Padagos na Maglakaw Arog kan Paglakaw ni Jesu-Cristo

“An nagsasabing sia nagdadanay na kasaro [nin Dios] may paninimbagan man na padagos na maglakaw arog kan paglakaw kan sarong iyan [si Jesus].”​—1 JUAN 2:6.

1, 2. Ano an kalabot sa pagheling nin maingat ki Jesus?

“DUMALAGAN kita na may pakatagal sa paorumbasan na ibinugtak sa atubangan ta,” an isinurat ni apostol Pablo, “mantang kita nagheheling nin maingat sa Pangenot na Ahente asin Parasangkap kan satong pagtubod, si Jesus.” (Hebreo 12:​1, 2) An pagsunod sa dalan nin kaimbodan naghahagad na kita magheling nin maingat ki Jesu-Cristo.

² An termino sa orihinal na lenguahe para sa “nagheheling nin maingat,” siring kan pagkagamit sa Kristianong Griegong Kasuratan, nangangahulogan na “ipokus an atension na mayo nin disturbo,” “haleon an pagheling sa sarong bagay tanganing maheling an ibang bagay,” “ipako an heling.” An sarong reperensia nagsasabi: “Oras na haleon kan Griegong paradalagan sa istadyum an saiyang atension sa pareyahan asin sa pasohan na saiyang hinihingoang aboton, asin helingon nia an mga kadaklan na nagdadalan, minaluya an saiyang rikas. Iyan man an nangyayari sa mga Kristiano.” An mga disturbo puedeng makaolang sa satong espirituwal na pag-oswag. Kita dapat na magheling nin maingat ki Jesu-Cristo. Asin ano an inaasahan niatong maheling sa Pangenot na Ahente? An termino sa Griego na trinadusir na “pangenot na ahente” nangangahulogan na “pangenot na poon, saro na nangengenot sa ano man na bagay asin sa siring nagtatao kan halimbawa.” An pagheling nin maingat ki Jesus naghahagad nin pagsunod sa saiyang halimbawa.

3, 4. (a) An paglakaw arog kan paglakaw ni Jesu-Cristo naghahagad nin ano sa kabtang niato? (b) Anong mga hapot an maninigo niatong tawan nin atension?

³ “An nagsasabing sia nagdadanay na kasaro [nin Dios] may paninimbagan man na padagos na maglakaw arog kan paglakaw kan sarong iyan [si Jesus],” an sabi kan Biblia. (1 Juan 2:6) Dapat na magdanay kita na kasaro nin Dios paagi sa pag-otob kan mga togon ni Jesus siring kan pag-otob nia kan mga togon kan saiyang Ama.​—Juan 15:10.

⁴ Huli kaini, an paglakaw na arog kan paglakaw ni Jesus naghahagad na maingat niato siang pagmasdan bilang an Pangenot na Poon asin na sunodon niato nin estrikto an saiyang mga lakad. An mahahalagang hapot na maninigo niatong estudyaran mapadapit digdi iyo ini: Paano kita pinapangenotan ni Cristo ngonyan? Paano maninigong makaapektar sa sato an pag-arog sa saiyang paagi nin paglakaw? Ano an mga pakinabang sa pagsusog sa arogan na itinao ni Jesu-Cristo?

Kun Paano Pinapangenotan ni Cristo an Saiyang mga Parasunod

 5. Bago sia nagsakat sa langit, ano an ipinanuga ni Jesus sa saiyang mga parasunod?

⁵ Bago magsakat sa langit, an binuhay liwat na si Jesu-Cristo nagpaheling sa saiyang mga disipulo asin tinawan sinda nin mahalagang gibohon. Sinabi nia: “Paduman kamo asin gumibo kamo nin mga disipulo sa mga tawo kan gabos na nasyon.” Kan okasyon na iyan nanuga man an Pangenot na Poon na makakaibahan nia sinda mantang inootob ninda an asignasyon na ini, na nagsasabi: “Uya! ako kaiba nindo sa gabos na aldaw sagkod sa pagtatapos kan sistema nin mga bagay.” (Mateo 28:​19, 20) Paanong si Jesu-Cristo kaiba kan saiyang mga parasunod sa panahon na ini kan pagtatapos kan sistema nin mga bagay?

