Ika Daw Marahay na Kapwa Trabahador?

Nanudan ni Jesus an mga kuwalidad na nagpangyari sa saiya na magin marahayon na halimbawa nin sarong kapwa trabahador para sa mga nakaibanan niya digdi sa daga. Paano kita makikinabang sa halimbawa ni Jesus? Paagi sa maingat na pagsiyasat sa saiyang halimbawa, maaaraman ta an tulong prinsipyo na makakatabang sa sato na magin marahay na mga kapwa trabahador. An mga prinsipyong ini makakatabang sa sato na mas makapahiling nin espiritu nin pagkasararo asin kooperasyon.

An sarong marahay na kapwa trabahador mapakumbaba asin pinapahalagahan an saiyang mga katrabaho saka dai iniisip na pahangaon an iba. An arog kaiyan na mapakumbabang sabuot nanudan ni Jesus sa saiyang Ama. Minsan ngani si Jehova sana an maninigong apudon na Kaglalang, tinawan niya nin atensiyon an nagin papel kan saiyang Aki asin kapwa trabahador. Maririsa ta iyan sa sinabi nin Diyos: “Gibuhon ta an tawo uyon sa satuyang ladawan.” (Gen. 1:26) Posibleng marhay na naapresyar ni Jesus an kapakumbabaan ni Jehova sa bagay na ini.—Sal. 18:35.

Mantang nasa daga, ipinahiling ni Jesus an arog kaiyan na kapakumbabaan. Pag inuumaw siya huli sa saiyang mga nagibo, itinatao niya an onra sa Saro na maninigo kaiyan. (Mar. 10:17, 18; Juan 7:15, 16) Hininguwa ni Jesus na mapagdanay an matuninong na relasyon sa saiyang mga disipulo asin minansay niya sinda bilang mga amigo imbes na mga uripon. (Juan 15:15) Hinanawan pa ngani niya an saindang bitis para itukdo sa sainda an leksiyon manungod sa kapakumbabaan. (Juan 13:5, 12-14) Arog niya, dapat ta man na pahalagahan an satong mga kapwa trabahador imbes na inuton an sadiri tang kapakanan. Pag ‘tinatawan ta nin onra an lambang saro’ asin pag dai ta pigpaparaisip kun kiisay mapapaduman an pag-umaw, mas dakul an mahahaman ta.—Roma 12:10.

Nasasabutan nin sarong mapakumbabang tawo na “may nahahaman pag may dakul na parakonseho.” (Tal. 15:22) Ano man an satong mga eksperyensiya o mga abilidad, dapat tang girumdumon na mayo nin tawo na aram an gabos. Maski si Jesus, inadmitir niya na may mga bagay na dai niya aram. (Mat. 24:36) Interesado man siya sa kun ano an aram o opinyon kan saiyang bakong perpektong mga disipulo. (Mat. 16:13-16) Kaya bako nanggad makangangalas na pamugtak an buot sa saiya kan mga kapwa trabahador niya! Sa kaparehong paagi, pag may kapakumbabaan niyatong isinasaisip an satong mga limitasyon asin dinadangog an opinyon kan iba, nagkakaigwa kita nin matuninong na relasyon sa sainda asin iribang “may nahahaman.”

Lalo nang mahalaga para sa mga elder na arugon si Jesus sa bagay na ini pag iribanan sindang nagtatrabaho. Kaipuhan nindang girumdumon na puwedeng giyahan kan banal na espiritu an siisay man sa mga elder sa grupo nin kamagurangan. Kun sa saindang mga miting, pinapagdanay kan mga elder na mamatian kan gabos na libre sindang magpahayag kan saindang opinyon, iriba sindang makakagibo nin mga desisyon na makikinabang an bilog na kongregasyon.

An sarong marahay na kapwa trabahador rasonable sa pakikiiba sa saiyang mga katrabaho. Madali siyang makibagay asin mapagpahunod. Siguradong nagkaigwa si Jesus nin dakul na oportunidad na mahiling an pagigin rasonable kan saiyang Ama. Halimbawa, isinugo siya ni Jehova para tubuson an katawuhan sa sentensiyang kagadanan na maninigo sa mga tawo.—Juan 3:16.

Nagpapahunod si Jesus pag kaipuhan o angay na gibuhon iyan. Girumduma kun paano niya tinabangan an sarong babayi na taga Fenicia, dawa ngani isinugo siya sa nasyon nin Israel sana. (Mat. 15:22-28) Nagin rasonable man siya sa inaasahan niya sa saiyang mga disipulo. Pagkatapos siyang nigaran sa atubangan nin mga tawo kan dayupot niyang amigo na si Pedro, andam si Jesus na patawadon ini. Pag-abot nin panahon, ipinagkatiwala niya ki Pedro an magabat na mga responsabilidad. (Luc. 22:32; Juan 21:17; Gibo 2:14; 8:14-17; 10:44, 45) Malinaw na ipinapahiling sa sato kan halimbawa ni Jesus na dapat na ‘mahayag sa gabos na tawo an satong pagigin rasonable’ paagi sa pagigin mapagpahunod.—Fil. 4:5.

