Siisay an Ooyonan ni Jehova?

“Padagos kamong maghingoa na makamtan an saindong kaligtasan . . . ; huli ta an Dios an saro na, huli sa saiyang marahay na boot, naghihiro dian sa saindo tanganing kamo bumoot asin humiro.”—FILIPOS 2:12, 13.

 1, 2. Sa anong situwasyon na si Jesus nag-ako nin kapahayagan kan pag-oyon nin Dios, asin taano ta maninigo kitang magkainteres digdi?

IDTO panahon nin pagkaliwat sa kasaysayan. Si Juan Bautista kaidto naghuhulit kan mensahe nin Dios asin binabautismohan sa tubig an mga nagsosolsol. Dangan nagdolok an sarong tawo na aram ni Juan na matanos; sia si Jesus. Mayo sia nin kasalan na kaipuhan niang pagsolsolan, pero nagpapabautismo sia tanganing “otobon an gabos na matanos.”—Mateo 3:1-15.

² Pakatapos na si Juan mapakumbabang kumuyog, asin si Jesus nagbutwa sa tubig, “an kalangitan nagkaburukasan, asin naheling nia an espiritu nin Dios na nag-iibaba siring sa salampati.” Labi pa kaiyan, “may nadangog man na tingog sa langit na nagsasabi: ‘Ini an sakong Aki, an namomotan, na sakong inooyonan.’”(Mateo 3:16, 17; Marcos 1:11) Kanigoan na kapahayagan! Kita gabos naoogmang paoyonan an saro na satong iginagalang. (Gibo 6:3-6; 16:1, 2; Filipos 2:19-22; Mateo 25:21) Kun siring, imahinara kun ano an mamamatean nindo kun ipaisi kan makakamhan sa gabos na Dios, Inooyonan ta ka!’

 3. Ano an maninigong tawan niato nin atension kun dapit sa pag-oyon nin Dios?

³ Puwede daw na an sarong tawo oyonan nin Dios ngonyan? Halimbawa, an sarong tawo na “mayo nin paglaom asin mayo nin Dios sa kinaban,” na “suhay sa buhay na gikan sa Dios.” (Efeso 2:12; 4:18) Puwede daw siang humale sa kamugtakan na iyan pasiring sa mapalad na kamugtakan na inooyonan ni Jehova? Kun iyo, paano? Helingon niato.

Ano an Boot Sabihon kan Saiyang mga Tataramon?

 4. (a) Ano an kahulogan kan termino sa Griego para sa “inooyonan” sa kapahayagan nin Dios? (b) Taano ta may espesyal na interes kita sa paggamit sa kasong ini?

⁴ An rekord kan Ebanghelyo sa mga tataramon. nin Dios na “sakong inooyonan [si Jesus]” naggagamit kan berbong Griego na eu·do·keʹo. (Mateo 3:17; Marcos 1:11; Lucas 3:22) Iyan nangangahulogan “maogma, ibilang na may pabor, mawilihan,” asin an pormang nombre kaiyan may kahulogan na “marahay na boot, pagkaogma, pabor, kabotan, kamawotan.” An eu·do·keʹo bakong limitado sana sa pag-oyon nin Dios. Halimbawa, an mga Kristiano sa Macedonia “naogma” na hirasan sa pinansial an iba. (Roma 10:1; 15:26; 2 Corinto 5:8; 1 Tesalonica 2:8; 3:1) Pero, an pag-oyon na inako ni Jesus ipinahayag nin Dios, bakong nin mga tawo. An terminong ini ginamit sana mapadapit ki Jesus pakalihis na sia mabautismohan. (Mateo 17:5; 2 Pedro 1:17) Interesante nanggad, an Lucas 2:52 naggagamit nin laen na termino—khaʹris—sa pagtaram manongod ki Jesus bilang barobatang dai pa nabautismohan na ‘nakapaoyon’ sa Dios asin sa mga tawo.

 5. (a) Paano maririsa na an mga tawong bakong sangkap puwedeng oyonan nin Dios? (b) Sairisay an “mga tawo na igwa kan marahay na boot”?

