Dai Maghusgar Base sa Pangluwas na Itsura

 1. Ano an iprinopesiya ni Isaias may koneksiyon ki Jesus, asin taano ta nakakapakusog iyan?

PAAGI sa saiyang propesiya mapadapit sa satong Kagurangnan na Jesu-Cristo, pinapakusog kita ni Isaias asin tinatawan nin paglaom. Nagpropesiya si Isaias na si Jesus ‘dai maghuhukom susog sa nahihiling o nadadangog niya.’ Saiyang ‘huhukuman sa katanusan an dukha.’ (Isa. 11:3, 4, BPVa) Taano ta nakakapakusog iyan? Huling nabubuhay kita sa kinaban na pano nin paboritismo asin pagpalain-lain. Hinahalat na nanggad niyato gabos an perpektong Hukom na nungkang mahusgar base sa satong pangluwas na itsura!

 2. Ano an ipinagbuot sa sato ni Jesus, asin ano an pag-uulayan ta sa artikulong ini?

² Aroaldaw, naggigibo kita nin mga paghusgar dapit sa mga tawo. Pero huling bako kitang perpekto, dai kita nakakagibo nin perpektong paghusgar arog ni Jesus. May tendensiya kitang maimpluwensiyahan kan nahihiling kan satong mga mata. Alagad, kan si Jesus nasa daga, ipinagbuot niya: “Magpundo na kamo sa paghusgar base sa pangluwas na itsura, kundi maghusgar kamo sa matanos na paagi.” (Juan 7:24) Malinaw na gusto ni Jesus na arugon ta siya na dai hinuhusgaran an iba base sa saindang pangluwas na itsura. Sa artikulong ini, pag-uulayan ta an tulong aspekto na diyan parating naiimpluwensiyahan an mga tawo kan nahihiling kan saindang mga mata: an rasa o nasyonalidad, estado sa buhay, asin edad. Sa kada saro kaiyan, tutukaron ta an praktikal na mga paagi kun paano ta masusunod an pagbuot ni Jesus.

3, 4. (a) Anong mga pangyayari an nakapabago sa pagmansay ni apostol Pedro sa mga Hentil? (Hilingon an ritrato sa kapinunan kan artikulo.) (b) Anong bagong katotoohan an ipinasabot ni Jehova ki Pedro?

³ Imahinara an mga naiisip ni apostol Pedro kan ipinaapod siya sa harong kan Hentil na si Cornelio sa Cesarea. (Gibo 10:17-29) Arog kan iba pang mga Judio kan panahon niya, nagimatan na ni Pedro an paniniwala na maati an mga Hentil. Pero may mga pangyayari na huli kaiyan nabago an paniniwalang iyan ni Pedro. Halimbawa, nakahiling pa sana si Pedro nin sarong milagrosong bisyon. (Gibo 10:9-16) Ano an nahiling ni Pedro? Igwa nin siring sa tamong na lalagan na kadakul nin maating hayop na itinunton sa saiya mantang sarong boses hali sa langit an nagsabi: “Tindog na Pedro, magbuno ka asin magkakan!” Marigon na nagsayuma si Pedro. Dangan, sinabi sa saiya kan boses hali sa langit na “dai . . . na pag-apudon na maati an mga bagay na lininig na nin Diyos.” Pakamata niya, pigparaisip ni Pedro kun ano an buot ipasabot sa saiya kan boses. Dangan, nag-abot an mga mensahero ni Cornelio. Pakaresibi kan paggiya kan banal na espiritu, nag-iba na si Pedro sa mga mensahero pasiring sa harong ni Cornelio.

