“An Sadit” Nagin “Sangribo”

“An sadit mismo magigin sangribo, asin an sadangoton magigin makosog na nasyon.”—ISAIAS 60:22.

1, 2. (a) Taano ta lakop sa daga an kadikloman ngonyan? (b) Paano an liwanag ni Jehova progresibong suminirang sa saiyang banwaan?

“AN KADIKLOMAN mismo makalalakop sa daga, asin an mahibog na kaduloman sa mga nasyon; alagad sa saimo si Jehova masirang, asin sa saimo an saiyang kamurawayan maheheling.” (Isaias 60:2) An mga tataramon na ini marahay an pagkaladawan sa situwasyon digdi sa daga poon kan 1919. Hinaboan kan Kakristianohan an tanda kan sa hadeng presensia ni Jesu-Cristo, “an ilaw kan kinaban.” (Juan 8:​12; Mateo 24:3) Huli sa “dakulang kaanggotan” ni Satanas, an namomoon sa “mga namamahala sa kinaban sa kadikloman na ini,” an ika-20 siglo iyo an pinakamaringis, pinakamapanlaglag na panahon sa kasaysayan nin tawo. (Kapahayagan 12:​12; Efeso 6:12) An kadaklan na tawo nabubuhay sa espirituwal na kadikloman.

² Pero, may liwanag na nagsisirang ngonyan. Si Jehova ‘nagsisirang’ sa saiyang mga lingkod, an linahidan na natatada, na iyo an mga representante sa daga kan saiyang langitnon na “babae.” (Isaias 60:1) Nangorogna poon kan sinda makaluwas sa pagkabihag sa Babilonya kan 1919, an mga ini nagpabanaag kan kamurawayan nin Dios asin ‘pinasirang an saindang liwanag sa atubangan nin mga tawo.’ (Mateo 5:16) Poon 1919 sagkod 1931, an ilaw kan Kahadean suminirang nin paliwanag nang paliwanag mantang hinahale kan mga ini an natatada pang mga gapos nin Babilonikong kaisipan. Duminakol sinda sagkod na nagin manampulong ribo mantang inootob ni Jehova an saiyang panuga: “Totoong gayong sasarayon ko an mga nawawalat pa sa Israel. Sa pagkasararo ibubugtak ko sinda, siring sa aripompon sa toril, siring sa kahayopan sa tahaw kan sabsaban kaiyan; sinda magigin maribok huli sa mga tawo.” (Miqueas 2:12) Kan 1931, an kamurawayan ni Jehova na yaon sa saiyang banwaan nagin orog pa nganing risang-risa kan akoon ninda an ngaran na Mga Saksi ni Jehova.​—Isaias 43:​10, 12.

 3. Paano nagin risang-risa na an liwanag ni Jehova masirang sa iba apuera sa mga linahidan?

³ Si Jehova daw masirang sana sa mga nawawalat pa sa “sadangoton na aripompon”? (Lucas 12:32) Dai. An luwas na Setyembre 1, 1931 kan The Watch Tower nagtokdo sa saro pang grupo. Sa marahayon na paliwanag kan Ezequiel 9:​1-11, ipinaheling kaiyan na an lalaki na may tintero nin parasurat na nasasambitan sa mga bersikulong iyan nagrerepresentar sa linahidan na natatada. Siisay an binubugtakan kan “lalaking” iyan nin tanda sa angog? An “ibang karnero,” an mga may paglaom na mabuhay nin daing sagkod sa sarong paraisong daga. (Juan 10:​16; Salmo 37:29) Kan 1935 an grupong ini nin “ibang karnero” namansayan na iyo an “dakulang kadaklan, . . . hale sa gabos na nasyon” na naheling sa bisyon ni apostol Juan. (Kapahayagan 7:​9-14) Poon kan 1935 sagkod ngonyan, dakulang atension an isinentro sa pagtipon sa dakulang kadaklan.

 4. Siisay an “mga hade” asin “mga nasyon” na sinasabi sa Isaias 60:3?

⁴ An pagtipon na ini nananabihan sa hula ni Isaias sa pagsabi kaiyan: “An mga nasyon maduruman nanggad sa saimong liwanag, asin an mga hade sa kaliwanagan kan saimong pagsirang.” (Isaias 60:3) Siisay an “mga hade” na sinasabi digdi? An mga nawawalat pa sa 144,000 na, kaiba ni Jesu-Cristo, kaibang mga paramana kan langitnon na Kahadean, asin nangenot sa paghuhulit. (Roma 8:​17; Kapahayagan 12:​17; 14:1) Ngonyan, an pipira sanang ribo kan mga nawawalat pa sa linahidan na natatada daog na marhay sa bilang kan “mga nasyon,” an mga may daganon na paglaom na minadolok ki Jehova tanganing magpatokdo saka nangingimbitar sa iba na gibohon man an siring.​—Isaias 2:3.

