Hinahale kan Liwanag nin Dios an Kadikloman!

“Si Jehova an nagpapaliwanag sa sakong kadikloman.”—2 SAMUEL 22:29.

 1. Ano an koneksion kan liwanag sa buhay?

“NAGSABI an Dios: ‘Magkaigwa nin liwanag.’ Dangan nagkaigwa nin liwanag.” (Genesis 1:3) Paagi sa importanteng mga tataramon na iyan, si Jehova ipinamimidbid kan rekord nin paglalang sa Genesis bilang an gikanan nin liwanag, na kun mayo kaiyan magigin imposible an buhay sa daga. Si Jehova man an gikanan nin espirituwal na liwanag, na mahalagang marhay na giya niato sa dalan nin buhay. (Salmo 43:3) Ipinaheling ni Hadeng David an haraning koneksion kan espirituwal na liwanag asin kan buhay kan sia sumurat: “Yaon sa saimo an gikanan nin buhay; paagi sa liwanag na gikan sa saimo nakaheheling kami nin liwanag.”​—Salmo 36:9.

 2. Siring kan ipinaheling ni Pablo, an liwanag konektadong marhay sa ano?

² Mga 1,000 taon pakalihis kan kapanahonan ni David, nasambitan ni Pablo an rekord nin paglalang. Kan magsurat sa Kristianong kongregasyon sa Corinto, sia nagsabi: “An Dios iyo an nagsabi: ‘Sumirang an liwanag hale sa kadikloman.’” Dangan ipinaheling ni Pablo na an espirituwal na liwanag konektadong marhay sa kaaraman na gikan ki Jehova kan idagdag nia: “Sia suminirang sa satong puso tanganing iyan magliwanag sa mamuraway na kaaraman dapit sa Dios paagi sa lalauogon ni Cristo.” (2 Corinto 4:6) Paano nakakaabot sa sato an liwanag na ini?

An Biblia—Parapaabot nin Liwanag

 3. Paagi sa Biblia, anong liwanag an itinatao ni Jehova?

³ Ipinapaabot ni Jehova an espirituwal na liwanag sa pangenot paagi sa saiyang ipinasabong na Tataramon, an Biblia. Kaya mantang pinag-aadalan niato an Biblia asin ilinalaog sa isip an kaaraman gikan sa Dios, tinotogotan niato na sumirang sa sato an saiyang liwanag. Paagi sa Biblia, tinatawan ni Jehova nin liwanag an saiyang mga katuyohan asin sinasabi sa sato kun paano niato magigibo an saiyang kabotan. Nagtatao ini nin katuyohan sa satong buhay asin nagtatabang sa sato na mapanigoan an satong espirituwal na mga pangangaipo. (Eclesiastes 12:1; Mateo 5:3) Idinoon ni Jesus na dapat niatong asikasohon an satong espirituwal na mga pangangaipo kan sia magsabi, na kinokotar an Ley ni Moises: “Nasusurat, ‘An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.’”​—Mateo 4:4; Deuteronomio 8:3.

 4. Sa anong paagi na si Jesus “an ilaw kan kinaban”?

⁴ Si Jesus midbid na konektadong marhay sa espirituwal na liwanag. Sa katunayan, inapod nia an saiyang sadiri bilang “an ilaw kan kinaban” asin nagsabi: “An minasunod sako dai nanggad maglalakaw sa kadikloman, kundi magkakaigwa kan ilaw nin buhay.” (Juan 8:12) An mga tataramon na ini nagtatabang sa sato na masabotan an mahalagang marhay na kabtang ni Jesus sa pagpaabot kan katotoohan ni Jehova sa katawohan. Tanganing makalikay kita sa kadikloman asin makalakaw sa liwanag nin Dios, dapat niatong hinanyogon an gabos na sinasabi ni Jesus asin sunodon nin maingat an saiyang halimbawa asin katokdoan na nasusurat sa Biblia.

