Papagdanayon si Jehova sa Atubangan Nindo

“Danay kong ibinubugtak si Jehova sa atubangan ko.”—SAL. 16:8.

 1. Ano an puedeng magin epekto sa sato kan mga pagkasaysay sa Biblia?

AN NASUSURAT na Tataramon ni Jehova igwa nin marahayon na rekord kan mga pagtratar nin Dios sa katawohan. Nasasambitan kaiyan an dakol na tawo na nagkaigwa nin kabtang sa pagkaotob kan katuyohan nin Dios. Siempre, an saindang mga tataramon asin gibo dai iniba sa Biblia bilang mga estorya sana para sa satong ikakaogma. Imbes, an siring na mga pagkasaysay puedeng orog kitang irani sa Dios.—Sant. 4:8.

2, 3. Paano niato sasaboton an mga tataramon sa Salmo 16:8?

² Kita gabos puedeng makanood nin dakol sa mga eksperyensia kan midbid na marhay na mga personahe sa Biblia—si Abraham, Sara, Moises, Rut, David, Ester, an apostol na si Pablo, asin iba pa. Minsan siring, makikinabang man kita sa mga pagkasaysay manongod sa bakong gayong prominenteng mga indibiduwal. An paghorophorop sa mga pagkasaysay sa Biblia makakatabang sa sato na gumawe kaoyon kan mga tataramon kan salmista: “Danay kong ibinubugtak si Jehova sa atubangan ko. Huli ta sia yaon sa sakong too, dai ako matatanyog.” (Sal. 16:8) Paano niato sasaboton an mga tataramon na ini?

³ Sa parate, an espada nin sarong soldados kapot kan saiyang toong kamot, na huli kaiyan an kabtang na iyan kan saiyang hawak dai napoprotehiran kan kalasag na kapot kan saiyang walang kamot. Pero, napoprotehiran sia kun an sarong katood nasa harani sa too nia mantang ini nakikipaglaban. Kun ginigirumdom niato si Jehova asin ginigibo niato an saiyang kabotan, poprotehiran nia kita. Kaya helingon niato kun paanong an pag-estudyar sa mga pagkasaysay sa Biblia makakapakosog sa satong pagtubod tanganing ‘papagdanayon niato si Jehova sa atubangan niato.’

Sinisimbag ni Jehova an Satong mga Pamibi

 4. Magtao nin halimbawa sa Kasuratan na nagpapaheling na sinisimbag nin Dios an mga pamibi.

⁴ Kun pinapagdadanay niato si Jehova sa atubangan niato, sisimbagon nia an satong mga pamibi. (Sal. 65:2; 66:19) Igwa kita nin prueba kaini sa kamugtakan kan pinakamatuang surugoon ni Abraham, na posibleng marhay na si Eliezer. Isinugo sia ni Abraham sa Mesopotamia tanganing maghanap nin sarong matatakton sa Dios na babae na magigin agom ni Isaac. Si Eliezer namibi na logod giyahan sia nin Dios asin minidbid nia na sia giniyahan nanggad kan pararaon ni Rebeca an saiyang mga kamelyo. Huling odok an pamibi ni Eliezer, nanompongan nia an saro na nagin namomotan na agom ni Isaac. (Gen. 24:12-14, 67) Totoo, sarong espesyal na misyon an ginibo kan surugoon ni Abraham. Alagad bako daw na maninigo man kitang magin arog kaiyan kapositibo na dinadangog ni Jehova an satong mga pamibi?

 5. Taano ta masasabi niato na dawa an halipot sana asin silensiong pamibi ki Jehova puedeng magin epektibo?

⁵ Kun beses, tibaad kaipuhan niatong marikas na mamibi na logod tabangan kita nin Dios. Sa sarong pangyayari, narisa ni Hadeng Artajerjes nin Persia na mamondo an saiyang kopero na si Nehemias. “Ano ining pinaghahagad mo?” an hapot kan hade. “Tolos-tolos [na si Nehemias] namibi sa Dios kan kalangitan.” Kaipuhan na halipot sana an pamibi ni Nehemias sa malinaw na silensiong pamibi na iyan. Pero, sinimbag iyan nin Dios, huling tinabangan si Nehemias kan hade na itogdok liwat an mga lanob kan Jerusalem. (Basahon an Nehemias 2:1-8.) Iyo, dawa an halipot sana asin silensiong pamibi puedeng magin epektibo.

