Mag-ugma sa Nagigibo Mong Pag-uswag!

 1. Taano ta dai kita ikinukumparar ni Jehova sa iba?

HABO ni Jehova na an gabos na bagay parareho lang, na mayong pagkakaiba. Hiling-hiling ini sa makangangalas niyang mga linalang, kaiba na an mga tawo. Mayo sa sato nin may eksaktong kapareho. Kaya nungkang ikinukumparar ka ni Jehova sa iba. Sinisiyasat niya an saimong puso, an saimong pagkatawo. (1 Sam. 16:7) Aram niya man kun sa ano ka matibay asin kun sa ano ka maluya, pati kun paano ka pinadakula. Asin dai ka niya hahagadan nin labi sa kaya mo. Kaipuhan tang arugon si Jehova paagi sa paghihinguwang mansayon an sadiri ta arog kan pagmansay niya sa sato. Paagi kaiyan, magkakaigwa kita nin “tultol na isip,” na dai man nagigin halangkaw o hababa an paghiling sa sadiri.—Roma 12:3.

 2. Taano ta dai ta dapat ikumparar an satong sadiri sa iba?

² Siyempre, puwede kitang makinabang paagi sa pag-obserbar sa halimbawa kan sarong maimbod na brother o sister na mahusay sa ministeryo. (Heb. 13:7) Tibaad makanuod kita saiya nin mga paagi na makakatabang sato na magin mas epektibo sa satong ministeryo. (Fil. 3:17) Pero may pagkakalain an pag-arog sa marahay na halimbawa nin saro asin an pagkumparar kan kakayahan mo sa kakayahan niya. An siring na pagkumparar puwedeng magin dahilan na mauri ka, madisganar, o mamatian mo pa ngani na mayo ka nin halaga. Arog kan nanudan ta sa sinundan na artikulo, an pakikipagkumpetensiya sa iba sa laog kan kongregasyon makakadanyar man sa satong espirituwalidad. Kaya mamumuton na sinasadol kita ni Jehova: “Siyasaton kan lambang saro an sadiri niyang mga gibo, dangan magkakaigwa siya nin dahilan para mag-ugma sa mga nagibo niya, asin bako sa pagkumparar kan saiyang sadiri sa iba.”—Gal. 6:4.

 3. Anong mga pag-uswag mo sa espirituwal an nakakatao saimo nin kaugmahan?

³ Gusto ni Jehova na ikaugma mo an nagigibo mong pag-uswag sa espirituwal. Halimbawa, kun nabawtismuhan ka, ikinakaugma mo na naabot mo an pasuhan na iyan! Ika mismo an nagdesisyon na abuton iyan. Ginibo mo iyan dahil sa pagkamuot mo sa Diyos. Isipa an mga nagin pag-uswag mo puon kaiyan. Halimbawa, mas gustong-gusto mo na daw ngunyan an saimong personal na pagbasa asin pag-adal nin Bibliya? Nagin mas makahulugan na daw saka udok sa puso an saimong mga pamibi? (Sal. 141:2) Nagin mas natural na daw an pakikipag-ulay mo pag naghuhulit saka mas epektibo mo na daw na nagagamit an mga pantabang sa ministeryo? Asin kun may pamilya ka, tinabangan ka daw ni Jehova na magin mas marahay na agom o magurang? Puwede kang makamati nin kaugmahan asin pagkakontento sa mga pag-uswag mo sa mga bagay na iyan.

 4. Ano an pag-uulayan ta sa artikulong ini?

⁴ Puwede kitang makatabang sa iba na magin maugma sa mga ginigibo nindang pag-uswag sa espirituwal. Matatabangan ta man sinda na dai ikumparar an sadiri ninda sa iba. Sa artikulong ini, aaramon ta kun paano matatabangan kan mga magurang an saindang mga aki, kun paano matatabangan kan mag-agom an lambang saro, asin kun paano matatabangan kan mga elder asin kan iba pa an saindang mga kapagtubod. Panghuri, pag-uulayan ta an nagkapirang prinsipyo sa Bibliya na makakatabang sato sa paggibo nin rasonableng mga pasuhan sigun sa mga kakayahan saka kamugtakan niyato bilang indibidwal.