 5. Ano an nagin paninimbagan kan mga parasunod ni Jesus pagkagadan nia?

⁵ Pirang aldaw bago sia magadan, si Jesus, na inaapod giraray an saiyang sadiri na liwanag, nagsabi sa saiyang mga disipulo: “An liwanag mapapasa tahaw nindo nin kadikit pang panahon. Lumakaw kamo mantang igwa kamo kan liwanag, tanganing dai kamo madaog kan kadikloman; asin an naglalakaw sa kadikloman dai nakaaaram kun masaen sia. Mantang yaon sa saindo an liwanag, gumibo kamo nin pagtubod sa liwanag, tanganing magin mga aki nin liwanag.” (Juan 12:​35, 36) An mga nagin aki nin liwanag nakanood kan “ikararahay na mga tataramon” na nasa Biblia. (2 Timoteo 1:​13, 14) Dangan ginamit ninda an ikararahay na mga tataramon na ini tanganing iluwas an iba pang sadiosan an pusong mga indibiduwal hale sa kadikloman pasiring sa liwanag nin Dios.

 6. Anong pundamental na katotoohan manongod sa liwanag asin kadikloman an maheheling niato sa 1 Juan 1:5?

⁶ Si apostol Juan nagsurat: “An Dios liwanag asin dian sa saiya dai nin ano man na kadikloman.” (1 Juan 1:5) Mangnoha an pagkakalaen digdi kan liwanag asin kan kadikloman. An espirituwal na liwanag naggigikan ki Jehova, asin an espirituwal na kadikloman dai puedeng ikonektar sa saiya. Siisay, kun siring, an gikanan kan kadikloman?

Espirituwal na Kadikloman—An Gikanan

 7. Siisay an nasa likod kan espirituwal na kadikloman sa kinaban, asin igwa sia nin anong impluwensia?

⁷ Si apostol Pablo may sinabing “dios kan sistemang ini nin mga bagay.” Sa pananaram na iyan, an boot niang sabihon iyo si Satanas na Diablo. Sinabi pa nia na an sarong ini “binuta . . . an isip kan mga dai nagtutubod, tanganing an liwanag kan mamuraway na maogmang bareta manongod ki Cristo, na iyo an ladawan nin Dios, dai sumirang.” (2 Corinto 4:4) Dakol an naghihingakong nagtutubod sa Dios; pero, nagdadakol sa sainda an dai nagtutubod na may Diablo. Taano? Habo nindang tumubod na may sarong maraot, nakalalabi sa tawong kapangyarihan na puedeng nag-eeksister asin makakaimpluwensia sa saindang pag-isip. Minsan siring, arog kan ipinaheheling ni Pablo, an Diablo talagang nag-eeksister asin talagang iniimpluwensiahan an mga tawo tanganing dai ninda maheling an liwanag nin katotoohan. An kapangyarihan ni Satanas na impluwensiahan an kaisipan nin tawo maheheling sa makahulang paglaladawan sa saiya bilang an saro “na ilinalagalag an bilog na ineerokan na daga.” (Kapahayagan 12:9) Bilang resulta kan mga ginigibo ni Satanas, an kamugtakan na ihinula ni propeta Isaias minaaplikar ngonyan sa bilog na katawohan apuera sa mga naglilingkod ki Jehova: “Uya! an kadikloman mismo makalalakop sa daga, asin an mahibog na kaduloman sa mga nasyon.”​—Isaias 60:2.

 8. Sa anong mga paagi ipinaheheling kan mga nasa espirituwal na kadikloman na sinda nariribaraw?

⁸ Sa grabeng kadikloman imposible na makaheling nin ano man. An saro madaling malagalag o maribaraw. Kaagid kaiyan, an mga nasa espirituwal na kadikloman mayo nin pakamansay asin dai nahahaloy nariribaraw na sa espirituwal. Puedeng mawara ninda an kakayahan na mamidbid an kalaenan nin katotoohan sa kaputikan, nin marahay sa maraot. Nagtaram si propeta Isaias dapit sa mga nasa siring na kadikloman kan sia magsurat: “Herak man kan mga nagsasabing an marahay maraot asin an maraot marahay, idtong mga riniribayan nin kadikloman an liwanag asin nin liwanag an kadikloman, idtong mga riniribayan nin mapait an mahamis asin nin mahamis an mapait!” (Isaias 5:20) An mga nagdadanay sa espirituwal na kadikloman naiimpluwensiahan kan dios kan kadikloman, si Satanas na Diablo, asin bilang resulta napapasiblag sinda sa gikanan nin liwanag asin buhay.​—Efeso 4:17-19.

