Nahahayag an Sarong Banal na Hilom

“An banal na hilom kan diosnon na debosyon na ini tunay na dakula.”—1 TIMOTEO 3:16.

1. Anong hilom an sinasabi sa 1 Timoteo 3:16?

NAPUPUKAW daw an saindong interes nin mga misteryo? Nawiwili daw kamong susugon an mga hilom? An kadaklan sa sato iyo! Kun siring, umiba kamo sa samo mantang sinisiyasat niato an saro sa pinakamamuraway na hilom—hilom na natago sa Tataramon nin Dios sa rinibong taon. An banal na hilom na ini nakakaapektar na gayo sa satong buhay, kapwa sa presente asin sa ngapit. Iyan an “banal na hilom kan diosnon na debosyon,” na sinasabi sato sa 1 Timoteo 3:16. Maninigo nanggad kitang magpasalamat ki Jehova, “an Parapahayag kan mga hilom,” huli sa maboot na pagpahayag sa sato kan mamuraway na hilom na ini asin kan kahulogan kaiyan!—Daniel 2:28, 29.

2. (a) Kasuarin enot na nagtaram si Jehova manongod sa banal na hilom, asin ano an ipinanuga nia kaidto? (b) Anong mga hapot an nagkakaipo nin simbag?

² Si Jehova enot na nagtaram manongod sa banal na hilom pagkatapos na dayaon kan Halas si Eva, asin si Adan suminunod sa saiya sa pagrebelde. Kaidto nanuga an Dios na an “banhi,” o gikan, roronoton an payo kan Halas. (Genesis 3:15) Siisay an Banhing ini? Paano nia dadaogon an Halas? Ibibindikar daw nia an pagigin totoo nin Dios asin an Saiyang katuyohan para sa dagang ini?

3. An banal na mga hula nagtao nin anong mga tanda kun siisay asin ano an gigibohon kan Banhi?

³ Pag-abot nin panahon, an banal na mga hula nagpahayag nin mga tanda sa kun siisay asin ano an gigibohon kan Banhi sa ngapit. Sia magigin gikan ni Abraham, magmamana kan kahadean ni David, asin aapodon na Prinsipe nin Katoninongan. ‘An kadakolan kan saiyang sa-prinsipeng pamamahala asin katoninongan magigin daing kasagkodan.’ (Isaias 9:6, 7; Genesis 22:15-18; Salmo 89:35-37) Alagad arog kan sabi kan Roma 16:25, an banal na hilom na iyan “dai ipinahayag sa haloy na mga panahon.”

Pagresolber sa Misteryo

4. Paano nagpoon na mahayag an banal na hilom kan 29 C.E.?

⁴ Sa katapustapusi, pakalihis nin apat na milenyo, biglang nagliwanag! Sa anong paagi? Kan 29 C.E., binautismohan ni Juan si Jesus na taga-Nazaret sa Salog nin Jordan, asin hale sa langit nagsabi an tingog nin Dios: “Ini an sakong Aki, an namomotan, na sakong inooyonan.” (Mateo 3:17) A, sa katapustapusi uya na an Banhing pangako! An banal na hilom nagpoon nang mahayag sa gabos na mamuraway na kabtang kaiyan, kaiba na an manongod sa diosnon na debosyon.

5. Ano an “diosnon na debosyon,” asin paano iyan nakakaapektar sa mga naggigibo kaiyan?

⁵ Ano an nasasabotan niato manongod sa “diosnon na debosyon”? Sa Kristianong Griegong Kasuratan, an mga tataramon na iyan minalataw sana nin 20 beses, na an labi sa kabanga yaon sa duwang surat ni Pablo ki Timoteo. An librong Insight on the Scriptures tinawan nin kahulogan an “diosnon na debosyon” na “paggalang, pagsamba, asin paglilingkod sa Dios, na may kaimbodan sa saiyang unibersal na soberaniya.” An paggalang minagikan sa puso na minarani sa Dios, na may paghanga sa saiyang kamahalan, sa saiyang pagigin daing sagkod, asin sa kadakolan kan saiyang makangangalas na mga linalang, na may pasalamat sa espirituwal asin materyal na mga balaog na pinaooran nia sa mapagpahalagang mga tawo. Tunay nanggad, an lambang saro sa sato na naggigibo nin diosnon na debosyon makapagsasabi, kapareho kan salmista sa Salmo 104:1: “Omawa si Jehova, O kalag ko, O Jehova na sakong Dios, dakula ka nanggad. Naggugubing ka nin dignidad asin kamurawayan.”

6. (a) Paano an mga parasamba ki Jehova napapalaen sa mga parasimba nin Kakristianohan? (b) Ano an isinabi ni Pablo sa Roma 11:33, 34, asin anong mga hapot kun siring an pinalalataw?

⁶ An debosyon niato sa Dios kaipuhan na ipahayag, asin ini ginigibo paagi sa mga aksion. Sa bagay na ini, an mga parasamba sa tunay na Dios, si Jehova, laen nanggad sa mga parasimba sa nawawara nang mga iglesya kan Kakristianohan. Para sa dakol na tawo sa daga, an relihiyon—kun igwa pa man sinda nin relihiyon—sarong pormalismo, alikboy na isinusulot tanganing sinda magin banal na paghelingon mantang sinda namumuhay oyon sa maraot na kinaban na nasa palibot ninda. Dai ngani ninda midbid kun siisay an Dios. Tunay nanggad, kaipuhan na horophoropon nin siring na mga tawo an mga tataramon ni Pablo sa Gibo 17:23, kan sia magsabi sa mga taga-Atenas na nagsasamba sa “Dios na Dai Midbid”: “An sa daing pakaaram sinasamba nindo, iyo ini an ibinabareta ko sa saindo.” Manongod sa mamuraway na Dios na iyan, si Pablo nakapagsabi sa Roma 11:33, 34: “O an rarom kan mga kayamanan asin kadonongan patin kaaraman nin Dios! Dai nanggad marorop an saiyang mga paghokom asin dai nanggad masusog an saiyang mga dalan! Huli ta ‘siisay an nakaaram kan kaisipan ni Jehova, o siisay an nagin saiyang parahatol?’” Kun siring, paano niato naaaraman an mga dalan nin Dios? Paagi sa pag-adal sa “banal na hilom kan diosnon na debosyon.” Alagad ta paano niato ginigibo iyan?