 5. Sigun sa Efeso 6:4, ano an dai dapat gibuhon kan mga magurang?

⁵ Dai dapat ikumparar kan mga magurang an aki ninda sa iba pang aki o hagadon sa aki ninda an labi sa kaya kaini. Dahil kun gigibuhon iyan kan mga magurang, puwede iyan na makapaluya kan buot kan aki ninda. (Basahon an Efeso 6:4.) An sister na si Sachikob nagsabi: “Inaasahan sako kan mga titser ko na dapat mas matibay ako sa mga kaklase ko. Saka gusto man ni Mama na tibayan ko an pag-eskuwela ko dahil magigin magayon na patotoo daa ’yan ki titser saka ki Papa na bakong kapagtubod. Sa katunayan, gusto niya na pirmi akong perpek sa mga eksam, na imposible man. Dawa haloy na panahon na, naiisip ko pa man giraray minsan kun baga nauugma si Jehova sa pinakamakakaya ko.”

 6. Ano an manunudan kan mga magurang sa Salmo 131:1, 2?

⁶ May mahalagang manunudan an mga magurang sa Salmo 131:1, 2, NWT. (Basahon.) Sinabi ni Hading David na dai siya ‘nag-ambisyon nin mga bagay na dakulaon’ o nin mga bagay na dai niya maaabot. Dahil mapakumbaba siya, ‘nagin kalmado asin matuninong siya.’ Ano an manunudan kan mga magurang sa sinabi ni David? Puwedeng magpahiling nin kapakumbabaan an mga magurang bako lang sa inaasahan ninda sa sadiri ninda kundi pati man sa inaasahan ninda sa saindang aki. Puwede nindang asiguraron an saindang aki paagi sa pagsabi sa kun sain siya matibay saka maluya pag tinatabangan ninda siya na magkaigwa nin angay na mga pasuhan. Nagigirumduman kan sister na si Marina: “Dai lamang ako pigkumparar ni Mama sa tulo kong tugang o sa iba pang aki. Itinukdo niya sako na an gabos may kanya-kanyang kakayahan asin na an lambang saro sato mahalagang marhay ki Jehova. Dahil ki Mama, bihira kong ikumparar sa iba an sadiri ko.”

7-8. Paano puwedeng tawan nin onra kan agom na lalaki an saiyang agom?

⁷ Dapat na pahilingan nin onra kan Kristiyanong agom na lalaki an saiyang agom. (1 Ped. 3:7) An pagtao nin onra iyo an pagtao nin espesyal na atensiyon asin respeto sa iba. Halimbawa, tinatawan nin onra kan agom na lalaki an saiyang agom paagi sa pagpahiling saiya nin dignidad. Dai siya naghahagad nin labi sa kayang itao kan agom niya. Asin dai nanggad niya ini ikukumparar sa iba pang mga babayi. Kun gigibuhon niya an arog kaiyan na pagkumparar, ano an puwedeng magin epekto kaiyan? An bakong Saksing agom kan sister na si Rosa parati siyang ikinukumparar sa ibang mga babayi. Dahil sa daing hirak na mga sinasabi kan agom ni Rosa saiya, nawaran siya nin kumpiyansa sa sadiri saka nagduda siya kun baga may tunay talagang nagpapadangat saiya. Sinabi ni Rosa, “Kaipuhan ko pirmi nin asigurasyon na pinapahalagahan ako ni Jehova.” Sa kabaliktaran, an sarong Kristiyanong agom na lalaki tinatawan nin onra an saiyang agom. Aram niya na an paggibo kaiyan may epekto sa relasyon niya sa agom niya pati man sa relasyon niya ki Jehova.c

