“Ginagamit an Tataramon kan Katotoohan sa Tamang Paagi”

AN Tataramon nin Dios sarong tambobong nin mga prinsipyo na mahalaga para sa sarong mapangganang buhay. Puede kaiyan na tabangan an sarong ministro na magtokdo, magsagwe, asin magtanos. (2 Timoteo 3:​16, 17) Minsan siring, tanganing makinabang nin lubos sa giyang ini na itinao nin Dios, kaipuhan na sunodon niato an hatol ni apostol Pablo ki Timoteo: “Gibohon mo an bilog mong makakaya tanganing ikaatubang mo an saimong sadiri na inooyonan nin Dios, sarong paragibo na mayo nin maninigong ikasopog, na ginagamit an tataramon kan katotoohan sa tamang paagi.”​—2 Timoteo 2:15.

An Tataramon nin Dios ibinaing, kabilang sa ibang bagay, sa masustansiang gatas, matagas na kakanon, nakarerepresko asin nakalilinig na tubig, sarong salming, asin matarom na minasbad. An pakasabot sa kahulogan kan mga terminong ini nakatatabang sa sarong ministro na ekspertong gamiton an Biblia.

Pananao kan Gatas kan Tataramon nin Dios

An gatas pagkakan na kaipuhan kan bagong mamundag na mga omboy. Mantang nagdadakula an omboy, dikit-dikit na iiniiba an matagas na kakanon sa saiyang pagkakan, alagad sa primero, gatas sana an kaya niang tunawon. Sa dakol na bagay, idtong mga dikit an aram manongod sa Tataramon nin Dios garo mga omboy. Baga man an sarong tawo bago pa sanang magkainteres sa Tataramon nin Dios o nahaloyhaloy nang nagin pamilyar dian, kun an pakasabot nia sagkod sana sa pinakasimpleng mga bagay na sinasabi kan Biblia, sia sarong espirituwal na omboy asin nangangaipo nin pagkakan na madaling tunawon​—an espirituwal na “gatas.” Dai pa nia kayang tunawon an “matagas na kakanon,” an hararom na mga bagay kan Tataramon nin Dios.​—Hebreo 5:12.

Ini an situwasyon sa bago pa sanang mapormang kongregasyon sa Corinto kan si Pablo magsurat sa sainda: “Tinawan ko kamo nin gatas, bakong nin makakakan, huli ta bako pa kamong makosog nin igo.” (1 Corinto 3:2) An mga taga-Corinto kaipuhan ngunang manodan an “simpleng mga bagay kan banal na mga kapahayagan nin Dios.” (Hebreo 5:12) Sa grado kan saindang pagtalubo, dai ninda kayang tunawon an “hararom na mga bagay nin Dios.”​—1 Corinto 2:10.

Arog ni Pablo, an Kristianong mga ministro ngonyan nagpapaheling kan saindang pagmakolog sa espirituwal na mga omboy paagi sa pagtao sa sainda nin “gatas,” an boot sabihon, paagi sa pagtabang sa sainda na magkaigwa nin marigon na pundasyon sa pundamental na Kristianong doktrina. Pinaririgon ninda an boot kan siring na mga bagohan o bako pang maygurang na ‘magkaigwa nin pagmawot sa daing kasalak na gatas kan tataramon.’ (1 Pedro 2:2) Ipinaheling ni apostol Pablo na namansayan nia an espesyalisadong atension na kaipuhan nin mga bagohan kan sia magsurat: “An lambang nagkakakan nin gatas dai pang kabatidan sa tataramon nin katanosan, huli ta sia omboy pa.” (Hebreo 5:13) An pasensia, konsiderasyon, pagsabot, asin kabootan hinahagad sa mga ministro nin Dios mantang ihinihiras ninda an daing kasalak na gatas kan Tataramon sa mga bagohan asin kulang an eksperyensia paagi sa pag-adal sa Biblia sa harong asin sa kongregasyon.

Paggamit kan Matagas na Kakanon kan Tataramon nin Dios

Tanganing magtalubo pasiring sa kaligtasan, an kaipuhan nin sarong Kristiano bako sanang “gatas.” Kun an pangenot na mga katotoohan kan Biblia malinaw nang nasabotan asin inako, sia andam nang bumalyo sa “matagas na kakanon para sa mga maygurang.” (Hebreo 5:14) Paano nia ini magigibo? Sa pundamental, paagi sa regular na rutina nin personal na pag-adal asin pakiasosyar sa Kristianong mga pagtiripon. An siring na marahay na mga ugale matabang sa sarong Kristiano na magin makosog an espirituwalidad, maygurang, asin epektibo sa ministeryo. (2 Pedro 1:8) Dai niato maninigong lingawan na dugang pa sa kaaraman, an paggibo kan kabotan ni Jehova espirituwal man na kakanon.​—Juan 4:34.