6, 7. Paano kita pinapangenotan ni Jesus paagi sa banal na espiritu?

⁶ “An paratabang, an banal na espiritu, na isusugo kan Ama sa ngaran ko,” an sabi ni Jesus, “an sarong iyan matokdo sa saindo kan gabos na bagay asin mapagirumdom sa saindo kan gabos na bagay na isinabi ko sa saindo.” (Juan 14:26) An banal na espiritu, na isinugo sa ngaran ni Jesus, naggigiya asin nagpapakosog sa sato ngonyan. Pinapaliwanagan kita kaiyan sa espirituwal asin tinatabangan kita na masabotan “minsan an hararom na mga bagay nin Dios.” (1 Corinto 2:10) Dugang pa, an diosnon na mga kualidad na “pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri” “mga bunga kan espiritu.” (Galacia 5:​22, 23) Sa tabang kan banal na espiritu, makukultibar niato an mga kualidad na ini.

⁷ Mantang kita nag-aadal sa Kasuratan asin naghihingoang iaplikar an satong nanonodan, an espiritu ni Jehova nagtatabang sa sato na magtalubo sa kadonongan, pagigin mapagrisa, pakasabot, kaaraman, tamang paghusgar, asin kakayahan sa pag-iisip. (Talinhaga 2:1-11) An banal na espiritu nagtatabang man sa sato na makaagwanta sa mga sugot asin pagbalo. (1 Corinto 10:13; 2 Corinto 4:7; Filipos 4:13) An mga Kristiano sinasadol na ‘magpakalinig sa lambang ramog nin laman asin espiritu, na sinasangkap an kabanalan.’ (2 Corinto 7:1) Talaga daw na kaya niatong mamuhay sono sa hinahagad nin Dios na kabanalan, o kalinigan, na mayo an tabang kan banal na espiritu? An saro sa mga paagi na ginagamit ni Jesus sa pangengenot sa sato ngonyan iyo an banal na espiritu, na inautorisaran ni Jehova Dios an saiyang Aki na gamiton.​—Mateo 28:18.

8, 9. Paano ginagamit ni Cristo “an maimbod asin mapagmansay na oripon” sa pangengenot?

⁸ Estudyare an saro pang paagi na ginagamit ni Cristo sa pangengenot sa kongregasyon ngonyan. Nagkokomento manongod sa saiyang presensia asin sa pagtatapos kan sistema nin mga bagay, si Jesus nagsabi: “Siisay man nanggad an maimbod asin mapagmansay na oripon na ninombrahan kan saiyang kagurangnan na mamahala sa saiyang mga domestiko, tanganing magtao sa sainda kan saindang kakanon sa tamang panahon? Maogma an oripon na iyan kun sa pagdatong kan saiyang kagurangnan makua siang naggigibo nin siring. Totoong sinasabi ko sa saindo, Nonombrahan nia sia na mamahala sa gabos niang rogaring.”​—Mateo 24:​3, 45-47.

⁹ An “kagurangnan” iyo si Jesu-Cristo. An “oripon” iyo an grupo nin linahidan na mga Kristiano digdi sa daga. Ipinaniwala sa grupong oripon na ini an pag-asikaso sa intereses ni Jesus sa daga asin an pagtao nin napapanahon na espirituwal na kakanon. An sarong sadit na grupo nin kualipikadong mga paraataman hale sa dakol an miembro na “maimbod asin mapagmansay na oripon” minakompuesto kan Namamahalang Grupo, na nagseserbing representante kan grupong oripon. Sinda an nagdidirehir sa pambilog na kinaban na paghuhulit kan Kahadean asin sa pagtao nin espirituwal na kakanon sa tamang panahon. Sa siring, si Cristo nangengenot sa kongregasyon paagi sa linahidan nin espiritu na “maimbod asin mapagmansay na oripon” asin sa Namamahalang Grupo kaiyan.