⁵ Posible man daw para sa bakong sangkap na mga tawong arog niato na kamtan an pag-oyon nin Dios? Makaoogma, an simbag iyo. Kan mamundag si Jesus, an mga anghel nagsabi: “Kamurawayan sa Dios sa kaitaasan, asin sa daga katoninongan sa mga tawo na igwa kan marahay na boot [eu·do·kiʹas].” (Lucas 2:14) Sa literal na Griego, an mga anghel nag-aawit manongod sa maabot na bendisyon sa “mga tawo na ibinibilang na marahay” o “mga tawo na inooyonan nin Dios.”a Si Propesor Hans Bietenhard nagsurat manongod sa paggamit na ini sa en an·throʹpois eu·do·kiʹas “An frase nanonongod sa mga tawo na ikinaoogma nin Dios . . . Kun siring, an pinag-oolayan niato digdi bakong marahay na boot nin mga tawo . . . An pinag-oolayan niato iyo an soberaniya asin maheherakon na boot nin Dios, na nagsasadiring pumili nin banwaan para sa kaligtasan.” Kaya, arog kan haloy nang ipinaliwanag nin mga Saksi ni Jehova, an Lucas 2:14 nagpaparisa na paagi sa pagdusay asin bautismo, posible para sa mga tawong bakong sangkap na magin mga tawo na igwa kan marahay na boot, mga tawo na inooyonan nin Dios!’b

 6. Ano an kaipuhan pa niatong manodan manongod sa pag-oyon nin Dios?

⁶ Minsan siring, tibaad marealisar nindo kun gurano an pagkakalaen kan pagigin ‘mga kaiwal nin Dios na an isip nasa mga gibong maraot’ asin kan pagigin inooyonan bilang mga kaasosyar kan satong matanos asin madonong na Dios. (Colosas 1:21; Salmo 15:1-5) Kun siring, minsan ngani kamo naoogma na madangog na an mga tawo puwedeng oyonan, tibaad boot nindong maaraman kun ano an napapalabot. Dakula an manonodan niato manongod kaini sa nakaaging mga gibo nin Dios.

Inako Nia an mga Tawo

 7. An Exodo 12:38 nagpaparisa nin ano kun dapit sa kaisipan nin Dios?

⁷ Sa laog nin dakol na siglo bago an paisi sa Lucas 2:14, inako ni Jehova an mga tawo na dumolok asin sumamba sa saiya. Siyempre, an esklusibong pinakikiaraman kaidto nin Dios iyo an nasyon nin Israel, na dusay sa saiya. (Exodo 19:5-8; 31:16, 17) Alagad, girumdomon na kan an Israel lumuwas sa pagkaoripon sa Egipto, “tuminukad man na kaiba ninda an sarong dakulang kadaklan.” (Exodo 12:38) An mga bakong Israelitang ini na tibaad may relasyon sa banwaan nin Dios asin nakaheling sa mga damat sa Egipto nagdesisyon ngonyan na umiba sa Israel. An iba posibleng nagin lubos na proselito.

 8. Anong duwang klase nin dayo an nag-istar sa Israel, asin taano ta may pagkakalaen an pagtrato sa sainda nin mga Israelitas?

⁸ Minidbid kan tipan nin Pagboot an situwasyon nin mga bakong Israelita may relasyon sa Dios asin sa saiyang banwaan. An ibang dayo mga nakikiistar na nag-iistar sana sa daga nin Israel, na duman kaipuhan nindang kuyogon an pundamental na mga ley, arog baga kan mga tumang sa paggadan asin kan naghahagad na otobon an Sabbath. (Nehemias 13:16-21) Imbes na akoon na tugang an mga nakikiistar na ini, an sarong Israelita nag-iingat kun nakikipag-olay o nakikipagtransaksion sa sainda, ta bako pa sindang kabtang kan nasyon nin Dios. Halimbawa, mantang an Israelita dai puwedeng bumakal asin kumakan kan dai pinadugong karne nin hayop na basta na sana nagadan, iyan puwedeng gibohon nin mga nakikiistar na bakong proselito. (Deuteronomio 14:21; Ezequiel 4:14) Pag-abot nin panahon an iba sa mga dayong nakikiistar na ini tibaad umarog sa ibang dayo na nagin tinuring mga proselito. Sa panahon sanang iyan na sinda tinatratong tugang sa tunay na pagsamba, na may paninimbagan na mag-otob sa bilog na Pagboot. (Levitico 16:29; 17:10; 19:33, 34; 24:22) Si Rut, na Moabita, asin si Naaman, na daoton na taga-Siria, mga bakong Israelita na inako nin Dios.—Mateo 1:5; Lucas 4:27.