Ngonyan, an sarong “maimbod asin madonong na oripon” ninombrahan na magtao sa mga lingkod nin Dios nin kakanon sa igong panahon asin tabangan sindang masabotan “an manlaenlaen na gayong kadonongan nin Dios.” Si Jehova, paagi sa saiyang espiritu, ihinahayag an hararom na Makakasuratan na mga katotoohan paagi sa fiel na oripon na ini, na maimbod na nagpupublikar nin espirituwal na “kakanon sa igong panahon.” (Mateo 24:​45-47; Efeso 3:​10, 11; Ikomparar an Kapahayagan 1:​1, 2.) An lambang indibiduwal na Kristiano may paninimbagan na gamiton sa pinakalubos an siring na ipinublikar na mga probisyon.​—Kapahayagan 1:3.

Siempre, may nagkapirang bagay sa Biblia na “mapawot saboton,” minsan kan maygurang na mga Kristiano. (2 Pedro 3:16) Igwa nin iisipon na marhay na mga kapahayagan, hula, asin ilustrasyon na nangangaipo nin dakol na pag-adal asin paghorophorop. Huli kaini, kabale sa personal na pag-adal an pagkotkot sa Tataramon nin Dios. (Talinhaga 1:​5, 6; 2:​1-5) An kamagurangan nangorognang may paninimbagan sa bagay na ini kun sinda nagtotokdo sa kongregasyon. Baga man nagkokondukta nin Pag-adal sa Libro kan Kongregasyon o nin Pag-adal sa Torrengbantayan, nagtatao nin mga pahayag-publiko, o naglilingkod sa ano man na ibang katongdan nin pagtotokdo, an kamagurangan maninigong pamilyar na gayo sa saindang materyal asin magin andam na tumao nin atension sa saindang “abilidad sa pagtotokdo” mantang ipinaaabot ninda an matagas na espirituwal na kakanon sa kongregasyon.​—2 Timoteo 4:2.

Tubig na Nakarerepresko Asin Nakalilinig

Sinabihan ni Jesus an Samaritana sa may bobon na tatawan nia sia nin maiinom na magigin sa saiya “burabod nin tubig na nagbuburokbusok tanganing magtao nin buhay na daing katapusan.” (Juan 4:​13, 14; 17:3) An tubig na ini na nagtatao nin buhay kabale an gabos na probisyon nin Dios para sa pagkamit nin buhay paagi sa Kordero nin Dios, asin an mga probisyon na ini ipinaliwanag sa Biblia. Bilang mga indibiduwal na napapaha sa “tubig” na iyan, inaako ta an imbitasyon kan espiritu asin kan nobya ni Cristo na “kumua kan tubig nin buhay na daing bayad.” (Kapahayagan 22:17) An pag-inom kan tubig na ini puedeng mangahulogan nin buhay na daing katapusan.

Dugang pa, an Biblia nagtatao kan moral asin espirituwal na mga pamantayan para sa tunay na mga Kristiano. Mantang iinaaplikar ta an mga pamantayan na ini na itinao nin Dios, kita linilinigan kan Tataramon ni Jehova, ‘hinuhugasan’ sa gabos na gawe na ikinaoongis ni Jehova. (1 Corinto 6:​9-11) Sa dahelan na ini, an katotoohan na yaon sa ipinasabong na Tataramon inaapod na sarong “paghugas nin tubig.” (Efeso 5:26) Kun dai niato togotan na linigon kita kan katotoohan nin Dios sa paaging ini, an satong pagsamba dai nia aakoon.

Interesante, an kamagurangan na “ginagamit an tataramon kan katotoohan sa tamang paagi” iinaagid man sa tubig. Si Isaias nagsasabi na sinda “siring sa mga sapa nin tubig sa sarong disyerto.” (Isaias 32:​1, 2) An mamomoton na kamagurangan inootob an paglaladawan na ini kun sinda minadalaw sa saindang mga tugang bilang espirituwal na mga pastor, na ginagamit an nakarerepreskong Tataramon nin Dios sa paghiras nin nakaparirigon, nakararanga, espirituwal na impormasyon na nakapakokosog asin nakapasasarig.​—Ikomparar an Mateo 11:​28, 29.a

An mga miembro kan kongregasyon galagang nag-aantisipar sa mga pagdalaw kan kamagurangan. “Aram ko na nakararanga nanggad an kamagurangan, asin ako naoogmang marhay na ginibo ni Jehova an probisyon na ini,” an sabi ni Bonnie. Si Lynda, sarong nagsosolong ina, nagsurat: “Paagi sa Makakasuratan na pagparigon sa boot, tinabangan ako kan kamagurangan na makapanggana. Sinda naghinanyog asin nagpaheling nin pagkaherak.” Si Michael nagsabi: “Tinabangan ninda akong makamate na ako kabtang nin organisasyon na nagmamakolog.” “An mga pagdalaw nin kamagurangan nakatabang sakuya na daogon an mga panahon nin labi-labing depresyon,” an sabi nin saro pa. An nakararahay sa espirituwal na pagdalaw nin sarong magurang sa kongregasyon garo sarong malipot, nakarerepreskong inomon. An mga arog-karnero nagkakararanga mantang an mamomoton na kamagurangan tinatabangan sinda na maheling kun paano minaaplikar an Makakasuratan na mga prinsipyo sa saindang situwasyon.​—Roma 1:​11, 12; Santiago 5:14.