7. Taano ta masasabi na “an banal na hilom kan diosnon na debosyon na ini tunay na dakula”?

⁷ Sa 1 Timoteo kapitulo 3, enot sinasabi ni apostol Pablo kun ano an hinahagad sa responsableng mga lingkod sa pamilya nin Dios, na inaapod sa bersikulo 15 na “kongregasyon kan nabubuhay na Dios, harigi asin tukod kan katotoohan.” Dangan idinugang ni Pablo, sa bersikulo 16: “An banal na hilom kan diosnon na debosyon na ini tunay na dakula.” Dakula nanggad ta isinugo ni Jehova an saiyang bugtong na Aki sa daga tanganing buksan an hilom na ini, ipaheling kun ano man nanggad an diosnon na debosyon asin kun paano iyan kaipuhan, napakahalaga, sa tunay na pagsamba. An banal na hilom kan diosnon na debosyon na ini tinawan nin liwanag sa nagin buhay ni Jesus digdi sa daga. An gabos na namomoot ki Jehova kaipuhan na itogdok an saindang pagtubod asin an saindang buhay ki Cristo, na nagin arogan nin diosnon na debosyon. Kun siring, paano liniwanag ni Jesus an banal na hilom nin diosnon na debosyon?

Anom na Kabtang

8. (a) Ano an anom na kabtang kan banal na hilom na sinasabi ni Pablo sa 1 Timoteo 3:16? (b) Siisay an “Sia” na ihinayag?

⁸ Sa pasabong nin Dios, sinimbag ni Pablo an hapot na iyan. Digdi sa 1 Timoteo 3:16, ilinaladawan nia an anom na kabtang kan banal na hilom na ini, na an sabi: “Sia [1] ihinayag sa laman, [2] ipinahayag na matanos sa espiritu, [3] nagpaheling sa mga anghel, [4] ihinulit sa mga nasyon, [5] tinubod sa kinaban, [6] inako duman sa kamurawayan.” Siisay an “Sia” na nahayag? Malinaw na an “Sia” iyo an ipinanugang Banhi, si Jesus, na nagdigdi tanganing otobon an kabotan nin Dios. Sia an pinakaprinsipal sa banal na hilom, na ginigibo iyan na talagang dakula.

9. Ano an pruweba na an 1 Timoteo 3:16 dai maninigong magsabing: “An Dios nahayag sa laman”?

⁹ An mga Trinitaryo hinihingoang palibogon an pakasabot sa banal na hilom sa pagsabi na an “Sia” sa 1 Timoteo 3:16 iyo an Dios mismo. Ini ibinabasar ninda sa Bibliang King James, na nagsasabi, “an Dios nahayag sa laman.” Minsan siring, ano an sinasabi kan pinakamasasarigan na mga manuskritong Griego? Dai nin pagliwatliwat, ginagamit ninda an pronombreng “Sia” imbes na “Dios.” An mga kritikong tekstuwal minaoyon na ngonyan na an pagbugtak kan “Dios” sa tekstong ini sala nin eskriba. Kaya, an mas bagong mga traduksion, arog baga kan American Standard Version, The New English Bible, asin New World Translation, tama an pagkasabi: ‘Sia [o, Sia na] nahayag sa laman.’ Bako, bakong an Dios mismo an naglataw “sa laman.” Imbes, idto an saiyang namomotan na Aki asin enot na linalang, na manongod sa saiya si apostol Juan nagsurat: “Kaya an Tataramon nagin laman asin nag-erok sa tahaw niato, asin naheling niato an saiyang kamurawayan, kamurawayan na arog kan yaon sa bugtong na aki gikan sa ama; asin sia pano nin dai na kutana maninigong kabootan asin katotoohan.”—Juan 1:14.

“Ihinayag sa Laman”

10. (a) Paano an enot na kabtang kan banal na hilom narisa kan bautismo ni Jesus? (b) Taano si Jesus ta nagin “an huring Adan”?

¹⁰ Kan bautismo ni Jesus narisa an enot na kabtang kan banal na hilom: si Jesus “ihinayag sa laman” bilang an linahidan na Aki nin Dios. Ibinalyo ni Jehova Dios an buhay kan saiyang Aki hale sa langit pasiring sa matris ni Maria tanganing si Jesus mamundag sa laman bilang sangkap na tawo. Kaya, arog kan ipinaheheling kan 1 Corinto 15:45-47, si Jesus nagin ikaduwa, o “huring,” Adan, sangkap na tawong kalag na eksaktong katimbang kan enot na Adan. Sa anong katuyohan? An 1 Timoteo 2:5, 6 inaapod an “huring Adan” na “sarong tawo, si Cristo Jesus, na nagtao kan saiyang sadiri bilang katimbang na pantubos para sa gabos.” Sa legal na basihan na ini na sangkap na tawong atang, si Jesus an tagapag-oltanan kan bagong tipan para sa 144,000 katawo na nagigin kairiba niang paramana sa saiyang Kahadean.—Kapahayagan 14:1-3.

