Taano ta Dapat na Magin Mapagsakripisyo?

Si Bill sarong tawong de pamilya na labi nang 50 anyos na paratokdo sa teknolohiya nin konstruksion. Sa bilog na taon, sa sadiri niang gastos, naggagamit sia nin dakol na semana sa pagplano para sa asin pagtabang sa pagtogdok nin mga Kingdom Hall para sa mga kongregasyon kan Mga Saksi ni Jehova. Si Emma edukadang marhay asin kualipikadong marhay na daragang 22 anyos. Imbes na pag-aaboton an biyong personal na mga pasohan asin kasingawan, naggagamit sia nin labing 70 oras kada bulan bilang ministro, na tinatabangan an mga tawo na masabotan an Biblia. Si Maurice asin Betty retirado na. Imbes na magluyaluya na sana ngonyan, nagbalyo sinda sa ibang nasyon tanganing tabangan an mga tawo duman na makanood manongod sa katuyohan nin Dios para sa daga.

DAI ibinibilang kan mga indibiduwal na ini na sinda espesyal o ekstraordinaryo. Sinda normal sanang mga tawo na ginigibo an para sa sainda iyo an tama na gibohon. Taano ta ginagamit ninda an saindang panahon, kosog, mga abilidad, asin kuarta para sa interes nin iba? An nagmomotibar sa sainda iyo an hararom na pagkamoot sa Dios asin sa saindang kataed. An pagkamoot na ini pinatalubo sa kada saro sa sainda an tunay na mapagsakripisyong espiritu.

Ano an boot niatong sabihon kan mapagsakripisyong espiritu? Bueno, an pagigin mapagsakripisyo dai nagkakaipong mamuhay nin mahigpit o nagpapainda sa sadiri. Dai kaipuhan na kalabot dian an sobrang pagdehar sa sadiri na hinahalean kita nin kagayagayahan o satispaksion. Siring sa pagkasabi kaiyan kan The Shorter Oxford English Dictionary, an pagsasakripisyo sa sadiri nangangahulogan sana nin “pagbutas sa sadiring intereses, kaogmahan, asin kamawotan nin saro, huli sa obligasyon o para sa ikararahay nin iba.”

Si Jesu-Cristo—An Pinakahalimbawa

An Aking bugtong nin Dios, si Jesu-Cristo, iyo an pinakahalimbawa nin saro na may mapagsakripisyong espiritu. Sa saiyang buhay bago nagin tawo, an saiyang buhay siertong iyo an nagin pinakanakaaanimar asin pinakanakakokontento. Dayupot asin personal niang nakaibaiba an saiyang Ama asin an espiritung mga linalang. Dugang pa, ginamit kan Aki nin Dios an saiyang mga abilidad sa masakit asin nakaoogmang mga aktibidad bilang “pangenot na trabahador.” (Talinhaga 8:30, 31) Segurado na an kamugtakan kan buhay nia nakalalabing marhay sa ano man na nakamtan kasuarin man maski kan pinakamayaman na tawo sa daga. Ikaduwa ki Jehova Dios, sia may mamuraway asin pribilehiadong katongdan sa langit.

Pero, an Aki nin Dios “nagpakang-daing halaga asin buminaing sa sarong oripon asin nagin kaagid nin mga tawo.” (Filipos 2:7) Gikan sa boot niang binutasan an gabos niang personal na bentaha paagi sa pagigin tawo asin pagtao kan saiyang buhay bilang pantubos tanganing haleon an epekto kan ginibong danyos ni Satanas. (Genesis 3:1-7; Marcos 10:45) Nangahulogan iyan nin pamumuhay sa kaibanan nin makasalan na katawohan sa sarong kinaban na nasa kapangyarihan ni Satanas na Diablo. (1 Juan 5:19) Nangahulogan man iyan nin pagtios nin personal na kapurisawan asin kadepisilan. Minsan siring, ano man an resulta kaiyan sa saiya si Jesu-Cristo determinadong gibohon an kabotan kan saiyang Ama. (Mateo 26:39; Juan 5:30; 6:38) Binalo kaini kun sagkod saen an pagkamoot asin kaimbodan ni Jesus. Sagkod saen sia andam na magsakripisyo? “Sia nagpakumbaba,” sabi ni apostol Pablo, “asin nagin makinuyog sagkod sa kagadanan, iyo, kagadanan sa hariging pasakitan.”—Filipos 2:8.