10. Ano an maninigo na magin aktitud niato sa kamagurangan, asin taano?

¹⁰ An saro pang kapahayagan kan pangengenot ni Cristo iyo an “balaog na mga lalaki”​—an Kristianong kamagurangan, o mga paraataman. Itinao sinda “sa pagpakarhay giraray kan mga banal, para sa gibohon nin paglingkod, para sa pagpakosog kan hawak ni Cristo.” (Efeso 4:​8, 11, 12) May labot sa sainda, an Hebreo 13:7 nagsasabi: “Girumdoma nindo idtong mga nangengenot sa saindo, na nagtaram kan tataramon nin Dios sa saindo, asin mantang pinaghohorophorop nindo an resulta kan saindang gawe-gawe aroga nindo an saindang pagtubod.” An kamagurangan nangengenot sa kongregasyon. Huling inaarog ninda si Cristo Jesus, an saindang pagtubod nagigin angay na arogon. (1 Corinto 11:1) Puede niatong ipaheling an satong pagpasalamat para sa areglo may koneksion sa kamagurangan paagi sa pagigin makinuyog asin mapagpasakop sa “balaog na mga lalaking” ini.​—Hebreo 13:17.

11. Sa anong mga paagi pinapangenotan ni Cristo an saiyang mga parasunod ngonyan, asin ano an kalabot sa paglakaw na arog kan paglakaw nia?

¹¹ Iyo, pinapangenotan ngonyan ni Jesu-Cristo an saiyang mga parasunod paagi sa banal na espiritu, “maimbod asin mapagmansay na oripon,” asin kamagurangan sa kongregasyon. An satong paglakaw arog kan paglakaw ni Cristo nangangahulogan nin pagsabot kun paano sia nangengenot asin pagpasakop dian. Iyan naghahagad man na arogon niato kun paano an saiyang paglakaw. “Sa dalan na ini kamo inapod,” an isinurat ni apostol Pedro, “huli ta minsan si Cristo nagdusa para sa saindo, na winalatan kamo nin modelo tanganing sunodon nindo nin estrikto an saiyang mga lakad.” (1 Pedro 2:21) Sa anong paagi maninigong makaapektar sa sato an pagsunod sa sangkap na modelo ni Jesus?

Magin Rasonable sa Paggamit nin Autoridad

12. Sa anong aspekto kan halimbawa ni Cristo partikularmenteng interesado an kamagurangan sa kongregasyon?

¹² Minsan ngani si Jesus nag-ako nin dai mapapantayan na autoridad hale sa saiyang Ama, sia rasonable sa paggamit kaiyan. An gabos na kabilang sa kongregasyon​—partikularmente an mga paraataman​—maninigong ‘ipaaram sa gabos na tawo an saindang pagkarasonable.’ (Filipos 4:5; 1 Timoteo 3:​2, 3) Mantang an kamagurangan may autoridad sa kongregasyon, mahalagang marhay na sunodon ninda an mga lakad ni Cristo sa paggamit kaiyan.

13, 14. Sa anong paagi puedeng arogon kan kamagurangan si Cristo mantang ineenkaminar ninda an iba na maglingkod sa Dios?

¹³ Kinonsiderar ni Jesus an mga limitasyon kan saiyang mga disipulo. Dai nia sinda hinagadan nin labi sa kaya nindang itao. (Juan 16:12) Dai man sinda ginigipit, pinarigon ni Jesus an boot kan saiyang mga parasunod na ‘maghingoa nin maigot’ sa paggibo kan kabotan nin Dios. (Lucas 13:24) Ginibo nia ini paagi sa pangengenot asin sa pagmotibar sa puso ninda. Kaagid kaiyan, an Kristianong kamagurangan ngonyan dai nananakot sa iba na maglingkod sa Dios paagi sa panunupog o pangongonsensia. Imbes, ineenkaminar ninda sinda na maglingkod ki Jehova huli sa pagkamoot sa saiya asin ki Jesus, saka sa saindang kapwa.​—Mateo 22:37-39.