⁴ Kun ibinase sana ni Pedro sa pangluwas na itsura an paghusgar niya, nungka kuta siyang malaog sa harong ni Cornelio. An mga Judio kaya dai naglalaog sa harong nin mga Hentil. Haloy nang nakagamot ki Pedro an pagpalain-lain na iyan, kaya taano ta naglaog siya? Nagkaigwa nin dakulang epekto ki Pedro an nahiling niyang bisyon asin an pag-asigurar na itinao sa saiya kan banal na espiritu. Pagkatapos niyang madangog an mga sinabi ni Cornelio, napahirong marhay si Pedro asin pinasabngan na magsabi: “Ngunyan lubos ko nang nasasabutan na an Diyos mayong pinapalain, kundi sa lambang nasyon an tawong natatakot sa saiya asin naggigibo nin matanos saiyang inaako.” (Gibo 10:34, 35) Para ki Pedro, pambihira nanggad na bagong pakasabot iyan na magkakaigwa nin dakulang epekto sa gabos na Kristiyano! Paano?

 5. (a) Ano an gusto ni Jehova na masabutan kan gabos na Kristiyano? (b) Dawa aram ta na an katotoohan, ano an tibaad dai ta pa nahahali?

⁵ Paagi ki Pedro, tinatabangan ni Jehova an gabos na Kristiyano na masabutan na dai Siya nagpapalain-lain. Dai niya hinihiling an rasa, etnikong pinaghalian, nasyonalidad, tribo, o lengguwahe nin saro. Inaako niya an siisay man na lalaki o babayi na may takot sa Diyos asin ginigibo kun ano an tama. (Gal. 3:26-28; Kap. 7:9, 10) Daing duda na aram mo man mismo na totoo ini. Pero paano kun nagdakula ka sa lugar o sa pamilya na komun an pagpalain-lain? Dawa sa paghiling mo dai kang ipinapaurog, tibaad may pagpalain-lain ka pang dai nahahali sa buot mo. Maski si Pedro, na nagkapribilehiyong ihayag na daing ipinapaurog si Jehova, nagpahiling nin pagpalain-lain pag-abot nin panahon. (Gal. 2:11-14) Paano ta masusunod si Jesus asin dai na maghusgar base sa pangluwas na itsura?

 6. (a) Ano an makakatabang sa sato na mahali an pagpalain-lain sa satong puso? (b) Ano an nahayag dapit sa sarong responsableng brother sa report na ginibo niya?

⁶ Paagi sa Tataramon nin Diyos, kaipuhan niyatong siyasaton na marhay an satong sadiri tanganing maaraman kun may dai pa kita nahahaling pagpalain-lain sa satong isip asin puso. (Sal. 119:105) Tibaad kaipuhan man niyato an mamumuton na tabang kan iba na tibaad naririsa na may pagpalain-lain kita, dawa kun kita mismo dai niyato iyan naririsa sa sadiri ta. (Gal. 2:11, 14) Posibleng nakatadom na iyan na marhay sa sato kaya dai ta na iyan naririsa. Halimbawa, sarong responsableng brother an nagsumitir nin report dapit sa sarong arugan na mag-agom na naglilingkod nin bilog na panahon. An agom na lalaki kabilang sa sadit na etnikong grupo na parating hababa an paghiling kan iba. Minalataw na dai narisa kan responsableng brother na siya mismo igwa man nin dai pa nahahaling pagpalain-lain sa etnikong grupong ini. Sa saiyang report, dakul siyang sinabing positibong bagay dapit sa agom na lalaki; pero sa katapusan sinabi niya: “Dawa kabilang siya sa [nasyonalidad na ini], an paggawi asin an paagi nin pamumuhay niya nakakatabang sa iba na masabutan na an pagigin [hali sa etnikong grupong ini] nin saro dai man pirming nangangahulugan na maati saka mas hababa an pamumuhay niya, na tipikal sa dakul na kabilang [digdi].” Nahiling mo an punto? Ano man an satong pribilehiyo, dapat na siyasaton niyatong marhay an satong sadiri asin magin andam na magpatabang tanganing mahiling ta an ano man na pagpalain-lain na tibaad yaon pa sa satong puso. Ano pa an puwede tang gibuhon?