⁸ An agom na lalaki na tinatawan nin onra an saiyang agom inuumaw ini, inaasigurar na namumutan niya ini, asin kinokomendaran. (Tal. 31:28) Iyan an ginibo kan agom ni Katerina, na sinambit sa sinundan na artikulo, na nakatabang saiya na mahali an saiyang hababang paghiling sa sadiri. Kan aki pa si Katerina, minemenos siya kan saiyang ina saka parati siyang ikinukumparar sa iba pang mga aking babayi, pati na sa mga amiga niya. Bilang resulta, nagpuon na ikumparar ni Katerina an sadiri niya sa iba para mahiling niya an saiyang halaga—dawa kan nasa katotoohan na siya! Pero tinabangan siya kan saiyang Kristiyanong agom na labanan an tendensiyang iyan asin magkaigwa nin balanseng pagmansay sa sadiri. Sinabi ni Katerina: “Namumutan niya ako, kinokomendaran sa marahay na mga nagigibo ko, saka ipinapamibi niya ako. Ipinapagirumdom niya man sako an magagayon na kuwalidad ni Jehova saka tinatabangan niya ako na itanos an negatibong kaisipan ko.”

9-10. Paano tinabangan kan mapagmakulog na mga elder an sarong sister na malabanan an tendensiyang ikumparar an sadiri niya sa iba?

⁹ Paano matatabangan kan mga elder an mga may tendensiya na ikumparar an sadiri ninda sa iba? Pag-isipan an eksperyensiya kan sister na si Hanuni, na bihirang komendaran kan siya aki pa. Nagigirumduman niya: “Masusupgon ako saka para sako, mas matibay an ibang mga aki kisa sako. Kaya aki palang ako, ikinukumparar ko na an sadiri ko sa iba.” Dawa kan nasa katotoohan na siya, ikinukumparar pa man giraray ni Hanuni an sadiri niya sa iba. Kaya, namatian niyang bako siyang mahalaga sa kongregasyon. Pero ngunyan, maugma siyang naglilingkod bilang payunir. Ano an nakatabang saiya na mabago an kaisipan niya?

¹⁰ Sinabi ni Hanuni na tinabangan siya nin mapagmakulog na mga elder. Sinabi ninda na mahalaga siya sa kongregasyon saka kinomendaran siya sa saiyang marahay na halimbawa nin kaimbudan. Isinurat niya: “Nagkapirang beses akong pinakiulayan kan mga elder na pakusugon an pirang sister na nangangaipo nin tabang. Dahil sa mga asignasyon na iyan, namatian ko na mahalaga ako. Nagigirumduman ko kan pinasalamatan ako kan mapagmakulog na mga elder sa pampakusog nin buot na itinao ko sa nagkapirang mas hoben na sister. Tapos binasa ninda sako an 1 Tesalonica 1:2, 3. Ikinaugma ko talaga iyan na marhay! Nagpapasalamat talaga ako sa mahuhusay na pastor na idto ta ngunyan pinapahalagahan ko nang marhay an lugar ko sa organisasyon ni Jehova.”

11. Paano ta matatabangan an “mga may runot [na] espiritu,” arog kan sinasabi sa Isaias 57:15?

¹¹ Basahon an Isaias 57:15, NWT. Nagmamakulog na marhay si Jehova sa “mga may runot [na] espiritu.” Gabos kita, bako lang an mga elder, makakatabang na pakusugon an namumutan na mga tugang na ini. An sarong paagi na mapapakusog ta sinda iyo an pagpahiling sainda na nagmamalasakit talaga kita sainda. Gusto ni Jehova na ipamati ta sa namumutan niyang mga karnerong iyan an pagkamuot niya para sa sainda. (Tal. 19:17) Puwede ta man tabangan an mga tugang paagi sa pagigin mapakumbaba. Dai ta gugustuhon na nasa sato pirmi an atensiyon, dahil puwede iyan magin dahilan na mauri sato an iba. Imbes, ginagamit ta an satong mga kakayahan asin kaaraman para pakusugon an lambang saro.—1 Ped. 4:10, 11.