“Papagdanayon Dian sa Saindo an Nasa Isip na Aktitud na Ini”

Dinadagka kita na sunodon an halimbawa ni Jesus. “Papagdanayon dian sa saindo an nasa isip na aktitud na ini na yaon man ki Cristo Jesus,” an sadol ni Pablo. (Filipos 2:5) Paano ta ini magigibo? An sarong paagi iyo an ‘pagrisa, bakong sa personal na interes sa sadiri sana nindong mga bagay-bagay, kundi siring man sa personal na interes sa kaidto man na iba.’ (Filipos 2:4) An tunay na pagkamoot “dai naghahanap kan saiyang sadiring kapakanan.”—1 Corinto 13:5.

An may pagmalasakit na mga indibiduwal parateng nagpapaheling nin daing kapasloan na dedikasyon sa paglilingkod sa iba. Minsan siring, ngonyan an dakol na tawo may tendensia na sadiri sana an intindihon. An kinaban igwa nin ako-nguna na aktitud. Kaipuhan kitang magmaan tumang sa espiritu kan kinaban huli ta kun iyan magin mapanggana sa pagmolde sa satong pananaw asin aktitud, posibleng marhay na an satong sadiring mga kamawotan an gigibohon tang pinakaimportante. Dangan an gabos tang ginigibo—kun paano ta ginagamit an satong panahon, an satong kosog, an satong kuarta—kokontrolon nin mga pag-iisip na para sana sa sadiri. Kun siring kaipuhan kitang makipaglaban nin maigot tumang sa impluwensiang ini.

Maski an marahay an intension na sadol kun beses puedeng paluyahon an satong espiritu nin pagsasakripisyo. Narerealisar an kaaabtan kan dalan nin pagsasakripisyo ni Jesus, si apostol Pedro nagsabi: “Maherak ka sa saimong sadiri, Kagurangnan.” (Mateo 16:22) Minalataw na nadepisilan siang akoon an pagigin andam ni Jesus na magadan para sa kapakanan kan soberaniya kan saiyang Ama asin sa kaligtasan kan katawohan. Kaya hiningoa niang padesganaron si Jesus sa pagpadagos sa siring na dalan.

‘Paindahan an Saimong Sadiri’

Ano an reaksion ni Jesus? An pagkasaysay nagsasabi: “Sia nagsalingoy, hineling an saiyang mga disipulo asin sinaway si Pedro, patin nagsabi: ‘Padian ka sa likod ko, Satanas, huli ta iniisip mo, bakong an mga kaisipan nin Dios, kundi an sa mga tawo.’” Dangan inapod ni Jesus an kadaklan sa saiya kaibanan an saiyang mga disipulo asin nagsabi: “Kun an siisay man boot na sumunod sa sako, paindahan nia an saiyang sadiri asin pasanon an saiyang hariging pasakitan patin padagos na sumunod sa sako.”—Marcos 8:33, 34.

Pakalihis nin mga 30 taon pakatao nia kan sadol na ini ki Jesus, ipinaheling ni Pedro na kan panahon na iyan nasabotan na nia an kahulogan nin pagsasakripisyo. Dai nia dinagka an mga kapagtubod na dai pakaseryoso asin maherak sa saindang sadiri. Imbes, sinadol sinda ni Pedro na andamon an saindang isip para sa aktibidad asin dai na magpamolde sono sa saindang dating kinabanon na mga mawot. Sa ibong nin mga pagbalo, dapat na enoton ninda sa saindang buhay an paggibo kan kabotan nin Dios.—1 Pedro 1:6, 13, 14; 4:1, 2.

An pinakanakakokontentong dalan na puedeng lakawan nin siisay man sa sato iyo an pagtao ki Jehova kan gabos na sadiri niato, na fiel na sinusunod si Jesu-Cristo asin tinotogotan an Dios na giyahan an satong mga aktibidad. Sa bagay na ini, si Pablo nagtao nin marahay na halimbawa. An saiyang pakamate nin pagkaapurado asin an saiyang pagpasalamat ki Jehova nagpahiro sa saiya na lingawan an kinabanon na mga ambisyon o oportunidad na puede kutanang makalingling sa saiya sa paggibo kan kabotan nin Dios. “Sa sakong kabtang,” sabi nia, “ako maogmang gayo na maggagamit kan sakong sadiri asin lubos na mapagamit” sa paglilingkod sa kapakanan nin iba. (2 Corinto 12:15) Ginamit ni Pablo an saiyang mga abilidad na paoswagon an intereses nin Dios, bakong an saiya.—Gibo 20:24; Filipos 3:8.

