Paghuhulit kan Maogmang Bareta na May Makosog na Kombiksion

¹ Sa pagpopoon kan enot na siglo, sinugo ni Jesu-Cristo an saiyang mga parasunod na maghulit kan maogmang bareta kan Kahadean asin ‘gumibo nin mga disipulo sa mga tawo kan gabos na nasyon.’ (Mat. 24:​14; 28:​19, 20) Isinaboot kan Mga Saksi ni Jehova an instruksion nia, kaya pag-abot kan katapusan kan ika-20 siglo, an satong Kristianong kasararoan nin magturugang duminakol sagkod sa labing 5,900,000 na disipulo sa 234 kadagaan. Kanigoan kakosog na kurahaw nin pag-omaw sa satong langitnon na Ama!

² Luminaog na kita ngonyan sa ika-21 siglo. Tusong pinagmamaigotan kan Kaiwal niato na olangon an satong pangenot na gibohon na paghuhulit kan Kahadean asin paggibo nin mga disipulo. Naggagamit sia nin mga impluwensia hale sa sistemang ini nin mga bagay sa paghihingoang malingling an satong atension, uboson an satong panahon, asin mapagal kita sa dakol na dai kaipuhan na inaasikaso asin intereses. Imbes na togotan na an sistemang ini an magdikta kun ano an importante sa buhay, pinatutunayan niato sa satong sadiri paagi sa Tataramon nin Dios kun ano an pangenot​—an paggibo kan kabotan ni Jehova. (Roma 12:2) Iyan nangangahulogan nin pagkuyog sa Makakasuratan na sadol na ‘ihulit an tataramon sa marahay asin masakit na panahon asin lubos na otobon an satong ministeryo.’​—2 Tim. 4:​2, 5.

³ Pataluboon an Marigon na Kombiksion: An mga Kristiano kaipuhan na “makatindog na lubos asin may marigon na kombiksion sa gabos na kabotan nin Dios.” (Col. 4:12) An tataramon na “kombiksion” tinatawan nin kahulogan na “makosog na paniniwala o pagtubod; an kamugtakan na pagigin kombensido.” Bilang mga Kristiano dapat kitang kombensido na segurado an makahulang tataramon nin Dios asin na kita ngonyan nasa poro na kan panahon kan katapusan. Kaipuhan kitang magkaigwa nin pagtubod na arog kakosog kan ki apostol Pablo, na nagsabi na an maogmang bareta “sa katotoohan, iyo an kapangyarihan nin Dios para sa kaligtasan kan lambang saro na nagtutubod.”​—Roma 1:16.

⁴ An Diablo naggagamit nin mga tawong maraot asin impostor, na sinda mismo nalagalag, tangani na impluwensiahan asin lagalagon an iba. (2 Tim. 3:13) Huling napatanidan bago pa manongod kaini, kita naggigibo nin mga paagi tangani na pakosogon an satong kombiksion na yaon sato an katotoohan. Imbes na togotan an mga kahaditan sa buhay na paluyahon an satong kaigotan, padagos niatong ineenot an intereses kan Kahadean. (Mat. 6:​33, 34) Ni bobooton man niatong malingawan an pagkaapurado kan mga panahon, na tibaad nag-iisip na harayo pa an katapusan kan sistemang ini. Iyan orog na naghaharani. (1 Ped. 4:7) Minsan ngani tibaad nag-iisip kita na sa nagkapirang kadagaan kadikit an epekto kan pagpalakop kan maogmang bareta kun pagbabasaran an patotoo na ikinatao na, dapat na magpadagos an pagpatanid.​—Ezeq. 33:​7-9.

⁵ An importanteng marhay na mga hapot sa huring kabtang kan panahon na ini iyo an: ‘Isinasaboot ko daw an sugo ni Jesus na gumibo nin mga disipulo? Kun ako naghuhulit kan maogmang bareta, ako daw nagpapaheling nin makosog na kombiksion na tunay an Kahadean? Ako daw determinadong magkaigwa nin dakulang kabtang sagkod sa mapupuede sa nagliligtas-buhay na ministeryong ini?’ Narerealisar kun gurano na karayo kan naabot niato sa panahon kan katapusan, kaipuhan niatong atenderan an satong sadiri asin an sugo sa sato na paghuhulit patin pagtotokdo. An paggibo kaini magliligtas sa sato man sana sagkod kaidtong mga naghihinanyog sa sato. (1 Tim. 4:16) Paano niato gabos mapakokosog an satong kombiksion bilang mga ministro?