 9. Paano pinatunayan ni Salomon an kaisipan nin Dios manongod sa mga tagaibang banwaan?

⁹ Kan kaaldawan ni Hadeng Salomon, maheheling man niato an pag-ako nin Dios sa mga bakong Israelita. Sa pag-inagurar sa templo, si Salomon namibi: “Sa tagaibang banwaan, na bakong kabtang kan saimong banwaan na Israel asin naghale sa harayong daga nin huli sa saimong ngaran . . . asin mamibi paatubang sa harong na ini, logod ika maghinanyog gikan sa kalangitan, tanganing an gabos na banwaan kan daga makamidbid sa saimong ngaran tanganing matakot sa saimo arog kan saimong banwaan na Israel.” ( 1 Hade 8:41-43) Iyo, inako ni Jehova an pamibi nin sinserong mga tagaibang banwaan na naghahanap sa saiya. Tibaad an mga ini man makanood sa saiyang mga pagboot, magpaturi, asin magin inaakong mga miembro kan saiyang mapalad na banwaan.

10. Paano posibleng trinatar kan mga Judio an kapon na Etiope, asin taano ta nakinabang sia sa pagtuturi?

¹⁰ An sarong tawo na guminibo kaini sa nahuhuring mga panahon iyo an tesurero ni Reyna Candace sa harayong Etiopia. Posible na kan enot niang mabaretaan an mga Judio asin an saindang pagsamba, an saiyang pamumuhay o relihiyosong mga gawe dai inaako ni Jehova. Kaya an mga Judio kaipuhan na magpaheling nin kadikit na pagpapasensia mantang an tagaibang banwaan na ini sa tahaw ninda nag-aadal sa Pagboot tanganing maaraman an mga kahagadan nin Dios. Malinaw na sia nag-oswag asin ginibo an kinakaipuhan na mga pagbakle tanganing makuwalipikar sa pagturi. An Gibo 8:27 nagsasabi sato na “sia nagduman sa Jerusalem sa pagsamba.” (Exodo 12:48, 49 ) Ini nagpaparisa na kaidto sia lubos nang proselito. Kaya nasa kamugtakan sia na akoon an Mesiyas asin magin saiyang bautisadong disipulo, sa siring nakaooyon sa progresibong kabotan nin Dios.

An mga Daing Pagtubod Asin an Kristianong Kongregasyon

11, 12. (a) Ano an nangyaring orog pang pagkaliwat kan magpabautismo an Etiope? (b) Paano ini kaoyon kan Filipos 2:12, 13?

¹¹ Sinabihan ni Jesus an saiyang mga parasunod: “Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.” (Mateo 28:19, 20) An proselitong Etiope na nasambitan pa sana may kaaraman manongod ki Jehova asin sa banal na espiritu. Kaya kan tabangan sia ni Felipe na masabotan asin akoon si Jesus bilang an mesiyanikong Aki nin Dios, puwede na siang bautismohan. Sa siring sia magigin inooyonan na miembro kan banwaan ni Jehova na nagsusunod ki Cristo. Natural, maninimbag sia sa Dios, na obligadong “otobon an gabos na bagay na ipinagboot” sa mga Kristiano. Alagad kaiba kan paninimbag na ini an makangangalas na paglaom: kaligtasan!

