“Ipaheling Nindo na Kamo Nagpapasalamat”
“Togotan nindo na an katoninongan kan Cristo mamogol sa saindong puso . . . Asin ipaheling nindo na kamo nagpapasalamat.”—COLOSAS 3:15.
1. Tumang sa ano dapat na magmaan an mga Kristiano sa ingratong kinaban na ini?
AN MARIBOK na ika-20 siglong ini nakaabot na sa punto na an dakol lingaw na kun paanong magpapasalamat. An may pag-apresyar na mga terminong “tabi” asin “mabalos” orog na nagigin bihirang madangog sa kada taon na minaagi. An pagigin ingrato nagin nanggad kabtang kan “doros,” an paslong espiritu na nagdodominar sa mga tawo kan kinaban na ini. (Efeso 2:1, 2) Minsan ngani an mga Kristiano “bakong kabtang kan kinaban,” sinda kaipuhan na mag-istar dian sagkod na yaon pa an presenteng palakaw nin mga bagay. (Juan 17:11, 16) Kun siring, kaipuhan sindang magmaan na dai maolakitan kan ingratong espiritung ini, na pinaluluya an saindang pagigin mapagpasalamat.
2. (a) Ano an pirang paagi na ikapahahayag kan mga lingkod ni Jehova an pagpasalamat sa saiya? (b) Ano an kaipuhan apuwera sa berbal na mga pagpapahayag nin pagpasalamat?
2 An pag-apresyar sa karahayan nin Dios puwedeng ipahayag nin parate sa pakikipag-olay sa mga kapagtubod. An kadaklan na nagdusay na Kristiano posibleng nagpapasalamat sa saindang langitnon na Ama, si Jehova, para sa saiyang karahayan pirang beses kada aldaw, na ginigibo iyan sa personal na pamibi. An pagpasalamat ipinahahayag man sa mga pamibi sa kongregasyon asin sa pagkanta kan mga awit na pan-Kahadean sa Kristianong pagtiripon. Siyempre, pasil sanang ipahayag an pagpasalamat sa tataramon. Alagad, sinadol ni apostol Pablo an saiyang mga tugang sa Colosas na bako sanang magsabi na sinda nagpapasalamat kundi ipaheling o idemonstrar an pagpasalamat sa saindang pan-aroaldaw na buhay. Sia nagsurat: “Togotan nindo na an katoninongan kan Cristo mamogol sa saindong puso, huli ta, sa katotoohan, kamo inapod dian sa sarong hawak. Asin ipaheling nindo na kamo nagpapasalamat.”—Colosas 3:15.
Abundang Dahelan na Magpasalamat
3. Taano ta kita gabos maninigong magpasalamat sa Dios?
3 An gabos na nabubuhay may abundang dahelan na magpasalamat. An pangenot na dahelan iyo an pagkaigwa mismo nin buhay, huli ta an gabos na nasa sato o tibaad pinaplano niato biglang mawawaran nin halaga kun kita mawaran nin buhay. An salmistang si David sinadol an gabos na girumdomon na “sa saimo [ki Jehova Dios] an gikanan nin buhay.” (Salmo 36:9) Asin si apostol Pablo ipinagirumdom sa mga taga-Atenas an iyo man sanang daing sagkod na katotoohan na iyan kan sia nagpapahayag sa Areopago. (Gibo 17:28) Iyo, an pagigin sanang buhay saro nang abundang dahelan na magpasalamat. Asin an satong pag-apresyar minararom kun gigirumdomon niato an mga abilidad na itinao sato nin Dios—an pagnamit, pakamate, pakaparong, pakaheling, asin pakadangog—tanganing maogma kita sa buhay asin sa mga kagayonan sa mga linalang na nasa palibot niato.
