Kun Ano Talaga an Kaipuhan Tanganing Magin Maogma

SI Jehova, an “maogmang Dios,” asin si Jesu-Cristo, an “maogma asin iyo sanang Paraboot,” nakakaaram nin orog sa gabos kun ano an kaipuhan tanganing magin maogma. (1 Timoteo 1:11; 6:15) Sa siring, bakong makangangalas na an pinakaliabe sa kaogmahan manonompongan sa Tataramon nin Dios, an Biblia.​—Kapahayagan 1:3; 22:7.

Sa saiyang bantog na Sermon sa Bukid, ilinadawan ni Jesus kun ano an kaipuhan tanganing magin maogma. Sinabi nia: “Maogma idtong mga” (1) nakakamate kan saindang espirituwal na pangangaipo, (2) nagmomondo, (3) mahoyo, (4) nagugutom asin napapaha sa katanosan, (5) maheherakon, (6) dalisay an puso, (7) mapagpatoninong, (8) pinaglalamag huli sa katanosan, asin (9) pinapakaraot asin pinaglalamag dahel sa saiya.​—Mateo 5:3-11.a

Tamang-Tama daw an Deklarasyon ni Jesus?

An pagigin totoo kan nagkapira sa mga deklarasyon ni Jesus dai na kaipuhan nin dakol na paliwanag. Siisay an madehar na an tawong mahoyo, maheherakon, asin mapagpatoninong na minomotibar nin dalisay na puso mas magigin maogma kisa sa saro na aranggoton, makiiwalon, daing herak?

Minsan siring, tibaad mag-isip-isip kita kun paano maaapod na maogma an mga tawo na nagugutom asin napapaha sa katanosan, o nagmomondo. An siring kaiyan na mga indibiduwal may realistikong pagmansay sa mga kamugtakan sa kinaban. Sinda “nag-aaragagha asin nag-aaragrangay huli sa gabos na makauuyam nin makuring bagay na ginigibo” sa satong kaaldawan. (Ezequiel 9:4) An mga bagay na iyan mismo dai nakakapaogma sa sainda. Minsan siring, kan maaraman ninda an katuyohan nin Dios na papangyayarihon nia an matanos na mga kamugtakan sa daga asin hustisya sa mga inaapi, labi-labi an saindang kagayagayahan.​—Isaias 11:4.

An pagkamoot sa katanosan nagigin dahelan man na magmondo an mga indibiduwal huli ta sa parate dai ninda nagigibo an tama. Sa siring, sinda nakakamate kan saindang espirituwal na pangangaipo. An siring na mga tawo andam na magpagiya sa Dios huli ta aram ninda na sia sana an puedeng makatabang sa mga tawo na madaog an mga kaluyahan ninda.​—Talinhaga 16:​3, 9; 20:24.

Aram kan mga tawo na nagmomondo, nagugutom asin napapaha sa katanosan, asin nakakamate kan saindang espirituwal na pangangaipo an kahalagahan nin pagkaigwa nin marahay na relasyon sa Kaglalang. An pagkaigwa nin marahay na relasyon sa mga tawo nagtatao nin kaogmahan, alagad orog pa ngani dian an marahay na relasyon sa Dios. Iyo, an seryoso an kaisipan na mga namomoot sa kun ano an tama, na andam na umako kan paggiya nin Dios, puede talagang apodon na maogma.

Minsan siring, tibaad depisil para saindo na maniwala na an saro na pinaglalamag asin pinapakaraot puedeng magin maogma. Pero, puedeng magin totoo iyan, huli ta si Jesus mismo an nagsabi kaiyan. Huli kaini, paano maninigong saboton an saiyang mga tataramon?

Pinaglalamag Pero Maogma​—Paano daw Iyan?

Mangnohon na dai sinabi ni Jesus na an pagpakaraot asin paglamag mismo an matao nin kaogmahan. Sinabi nia: “Maogma idtong mga pinaglamag huli sa katanosan, . . . kun an mga tawo pinapakaraot kamo asin pinaglalamag kamo . . . dahel sa sako.” (Mateo 5:​10, 11) Kaya maresulta sana iyan sa kaogmahan kun an saro magdusa nin pagpakaraot huli sa pagigin parasunod ni Cristo asin huli sa pagsusog nia sa pamumuhay na sono sa matanos na mga prinsipyo na itinokdo ni Jesus.