⁶ Arogon an mga Taga Tesalonica: Si apostol Pablo, sa paggirumdom sa pagpapagal kan mga tugang sa Tesalonica, nagsabi sa sainda: “An maogmang bareta na samong ihinuhulit dai nagdatong sa saindo sa tataramon sana kundi siring man sa kapangyarihan asin banal na espiritu patin makosog na kombiksion, siring na aram nindo kun nagin ano kaming klaseng mga tawo sa saindo para sa saindong karahayan; asin kamo nagin mga paraarog sa samo asin sa Kagurangnan, mantang inako nindo an tataramon sa irarom nin dakulang kahorasaan na igwa kan kagayagayahan nin banal na espiritu.” (1 Tes. 1:​5, 6) Iyo, kinomendaran ni Pablo an kongregasyon kan mga taga Tesalonica huli ta sa ibong nin dakulang kahorasaan sinda naghulit na may kaigotan asin makosog na kombiksion. Ano an nagpangyari sa sainda na gibohon ini? Sa dakulang kabtang, nagkaigwa nin positibong epekto sa sainda an kaigotan asin kombiksion na naheling ninda ki apostol Pablo asin sa saiyang mga kapwa trabahador. Taano man?

⁷ An mismong buhay ni Pablo asin kan saiyang kairiba sa pagbiahe nagpatotoo na yaon sa sainda an espiritu nin Dios asin na bilog na puso sindang nagtutubod sa saindang ihinuhulit. Bago dumatong sa Tesalonica, si Pablo asin Silas pinagringisan sa Filipos. Mayo nin pagbista, sinda hinampak, ikinarsel, asin ipinandog. Minsan siring, an masakit na inagihan na ini dai nagpaluya kan saindang kaigotan para sa maogmang bareta. An pag-interbenir nin Dios nagpangyaring makaluwas sinda, nagresulta sa pagkakombertir kan bantay sa bilanggoan asin kan saiyang pamilya, asin nagtaong dalan para sa mga tugang na ini na makapadagos sa saindang ministeryo.​—Gibo 16:​19-​34.

⁸ Sa puersa kan espiritu nin Dios, si Pablo nagdatong sa Tesalonica. Duman sia nagtrabaho tanganing makua an saiya mismong mga kinakaipuhan dangan lubos na ginamit an saiyang sadiri sa pagtokdo kan katotoohan sa mga taga Tesalonica. Dai sia nagpogol sa pagpahayag kan maogmang bareta sa gabos na oportunidad. (1 Tes. 2:9) An paghuhulit ni Pablo na may makosog na kombiksion nagkaigwa nin mapuersang marhay na epekto sa mga taga duman kaya binayaan kan nagkapira sa sainda an dati nindang idolatrosong pagsamba asin nagin mga lingkod kan tunay na Dios, si Jehova.​—1 Tes. 1:​8-​10.

⁹ An paglamag dai nakaolang sa mga bagong nagturubod sa paghuhulit kan maogmang bareta. Huling napahiro kan saindang bago pa sanang makuang pagtubod asin lubos na kombensido na mapapasainda an daing katapusan na mga bendisyon, napahiro an mga taga Tesalonica na ibalangibog an katotoohan na entusiastiko nindang inako. Nagin aktibong marhay an kongregasyon na iyan kaya an bareta manongod sa saindang pagtubod asin kaigotan nakalakop sa ibang parte nin Macedonia asin sagkod sa Acaya pa ngani. Huli kaini, kan isurat ni Pablo an saiyang enot na surat sa mga taga Tesalonica, aram nang marhay an saindang marahay na mga gibo. (1 Tes. 1:7) Kanigoan karahay na halimbawa!

¹⁰ Namotibar nin Pagkamoot sa Dios Asin sa mga Tawo: Paano kita, siring sa mga taga Tesalonica, makapagpapadanay nin makosog na personal na kombiksion kun naghuhulit kan maogmang bareta ngonyan? Manongod sa sainda, si Pablo nagsurat: “Daing ontok na isinasaisip niamo an saindong fiel na gibo asin an saindong pagpapagal huli sa pagkamoot.” (1 Tes. 1:​3, nota sa ibaba) Risang-risa na igwa sinda nin hararom, odok sa pusong pagkamoot ki Jehova Dios asin sa mga tawo na hinuhulitan ninda. An pagkamoot man sanang ini an nagmotibar ki Pablo asin sa saiyang kairiba na itao sa mga taga Tesalonica “bako sanang an maogmang bareta nin Dios, kundi siring man an [saindang] kalag.”​—1 Tes. 2:8.

