Poprotektaran Ka ni Jehova—Paano?

 1. Taano ta hinagad ni Jesus ki Jehova na bantayan an mga disipulo niya?

KAN huring banggi kan saiyang buhay bilang tawo, iniisip ni Jesus an mga kadipisilan na mapapaatubang sa mga disipulo niya. Dahil namumutan niya an mga amigo niya, hinagad ni Jesus sa saiyang Ama na “bantayan . . . sinda huli kan saro na maraot.” (Juan 17:14, 15) Aram ni Jesus na pag magbalik na siya sa langit, padagos na makikipaglaban si Satanas na Diyablo sa siisay man na gustong maglingkod ki Jehova. Kaya nangangaipo nin proteksiyon an mga lingkod ni Jehova.

 2. Paano kita makakasigurado na sisimbagon ni Jehova an mga pamibi ta?

² Sinimbag ni Jehova an pamibi ni Jesus huling namumutan Niya an Saiyang Aki. Kaya kun gigibuhon ta an pinakamakakaya ta para mapaugma si Jehova, mamumutan niya man kita, saka sisimbagon niya an mga pamibi ta para sa tabang asin proteksiyon. Mamumuton na Payo nin pamilya si Jehova, kaya padagos niyang aatamanon an saiyang mga aki. Nakataya diyan an saiya mismong pangaran, o reputasyon!

 3. Taano ta kaipuhan ta ngunyan an proteksiyon ni Jehova?

³ Kaipuhan ta ngunyan an proteksiyon ni Jehova urog kisa kasuarin man. Pinalayas si Satanas sa langit “na grabe an kaanggutan.” (Kap. 12:12) Napatubod niya an nagkapirang nagpepersegir sa sato na an ginigibo ninda “sagradong paglilingkod sa Diyos.” (Juan 16:2) Pinepersegir kita kan iba na dai nagtutubod sa Diyos huling napapalain kita sa mga tawo sa kinaban. Ano man an dahilan, dai kita natatakot. Taano? Huling sinasabi kan Tataramon nin Diyos: “Maimbod an Kagurangnan, asin papakusugon niya kamo asin poprotektaran kamo sa saro na maraot.” (2 Tes. 3:3) Paano kita pinoprotektaran ni Jehova? Pag-ulayan ta an duwang paagi.

 4. Sigun sa Efeso 6:13-17, ano an itinao sato ni Jehova?

⁴ Tinawan kita ni Jehova nin pangalasag na makakaprotektar sato sa mga pag-atake ni Satanas. (Basahon an Efeso 6:13-17.) An espirituwal na pangalasag na iyan matibay asin epektibo! Pero mapoprotektaran sana kita kaiyan kun isusulot ta an lambang kabtang kaiyan—asin dai iyan hahalion. Ano an irinerepresentar kan lambang kabtang kaiyan? Hilingon ta.

 5. Ano an paha nin katotoohan, asin taano ta dapat tang isulot iyan?

⁵ An paha nin katotoohan nagrerepresentar sa katotoohan na nasa Tataramon nin Diyos, an Bibliya. Taano ta dapat tang isulot iyan? Huling si Satanas “an ama kan kaputikan.” (Juan 8:44) Ribo-ribong taon na siyang nagpuputik asin nadaya niya an “bilog na kinaban”! (Kap. 12:9) Pero pinoprotektaran kita kan mga katotoohan na nasa Bibliya para dai kita madaya. Paano ta isinusulot an simbolikong paha na ini? Ginigibo ta iyan paagi sa pag-aram kan katotoohan manungod ki Jehova, paagi sa pagsamba saiya “sa espiritu asin katotoohan,” asin paagi sa paggawi nin sadiyosan sa gabos na bagay.—Juan 4:24; Efe. 4:25; Heb. 13:18.