11. Kiisay nakaaabot an mga pakinabang sa pantubos na atang ni Jesus?

¹¹ Makikinabang man daw an iba sa kagadanan ni Jesus bilang atang? Iyo nanggad! An 1 Juan 2:2 nagsasabi na si Jesu-Cristo “sarong pantubos na atang para sa satong mga kasalan [an boot sabihon, mga kasalan nin linahidan na mga Kristiano arog ni Juan], alagad bako sanang kan sa sato kundi siring man kan sa bilog na kinaban.” Kaya an mga pakinabang hale sa pantubos na atang ni Jesus bako sanang sa 144,000 na linahidan na mga Kristiano kundi sagkod sa bilog na kinaban nin katawohan. An “sarong dakulang kadaklan” na nabubuhay ngonyan asin an rinibong milyon na bubuhayon liwat sa Paraisong daga mag-aako nin buhay na daing katapusan basado sa saindang pagtubod sa pantubos na atang ni Jesus. Arog kan ihinula sa Kapahayagan 7:9, 10, hinugasan na kan dakulang kadaklan an saindang gubing asin pinaputi iyan paagi sa pagtubod sa pinabulos na dugo kan Kordero, si Jesu-Cristo. Sinda ibinibilang na matanos kun dapit sa pakikikatood sa Dios. May kagayagayahan, nanonodan ninda an laen-laen na kabtang kan banal na hilom asin nagpapaheling nin diosnon na debosyon kaoyon sa halimbawa ni Jesus!

Iba Pang Kabtang

12. Paano si Jesus “ipinahayag na matanos sa espiritu”?

¹² Ano man an ikaduwang kabtang kan 1 Timoteo 3:16? Si Jesus “ipinahayag na matanos sa espiritu.” Alagad ta paano? Paagi sa pagbuhay liwat ni Jehova sa saiyang nagdadanay sa integridad na Aki hale sa mga gadan pasiring sa espiritung buhay. Ini an kapahayagan nin Dios na si Jesus biyong matanos asin angay na tawan nin dugang pang mamuraway na mga asignasyon. Arog kan sabi kan Roma 1:4, si Jesus “ipinahayag na may kapangyarihan bilang Aki nin Dios sa espiritu nin kabanalan paagi sa pagkabuhay liwat hale sa mga gadan.” Sa pagpatunay digdi, si Pedro nagsasabi sato sa enot niang surat, kapitulo 3, bersikulo 18: “Si Cristo nagadan nin makasaro para sa gabos na panahon manongod sa mga kasalan, sarong matanos para sa mga bakong matanos, tanganing magiyahan nia kamo sa Dios, na sia ginadan sa laman, alagad binuhay sa espiritu.” An halimbawa daw ni Jesus sa diosnon na debosyon naggigiya sa saindo sa Dios?

13. An binuhay liwat na si Jesus nagpaheling sa siisay na mga anghel, asin anong klaseng mensahe an ihinulit nia sa sainda?

¹³ Sa pagpapadagos sa 1 Timoteo 3:16, sumunod na sinabi ni Pablo an ikatolong kabtang kan banal na hilom, na sinasabi na si Jesus “nagpaheling sa mga anghel.” Siisay daw an mga anghel na ini? Mapadapit ki Jesus, na ngonyan “binuhay sa espiritu,” si Pedro nagsurat sa 1 Pedro 3:19, 20: “Sa kamugtakan man na ini sia nagduman asin naghulit sa mga espiritu na nasa bilanggoan, na nagin masumbikal kaidtong an pakatios nin Dios naghahalat kan mga aldaw ni Noe.” Sono sa Judas 6, an mga espiritung idto iyo “an mga anghel na dai nag-ingat kan saindang dating katongdan kundi nagbaya sa saindang sadiring tamang erokan” sa kalangitan. Sinda naggubing nin mga hawak na laman tanganing magibo an salang seksuwal na pakikidorog sa mga babae. Kan an Baha piriton an mga anghel na iyan na bumuwelta sa lugar nin mga espiritu, sinda iinapon sa Tartaro, kamugtakan nin biyong pagkababa. (2 Pedro 2:4) An binuhay liwat na si Jesus naghulit sa sainda. Alagad idto daw mensahe nin kaligtasan? Bako nanggad! Imbes, kinondenar ni Jesus an saindang karatan bilang an kabaliktaran nin diosnon na debosyon. An siisay man sa banwaan nin Dios na nagbabalobalo sa seksuwal na inmoralidad ngonyan maninigong mapatanidan kan paghokom sa mga anghel na iyan!

14. Paano na si Jesus nagpoon na ‘ihulit sa mga nasyon’?

¹⁴ An ikaapat na kabtang kan 1 Timoteo 3:16 iyo na si Jesus “ihinulit sa mga nasyon.” Paano ini naotob? Bago sia arestaron, sinabihan ni Jesus an mga apostol: “Sa katotoohan sinasabi ko sa saindo, An minatubod sa sako, an saro man na iyan makagigibo sa mga gibo na ginibo ko; asin magibo sia nin mga gibo na orog pa kaini, huli ta ako maduman sa Ama.” (Juan 14:12) Dai nahaloy pakalihis kaidto, kan Pentecostes 33 C.E., ibinubo ni Jesus an banal na espiritu sa saiyang mga disipulo, asin an nakakukubhan na bareta na “an Jesus na ini binuhay liwat nin Dios” nagpoon na ihulit sa mga Judio. Dangan, inako man kan mga Samaritano an tataramon nin Dios asin nagpoon na umako nin banal na espiritu. (Gibo 2:32; 8:14-17) Dangan, kan 36 C.E., si Pedro naghulit ki Cornelio asin sa iba pang Hentil na tiripon sa saiyang harong. Kaya, an maogmang bareta manongod ki Jesus nagpoon na ‘ihulit sa mga nasyon,’ an boot sabihon, sa mga bakong Judio, na linahidan man kan banal na espiritu.

15. Ano an nagpapatunay na an mga Kristiano kan enot na siglo nakanood na gayo kan banal na hilom nin diosnon na debosyon?