¹¹ Kaagid kaiyan, an satong hararom na pagkamoot ki Jehova asin sa satong kapwa nagpapahiro sa sato na booton na makikabtang nin lubos sa paghuhulit na itinao sa sato nin Dios na gibohon. Huli sa pagkamoot na iyan, rinerekonoser niato na personal, tao nin Dios na paninimbagan niato na ilakop an maogmang bareta. Paagi sa paghorophorop nin positibo asin may pagpahalaga sa gabos na ginibo para sa sato ni Jehova na giyahan kita pasiring sa “tunay na buhay,” namomotibar kita na sabihon sa iba an iyo man sanang marahayon na mga katotoohan na tinutubod niato sa bilog niatong puso.​—1 Tim. 6:19.

¹² Mantang kita padagos na sibot sa paghuhulit, an satong pagkamoot ki Jehova asin sa mga tawo dapat na padagos na umoswag. Kun iyo, kita mapahihiro na dagdagan an satong kabtang sa ministeryo sa mga pinto asin pagmaigotan na gibohon an gabos na iba pang porma nin paghuhulit na bukas sa sato. Aaprobetsaran niato an mga oportunidad na maghulit sa impormal na paagi sa mga paryente, kataed, asin kamidbid. Minsan ngani an kadaklan na tawo tibaad sayumahan an maogmang bareta na iinaalok niato asin an nagkapira maghihingoang olangon an pagbalangibog kan Kahadean, kita nakaeeksperyensia nin panlaog na kagayagayahan. Taano? Huli ta aram niato na nagibo niato an pinakamakakaya niato na magpatotoo manongod sa Kahadean asin tabangan an mga tawo na magkamit nin kaligtasan. Asin bebendisyonan ni Jehova an satong mga paghihingoa na manompongan an mga tama an kamugtakan nin puso. Dawa kun nasasakitan na kita sa mga pangigipit sa buhay asin hinihingoa ni Satanas na paluyahon an kagayagayahan niato, nahihimo niatong mapagdanay an satong makosog na kombiksion asin an satong kaigotan sa paghuhulit sa iba. Kun ginigibo niato gabos an satong kabtang, ini nagbubunga nin makosog, maigot na mga kongregasyon arog kan sa Tesalonica.

¹³ Nungka na Sumuko sa Irarom nin Pagbalo: Kaipuhan man an kombiksion kun kita napapaatubang sa manlaenlaen na pagbalo. (1 Ped. 1:​6, 7) Liniwanag ni Jesus sa saiyang mga disipulo na kun sinda masunod sa saiya, sinda ‘ikaoongis kan gabos na nasyon.’ (Mat. 24:9) Inagihan ini ni Pablo asin Silas kan nasa Filipos. An pagkasaysay sa Gibo kapitulo 16 nagsasabi na si Pablo asin Silas iinapon sa mas nasa laog na karsel asin ipinandog. Sa pankagabsan, an pangenot na karsel sarong klase nin patyo o portiko na sa palibot kaiyan may mga selda na may liwanag asin aire. Minsan siring, an mas nasa laog na karsel mayo nin liwanag asin limitado an bentilasyon. Kinaipuhan na tioson ni Pablo asin Silas an kadikloman, init, asin bata kan miserableng lugar na ini nin bilanggoan. Maiimahinar daw nindo an kolog na siertong namatean ninda mantang nakapandog sa laog nin dakol na oras na an saindang mga likod gasgas na asin nagdudugo huli sa pasakit?

¹⁴ Sa ibong kan mga pagbalong ini, si Pablo asin Silas nagdanay na fiel. Sinda nagpaheling nin odok sa pusong kombiksion, na nagpakosog sa sainda na maglingkod ki Jehova sa ibong kan pagbalo. An saindang kombiksion idinodoon sa bersikulo 25 kan kapitulo 16, kun saen iyan nagsasabi na si Pablo asin Silas “namimibi asin nag-oomaw sa Dios paagi sa awit.” Sa katunayan, maski ngani sinda yaon sa mas nasa laog na karsel, nakasisierto sindang marhay na inooyonan sinda nin Dios kaya sinda nag-awit na may igong kosog tangani na madangog kan iba pang mga preso! Kaipuhan kitang magkaigwa nin kaagid na kombiksion ngonyan kun napapaatubang sa mga pagbalo sa satong pagtubod.

