Lubos na Makinabang sa Pagbasa kan Bibliya

1-3. Ano an mga pakinabang sa pagbasa kan Bibliya asin pag-aplikar kan mga katukduan kaiyan?

“KADA aga nagpapasalamat ako ki Jehova sa pagtabang sako na masabutan an Bibliya.” An may edad nang sister na nagsabi kaiyan nabasa na an bilog na Bibliya nin labing 40 beses, asin dai siya nagpupundo. An sarong mas hoben na sister nagsurat na an pagbasa kan Bibliya nakatabang sa saiya na mahiling na si Jehova totoo. Bilang resulta, nagin mas harani siya sa saiyang Ama sa langit. Sinabi niya, “Dai pa ako nuarin man nagin arog kaini kaugma sa sakong buhay!”

² Dinagka ni apostol Pedro an gabos na magin ‘danay na paha para sa purong gatas na espirituwal.’ (1 Ped. 2:2, BPV)a An gabos na naghihinguwang mapaniguan an pagkapahang iyan paagi sa pag-adal kan Bibliya asin nag-aaplikar kan mga katukduan kaiyan igwa nin malinig na konsensiya saka katuyuhan sa buhay. Nagkakaigwa sinda nin nagdadanay na pakikikatuod sa iba na namumuot asin naglilingkod man sa tunay na Diyos. An gabos na ini marahay na dahilan na ‘mag-ugma sa katugunan nin Diyos.’ (Roma 7:22) Pero, may iba pang mga pakinabang. Ano an nagkapira sa mga iyan?

³ Mantang urog kang nakakanuod dapit ki Jehova asin sa saiyang Aki, nag-uurog man an saimong pagkamuot sa sainda asin sa saimong kapwa. An pagkaigwa nin tamang kaaraman na suno sa Kasuratan nakakatabang sa saimo na mahiling kun paano an makinuyog na katawuhan ililigtas nin Diyos sa dai na mahahaloy sa naghihingagdan nang sistemang ini nin mga bagay. Igwa ka nin positibong mensahe kan maugmang bareta na ikakahiras sa mga tawo sa saimong ministeryo. Bebendisyunan ka ni Jehova mantang itinutukdo mo sa iba an mga bagay na nanudan mo sa pagbasa kan Tataramon nin Diyos.

 4. Paano mo maninigong basahon an Bibliya?

⁴ Habo ni Jehova na an saiyang mga lingkod maghidali sa pagbasa kan saiyang Tataramon. Sinabihan niya si Josue kan suanoy: ‘An surat kan pagbuot na ini dai nanggad makasuhay sa saimong nguso, ata ngani sa aldaw asin sa banggi maghurop-hurop ka sa saiya.’ (Jos. 1:8; Sal. 1:2) Hinahagad daw sa saimo kan instruksiyon na ini na talagang sawudon, o sayudon, sa maluyang boses an gabos na tataramon na babasahon mo puon Genesis sagkod Kapahayagan? Dai. An buot sabihon kaiyan, maninigo na magbasa ka sa paagi na matao sa saimo nin panahon na maghurop-hurop. Matabang iyan sa saimo na magkonsentrar sa mga kabtang na nangurugnang kapakipakinabang asin nakakaparigon sa saimo sa oras na iyan. Pag may naagihan kang arog kaiyan—mga pananaram, bersikulo, o pagkasaysay—basahon iyan nin luway-luway, na tibaad silensiyong ibinubuka an nguso. An pinakapunto nin sarong teksto sa Kasuratan puwedeng magkaigwa nin dakulang epekto sa saimo personalmente. Taano ta importante ini? Huling an pakasabot sa kahulugan kan konseho nin Diyos nagtatao sa saimo nin mapuwersang motibasyon na iaplikar iyan.

5-7. Iilustrar kun paano an pagbasa kan Tataramon nin Diyos na may paghurop-hurop puwedeng makatabang sa saimo na (a) magdanay na malinig sa moral; (b) trataron an iba nin may pasensiya asin kabuutan; (c) magtiwala ki Jehova dawa sa masakit na mga panahon.

⁵ Kapakipakinabang an pagbasa na may paghurop-hurop pag yaon ka sa mga libro sa Bibliya na dai ka gayong pamilyar. Sa pag-ilustrar, imahinara an tulong senaryo. Inot, isip-isipa an sarong brother na yaon na sa hula ni Oseas sa saiyang personal na pagbasa kan Bibliya. Sa kapitulo 4, nagpundo siya pagkatapos na mabasa nin luway-luway an bersikulo 11 sagkod 13. (Basahon an Oseas 4:11-13.) Taano? Napaisip siya kan mga bersikulong iyan huling nasasakitan siyang labanan an panggigipit sa eskuwelahan na gumibo nin imoral. Pighurop-hurop niya iyan asin nagsabi sa sadiri: ‘Nahihiling ni Jehova an maraot na ginigibo nin mga tawo dawa pa sa pribado. Habo kong makulgan an saiyang buot.’ Nagdesisyon an brother na magdanay na malinig sa moral sa atubang ni Jehova.