Ipinapaheling ini sa nangyari sa enot na mga Kristiano. An mga miembro kan Sanhedrin, an Judiong korte suprema, “tiniripon . . . an mga apostol, hinampak sinda, asin pinagbotan sinda na mag-ontok sa pagtaram basado sa ngaran ni Jesus, asin binutasan sinda.” Ano an nagin reaksion kan mga apostol? “Sinda, kun siring, naghale sa Sanhedrin, na naggagayagaya huli ta pinapagkanigo sinda na magtios nin kasupganan huli sa saiyang ngaran. Asin aroaldaw sa templo asin sa harong-harong nagpadagos sinda na dai nin ontok sa pagtokdo asin pagpahayag kan maogmang bareta dapit ki Cristo, si Jesus.”​—Gibo 5:40-42; 13:50-52.

Si apostol Pedro nagtao nin dugang pang liwanag sa koneksion kan pag-olog-olog asin kaogmahan. Sia nagsurat: “Kun kamo pinag-oolog-olog huli sa ngaran ni Cristo, maogma kamo, huli ta an espiritu nin kamurawayan, minsan an espiritu nin Dios, nag-oontok dian sa saindo.” (1 Pedro 4:14) Iyo, an pagdusa bilang Kristiano sa paggibo nin tama, minsan ngani an siring na pagdusa dai nakakaogma, nagbubunga nin kaogmahan sa pakaaram na an saro nag-aako kan banal na espiritu nin Dios. Paanong an espiritu nin Dios konektado sa kaogmahan?

An mga Gibo kan Laman o an mga Bunga kan Espiritu?

An banal na espiritu nin Dios yaon sana sa mga nagkukuyog sa Dios bilang namamahala. (Gibo 5:32) Dai itinatao ni Jehova an saiyang espiritu sa mga naggigibo nin “mga gibo kan laman.” An mga gibong iyan iyo an “pakikisaro, karompotan, malaswang gawe-gawe, idolatriya, paggibo nin espiritismo, mga pagralabanlaban, iriwal, pangimon, mga pagputok nin kaanggotan, mga pasuruhay, pagkabaranga, mga sekta, mga pagkauri, mga pagburat, mariribok na pag-ogma, asin an mga bagay na kapareho kaini.” (Galacia 5:19-21) Totoo, sa kinaban ngonyan “an mga gibo kan laman” ordinaryo nang marhay. Pero, an mga naggigibo kaiyan dai nagkakamit nin tunay asin permanenteng kaogmahan. Imbes, sa paggibo kan mga bagay na iyan rinaraot kan saro an relasyon nia sa mga paryente, katood, asin kamidbid. Apuera dian, sinasabi kan Tataramon nin Dios na an mga “naggigibo kan siring na mga bagay dai magmamana kan kahadean nin Dios.”

Sa kabaliktaran, itinatao nin Dios an saiyang espiritu sa mga nagkukultibar kan “mga bunga kan espiritu.” An mga kualidad na minakompuesto sa bungang ini iyo an “pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri.” (Galacia 5:​22, 23) Kun ipinapaheling niato an mga kualidad na ini, pinapalataw niato an mga kamugtakan para sa matoninong na relasyon sa iba asin sa Dios, na maresulta sa tunay na kaogmahan. (Helingon an kahon.) Mas importante, paagi sa pagpaheling nin pagkamoot, kabootan, karahayan, asin iba pang diosnon na mga kualidad, pinapaogma niato si Jehova asin igwa kita kan maogmang paglaom na buhay na daing katapusan sa bagong kinaban nin Dios na may katanosan.