¹⁵ Arog kan sinasabi sa Gibo 12:24, “an tataramon ni Jehova padagos na nagtalubo asin naglakop.” An Gibo 17:6 nagsasaysay na sa parteng norte nin Grecia an mga tumang nagkururahaw, arog kan ginigibo ninda duman sagkod ngonyan: “An mga tawong ini na nagpabagsak sa ineerokan na daga yaon man digdi.” Sa laog nin 30 taon, si Pablo nakasurat hale sa Roma na an maogmang bareta “ikinahulit sa gabos na linalang sa sirong nin langit.” (Colosas 1:23) An mga Kristiano kan panahon na idto nakanood na gayo sa banal na hilom nin diosnon na debosyon. Iyan maigoton nindang iinaplikar! Asin kita man logod makanood kaiyan asin iaplikar iyan sa huring mga aldaw kan paghuhulit kan Kahadean!

16. Ano an ikalimang kabtang kan banal na hilom, asin anong aktibidad an nagparisa kaiyan?

¹⁶ Bilang simbag sa paghuhulit na idto kan enot na siglo, an ikalimang kabtang kan banal na hilom sa 1 Timoteo 3:16 narisang marhay. Si Jesus ngonyan “tinubod sa kinaban.” Ini bunga kan arog-Cristong diosnon na debosyon nin mahigos na mga misyonero, kaiba na si Pablo asin Timoteo. Dinara ninda an maogmang bareta sa Asia Minor asin Europa, seguro sagkod sa España, asin sagkod sa East Africa paagi sa ngoso kan nabautismohan na Etiope, mantang si Pedro naglingkod sa Babilonya.

17. Taano si Jesus ta tinutubod sa bilog na modernong kinaban?

¹⁷ Kumusta man sa satong aldaw? Poon kan 1919 an linahidan na natatada nagpapaheling nin pambihirang diosnon na debosyon. An mga linahidan na ini marigon na nagtogdok sa pundasyon nin pagtubod na ibinugtak ni Jesus. Nangorogna poon kan 1935, tinipon ninda an sarong dakulang kadaklan, na nag-oogma sa paglaom na makaligtas sa “dakulang kahorasaan” asin magkamit nin buhay na daing katapusan sa paraisong daga. (Kapahayagan 7:9, 14) Kaya, an maogmang bareta na nasisentro ki Jesus tinutubod sa bilog na modernong kinaban. May diosnon na debosyon, labing 3,700,000 na Saksi ni Jehova an naghuhulit na ngonyan asin nag-ooswag sa bilog na globo!

18. Paano si Jesus “inako duman sa kamurawayan”?

¹⁸ Saro pang kabtang kan banal na hilom an natatada, an ikaanom: si Jesus “inako duman sa kamurawayan.” Sa laog kan 40 aldaw pakabuhaya sa espiritu, si Jesus nagmateryalisar nin mga hawak na laman, na nagpaheling sa saiyang mga disipulo asin sinasabihan sinda “kan mga bagay dapit sa kahadean nin Dios.” Dangan sia suminakat sa langit. (Gibo 1:3, 6-9) An saiyang pamibi, na nasusurat sa Juan 17:1-5, nasimbag: “Ama, . . . pamurawaya an saimong aki, tanganing pamurawayon ka kan saimong aki . . . pinamuraway ta ka sa daga . . . Kaya ngonyan, Ama, pamurawaya ako sa kataed mo kan kamurawayan na dating yaon sa sako bago an kinaban.”

19. Ano an seguradong nangyari kan si Jesus bumuwelta sa langit?

¹⁹ Seguradong kanigoan na kagayagayahan an nangyari kan si Jesus bumuwelta sa langit! Haloy pang panahon bago kaini, kan gibohon ni Jehova an daga, “an gabos na aki nin Dios nagkururahaw sa pag-omaw.” (Job 38:7) An mga hukbo nin anghel seguradong orog pang naogma na akoon liwat sa tahaw ninda an maimbod na Paradepensa sa soberaniya ni Jehova!

20. Taano si Jesus ta nagmana nin marahayon na ngaran, asin ano an ginibo nia kan nasa daga?

²⁰ Sa Hebreo 1:3, 4, si Pablo nagsabi manongod sa mapangganang si Jesus: “Pakaliniga nia kan satong mga kasalan sia tuminukaw sa too kan Kamahalan sa mga kaitaasan. Kaya sia nagin orog kisa mga anghel, sagkod sa pagmana nia nin ngaran na orog na halangkaw kisa sainda.” Inako ni Cristo an ngaran na iyan huli sa saiyang pakadaog sa karatan. Tunay na pinangenotan kan Aki nin Dios an diosnon na debosyon digdi sa daga. Sia nagtao man nin arogan para sa gabos pang iba na magkakamit nin buhay na daing katapusan. Paagi sa pagkapamuraway ki Jesus sa toong kamot nin Dios sa langit, an banal na hilom kan diosnon na debosyon na ini ihinayag sa gabos na kabtang kaiyan.

Pakanood kan Banal na Hilom nin Diosnon na Debosyon

“Minsan si Cristo nagtios para sa saindo, na winalatan kamo nin padara tanganing sunodon nindo nin estrikto an saiyang mga lakad.”—1 PEDRO 2:21.

1. Ano an katuyohan ni Jehova mapadapit sa “banal na hilom kan diosnon na debosyon”?

“AN BANAL na hilom kan diosnon na debosyon na ini” bako nang hilom! (1 Timoteo 3:16) Iyan laen na gayo sa mga hilom nin falsong relihiyon, arog kan mistikong Trinidad, na nagdadanay na hilom! Mayo nin nakasasabot dian. Imbes, katuyohan ni Jehova na an banal na hilom na nahayag sa persona ni Jesu-Cristo tawan kan pinakamahiwas na publisidad na mahihimo. Si Jesus mismo nagin an pangenot na halimbawa nin maigot na parabalangibog kan Kahadean nin Dios. Dakol an manonodan niato sa saiyang mensahe asin paagi nin paghuhulit, arog kan maheheling niato ngonyan.