An pagigin rasonable magpapahiro man sa sato tanganing magkaigwa nin matuninong na pakikiiba sa gabos na klase nin tawo. Nagin marahayon an pagtratar ni Jesus sa mga nakakaibanan niya kaya an nauuring mga nagkokontra sa saiya inakusaran siya na “amigo nin mga parasingil nin buhis saka mga parakasala” na mga tawong naghimati sa saiyang mensahe. (Mat. 11:19) Arog ni Jesus, makakaya ta man daw na makatrabaho an ibang mga tawo? An brother na si Louis na dakul na tawo an nakaiba-iba bilang paraataman nin sirkito asin Bethelite, nagsabi: “Ikinumparar ko an kada grupo na nakakaibanan ko sa sarong pader na itinugdok gamit an mga gapo na magkakaiba an pagkadakula. Kaipuhan mong burubaguhon an mga posisyon kan nagkapirang gapo tanganing magin pantay an pader. Hininguwa ko man na gumibo nin mga pagbabago tanganing makakontribwir ako sa pagigin pantay kan pader.” Marahayon na kaisipan iyan!

Anong mga oportunidad an igwa kita para maipahiling an pagigin rasonable sa satong mga kakongregasyon? Maipapahiling ta iyan pag kaibanan ta an satong grupo sa paglilingkod sa langtad. Puwede kitang makiiba sa mga parahayag na an responsabilidad sa pamilya iba man sa sato o na bako tang kaedad. Magigibo ta daw na magin rasonable paagi sa pagbago kan satong pamamaagi para matabangan sinda na magkaigwa nin mas mabungang ministeryo?

An sarong marahay na kapwa trabahador “andam na magtao.” (1 Tim. 6:18) Mantang nagtatrabaho kaiba kan saiyang Ama, siguradong naobserbaran ni Jesus na si Jehova mayong itinatago. “Kan andamon [ni Jehova] an kalangitan,” si Jesus ‘yaon duman’ asin puwede siyang makanuod sa saiya. (Tal. 8:27) Pag-abot nin panahon, si Jesus mismo maugmang ihiniras sa saiyang mga disipulo an mga bagay na “nadangog” niya sa saiyang Ama. (Juan 15:15) Maaarog ta man si Jehova kun andam man kitang ihiras an satong kaaraman asin eksperyensiya sa satong mga kapwa trabahador. An sarong marahay na kapwa trabahador siguradong dai isesekreto sa iba an kapaki-pakinabang na mga impormasyon para sana magin kontrolado niya sinda. Mauugma siyang ihiras sa iba an marahay na mga bagay na nanudan niya.

Puwede man kitang magsabi nin nakakapakusog sa buot na mga tataramon sa satong mga kapwa trabahador. Pag may nakakarisa kan satong mga paghihinguwa asin udok sa puso kitang pinapasalamatan, bako daw na nauugma kita? Nagtao si Jesus nin panahon para sabihon sa saiyang mga kapwa trabahador an marahay na nahiling niya sa sainda. (Ikumparar an Mateo 25:19-23; Lucas 10:17-20.) Sinabi pa ngani niya sa sainda na ‘magibo sinda nin mga bagay na labi pa’ sa mga ginibo niya. (Juan 14:12) Kan banggi bago siya gadanon, kinomendaran niya an saiyang maimbod na mga apostol, na sinasabi: “Kamo an mga nagdanay na kaiba ko sa mga kasakitan na inagihan ko.” (Luc. 22:28) Imahinara na sana kun gurano nakapakusog asin nakapahiro sa sainda an mga tataramon niya! Kun matao man kita nin panahon para komendaran an satong mga kapwa trabahador, siguradong magigin maugma sinda asin posibleng marhay na mas dakul an magigibo ninda.

“An sarong marahay na kapwa trabahador dai man kaipuhan na magin perpekto,” an sabi kan brother na si Kayode, “pero nagtatao siya nin kaugmahan sa iba asin pinapagian an trabaho kan mga kaiba niya.” Arog ka daw kaiyan na kapwa trabahador? Taano ta dai haputon an nagkapira sa mga tugang tanganing maaraman kun ano an masasabi ninda sa saimo manungod sa bagay na iyan? Kun nauugma sindang makaibanan ka bilang kapwa trabahador, kun paanong naugma an mga disipulo ni Jesus na magin mga kapwa trabahador niya, masasabi mo man an sinabi ni apostol Pablo: “Mga kapwa trabahador nindo kami para sa saindong kaugmahan.”—2 Cor. 1:24.