¹⁵ Balakid an mga pagbalo na iinaatubang sa sato kan Diablo. Para sa nagkapira iyan tibaad paglamag nin kapamilya. Napapaatubang an kadaklan sa satong mga tugang sa legal na mga angat. Puedeng mapaatubang sa pagtumang nin mga apostata. May pinansial na mga pagabat asin kahaditan kun paano papagtatamatamaon an entrada. Napapaatubang an mga hoben sa impluwensia nin kairiba sa eskuelahan. Paano niato maaatubang nin mapanggana an mga pagbalong ini? Ano an kaipuhan tangani na ikapaheling an kombiksion?

¹⁶ Enot sa gabos, kaipuhan niato na papagdanayon an dayupot na personal na relasyon ki Jehova. Kan si Pablo asin Silas yaon sa mas nasa laog na karsel, dai ninda ginamit an panahon na idto sa pagreklamo dapit sa saindang situwasyon o na maherak sa saindang sadiri. Sinda tolos-tolos na duminolok sa Dios paagi sa pamibi asin inomaw sia paagi sa awit. Taano? Huli ta sinda igwa nin dayupot na personal na relasyon sa saindang langitnon na Ama. Narealisar ninda na sinda nagdudusa dahel sa katanosan asin na an saindang kaligtasan nasa kamot ni Jehova.​—Sal. 3:8.

¹⁷ Kun kita napapaatubang sa mga pagbalo ngonyan, kita man dapat na umasa ki Jehova. Ineenkaminar kita ni Pablo bilang mga Kristiano na ‘ipahayag sa Dios an satong mga kahagadan; asin an katoninongan nin Dios na minalampas sa gabos na kaisipan mag-iingat kan satong puso asin kan satong mga pag-isip.’ (Fil. 4:​6, 7) Kanigoan kanakararanga na maaraman na dai totogotan ni Jehova na kita solong umagi sa mga pagbalo! (Isa. 41:10) Sia pirmeng kaiba niato basta kita naglilingkod sa saiya na may tunay na kombiksion.​—Sal. 46:7.

¹⁸ An saro pang mahalagang marhay na tabang sa pagpaheling nin kombiksion iyo an pagdadanay na sibot sa paglilingkod ki Jehova. (1 Cor. 15:58) Si Pablo asin Silas iinapon sa karsel huli ta sinda nagin sibot sa paghuhulit kan maogmang bareta. Uminontok daw sinda sa paghuhulit huli sa mga pagbalo sa sainda? Dai, sinda padagos na naghulit minsan ngani nasa karsel, asin pakaluwas ninda, sinda nagbiahe pa-Tesalonica asin nagduman sa sinagoga kan mga Judio tangani na ‘makipagrasonan sa sainda hale sa Kasuratan.’ (Gibo 17:​1-3) Kun kita igwa nin makosog na paniniwala o pagtubod ki Jehova asin kombensido na yaon sato an katotoohan, mayo nin “makapasusuhay sa sato hale sa pagkamoot nin Dios na yaon dian ki Cristo Jesus na satong Kagurangnan.”​—Roma 8:​35-39.

¹⁹ Modernong mga Halimbawa nin Makosog na Kombiksion: Igwa nin dakol na pambihirang halimbawa sa satong aldaw nin mga, siring ki Pablo asin Silas, nagpaheling nin makosog na kombiksion. An sarong tugang na babae na nakatagal sa kampo de konsentrasyon sa Auschwitz nag-estorya manongod sa dai nanluyang pagtubod asin kombiksion na ipinaheling kan mga tugang na lalaki asin babae duman. Sia nagsaysay: “Sarong beses durante nin pag-usisa, rinani ako nin sarong opisyal na gugom an kamaoo. ‘Ano an gigibohon niamo sa saindo?’ an kagsing nia. ‘Kun arestaron niamo kamo, dai kamong labot. Kun ikarsel niamo kamo, dai nanggad kamong labot. Kun darahon niamo kamo sa kampo de konsentrasyon, dai kamo nahahadit. Kun sentensiahan niamo kamo na magadan, dai sana kamong labot. Ano an gigibohon niamo sa saindo?’” Kanigoan kanakapakokosog sa pagtubod na maheling an pagtubod kan satong mga tugang sa irarom nin siring karingis na mga sirkunstansia! Sinda daing ontok na nag-asa ki Jehova para sa tabang tangani na makatagal.