An Maigot na mga Lingkod ni Jehova

 5. (a) Anong mga detalye an nagpapaheling na dai nainaan an kaigotan kan banwaan ni Jehova? (b) Arin na mga nasyon an nagkaigwa nin lataw na mga pag-aumento kan 1999? (Helingon an tsart sa pahina 17-20.)

⁵ Abaang kaigotan an ipinaheling kan mga Saksi ni Jehova sa presenteng aldaw sa bilog na ika-20 siglo! Asin sa ibong nin nag-oorog na mga sakit, dai nainaan an saindang kaigotan mantang nagdadangadang an taon 2000. Sineryoso pa man giraray nindang marhay an pagboot ni Jesus: “Gumibo kamo nin mga disipulo sa mga tawo kan gabos na nasyon.” (Mateo 28:​19, 20) An kabilangan nin aktibong mga parahayag kan maogmang bareta sa ultimong taon nin paglilingkod kan ika-20 siglo nakaabot sa bagong pinakahalangkaw na kabilangan na 5,912,492. Ginamit ninda an pambihirang total na 1,144,566,849 oras sa pakikipag-olay sa iba manongod sa Dios asin sa saiyang mga katuyohan. Guminibo sinda nin 420,047,796 na pagdalaw liwat sa mga interesado asin pinamayohan an 4,433,884 daing bayad na pag-adal sa Biblia. Kanigoan kamakangangalas na rekord nin maigot na paglilingkod!

 6. Anong bagong areglo an ginibo para sa mga payunir, asin ano an nagin reaksion?

⁶ Kan Enero, ipinaisi kan Namamahalang Grupo an pagliwat sa kahagadan na oras sa mga payunir. Dakol an nag-aprobetsar kaini tanganing makabilang sa mga regular saka auxiliary payunir. Halimbawa, durante kan enot na apat na bulan nin 1999, an sangang opisina sa Netherlands apat na doble an naresibing aplikasyon sa regular payunir sa naresibi kan iyo man sanang panahon kan nakaaging taon. An Ghana nagreport: “Poon kan magkaigwa nin bagong pasohan sa oras para sa mga payunir, daing ontok an paglangkaw kan kabilangan kan samong mga regular payunir.” Sa 1999 na taon nin paglilingkod, an kabilangan nin mga payunir sa bilog na kinaban nakaabot sa 738,343​—sarong marahayon na patunay sa ‘kaigotan para sa marahay na mga gibo.’​—Tito 2:14.

 7. Paano binendisyonan ni Jehova an maigot na aktibidad kan saiyang mga lingkod?

⁷ Binendisyonan daw ni Jehova an maigot na aktibidad na ini? Iyo. Paagi ki Isaias sia nagsasabi: “Tingkalagan an saimong mga mata sa palibot asin helinga! Sinda gabos tiniripon; sinda nagdorolok sa saimo. Gikan sa harayo an saimong mga aking lalaki nag-aarabot, asin an saimong mga aking babae na aatamanon sa gilid.” (Isaias 60:4) An tiniripon na linahidan na “mga aking lalaki” asin “mga aking babae” sagkod ngonyan maigot na naglilingkod sa Dios. Asin ngonyan, an ibang karnero ni Jesus tinitipon sa kataed kan linahidan na “mga aking lalaki” asin “mga aking babae” ni Jehova sa 234 kadagaan saka isla kan dagat.

“Lambang Marahay na Gibo”

 8. Sa anong ‘marahay na mga gibo’ aktibo an Mga Saksi ni Jehova?

⁸ An mga Kristiano may paninimbagan na ihulit an maogmang bareta kan Kahadean asin tabangan an mga interesado na magin mga disipulo. Alagad sinda “nasangkapan para sa lambang marahay na gibo.” (2 Timoteo 3:17) Sa siring, sinda mamomoton na nag-aataman sa saindang mga pamilya, nagpapaheling nin pagkamapag-istimar, asin nagsosongko sa mga may helang. (1 Timoteo 5:​8; Hebreo 13:16) Asin an mga boluntaryo kalabot sa mga proyekto na arog baga kan pagtogdok nin mga Kingdom Hall​—sarong trabaho na nagtatao man nin patotoo. Sa Togo, pagkatogdok nin sarong tiriponan, gustong maaraman kan mga magabat an paninimbagan sa sarong lokal na iglesiang karismatiko kun taano an Mga Saksi ni Jehova ta nakapagtogdok kan sadiri nindang mga edipisyo mantang an iglesia kaipuhan na magtangdan nin mga tawo para sa katuyohan na ini! Irineport kan Togo na an pagtogdok nin de kalidad na mga Kingdom Hall positibong marhay an epekto sa mga pagtaraed kaya may mga tawo na naghihingoang mag-arkila o magtogdok nin harong sa mga lugar na totogdokan nin mga tiriponan.

