Maninigo daw Kamong Mamibi ki Jesus?

AN IBANG tawo ibinibilang na tamang mamibi ki Jesus. Sa Alemania dakol an tinokdoan mantang aki pa na bago sinda magkakan maninigo nindang pagdokoton an saindang mga palad asin magpasalamat ki Jesu-Cristo.

Sono sa Biblia, si Jesus talagang igwa nin halangkawon na posisyon sa langit. Alagad, nangangahulogan daw iyan na maninigo kitang mamibi sa saiya? Tibaad saro kamo sa mga, huli sa pagkamoot ki Jesus, namimibi sa saiya, pero ano an nasa isip ni Jesus mismo manongod sa siring na mga pamibi?

Enot, taano ngani ta minalataw an mga hapot na ini? Huli ta sinasabi kan Biblia na si Jehova Dios an “Paradangog nin pamibi.” Bako nanggad makangangalas, kun siring, na an mga lingkod nin Dios kan suanoy na mga panahon, arog baga kan mga Israelita, namibi solamente ki Jehova Dios, an Makakamhan sa gabos.​—Salmo 5:​1, 2; 65:2.

Naliwat daw an mga bagay kan si Jesus, an Aki nin Dios, nagdigdi sa daga tanganing iligtas an katawohan sa kasalan asin kagadanan? Dai, an mga pamibi itinao pa man giraray ki Jehova. Kan yaon digdi sa daga si Jesus mismo parateng namimibi sa saiyang langitnon na Ama, asin tinokdoan nia an iba na gibohon man an siring. Isip-isipa na sana an modelong pamibi, na kun beses inaapod na Pamibi kan Kagurangnan o Ama Niamo, na saro sa pinakamidbid na mga pamibi sa kinaban. Dai kita tinokdoan ni Jesus na mamibi sa saiya; itinao nia sa sato an modelong ini: “Ama niamo na nasa langit, pakangbanalon logod an saimong ngaran.”​—Mateo 6:​6, 9; 26:​39, 42.

Ngonyan helingon niatong marhay an tema paagi sa pagsiyasat kun ano man nanggad an pamibi.

Ano an Pamibi?

An kada pamibi sarong porma nin pagsamba. Pinatutunayan ini kan The World Book Encyclopedia, na nagsasabi: “An pamibi sarong porma nin pagsamba na dian an saro puwedeng tumao nin debosyon, pasasalamat, pagtuga, o pagngayongayo sa Dios.”

Sa sarong okasyon si Jesus nagsabi: “Nasusurat, ‘Si Jehova na saimong Dios an dapat mong sambahon, asin sa saiya ka sana magtao nin banal na paglilingkod.’” Nagdanay si Jesus sa pundamental na katotoohan na an pagsamba​—kun siring pati pamibi—​dapat na itao solamente sa saiyang Ama, si Jehova Dios.​—Lucas 4:8; 6:12.

Pagmidbid ki Jesus sa Satong mga Pamibi

Si Jesus nagadan bilang pantubos na atang para sa katawohan, binuhay liwat nin Dios, asin ilinangkaw sa superyor na posisyon. Siring kan puwedeng maimahinar nindo, an gabos na ini talagang nagbunga nin pagkaliwat manongod sa inaakong mga pamibi. Sa anong paagi?

Ilinaladawan ni apostol Pablo nin arog kaini an dakulang impluwensia kan posisyon ni Jesus sa pamibi: “Sa rason man mismong ini ilinangkaw sia nin Dios sa superyor na kamugtakan asin may kabootan na itinao saiya an ngaran na halangkaw kisa lambang ibang ngaran, tanganing sa ngaran ni Jesus an lambang tuhod lumuhod kaidtong mga nasa langit asin sa daga asin mga nasa irarom kan daga, asin an lambang dila hayag na magmidbid na si Jesu-Cristo iyo an Kagurangnan para sa kamurawayan nin Dios na Ama.”​—Filipos 2:​9-11.