 6. Ano an takop sa daghan na katanusan, asin taano ta dapat tang isulot iyan?

⁶ An takop sa daghan na katanusan nagrerepresentar sa matanos na mga pamantayan ni Jehova. Taano ta dapat tang isulot an takop sa daghan? Arog sa literal na pantakop sa daghan na pinoprotektaran an puso kan suldados, pinoprotektaran man kan takop sa daghan na katanusan an satong piguratibong puso, o panglaog na pagkatawo, sa nakakaraot na impluwensiya kan kinaban na ini. (Tal. 4:23) Inaasahan ni Jehova sato na mamumutan asin paglilingkudan ta siya nin bilog na puso. (Mat. 22:36, 37) Kaya pinupurbaran ni Satanas na bangaon an satong puso paagi sa pag-impluwensiya sato na mamutan an mga bagay sa kinaban na ini—mga bagay na ikinakaungis ni Jehova. (Sant. 4:4; 1 Juan 2:15, 16) Pero kun dai iyan mag-aser, tatakuton niya kita o pepersegiron para gumibo nin mga bagay na kontra sa mga pamantayan ni Jehova.

 7. Paano ta isinusulot an takop sa daghan na katanusan?

⁷ Isinusulot ta an takop sa daghan na katanusan paagi sa pag-ako sa mga pamantayan ni Jehova sa kun ano an tama saka sala asin paagi sa pag-aplikar kaiyan. (Sal. 97:10) Tibaad para sa iba, mahigpit an mga pamantayan ni Jehova. Pero kun mapundo na kita sa pagsabuhay sa mga prinsipyo sa Bibliya, garo kita kaiyan sarong suldados na hinali an takop niya sa daghan sa kainitan nin laban dahil para saiya magabaton iyan. Kamangmangan nanggad iyan! Para sa mga namumuot ki Jehova, “bakong magabat” an mga tugon niya, kundi nagliligtas-buhay.—1 Juan 5:3.

 8. Ano an buot sabihon kan pagsulot sa bitis ta kan sandalyas nin pagigin andam sa pagpahayag kan maugmang bareta?

⁸ Dinadagka man kita ni Pablo na isulot sa satong mga bitis an sandalyas nin pagigin andam sa pagpahayag kan maugmang bareta nin katuninungan. Buot sabihon, dapat na pirmi kitang andam na ihulit an maugmang bareta kan Kahadian. Pag sinasabi ta sa iba an mensahe kan Bibliya, nagkukusog an satong pagtubod. Talagang nakakapakusog na mahiling kun paano naghahanap nin oportunidad an mga lingkod ni Jehova sa bilog na daga para ihulit an maugmang bareta—pag nasa trabaho, sa eskuwelahan, sa lugar nin negosyo asin pag naghaharong-harong, namamakal, nagbibisita sa bakong kapagtubod na mga paryente, nakikipag-ulay sa mga kabisto, o dawa pag nasa harong lang. Kun mapadaog kita sa takot asin mapundo na sa paghuhulit, garo kita sarong suldados na hinali an sandalyas niya mantang nasa laban; madali sanang malulugadan an mga bitis niya. Huli kaiyan, madidipisilan na siyang protektaran an sadiri niya, asin dai niya na masusunod an mga pagbuot kan komandante.

 9. Taano ta kaipuhan tang darahon an dakulang kalasag nin pagtubod?

⁹ An dakulang kalasag nin pagtubod nagrerepresentar sa pagtubod ta ki Jehova. Nagtitiwala kita na uutubon niya an gabos niyang panuga. Tatabangan kita kan pagtubod na iyan na “[masigbo] an gabos na nagkakalayong mga pana kan saro na maraot.” Taano ta kaipuhan tang darahon an dakulang kalasag na ini? Dahil pinoprotektaran kita kaiyan na dai madara kan mga katukduan kan mga apostata o pangluyahan nin buot pag tinutuya an mga tinutubod ta. Kun mayo nin pagtubod, dai kita magkakaigwa kan kusog na sunudon si Jehova pag ginigipit kita kan iba na baliwalaon an mga pamantayan niya. Sa kabaliktaran, sa kada naninindugan kita pag nasa trabaho o eskuwelahan, dinadara ta an satong kalasag. (1 Ped. 3:15) Sa kada sinasayumahan ta an sarong trabaho na mas dakula an suweldo pero makakaulang sa rutina ta nin pagsamba, dinadara ta an satong kalasag. (Heb. 13:5, 6) Asin pag padagos kitang naglilingkod ki Jehova sa ibong nin pagkontra, pinoprotektaran kita kan satong kalasag.—1 Tes. 2:2.