Hale sa Kadikloman Pasiring sa Liwanag​—An Angat

 9. Ipaliwanag kun paanong an mga paragibo nin sala nagugusto sa literal sagkod espirituwal na kadikloman.

⁹ Sinambit kan fiel na si Job an pagkagusto kan mga paragibo nin sala sa literal na kadikloman kan sabihon nia: “Kun dapit sa mata kan parasambay, iyan naghahalat sa kadikloman nin banggi, na nagsasabi, ‘Mayo nin matang makakaheling sa sakuya!’ Asin tinahoban nia an saiyang lalauogon.” (Job 24:15) An mga paragibo nin sala nasa espirituwal na kadikloman man, asin an kadikloman na iyan puedeng nakapangingibabaw. Sinabi ni apostol Pablo na an seksuwal na inmoralidad, paghabon, kahanaban, pagburat, pagmuda, asin pangingikil lakop sa tahaw kan mga nasisiod sa kadikloman na iyan. Alagad an siisay man na minadolok sa liwanag kan Tataramon nin Dios puedeng magbakle. Linilinaw ni Pablo sa saiyang surat sa mga taga Corinto na posible an pagbakle na iyan. An dakol na Kristianong taga Corinto dati naggigibo nin mga gibo nin kadikloman, pero sinabi sa sainda ni Pablo: “Alagad kamo nahugasan na, alagad kamo sinantipikar na, alagad kamo ipinahayag nang matanos sa ngaran kan satong Kagurangnan na si Jesu-Cristo asin sa espiritu kan satong Dios.”​—1 Corinto 6:9-11.

10, 11. (a) Paano si Jesus nagpaheling nin konsiderasyon sa sarong tawo na pinaomayan nia an pagheling? (b) Taano ta dakol an habo kan liwanag?

¹⁰ Kun an saro lumuwas sa grabeng kadikloman pasiring sa liwanag, posibleng marhay na an saiyang mga mata mangangaipo nin kadikit na panahon tanganing makaadaptar. Sa Betsaida, pinaomayan ni Jesus an sarong buta alagad may kabootan na ginibo iyan nin tangga-tangga. “Kinapotan nia an tawong buta, dinara sia sa luwas kan baryo, asin, kan malutaban an saiyang mga mata, ibinugtak nia an saiyang kamot sa saiya asin pinonan na hapoton sia: ‘Nakakaheling ka nin ano man?’ Asin an tawo nagtangad asin nagpoon na magsabi: ‘Nakakaheling ako nin mga tawo, huli ta namamasdan ko an garo mga kahoy, alagad sinda nagraralakaw.’ Dangan ibinugtak nia giraray an saiyang mga kamot sa mga mata kan lalaki, asin an lalaki nakaheling nin malinaw, asin naomayan sia, asin naheling na nia nin maliwanag an gabos na bagay.” (Marcos 8:23-25) Minalataw na luway-luway na pinaomayan ni Jesus an pagheling kan tawong iyan tanganing makaadaptar sia sa nakasusulang liwanag kan saldang. Maiimahinar niato an kagayagayahan kan tawong iyan kan makaheling na sia.

