Katapusan kan Kinaban—Pagkatakot, Pag-antisipar, Asin Pagkadisganar

Ano an namamatian mo manungod sa Disyembre 21, 2012, an petsa sa kalendaryo kan mga Maya na sinasabi kan dakul na magkakaigwa nin pagbabago sa bilog na kinaban? Depende sa inasahan mo, puwedeng nakaginhawa ka, nadisganar, o nawaran nin interes. Saro daw giraray ining salang prediksiyon manungod sa katapusan kan kinaban?

Kumusta man an manungod sa ‘katapusan kan kinaban’ na ilinadawan sa Bibliya? (Mateo 24:3) May mga natatakot na an daga susuluon. An iba interesadong marhay sa kun ano an mangyayari sa katapusan kan kinaban. An dakul nawaran na nin interes huling haloy nang sinasabi sa sainda na harani na an katapusan. Pero mga reaksiyon daw iyan sa inimbentong istorya o sa katotoohan?

Tibaad mabigla ka kun maaraman mo kun ano talaga an sinasabi kan Bibliya manungod sa katapusan kan kinaban. An Bibliya dai sana nagtatao nin mga dahilan na antisiparon an katapusan kundi sinasabi man kaiyan an pagkadisganar nin nagkapira sa pag-isip na garo baga naaatraso iyan. Iniimbitaran ka niyamo na isip-isipon an simbag kan Bibliya sa nagkapirang parate nang ihinahapot manungod sa katapusan kan kinaban.

SIMBAG KAN BIBLIYA: ‘Pinundar [nin Diyos] an daga sa patugmadan kaiyan; dai matatanyog nuarin man asin sagkod lamang.’—SALMO 104:5, An Banal na Biblia.

An daga dai lalaglagon paagi sa kalayo o sa ano man na ibang paagi. Imbes, itinutukdo kan Bibliya na an planetang ini an iistaran nin katawohan sagkod lamang. An Salmo 37:29 (BPVa) nagsasabi: “Masasadirihan kan mga matanos an daga asin mag-eerok sinda duman sagkod lamang.”—Salmo 115:16; Isaias 45:18.

Pagkalalang nin Diyos sa daga, sinabi niya na ‘labi-labi iyan karahay,’ asin iyan pa man giraray an sabuot niya. (Genesis 1:31) Mayo siyang planong rauton iyan. Imbes, nanunuga siya na ‘lalaglagon niya an mga naglalaglag kan daga’ asin poprotektaran niya iyan sa permanenteng pagkaraot.—Kapahayagan 11:18.

Pero, tibaad maisip mo an sinasabi sa 2 Pedro 3:7. Sinasabi kan bersikulong iyan: ‘An kalangitan ngunyan, asin an daga, rinimpos [“natatagama,” BPV] manungod sa kalayo.’ Bako daw na ipinapahiling kaini na susuluon an daga? An totoo, an mga terminong ‘kalangitan,’ “daga,” asin “kalayo” ginagamit kun beses kan Bibliya sa piguratibong paagi, bilang mga simbolo. Halimbawa, kan an Salmo 66:4 magsabing: “An bilog na daga sasambahon ka,” ginamit diyan an “daga” tanganing mangahulugan na sosyedad nin tawo.

Ipinapahiling sa konteksto kan 2 Pedro 3:7 na an kalangitan, daga, asin kalayo na sinambit diyan mga simbolo man. An bersikulo 5 asin 6 may pagkakapareho sa Baha kan panahon ni Noe. Kan panahon na idto, linaglag an sarong suanoy na kinaban, pero dai nawara an satong planeta. Imbes, pinara kan Baha an sarong madahas na sosyedad, o “daga.” (Genesis 6:11) Linaglag man kaiyan an sarong klase nin ‘kalangitan’—an mga tawong namahala sa sosyedad na iyan sa daga. Sa kaparehong paagi, ihinula sa 2 Pedro 3:7 an permanenteng paglaglag sa maraot na sosyedad nin tawo asin sa kuraptong mga gobyerno kaini na garo baga paagi sa kalayo.

SIMBAG KAN BIBLIYA: ‘An kinaban naagi sana asin an saiyang mga hurot: alagad an naggigibo kan buot nin Diyos nagdadanay sagkod lamang.’—1 JUAN 2:17.

“An kinaban” na maagi sana, bako an planetang daga, kundi an gabos na tawo sa kinaban na an pamumuhay bakong kauyon kan kabutan nin Diyos. Kun paanong puwedeng halion nin siruhano an cancerous na tumor tanganing iligtas an buhay nin sarong pasyente, ‘rurunuton’ o pupuhuon nin Diyos an maraot tangani na talagang ikaugma kan marahay na mga tawo an buhay sa daga. (Salmo 37:9) Kaya, an ‘katapusan kan kinaban’ sarong marahay na bagay.

An siring na positibong pagmansay sa ‘katapusan kan kinaban’ mahihiling man sa mga traduksiyon kan Bibliya na itinatradusir an mga tataramon na iyan bilang “pagtatapos kan sistema nin mga bagay” o ‘katapusan kan panahon.’ (Mateo 24:3; NW, BPV) Mantang an katawohan asin an daga parehong makakaligtas sa katapusan, bako daw na rasonable sana na an kasunod kaiyan sarong bagong panahon o bagong sistema nin mga bagay? Iyo an simbag kan Bibliya, huling sinasabi kaiyan an manungod sa “kinaban na madatong.”—Lucas 18:30.