An Kaogmahan Puedeng Pilion

Kan si Wolfgang asin Brigitte, sarong mag-agom na taga Alemania, magpoon na maigot na mag-adal nin Biblia, igwa sinda nin dakol na materyal na bagay na sa paghona kan mga tawo iyo an kaipuhan tanganing magin maogma. Sinda hoben pa asin may marahay na salud. Nagsusulot sinda nin mamahalon na mga gubing, nag-iistar sa harong na magayon an pagkadekorar, asin igwa nin asensadong negosyo. An dakol sa panahon ninda ginagamit sa pagmamaigot na kamtan an mas dakol na materyal na bagay, alagad dai iyan nagtao sa sainda nin tunay na kaogmahan. Pero, pag-abot nin panahon si Wolfgang asin Brigitte naggibo nin importanteng pagpili. Pinonan nindang idusay an mas dakol na panahon asin paghihingoa tanganing paoswagon an pagpapahalaga sa espirituwal na mga bagay asin naghanap nin mga paagi tanganing magin mas dayupot ki Jehova. An pagpili ninda tolos na nagbunga nin pagkaliwat kan saindang aktitud, na nagpahiro man sainda na pasimplehon an saindang buhay asin maglingkod bilang mga payunir, o bilog na panahon na mga paraebanghelyo kan Kahadean. Ngonyan, naglilingkod sinda bilang mga boluntaryo sa sangang opisina kan Mga Saksi ni Jehova sa Alemania. Dugang pa, inaadalan ninda an lenguahe sa Asia tanganing makatabang sa mga taga ibang nasyon na makanood kan katotoohan na yaon sa Tataramon nin Dios, an Biblia.

Nanompongan daw kan mag-agom na ini an tunay na kaogmahan? Si Wolfgang nagsasabi: “Poon kan magin mas okupado kami sa pag-aabot sa espirituwal na mga bagay, kami nagin mas maogma asin nakaeksperyensia nin orog na satispaksion. An paglilingkod ki Jehova nin bilog na puso nagpakosog man sa samong pag-agoman. Dati na kaming may maogmang pag-agoman, pero may mga obligasyon kami asin intereses na nagbobotong samo sa magkalaen na direksion. Ngonyan nagkakasaro na kami sa pag-aabot sa parehong pasohan.”

Ano an Kaipuhan Tanganing Magin Maogma?

Sa halipot na pagtaram: Likayan an “mga gibo kan laman,” asin kultibaron an “mga bunga kan espiritu [nin Dios].” Tanganing magin maogma, kaipuhan na maghimuyawot an saro na magkaigwa nin dayupot na relasyon sa Dios. An saro na nagmamaigot na makamtan ini makakapareho kan deskripsion ni Jesus sa sarong maogmang tawo.

Kun siring, dai mapasalang magkonklusyon na an kaogmahan dai nindo kayang kamtan. Ipamugtak na sa presente tibaad mayo kamo nin marahay na salud o tibaad igwa ngani kamong problema sa saindong pag-agoman. Tibaad bako nang posible na magkaaki kamo, o tibaad nasasakitan kamong makakua nin mapangganang karera. Tibaad mayo nang gayo kamong kuarta arog kan dati. Minsan siring, kosogan an saindong boot; mayo kamong dahelan na mawaran nin paglaom! An pamamahala kan Kahadean nin Dios an maresolber sa mga problemang ini asin kadakol pang iba. Tunay nanggad, dai na mahahaloy ootobon ni Jehova Dios an saiyang mga panuga na ipinahayag kan salmista: “An saimong paghade sarong paghade sa gabos na panahon na daing talaan . . . Binibiklad mo an saimong kamot asin pinapanigoan an mawot nin lambang bagay na may buhay.” (Salmo 145:​13, 16) Arog kan napapatunayan kan minilyon na lingkod ni Jehova sa bilog na kinaban, an pagpapadanay sa isip kan nakakapakosog liwat sa boot na panugang ini ni Jehova makakakontribwir na marhay sa saindong kaogmahan ngonyan.​—Kapahayagan 21:3.

[Nota sa Ibaba]

[Kahon/Ritrato sa pahina 6]

Mga Bagay na Nakakakontribwir sa Kaogmahan

An pagkamoot pinapahiro an iba na mamotan man kamo.

An kagayagayahan nagtatao saindo nin kosog na makaya an mga kadepisilan.

An katoninongan makakatabang saindo na mapagdanay an mga relasyon na mayo nin iriwal.

An pakatios nagpapangyari na magdanay kamong maogma dawa nasa irarom kamo nin kasakitan.

An kabootan an nagpaparani kan ibang tawo saindo.

An karahayan sa kabtang nindo nagpapangyari na an iba humiro kun kaipuhan nindo an tabang.

An pagtubod maasegurar saindo kan mamomoton na paggiya nin Dios.

An kahoyoan matao saindo nin pagkakalmado nin puso, isip, asin hawak.

An pagpopogol sa sadiri nangangahulogan na magkakaigwa kamo nin mas dikit na sala.

[Mga Ritrato sa pahina 7]

Tanganing kamtan an kaogmahan, kaipuhan na panigoan nindo an saindong espirituwal na mga pangangaipo