Padagos na Magin Andam Para sa Aldaw ni Jehova

1. Ano an dapat tang gibuhon para makaligtas sa aldaw ni Jehova?

PAG sinasambit kan Bibliya an manungod sa “aldaw ni Jehova,” nanunungod iyan sa panahon kun nuarin ipapaabot ni Jehova an saiyang paghukom sa saiyang mga kaiwal asin ililigtas an saiyang banwaan. Kaidto, may nagkapirang paghukom nang ginibo si Jehova. (Isa. 13:1, 6; Ezek. 13:5; Sof. 1:8) Sa panahon niyato, an “aldaw ni Jehova” mapuon sa pag-atake sa Dakulang Babilonya asin matatapos sa ralaban nin Armagedon. Para makaligtas sa “aldaw” na iyan, kaipuhan tang mag-andam na ngunyan. Itinukdo ni Jesus na dai lang kita dapat na magin andam sa “dakulang kasakitan” kundi dapat man na “magdanay [kitang] andam” para diyan.—Mat. 24:21; Luc. 12:40.

2. Taano ta puwede kitang makinabang sa 1 Tesalonica?

² Sa saiyang inot na ipinasabong na surat sa mga taga Tesalonica, naggamit si apostol Pablo nin nagkapirang ilustrasyon para tabangan an mga Kristiyano na magdanay na andam para sa dakulang aldaw ni Jehova nin paghukom. Aram ni Pablo na an aldaw ni Jehova dai pa maabot kan mismong panahon na idto. (2 Tes. 2:1-3) Minsan siring, sinadol niya pa man giraray an saiyang mga tugang na mag-andam para sa aldaw na iyan na garo baga maabot na iyan kinaagahan, asin puwede ta man na iaplikar an sadol na iyan. Pag-ulayan ta an saiyang paliwanag manungod sa minasunod: (1) kun paano maabot an aldaw ni Jehova, (2) kun siisay an dai makakaligtas sa aldaw na iyan, asin (3) kun paano kita maandam para makaligtas.

3. Sa paanong paagi na an aldaw ni Jehova maabot na kaparehong-kapareho nin sarong parahabon sa banggi? (Hilingon man an ritrato.)

³ “Kaparehong-kapareho . . . nin sarong parahabon sa banggi.” (1 Tes. 5:2) Ini an inot sa tulong ilustrasyon na ginamit para iladawan an pag-abot kan aldaw ni Jehova. Sa parati, an mga parahabon marikas na minahiro asin naghahabon sinda pag banggi sa oras na dai inaasahan kan mga tawo. An aldaw ni Jehova bigla man na maabot asin ikakabigla iyan kan kadaklan. Dawa an tunay na mga Kristiyano posibleng mabigla man sa kun gurano karikas na mangyayari an mga bagay-bagay. Pero bakong arog kan mga maraot, dai kita malalaglag.

4. Sa paanong paagi na an aldaw ni Jehova siring sa kulog nin pangangaki?

⁴ “Siring sa kulog nin pangangaki na minaabot sa sarong babaying bados.” (1 Tes. 5:3) Dai madedeterminaran kan sarong bados na ina an eksaktong oras kun nuarin siya mangangaki. Pero sigurado siya na mangyayari iyan. Pag uminabot iyan, posibleng magin bigla an pangangaki, makulog, asin dai mapupugulan. Sa kaparehong paagi, dai ta man aram an aldaw asin oras kun nuarin mapuon an aldaw ni Jehova. Minsan siring, sigurado kita na maabot iyan asin an paghukom nin Diyos sa mga maraot magigin bigla asin dai madudulagan.

5. Sa anong paagi na an dakulang kasakitan siring sa mag-aagahon?

⁵ Siring sa mag-aagahon. Sa ikatulong ilustrasyon, sinambit giraray ni Pablo an mga parahabon na nanghahabon pag banggi. Pero ngunyan, garo baga ikinukumparar ni Pablo an aldaw ni Jehova na siring sa mag-aagahon. (1 Tes. 5:4) An mga parahabon na nanghahabon pag banggi puwedeng malingling sa dakul na bagay asin dai marisa an oras. Puwedeng abutan sinda kan liwanag kan aldaw na dai nagririsa asin malantad an ginigibo ninda. Ilalantad man kan dakulang kasakitan idtong mga tawo na arog kan mga parahabon, nagdadanay sa diklom paagi sa padagos na paggibo kan mga bagay na ikinakaanggot nin Diyos. Bakong arog ninda, puwede kitang magin andam paagi sa pagsikwal kan mga paggawi na ikinakaanggot ni Jehova asin paghihinguwang gumibo nin “gabos na klase nin karahayan asin katanusan saka katotoohan.” (Efe. 5:8-12) Sunod, ginamit ni Pablo an duwang magkakonektar na ilustrasyon para iladawan idtong mga dai makakaligtas.