6, 7. (a) Kun mapadapit sa pamibi, anong halimbawa an itinao ni Epafras? (b) Taano ta maninigo kitang mamibi para sa iba?

⁶ Kita sinasadol na ‘mamibi para sa lambang saro,’ minsan ngani dai niato pirmeng nakukua an ensegidang prueba na sinisimbag an siring na mga pamibi. (Sant. 5:16) Si Epafras, na “sarong maimbod na ministro kan Cristo,” odok na namibi para sa mga may relasyon sa saiya sa pagtubod. Nagsurat hale sa Roma, si Pablo nagsabi: “Si Epafras, na gikan sa tahaw nindo [mga taga Colosas], sarong oripon ni Cristo Jesus, nagpapaabot sa saindo kan saiyang mga pangungumusta, na danay na nagmamaigot para sa saindo sa saiyang mga pamibi, tangani na sa katapustapusi kamo makatindog na lubos asin may marigon na kombiksion sa gabos na kabotan nin Dios. Ako nagpapatotoo nanggad sa saiya na sia naghihingoang gayo para sa saindo asin sa mga nasa Laodicea asin sa mga nasa Hierapolis.”—Col. 1:7; 4:12, 13.

⁷ An Colosas, Laodicea, asin Hierapolis mga siudad na yaon sa Asia Minor. An mga Kristiano sa Hierapolis namumuhay kaiba kan mga parasamba sa diosang si Cybele, an mga Kristiano sa Laodicea napapalibotan nin materyalistikong mga tawo, asin an mga taga Colosas namemeligro sa pilosopiya nin tawo. (Col. 2:8) Natural sana na si Epafras, na taga Colosas, ‘nagmaigot sa saiyang pamimibi’ para sa mga nagtutubod na nasa siudad na iyan! Dai ipinapaliwanag kan Biblia kun paano sinimbag an mga pamibi ni Epafras, alagad dai sia nag-ontok sa pamimibi para sa mga kapagtubod; ni maninigo man kitang umontok sa satong pamimibi para sa mga tugang. Minsan ngani bako kitang mga “parapakilabot sa mga bagay-bagay nin iba,” tibaad aram niato na an sarong miembro nin pamilya o sarong katood nakakaeksperyensia nin grabeng pagbalo sa pagtubod. (1 Ped. 4:15) Magigin angay nanggad na sia ipamibi niato sa pribado! Si Pablo natabangan kan mga pakimaherak nin iba, asin dakol man na karahayan an magigibo kan satong mga pamibi.—2 Cor. 1:10, 11.

 8. (a) Paano niato naaaraman na inapresyar kan kamagurangan sa Efeso an kahalagahan nin pamibi? (b) Ano an maninigong magin saboot niato mapadapit sa pamibi sa Dios?

⁸ Minamansay daw kita nin iba bilang mga tawo na parateng namimibi? Pagkatapos na makipaghelingan si Pablo sa kamagurangan sa Efeso, “sia nagluhod kaiba ninda gabos asin namibi.” Dangan “dakol-dakol na pagtangis an nangyari sa tahaw ninda gabos, asin kinugos ninda an liog ni Pablo saka mapagpadangat na hinadokan sia, huli ta ikinamondong gayo ninda an saiyang itinaram na dai na ninda maheheling an saiyang lalawgon.” (Gibo 20:36-38) Dai niato aram an mga ngaran kan gabos na kamagurangan na idto, alagad minalataw na inapresyar ninda an kahalagahan nin pamibi. Daing duwa-duwa na dapat niatong pahalagahan an pribilehio na mamibi sa Dios asin maninigo niatong ‘iitaas an maimbod na mga kamot’ na nagtutubod na sisimbagon kita kan satong langitnon na Ama.—1 Tim. 2:8.

Lubos na Kuyogon an Dios

9, 10. (a) Anong halimbawa an itinao kan mga aking babae ni Zelofehad? (b) Paano an pagkuyog kan mga aking babae ni Zelofehad puedeng makaapektar sa pagmansay nin daing agom na Kristiano manongod sa pag-agom?