 7. Paano ta maipapahiling na lubos niyatong binubuksan an satong puso?

⁷ Kun bubuksan niyato nin lubos an satong puso, masasalidahan niyato nin pagkamuot an pagpalain-lain. (2 Cor. 6:11-13) Kinatudan mo na daw na makidayupot sana sa mga karasa, kanasyon, katribo, o kalengguwahe mo? Kun iyo, magpahiwas ka. Puwede mo daw imbitaran an mga tugang na may ibang pinaghalian na makaiba mo sa ministeryo o imbitaran sinda sa harong para magkakan o magtiripon-tipon? (Gibo 16:14, 15) Kun gigibuhon mo iyan, mapapano nin dakulang pagkamuot an saimong puso asin mawawaran na nin lugar an pagpalain-lain. Pero may iba pang aspekto na diyan may tendensiya kitang husgaran an iba base sa pangluwas na itsura. Sunod tang pag-ulayan an estado sa buhay.

 8. Sigun sa Levitico 19:15, paano puwedeng makaapektar sa paghusgar niyato an estado sa buhay nin saro?

⁸ An estado sa buhay saro pang aspekto na puwedeng makaapektar sa pagmansay niyato sa iba. Sinasabi kan Levitico 19:15: ‘Dai kamo magpahiling nin [pagpaurog] sa mga dukha o [paboritismo] sa mga mayaman. Alagad sa katanusan, husgaran nindo an saindong kapwa.’ (BPV) Pero paano puwedeng makaapektar an estado sa buhay nin saro sa pagmansay ta sa saiya?

 9. Anong makamumundong katotoohan an isinurat ni Solomon, asin ano an itinutukdo kaini sa sato?

⁹ Pinahiro si Solomon kan banal na espiritu na isurat an sarong makamumundong katotoohan dapit sa bakong perpektong mga tawo. Sa Talinhaga 14:20, sinabi niya: ‘An dukha [ikinakaanggot] maski kan saiyang kataraid, alagad an mayaman dakul an katuod.’ (BPV) Ano an itinutukdo sa sato kan talinhagang ini? Kun dai kita mag-iingat, tibaad mayayaman sanang mga tugang an gusto tang magin amigo mantang rinarayuan an pobreng mga tugang. Taano ta peligrosong marhay na basta ta na sana ibasar sa estado sa buhay an halaga nin sarong tawo?

10. Nagpatanid si Santiago dapit sa anong problema?

¹⁰ Kun hinuhusgaran ta an iba base sa saindang estado sa buhay, puwedeng pagpunan iyan nin pagkabaranga sa kongregasyon. Nagpatanid an disipulong si Santiago na an problemang ini an dahilan kaya nagkakabaranga an pirang kongregasyon kan inot na siglo. (Basahon an Santiago 2:1-4.) Dapat tang ingatan an satong mga kongregasyon ngunyan na dai maapektaran kan kaisipan na ini. Paano ta malilikayan an siring na paghusgar base sa pangluwas na itsura?

11. May epekto daw sa relasyon nin saro ki Jehova an estado niya sa buhay? Ipaliwanag.

¹¹ Dapat na hilingon niyato an satong mga tugang arog kan paghiling sa sainda ni Jehova. Ibinibilang ni Jehova na mahalaga an saro bako huli ta mayaman ini o pobre. An satong relasyon ki Jehova nungkang nakadepende sa kun gurano kadakul kan satong materyal na pagsadiri. Totoo na sinabi ni Jesus na “magigin dipisil para sa tawong mayaman na makalaog sa Kahadian kan kalangitan,” alagad dai niya sinabi na imposible iyan. (Mat. 19:23) Sa ibong na lado, sinabi man ni Jesus: “Maugma kamong mga dukha, huli ta sa saindo an Kahadian nin Diyos.” (Luc. 6:20) Pero, dai man ini nangangahulugan na gabos na pobre maako nin espesyal na mga bendisyon asin madangog sa mga katukduan ni Jesus. Dakul na pobre an dai nagdangog. An punto, Dai ta basta puwedeng husgaran an relasyon nin saro ki Jehova base sa saiyang estado sa buhay.