6. Sa anong paagi na an kadaklan sa mga tawo nagtuturog? (1 Tesalonica 5:6, 7)

⁶ “An mga nagtuturog.” (Basahon an 1 Tesalonica 5:6, 7.) Ikinumparar ni Pablo idtong mga dai makakaligtas sa aldaw ni Jehova sa mga tawong nagtuturog. Dai ninda aram an mga nangyayari sa palibot o an paglihis nin oras. Kaya dai ninda aram kun may importanteng mga nangyayari o kun paano mahiro huli kaiyan. Kadaklan sa mga tawo sa ngunyan turog sa espirituwal. (Roma 11:8) Dai sinda nagtutubod sa mga patunay na nabubuhay na kita sa “huring mga aldaw” asin na an dakulang kasakitan madali nang mag-abot. An dakulang mga pagbabago sa kinaban puwedeng makapukaw sa nagkapirang turog sa espirituwal asin makapahiro sa sainda na magkainteres sa satong mensahe kan Kahadian. Minsan siring, dakul an minabalik sa pagturog imbes na magdanay na mata. Iniisip dawa kan iba na nagtutubod sa aldaw nin paghukom na haloy pa iyan na maabot. (2 Ped. 3:3, 4) Minsan siring, aram ta na an ipinasabong na konseho na magdanay na mata mas nagigin apurado sa kada aldaw na minaagi.

7. Sa paanong paagi na garo mga burat idtong masapar nin grabeng kaanggutan nin Diyos?

⁷ “An mga nagbuburat.” Iinagid kan apostol idtong mga masapar kan grabeng kaanggutan nin Diyos sa mga nagbuburat. An mga tawong burat nagigin maluway an reaksiyon sa mga nangyayari sa palibot ninda, asin nakakagibo nin salang mga desisyon. Sa kaagid na paagi, an mga maraot dai naghihimati sa mga patanid nin Diyos. Pinipili ninda an paagi nin pamumuhay na maresulta sa saindang ikakapahamak. Pero sinasadol an mga Kristiyano na magdanay na tultol an pag-iisip, na mag-isip nin malinaw. (1 Tes. 5:6) Ilinadawan kan sarong iskolar sa Bibliya an pagigin malinaw nin isip bilang “sarong kalmado, marigon na kamugtakan nin isip na tamang tinuturutimbang asin tinatantiyar an mga bagay-bagay na nakakatabang para makagibo kita nin tamang desisyon.” Taano ta dapat kitang magdanay na kalmado asin marigon? Tanganing dai kita mapalabot sa mga isyu ngunyan sa pulitika o sosyedad. An mga panggigipit na kumampi sa mga isyung iyan lalo pang magrabe mantang lalo pang nagrarani an aldaw ni Jehova. Minsan siring, dai ta kaipuhan na mahadit sa kun ano an dapat na gibuhon ta. Puwede kitang tabangan kan espiritu nin Diyos na magkaigwa nin kalmado saka marigon na kamugtakan nin isip asin makagibo nin madunong na mga desisyon.—Luc. 12:11, 12.

8. Paano iinilustrar kan 1 Tesalonica 5:8 an mga kuwalidad na makakatabang sa sato na magdanay na mata asin tultol an pag-iisip? (Hilingon man an ritrato.)

⁸ ‘Isulot an takop sa daghan asin an helmet.’ Ikinumparar kita ni Pablo sa mga suldados na alerto asin nakasulot nin panggiyera. (Basahon an 1 Tesalonica 5:8.) Inaasahan sa sarong suldados na nasa serbisyo na magin andam para sa pakikipaglaban sa gabos na panahon. Arog man kita kaiyan. Nagdadanay kitang andam para sa aldaw ni Jehova paagi sa pagsulot nin takop sa daghan na pagtubod saka pagkamuot asin helmet na paglaom. Makakatabang na marhay sa sato an mga kuwalidad na iyan.