⁶ Sa ikaduwang senaryo, sarong sister an nagbabasa kan hula ni Joel asin naagihan niya an kapitulo 2, bersikulo 13. (Basahon an Joel 2:13.) Mantang luway-luway niyang binabasa an bersikulong iyan, pighurop-hurop niya kun paano niya maninigong arugon si Jehova, na ‘mahihirakon asin maugayon, maluway maanggot, asin dakula sa pagkahirak.’ Nagdesisyon siyang magbago huling kun minsan malanit asin anggot siya kun magtaram sa saiyang agom asin sa iba.

⁷ Ikatulo, imahinara an sarong Kristiyanong ama na nawaran nin trabaho asin nahahadit sa kapakanan kan saiyang agom asin mga aki. Sa Nahum 1:7, luway-luway niyang binasa na si Jehova ‘namimidbid niya an mga nananarig sa saiya’ asin nagtatao sa sainda nin proteksiyon siring sa ‘pailihan sa aldaw nin kasakitan.’ Nakaranga iyan sa saiya. Namatian niya an mamumuton na pag-ataman ni Jehova asin dai nang gayo nahahadit. Dangan luway-luway niyang binasa an bersikulo 15. (Basahon an Nahum 1:15.) Narealisar kan satong tugang na paagi sa paghuhulit kan maugmang bareta sa masakit na mga panahon, ipinapahiling niya na talagang si Jehova an pailihan niya. Mantang padagos na naghahanap nin sekular na trabaho, napahiro na man siya na suportaran an pagluwas sa langtad sa tahaw kan semana.

 8. Sabihon sa halipot an sarong espirituwal na diyamante na nakua mo sa pagbasa kan Bibliya.

⁸ An kapakipakinabang na mga punto na nasambitan pa sana makukua sa mga libro sa Bibliya na tibaad dipisil sabuton para sa iba. Mantang sinisiyasat mo an mga libro nin Oseas, Joel, asin Nahum na may pagmawot na makanuod, gugustuhon mong basahon na may paghurop-hurop an iba pang mga bersikulo diyan. Imahinara na sana kun gurano kadakulang kadunungan asin karangahan an makukua mo sa isinurat kan mga propetang idto! Asin kumusta man an iba pang libro sa Bibliya? An Tataramon nin Diyos garo minahan na kadakul nin diyamante. Hanapon na marhay an mga diyamante! Iyo, basahon an bilog na Bibliya na an katuyuhan makahanap nin arog sa diyamanteng paggiya asin pag-asegurar nin Diyos.

 9. Paano kita magkakaigwa nin urog na pakasabot sa kabutan nin Diyos?

⁹ Apuwera sa pagbasa nin sarong kabtang kan Bibliya aroaldaw, importante man na pagmaigutan mong magkaigwa nin pakasabot asin pakarurop. Kaya, gamiton na marhay an mga publikasyon kan organisasyon ni Jehova tanganing siyasaton an mga impormasyon dapit sa mga tawo, lugar, asin pangyayari na nabasa mo. O kun dai ka sigurado kun paano puwedeng iaplikar sa saimong buhay an sarong katukduan sa Bibliya, puwede kang magpatabang sa sarong elder sa kongregasyon o sa saro pang maygurang na Kristiyano. Tanganing iilustrar an importansiya kan pagkaigwa nin urog na pakasabot, pag-ulayan ta an halimbawa nin sarong Kristiyano kan inot na siglo na nagmaigot na magibo mismo iyan. Siya si Apolos.

10, 11. (a) Paano natabangan si Apolos na umuswag bilang ministro kan maugmang bareta? (b) Ano an manunudan ta sa pagkasaysay mapadapit ki Apolos? (Hilingon an kahon na “Suno daw sa Pinakabagong Impormasyon an Saimong Pagtutukdo?”)

¹⁰ Si Apolos sarong Judiong Kristiyano na ‘aram na gayo an mga Kasuratan’ asin ‘pano nin entusiyasmo.’ Ini an sabi kan libro nin Guibo dapit sa saiya: ‘Siya nagtataram asin nagtutukdo kan katotoohan manungod ki Jesus maski ngani an aram niya sana iyo an [bawtismo] ni Juan.’ Dai aram ni Apolos na an itinutukdo niya dapit sa bawtismo bako nang suno sa pinakabagong impormasyon. Pagkatapos na madangog siyang magtukdo sa Efeso, ipinaliwanag sa saiya kan Kristiyanong mag-agom na si Priscila asin Aquila ‘nin mas malinaw an dapit sa Dalan nin Diyos.’ (Gui. 18:24-26, BPV) Paano nakinabang si Apolos digdi?