12. Taano ta pamugtak an buot kan ordinaryong mga tawo ki Jesus? (Hilingon an ritrato sa cover.)

¹² Manungod sa kun paano tatrataron an iba, dakul kitang manunudan sa kun paano trinatar ni Jesus an mga parasunod niya. Siya an pinakanangungurog na tawo na nabuhay kasuarin man. Dawa arog kaiyan, siya “may mahuyong buot saka may mapakumbabang puso.” (Mat. 11:28-30) Dai niya ipinaghambog an saiyang nakakalabing kadunungan saka dakulang kaaraman. Nagtukdo siya paagi sa simpleng lengguwahe saka marahayon na mga ilustrasyon na nakapahiro sa puso kan ordinaryong mga tawo. (Luc. 10:21) Bakong arog kan aroganteng mga lider nin relihiyon, nungkang ipinamati sainda ni Jesus na bako sindang mahalaga sa Diyos. (Juan 6:37) Imbes, tinawan niya nin dignidad an ordinaryong mga tawo.

13. Paano mahihiling sa pagtratar ni Jesus sa mga disipulo niya an kabuutan saka pagkamuot niya sainda?

¹³ An kabuutan saka pagkamuot ni Jesus hiling-hiling sa pagtratar niya sa saiyang mga disipulo. Aram niya na magkakalain sinda nin kakayahan saka kamugtakan. Kaya gabos sinda, dai makakayang magsaabaga nin pararehong responsabilidad saka dai magigin parareho an maisasagibo ninda sa ministeryo. Dawa arog kaiyan, inapresyar niya an bilog na kalag na paghihinguwa kan lambang saro. Mahihiling an pagigin mapagsabot ni Jesus sa parabula manungod sa mga talento. Sa ilustrasyon na iyan, tinawan kan kagurangnan nin trabaho an lambang uripon “depende sa kakayahan kan kada saro.” An saro sa duwang mahigos na uripon mas dakul an naganar kisa sa saro. Pero parehong komendasyon an itinao kan kagurangnan sa saindang duwa: “Magayon an ginibo mo, marahay asin maimbod na uripon!”—Mat. 25:14-23.

14. Paano ta maaarog si Jesus sa pagtratar ta sa iba?

¹⁴ Mabuot saka mamumuton si Jesus sa sato. Aram niya na magkakalain kita nin kakayahan saka kamugtakan, asin nauugma siya pag ginigibo ta an satong pinakamakakaya. Dapat niyatong arugon si Jesus sa pagtratar ta sa iba. Habo ta nanggad na magin dahilan na makamati an kapwa ta parasamba na mayo siyang halaga o na masupog siya dahil mas dikit an kaya niyang gibuhon kumpara sa iba. Imbes, maghanap kita nin mga oportunidad na komendaran an satong mga tugang sa paggibo ninda kan saindang pinakamakakaya para maglingkod ki Jehova.

15-16. Paano nakinabang an sarong sister sa pagkaigwa nin rasonableng mga pasuhan?

¹⁵ An pagkaigwa nin espirituwal na mga pasuhan nagtatao nin direksiyon asin katuyuhan sa satong buhay. Pero an satong mga pasuhan dapat na nakabase sa kakayahan asin kamugtakan niyato, bako sa kakayahan asin kamugtakan kan iba. Kun gigibuhon ta kaya iyan, mamumundo saka madidisganar lang kita. (Luc. 14:28) Pag-isipan an halimbawa kan payunir na sister na si Midori.

¹⁶ An ama ni Midori bakong Saksi, asin pigparapasupog siya kaini kan aki pa siya paagi sa pagkumparar saiya sa mga tugang niya saka mga kaklase. “Namatian kong mayo akong halaga,” an sabi ni Midori. Pero mantang nagigin adulto na si Midori, nagkaigwa na siya nin kumpiyansa sa sadiri. Sinabi niya, “Binabasa ko an Bibliya aroaldaw para magkaigwa nin katuninungan an puso ko saka mamatian na namumutan ako ni Jehova.” Apuwera kaiyan, nagkaigwa man siya nin rasonableng mga pasuhan, saka espesipiko niyang ipinamibi na tabangan siyang maabot an mga pasuhan na iyan. Bilang resulta, nakamati nin kaugmahan si Midori sa pag-uswag niya sa espirituwal.