2. Taano an paglilingkod ni Jesus ta inienot sa pantubos? (Mateo 20:28)

² Kun siring, tawan niato nin dagdag pang pagkonsiderar an pagigin “ihinayag sa laman” ni Jesus. (1 Timoteo 3:16) Sa Mateo 20:28 mababasa niato na si Jesus “nagdigdi, bakong tanganing paglingkodan, kundi tanganing maglingkod asin magtao kan saiyang kalag bilang pantubos na karibay nin dakol.” Inienot ngani kaini an saiyang paglilingkod kisa pantubos. Taano daw? Bueno, duman sa Eden ibinugtak sa pagduda kan tusong Halas an matanos na soberaniya ni Jehova sa katawohan, na ipinasisentido na an linalang nin Dios may diperensia asin na sa irarom nin pagbalo mayo nin tawo na makapagdadanay sa integridad sa Kaharohalangkawe. (Ikomparar an Job 1:6-12; 2:1-10.) An dai man lamang ni kadikit na depektong ministeryo ni Jesus bilang sangkap na tawo, “an huring Adan,” nagpaheling na an nag-angat na si Satanas maraot na putikon. (1 Corinto 15:45) Dugang pa, pinatunayan ni Jesus nin lubos an saiyang kuwalipikasyon na maglingkod bilang “Pangenot na Ahente asin Paraligtas” nin Dios asin “hokoman an ineerokan na daga sa katanosan,” sa pagbindikar sa soberaniya ni Jehova.—Gibo 5:31; 17:31.

3. Paano biyong pinatunayan ni Jesus na bakong totoo an angat ni Satanas?

³ Biyong pinatunayan ni Jesus na bakong totoo an mapagtuyang angat ni Satanas! Sa bilog na kasaysayan, mayo nin tawo digdi sa daga na naglingkod sa Dios nin siring kadebotado—sa ibong nin mga pagtuya, paghampak, asin pisikal saka mental na pagpasakit. Si Cristo nagtios nin mapaglanghad na mga pakaraot bilang Aki nin Dios. Sa gabos na iyan—minsan sagkod sa maringis asin makasosopog na pagkagadan—sia marigon, dai natatanyog an kaimbodan sa saiyang Ama. Sa Filipos 2:8, 9, si Pablo nagsurat na huling si Jesus nagkuyog ‘sagkod sa kagadanan, iyo, kagadanan sa hariging pasakitan, ilinangkaw sia nin Dios asin itinao saiya an ngaran na halangkaw kisa lambang ibang ngaran.’ Ibinuyagyag ni Jesus si Satanas bilang mararang putikon!

4. Taano ta nasabi ni Jesus ki Pilato na sia napadigdi sa kinaban tanganing magpatotoo sa katotoohan?

⁴ Kaya, sa katapusan nin pira sanang taon nin todo-todong paghuhulit, si Jesus mapusong nakapagpatotoo ki Poncio Pilato: “Ika mismo an nagsasabi na ako hade. Ako namundag dahel kaini, asin dahel kaini ako napadigdi sa kinaban, tanganing ako magpatotoo sa katotoohan. An siisay man na nasa katotoohan naghihinanyog sa sakong tingog.” (Juan 18:37) Si Jesus nagpaheling nin daing kaagid na diosnon na debosyon sa pagbalangibog kan katotoohan kan Kahadean nin Dios sa bilog na Palestina. Tinokdoan nia an saiyang mga disipulo na magin man maigot na mga parahulit. An saiyang halimbawa nagpapahiro nanggad sa sato na sumunod sa saiyang mga lakad ngonyan!

Pakanood sa Satong Arogan

5. Ano an manonodan niato manongod sa diosnon na debosyon paagi sa pagheling nin maingat ki Jesus?

⁵ Paagi sa satong diosnon na debosyon sa pag-otob kan kabotan ni Jehova, puwede man niatong patunayan na putikon an Diablo. Ano man na pagbalo an satong tinitios, mayo nin makapapantay sa mga kasakitan asin kasosopgan na inagihan ni Jesus. Kun siring, makanood kita sa satong Arogan. Arog kan isinasadol sato kan Hebreo 12:1, 2, kita logod dumalagan sa paorumbasan na may pakatagal “mantang kita nagheheling nin maingat sa Pangenot na Ahente asin Parasangkap kan satong pagtubod, si Jesus.” Bakong arog ni Adan, na dai nakapasar kan baloon sa diosnon na debosyon, si Jesus nagin an solamenteng tawo sa daga na sangkap na nakapanggana sa gabos na pagbalo. Sagkod sa kagadanan, sia napatunayan na “maimbod, dai nin kadayaan, dai nin digta, siblag sa mga parakasala.” (Hebreo 7:26) Sa sangkap na integridad, nakapagsabi sia sa saiyang mga kaiwal: “Siisay sa saindo an makakapagsahot na ako nagkasala?” Ibinalik ni Jesus an angat ni Satanas, na sinasabi: “An poon kan kinaban . . . mayong kapangyarihan sa sako.” Asin sa pagtatapos kan saiyang ultimong pahayag sa saiyang mga disipulo bago sia pasaloiban asin dakopon, sia nagsabi sa sainda: “Magmapuso kamo! Nadaog ko an kinaban.”—Juan 8:46; 14:30; 16:33.

6. (a) Taano ta aram ni Jesus kun anong klaseng kaginhawahan an kaipuhan nin katawohan? (b) Gurano an ipinaheling na diosnon na takot ni Jesus?