10. Ano an helmet nin kaligtasan, asin taano ta dapat tang isulot iyan?

¹⁰ An helmet nin kaligtasan iyo an paglaom na itinatao sato ni Jehova—an paglaom na ililigtas niya kita sa kagadanan asin na babalusan niya an gabos na naggigibo kan kabutan niya. (1 Tes. 5:8; 1 Tim. 4:10; Tito 1:1, 2) Arog sa literal na helmet na pinoprotektaran an payo nin suldados, pinoprotektaran man kan paglaom na kaligtasan an satong kakayahan na mag-isip. Paano? Pinapagdanay kan paglaom na iyan an satong pokus sa mga panuga nin Diyos asin tinatabangan kita kaiyan na magkaigwa nin tamang pagmansay sa mga problema. Paano ta isinusulot an helmet na ini? Paagi sa paghihinguwang magin kauyon pirmi kan kaisipan nin Diyos an satong kaisipan. Halimbawa, naglalaom kita bako sa kayamanan na mayong kasiguruhan, kundi sa Diyos.—Sal. 26:2; 104:34; 1 Tim. 6:17.

11. Ano an espada kan espiritu, asin taano ta kaipuhan tang gamiton iyan?

¹¹ An espada kan espiritu iyo an Tataramon nin Diyos, an Bibliya. An espadang iyan may kakayahan na ihayag an gabos na klase nin pandadaya asin patalingkason an mga tawo sa pagkauripon sa palsong mga katukduan saka nakakaraot na mga kaugalian. (2 Cor. 10:4, 5; 2 Tim. 3:16, 17; Heb. 4:12) Nakakanuod kitang gamiton nin tama an espadang iyan paagi sa personal na pag-adal asin paagi sa pagsasanay na itinatao sato kan organisasyon nin Diyos. (2 Tim. 2:15) Apuwera sa pangalasag, tinatawan kita ni Jehova nin saro pang makusog na proteksiyon. Ano iyan?

12. Ano pa an kaipuhan ta, asin taano?

¹² Aram nin sarong eksperyensiyadong suldados na dai niya madadaog an dakulaon na hukbo kun siya sana; kaipuhan niya an tabang kan mga kapwa niya suldados. Kaagid kaiyan, dai mo madadaog si Satanas asin an mga parasunod niya kun ika sana; kaipuhan mo an suporta kan mga tugang. Tinawan kita ni Jehova nin pambilog na kinaban “na kasararuan nin magturugang” para tabangan kita.—1 Ped. 2:17.

13. Sigun sa Hebreo 10:24, 25, ano an mga pakinabang na makukua ta sa satong mga pagtiripon?

¹³ An sarong paagi na nakakaresibi kita nin tabang iyo an pag-atender sa satong mga pagtiripon. (Basahon an Hebreo 10:24, 25.) Pag pinangluluyahan kita nin buot—na nangyayari man sato gabos paminsan-minsan—napapagian kan mga pagtiripon an pagmati ta. Napapakusog kita kan udok sa pusong mga komento kan mga tugang. Nakakamotibar sato an basado sa Bibliyang mga pahayag saka demonstrasyon na padagos na maglingkod ki Jehova. Asin napapakusog kita pag nakikipag-ulay kita sa mga tugang bago asin pagkatapos kan pagtiripon. (1 Tes. 5:14) Nagkakaoportunidad man kita sa mga pagtiripon na mamatian an kaugmahan sa pagtabang sa iba. (Gibo 20:35; Roma 1:11, 12) Nakakatabang man sa ibang paagi an satong mga pagtiripon. Napapauswag diyan an satong mga kakayahan sa pakikilaban, sabi ngani, paagi sa pagtabang sato na magin mahusay sa ministeryo. Halimbawa, nanunudan ta kun paano magin epektibo sa paggamit kan mga kasangkapan sa satong Toolbox sa Pagtutukdo. Kaya mag-andam na marhay para sa mga pagtiripon kan kongregasyon. Pag nasa pagtiripon, magdangog na marhay. Pagkatapos kan pagtiripon, iaplikar an itinaong pagsasanay. Kun gigibuhon mo iyan, magigi kang “sarong matibay na suldados ni Cristo Jesus.”—2 Tim. 2:3.