17. Paano ta ‘padagos na babaguhon an paagi kan satong pag-iisip,’ asin ano an resulta kaiyan?

¹⁷ Puwedeng dai basta-basta mahali an mga negatibo tang pagmati asin kaisipan. Kaya sinasadol kita ni Jehova: “Dapat na padagos nindong baguhon an paagi kan saindong pag-iisip.” (Efe. 4:23, 24) Siyempre para magibo iyan, kaipuhan tang mamibi, mag-adal kan Tataramon nin Diyos, asin maghurop-hurop. Padagos na gibuhon an mga bagay na ini, asin maghagad nin kusog ki Jehova. Tatabangan ka kan saiyang banal na espiritu na malabanan an ano man na tendensiya na ikumparar an sadiri sa iba. Tatabangan ka man ni Jehova na mahiling saka mahali tulos an pagkauri o pagigin orgulyoso engkaso magtubo iyan sa puso mo.

18. Paano nakakapakusog saimo an mga tataramon na nasa 2 Cronica 6:29, 30?

¹⁸ Basahon an 2 Cronica 6:29, 30, NWT. Aram ni Jehova kun ano an iniisip asin namamatian ta. Aram niya man an pagmamaigot ta na labanan an espiritu kan kinaban saka an mga kaluyahan ta. Mantang nahihiling ni Jehova kun gurano kita nagmamaigot na labanan an maraot na mga impluwensiyang iyan, mas lalo niya man kitang namumutan.

19. Paano iinilustrar ni Jehova an namamatian niya sato?

¹⁹ Para iilustrar kun ano an namamatian niya sato, ginamit ni Jehova an pagkamuot kan ina asin kan umboy sa lambang saro. (Isa. 49:15) Pag-isipan an halimbawa kan sarong ina na si Rachel. Isinurat niya: “Bako ko pang kabulanan kan ipangaki ko si Stephanie. Kan inot ko siyang mahiling, saditon sana siya saka makahirak. Pero tinugutan ako kan ospital na kaputan ko siya kada aldaw sa inot na bulan mantang nasa incubator siya. Nakatabang iyan samo na magin dayupot na marhay. Sais anyos na siya ngunyan saka mas sadit kumpara sa mga kaedad niya. Pero, mas lalo ko pa ngani siyang namumutan dahil talagang nakipaglaban siya para mabuhay, saka nagdara siya nin dakulaon na kaugmahan sa buhay ko!” Nakakaugma nanggad na maaraman na nakakamati si Jehova nin arog kaiyan kararom na pagkamuot sato pag nahihiling niya kitang nagmamaigot na maglingkod saiya nin bilog na kalag!

20. Bilang dusay na lingkod ni Jehova, anong dahilan an igwa ka para mag-ugma?

²⁰ Huling lingkod ka ni Jehova, mahalaga kang marhay na miyembro kan saiyang pamilya, saka mayo kang kapareho. Irinani ka ni Jehova sa saiya bako dahil ta mas matibay ka sa iba, kundi dahil hiniling niya an saimong puso asin nahiling niya na saro kang tawong mahuyo saka andam na tukduan na puwede niyang moldehon. (Sal. 25:9) Makakasigurado ka na nauugma siya pag ginigibo mo an pinakamakakaya mo para maglingkod saiya. An saimong pakatagal saka kaimbudan ebidensiya na igwa ka nin “sinsero asin marahay na puso.” (Luc. 8:15) Kaya padagos mong itao ki Jehova an pinakamakakaya mo. Dangan magkakaigwa ka nin marahay na dahilan na mag-ugma basado sa sadiri mo sana.