⁶ Kan laman digdi sa daga, naeksperyensiahan ni Jesus kun ano an pagigin tawo, “hababa nin kadikit kisa mga anghel.” (Hebreo 2:7) Naaraman nia an mga kaluyahan nin tawo asin kun siring kuwalipikadong marhay na maglingkod bilang Hade asin Hokom nin katawohan sa laog nin sangribong taon. An Aki nin Dios na ini, na nagsabi, “Madia kamo sa sako, kamo gabos na napapagal asin nagagabatan, asin tatawan ko kamo nin kaginhawahan,” nakaaaram kun anong klaseng kaginhawahan an kaipuhan nin katawohan. (Mateo 11:28) An Hebreo 5:7-9 nagsasabi sato: “Sa mga aldaw kan saiyang laman si Cristo nagdolot nin mga pagngayongayo patin nin mga kahagadan sa Saro na makapagliligtas sa saiya hale sa kagadanan, na may makosog na mga pagtangis asin luha, asin sia dinangog na may pabor huli sa saiyang diosnon na takot. Minsan ngani sia Aki, sia nakanood nin pagkuyog hale sa mga bagay na saiyang tinios; asin pakatapos na sia ginibong sangkap [sa pagkuyog] nagtao sia nin daing sagkod na kaligtasan sa gabos na nagkukuyog sa saiya.” Si Jesus dai nag-urong-sulong, minsan ngani sia kinaipuhan na magtagal sagkod na maeksperyensiahan an sugod nin pagkagadan nin tawo sa pag-ako nin ‘lugad sa bool’ hale sa naoongis na Halas. (Genesis 3:15) Kapareho ni Jesus, kita logod perming magpaheling nin diosnon na takot, dawa sagkod sa kagadanan kun kaipuhan, na nagsasarig na dadangogon ni Jehova Dios an satong mga pagngayongayo asin tatawan kita nin kaligtasan.

‘Pagkabuhay sa Katanosan’

7. Sono sa 1 Pedro 2:21-24, anong padara an iwinalat ni Cristo para sa sato, asin paano kita maninigong maapektaran kan saiyang ginibo?

⁷ Mantang nahahayag sa laman, si Jesus maimbod na binukasan an banal na hilom nin diosnon na debosyon. Mababasa niato sa 1 Pedro 2:21-24: “Minsan si Cristo nagtios para sa saindo, na winalatan kamo nin padara tanganing sunodon nindo nin estrikto an saiyang mga lakad. Dai sia nakaginibo nin kasalan, ni nakua man sa saiyang ngoso an kadayaan. Kan sia pinag-oolog-olog, dai sia nagbalos na mag-olog-olog. Kan sia nagtitios, dai sia nagpatakot, kundi padagos na nagdolot kan saiyang sadiri sa naghohokom nin matanos. Sia mismo nagdara kan satong mga kasalan sa saiyang sadiring hawak duman sa harigi, tanganing kita mahalean nin mga kasalan asin mabuhay sa katanosan.” Mantang hinohorophorop niato an ginibo ni Jesus, iyan nakadadagkang gayo sato na maghingoang magibo an diosnon na debosyon, magdanay sa integridad, asin mabuhay sa katanosan kapareho nia!

8. Paano kita puwedeng mabuhay sa katanosan arog ni Jesus?

⁸ Si Jesus talagang nabuhay sa katanosan. An Salmo 45:7 naghula manongod sa saiya: “Namoot ka sa katanosan asin naongis ka sa karatan.” Iinaaplikar an mga tataramon na iyan ki Jesus, si apostol Pablo nagsabi sa Hebreo 1:9: “Namoot ka sa katanosan, asin naongis ka sa karatan.” Sa liwanag kan satong pakasabot sa banal na hilom kan diosnon na debosyon na ini, kita logod kapareho ni Jesus perming kamotan an matanos asin ikaongis an maraot. Sa Kristianong moral, na ngonyan sinasalakay nin desidido kan kinaban ni Satanas, asin sa gabos niatong pakikiiba sa mga nasa laog asin nasa luwas kan organisasyon nin Dios, magin determinado kitang mabuhay sa katanosan, na sinusuportaran an tamang mga prinsipyo ni Jehova. Asin padagos kitang magpiyesta sa Tataramon nin Dios tanganing magkaigwa kan diosnon na pagmansay na kaipuhan na gayo sa paglaban sa Diablo asin sa saiyang mga pakana!

9. Ano an nakadugang sa kaigotan ni Jesus sa ministeryo, asin ano an kalabot digdi mapadapit sa mga pastor nin falsong relihiyon?

⁹ May saro pang dagdag na nakamotibar ki Jesus na magin maigot sa saiyang ministeryo. Ano iyan? Sa Mateo 9:36 mababasa niato: “Kan maheling nia an kadaklan naherak sia sainda, huli ta sinda maniwang asin nagkakaralagalag siring sa mga karnero na mayong pastor.” Kaya si Jesus “nagpoon na magtokdo sa sainda nin balakid na mga bagay.” (Marcos 6:34) Siyempre, kalabot digdi an pagbuyagyag kan karatan asin katampalasanan kan falsong relihiyosong mga pastor. Sono sa Mateo 15:7-9, sinabihan ni Jesus an nagkapira sa mga ini: “Kamong mga parasaginsagin, marahay nanggad an pagkahula ni Isaias dapit sa saindo, kan sia magsabi, ‘An mga tawong ini nagtataong onra sako sa saindang mga ngabil, alagad an saindang puso harayo sako. Sayang sana na sinda nagsasamba sako, huli ta itinotokdo ninda bilang mga doktrina an mga pagboot nin mga tawo.’”

