‘Isolog Nindo an Pakatios’

“Isolog nindo an mamomoton na mga pagmate nin pagdamay . . . asin pakatios.”—COLOSAS 3:12.

 1. Isaysay an sarong marahayon na halimbawa nin pakatios.

SI Regis, na taga timog-solnopan na Pransia, nagin bautisadong Saksi ni Jehova kan 1952. Sa laog nin dakol na taon ginibo kan saiyang agom na babae an gabos kaining mahihimo tanganing olangon an saiyang mga paghihingoa na paglingkodan si Jehova. Prinobaran kaini na laboton an rueda kan saiyang lunadan tanganing olangon sia sa pag-atender sa mga pagtiripon, asin sarong beses sinundan pa ngani sia kaini mantang sia naghuhulit kan mensahe kan Biblia sa harong-harong, na tinutuyatuya sia mantang sia nakikipag-olay sa mga kagharong manongod sa maogmang bareta kan Kahadean. Sa ibong kan sige-sigeng pagtumang na ini, si Regis padagos na nagin matinios. Sa siring, si Regis sarong marahayon na halimbawa para sa gabos na Kristiano, huling hinahagad ni Jehova sa gabos na nagsasamba sa saiya na magin matinios sa saindang relasyon sa iba.

 2. Ano an literal na kahulogan kan termino sa Griego para sa “pakatios,” asin ano an ipinaririsa kan terminong iyan?

² An termino sa Griego para sa “pakatios” literal na nangangahulogan nin “pagigin halaba nin espiritu.” An New World Translation na Ingles sampulong beses na tinatradusir an terminong ini na “pakatios,” tolong beses na “pasensia,” asin sarong beses na “pagpapasensia.” An mga pananaram sa Hebreo sagkod sa Griego na trinadusir na “pakatios” may ideya nin pasensia, pagpopogol, asin pagigin maluway sa pagkaanggot.

 3. Paano an Kristianong pagmansay sa pakatios laen kisa pagmansay kan mga Griego kaidtong enot na siglo?

³ An pakatios dai minansay kan mga Griego kaidtong enot na siglo bilang birtud. An mismong termino na iyan dai ginamit kan mga pilosopong Estoico. Segun sa nag-espesyalisar sa Biblia na si William Barclay, an pakatios “iyo an mismong kabaliktaran kan birtud na Griego,” na kabilang sa iba pang bagay ipinaghahambog “an dai pagtogot sa ano man na pan-iinsulto o perwisyo.” Sinabi nia: “Para sa Griego an pusog na lalaki iyo an lalaki na ginigibo an gabos tanganing makabalos. Para sa Kristiano an pusog na lalaki iyo an lalaki na, dawa kaya niang bumalos, habong gibohon iyan.” Tibaad ibinilang kan mga Griego na an pakatios sarong tanda nin kaluyahan, alagad digdi, arog sa iba pang kamugtakan, “an rungaw na bagay nin Dios orog kadonong kisa mga tawo, asin an maluyang bagay nin Dios orog kakosog kisa mga tawo.”​—1 Corinto 1:25.

An Halimbawa nin Pakatios ni Cristo

4, 5. Anong makangangalas na halimbawa nin pakatios an itinao ni Jesus?

⁴ Ikaduwa sana ki Jehova, si Cristo Jesus nagtao nin marahayon na halimbawa nin pakatios. Kan nasa grabeng pangigipit, si Jesus nagpaheling nin makangangalas na pagpopogol. Dapit sa saiya ihinula: “Sia nagigipit na gayo, asin itinotogot nia na sia kologan; alagad ta dai nia binuka an saiyang ngoso. Sia dinadara siring sa sarong karnero pasiring sa bunoan; asin siring sa babaeng karnero na nagin pula sa atubangan kan saiyang mga paratusar, dai man nia bubukahon an saiyang ngoso.”​—Isaias 53:7.

⁵ Pambihira nanggad na pakatios an ipinaheling ni Jesus sa bilog niang ministeryo digdi sa daga! Tinios nia an mapandayang mga pagkuestion kan mga kalaban nia asin an mga pan-iinsulto kan mga paratumang. (Mateo 22:15-46; 1 Pedro 2:23) Pinagpasensiahan nia an saiyang mga disipulo, dawa kan pirepirme nindang pinag-iiriwalan kun siisay baga an pinakadakula. (Marcos 9:33-37; 10:35-45; Lucas 22:24-27) Asin kahangahanga nanggad na pagpopogol an ipinaheling ni Jesus kaidtong banggi kan pagpasaloib sa saiya kan si Pedro asin Juan nakatorog pakatapos na sabihan na “magdanay kamong mapagbantay”!​—Mateo 26:36-41.