¹⁴ Dai inabuso ni Jesus an autoridad na ipinaniwala sa saiya paagi sa pagkontrol sa buhay nin iba. Dai sia nagbugtak nin dai maaabot na mga pamantayan ni nagtao nin kadakoldakol na susundon. An saiyang paagi iyo an pagmotibar sa iba paagi sa pagtaros sa saindang puso na ginagamit an mga prinsipyo sa likod kan mga ley na itinao paagi ki Moises. (Mateo 5:​27, 28) Bilang pag-arog ki Jesu-Cristo, linilikayan kan kamagurangan na gumibo nin arbitraryong mga susundon o mag-insistir sa saindang personal na mga punto de vista. Mapadapit sa paggubing asin pag-alinyar o dibersion asin pag-aling-aling, hinihingoa kan kamagurangan na taroson an puso na ginagamit an diosnon na mga prinsipyo na siring kan sinasabi sa Miqueas 6:8; 1 Corinto 10:31-33; asin 1 Timoteo 2:​9, 10.

Magin Maduminamay Asin Mapagpatawad

15. Ano an nagin reaksion ni Jesus sa mga pagkukulang kan saiyang mga disipulo?

¹⁵ Si Cristo nagwalat nin modelo na susundon niato sa kun paano nia trinatar an mga pagkukulang asin sala kan saiyang mga disipulo. Estudyare an duwang pangyayari sa ultimong banggi nia digdi sa daga bilang tawo. Pag-abot sa Getsemani, “iiniba [ni Jesus] si Pedro asin Santiago asin Juan” asin sinabihan sinda na ‘magdanay na mapagbantay.’ Dangan, “pakapaoroenotan luminaob sia sa daga asin nagpoon na mamibi.” Pagbalik nia, “nakua [nia] sindang tororog.” Ano an nagin reaksion ni Jesus? Sinabi nia: “An espiritu nagmamawot, alagad an laman maluya.” (Marcos 14:32-38) Imbes na may kaisogan na anggotan si Pedro, Santiago, asin Juan, nagpahayag sia nin simpatiya! Kan banggi man sanang idto, dineharan ni Pedro si Jesus nin tolong beses. (Marcos 14:66-72) Paano trinatar ni Jesus si Pedro pakatapos kaiyan? “Ibinangon an Kagurangnan asin nagpaheling sia ki Simon [Pedro].” (Lucas 24:34) “Sia nagpaheling ki Cefas,” an sabi kan Biblia, “dangan sa kagduwa.” (1 Corinto 15:5) Imbes na maghinanakit, pinatawad ni Jesus an nagsosolsol na apostol asin pinakosog sia. Kan huri, pinaniwalaan ni Jesus si Pedro nin darakulang paninimbagan.​—Gibo 2:14; 8:14-17; 10:​44, 45.

16. Paano kita makakalakaw arog kan paglakaw ni Jesus kun an satong mga kapagtubod may nagibong pagkukulang o pagkakasala sa sato?

¹⁶ Kun an satong mga kapagtubod may nagibong pagkukulang o pagkakasala sa sato huli sa pagkabakong sangkap nin tawo, bako daw na kita maninigo man na magin maduminamay asin mapagpatawad kapareho ni Jesus? Sinadol ni Pedro an mga kapagtubod nia: “Kamo gabos magin parareho an isip, nagpapaheling nin pakikipagkapwa, may kapadangatan na sa magturugang, mapagmalasakit sa mapagpadangat na paagi, mapakumbaba sa isip, na dai nagbabalos nin maraot sa maraot o nin pagmuda sa pagmuda, kundi, al kontraryo, nag-oomaw.” (1 Pedro 3:​8, 9) Kumusta kun dai kita trinatar nin sarong indibiduwal siring kan pagtratar kutana sa sato ni Jesus, na habong magin maduminamay o mapagpatawad? Dawa pa siring, kita may paninimbagan na maghingoang arogon si Jesus asin magin kapareho nia an satong reaksion.​—1 Juan 3:16.