Sarong Makamomondong Misteryo

10. Ngonyan, “an misteryo kan katampalasanan na ini” nasisentro kiisay, asin ano an kasalan ninda?

¹⁰ Kun paanong si Jesus nagtaram tumang sa mga namomoon sa falsong relihiyon, ngonyan man ikinamomondo niato an sarong misteryo na kabaliktaran na gayo kan banal na hilom kan diosnon na debosyon. Sa 2 Tesalonica 2:7, inapod iyan ni Pablo na “an misteryo kan katampalasanan na ini.” Idto sarong misteryo kan enot na siglo C.E. ta dai idto mahahayag sagkod na haloy nang nagadan an mga apostol. Ngonyan, iyan nasisentro sa klero nin Kakristianohan, na mas interesado sa politika kisa sa pagpahayag kan maogmang bareta kan matanos na Kahadean nin Dios. Lakop an pagsaginsagin sa tahaw ninda. An lataw na gayong halimbawa iyo an mga ebanghelista sa telebisyon kan mga sektang Protestante nin Kakristianohan: mga nagdodonongdonongan na nanganguwarta sa saindang mga aripompon, nagtotogdok nin multimilyon-dolyar na mga imperyo, nakikiibaiba sa mga patotot, naghihibihibian kun nabubuyagyag, asin daing ontok sa paghagad nin kuwarta, nin dagdag pang kuwarta. An Batikano kan Romano Katoliko arog man kaiyan kamakasosopog kan kamugtakan, huli sa daing konsensiang mga politikal na koneksion kaiyan, panluwas na luho, asin maraot na mga gibo may koneksion sa bangko.

11. Ano an mangyayari sa klero nin Kakristianohan asin sa bilog na Dakulang Babilonya?

¹¹ Bakong makangangalas na an klero nin Kakristianohan masasabing iyo “an tawo nin katampalasanan”! (2 Tesalonica 2:3) An lataw na kabtang na ini kan garo-patotot na Dakulang Babilonya biyong mabubuyagyag asin magagaba, kaiba an bilog na falsong relihiyon. Arog kan mababasa niato sa Kapahayagan 18:9-17, an mga politiko asin negosyante (asin an saindang mga bangkero) mananambitan sa panahon na iyan: “Herak man, herak man, saimo dakulang siudad!” An Dakulang Babilonya asin an saiyang mga misteryo nabuyagyag na sa panahon na iyan, na kabaliktaran na gayo sa gabos na nagtatao nin liwanag sa banal na hilom kan diosnon na debosyon.

12. An pagkamoot ni Jesus sa katanosan naggiya sa saiya na gibohon an ano?

¹² An pagkamoot ni Jesus sa katanosan asin pagkaongis sa katampalasanan naggiya sa saiya na biyong maghingoa para sa tunay na pagsamba. Sa enot niang pagsongko sa Jerusalem bilang an linahidan na Aki nin Dios, pinalayas ni Cristo an mga negosyante asin mga pararibay nin pirak sa templo, na sinasabi: “Halea nindo digdi an mga bagay na ini! Dai nindo paggibohon an harong kan sakong Ama na harong nin negosyo!” (Juan 2:13-17) Sa mas nahuring pagsongko sa templo, sinabihan ni Jesus an nagkokontrang mga Judio: “Gikan kamo sa saindong ama na Diablo, asin boot nindo na gibohon an mga horot kan saindong ama. An sarong iyan sarong paragadan sa kapinonan, asin dai sia nagdanay sa katotoohan, huli ta mayo sa saiya an katotoohan. Kun sia nagtataram nin putik, sia nagtataram oyon sa saiyang sadiring boot, huli ta sia sarong putikon asin iyo an ama kan kaputikan.” (Juan 8:44) Kanigoan na kapusoan an ipinaheling ni Jesus sa pagsabi nin prangka sa mga relihiyonistang idto na sinda mga putikon asin aki kan Diablo!

13. (a) Saen nangorognang ipinahayag an pagkaongis ni Jesus sa katampalasanan? (b) Taano an tampalasan na klero ta maninigong hokoman nin kapareho sa ipinahayag ni Jesus sa mga eskriba asin Fariseo?

¹³ An pagkaongis ni Jesus sa katampalasanan pinakamalinaw na ipinahayag sa saiyang malanit na pagdenunsiar sa mararang mga eskriba asin Fariseo, arog kan nasusurat sa Mateo kapitulo 23. Dian sia nagsabi nin pitong “herak man,” na ibinabaing sinda sa ‘mga lolobngan na pinaputi—na pano nin gabos na klaseng ramog, pagsaginsagin, asin katampalasanan.’ Kanigoan an pagmawot ni Jesus na kaldahon sa katampalasanan na iyan an inaaping banwaan! “Jerusalem, Jerusalem,” an saiyang ikinurahaw, “makapirang binoot kong tiriponon an saimong mga aki, siring kan gunakan na minatipon kan saiyang mga siwo sa irarom kan saiyang mga pakpak! Alagad ta kamo huminabo kaiyan. Uya! An saindong harong pinabayaan na sa saindo.” (Bersikulo 37, 38) An tampalasan na klero ngonyan maninigo sa kabaing na paghokom ta, arog kan sabi kan 2 Tesalonica 2:12, “dai sinda nagturubod sa katotoohan kundi nag-ogma sa kabikoan.” An saindang katampalasanan iyo an kabaliktaran sa diosnon na debosyon na maimbod na ipinaheling ni Jesus kan sia yaon digdi sa daga.