 6. Paano nakinabang si Pablo sa pakatios ni Jesus, asin ano an manonodan ta digdi?

⁶ Pagkagadan asin pagkabuhay nia liwat, si Jesus padagos na nagin matinios. Partikularmenteng aram ini ni apostol Pablo, huling sia dating paralamag sa mga Kristiano. Si Pablo nagsurat: “Fiel asin maninigong lubos na akoon an pagsabi na si Cristo Jesus napadigdi sa kinaban tanganing magligtas nin mga parakasala. Sa sainda ako an nangongorog. Minsan siring, an dahelan na ako naherakan iyo na tanganing paagi sa sako bilang an nangongorog na halimbawa ikapahayag ni Cristo Jesus an gabos niang pakatios bilang arogan kaidtong matubod sa saiya manongod sa buhay na daing katapusan.” (1 Timoteo 1:​15, 16) Ano man an satong nakaagi, kun kita matubod ki Jesus, sia magigin matinios sa sato​—minsan ngani, siempre, inaasahan na kita mapaheling kan “mga gibo na angay sa pagsolsol.” (Gibo 26:20; Roma 2:4) An mga mensaheng ipinadara ni Cristo sa pitong kongregasyon sa Asia Minor nagpapaheling na minsan ngani sia matinios, talagang nag-aasa sia nin pag-oswag.​—Kapahayagan, kapitulo 2 asin 3.

Sarong Bunga kan Espiritu

 7. Ano an koneksion kan pakatios asin kan banal na espiritu?

⁷ Sa ika-5 kapitulo kan saiyang surat sa mga taga Galacia, ipinaheheling ni Pablo an kalaenan kan mga gibo kan laman sa bunga kan espiritu. (Galacia 5:19-23) Huling an pakatios saro sa mga kualidad ni Jehova, an kualidad na ini naggigikan sa saiya asin sarong bunga kan saiyang espiritu. (Exodo 34:​6, 7) Tunay nanggad, an pakatios ikaapat sa lista kan paglaladawan ni Pablo kan bunga kan espiritu, kaiba kan “pagkamoot, kagayagayahan, katoninongan, . . . kabootan, karahayan, pagtubod, kahoyoan, pagpopogol sa sadiri.” (Galacia 5:​22, 23) Kun siring, kun an mga lingkod nin Dios nagpapaheling nin diosnon na pagpapasensia, o pakatios, ginigibo ninda iyan sa impluwensia kan banal na espiritu.

 8. Ano an mapangyari sa sato na makultibar an bunga kan espiritu, kabale an pakatios?

⁸ Minsan siring, dai ini nangangahulogan na ipinipirit ni Jehova an saiyang espiritu sa sarong tawo. Kita dapat na gikan sa boot na magpahunod sa impluwensia kaiyan. (2 Corinto 3:17; Efeso 4:30) Tinotogotan ta an espiritu na maghiro sa satong buhay paagi sa pagkultibar kan bunga kaiyan sa gabos niatong ginigibo. Pakatapos na sarosaroon an mga gibo kan laman asin an bunga kan espiritu, idinugang ni Pablo: “Kun kita nabubuhay sa espiritu, magpadagos man kitang maglakaw na tanos sa espiritu. Dai kamo palagalag: An Dios dai maoolog-olog. Huli ta ano man an itinatanom nin tawo, ini man an saiyang aanihon; huli ta sia na nagtatanom sa saiyang laman mag-aani man nin pagkatunaw sa saiyang laman, alagad an nagtatanom sa espiritu mag-aani nin buhay na daing katapusan gikan sa espiritu.” (Galacia 5:25; 6:​7, 8) Tanganing kita magin mapanggana sa pagkultibar nin pakatios, dapat man niatong kultibaron an iba pang bunga na pinaluluwas kan banal na espiritu sa mga Kristiano.

“An Pagkamoot Matinios”

 9. Tadaw gayod ta sinabihan ni Pablo an mga taga Corinto na “an pagkamoot matinios”?

⁹ Ipinaheling ni Pablo na may espesyal na koneksion an pagkamoot asin an pakatios kan sabihon nia: “An pagkamoot matinios.” (1 Corinto 13:4) An sarong nag-espesyalisar sa Biblia, si Albert Barnes, nagsusuherir na idinoon ini ni Pablo dahelan sa pasuruhay asin iriwal na nangyari kaidto sa Kristianong kongregasyon sa Corinto. (1 Corinto 1:​11, 12) Sinabi ni Barnes: “An termino na ginamit digdi [para sa pakatios] kabaliktaran nin paghidali: nin anggot na mga pananaram asin pag-iisip, asin nin pagigin iritable. Nangangahulogan iyan kan kamugtakan nin isip na NAKAKATIOS kun inaapi, pinoprobokar.” An pagkamoot asin pakatios nakakokontribwir pa man giraray nin dakula sa katoninongan kan Kristianong kongregasyon.