⁹ An pagpapadanay na nasa isip si Jehova makakatabang sa sato na kuyogon sia, asin bilang resulta magkakamit kita nin mga bendisyon. (Deut. 28:13; 1 Sam. 15:22) Nagkakaipo ini nin pagigin makinuyog. Estudyare an saboot kan limang babae na magturugang sa laman, an mga aki ni Zelofehad, na nabuhay kan panahon ni Moises. Para sa mga Israelita, an mga aking lalaki an parateng nag-aako nin mana hale sa saindang ama. An lalaking si Zelofehad nagadan na mayo nin mga aking lalaki, asin sinabi ni Jehova na kaipuhan na akoon kan limang babaeng ini an enterong mana—sa sarong kondisyon. Kaipuhan na magpaagom sinda sa mga aking lalaki ni Manases tanganing an mamanahon na rogaring magdanay sa tribo man sanang iyan.—Bil. 27:1-8; 36:6-8.

¹⁰ An mga aking babae ni Zelofehad may pagtubod na magigin marahay an resulta kun makuyog sinda sa Dios. “Siring sa ipinagboot ni Jehova ki Moises, siring man an ginibo kan mga aking babae ni Zelofehad,” an sabi kan Biblia. “Huli kaiyan si Mala, si Tirsa asin si Hogla saka si Milca patin si Noa, na mga aking babae ni Zelofehad, nagin mga agom kan mga aki kan mga amaon ninda. Sinda nagin mga agom kan nagkapira na hale sa mga pamilya kan mga aki ni Manases na aki ni Jose, tanganing an saindang mana magdanay na nasa tribo kan pamilya kan saindang ama.” (Bil. 36:10-12) Ginibo kan makinuyog na mga babaeng idto an ipinagboot ni Jehova. (Jos. 17:3, 4) Huling igwa kan kaparehong pagtubod, an maygurang sa espirituwal na mga Kristiano na daing agom kinukuyog an Dios paagi sa pag-agom “basta sa Kagurangnan.”—1 Cor. 7:39.

11, 12. Paano ipinaheling ni Caleb na sia may pagsarig sa Dios?

¹¹ Kaipuhan niatong lubos na kuyogon si Jehova, arog kan ginibo kan Israelitang si Caleb. (Deut. 1:36) Pagkatapos na makalda an Israel sa Egipto kan ika-16 na siglo B.C.E., si Moises nagsugo nin 12 lalaki tanganing mag-espiya sa Canaan, alagad 2 sana sa mga espiya—si Caleb asin Josue—an nagsadol sa banwaan na magkaigwa nin lubos na pagtitiwala sa Dios asin lumaog sa dagang iyan. (Bil. 14:6-9) Pakalihis nin mga kuarentang taon, buhay pa si Josue asin Caleb saka lubos nindang sinusunod si Jehova, patin ginamit nin Dios si Josue tanganing pangenotan an mga Israelita palaog sa Dagang Panuga. Minsan siring, an sampulong espiya na daing pagtubod minalataw na nagadan durante kan 40 taon na pagbaklay kan Israel sa kaawagan.—Bil. 14:31-34.

¹² Bilang may edad nang natadang buhay sa naeksperyensiahan kan Israel sa kaawagan, si Caleb makakatindog sa atubangan ni Josue asin makakapagsabi: “Lubos kong sinunod si Jehova na sakong Dios.” (Basahon an Josue 14:6-9.) Nagsabi an 85 anyos na si Caleb na itao sa saiya an mabukid na rehion na ipinanuga nin Dios sa saiya, minsan ngani iniistaran idto kan mga kaiwal na igwa nin darakulang siudad na nakukutaan.—Jos. 14:10-15.

13. Sa ibong kan mga pagbalo sa sato, ano an kaipuhan niatong gibohon tanganing mag-ako kan mga bendisyon nin Dios?

¹³ Arog kan maimbod asin makinuyog na si Caleb, bebendisyonan kita nin Dios kun ‘lubos niatong susunodon si Jehova.’ Kun napapaatubang kita sa grabeng mga problema, tatabangan kita mantang ‘lubos niatong sinusunod si Jehova.’ Alagad an paggibo kaiyan sa bilog na buhay, siring kan ginibo ni Caleb, puedeng magin depisil. Minsan ngani sinunod ni Hadeng Salomon si Jehova kan ponan nia an saiyang paghade, kan sia gurang na ikiniling kan saiyang mga agom an puso nia tanganing magsamba sa falsong mga dios, asin “dai nia lubos na sinunod si Jehova kapareho ni David na saiyang ama.” (1 Ha. 11:4-6) Sa ibong kan mga pagbalo na kaipuhan niatong atubangon, logod na pirme niatong lubos na kuyogon an Dios asin papagdanayon sia sa atubangan niato.