9. Paano kita napoprotektaran kan satong pagtubod?

⁹ An takop sa daghan nagpoprotektar sa puso kan sarong suldados. An pagtubod asin an pagkamuot nagpoprotektar sa satong piguratibong puso. Makakatabang an mga iyan sa sato na padagos na maglingkod sa Diyos asin magsunod ki Jesus. An pagtubod nag-aasigurar sa sato na babalusan kita ni Jehova sa paghanap ta sa saiya nin bilog na puso. (Heb. 11:6) Papahiruon kita kaiyan na magdanay na maimbod sa satong lider, si Jesus, dawa pa mag-agi kita nin mga kasakitan. Mapapakusog ta an satong pagtubod para makayanan an mga kadipisilan sa buhay paagi sa pagkonsiderar sa mga halimbawa kan mga indibidwal sa modernong panahon na pinagdanay an saindang integridad sa ibong nin persekusyon o pagtios. Asin puwede tang malikayan an silo nin materyalismo paagi sa pag-arog sa mga indibidwal na nagpasimple kan saindang buhay para inuton an intereses kan Kahadian.b

10. Paano an pagkamuot sa Diyos asin sa satong kapwa nakakatabang sato na magtagal?

¹⁰ Mahalagang marhay man an pagkamuot para magdanay na mata asin tultol an pag-iisip. (Mat. 22:37-39) An pagkamuot sa Diyos makakatabang sato na magtagal sa paghuhulit sa ibong nin ano man na problema na tibaad mapaatubang sa sato huli kaiyan. (2 Tim. 1:7, 8) Huling namumutan ta pati idtong mga bako tang kapagtubod, padagos kitang naghuhulit asin dinudumanan an satong teritoryo, iyan man paagi sa pagpapatotoo sa telepono o sa surat. Dai kita nawawaran nin paglaom sa satong kapwa na sarong aldaw magbago sinda asin magpuon na gibuhon an tama.—Ezek. 18:27, 28.

11. Paano makakatabang sa sato an pagkamuot sa satong mga kapagtubod? (1 Tesalonica 5:11)

¹¹ Kaiba sa pinapahilingan ta nin pagkamuot sa kapwa an satong mga kapwa Kristiyano. Ipinapahiling ta an siring na pagkamuot paagi sa ‘pagpakusog asin pagparigon sa lambang saro.’ (Basahon an 1 Tesalonica 5:11.) Arog nin mga suldados na sinusuportaran an kada saro sa pakikipaglaban, pinapakusog ta man an lambang saro. Siyempre, puwedeng aksidenteng makulgan kan sarong suldados an kapwa niya suldados sa kainitan nin laban, pero nungka na tutuyuhon niya iyan. Sa kaparehong paagi, nungka ta man na tutuyuhon na kulgan an satong mga tugang o na magbalos nin maraot sa maraot. (1 Tes. 5:13, 15) Ipinapahiling ta man an satong pagkamuot paagi sa paggalang sa mga brother na nanginginot sa kongregasyon. (1 Tes. 5:12) Kan isurat ni Pablo an surat na ini, mayo pang sarong taon an kongregasyon sa Tesalonica. Posibleng marhay na an nombradong mga lalaki diyan dikit pa sana an eksperyensiya asin tibaad may nagigibong mga sala. Minsan siring, maninigo man giraray sinda na igalang. Mantang paparani an dakulang kasakitan, posibleng kakaipuhanon ta na magdepende sa satong mga elder para sa paggiya nin urog kisa sa ginigibo ta ngunyan. Puwedeng mawaran kita nin komunikasyon sa world headquarters asin sa sangang opisina; kaya, mahalagang manudan ta na mamutan asin igalang an satong mga elder ngunyan. Ano man an mangyari, pagdanayon tang tultol an satong pag-iisip, na nagpopokus bako sa mga kaluyahan ninda kundi sa katunayan na ginigiyahan ni Jehova paagi ki Cristo an maimbod na mga lalaking ini.

12. Paano an satong paglaom nagpoprotektar sa satong kaisipan?

¹² Kun paanong napoprotektaran kan helmet an payo nin sarong suldados, an satong paglaom na kaligtasan nagpoprotektar sa satong kaisipan. Huling makusog an satong paglaom, aram ta na an iinaalok kan kinaban na ini mayong kamanungdanan. (Fil. 3:8) An satong paglaom nakakatabang sa sato na magdanay na kalmado asin marigon. Namatian mismo iyan ni Wallace asin Laurinda, na naglilingkod sa Africa. Sa laog sana nin tulong semana, pareho sindang nagadanan nin magurang. Huli sa COVID-19 na pandemya, dai sinda makapuli para makaibanan an saindang pamilya. Isinurat ni Wallace: “An paglaom na pagkabuhay liwat nakatabang sa sako na isipon bako an huring mga aldaw ninda sa kinaban na ini kundi an magigin inot na mga aldaw ninda sa bagong kinaban. An paglaom na ini nagpapakalma sa sako pag grabe an sakong kamunduan o pagkapungaw.”