Paano ta puedeng siyasaton an satong sadiri tanganing helingon kun igwa kita kan punto de vista na arog kan ki apostol Pablo? Puede tang ihapot sa satong sadiri an arog kaini: Paano ko ginagamit an sakong panahon, sakong kosog, sakong mga abilidad, asin sakong kuarta? Ginagamit ko daw an mga ini asin an iba pang mahalagang marhay na balaog tangani sanang paoswagon an sako mismong kapakanan, o ginagamit ko daw iyan sa pagtabang sa iba? Pinag-isipan ko na daw an mas lubos pang pakikikabtang sa nagliligtas-buhay na gibohon na pagpahayag kan maogmang bareta, na tibaad bilang sarong pambilog na panahon na parabalangibog kan Kahadean? Puede daw akong mas lubos pang magpartisipar sa mga aktibidad na arog kan pagtogdok o pagmantener nin mga Kingdom Hall? Inaaprobetsaran ko daw an mga oportunidad na tabangan an mga nangangaipo? Itinatao ko daw ki Jehova an sakong pinakamakakaya?—Talinhaga 3:9.

“Orog na Kaogmahan sa Pagtao”

Pero, talaga daw na madonong an magin mapagsakripisyo? Iyo nanggad! Aram ni Pablo gikan sa personal na eksperyensia na an siring na espiritu nagtatao nin abundang balos. Iyan nagtao sa saiya nin dakulang kaogmahan asin dakulaon na personal na satispaksion. Ipinaliwanag nia ini sa kamagurangan na lalaki hale sa Efeso kan makipag-olay sia sa sainda sa Mileto. Si Pablo nagsabi: “Ipinaheling ko sa saindo sa gabos na bagay na paagi sa siring na pagpagal [sa mapagsakripisyong paagi] dapat nindong tabangan an mga maluya, asin dapat na isaisip nindo an mga tataramon kan Kagurangnan na si Jesus, kan sia mismo magsabi, ‘Igwang orog na kaogmahan sa pagtao kisa pag-ako.’” (Gibo 20:35) Minilyon na tawo an nakadiskobre na an pagpahayag kan klaseng ini nin espiritu nagtatao nin dakulang kaogmahan ngonyan mismo. Matao man iyan nin kagayagayahan sa ngapit kun balosan na ni Jehova an mga ineenot an intereses nia asin kan iba kisa an sainda.—1 Timoteo 4:8-10.

Kan hapoton kun taano ta nagmaigot sia sa pagtabang sa iba na magtogdok nin mga Kingdom Hall, si Bill nagkomento: “An paaging ini nin pagtabang sa masasabing mas sadit na mga kongregasyon nagtatao sa sako nin dakulang personal na satispaksion. Naoogma ako na gamiton an abilidad asin kakayahan ko para sa kapakinabangan nin iba.” Taano ta pinili ni Emma na idusay an saiyang kosog asin mga abilidad sa pagtabang sa iba na manodan an katotoohan sa Kasuratan? “Dai ko maimahinar na iba an ginigibo ko. Mantang hoben pa asin kayang gibohon iyan, gusto ko sanang gibohon an pinakamakakaya ko tanganing paogmahon si Jehova asin tabangan an iba. An pagsakripisyo nin nagkapirang materyal na bentaha bakong mahalaga. Ginigibo ko sana an maninigo kong gibohon huli sa ginibo ni Jehova para sa sako.”

Si Maurice asin Betty dai pinagbabasolan an dai pagpasiramsiram sa buhay, pakatapos nin dakol na taon nin pagpapagal sa pag-asikaso asin pagsustento sa saindang pamilya. Ngonyan na sinda retirado na, boot nindang padagos na gumibo nin sarong bagay na may pakinabang asin kahulogan sa saindang buhay. “Habo ming umontok na sana asin magpahorohayahay ngonyan,” an sabi ninda. “An pagtabang sa iba na makanood manongod ki Jehova sa ibang nasyon nagtatao sa samo nin oportunidad na magpadagos sa paggibo nin sarong bagay na may katuyohan.”

Determinado daw kamo na magin mapagsakripisyo? Bako ining pasil. Pirmeng nagkakalaban an satong bakong sangkap na mga mawot bilang tawo asin an satong odok na pagmawot na paogmahon an Dios. (Roma 7:21-23) Alagad iyan sarong laban na puedeng ganahon kun totogotan ta si Jehova na giyahan an satong buhay. (Galacia 5:16, 17) Seguradong gigirumdomon nia an satong pagsasakripisyo sa paglilingkod sa saiya asin bebendisyonan nia kita nin abunda. Tunay nanggad, ‘bubukasan ni Jehova Dios an mga gaha kan kalangitan asin uulaan nanggad kita nin bendisyon sagkod na mayo na nin kulang.’—Malaquias 3:10; Hebreo 6:10.

[Ritrato sa pahina 23]

Si Jesus igwa nin mapagsakripisyong espiritu. Kamo iyo man?

[Mga Ritrato sa pahina 24]

Ikinonsentrar ni Pablo an saiyang mga paghihingoa sa paghuhulit kan Kahadean