸ An interes niato sa iba an mamotibar sa sato na ‘makipagrasonan hale sa Kasuratan.’ (Gibo 17:​2, 3) Nagkakaipo ini nin mapagngayongayong pag-adal asin madonong na paggamit kan mga publikasyon na itinatao paagi sa “fiel na mayordomo.” (Lucas 12:42-44) Halimbawa, an librong Kaaraman na Minagiya Pasiring sa Buhay na Daing Katapusan igwa nin dakol na kotasyon na teksto.b Huling dai magkakaigo, an nagkapira sitado na sana. Durante nin pag-adal sa Biblia, mahalaga na basahon asin ipaliwanag kisuerra an nagkapira kan sitadong mga tekstong ini. Total, an satong pagtotokdo basado sa Tataramon nin Dios, asin mapuersang marhay iyan. (Hebreo 4:12) Magbukas nin Biblia durante kan kada pag-adal, na parateng ginagamit an mga teksto na yaon sa mga parapo. Tabangan an inaadalan na masabotan an sinasabi kan Biblia manongod sa sarong tema o paggawe. Pagmaigotan na ipaheling sa saiya kun paano sia makikinabang sa pagkuyog sa Dios.​—Isaias 48:​17, 18.

Magpalataw nin Nakapupukaw nin Isip na mga Hapot

19, 20. (a) Taano ta dapat gumamit nin mga hapot sa punto de vista kun namamayo nin pag-adal sa Biblia? (b) Ano an puedeng gibohon kun an sarong partikular na tema nagkakaipo nin dugang pang pag-estudyar?

¹⁹ An ekspertong paggamit ni Jesus nin mga hapot nakatabang sa mga tawo na mangatanosan. (Mateo 17:24-27) Kun mapalataw kita nin mga hapot sa punto de vista na dai ipinapasupog an sarong inaadalan sa Biblia, puedeng ihayag kan saiyang mga simbag kun ano an saiyang iniisip manongod sa sarong pinag-oolayan. Tibaad madiskobre niato na igwa pa palan sia nin mga punto de vista na bakong sono sa Kasuratan. Halimbawa, tibaad naniniwala sia sa Trinidad. Sa kapitulo 3, sinasabi kan librong Kaaraman na an tataramon na “Trinidad” mayo sa Biblia. An libro nagkotar asin nagsitar nin mga teksto na nagpapaheling na si Jehova siblag ki Jesus asin na an banal na espiritu iyo an puersa aktiba nin Dios, bakong persona. An pagbasa asin pagpaliwanag sa mga tekstong ini sa Biblia tibaad igo na. Alagad paano kun orog pa an kaipuhan? Pakatapos gayod kan sunod na regular na sesyon nin pag-adal, puedeng gumamit nin panahon sa kapakipakinabang na pagpaliwanag kan temang ini na tinokar sa ibang publikasyon kan Mga Saksi ni Jehova, arog kan brosyur na Should You Believe in the Trinity? Pakatapos kaiyan, puede niatong ipagpadagos an pag-adal na ginagamit an librong Kaaraman.

²⁰ Ipamugtak ta baga na nakabibigla o nakadedesganar pa ngani an simbag kan estudyante sa sarong hapot sa punto de vista. Kun an kalabot pagsigarilyo, o ibang sensitibong tema, puede niatong isuherir na ipadagos niato an pag-adal asin sa huri na sana pag-olayan an bagay na iyan. Dahel aram tang nagsisigarilyo pa an inaadalan, mahanap kita nin napublikar nang impormasyon na puedeng makatabang sa saiya na umoswag sa espirituwal. Mantang pinagmamaigotan niato na taroson an puso kan inaadalan, puede niatong ipamibi na logod tabangan sia ni Jehova na tumalubo sa espirituwal.

21. Ano an puedeng mangyari kun ibabagay niato an satong mga pamamaagi nin pagtotokdo sa espesipikong mga pangangaipo nin sarong inaadalan sa Biblia?

²¹ Paagi sa marahay na pag-andam asin sa tabang ni Jehova, daing duwa-duwa na mahihimo niatong ibagay an satong mga pamamaagi nin pagtotokdo sa espesipikong mga pangangaipo kan inaadalan sa Biblia. Mantang nag-aagi an panahon, tibaad matabangan niato sia na makapatalubo nin hararom na pagkamoot sa Dios. Tibaad magin mapanggana man kita sa pagpatalubo nin paggalang asin pag-apresyar sa organisasyon ni Jehova. Asin kanigoan kanakaoogma kun minimidbid kan mga inaadalan sa Biblia na ‘an Dios tunay nanggad na yaon sa sato’! (1 Corinto 14:​24, 25) Kun siring, logod na mamayo kita nin epektibong mga pag-adal sa Biblia asin gibohon an gabos niatong makakaya na tabangan an iba na magin mga disipulo ni Jesus.

Sarong Kayamanan na Dapat Pakamahalon

22, 23. Ano an kaipuhan tanganing lubos niatong maotob an satong ministeryo?

²² Tanganing lubos na maotob an satong ministeryo, dapat kitang magsarig sa kosog na tao nin Dios. Nagtataram manongod sa ministeryo, sinuratan ni Pablo an mga kapwa linahidan na Kristiano: “Igwa kami kan kayamanan na ini sa mga lalagan na gibo sa dalipay, tanganing an puersa na labi sa ordinaryo magin sa Dios asin bakong an gikan mismo sa samo.”​—2 Corinto 4:7.

²³ Baga man kabilang sa linahidan o “ibang karnero,” kita siring sa mapapasaon na mga lalagan na gibo sa dalipay. (Juan 10:16) Pero, puede kitang tawan ni Jehova kan kosog na kaipuhan tanganing maotob an satong mga asignasyon ano man na mga pangigipit an gibohon sa sato. (Juan 16:13; Filipos 4:13) Kun siring, magtiwala kita nin lubos ki Jehova, pakamahalon an satong kayamanan na paglilingkod, asin lubos na otobon an satong ministeryo.

[Mga Nota sa Ibaba]

Ano an Isisimbag Nindo?

• Ano an magigibo nin kamagurangan tanganing lubos na maotob an saindang ministeryo?

• Paano niato mapaooswag an pagigin epektibo kan satong pamamayo nin mga pag-adal sa Biblia?

• Ano an gigibohon nindo kun dai nasabotan nin inaadalan sa Biblia an sarong ilustrasyon o nangangaipo sia nin dugang na impormasyon dapit sa sarong tema?

[Ritrato sa pahina 16]

An Kristianong kamagurangan nagtotokdo sa kongregasyon asin nagtatabang na sanayon sa ministeryo an mga kapagtubod

[Ritrato sa pahina 18]

An pamamayo nin epektibong mga pag-adal sa Biblia sarong paagi nin pagpasirang kan satong liwanag