Paano Magigin Maugma an Pamilya Mo?—Kabtang 1

Naglalaom an mga bagong kasal na an kaugmahan na namamatian ninda sa aldaw kan saindang kasal magigin habangbuhay. Asin posible nanggad iyan. Napatunayan iyan kan mga Kristiyano na haloy nang mag-agom asin naghihinguwang sunudon an mga giya kan Bibliya para sa mga mag-agom.

1. Ano an sinasabi kan Bibliya na dapat gibuhon kan mga agom na lalaki?

Itinao ni Jehova sa agom na lalaki an responsabilidad na magin payo kan pamilya. (Basahon an Efeso 5:23.) Inaasahan sa saiya ni Jehova na magibo siya nin mga desisyon na para sa ikakarahay kan saiyang pamilya. Sinasabi kan Bibliya sa mga agom na lalaki: “Padagos na mamutan an saindong mga agom.” (Efeso 5:25) Ano an buot sabihon kaiyan? An sarong mamumuton na agom na lalaki mabuot na tinatrato an saiyang agom, sa harong man o sa publiko. Pinoprotektaran niya an saiyang agom asin ginigibo an saiyang pinakamakakaya para maitao an pisikal asin emosyonal na pangangaipo kaini. (1 Timoteo 5:8) An pinakaimportante, tinatabangan niya an saiyang agom na magin dayupot ki Jehova. (Mateo 4:4) Halimbawa, puwede siyang mamibi o magbasa nin Bibliya kaiba kan saiyang agom. Pag mamumuton na inaasikaso kan agom na lalaki an saiyang agom, padagos siyang nagigin amigo ni Jehova.—Basahon an 1 Pedro 3:7.

2. Ano an sinasabi kan Bibliya na dapat gibuhon kan mga agom na babayi?

Sinasabi kan Tataramon nin Diyos na an agom na babayi “dapat na magkaigwa nin hararom na paggalang sa saiyang agom.” (Efeso 5:33) Paano niya iyan magigibo? Puwedeng isip-isipon kan agom na babayi an marahay na mga kuwalidad kan saiyang agom saka an paghihinguwa kaini na asikasuhon siya saka an saindang mga aki. Maipapahiling niya man na irinerespeto niya an saiyang agom paagi sa pagsuportar sa mga desisyon kaini, sa mabuot na pakikipag-ulay sa saiya, asin sa dai pag-istorya sa iba kan negatibong mga bagay manungod sa saiya, dawa pa bako kapagtubod an agom niya.

3. Paano mapapakusog kan mag-agom an saindang relasyon?

Sinasabi kan Bibliya manungod sa mga mag-agom: “An duwa magigin sarong laman.” (Mateo 19:5) Nangangahulugan iyan na dapat nindang labanan o likayan an ano man na puwedeng makaraot sa saindang relasyon. Magigibo ninda iyan paagi sa pirming pagtao nin panahon sa kada saro saka paagi sa onesto asin mabuot na pagsabi kan saindang mga iniisip asin namamatian. Dai ninda tinutugutan an ano man o an siisay man—apuwera ki Jehova—na magin mas importante kisa sa saindang agom. Nag-iingat man sindang marhay na dai magin sobra kadayupot sa iba.

ARAMON PA

4. Mga agom na lalaki—mamutan asin atamanon an saindong agom

VIDEO: Mga Agom na Lalaki, Kamutan an Saindong Agom nin Siring sa Saindong Sadiri (9:53)

• Ano an nagkapirang paagi na maipapahiling kan agom na lalaki an saiyang pagkamuot saka pag-asikaso sa saiyang agom?

Basahon an Colosas 3:12, dangan pag-ulayan an hapot na ini:

• Paano maipapahiling kan agom na lalaki an mga kuwalidad na ini sa pagtrato niya sa saiyang agom?

5. Mga agom na babayi—mamutan asin irespeto an saindong agom

Sinasabi kan Bibliya sa agom na babayi na irespeto an saiyang agom, naglilingkod man ini ki Jehova o dai. Basahon an 1 Pedro 3:1, 2, dangan pag-ulayan an mga hapot na ini:

• Kun an saimong agom bakong kapagtubod, siguradong gusto mo na magin parasamba man siya ni Jehova. Ano sa hiling mo an mas makakatabang saiya—an hulitan mo siya pirmi o an magin marahay, mabuot, asin magalang na agom ka saiya? Taano?

Makakagibo nin marahay na mga desisyon an mag-agom kun magtitinabangan sinda. Pero kun minsan, tibaad dai uyon an agom na babayi sa desisyon kan saiyang agom. Puwede niyang sabihon sa kalmado asin magalang na paagi an mga naiisip niya. Pero dapat niyang tandaan na itinao ni Jehova sa saiyang agom an responsabilidad na magdesisyon kun ano an pinakamarahay para sa saindang pamilya. Dapat niyang gibuhon an saiyang pinakamakakaya na suportaran an desisyon kan agom niya. Paagi kaiyan, makakatabang siya na magin maugma an saindang pamilya. Basahon an 1 Pedro 3:3-5, dangan pag-ulayan an hapot na ini:

• Ano an namamatian ni Jehova pag irinerespeto kan agom na babayi an saiyang agom?

6. Kaya nindong malampasan an mga problema sa relasyon nindong mag-agom

VIDEO: Kun Paano Papakusugon kan Mag-agom an Saindang Pag-ibanan (5:44)

• Sa video, ano an nagkapirang senyales na napaparayo na sa kada saro an mag-agom?

• Ano an ginibo ninda para pakusugon an saindang relasyon?

Basahon an 1 Corinto 10:24 asin Colosas 3:13. Pagkatapos basahon an kada teksto, pag-ulayan an hapot na ini:

• Paano puwedeng iaplikar kan mag-agom an sadol na ini para mapakusog an saindang relasyon?

Sinasabi kan Bibliya na dapat tang tawan nin onra an lambang saro. Tinatawan ta nin onra an sarong tawo kun mabuot asin magalang kita sa saiya. Basahon an Roma 12:10, dangan pag-ulayan an mga hapot na ini:

• Dapat daw na halaton nguna kan agom na lalaki o agom na babayi na pahilingan siya nin onra kan saiyang agom bago siya magpahiling man nin onra sa saiya? Taano?

SUMARYO

Puwedeng magin maugma an mag-agom kun mamumutan asin irerespeto ninda an kada saro saka iaaplikar an mga prinsipyo sa Bibliya.

Rebyu

• Ano an dapat na gibuhon kan agom na lalaki para magin maugma an pag-ibanan nindang mag-agom?

• Ano an dapat na gibuhon kan agom na babayi para magin maugma an pag-ibanan nindang mag-agom?

• Anong mga prinsipyo sa Bibliya an makakatabang para magin makusog an relasyon nin mag-agom?

HILINGON MAN

Aramon an praktikal na mga suhestiyon na makakatabang para magin maugma an saindong pamilya.

Puwedeng Magin Maugma an Pamilya Mo (brosyur)

Hilingon an music video na nagtatampok kan mga bendisyon na makakamtan kan mga mag-agom kun susunudon ninda an mga giya kan Diyos.

Tunay na Pagkamuot (4:26)

Aramon kun ano an buot sabihon kan pagpasakop sa pagkapayo kan agom na lalaki.

“Mga Babae, Taano ta Dapat Magpasakop sa Pagkapayo?” (An Torrengbantayan, Mayo 15, 2010)

Paano napangganahan nin sarong mag-agom an magabat na mga problema—kaiba na an manungod sa pagdiborsiyo?

Pinakarhay Mi an Samong Pag-aguman sa Tabang kan Diyos (5:14)