²⁰ Seguradong nagigirumdoman niato an kombiksion kan kadaklan na tugang niato na napapaatubang sa etnikong pagkaongis na heling-heling sa nakaagi pa sanang mga taon. Sa ibong kan pagigin nasa peligrosong mga situwasyon, desidido an responsableng mga tugang na lalaki na siertohon na napakakakan sa espirituwal an saindang mga tugang na lalaki asin babae. An gabos nagpapadagos na fiel na may makosog na kombiksion na ‘an ano man na armas na gibohon tumang sa sainda dai magkakaepekto.’​—Isa. 54:17.

²¹ An dakol sa satong mga tugang na lalaki asin babae na an agom daing pagtubod nagpapaheling man nin makosog na pagtubod asin pakatagal. An sarong tugang na lalaki sa Guadeloupe napaatubang sa grabeng pagkontra kan saiyang daing pagtubod na agom. Tangani na panluyahon an boot nia asin olangon an saiyang pag-atender sa Kristianong mga pagtiripon, dai sia kaini ipinagluluto o ipinaglalaba, ipinaplantsa, asin isinusursi nin saiyang mga gubing. Sa laog nin dakol na aldaw, dai sia ginigirong kaini. Alagad paagi sa pagpaheling nin odok sa pusong kombiksion sa paglilingkod ki Jehova asin pagdolok sa saiya paagi sa pamibi para sa tabang, natagalan iyan gabos kan tugang na ini. Gurano kahaloy? Sa laog nin mga 20 taon​—na pakatapos kaiyan an saiyang agom luway-luway na nagbago an puso. Pag-abot nin panahon, sia talagang nakapaggagayagaya huli ta inako kan saiyang agom an paglaom sa Kahadean nin Dios.

²² Sa katapustapusi, dai niato dapat paglingawan an makosog na kombiksion kan satong hoben na mga tugang na lalaki asin babae na nag-eeskuela kada aldaw asin inaatubang an impluwensia nin kairiba patin iba pang angat. May labot sa impluwensia na umarog sa eskuelahan, an sarong daragitang Saksi nagsabi: “Kun ika nag-eeskuela, pirme kang ineenganyar nin gabos na magin rebelde nin kadikit. Mas iginagalang ka kan mga aki kun ika may ginigibo na harani dian.” Kanigoan na impluwensia an inaatubang kan satong mga hoben! Dapat na marigon sindang magdesisyon sa isip asin puso na labanan an sugot.

²³ Marahay ta an dakol sa satong mga hoben pinagdadanay an saindang integridad sa ibong nin mga pagbalo. An sarong halimbawa iyo an sarong hoben na tugang na babae na nag-iistar sa Pransia. Sarong aldaw pakapangodto, may mga solterito na nagprobar na piriton siang hadokan sinda, alagad sia namibi asin makosog na nagsayuma, kaya binayaan na sana sia kan mga solterito. Pagkatapos, an saro sa sainda buminalik asin sinabihan sia na ini naghanga sa saiya huli sa saiyang kosog nin boot. Sia nakapagtao nin marahay na patotoo sa saiya dapit sa Kahadean, na ipinaliliwanag an halangkaw na mga pamantayan na itinatao ni Jehova sa gabos na boot na magkaigwa nin kabtang sa mga bendisyon kaiyan. Durante kan taon nin pag-eskuela, ipinaliwanag man nia an saiyang mga tinutubod sa bilog na klase.

²⁴ Kanigoan kamahal na marhay na pribilehio niato na mapabilang sa mga ikinaoogma ni Jehova na gamiton sa pagtaram na may marigon na kombiksion dapit sa saiyang kabotan! (Col. 4:12) Saro pa, igwa kita nin marahayon na oportunidad na patunayan an satong integridad kun sinasalakay nin siring sa leon na Kaiwal niato, si Satanas na Diablo. (1 Ped. 5:​8, 9) Nungkang paglingawan na ginagamit ni Jehova an mensahe kan Kahadean sa pagtao nin kaligtasan sa sato na naghuhulit kaiyan sagkod sa mga naghihinanyog. Logod na an mga desisyon na ginigibo niato asin an satong aroaldaw na pamumuhay magpatunay na ineenot niato an Kahadean. Padagos kitang maghulit kan maogmang bareta na may makosog na kombiksion!