4. Ano an maprotehir sato na dai pagbasangbasangon an mga bendisyon sa buhay?
4 Pero an dakol dai na pinagmamangno an mararahay na bagay na ini. Kun nawawaran sana nin sarong abilidad, arog baga kan pakaheling o pakadangog, na an dakol nakarerealisar sa mga bendisyon na dai ninda naapresyar kan sinda may marahay na salud. An nagdusay na mga Kristiano kaipuhan na perming magmaan na dai maholog sa kaparehong kadaihan nin pag-apresyar. Kaipuhan sindang maghingoa na papagdanayon an mapagpasalamat na kaisipan na kapareho kan ipinaheling kan salmista na nagsabi: “Dakol an mga bagay na saimo mismong ginibo, O Jehova na sakong Dios, minsan an saimong makangangalas na mga ginibo asin an saimong mga pagmakolog samo; mayo nin ikababaing saimo. Kun ako magmawot na isaysay asin itaram iyan, iyan dai ko na kayang isaysay huli sa kadakolan.”—Salmo 40:5.
5. Sa ibong kan dugang na mga bendisyon sa Israel gikan ki Jehova, ano an makasosopog na ginibo ninda?
5 An ika-106 na Salmo nagtatao nin poetikong sumaryo kan makakamhan na mga ginibo ni Jehova para sa saiyang banwaan, an Israel. An mga ginibo sa sainda nin Dios dugang pa sa karahayan asin normal na mga bendisyon nin buhay na itinatao nia sa pankagabsan na tawo. Alagad, sa ibong kan mga bentahang ini, idinoon kan salmista na an mga Israelitas dai nagpadagos na magpaheling nin pag-apresyar sa pambihirang mga bendisyon na ini. An bersikulo 13 nagsasabi: “Madali nindang nalingawan an saiyang mga gibo; dai ninda hinalat an saiyang hatol.” Bako, bakong an pag-agi nin panahon an luway-luway na nakapaluya sa saindang pagpasalamat, kaya pakalihis nin dakol na dekada dai na ninda nagigirumdoman an ginibo nin Dios para sa sainda. Imbes, sinda madaling nakalingaw—sa laog sana nin pirang semana poon kan pambihirang mga milagro ni Jehova para sa sainda sa Dagat na Pula. (Exodo 16:1-3) Makamomondo, an mga pangyayari sa ngapit nagpaheling na an pagkaingrato nagin nang ugale kan saindang buhay.
Kun Paano Ipaheheling an Pagpasalamat
6. Taano ta bakong masakit an kahagadan sa tinagba?
6 Detalyado, isinabi ni Jehova an tolong espisipikong paagi na an mga Israelitas magpapaheling nin tunay na pag-apresyar sa saiyang karahayan. An saro iyo an pag-otob sa kahagadan sa tinagba paagi sa pagtao ki Jehova kan ikasampulong kabtang kan gabos na inani asin kan mga hayop. (Levitico 27:30-32) Ini dai magigin depisil, huli ta an Dios iyo an responsable sa aldaw, sa matabang daga, sa oran, asin sa milagro nin pagtubo. Kaya, an pagtao nin ikasampulong kabtang sa mga saserdote sa santuaryo ni Jehova praktikal na kapahayagan nin pagpasalamat ki Jehova mismo.
7. (a) Ano an dakulang pagkakalaen kan pagtao nin tinagba asin pag-ambag ki Jehova? (b) Ano an itinogot kaini na ipahayag kan mga Israelitas manongod sa sainda man sana?
7 An saro pang kahagadan iyo an pag-ambag sa Dios na dian an kantidad depende sa kamugtakan kan puso kan lambang Israelita. Minsan ngani mayo nin itinalaan na kantidad, an ambag kaipuhan na enot na bunga—an enot na trigo, arak, asin lino kan mga karnero. (Bilang 15:17-21; Deuteronomio 18:4) Dugang pa, isinabi ni Jehova na an saiyang banwaan ‘dai maninigong magtao na may panganogon’ asin kaipuhan na itao “an pinakaprimera sa enot na hinog na bunga.” (Exodo 22:29; 23:19) Ini nagtao sa mga Israelitas nin oportunidad na ipaheling an saindang pagpasalamat ki Jehova sa naheheling na paagi. Ikapaheheling ninda an rarom kan saindang pagpasalamat sa kantidad kan mga ambag. Sinda daw maambag nin saro sanang pongot nin ubas? O an matinao daw na puso mapahiro sainda na magtao nin sarong basket? Sa siring, an kada tawo o pamilya makapagpapaheling nin pagpasalamat na dai pinipirit.