¹¹ Pagkatapos maghulit sa Efeso, nagduman si Apolos sa Acaya. ‘Pag-abot duman, natabangan niyang marhay idtong mga nagturubod sa paagi kan biyaya nin Diyos. Maisog na nakipagdebate siya nin hayag sa gabos na Judio; pinatunayan niya, sa paagi kan Kasuratan, na si Jesus iyo an Cristo.’ (Gui. 18:27, 28, BPV) Kan panahon na iyan, ikakapaliwanag na niya nin tama an kahulugan kan Kristiyanong bawtismo. Huli sa saiyang urog na pakasabot, ‘natabangan niyang marhay’ an mga baguhan na umuswag sa tunay na pagsamba. Ano an manunudan ta sa pagkasaysay na ini? Arog ni Apolos, nagmamaigot kita na masabutan an nababasa ta sa Bibliya. Alagad, kun an sarong eksperyensiyadong kapagtubod magsuherir kun paano kita makakapagtukdo nin mas epektibo, gusto tang akuon an tabang na iyan nin may kapakumbabaan asin pagpapasalamat. Kun gigibuhon ta iyan, mauswag an kalidad kan satong sagradong paglilingkod.

12, 13. Iilustrar kun paano an mataktikang paggamit kan Kasuratan puwedeng makatabang sa mga tinutukduan sa Bibliya na umuswag.

¹² Arog ni Priscila, Aquila, asin Apolos, puwede man kitang magin bendisyon sa iba. Kun an itinao mong pamparigon sa buot nakatabang sa sarong interesado na mapangganahan an sarong ulang sa saiyang pag-uswag sa espirituwal, ano an pagmati mo? O kun ika sarong elder, ano an pagmati mo kun pasalamatan ka nin sarong kapagtubod huli sa itinao mong maka-Kasuratan na konseho na nakatabang sa saiya sa panahon nin kadipisilan? Daing duda na an paggamit kan Tataramon nin Diyos tanganing tabangan an iba na mapauswag an saindang buhay nagtatao nin satispaksiyon asin kagayagayahan.b Hilingon kun paano mo magigibo an pasuhan na iyan.

¹³ Mapadapit sa tunay asin palsong pagsamba, dakul na Israelita kan panahon ni Elias an garo nakasakrang sa kudal. An konseho ni Elias sa mga tawong idto puwedeng makatabang sa sarong tinutukduan sa Bibliya na dai pa nakapagdesisyon na maglingkod ki Jehova. (Basahon an 1 Hade 18:21.) Ini an saro pang situwasyon: Kun an sarong interesado natatakot sa reaksiyon kan saiyang mga amigo o pamilya, puwede mong mapakusog an saiyang pagmawot na sambahon si Jehova paagi sa pangangatanusan na basado sa Isaias 51:12, 13.—Basahon.

14. Ano an makakatabang sa saimo na magirumduman an mga teksto sa Bibliya pag kaipuhan mo iyan tanganing matabangan an iba?

¹⁴ Malinaw na dakul na tataramon sa Bibliya an puwedeng magparigon, magtanos, o magpakusog sa mga nagbabasa kaiyan. Pero tibaad ihapot mo, ‘Ano an gigibuhon ko tanganing may magamit akong mga teksto pag kaipuhan ko iyan?’ Basahon an Bibliya asin hurop-hurupon an mga kaisipan nin Diyos aroaldaw. Paagi kaiyan, makakatipon ka nin dakul na maka-Kasuratan na punto na puwedeng ipagirumdom kan espiritu ni Jehova pag kaipuhan mo iyan.—Mar. 13:11; basahon an Juan 14:26.c

15. Ano an makakatabang sa saimo na mas lubos na masabutan an Tataramon nin Diyos?

¹⁵ Arog ni Hading Salomon, mamibi ki Jehova na tawan ka nin kadunungan sa pag-asikaso kan teokratikong mga paninimbagan. (2 Cron. 1:7-10) Arog kan ginibo kan mga propeta kan suanoy, ‘maghanap asin magsiyasat nin maigot’ sa Tataramon nin Diyos para sa tamang kaaraman dapit ki Jehova asin sa saiyang kabutan. (1 Ped. 1:10-12) Dinagka ni apostol Pablo si Timoteo na pag-adalan an ‘mga tataramon nin pagtubod asin nin marahay na katukduan.’ (1 Tim. 4:6) Kun ginigibo mo iyan, nasa marahayon na kamugtakan ka na tabangan an iba sa espirituwal. Kasabay kaiyan, napapakusog mo man an saimong pagtubod.