¹¹ Minsan siring, an kagayagayahan na namatean kan tawong iyan nalalabihan kan kagayagayahan kan mga natatabangan na lumuwas, nin tangga-tangga, hale sa espirituwal na kadikloman pasiring sa liwanag nin katotoohan. Kun naheheling ta an saindang kagayagayahan, tibaad magngalas kita kun taano ta dakol an dai naaakit sa liwanag. Itinao ni Jesus an dahelan: “Ini an basehan nin paghokom, na an liwanag nagdatong sa kinaban alagad an mga tawo namoot sa kadikloman imbes na sa liwanag, huli ta an saindang mga gibo maraot. Huli ta an nagsasagibo nin marigsok na mga bagay naoongis sa liwanag asin dai minadolok sa liwanag, tanganing an saiyang mga gibo dai masagwe.” (Juan 3:​19, 20) Iyo, dakol an gustong-gustong maggibo nin “marigsok na mga bagay”​—arog nin inmoralidad, pan-aapi, pagputik, pandadaya, asin paghabon​—asin an espirituwal na kadikloman ni Satanas sarong tamang-tamang kamugtakan tanganing magibo ninda an gusto ninda.

Paggibo nin Pag-oswag sa Liwanag

12. Sa anong mga paagi kita nakinabang sa pagdolok sa liwanag?

¹² Poon kan maaraman niato an liwanag, anong mga pagbabago an naheling na niato sa satong sadiri? Kun minsan marahay na girumdomon asin ugidon an espirituwal na pag-oswag na nagibo na niato. Anong maraot na mga ugale an hinale na niato? Anong mga problema sa satong buhay an nahusay na niato? Paano nabago an mga plano niato sa ngapit? Paagi sa kosog ni Jehova asin sa tabang kan saiyang banal na espiritu, puede kitang magpadagos na gumibo nin mga pagbabago sa satong personalidad asin pag-iisip na magpapaheling na kita minahiro oyon sa liwanag. (Efeso 4:​23, 24) Siring kaini an pagkasabi kaiyan ni Pablo: “Kaidto kamo kadikloman, alagad ngonyan kamo liwanag dian sa Kagurangnan. Padagos kamong maglakaw bilang mga aki nin liwanag, huli ta an bunga kan liwanag gabos na klase nin karahayan asin katanosan patin katotoohan.” (Efeso 5:​8, 9) An pagtogot na an satong sadiri giyahan kan liwanag ni Jehova nagtatao sa sato nin paglaom asin katuyohan saka nakakapaogmang marhay sa buhay kan mga nakakaibaiba niato. Asin kanigoan na kagayagayahan an itinatao sa puso ni Jehova kan paggibo niato nin siring na mga pagbabago!​—Talinhaga 27:11.

13. Paano niato ikapaheheling an satong pagpasalamat sa liwanag ni Jehova, asin ano an kaipuhan sa paggibo kaiyan?

¹³ Ipinaheheling niato an satong pagpasalamat sa mas maogmang buhay na nakakamtan niato paagi sa pagpabanaag kan liwanag ni Jehova​—paghiras kan satong nanonodan sa Biblia sa satong mga kapamilya, katood, asin kataraed. (Mateo 5:12-16; 24:14) Sa mga habong maghinanyog, an satong paghuhulit pati na an satong arogan na Kristianong pamumuhay nagigin pagsagwe. Nagpapaliwanag si Pablo: “Padagos na segurohon kun ano an inaako kan Kagurangnan; asin dai na kamo makiiba sa sainda sa daing pakinabang na mga gibo nin kadikloman, kundi, imbes, sagweon sinda.” (Efeso 5:​10, 11) An pagtabang sa iba na bayaan an kadikloman asin pilion an liwanag nagkakaipo nin kosog nin boot niato. Orog na mahalaga, nangangaipo nin simpatiya asin pagmakolog sa iba saka nin odok sa pusong pagmawot na ihiras sa sainda an liwanag nin katotoohan para sa daing sagkod na pakinabang ninda.​—Mateo 28:​19, 20.

Mag-ingat sa Paon na mga Ilaw!