An mga tataramon daw na “sa ngaran ni Jesus an lambang tuhod lumuhod” nangangahulogan na kita dapat na mamibi sa saiya? Dai. An frase sa Griego na kalabot digdi “nangangahulogan kan ngaran na dian an mga minaluhod kan mga tuhod nagkakasararo, na dian nagkakasararo na an gabos (πᾶν γόνυ) nagsasamba. An ngaran na inako ni Jesus nagpapahiro sa gabos sa nagkakasararong pagsamba.” (A Grammar of the Idiom of the New Testament, ni G. B. Winer) Iyo nanggad, tanganing akoon an pamibi, iyan dapat na ipresentar “sa ngaran ni Jesus,” pero iyan, minsan siring, itinatao ki Jehova Dios asin nagseserbi para sa saiyang kamurawayan. Sa rason na ini, nagsabi si Pablo: “Sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan.”​—Filipos 4:6.

Kun paanong an sarong dalan minapasiring sa sarong dudumanan, si Jesus man iyo an “dalan” na pasiring sa Dios na Makakamhan sa gabos. “Ako iyo an dalan asin an katotoohan patin an buhay. Mayo nin makaduduman sa Ama kun bakong huli sa sako,” an itinokdo ni Jesus sa saiyang mga apostol. (Juan 14:6) Kaya, maninigo niatong ipresentar sa Dios an satong mga pamibi paagi ki Jesus asin bakong direkta ki Jesus mismo.a

‘Alagad,’ an iba tibaad maghapot, ‘bako daw na ibinabareta kan Biblia na an disipulong si Esteban asin an apostol na si Juan pareho nakipag-olay ki Jesus sa langit?’ Totoo iyan. Alagad, dai kalabot sa mga pangyayaring ini an mga pamibi, mantang an kada saro ki Esteban asin Juan naheling si Jesus sa bisyon asin direktang nakipag-olay sa saiya. (Gibo 7:​56, 59; Kapahayagan 1:​17-19; 22:20) Girumdomon na an pakikipag-olay sana dawa sa Dios bako mismong pamibi. Si Adan asin Eva nakipag-olay sa Dios, na nagtatao nin mga sarahotan sa saindang dakulang kasalan, kan hokoman Nia sinda kasunod kan saindang pagkakasala sa Eden. An saindang pakipag-olay sa saiya sa paaging idto bakong pamibi. (Genesis 3:​8-19) Kaya, salang sabihon na an pakipag-olay ni Esteban o ni Juan ki Jesus ebidensia na kita maninigong aktuwal na mamibi sa saiya.

Paano ‘Inaapod’ an Ngaran ni Jesus?

Igwa daw kamo nin nagdadanay na mga pagduda, na ibinibilang pang tama na mamibi ki Jesus? Sarong misis an nagsurat sa sarong sangang opisina kan Watch Tower Society: “Makamomondo, bako pa akong kombensido na an enot na mga Kristiano dai namibi ki Jesus.” Nasa isip nia an mga tataramon ni Pablo sa 1 Corinto 1:​2, kun saen nasambitan nia an “gabos na sa gabos na lugar nag-aapod sa ngaran kan satong Kagurangnan, si Jesu-Cristo.” Alagad, maninigong saboton nin saro na sa orihinal na lenguahe, an ekspresyon na “mag-apod sa” puwedeng mangahulogan nin mga bagay apuwera sa pamibi.

Paano ‘inapod’ an ngaran ni Cristo sa gabos na lugar? An sarong paagi iyo na an mga parasunod ni Jesus na taga-Nazaret hayag na minidbid sia bilang Mesiyas asin “Paraligtas kan kinaban,” na naggigibo nin dakol na milagro sa saiyang ngaran. (1 Juan 4:14; Gibo 3:6; 19:5) Kaya, sinasabi kan The Interpreter’s Bible na an fraseng “mag-apod sa ngaran kan satong Kagurangnan . . . nangangahulogan na magtuga kan saiyang pagigin kagurangnan imbes na mamibi sa saiya.”

An pag-ako ki Cristo asin paggibo nin pagtubod sa saiyang pinabolos na dugo, na ginigibong posible an kapatawadan nin mga kasalan, ‘pag-apod [man] sa ngaran kan satong Kagurangnan, si Jesu-Cristo.’ (Ikomparar an Gibo 10:43 sa 22:16.) Asin literal niatong sinasambit an ngaran ni Jesus basta kita namimibi sa Dios paagi sa saiya. Kaya, minsan ngani ipinaheheling na puwede kitang mag-apod sa ngaran ni Jesus, an Biblia dai nagpaparisa na maninigo kitang mamibi sa saiya.​—Efeso 5:20; Colosas 3:17.