13. Ano an puwede tang gibuhon para mag-ako kan banal na espiritu?

¹³ “Dai nindo pagsigbuhon an laad kan espiritu.” (1 Tes. 5:19) Ikinumparar ni Pablo an banal na espiritu sa sarong laad na yaon sa laog niyato. Pag igwa kita kan espiritu nin Diyos, naglalaad an satong kaigutan asin entusiyasmo sa kun ano an tama asin motibado kita na maglingkod ki Jehova. (Roma 12:11) Ano an puwede tang gibuhon para mag-ako kan banal na espiritu? Puwede tang hagadon iyan sa pamibi, pag-adalan an ipinasabong na Tataramon nin Diyos, asin makiasosyar sa saiyang organisasyon na ginigiyahan kan espiritu. An paggibo kaiyan makakatabang sa sato na maipahiling “an bunga kan espiritu.”—Gal. 5:22, 23.

14. Ano an dapat tang likayan kun gusto tang padagos na mag-ako kan espiritu nin Diyos? (Hilingon man an ritrato.)

¹⁴ Pag tinawan kita nin Diyos kan saiyang banal na espiritu, dapat kitang mag-ingat na “dai . . . pagsigbuhon an laad kan espiritu.” Itinatao nin Diyos an saiyang espiritu duman sana sa mga tawo na pinapagdanay an malinig na kaisipan asin paggawi. Dai niya kita padagos na tatawan kan saiyang espiritu kun dai ta hahalion an maating kaisipan asin paggawi. (1 Tes. 4:7, 8) Tanganing padagos na mag-ako kan banal na espiritu, dapat man na “dai [niyato] pagbasang-basangon an mga propesiya.” (1 Tes. 5:20) An “mga propesiya” na sinambit digdi nanunungod sa mga mensahe na itinao ni Jehova sa sato paagi sa saiyang espiritu, kaiba na an mga mapadapit sa aldaw ni Jehova asin sa pagkaapurado kan satong panahon. Dai ta ipinapasipara an aldaw na iyan, na iniisip na an Armagedon dai mangyayari sa panahon ta. Imbes, pinaparikas ta an pag-abot kaiyan—na pirmi iyan na isinasaisip—paagi sa pagpapadanay nin marahay na paggawi asin pagigin sibot sa “mga gibong nagpapahiling nin debosyon sa Diyos” aroaldaw.—2 Ped. 3:11, 12.

15. Paano ta malilikayan na madaya nin salang mga impormasyon asin propaganda kan mga demonyo? (1 Tesalonica 5:21)

¹⁵ Sa madali nang panahon, an mga nagkokontra sa Diyos sa paano man madeklarar: “Katuninungan asin katiwasayan!” (1 Tes. 5:3) An propagandang ipinasabong nin mga demonyo malakop sa bilog na daga, na makakadaya sa kadaklan. (Kap. 16:13, 14) Kumusta man kita? Dai kita madadaya kun ‘sisiyertuhon ta [o, sisiyasaton] an gabos na bagay.’ (Basahon an 1 Tesalonica 5:21.) An Griegong tataramon na trinadusir na “siyertuhon” ginamit may koneksiyon sa pagsiyasat o pagkilatis nin mamahalon na mga metal. Kun siring, kaipuhan tang siyasaton an mga nadadangog o nababasa ta para madeterminaran kun baga iyan tunay. Mahalaga iyan para sa mga taga Tesalonica, asin urog na magigin mahalaga iyan para sa sato mantang mas nagrarani kita sa dakulang kasakitan. Imbes na basta na sana paniwalaan an sinasabi kan iba, ginagamit ta an satong kakayahan na mag-isip para ikumparar an mga nababasa o mga nadadangog ta sa kun ano an sinasabi kan Bibliya asin kan organisasyon ni Jehova. Paagi kaiyan, dai kita madadaya kan ano man na propaganda o panglalansi kan mga demonyo.—Tal. 14:15; 1 Tim. 4:1.

16. Anong siguradong paglaom an igwa kita, asin napapahiro kita kaiyan na gibuhon an ano?

¹⁶ Bilang sarong grupo, an mga lingkod nin Diyos makakaligtas sa dakulang kasakitan. Pero bilang indibidwal, dai ta aram kun ano an mangyayari sa sato sa maabot. (Sant. 4:14) Minsan siring, abuton ta man an dakulang kasakitan o magadan bago kaiyan, babalusan kita nin buhay na daing katapusan kun magdadanay kitang maimbod. An mga linahidan makakaibanan ni Cristo sa langit. An ibang mga karnero maistar sa paraisong daga. Lugod na gabos kita magpokus sa satong magayunon na paglaom asin padagos na magin andam para sa aldaw ni Jehova!