¹² Pakalihis kaini, si Pablo nagsurat na an gabos na Kristiano kaipuhan na ‘padagos na maghingoa na makamtan an saindang kaligtasan na may takot asin pagtakig.’ Pero, puwedeng gibohon iyan, “huli ta an Dios an saro na, Huli sa saiyang marahay na boot [eu·do·kiʹas], naghihiro dian sa saindo tanganing kamo bumoot asin humiro.”—Filipos 2:12, 13.

13. Paano posibleng trinato nin mga Kristiano an mga bakong arog kalistong magpabautismo kan kapon na Etiope?

¹³ Bakong gabos na nakakaasosyar sa tunay na mga Kristiano arog kan Etiope kaandam asin kakuwalipikado na marikas na pumasiring sa pagpabautismo. An iba, huling bakong Judio o proselito, kakadikit o mayo ngani nin kaaraman manongod ki Jehova asin sa saiyang mga dalan; ni ginigiyahan man kan saiyang mga pamantayan an saindang moral. Paano sinda tatrataron? An mga Kristiano dapat na umarog sa halimbawa ni Jesus. Tunay na sia dai nagsadol o nagkonsinte sa kasalan. (Juan 5:14) Pero, sia mapasensia sa mga parakasala na minarani sa saiya asin boot na ioyon an saindang gawe sa Dios.—Lucas 15:1-7.

14, 15. Apuwera sa linahidan na mga Kristiano, anong klaseng mga tawo an nag-atender sa mga pagtiripon sa Corinto, asin paano daw sinda nagkalaenlaen kun manongod sa espirituwal na pag-oswag?

¹⁴ Na an mga Kristiano mapasensia sa mga nag-aadal manongod sa Dios malinaw sa mga komento ni Pablo manongod sa mga pagtiripon sa Corinto. Sa pagpaliwanag manongod sa paggamit nin milagrosong mga balaog kan espiritu na sa primero iyo an nagin tanda na an Kristianismo igwa kan bendisyon nin Dios, nasambitan ni Pablo an “mga nagtutubod” asin “mga dai nagtutubod.” ( 1 Corinto 14:22) An “mga nagtutubod” iyo an mga nag-ako ki Cristo asin bautisado na. (Gibo 8:13; 16:31-34) “An kadaklan sa mga taga-Corinto na nagpakadangog nagpoon na magtubod asin mabautismohan.”—Gibo 18:8.

¹⁵ Sono sa 1 Corinto 14:24, an mga “dai nin pagtubod o tawong ordinaryo” nag-atender man sa mga pagtiripon sa Corinto asin inako duman.c Posible na nagkakalaenlaen sinda kun dapit sa saindang pag-oswag sa pag-adal asin pag-aplikar kan Tataramon nin Dios. An iba tibaad naggigibo pa nin kasalan. An iba tibaad may kadikit nang pagtubod, nagbakle na sa saindang buhay, asin, bago pa man bautismohan, nagpoon nang isabi sa iba an saindang nanodan.

16. Paano makikinabang an siring na mga tawo sa pagigin kaiba nin mga Kristiano sa mga pagtiripon kan kongregasyon?

¹⁶ Siyempre, mayo sa mga dai pa nabautismohan na iyan an “dian sa Kagurangnan.” (1 Corinto 7:39) Kun an nakaagi nindang pamumuhay may kaibang magagabat na moral asin espirituwal na kasalan, natural sana na tibaad nahaloyhaloy sinda bago nakaoyon sa mga pamantayan nin Dios. Mientras tanto, basta dai ninda hinihingoang raoton an pagtubod asin kalinigan kan kongregasyon, sinda inaako. An saindang naheheling asin nadadangog sa mga pagtiripon puwedeng ‘makasagwe sainda’ mantang ‘nahahayag an mga hilom kan saindang puso.’—1 Corinto 14:23-25; 2 Corinto 6:14.