Kun Ano an Magigibo ni Jesus Para sa Sato

Si Jesus malinaw na nanuga sa saiyang mga disipulo: “Kun kamo mahagad nin ano man na bagay sa sakong ngaran, gigibohon ko iyan.” Naghahagad daw ini nin pagpamibi sa saiya? Dai. An paghagad ginigibo ki Jehova Dios​—pero sa ngaran ni Jesus. (Juan 14:​13, 14; 15:16) Ipinakikimaherak niato sa Dios na gamiton kan Saiyang Aki, si Jesus, an saiyang dakulang kapangyarihan asin autoridad para sa sato.

Paano si Jesus nakikikomunikar sa saiyang tunay na mga parasunod ngonyan? An paglaladawan ni Pablo sa kongregasyon nin linahidan na mga Kristiano puwedeng magserbing ilustrasyon. Ikinomparar nia iyan sa sarong hawak asin si Jesu-Cristo sa payo. An “payo” nagtatao sa mga miembro kan espirituwal na hawak kan saindang mga pangangaipo na pinaaagi sa “mga pagsokmolan asin kusog,” o an mga paagi asin areglo sa pagtao nin espirituwal na kakanon asin paggiya sa saiyang kongregasyon. (Colosas 2:19) Sa kaagid na paagi, naggagamit ngonyan si Jesus nin “balaog na mga lalaki,” o kuwalipikado sa espirituwal na mga lalaki, tanganing mangenot sa kongregasyon, na nagtatao pa ngani nin pagtatanos kun kinakaipuhan. Mayo nin probisyon para sa mga miembro kan kongregasyon na direktang makikomunikar ki Jesus o mamibi sa saiya, alagad tunay na sinda maninigo​—iyo, dapat—​na mamibi sa Ama ni Jesus, si Jehova Dios.​—Efeso 4:​8-12.

Paano Nindo Tinatawan nin Onra si Jesus?

Mapadapit sa kaligtasan kan mga tawo, igwa nanggad nin mahalagang kabtang si Jesus! Si apostol Pedro nagkagsing: “Mayo nin kaligtasan sa siisay pa man na iba, huli ta mayo na nin ibang ngaran sa sirong nin langit na itinao sa mga tawo na sukat makaligtas sa sato.” (Gibo 4:12) Namamansayan daw nindo an importansia kan ngaran ni Jesus?

Sa dai pamimibi mismo ki Jesus, dai niato minimenus an saiyang posisyon. Imbes, si Jesus natatawan nin onra kun kita namimibi sa saiyang ngaran. Asin kun paanong an mga aki nagtatao nin onra sa saindang mga magurang paagi sa pagigin makinuyog, tinatawan niato nin onra si Jesu-Cristo paagi sa pagkuyog sa saiyang mga togon, nangorogna an bagong togon na magkaminorootmootan.​—Juan 5:23; 13:34.

Inaakong mga Pamibi

Minamawot daw nindong tumao nin inaakong mga pamibi? Kun siring itao iyan ki Jehova Dios, asin gibohon iyan sa ngaran kan saiyang Aki, si Jesus. Aramon an kabotan nin Dios, asin ipabanaag sa saindong mga pamibi an pakasabot na iyan. (1 Juan 3:​21, 22; 5:14) Kumua nin kosog sa mga tataramon kan Salmo 66:20: “Omawon an Dios, na dai ipinagilid an sakong pamibi, ni an saiyang mamomoton na kabootan sa sako.”

Siring kan satong naheling, an mga pamibi porma nin pagsamba na esklusibong para sana sa Makakamhan sa gabos na Dios. Paagi sa pagpaabot kan gabos niatong pamibi ki Jehova Dios, ipinaheheling ta na sato nang isinapuso an pagboot ni Jesus na mamibi: “Ama niamo na nasa langit.”​—Mateo 6:9.

[Nota sa Ibaba]