10. (a) Sa anong paagi kita tinatabangan kan pagkamoot na magin matinios, asin anong hatol an itinao ni apostol Pablo dapit sa bagay na ini? (b) Ano an ikinomento nin sarong nag-espesyalisar sa Biblia dapit sa pakatios asin kabootan nin Dios? (Helingon an nota sa ibaba.)

¹⁰ “An pagkamoot matinios asin maboot. An pagkamoot . . . dai naghahanap kan saiyang sadiring kapakanan, dai napaaanggot.” Huli kaini, sa dakol na paagi, tinatabangan kita kan pagkamoot na magin matinios.a (1 Corinto 13:​4, 5) An pagkamoot pinangyayari kita na mapasensiang magpatiniriostios asin girumdomon na kita gabos bakong sangkap asin igwa nin mga sala patin depekto. Tinatabangan kita kaiyan na magin makonsiderasyon asin mapagpatawad. Ineenkaminar kita ni apostol Pablo na maglakaw na “igwa nin lubos na kababaan nin isip asin kahoyoan, na may pakatios, na nagpapatiriostiosan sa pagkamoot, na maigot na naghihingoa na otobon an pagkasararo kan espiritu sa nakapagpapasarong bogkos nin katoninongan.”​—Efeso 4:1-3.

11. Taano ta partikularmenteng mahalaga na magin matinios sa Kristianong mga komunidad?

¹¹ An pakatios kan saindang mga miembro nakakokontribwir sa katoninongan asin kaogmahan kan Kristianong mga komunidad, baga man sa mga kongregasyon, erokan na Bethel, erokan nin mga misyonero, grupo nin mga nagtatrabaho sa konstruksion, o paadalan. Huli sa mga pagkakalaen nin personalidad, hilig, pagkapadakula, pamantayan nin pagigin magalang, kalinigan pa ngani, puedeng bumangon sa panapanahon an nakakokonsumir na mga situwasyon. Totoo man ini sa mga pamilya. An pagigin maluway sa pagkaanggot mahalagang marhay. (Talinhaga 14:29; 15:18; 19:11) An pakatios​—mapasensiang pagtagal, na naglalaom na magrarahay pa an situwasyon​—kaipuhan kan gabos.​—Roma 15:1-6.

An Pakatios Tinatabangan Kitang Makatagal

12. Taano ta mahalaga an pakatios sa panahon nin masakit na mga kamugtakan?

¹² Tinatabangan kita kan pakatios na matagalan an masakit na mga situwasyon na garo baga dai nang katapusan o mayo nin ano man na ensegidang solusyon. Totoo ini ki Regis, na nasambitan sa kapinonan. Sa laog nin dakol na taon, kinontra kan saiyang agom an mga paghihingoa nia na paglingkodan si Jehova. Minsan siring, sarong aldaw ruminani ini sa saiya na naghihibi asin nagsabi: “Aram kong iyan an katotoohan. Tabangi man ako. Gusto kong adalan ako sa Biblia.” Sa kahurihurihi nabautismohan sia bilang Saksi. Sabi ni Regis: “Patunay ini na binendisyonan ni Jehova an mga taon na idto nin masakit na paghihingoa, pagpapasensia, asin pakatagal.” Binalosan an saiyang pakatios.

13. Ano an nagpangyari ki Pablo na makatagal, asin paano makatatabang sa sato an saiyang halimbawa tanganing makatagal?

¹³ Kaidtong enot na siglo C.E., si apostol Pablo sarong marahayon na halimbawa nin pakatios. (2 Corinto 6:3-10; 1 Timoteo 1:16) Sa paghinanapos kan saiyang buhay kan hinahatolan nia an saiyang hoben pang kaibaiba na si Timoteo, pinatanidan sia ni Pablo na an gabos na Kristiano mapapaatubang sa mga pagbalo. Sinitar ni Pablo an saiya mismong halimbawa asin irinekomendar an pundamental na Kristianong mga kualidad na kaipuhan sa pakatagal. Sia nagsurat: “Ika maingat na nagsunod sa sakong katokdoan, sa sakong pamumuhay, sa sakong katuyohan, sa sakong pagtubod, sa sakong pakatios, sa sakong pagkamoot, sa sakong pagtagal, sa mga paglamag sa sako, sa sakong mga kasakitan, sa klase nin mga bagay na nangyari sa sako sa Antioquia, sa Iconio, sa Listra, sa klase nin mga paglamag na tinios ko; alagad ta sa gabos na iyan ilinigtas ako kan Kagurangnan. Sa katotoohan, an gabos na nagmamawot na mamuhay na may diosnon na debosyon kaibahan ni Cristo Jesus paglalamagon man.” (2 Timoteo 3:10-12; Gibo 13:49-51; 14:19-22) Tanganing makatagal, kita gabos nangangaipo nin pagtubod, pagkamoot, asin pakatios.