Pirmeng Magtiwala ki Jehova

14, 15. Sa mga eksperyensia ni Noemi, ano an nanodan nindo manongod sa pangangaipo na magtiwala sa Dios?

¹⁴ Kaipuhan niatong magtiwala sa Dios nangorogna kun kita nagmomondo nin makuri huling an satong ngapit garo baga daing paglaom. Estudyare an may edad nang si Noemi, na nagadanan nin agom asin nin duwang aking lalaki. Kan sia magbalik sa Juda hale sa Moab, sia nanambitan: “Dai nindo ako pag-apodon na Noemi [“An Sakong Kagayagayahan,” nota sa ibaba]. Apodon nindo akong Mara [“Mapait,” nota sa ibaba], huli ta tinawan ako nin dakulang kapaitan kan Makakamhan sa Gabos. Ako pano kan ako maghale, asin pinapuli ako ni Jehova na daing laog. Taano ta aapodon nindo akong Noemi, mantang si Jehova an nagpasupog sa sakuya asin an Makakamhan sa Gabos an nagtao sa sakuya nin kasakitan?”—Rut 1:20, 21.

¹⁵ Minsan ngani nasasakitan si Noemi, an maingat na pagbasa sa libro nin Rut nagpapaheling na padagos siang nagtiwala ki Jehova. Asin nagbago nanggad an saiyang situwasyon! An balong manugang ni Noemi na si Rut nagin agom ni Booz asin nangaki nin sarong aking lalaki. Nagin paraaling si Noemi kan aki, asin an pagkasaysay nagsasabi: “Nginaranan iyan kan kataed na mga babae, na nagsasabi: ‘Sarong aking lalaki an namundag ki Noemi.’ Asin an saiyang ngaran inapod nindang Obed. Sia an ama ni Jese, na ama ni David.” (Rut 4:14-17) Kun si Noemi buhayon na liwat sa daga, maaaraman nia na si Rut, na yaon man duman, nagin apoon ni Jesus, an Mesiyas. (Mat. 1:5, 6, 16) Arog ni Noemi, dai niato masesegurado kun ano an magigin resulta kan makamomondong mga situwasyon. Kun siring, pirme kitang magtiwala sa Dios, siring nanggad kan sadol sa sato sa Talinhaga 3:5, 6: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.”

Magsarig sa Banal na Espiritu

16. Paano tinabangan kan banal na espiritu nin Dios an nagkapirang kamagurangan na lalaki sa suanoy na Israel?

¹⁶ Kun pinapagdadanay niato si Jehova sa atubangan niato, gigiyahan nia kita paagi sa saiyang banal na espiritu. (Gal. 5:16-18) An espiritu nin Dios yaon sa piniling 70 kamagurangan na lalaki tanganing tumabang ki Moises sa “pagdara kan pasan kan banwaan” nin Israel. Si Eldad asin Medad sana an nginaranan, alagad pinangyari kan banal na espiritu na magibo ninda gabos an saindang mga katongdan. (Bil. 11:13-29) Daing duda na sinda may kakayahan, matatakton sa Dios, mapagtitiwalaan, asin onesto arog kan mas naenot na mga pinili. (Ex. 18:21) Ipinapaheling kan Kristianong kamagurangan ngonyan an siring na mga kualidad.

17. Ano an papel kan banal na espiritu ni Jehova sa pagtogdok kan tabernakulo?

¹⁷ An banal na espiritu ni Jehova nagkaigwa nin mahalagang papel sa pagtogdok kan tabernakulo sa kaawagan. Ninombrahan ni Jehova si Bezalel bilang an pangenot na panday asin paratogdok kan tabernakulo, na nanunuga na ‘papanoon sia kan espiritu nin Dios na magkaigwa nin kadonongan asin pakasabot asin kaaraman saka makagibo nin gabos na klase nin pagpanday.’ (Ex. 31:3-5) An mga lalaki na may “madonong na puso” nagtrabaho kaiba ni Bezalel asin kan saiyang katabang na si Oholiab sa paggibo kan marahayon na asignasyon na iyan. Dugang pa, pinahiro kan espiritu ni Jehova an banwaan, na gusto an puso, na buka an palad na magtao nin kontribusyon. (Ex. 31:6; 35:5, 30-34) An espiritu man sanang iyan an nagmomotibar sa mga lingkod nin Dios sa presenteng panahon na gibohon an bilog na makakaya ninda tanganing suportaran an intereses kan Kahadean. (Mat. 6:33) Tibaad igwa kita nin nagkapirang abilidad, alagad kaipuhan niatong mamibi na logod tabangan kita kan banal na espiritu asin togotan iyan na giyahan kita tangani na maotob niato an gibohon na itinao ni Jehova sa saiyang banwaan sa satong panahon.—Luc. 11:13.