8. (a) Anong duwang pakinabang an itinao kan areglo sa paggutol? (b) Paano an pagkamatinao asin pagpasalamat ikapaheheling kan gabos na napapalabot sa areglo nin paggutol?
8 An ikatolong espisipikong paagi na ikapaheling an pagpasalamat may koneksion sa probisyon nin Dios na paggutol. Sa panahon nin pag-ani, may mga kabtang na dapat na tadaon na dai anihon para sa mga dukha. Ini bako sanang nagtokdo nin pagkaherak asin konsiderasyon sa mga dukha kundi iyan nakagarantiya man na sinda dai mabuhay sa nakadedemoralisar na mga limos, na daing hinahagad na paghihingoa sa parte ninda. (Levitico 19:9, 10) Dai isinabi kun gurano an maninigong itada para sa mga dukha. Alagad kun an mga paraomang Israelita magpaheling nin espiritu nin pagkamatinao paagi sa pagtada nin dakol sa gilid sa palibot kan saindang oma asin sa siring nagtatao nin marahay na boot sa mga dukha, saindang mapamumuraway an Dios. (Talinhaga 14:31) Nasa sainda an pagdesisyon kun baga hayakpit o halakbang an itatada na dai inani. Alagad an Dios nagtao nin mapuwersang pagboot manongod sa pagkamatinao paagi sa pagsabi na an ano man na opong na nalingawan sa oma asin an ano man na bunga na natada sa kahoy o ubas maninigong iwalat para sa mga paragutol. (Deuteronomio 24:19-22) An mga paragutol naman makapagpapaheling kan saindang pagpasalamat ki Jehova para sa probisyon na ini paagi sa pag-ambag kan ikasampulong kabtang kan saindang ginutol sa lugar nin pagsamba sa saiya.
Pagkamatinao nin Puso
9. Taano an mga nagpapaheling nin kapasloan ta sa katotoohan dinadanyaran an sadiri?
9 Kun an mga Israelitas nagtatao nin dakol na ambag, napapasa saindang harong an bendisyon ni Jehova. (Ikomparar an Ezequiel 44:30; Malaquias 3:10) Alagad sa ibong nin abundang mga pag-ani, parate sindang dai nakapag-aambag. Dangan ginagamit nin Dios an mga pagirumdom paagi sa mga hade o propeta tanganing pukawon liwat an saindang pagpasalamat. An totoo, an paslong mga Israelitas an nawawaran, huli ta dai puwedeng bendisyonan ni Jehova an mga dai nag-aambag para sa saiyang pagsamba o sa mga dukha.
10. (a) Ano an maogmang resulta kan mga pagirumdom ni Hadeng Ezequias manongod sa pagpasalamat? (b) Nagpadagos daw an mga kamugtakan na ini?
10 Sarong beses, an mga pagirumdom ni Hadeng Ezequias nagbunga nin maogmang 14 aldaw na pagselebrar sa Jerusalem. An banwaan buminagsik liwat sa espirituwal. Enot, linaglag ninda an gabos na kasangkapan sa pagsamba sa ladawan dangan “nagtao nin tambak-tambak . . . Kan si Ezequias asin an mga prinsipe mag-arabot asin maheling an mga tinambak, inomaw ninda si Jehova asin an saiyang banwaan na Israel.” (2 Cronica 30:1, 21-23; 31:1, 6-8) Alagad, makamomondo, pakalihis nin mga pagkabuhay giraray na iyan sa panapanahon, an banwaan balik na naman sa dai pagpasalamat. Sa katapustapusi, naubos an pasensia nin Dios, asin itinogot nia na an saiyang banwaan darahon na bihag sa Babilonya. An saindang siudad asin magayon na templo linaglag. (2 Cronica 36:17-21) Kan huri, pagkabalik ninda, an mga kamugtakan nagin grabe na naman kaseryoso kaya ibinaing ni Jehova an kakuriputan kan mga Judio sa paghabon sa saiya, na hinahabonan sia!—Malaquias 3:8.