Inapod ni Jesus an maabot na panahon na iyan na “pagbago kan gabos” na bagay. Sa panahon na iyan, ibabalik nin Diyos an dating kamugtakan kan katawohan arog kan orihinal na katuyuhan niya. (Mateo 19:28) Dangan, makakamtan niyato an

• Sarong paraisong daga na may katiwasayan asin abundansya para sa gabos.—Isaias 35:1; Miqueas 4:4.

• Kapakipakinabang asin nakakakontentong trabaho.—Isaias 65:21-23.

• Pagpaumay sa gabos na hilang.—Isaias 33:24.

• Pagbalik sa pagkahoben kan mga gurang.—Job 33:25.

• Pagkabuhay liwat kan mga gadan.—Juan 5:28, 29.

Kun gigibuhon ta an ‘buot nin Diyos,’ an kahagadan niya sa sato, dai niyato kakatakutan an katapusan kan kinaban. Imbes, aantisiparon niyato iyan.

SIMBAG KAN BIBLIYA: ‘Kun mahiling na nindo na nangyayari na an mga bagay na ini, sabuton nindo na harani na an kahadian nin Diyos.’—LUCAS 21:31.

Sa librong The Last Days Are Here Again, sinurat kan propesor na si Richard Kyle na an “biglang pagbabago asin kariribukan sa sosyedad nagreresulta sa mga prediksiyon sa katapusan kan kinaban.” Totoo iyan nangurugna kun an pagbabago asin kariribukan garo baga dipisil ikapaliwanag.

Minsan siring, an mga propeta sa Bibliya na naghula manungod sa katapusan dai ipinapaliwanag an mga nakakaribaraw na mga pangyayari kan panahon ninda. Imbes, sinda pinasabngan nin Diyos na iladawan an mga kamugtakan na magpaparisang madali na an katapusan kan kinaban. Isip-isipa an nagkapira sa mga hulang iyan dangan ika mismo an magsabi kun baga nangyayari na an mga iyan sa panahon niyato.

• Mga giyera, gutom, linog, asin epidemya nin nakakagadan na hilang.—Mateo 24:7; Lucas 21:11.

• Grabeng pagdakul nin krimen.—Mateo 24:12.

• An pagraot kan mga tawo sa daga.—Kapahayagan 11:18.

• Mga tawong mamumuton sa sadiri, sa kuwarta, asin sa kasingawan pero dai namumuot sa Diyos.—2 Timoteo 3:2, 4.

• An pagkaraot nin pamilya.—2 Timoteo 3:2, 3.

• Lakop na pagbaliwala sa mga ebidensiya kan nagdadangadang na katapusan.—Mateo 24:37-39.

• An paghuhulit kan maugmang bareta kan Kahadian nin Diyos sa bilog na kinaban.—Mateo 24:14.

Siring kan sinabi ni Jesus, kun mahiling ta na an ‘gabos na bagay na ini,’ maaaraman niyatong harani na an katapusan kan kinaban. (Mateo 24:33) Naniniwala an Mga Saksi ni Jehova na nakakakumbensir an mga ebidensiya, asin sinasabi man ninda sa iba an saindang pagtubod paagi sa paghuhulit sa 236 na kadagaan.

SIMBAG KAN BIBLIYA: ‘Kun nuarin sinda nagsasabi: “Katuninungan asin katiwasayan,” dangan bigla sindang sisiputon nin kapahamakan siring sa pagbabatyag nin bados, asin dai sinda makakadulag.’—1 TESALONICA 5:3, An Banal na Biblia.

Iinaagid kan Bibliya an pagkalaglag kan kinaban sa pagpupuon nin pagbatyag kan ina na madali nang mangaki—an kulog dai malilikayan asin bigla. An panahon na minasagkod sa katapusan garo man pagbabados. Aram nin sarong bados kun madali na siyang mangaki huli sa nag-uurog na senyales kaiyan. Puwedeng tantsahon kan doktor an aldaw kan pangangaki niya; alagad, dawa ngani magsalto iyan, sigurado pa man giraray an ina na dai mahahaloy mangangaki siya. Kaagid kaiyan, dai mababago kan ano man na salang mga inasahan manungod sa katapusan an malinaw na mga tanda na nagsasabing ini na an ‘mga huring aldaw.’—2 Timoteo 3:1.

‘Kun an tanda na harani na kita sa katapusan risang-risa na,’ tibaad ihapot mo, ‘taano ta kadakul an dai nakakarisa kaiyan?’ Ipinapahiling kan Bibliya na kun harani na an katapusan, dakul an mabaliwala sa mga ebidensiya. Imbes na maniwala na an dakulang mga pagbabago tanda kan huring mga aldaw, magtutuya-tuya pa sinda: ‘Nagadan na an satong mga ginikanan, alagad dai man nin nabago puon kan lalangon an kinaban!’ (2 Pedro 3:3, 4, BPV) Sa ibang pagtaram, risang-risa na an tanda kan huring mga aldaw, pero dakul an mabaliwala kaiyan.—Mateo 24:38, 39.

Tinukar sa artikulong ini an pira sana sa ebidensiya sa Bibliya na harani na an katapusan.b Gusto mo daw na makanuod nin urog pa? Kun iyo, taano ta dai kontakon an Mga Saksi ni Jehova para sa libreng pag-adal sa Bibliya? An pag-adal puwedeng gibuhon sa harong nindo, sa ibang kumbenyenteng lugar, o dawa sa telepono. Panahon sana an kaipuhan mong itao, asin daing kaagid na pakinabang an makakamtan mo.