Pagpapahayag kan mga Paghokom nin Dios

14. An pag-apresyar sa banal na hilom kan diosnon na debosyon maninigong magpahiro sato na gibohon an ano?

¹⁴ An pag-apresyar niato sa banal na hilom kan diosnon na debosyon maninigong gumiya sa sato na perming sumunod sa mga lakad ni Jesus. Kapareho nia, maninigo na kita maigot sa pagbalangibog kan inaapod kan Isaias 61:2 na “taon nin marahay na boot ni Jehova asin . . . aldaw nin pamalos kan satong Dios.” Asin gibohon logod niato nin maigot an satong kabtang “sa pagranga kan gabos na nagtatangis.” Arog kaidtong yaon digdi sa daga si Jesus, kaipuhan niato ngonyan an kapusoan na ipahayag an mga paghokom ni Jehova, kaiba an makokosog na mensahe sa prangkang mga artikulo sa Torrengbantayan asin sa librong Revelation—Its Grand Climax At Hand! Kaipuhan kitang maghulit na mapuso asin mataktika, na an satong mga tataramon “tinimplahan nin asin” tanganing magin managom sa mga gusto sa katanosan. (Colosas 4:6) Mantang nakanood sa halimbawa ni Jesus sa diosnon na debosyon, makapagreport logod kita sa igong panahon na natapos na niato an ipinagigibo sa sato ni Jehova.—Mateo 24:14; Juan 17:4.

15. Kun manongod sa banal na hilom nin Dios, ano an nangyari poon kan 1914?

¹⁵ Kan nahayag sa laman, si Jesus nagin marahayon nanggad na Arogan! Malinawon na naotob sa saiya an banal na hilom kan diosnon na debosyon! Mapuso nanggad na inomaw nia an ngaran ni Jehova! Asin makangangalas nanggad na si Jesus binalosan kan saiyang Ama huli sa saiyang pagdadanay sa integridad! Alagad ta bako sana ini an kalabot sa banal na hilom nin Dios. Magpoon kan 1914 kita nabubuhay sa “aldaw kan Kagurangnan.” (Kapahayagan 1:10) Arog kan sinasabi kan Kapahayagan 10:7, idto an panahon na ‘an banal na hilom nin Dios sono sa maogmang bareta matapos.’ An mga tingog sa langit nagpahayag na: “An kahadean kan kinaban nagin nang kahadean kan satong Kagurangnan [si Jehova] asin kan saiyang Cristo, asin sia maghahade sagkod lamang.” (Kapahayagan 11:15) Pinatukaw na ni Jehova an Mesiyanikong Hade, si Jesu-Cristo, sa saiyang mamuraway na trono tanganing magin katabang na hade Nia!

16. Paano listong ipinaheling kan bagong tumukaw sa tronong Hade, si Jesu-Cristo, an saiyang pagmakolog sa kabanalan duman sa langit?

¹⁶ Bilang katabang na hade nin Dios sa bagong mamundag na Kahadean, si Jesus inaapod man na Miguel (na an boot sabihon, “Siisay an Nakaaagid sa Dios?”). Mayo nin rebelde na mahihimong makaagid sa Dios, asin an bagong patukawon sa tronong Hade listong ipinaheling ini paagi sa pag-apon sa gurang na Halas, si Satanas, asin kan saiyang mga anghel digdi sa daga. (Kapahayagan 12:7-9) Iyo, si Jesus may pagmakolog sa kabanalan duman sa langit, kun paanong sia nagpaheling nin diosnon na debosyon kan yaon digdi sa daga. An pinamuraway na si Jesu-Cristo dai mapondo sagkod na napoho na nia an falsong relihiyon asin biyo nang napara an organisasyon ni Satanas, naheheling asin dai naheheling.

17. Magpoon kan 1914, ano an nangyayari bilang kaotoban kan Mateo 25:31-33?

¹⁷ Poon kan 1914 an pagkaotob kan hula ni Jesus sa Mateo 25:31-33 nagtao nin makosog na liwanag sa banal na hilom nin Dios. Dian si Jesus nagsasabi: “Kun an Aki nin tawo magdatong na sa saiyang kamurawayan, asin an gabos na anghel kaibanan nia, dangan sia matukaw sa saiyang mamurawayon na trono. Asin an gabos na nasyon titiponon sa atubang nia, asin pagbubulagbulagon nia an mga tawo, kun paanong ibinubulag nin pastor an karnero hale sa mga kanding. Asin ibubugtak nia an mga karnero sa saiyang too, alagad an mga kanding sa saiyang wala.” Gikan sa saiyang halangkaw na kamugtakan sa kalangitan, an mamuraway na Hade, Hokom, asin Parasuportar na ini sa diosnon na debosyon mamamalos, enot sa tawo nin katampalasanan asin iba pang kabtang kan Dakulang Babilonya, dangan sa gabos na natatadang elemento asin arog-kanding na mga parasuportar sa maraot na daganon na organisasyon ni Satanas. Dangan ihoholog sa bungaw si Satanas. (Kapahayagan 20:1-3) Alagad an arog-karnerong “mga matanos” mapasiring sa buhay na daing katapusan. (Mateo 25:46) Ibugtak logod kamo sa matanos na grupong iyan kan saindong paglakaw sa diosnon na debosyon!

18. Ano an satong magayagayang pribilehiyo may koneksion sa banal na hilom kan diosnon na debosyon?

¹⁸ An Kapahayagan 19:10 nagsasadol sato na “sumamba ka sa Dios.” Asin taano? An kasuratan nagpapadagos: “Huli ta an pagpatotoo ki Jesus iyo an nagpapasabong nin paghula.” An kadakol na ipinasabong na hula kan suanoy na mga panahon nagpatotoo ki Jesus! Asin mantang naootob an mga hulang ini, an banal na hilom nin Dios nagigin malinawon siring sa kristal. Kun siring, ikinaoogma niatong maaraman na an banal na hilom kan diosnon na debosyon na ini napersonipikar ki Jesus. Kita may makangangalas na pribilehiyo na sumunod sa saiyang mga lakad bilang mapakumbabang mga ministro kan Kahadean nin Dios. Iyo, para sa sato dakulang onra an makikabtang sa pagsabot sa asin pagbalangibog kan gabos na banal na hilom nin Dios sono sa maogmang bareta!