11. Anong prinsipyo na nanodan sa kasaysayan nin Israel an magtatao nin pakinabang sa mga Kristiano na nabubuhay sa panahon na ini?
11 Anong prinsipyo an manonodan sa paliwatliwat na kasaysayan kan mga Israelitas? Ini: Sagkod na an pagpasalamat makosog sa saindang puso, ini maogma nindang ipinaheling paagi sa pagtao nin “tambak-tambak” ki Jehova. Alagad kun an pagpasalamat nalilingawan o minaluya, an maogmang pagtao nin materyal haros napopondo. Puwede man daw na ipaheling an siring na maraot na gawe nin nagdusay na mga Kristiano ngonyan? Iyo, ta nasa sato pa an dai pagkasangkap nin tawo. Naoogma nanggad kita na ipinasurat nin Dios an mga ginibo nia sa Israel tanganing kita, na nabubuhay sa katapusan kan palakaw na ini nin mga bagay, puwedeng makanood asin makinabang dian!—Roma 15:4; 1 Corinto 10:11.
12. (a) Paano an banwaan ni Jehova ngonyan nasa kamugtakan na kapareho kan sa mga Israelitas? (b) Ano an kaipuhan na mga ihapot niato?
12 Kapareho kan mga Israelitas, an banwaan ni Jehova ngonyan igwa nin dakol na dahelan na magpasalamat. Kita man nag-aako nin mas dakol na bendisyon kisa satong mga kapwa. An totoo, mas dakol an aram niato manongod sa mga katuyohan ni Jehova kisa banwaan nin Israel. Nanodan niato kun paano gikan sa boot na iinatang nin Dios an saiyang Aki, asin aram niato an mga bendisyon na itatao kaini sa mga may banal na pag-oyon. Asin ngonyan may pribilehiyo kita na mamugtak sa sarong espirituwal na paraiso, huli ta poon kan 1919, si Jehova naglalang nin makangangalas na espirituwal na daga para sa saiyang banwaan. Iyo, an mga Saksi ni Jehova igwa nin dakol na dugang na dahelan na magpasalamat. Kaya kaipuhan niatong ihapot: Gurano kararom kan satong pagpasalamat sa Dios? Asin paano niato ikapaheheling na kita nagpapasalamat sa ika-20 siglong ini?
Mga Pagkakaagid sa Modernong Aldaw
13, 14. Minsan ngani an mga Kristiano bakong sakop kan Pagboot ni Moises, puwede daw na kumua nin pagkakaagid para sa sainda sa pagboot sa pagtao nin tinagba?
13 An mga Kristiano bakong sakop kan Pagboot ni Moises na nagsasabi kun paano ipaheheling an pagpasalamat sa Dios. (Galacia 3:24, 25) An satong “atang” nin pag-omaw ki Jehova iyo “an bunga nin mga ngabil na nagpapahayag sa publiko kan saiyang ngaran. (Hebreo 13:15) Kun siring, iyo ini an pangenot na paagi na ikapaheheling nin nagdusay na mga Kristiano an pagpasalamat sa Dios. Alagad puwedeng kumua nin interesanteng mga pagkakaagid sa mga pagboot manongod sa pagtao nin tinagba, pag-ambag, asin paggutol.
14 An pagtao nin tinagba nangahulogan nin pagtao kan espisipikong kantidad na ikasampulo—asin an saro mayo nin diretsong pumili manongod digdi. Siring man, ngonyan igwa nin espisipikong mga pagboot sa gabos na lingkod ni Jehova, na mayo man kita nin diretsong pumili. Kita kaipuhan na dayaday na magtiripontipon, asin kaipuhan na ihulit niato sa publiko an maogmang bareta kan Kahadean ni Jehova asin tabangan an iba na magin mga disipulo ni Cristo.—Hebreo 10:24, 25; Mateo 24:14; 28:19, 20.
15. Anong mga nagpaparisa nin matinaong puso sa modernong panahon an kaagid kan mga ipinarisa kan mga areglo sa pag-ambag asin paggutol sa suanoy na Israel?