Enoton an Intereses kan Kahadean

17. Ano an nagpapaheling na inenot ni Jesus sa saiyang buhay an paggibo kan kabotan nin Dios?

¹⁷ May saro pang paagi na kaipuhan niatong maglakaw arog kan paglakaw ni Jesu-Cristo. An pagpahayag kan maogmang bareta kan Kahadean nin Dios an pinakamahalaga sa buhay ni Jesus. Pakatapos na maghulit sa Samaritana harani sa siudad nin Sicar sa Samaria, sinabihan ni Jesus an saiyang mga disipulo: “An sakong kakanon iyo an sakong paggibo kan kabotan nia na nagsugo sa sako asin pagtapos kan saiyang gibohon.” (Juan 4:34) An paggibo kan kabotan kan saiyang Ama nakasustenir ki Jesus; iyan nakakatao nin sustansia, nakakabasog, asin nakakarepresko sa saiya na siring sa kakanon. An pag-arog daw ki Jesus paagi sa pagdanay na nakapokus sa paggibo kan kabotan nin Dios magbubunga nin buhay na bako talagang makahulogan asin nakakakontento?

18. Anong mga bendisyon an ibinubunga kan pag-enkaminar sa mga aki na lumaog sa bilog na panahon na paglilingkod?

¹⁸ Kun ineenkaminar kan mga magurang an saindang mga aki na lumaog sa bilog na panahon na paglilingkod, sinda saka an saindang mga aki nag-aako nin dakol na bendisyon. An sarong ama nin kambal na aking lalaki inenkaminar an mga ini na gibohon na pasohan an paglilingkod bilang payunir poon kan akion pa sinda. Kan matapos ninda an saindang sekular na edukasyon, an kambal talagang nagin mga payunir. Pinepensar an mga kagayagayahan na naeksperyensiahan nia bilang resulta, an ama na ini nagsurat: “Dai nasudya an samong linalaoman sa samong mga aki. Mapagpasalamat niamong masasabi, ‘An mga aki mana hale ki Jehova.’” (Salmo 127:3) Asin paano nakikinabang an mga aki sa paglaog sa bilog na panahon na paglilingkod? An ina nin limang aki nagsasabi: “An pagpapayunir nakatabang sa gabos kong aki na magpatalubo nin mas harani nanggad na relasyon ki Jehova, nakaparahay sa saindang mga ugale sa personal na pag-adal, nakatabang sa sainda na makanood kun paano madonong na gagamiton an saindang panahon, asin nakatabang sa sainda na makanood na enoton an espirituwal na mga bagay sa saindang buhay. Minsan ngani kinaipuhan ninda gabos na gumibo nin dakol na pagliwat sa saindang buhay, mayo ni saro sa sainda na nagbasol sa dana na pinili nindang sundan.”

19. Anong mga plano sa ngapit an madonong na horophoropon nin mga hoben?

¹⁹ Mga hoben, ano an plano nindo para sa ngapit? Kamo daw naghihingoang makalabi sa iba sa sarong propesyonal na karera? O kamo daw nagmamaigot na maabot an sarong karera sa bilog na panahon na paglilingkod? “Magmaan kamong marhay na an saindong paglakaw bakong siring sa mga mangmang kundi siring sa mga madonong,” an sadol ni Pablo, “na tinutubos an angay na panahon para sa saindo man sana, huli ta an mga aldaw maraot.” Idinugang nia: “Kaya dai na kamo magin bakong makatanosan, kundi padagos na saboton kun ano an kabotan ni Jehova.”​—Efeso 5:15-17.