14. Kun dapit sa ilaw, anong patanid an maninigo niatong himateon?

¹⁴ Para sa mga nasa dagat durante nin madiklom na mga oras, nakaoogma an makaheling nin ano man na ilaw. Kaidtong nakaaging mga panahon, may pinapalaad na mga kalayo sa mga kantil na gapo sa Inglaterra tanganing magserbing tanda kun saen puedeng magpaipli kun may bagyo. An mga tripulante nin barko nagpapasalamat na giyahan kan mga ilaw na ini pasiring sa ligtas na mga duongan. Pero, may nagkapirang kalayo na paon. Imbes na makakua nin duongan, dakol na barko an nadaya asin suminadsad sa magapong baybayon, kun saen hinahabon an saindang mga kargamento. Sa mapandayang kinaban na ini, dapat kitang mag-ingat na dai maatraer sa paon na mga ilaw na puedeng mag-engganyar sa sato pasiring sa espirituwal na pagkasadsad. “Si Satanas nagmamalemale na anghel nin liwanag,” an sabi sa sato. Siring man, an mga lingkod nia, kabale an mga apostata, “madayang mga trabahador” na “nagmamalemale [man] na mga ministro nin katanosan.” Kun aakoon niato an putik na mga pangangatanosan kan mga siring, an satong kompiansa sa Tataramon nin katotoohan ni Jehova, an Biblia, puedeng lumuya asin an satong pagtubod puedeng magadan.​—2 Corinto 11:13-15; 1 Timoteo 1:19.

15. Ano an matabang sa sato na magdanay sa dalan na pasiring sa buhay?

¹⁵ An salmista nagsurat: “An saimong tataramon ilawan sa sakong bitis, asin liwanag sa sakong dalan.” (Salmo 119:105) Iyo, an ‘piot na dalan na pasiring sa buhay’ maliwanag na iniilawan kan satong mamomoton na Dios, si Jehova, “na an kabotan iyo na an gabos na klase nin tawo makaligtas asin makaabot sa tamang kaaraman sa katotoohan.” (Mateo 7:14; 1 Timoteo 2:4) An pag-aplikar sa mga tokdo kan Biblia maprotehir sa sato na dai maparayo sa piot na dalan na iyan pasiring sa mga dana nin kadikloman. Si Pablo nagsurat: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan.” (2 Timoteo 3:16) Mantang kita nagtatalubo sa espirituwal, kita tinotokdoan kan Tataramon nin Dios. Paagi sa liwanag kan Tataramon nin Dios, puede niatong sagweon an satong sadiri o, kun kinakaipuhan, puede kitang sagweon kan mamomoton na mga pastor sa kongregasyon. Siring man, puede niatong husayon an mga bagay asin mapakumbabang akoon an disiplina sa katanosan tanganing magdanay kita sa dalan na pasiring sa buhay.

May Pag-apresyar na Maglakaw sa Liwanag

16. Paano niato ikapaheheling an apresasyon sa makangangalas na probisyon ni Jehova na liwanag?

¹⁶ Paano niato ikapaheheling an apresasyon sa makangangalas na probisyon ni Jehova na liwanag? An Juan kapitulo 9 nagsasabi sa sato na kan paomayan ni Jesus an sarong tawong namundag na buta, an tawong iyan napahiro na magpahayag kan saiyang apresasyon. Paano? Nagtubod sia ki Jesus bilang an Aki nin Dios asin ipinamidbid nia sia sa mga tawo bilang “sarong propeta.” Apuera dian, sia pusoan na nagtaram tumang sa mga naghihingoang menoson an milagro ni Jesus. (Juan 9:​17, 30-34) An linahidan na mga miembro kan Kristianong kongregasyon inaapod ni apostol Pedro na sarong “banwaan para sa espesyal na pagkasadiri.” Taano? Huli ta igwa sinda kan kaparehong espiritu nin pagpasalamat na arog kan tawo na namundag na buta asin pinaomayan. Ipinaheheling ninda an apresasyon ki Jehova, an saindang Paratabang, paagi sa ‘pagpahayag nin mahiwas kan mga kamurawayan kan saro na nag-apod sa sainda hale sa kadikloman pasiring sa saiyang makangangalas na liwanag.’ (1 Pedro 2:9; Colosas 1:13) An mga igwa nin daganon na paglaom igwa nin kaparehong espiritu nin pagpasalamat, asin sinusuportaran ninda an saindang linahidan na mga tugang sa pagpahayag sa publiko kan “mga kamurawayan” ni Jehova. Kanigoan kadai masokol na pribilehio an itinatao nin Dios sa bakong sangkap na mga tawo!