16. (a) Paano nakinabang an mga taga Berea sa maingat na ‘pagsiyasat kan mga kasuratan aroaldaw’? (b) Taano ta mahalagang marhay sa sato ngunyan an pagbasa kan Bibliya aroaldaw?

¹⁶ Nakaugalian na kan mga Judio sa siyudad nin Berea sa Macedonia na maingat na ‘siyasaton an mga kasuratan aroaldaw.’ Kan ihulit sa sainda ni Pablo an maugmang bareta, an sinabi niya ikinumparar ninda sa saindang kaaraman sa Kasuratan. An resulta? Dakul an nakumbinsir na siya nagtutukdo kan katotoohan, asin sinda “nagturubod.” (Gui. 17:10-12) Ipinapahiling kaini na an aroaldaw na pagbasa kan Bibliya nagpapakusog kan pagtubod ki Jehova. An siring na pagtubod, an ‘katunayan kan mga bagay na pinaglalaom,’ mahalagang marhay tanganing makaligtas kita pasiring sa bagong kinaban nin Diyos.—Heb. 11:1.

17, 18. (a) Paano pinoprotektaran kan makusog na pagtubod asin pagkamuot an piguratibong puso nin sarong Kristiyano? (b) Paano an paglaom nagpoprotektar sa sato sa peligro?

¹⁷ May marahay na dahilan si Pablo kan siya magsurat: ‘Huling kita mga sa aldaw, magpakamayukod kita, na isulog an takop sa daghan nin pagtubod asin nin pagkamuot, asin an paglaom nin kaligtasan na takop sa payo.’ (1 Tes. 5:8) An puso nin sarong suldados nangangaipo nin proteksiyon laban sa mga kaiwal. Kaagid kaiyan, an piguratibong puso nin sarong Kristiyano nangangaipo man nin proteksiyon sa kapangyarihan nin kasalan. Ano an mangyayari kun, apuwera sa makusog na pagtubod sa mga panuga nin Diyos, an sarong lingkod ni Jehova igwa man nin pagkamuot sa Saiya saka sa kapwa? Isinusulog kan siring na lingkod an pinakamatibay na espirituwal na takop sa daghan. Posibleng marhay na dai siya magibo nin ano man na makakawara kan pag-uyon nin Diyos.

¹⁸ Sinambit man ni Pablo an takop sa payo, “an paglaom nin kaligtasan.” Kan mga panahon kan Bibliya, madali sanang magadan sa ralaban an sarong suldados na mayong proteksiyon sa payo. Pero kun may matibay na takop sa payo, makakaligtas siya sa mga tama sa payo, na dai nagsasapar nin seryosong danyos. Paagi sa pag-adal kan saiyang Tataramon, napapatalubo ta an satong paglaom sa pagliligtas ni Jehova. An makusog na pagtubod matabang sa sato na labanan an mga apostata asin an saindang nakakaraot na ‘mga basang na tarabilan’ o tataramon. (2 Tim. 2:16-19) Papakusugon man kita kan satong paglaom na sayumahan idtong mga makakaimpluwensiya sa sato na gumibo kan mga bagay na kinokondenar ni Jehova.

19, 20. Taano ta pinapahalagahan tang marhay an Tataramon nin Diyos, asin paano ta ipinapahiling an satong pag-apresyar diyan? (Hilingon an kahon na “Itinatao ni Jehova Kun Ano an Mismong Kaipuhan Ko.”)

¹⁹ Miyentras na mas nagrarani kita sa panahon kan katapusan, mas kaipuhan tang manarig sa Tataramon ni Jehova. An konsehong hali diyan nakakatabang sa sato na itanos an salang mga ugali asin kontrolon an satong makasalan na tendensiya. Paagi sa pamparigon sa buot asin karangahan na itinatao kaiyan, mapapangganahan ta an mga pagbalo hali ki Satanas asin sa saiyang kinaban. Paagi sa paggiya ni Jehova na yaon sa saiyang Tataramon, makakapagdanay kita sa dalan pasiring sa buhay.

²⁰ Girumdumon na kabutan nin Diyos na “an gabos na klase nin tawo makaligtas.” An mga lingkod ni Jehova kaiba sa “gabos na klase nin tawo.” Kaiba man diyan idtong mga matatabangan ta paagi sa satong paghuhulit asin pagtutukdo. Pero an gabos na nagmamawot na makaligtas dapat na magkaigwa nin “tamang kaaraman dapit sa katotoohan.” (1 Tim. 2:4, NW) Kaya, an pagbasa kan Bibliya asin pag-aplikar kan ipinasabong na mga instruksiyon diyan kaipuhan tanganing makaligtas sa huring mga aldaw. Iyo, an pagbasa niyato kan Bibliya aroaldaw nagpapahiling kun gurano ta pinapahalagahan an mahalagang marhay na Tataramon nin katotoohan ni Jehova.—Juan 17:17.