Magin Maimbod

20, 21. Sa anong paagi na maimbod si Jesus, asin paano niato maaarog an saiyang kaimbodan?

²⁰ Tanganing makalakaw arog kan paglakaw ni Jesus, kaipuhan niatong arogon an saiyang kaimbodan. Mapadapit sa kaimbodan ni Jesus, an Biblia nagsasabi: “Minsan ngani sia kabaing nin Dios, dai [sia] nag-isip na man-agaw, an boot sabihon, na sia makapantay sa Dios. Dai, kundi sia nagpakadai sa sadiri asin nagpakang oripon patin nagin kaagid nin mga tawo. Orog pa kaiyan, kan makua nia an saiyang sadiri na kabaing nin tawo, sia nagpakumbaba asin nagin makinuyog sagkod sa kagadanan, iyo, kagadanan sa hariging pasakitan.” Maimbod na sinuportaran ni Jesus an soberaniya ni Jehova paagi sa pagpasakop sa kabotan nin Dios para sa saiya. Sia nagin makinuyog sagkod sa pag-agi nin kagadanan sa sarong hariging pasakitan. Dapat niatong ‘papagdanayon an nasa isip na aktitud na ini’ asin kita maimbod na magpasakop sa paggibo kan kabotan nin Dios.​—Filipos 2:5-8.

²¹ Si Jesus nagpaheling man nin kaimbodan sa saiyang maimbod na mga apostol. Sa ibong kan saindang mga kaluyahan asin pagkabakong sangkap, namotan sinda ni Jesus “sagkod sa katapusan.” (Juan 13:1) Kaagid kaiyan, dai niato maninigong togotan na magkaigwa kita nin matatsar na aktitud huli sa mga pagkabakong sangkap kan satong mga tugang.

Susugon an Arogan na Itinao ni Jesus

22, 23. Ano an mga pakinabang sa pagsusog sa arogan na itinao ni Jesus?

²² Siempre, bilang bakong sangkap na mga tawo, dai kita makakalakaw nin eksakto nanggad sa mga lakad kan satong sangkap na Arogan. Minsan siring, puede kitang maghingoang sunodon nin estrikto an saiyang mga lakad. An paggibo kaiyan nangangaipo na masabotan niato an asin magpasakop kita sa paagi nin pangengenot ni Cristo asin magdanay kita sa arogan na itinao nia.

²³ An pagigin paraarog ki Cristo nagbubunga nin dakol na bendisyon. An satong buhay nagigin mas makahulogan asin nakakakontento huli ta kita nakapokus sa paggibo kan kabotan nin Dios imbes na sa paggibo kan boot niato. (Juan 5:30; 6:38) Igwa kita nin marahay na konsensia. An satong paagi nin paglakaw nagigin arogan. Inimbitaran ni Jesus an gabos na nagpapagal asin nagagabatan na dumolok sa saiya asin makanompong nin kaginhawahan para sa saindang kalag. (Mateo 11:28-30) Kun sinusunod niato an halimbawa ni Jesus, puede man niatong paginhawahon an iba paagi sa satong pakikiiba. Kun siring, padagos kitang maglakaw arog kan paglakaw ni Jesus.

Nagigirumdoman daw Nindo?

• Paano pinapangenotan ni Cristo an saiyang mga parasunod ngonyan?

• Paano masusundan kan kamagurangan an pangengenot ni Cristo sa paggamit kan saindang autoridad na tao nin Dios?

• Paano niato masusundan an halimbawa ni Jesus kun napapaatubang kita sa mga pagkukulang nin iba?

• Paano eenoton kan mga hoben an intereses kan Kahadean?

[Ritrato sa pahina 23]

An Kristianong kamagurangan nagtatabang sa sato na sunodon an pangengenot ni Cristo

[Ritrato sa pahina 24, 25]

Mga hoben, ano an mga pinaplano nindo tanganing magkaigwa nin nakakakontentong Kristianong pamumuhay?