Pirmeng Sambahon si Jehova nin mga Hukbo

18, 19. (a) Tinatabangan kita kan banal na espiritu nin Dios na gibohon an ano? (b) Ano an nanodan nindo sa mga halimbawa ni Simeon asin Ana?

¹⁸ Tinatabangan kita kan banal na espiritu na sambahon si Jehova na pinapagdadanay sia sa atubangan niato. An suanoy na banwaan nin Dios sinabihan: “Si Jehova nin mga Hukbo an dapat nindong sambahon bilang banal.” (Isa. 8:13, Byington) An duwang may edad nang parasamba sa Jerusalem kan enot na siglo iyo si Simeon asin Ana. (Basahon an Lucas 2:25-38.) Si Simeon nagtubod sa Mesiyanikong mga hula asin “naghahalat kan karangahan nin Israel.” Ibinubo nin Dios an banal na espiritu ki Simeon asin sinierto Nia sa saiya na maheheling nia an Mesiyas mantang buhay pa sia. Asin iyan an nangyari. Sarong aldaw kan taon 2 B.C.E., si Jesus dinara sa templo ni Maria asin Jose, an ina asin kag-ampon na ama kan omboy. Huling si Simeon pinahiro kan banal na espiritu, nagtaram sia nin makahulang mga tataramon manongod sa Mesiyas asin naghula sia nin pagkamondo para ki Maria, na nakaeksperyensia nin kamondoan kan si Jesus ipako sa hariging pasakitan. Alagad imahinaron an dakulang kagayagayahan na naeksperyensiahan ni Simeon kan kargahon nia “an Cristo ni Jehova”! Asin marahayon nanggad na halimbawa nin pagsamba an itinao ni Simeon para sa mga lingkod nin Dios ngonyan!

¹⁹ An parasambang si Ana, na 84 anyos na balo, “dai noarin man nagpapalta sa templo.” Sia naggibo nin sagradong paglilingkod ki Jehova banggi-aldaw na “may mga pag-ayuno asin pagngayongayo.” Presente man si Ana kan an omboy na si Jesus darahon sa templo. Nagpasalamat nanggad sia na naheling nia an magigin Mesiyas! Iyo, sia “nagpoon na magpasalamat sa Dios asin magtaram dapit sa aki sa gabos na naghahalat sa pagkaligtas kan Jerusalem.” Si Ana napahiro nanggad na ipaabot an maogmang baretang ini sa iba! Kapareho ni Simeon asin Ana, an may edad nang mga Kristiano ngonyan naoogmang marhay na dawa an mga gurang na, puede pang maglingkod ki Jehova bilang saiyang mga Saksi.

20. Ano man an satong edad, ano an kaipuhan niatong gibohon, asin taano?

²⁰ Ano man an satong edad, kaipuhan niatong papagdanayon si Jehova sa atubangan niato. Sa siring, bebendisyonan nia an satong mapakumbabang paghihingoa na sabihon sa iba an manongod sa saiyang pagkahade asin sa saiyang makangangalas na mga gibo. (Sal. 71:17, 18; 145:10-13) Minsan siring, tanganing matawan niato nin onra si Jehova, kaipuhan na magpaheling kita nin diosnon na mga kualidad. Paagi sa pagsiyasat sa dugang pang mga pagkasaysay sa Biblia, ano an manonodan niato manongod sa siring na mga kualidad?

Ano an Isisimbag Nindo?

• Paano niato naaaraman na dinadangog ni Jehova an mga pamibi?

• Taano ta maninigo niatong lubos na kuyogon an Dios?

• Dawa kun kita nagmomondo nin makuri, taano ta maninigo na pirme kitang magtiwala ki Jehova?

• Paano tinatabangan kan banal na espiritu nin Dios an saiyang banwaan?

[Ritrato sa pahina 4]

Epektibo an pamibi ni Nehemias ki Jehova

[Ritrato sa pahina 5]

An paggirumdom sa mga inakong bendisyon ni Noemi makakatabang sa sato na magtiwala ki Jehova