Gamiton an Tataramon nin Dios na Arog nin Salming

Kun an sarong indibiduwal minaako nin matagas na kakanon, an katuyohan bako sanang masiraman sa namit. Imbes, sia naglalaom na makakua nin sustansia na mapangyari sa saiya na magpunsionar. Kun sia sarong aki, sia naglalaom na an kakanon matabang sa saiya na magtalubo pasiring sa pagigin adulto. Arog man kaiyan sa espirituwal na kakanon. An personal na pag-adal sa Biblia puedeng magin nakaoogma, alagad bako sana iyan an rason para dian. An espirituwal na kakanon maninigong makapabago sa sato. Tinatabangan kita kaiyan na mamidbid an asin makapaluwas kan bunga kan espiritu saka isolog “an bagong pagkatawo, na binabago paagi sa tamang kaaraman oyon sa ladawan kan Saro na naglalang kaiyan.” (Colosas 3:10; Galacia 5:​22-24) An espirituwal na kakanon tinatabangan man kita na tumalubo pasiring sa pagkamaygurang, na nagpapangyari na orog tang ikaaplikar an Makakasuratan na mga prinsipyo sa pag-atubang sa satong mga problema asin sa pagtabang sa iba na maatubang an saindang mga problema.

Paano niato masasabi kun baga an Biblia nagkakaigwa kan epektong iyan sa sato? Ginagamit niato an Biblia na arog nin salming. Si Santiago nagsabi: “Magin kamong mga paragibo kan tataramon, asin bakong mga paradangog sana . . . Kun an siisay man paradangog kan tataramon, asin bakong paragibo, an sarong ini nakaaagid sa tawo na nagheheling sa saiyang lalauogon sa salming. Huli ta pinagheheling nia an saiyang sadiri, asin sia minahale asin nalilingawan tolos kun anong klase siang tawo. Alagad an nagtotorohok sa sangkap na pagboot para sa katalingkasan asin nagdadanay dian, an tawong ini, huli ta sia nagin, bakong malingawon na paradangog, kundi paragibo kan gibohon, maoogma sa paggibo nia kaiyan.”​—Santiago 1:​22-25.

Kita “nagtotorohok” sa Tataramon nin Dios kun sinisiyasat niato iyan nin maingat asin ikinokomparar an kamugtakan ta sa maninigo na magin kamugtakan ta oyon sa mga pamantayan nin Dios. Sa paggibo kaini, kita magigin “mga paragibo kan tataramon, asin bakong mga paradangog sana.” An Biblia magkakaigwa nin marahay na epekto sa sato.

An Tataramon nin Dios Bilang Minasbad

Katapustapusi, tinatabangan kita ni apostol Pablo na maheling kun paano niato gagamiton an Tataramon nin Dios bilang minasbad. Sa pagpatanid sato tumang sa “mga gobyerno, tumang sa mga autoridad, tumang sa mga namamahala sa kinaban sa kadikloman na ini, tumang sa maraot na mga puersang espiritu sa langitnon na mga lugar,” dinadagka nia kita na ‘akoon an minasbad kan espiritu, na iyo, an tataramon nin Dios.’ (Efeso 6:​12, 17) An Tataramon nin Dios sarong mahalagang marhay na armas na magagamit niato sa paghale sa dawa anong ideya na “pinatitindog tumang sa kaaraman nin Dios.”​—2 Corinto 10:​3-5.

Daing duwa-duwa, “an tataramon nin Dios buhay asin mapuersa.” (Hebreo 4:12) Si Jehova nagtataram sa katawohan paagi sa mga pahina kan saiyang ipinasabong na Tataramon. Gamiton iyan nin marahay sa pagtokdo sa iba asin sa pagbuyagyag nin falsong mga doktrina. Aprobetsaran nindo iyan tanganing parigonon an boot, pasarigon, parepreskohan, rangahon, motibaron, asin pakosogon sa espirituwal an iba. Asin logod si Jehova “sumangkap sa saindo nin lambang marahay na bagay sa pag-otob kan saiyang kabotan,” tanganing permi nindong gibohon an “nakaoogma sa saiyang pagheling.”​—Hebreo 13:21.

[Nota sa ibaba]

[Retrato sa pahina 31]

An kamagurangan pinaririgon an boot nin iba, na “ginagamit an tataramon kan katotoohan sa tamang paagi”