15 Girumdomon man an mga areglo sa pag-ambag asin paggutol. Dai sinabi an espisipikong mga kantidad. Siring man, an Kasuratan dai nagsasabi nin espisipikong lawig nin panahon na maninigong gamiton kan kada Saksi ni Jehova sa banal na paglilingkod. An lawig nin panahon na idinudusay sa pag-adal sa Tataramon nin Dios asin paghuhulit sa iba iwinawalat sa motibasyon nin matinao, daing kapasloan na puso. Siring man, an kantidad nin materyal na ambag para sa pagpaoswag sa intereses kan Kahadean nasa dikta na kan puso kan lambang saro. An rarom nin pagpasalamat iyo an madeterminar kun baga an saro sa mga lingkod nin Dios ngonyan magtatao nin “tambak-tambak” o nin igo sanang magpanigo sa pangangaipo. (2 Cronica 31:6) Alagad, kapareho kaidto sa Israel, mientras na mas dakula an pagpapaheling nin pagpasalamat nin saro, mas dakol man an bendisyon na inaako sa Dios.
Mga Paagi na Ikapaheling an Pagpasalamat
16-18. Sa anong espisipikong mga paagi na ikapaheheling nin nagdusay na mga Kristiano na sinda nagpapasalamat?
16 An saro sa pinakadirektang paagi na ikapaheling an pagpasalamat ki Jehova iyo an paglaog sa bilog na panahon na ministeryo. An saindo daw na pagpasalamat may igong kosog tanganing an saindong puso magmawot kaiyan? Namasdan na an mapangganang payunir kaipuhan nguna an pagmawot na maglingkod dangan an tamang kamugtakan. Kun makosog an pagpasalamat, an nagpapahirong kamawotan na orog na maglingkod sa Dios nagsusulwak sa pusong may pag-apresyar. Iyan daw an pagmate nindo? Dawa kun an saindong presenteng kamugtakan dai minatogot na kamo makikabtang sa bilog na panahon na ministeryo, ini dai man kaipuhan na makasigbo sa espiritu nin pagpapayunir. Puwede kamong tumao nin bilog na pusong pagsuportar asin pagpakosog sa mga payunir.
17 Kun kamo dai makapagpapayunir ngonyan, puwede daw kamong mag-auxiliary payunir sa panapanahon? May espesyal na mga panahon kada taon na an Kristianong kongregasyon nagsasadol nin orog kisa ordinaryong paghihingoa sa paghuhulit. Halimbawa, an mga bulan sa tig-initan marahay para sa dakol, asin sa Oktubre may dugang na aktibidad may koneksion sa kampanya sa suskripsion sa magasin. Mapadapit sa mas dakol na oras sa banal na paglilingkod, totoo an prinsipyo na an pagpasalamat nagbubunga nin abundang pagtatao.
18 An saro pang espisipikong paagi na ikapaheling an pagpasalamat iyo an pagsuportar sa teokratikong programa nin pagtotogdok sa bilog na daga. Sa dakol na nasyon, may itinotogdok na bagong mga Kingdom Hall, asin an dati nang mga tiriponan pinahihiwas huli sa pagsurusuan. Itinotogdok man an bagong mga Assembly Hall, asin pinahihiwas an mga Bethel Home asin pabrika. Kanigoan kapraktikal na paagi na ikapaheling an pagpasalamat ki Jehova—an pag-ambag niato nin kosog o kuwarta sa pag-asikaso sa mga proyektong ini sa pagtotogdok!
Marahay na Halimbawa kan Dukhang Balo
19. Ano an pinakahinahangaan nindo sa dukhang balo sa templo?
19 An bantog na halimbawa sa Biblia nin pagpaheling nin pagpasalamat paagi sa bukas an palad na pagtao nin materyal iyo an sa balo na isinaysay ni Jesus. (Lucas 21:1-4) Sierto na aram nia na an saiyang duwang sinsilyo na kakadikit kan halaga daing gayo nin magigin epekto sa materyal na karahayan kan templo asin kan mga naglilingkod duman. Pero dai nia pinagheling an templo asin an mga saserdoteng naglilingkod duman patin nag-isip: ‘Mas marahay an buhay ninda asin mas magayon an edipisyo ninda kisa sakong menus na harong.’ Totoo, an templo mas maluho asin magayon. “Iyan nasasamnohan nin magagayon na gapo asin mga dolot.” (Lucas 21:5) Pero iyan dai nakaolang sa balo sa pag-ambag. Boot niang ipaheling na sia nagpapasalamat ki Jehova, bakong sa mga tawo na naglilingkod sa templo.