Pagdadanay na Inooyonan nin Dios Para sa Ikaliligtas

17. An Lucas 2:14 nagkaigwa nin anong kaotoban kan enot na siglo?

¹⁷ Paagi sa paghuhulit sa publiko kan bautisadong mga Kristiano kan enot na siglo, rinibo an nakadangog kan maogmang bareta. Nagtubod sinda sa saindang nadangog, pinagsolsolan an saindang nakaaging gawe, asin nabautismohan, na “nagpapahayag sa publiko para sa kaligtasan.” (Roma 10:10-15; Gibo 2:41-44; 5:14; Colosas 1:23) Daing duwa-duwa na an mga bautisado kaidto inooyonan ni Jehova, ta linahidan nia sinda kan banal na espiritu, na inaampon sinda bilang espirituwal na mga aki. Si apostol Pablo nagsurat: “Itinalaga nia kita sa pagpaniaki paagi ki Jesu-Cristo bilang mga aki nia, siring sa pinagmarahay [eu·do·kiʹas] kan saiyang kabotan.” (Efeso 1:5) Kaya, sa laog kan siglong idto nagpoon na maotob an ihinula kan mga anghel kan mamundag si Jesus: “Katoninongan sa mga tawo na igwa kan marahay na boot [o, mga tawo na inooyonan nin Dios ].”—Lucas 2:14.

18. Taano ta dai puwedeng basang-basangon nin linahidan na mga Kristiano an saindang inooyonan na kamugtakan sa atubangan nin Dios?

¹⁸ Tanganing mapagdanay an katoninongan na iyan, kaipuhan na an “mga tawo na igwa kan marahay na boot” na idto “padagos [na] maghingoa na makamtan an [saindang] kaligtasan na may takot asin pagtakig.” (Filipos 2:12) Idto bakong pasil, ta sinda bako pang sangkap. Mapapaatubang sinda sa mga sugot asin impluwensia na gumibo nin sala. Kun padadara sinda sa pagkakasala, mawawara sa sainda an pag-oyon nin Dios. Kaya, mamomoton na itinao ni Jehova an espirituwal na mga pastor na magtatabang asin magpoprotehir sa mga kongregasyon.—1 Pedro 5:2, 3.

19, 20. Anong mga probisyon an ginibo nin Dios tanganing an bautisadong mga Kristiano makapagpadagos na inooyonan na mga lingkod nia?

¹⁹ Isasapuso kan kamagurangan na iyan sa kongregasyon an hatol ni Pablo: “Minsan kun an sarong tawo may nagibong kasalan bago nia iyan maaraman, kamo na igwang espirituwal na mga kuwalipikasyon pagmaigotan nindo na ibangon an tawong iyan sa espiritu nin kahoyoan, mantang binabantayan man nindo an saindong sadiri, ta tibaad kamo masugotan man.” (Galacia 6:1) Arog kan masasabotan niato, an tawo na guminibo na kan importanteng tangga na pagpabautismo mas dakula an paninimbagan, arog nin sarong dayo na nagin tinuring proselito sa Israel. Minsan siring, kun magkasala an sarong bautisadong Kristiano, makakanompong sia nin mamomoton na tabang sa laog kan kongregasyon.

²⁰ An grupo nin kamagurangan sa kongregasyon puwedeng mag-opresir nin tabang sa saro na naholog sa magabat na pagkakasala. Si Judas nagsurat: “Padagos kamong magpaheling nin pagkaherak sa nagkapira na igwa nin mga pagduwaduwa; iligtas nindo sinda paagi sa pag-agaw sa sainda hale sa kalayo. Alagad padagos na magpaheling nin pagkaherak sa iba, na ginigibo iyan na may takot, mantang ikinaoongis nindo minsan an panlaog na gubing na namantsahan kan laman.” (Judas 22, 23) An bautisadong miembro kan kongregasyon na natabangan sa paaging ini puwedeng padagos na magkamit kan pag-oyon ni Jehova asin kan katoninongan na sinabi kan mga anghel kaidtong mamundag si Jesus.

21, 22. Ano an ibubunga kun an saro magin parakasalang habong magsolsol, asin ano an magigin reaksion nin maimbod na mga miembro kan kongregasyon?