Solog an Pakatios

14. Sa ano ibinaing ni Pablo an diosnon na mga kualidad na arog kan pakatios, asin ano an ihinatol nia sa mga Kristiano sa Colosas?

¹⁴ An pakatios asin iba pang diosnon na kualidad ibinaing ni apostol Pablo sa gubing na maninigong isolog kan Kristiano pakatapos na hubaon an mga gibo na karakteristiko kan “daan na personalidad.” (Colosas 3:5-10) Sia nagsurat: “Bilang mga pinili nin Dios, banal asin namomotan, isolog nindo an mamomoton na mga pagmate nin pagdamay, kabootan, kababaan nin isip, kahoyoan, asin pakatios. Padagos kamong magpatiriostios asin sueltong magpatarawadtawadan kun an siisay man igwa nin sumbong tumang sa saro. Kun paanong kamo sueltong pinatawad ni Jehova, siring man an gibohon nindo. Alagad, laen pa sa gabos na bagay na ini, isolog nindo an pagkamoot, huli ta iyan sangkap na bungkos nin pagkasararo.”​—Colosas 3:12-14.

15. Ano an resulta kun an mga Kristiano ‘nagsosolog’ nin pakatios asin iba pang diosnon na kualidad?

¹⁵ Kun an mga miembro nin kongregasyon ‘nagsosolog’ nin pagdamay, kabootan, kababaan nin isip, kahoyoan, pakatios, asin pagkamoot, nareresolberan ninda an mga problema asin may pagkasararong nagpapadagos sa paglilingkod ki Jehova. Sa partikular an Kristianong mga paraataman kaipuhan na magin matinios. Tibaad may mga panahon na kaipuhan nindang sagweon an ibang Kristiano, alagad igwa nin laen-laen na paagi nin paggibo kaini. Isinabi ni Pablo an pinakamarahay na aktitud kan sumurat sia ki Timoteo: “Magsagwe, magtuyaw, magsadol, sa bilog na pakatios asin abilidad sa pagtotokdo.” (2 Timoteo 4:2) Iyo, an mga karnero ni Jehova maninigo na pirmeng trataron na may pakatios, dignidad, asin pagpadangat.​—Mateo 7:12; 11:28; Gibo 20:​28, 29; Roma 12:10.

“Matinios sa Gabos”

16. Ano an puedeng magin resulta kun kita “matinios sa gabos”?

¹⁶ An pakatios ni Jehova sa katawohan nagtatao sa sato nin moral na obligasyon na “magin matinios sa gabos.” (1 Tesalonica 5:14) Nangangahulogan ini nin pagigin mapasensia sa mga kapamilya na bakong Saksi, kataraed, katrabaho, kaklase. Dakol na prehuwisyo an nahale kan mga Saksi na, kun beses sa laog nin dakol na taon, tinios an mga pagtuya o direktang pagtumang nin mga tawo na kairibaiba ninda sa trabaho o sa eskuelahan. (Colosas 4:​5, 6) Si apostol Pedro nagsurat: “Papagdanayon na marahay an saindong gawe-gawe sa tahaw nin mga nasyon, tanganing, sa mga bagay na ipinagtataram ninda kontra sa saindo na garo baga kamo naggibo nin maraot, tibaad huli sa saindong marahay na mga gibo na saindang naheheling pamurawayon ninda an Dios sa aldaw kan saiyang pagsiyasat.”​—1 Pedro 2:12.

17. Paano niato maaarog an pagkamoot asin pakatios ni Jehova, asin taano ta maninigo niatong gibohon iyan?

¹⁷ An pakatios ni Jehova mangangahulogan nin kaligtasan para sa minilyon. (2 Pedro 3:​9, 15) Kun inaarog ta an pagkamoot asin pakatios ni Jehova, kita may pasensiang magpapadagos sa paghuhulit kan maogmang bareta kan Kahadean nin Dios asin sa pagtotokdo sa iba na pumasakop sa pamamahala kan Kahadean ni Cristo. (Mateo 28:18-20; Marcos 13:10) Kun kita maontok sa paghuhulit, garo man sana gusto tang limitaran an pakatios ni Jehova asin dai ta rinerekonoser an katuyohan kaiyan, na tanganing an mga tawo makapagsolsol.​—Roma 2:4.