20. Paano daw niato ikapaheheling an marahay na kaisipan na kapareho sa ipinaheling kan dukhang balo?
20 An banwaan ni Jehova ngonyan nakakanood sa halimbawang ini. Kapareho kan dukhang balo, aram ninda na an saindang ambag, dakol man o kadikit, itinatao sa Dios. Asin napasasarig an saindang boot sa pakaaram na an daganon na organisasyon ni Jehova inorganisar sa paagi na mayo nin siisay man na puwedeng magganansia sa pinansial. An mga pasilidad kan Sosyedad itinotogdok asin ginagamit tanganing masangkapan an mahigos na mga trabahador na makua an pinakadakulang resulta sa de kuwalidad na paggibo nin mga Biblia asin mga pantabang sa Biblia saka sa paglilingkod sa intereses kan Kahadean. Ini risang gayong kabaliktaran sa iskandalosong salang paggamit sa idinonar na kuwarta na bago pa sanang mabareta may koneksion sa pirang ebanghelisador sa telebisyon.
An mga Pagirumdom sa Pagpasalamat Kapakipakinabang
21, 22. Anong epekto an maninigong pukawon sa may pag-apresyar na puso kan maboot na mga pagirumdom na ipaheling niato na kita nagpapasalamat?
21 An mga Israelitas perming nagkaipo nin pagirumdom sa saindang obligasyon ki Jehova, nangorogna manongod sa pangangaipo na magpaheling nin mapagpasalamat na espiritu. Sa kadaklan, kun ipinagigirumdom sa sainda an mga bagay na ini, an pagpasalamat napupukaw liwat sa saindang puso, asin ini nagbunga nin labi sa mga tataramon sana tanganing ipahayag an saindang mapagpasalamat na pag-apresyar. Andam sindang tumao nin “tambak-tambak” na ani ki Jehova tanganing gamiton sa saiyang harong nin pagsamba.
22 Kaya an mga kabilang logod sa presenteng “Israel nin Dios” asin sa “dakulang kadaklan” kan saindang kairiba permi man na arog kaiyan an pagmate. (Galacia 6:16; Kapahayagan 7:9) An sainda logod na mapagpasalamat na puso magpahiro sainda na tumao nin “tambak-tambak” na pag-omaw ki Jehova. Sa siring sinda talagang makapagsasabi: “Ipinaheheling mi na kami nagpapasalamat sa samong matinao asin mamomoton na Dios, si Jehova.”
Nagigirumdoman daw Nindo?
◻ Taano ta kaipuhan na perming siyasaton nin mga Kristiano kun gurano an saindang pagpasalamat?
◻ Taano an banwaan ni Jehova ta perming may dagdag na dahelan na magpasalamat?
◻ Sa anong espisipikong mga paagi na ikapaheheling kan mga lsraelitas an saindang pagpasalamat ki Jehova?
◻ Kapareho kan mga Israelitas, anong espisipikong mga bagay an magigibo niato tanganing ikapahayag an pagpasalamat?
◻ Ano an manonodan niato sa dukhang balo sa templo?
[Ritrato sa pahina 7]
An mga Israelitas nagpaheling nin pagpasalamat paagi sa pagdolot nin mga tinagba asin enot na bunga saka paagi sa pagtagama para sa mga dukha na makagutol sa saindang oma
[Ritrato sa pahina 8]
An salmista nagpasalamat ki Jehova para sa Saiyang makangangalas na mga gibo asin paggirumdom sa Saiyang banwaan
[Mga ritrato sa pahina 10]
An mga Saksi ni Jehova ngonyan nagpapaheling nin pagpasalamat paagi sa pakikikabtang sa paglilingkod sa langtad asin sa mga teokratikong proyekto sa pagtotogdok, saka paagi sa pagtao nin materyal na mga dolot