5 Mahalaga Kun Saen Asin Kun Noarin?

MAYONG duda na naririsa mo na sa kadaklan na establisadong relihion, mahalaga an magarbong mga harong na pamibian asin may ipinapaotob na espesipikong mga oras kun noarin maninigong mamibi. Sinasabi daw kan Biblia na may espesipiko sanang mga lugar asin oras na kita dapat mamibi?

Ipinapaheling talaga kan Biblia na may mga panahon na angay mamibi. Halimbawa, bago magkakan si Jesus kaiba kan saiyang mga parasunod, sia nagpasalamat sa Dios sa pamibi. (Lucas 22:17) Asin kan an mga disipulo magtiripon sa pagsamba, sinda iribang namibi. Kun siring, ipinadagos ninda an haloy nang kaugalean sa Judiong mga sinagoga asin sa templo sa Jerusalem. Katuyohan nin Dios na an templo magin “harong na pamibian para sa gabos na nasyon.”—Marcos 11:17.

Kun an mga lingkod nin Dios iribang nagtitiripon asin namimibi, puedeng dangogon an mga kahagadan ninda. Naoogma an Dios kun nagkakasararo an kaisipan kan grupo asin kun an pamibi para sa grupo kaoyon kan mga prinsipyo sa Biblia. An pamibi tibaad magpahiro pa ngani sa saiya na gibohon an dai nia kutana gigibohon. (Hebreo 13:18, 19) Regular na namimibi an Mga Saksi ni Jehova sa mga pagtiripon ninda. Maogma kang iniimbitaran na magbisita sa Kingdom Hall na harani sa saindo tanganing madangog mo mismo an siring na mga pamibi.

Minsan siring, dai sinasabi kan Biblia na may espesipiko sanang oras o lugar na dapat mamibi. Mababasa niato sa Biblia an dapit sa mga lingkod nin Dios na namibi ano man na oras, asin saen man na lugar. Si Jesus nagsabi: “Kun ika namimibi, lumaog ka sa saimong pribadong kuarto asin, pagkapinto mo kaiyan, mamibi ka sa saimong Ama na nasa hilom; dangan an saimong Ama na nagheheling sa hilom an matao nin balos sa saimo.”—Mateo 6:6.

Bako daw na nakakaengganyo iyan? Talagang makakadolok ka sa Soberano kan uniberso ano man na oras, na biyong pribado, asin makakasierto ka na dadangogon ka nia. Kun siring, bako nanggad makangangalas na parateng naghingoa si Jesus na magsolo tanganing mamibi! Sarong beses, magdamlag siang namibi sa Dios, na malinaw na naghahagad nin paggiya dapit sa sarong mahalagang marhay na desisyon.—Lucas 6:12, 13.

Namibi an ibang mga lalaki asin babae na sinambit sa Biblia kan kaipuhan nindang magdesisyon nin magabat o kan sinda may masakiton na mga problema. Kun beses, sinda namimibi nin makosog asin silensio; sinda namimibi man bilang grupo asin kun solo. An mahalaga namibi sinda. Dinagka pa ngani nin Dios an mga lingkod nia: “Mamibi nin daing pondo.” (1 Tesalonica 5:17) Sia andam na magdangog nin daing pondo sa mga naggigibo kan kabotan nia. Bako daw na mamomoton an pagdagkang iyan?

Siempre, sa mapagtuyang kinaban ngonyan, dakol an nag-iisip manongod sa praktikal na halaga nin pamibi. Tibaad ihapot mo, ‘Talaga daw na makakatabang iyan sa sako?’