14. Ano pang tabang an igwa kita?

¹⁴ Tinatabangan man kita nin minilyon na makapangyarihan na anghel. Isipa an kayang gibuhon nin saro sanang anghel! (Isa. 37:36) Ngunyan imahinara kun ano an magigibo nin sarong makapangyarihan na hukbo nin mga anghel. Mayo nin siisay man na tawo o demonyo an makakapantay sa makapangyarihan na hukbo ni Jehova. Si Jehova an pinakamakapangyarihan sa gabos. Kaya pag kaiba ta siya, siguradong mas makusog kita kisa sa mga parakontra, gurano man sinda kadakul. (Hok. 6:16) Totoo nanggad iyan! Pirming girumdumon iyan pag nangluluya an buot mo dahil sa sinabi o ginibo kan katrabaho, kaklase, o kan bakong kapagtubod na paryente mo. Tandaan na dai ka nagsosolo sa laban na ini. Nagsusunod ka sa paggiya ni Jehova.

15. Sigun sa Isaias 54:15, 17, taano ta dai nanggad mapapapundo an mga lingkod nin Diyos?

¹⁵ Nauungis sato an kinaban na ini na kontrolado ni Satanas dahil sa dakul na dahilan. Nagdadanay kitang lubos na neutral sa pulitika, saka dai kita nakikikabtang sa giyera. Ibinabalangibog ta an pangaran nin Diyos, ihinuhulit ta na an Kahadian niya an solamenteng paglaom para sa katuninungan, saka sinusunod ta an matanos na mga pamantayan niya. Ilinalantad ta na an tagapamahala kan kinaban na ini grabe kaputikon saka paragadan. (Juan 8:44) Tapos ibinabareta ta na madali nang laglagon an kinaban ni Satanas. Pero dai nanggad kita mapapapundo ni Satanas saka kan mga parasunod niya. Imbes, padagos kitang mag-uumaw ki Jehova sa ano man na paaging magigibo ta! Makapangyarihan si Satanas, pero dai niya napugulan na makaabot sa mga tawo sa bilog na kinaban an mensahe kan Kahadian. Nagin posible sana iyan huli sa proteksiyon ni Jehova.—Basahon an Isaias 54:15, 17, NWT.

16. Paano ililigtas ni Jehova an banwaan niya durante kan grabeng kasakitan?

¹⁶ Ano an mangyayari sa maabot? Durante kan grabeng kasakitan, ililigtas kita ni Jehova sa duwang makangangalas na paagi. Inot, ililigtas niya an maimbod niyang mga lingkod pag pinangyari niya nang laglagon kan mga hadi sa daga an Dakulang Babilonya, an imperyo nin palsong relihiyon. (Kap. 17:16-18; 18:2, 4) Dangan, ililigtas niya an saiyang banwaan pag pinara niya na sa Armagedon an natatadang mga elemento kan kinaban ni Satanas.—Kap. 7:9, 10; 16:14, 16.

17. Ano an pakinabang kun magdadanay kitang harani ki Jehova?

¹⁷ Kun magdadanay kitang harani ki Jehova, mayong magigibong permanenteng danyos sato si Satanas. Sa katunayan, siya ngani an masapar nin permanenteng danyos. (Roma 16:20) Kaya isulot an kumpletong pangalasag—asin dai iyan paghalion! Dai makipaglaban nin solo. Tabangan an mga tugang mo. Asin sunudon an paggiya ni Jehova. Kun gigibuhon mo iyan, makakasigurado ka na papakusugon saka poprotektaran ka kan saimong mamumuton na Ama sa langit.—Isa. 41:10.