²¹ Minsan ngani pambihira sana, may mga pangyayari na an nagkasala habong magsolsol. Kun siring kaipuhan siang itiwalag kan kamagurangan tanganing maprotehiran an malinig na kongregasyon sa pagkaolakit. Iyan nangyari sa sarong bautisadong tawo sa Corinto na nagpadagos sa sarong inmoral na relasyon. Hinatolan ni Pablo an kongregasyon: “Umontok sa pakikiiba sa mga parapakisaro, bako man na an boot sabihon iyo an mga parapakisaro kan kinaban na ini o an mga paslo asin mga parakikil o mga parasamba sa ladawan. Ta kun iyo, kaipuhan kamong lumuwas sa kinaban. Alagad ngonyan sinusuratan ko kamo na umontok sa pakikiiba sa siisay man na inaapod na tugang na nagin parapakisaro o paslo o parasamba sa ladawan o paramuda o paraburat o parakikil, na dai ngani makikakan sa siring na tawo.”—1 Corinto 5:9-11.

²² Mantang an tawong taga-Corinto guminibo na kan importanteng tangga na pagpabautismo, na nagin nang inooyonan nin Dios asin miembro kan kongregasyon, an pagkatiwalag nia seryosong bagay. Ipinarisa ni Pablo na an mga Kristiano dai dapat na makiiba sa saiya, ta isinikwal nia an saiyang inooyonan na kamugtakan sa atubangan nin Dios. (Ikomparar an 2 Juan 10, 11.) Si Pedro nagsurat manongod sa mga itiniwalag na iyan: “Marahay pa sainda na dai kutana nakaaram nin tama kan dalan nin katanosan kisa pakaaram kaiyan nin tama tumalikod sa banal na pagboot na itinao sa sainda. Nangyari sa sainda an kasabihan kan totoong talinhaga: ‘An ayam minabalik sa sadiring suka.’”—2 Pedro 2:21, 22.

23. Kan enot na siglo, ano an pankagabsan na situwasyon sa tahaw nin mga Kristiano kun dapit sa pagpapadanay sa pag-oyon nin Dios?

²³ Malinaw na dai na ikabibilang ni Jehova an siring na mga tawo na inooyonan, huli ta sinda itiniwalag huli sa pagigin mga parakasalang dai nin pagsolsol. (Hebreo 10:38; ikomparar an 1 Corinto 10:5.) Malinaw na kadikit sana an natiwalag. An kadaklan, na nagkamit kan “dai na kutana maninigong kabootan asin katoninongan hale sa Dios” asin ‘pinaniaki siring sa pinagmarahay kan saiyang kabotan’ nagdanay na maimbod.—Efeso 1:2, 5, 8-10.

24. Ano pang kabtang kan temang ini an maninigo niatong tawan nin atension?

²⁴ Sa pundamental arog man kaiyan sa satong panahon. Alagad, pag-olayan niato kun paano an mga “dai nin pagtubod o tawong ordinaryo” matatabangan na magin inooyonan nin Dios ngonyan asin kun ano an magigibo tanganing matabangan sinda kun halimbawa magkasala sinda. An minasunod na artikulo magpapaliwanag sa mga bagay na ini.

[Mga Nota sa Ibaba]

Nagigirumdoman daw Nindo?

◻ Sono sa Kasuratan, poon noarin asin sa anong paagi puwedeng oyonan nin Dios an mga tawo?

◻ Ano an punto-de-vista nin Dios sa mga tagaibang banwaan na nasa tahaw kan saiyang banwaan, alagad taano ta kaipuhan na timbangan nin mga Israelitas nin pagpapasensia an pagmamaan?

◻ Ano an puwede niatong ikonklusyon sa bagay na an mga “dai nin pagtubod” nag-atender sa Kristianong mga pagtiripon sa Corinto?

◻ Paano guminibo nin probisyon an Dios tanganing tabangan an bautisadong mga Kristiano na makapagdanay na inooyonan na mga lingkod nia?