12. Anong sadol an itinatao kan Kasuratan sa mga mayaman asin sa mga pobre?

¹² Dakul kitang tugang ngunyan na mayaman asin pobre na namumuot asin naglilingkod ki Jehova nin bilog na puso. Sinasadol kan Kasuratan an mga mayaman “na ibugtak an saindang tiwala, bako sa kayamanan na mayong kasiguruhan, kundi sa Diyos.” (Basahon an 1 Timoteo 6:17-19.) Siring man, an Tataramon nin Diyos nagsasadol sa gabos na lingkod nin Diyos, mayaman man o pobre, na mag-ingat na dai mamuot sa kuwarta. (1 Tim. 6:9, 10) Iyo, kun bubuksan niyato an satong mga mata asin hihilingon an satong mga tugang arog kan paghiling sa sainda ni Jehova, dai ta sinda huhusgaran base sana sa saindang materyal na pagsadiri. Pero paano man pag-abot sa edad? Marahay na basehan daw iyan para husgaran ta an iba? Hilingon ta.

13. Ano an itinutukdo sa sato kan Kasuratan dapit sa paggalang sa mga may edad na?

¹³ Parati kitang sinasadol kan Kasuratan na pahilingan nin tamang paggalang an mga may edad na. Sinasabi sa Levitico 19:32: “Maninigo na tumindog ka sa atubangan nin may uban, asin dapat kang magtaong onra sa may edad na, asin dapat na matakot ka sa saimong Diyos.” (NW) Kapareho kaiyan, sinasabi kan Talinhaga 16:31 na “an uban korona nin kagayunan kun iyan yaon sa dalan nin katanusan.” (NW) Siring man, sinadol ni Pablo si Timoteo na dai pakasobrahan nin tuyaw an sarong may edad nang lalaki kundi mansayon ini nin siring sa sarong ama. (1 Tim. 5:1, 2) Dawa ngani igwa man nin awtoridad si Timoteo sa may edad nang mga lalaking iyan, dapat niya sindang pagmakulgan asin igalang.

14. Sa anong sitwasyon angay na tawan niyato nin kinakaipuhan na konseho o disiplina an saro na mas maedad kisa sa sato?

¹⁴ Alagad, sagkod sain aplikado an prinsipyong iyan? Halimbawa, kun an sarong may edad na tuyong naggigibo nin kasalan o kaya nagsusuportar sa sarong bagay na dai inuuyunan ni Jehova, obligado daw kitang pabayaan na sana siya sa sala niyang ginigibo? Si Jehova dai mahusgar base sa pangluwas na itsura asin dai niya pagpapasensiyahan an tuyong parakasala huli sana ta may edad na ini. Pag-isipan an prinsipyo na nasa Isaias 65:20: “An parakasala isusumpa, dawa ngani sanggatos anyos na siya.” (NW) Siring man kaiyan an prinsipyo na ipinapahiling sa bisyon ni Ezequiel. (Ezeq. 9:5-7) Kaya, an dapat na pirming pinakapanginot sa sato iyo an pagpahiling nin paggalang sa Suanoy kan mga Aldaw, si Jehova Diyos. (Dan. 7:9, 10, 13, 14) Kun gigibuhon ta iyan, dai kita mag-aalangan na itanos an saro na nangangaipo nin konseho, maski ano pa an edad niya.—Gal. 6:1.