18. Ano an ipinamibi ni Pablo para sa mga taga Colosas?

¹⁸ Sa saiyang surat sa mga Kristiano sa Colosas, Asia Minor, si Pablo nagsurat: “Kaya ngani kami man, magpoon kan aldaw na madangog niamo iyan, dai nag-ontok sa pagpamibi para sa saindo asin sa paghagad na kamo mapano kan tamang kaaraman sa saiyang kabotan sa bilog na kadonongan asin espirituwal na pakatalastas, tanganing maglakaw na angay ki Jehova sa katuyohan na lubos na makapaogma sa saiya mantang kamo padagos na namumunga sa lambang marahay na gibo asin nag-ooswag sa tamang kaaraman dapit sa Dios, na pinakokosog sa bilog na kapangyarihan sono sa sokol kan saiyang mamuraway na kapangyarihan tanganing lubos na makatagal asin magin matinios na may kagayagayahan.”​—Colosas 1:9-11.

19, 20. (a) Paano niato malilikayan na mansayon bilang pagbalo an nagpapadagos na pakatios ni Jehova? (b) Anong mga pakinabang an ibubunga kan satong pagigin matinios?

¹⁹ An nagpapadagos na pakatios, o pasensia ni Jehova dai magigin pagbalo para sa sato kun kita ‘pano kan tamang kaaraman sa saiyang kabotan,’ na an “gabos na klase nin tawo makaligtas asin makaabot sa tamang kaaraman sa katotoohan.” (1 Timoteo 2:4) Kita ‘padagos na mamumunga sa lambang marahay na gibo,’ partikular na an paghuhulit kan “maogmang baretang ini kan kahadean.” (Mateo 24:14) Kun fiel kitang magpapadagos sa paggibo kaini, kita ‘pakokosogon [ni Jehova] sa bilog na kapangyarihan,’ na nagpapangyaring kita “lubos na makatagal asin magin matinios na may kagayagayahan.” Sa paggibo kaiyan, kita ‘maglalakaw na angay ki Jehova,’ asin mapapasato an katoninongan na ibinubunga kan pakaaram na kita ‘lubos na nakapaoogma sa saiya.’

²⁰ ogod na kita magin biyong kombensido sa pagigin madonong kan pakatios ni Jehova. Iyan nagkokontribwir sa kaligtasan niato asin sa kaligtasan kan mga naghihinanyog sa satong paghuhulit asin pagtotokdo. (1 Timoteo 4:16) An pagkultibar kan bunga kan espiritu​—pagkamoot, kabootan, karahayan, kahoyoan, asin pagpopogol sa sadiri​—magpapangyari sa sato na magin matinios na may kagayagayahan. Mas makapamumuhay kitang matoninong sa kaibahan kan mga kapamilya niato siring man kan satong mga tugang na lalaki asin babae sa laog kan kongregasyon. Tatabangan man kita kan pakatios na magin mapasensia sa satong mga katrabaho o kaeskuela. Asin an satong pakatios magkakaigwa nin katuyohan, an pagligtas sa mga paragibo nin sala asin an pagpamuraway sa Dios nin pakatios, si Jehova.

[Nota sa Ibaba]

Ikapaliliwanag daw Nindo?

• Sa anong mga paagi na si Cristo sarong makangangalas na halimbawa nin pakatios?

• Ano an matabang sa sato na makultibar an pakatios?

• Paano an pakatios nakatatabang sa mga pamilya, Kristianong komunidad, asin kamagurangan?

• Paano an satong pagigin matinios magtatao nin mga pakinabang sa sato asin sa iba?

[Ritrato sa pahina 15]

Dawa kan nasa grabeng pangigipit, si Jesus mapasensia sa saiyang mga disipulo

[Ritrato sa pahina 16]

An Kristianong mga paraataman sinasadol na magtao nin marahay na halimbawa nin pakatios sa pagtratar sa saindang mga tugang

[Ritrato sa pahina 17]

Kun inaarog ta an pagkamoot asin pakatios ni Jehova, padagos kitang maghuhulit kan maogmang bareta

[Ritrato sa pahina 18]

Ipinamibi ni Pablo na an mga Kristiano “magin matinios na may kagayagayahan”