17, 18. (a) Ano an paninimbagan nin balang indibiduwal? (b) Bilang pag-arog ki Timoteo, an balang Kristiano ineenkaminar na likayan an ano?

¹⁷ Mahalagang marhay an pagkaigwa nin odok sa pusong apresasyon sa liwanag nin katotoohan. Girumdomon, mayo sa sato an namundag na nakakaaram kan katotoohan. An nagkapira nanodan iyan kan nasa edad na, asin madali nindang nasabotan an pakalabi kan liwanag sa kadikloman. An iba nagkaigwa nin dakulang pribilehio nin pagigin pinadakula nin may takot sa Dios na mga magurang. Para sa mga siring, tibaad pasil na ipasipara na sana an liwanag. Inaadmitir nin sarong Saksi na an mga magurang naglilingkod na ki Jehova bago pa sia namundag na nangaipo sia nin dakulang panahon asin paghihingoa tangani na masabotan an lubos na kahulogan asin kahalagahan kan mga katotoohan na itinokdo sa saiya poon sa pagkaomboy. (2 Timoteo 3:15) Hoben o gurang, an balang saro sa sato kaipuhan na magkultibar nin hararom na apresasyon sa katotoohan na ihinayag ni Jehova.

¹⁸ An hoben na si Timoteo tinokdoan kan “banal na mga kasuratan” poon sa saiyang pagkaomboy, alagad paagi sana sa paghihingoa nia sa saiyang ministeryo na naabot nia an pagkamaygurang bilang Kristiano. (2 Timoteo 3:15) Nasa kamugtakan na sia kun siring na tumabang ki apostol Pablo, na nagsadol sa saiya: “Gibohon mo an bilog mong makakaya tanganing ikaatubang mo an saimong sadiri na inooyonan nin Dios, sarong paragibo na mayo nin maninigong ikasupog, na ginagamit an tataramon kan katotoohan sa tamang paagi.” Logod na kita gabos, arog ni Timoteo, lumikay sa paggibo nin ano man na tibaad magin dahelan na kita masupog​—o magin dahelan na kita ikasupog ni Jehova!​—2 Timoteo 2:15.

19. (a) Arog ni David, kita gabos may dahelan na sabihon an ano? (b) Ano an totokaron sa masunod na artikulo?

¹⁹ Yaon sa sato an gabos na dahelan na omawon si Jehova, na nagtao sa sato kan liwanag kan saiyang katotoohan. Arog ki Hadeng David, kita nagsasabi: “Ika an sakong ilawan, O Jehova, asin si Jehova an nagpapaliwanag sa sakong kadikloman.” (2 Samuel 22:29) Pero, dai kita mangahas na magin kontento na sa sadiri, ta ini puedeng magbunga kan satong pagkadarinas pabalik sa kadikloman na pinagkaldahan sa sato. Kun siring, an masunod na artikulo tatabangan kita na ebalwaron an pagpahalaga niato sa katotoohan nin Dios sa satong buhay.

Ano an Nanodan Nindo?

• Paano nagtatao si Jehova nin espirituwal na kaliwanagan?

• Anong angat an iinaatubang kan espirituwal na kadikloman na nakapalibot sa sato?

• Anong mga peligro an dapat niatong likayan?

• Paano niato ikapaheheling an satong pagpasalamat sa liwanag nin katotoohan?

[Ritrato sa pahina 8]

Si Jehova an gikanan nin pisikal asin espirituwal na liwanag

[Ritrato sa pahina 10]

Kun paanong luway-luway na pinaomayan ni Jesus an sarong tawong buta, tinatabangan nia man kita na makaluwas sa espirituwal na kadikloman

[Ritrato sa pahina 11]

An pagigin nadaya kan falsong mga ilaw ni Satanas minaresulta sa espirituwal na pagkasadsad