15. Ano an manunudan ta ki apostol Pablo dapit sa pagpahiling nin paggalang sa mas hoben na mga brother?

¹⁵ Paano man an mas hoben na mga brother sa kongregasyon? Ano an paghiling mo sa sainda? Nagsurat si apostol Pablo sa hoben na si Timoteo: “Dai mo nuarin man pagpabayaan na menuson nin siisay man an pagigin hoben mo. Imbes, magi kang halimbawa sa mga maimbod kun manungod sa pagtaram, sa paggawi, sa pagkamuot, sa pagtubod, sa kalinigan.” (1 Tim. 4:12) Posibleng labi pa sanang 30 anyos si Timoteo kan isurat ni Pablo an mga tataramon na ini. Alagad, inasignaran na siya ni Pablo na mag-asikaso nin magabat na mga responsabilidad. Ano man an dahilan kaya tinawan siya kan konsehong ini, malinaw an punto. Dai niyato dapat husgaran an mas hoben na mga brother base sana sa saindang edad. Marahay na girumdumon na maski ngani an satong Kagurangnan na Jesus isinagibo an saiyang bilog na ministeryo sa daga kan siya labi pa sanang 30 anyos.

16, 17. (a) Paano dinedeterminaran kan mga elder kun baga kuwalipikado na an sarong brother na irekomendar na magin ministeryal na lingkod o elder? (b) Paano tibaad magin kontra sa Kasuratan an personal na mga opinyon asin an kinatudan sa kultura?

¹⁶ Tibaad sa kultura ta dai gayong iginagalang an hoben na mga lalaki. Kun arog kaiyan, tibaad mag-alangan an mga elder sa kongregasyon na magrekomendar nin kuwalipikadong hoben na mga brother na magin ministeryal na lingkod o elder. Marahay na girumdumon kan gabos na elder na an Kasuratan mayong itinataong minimum na edad para sa sarong brother tanganing irekomendar na magin ministeryal na lingkod o elder. (1 Tim. 3:1-10, 12, 13; Tito 1:5-9) Kun an sarong elder naggigibo nin pamantayan base sa kultura, dai siya minagawi kauyon kan Kasuratan. Dapat na ebalwaron an hoben na mga lalaki bako base sa personal na mga opinyon o sa kultura, kundi base sa pamantayan na itinatao kan Tataramon nin Diyos.—2 Tim. 3:16, 17.

¹⁷ Hilinga kun paano an siring na pagmansay na bakong basado sa Kasuratan puwedeng makaulang na manombrahan an kuwalipikadong mga brother. Sa sarong nasyon, sarong kuwalipikadong marhay na ministeryal na lingkod an pinagkatiwalaan nin magabat na mga responsabilidad. An mga elder sa kongregasyon uyon na naabot na kan hoben na brother sa rasonableng lebel an basado sa Kasuratan na mga kuwalipikasyon para sa sarong elder, alagad dai ninda siya irinekomendar na nombrahan. Ininsistir kan pirang may edad nang elder na hobenon pang hilingon an brother para magin elder. Makamumundo na dai ninombrahan an brother huli sana sa saiyang itsura. Dawa sarong pangyayari sana ini, ipinapahiling kan mga report na dakul an igwang arog kaiyan na kaisipan sa manlain-lain na parte kan kinaban. Mahalaga nanggad na manarig kita sa Kasuratan imbes na sa kinatudan sa satong kultura o sa personal na mga opinyon ta! Iyan sana an paagi tanganing masunod ta si Jesus asin dai na maghusgar base sa pangluwas na itsura.

18, 19. Ano an kaipuhan niyatong gibuhon tanganing maarog an paghiling ni Jehova sa iba?

¹⁸ Dawa bako kitang perpekto, puwede niyatong maarog si Jehova na mayong pinapalain. (Gibo 10:34, 35) Pero kaipuhan niyato an padagos na paghihinguwa asin an regular na pagirumdom hali sa Tataramon nin Diyos. Kun iaaplikar ta an mga pagirumdom na ini, mas masusunod niyato an pagbuot ni Jesus na dai na maghusgar base sa pangluwas na itsura.—Juan 7:24.

¹⁹ Dai na mahahaloy, huhukuman na kan satong Hadi, si Jesu-Cristo, an bilog na katawuhan bako base sa nahihiling kan saiyang mata o sa nadadangog kan saiyang talinga, kundi base sa matanos na paghukom. (Isa. 11:3, 4) Pambihirang panahon nanggad iyan!