 9. Ano an reaksion kan Mga Saksi ni Jehova kun may mga kalamidad?

⁹ Kun beses, ibang klaseng marahay na gibo an kaipuhan. Dakol na nasyon durante kan nakaaging taon nin paglilingkod an tinamaan nin mga kalamidad, asin parate na an naeenot na umayuda iyo an Mga Saksi ni Jehova. Halimbawa, an mahiwas na parte nin Honduras rinadas kan Bagyong si Mitch. Dali-dali, binilog kan sangang opisina an mga komite sa emerhensia tanganing mag-organisar nin mga pag-ayuda. An mga Saksi sa Honduras asin sa dakol pang ibang nasyon nagdonar nin mga gubing, kakanon, bolong, saka iba pang kaipuhan na mga bagay. An mga Rehional na Komite sa Pagtogdok ginamit an saindang mga abilidad tanganing ikatogdok liwat an mga harong. Dai nahaloy, an satong mga tugang na biktima kan kalamidad tinatabangan nang makabalik sa dati nindang mga aktibidad. Sa Ecuador, inayudahan kan Mga Saksi ni Jehova an saindang mga tugang kan an nagkapirang harong raoton nin grabeng pagbaha. Pakamasdi sa episienteng pag-atubang ninda sa situwasyon, an sarong opisyal kan gobyerno nagsabi: “Kun nagtatrabaho sako an grupong ini, makagigibo ako nin mga ngangalasan! An mga tawong arog nindo maninigong mapasa gabos na parte kan kinaban.” An siring na marahay na gibo nagtatao nin kaomawan ki Jehova Dios saka ebidensia kan satong “diosnon na debosyon [na] kapakipakinabang sa gabos na bagay.”​—1 Timoteo 4:8.

Sinda “Nagrurulupad na Garo Panganoron”

10. Sa ibong kan nagdidikit na linahidan, taano an ngaran ni Jehova ta ipinahahayag nin orog kisa kasuarin pa man?

¹⁰ Naghahapot ngonyan si Jehova: “Sairisay ining nagrurulupad na garo panganoron, asin garo mga salampati sa mga gaha kan saindang harong-harong? Huli ta sa sakuya maglalaom an mga isla, siring man an mga barko kan Tarsis arog kan enot, tanganing darahon an saimong mga aking lalaki hale sa harayo . . . An mga taga ibang daga an matogdok kan saimong mga lanob, asin an saindang mga hade maglilingkod sa saimo.” (Isaias 60:​8-10) An enot na huminiro sa ‘pagsirang’ ni Jehova iyo an saiyang “mga aking lalaki,” an linahidan na mga Kristiano. Dangan uminabot an “mga taga ibang daga,” an dakulang kadaklan, na maimbod na naglilingkod sa saindang linahidan na mga tugang, na sinusunod an pangengenot kan mga ini sa paghuhulit kan maogmang bareta. Sa siring, dawa nagdidikit an mga linahidan, an ngaran ni Jehova ipinahahayag sa bilog na daga nin orog kisa kasuarin pa man.

11. (a) Ano an sagkod ngonyan nagpapadagos asin may anong resulta kan 1999? (b) Arin na mga nasyon an nagkaigwa nin lataw na kabilangan nin nabautismohan para sa 1999? (Helingon an tsart sa pahina 17-20.)

¹¹ Bilang resulta, minilyon an nagbuburunyog na “garo mga salampati sa mga gaha kan saindang harong-harong,” na nagpapaili sa laog kan Kristianong kongregasyon. Ginatos na ribo an nakadadagdag taon-taon, asin bukas an dalan para sa mas dakol pa. Sinasabi ni Isaias: “An saimong mga tata papagdadanayon na pirmeng bukas; iyan dai pipintoan dawa sa aldaw o sa banggi, tanganing darahon sa saimo an mga kayamanan kan mga nasyon.” (Isaias 60:11) Kan sarong taon 323,439 an nabautismohan bilang simbolo kan saindang pagdusay ki Jehova, asin dai pa nia pinipintoan an mga tata. “An kawiliwiling mga bagay kan gabos na nasyon,” na mga miembro kan dakulang kadaklan, sagkod ngonyan nagsusurusoan dian. (Haggeo 2:7) Mayo nin gustong bayaan an kadikloman na sinasayumahan na lumaog. (Juan 12:46) Logod na an gabos na iyan nungka na mawaran kan saindang pag-apresyar sa liwanag!

Daing Takot sa Ibong nin Pagkontra

12. Paano hiningoa kan mga namomoot sa kadikloman na padiklomon an liwanag?

¹² An mga namomoot sa kadikloman naoongis sa liwanag ni Jehova. (Juan 3:19) An nagkapira pinoprobaran pa ngani na padiklomon an liwanag na iyan. Ini bakong dai linalaoman. Dawa si Jesus, “an tunay na liwanag na nagtatao nin liwanag sa lambang klase nin tawo,” pinag-olog-olog, kinontra, asin sa katapustapusi ginadan kan saiyang mga kahimanwa. (Juan 1:9) Sa bilog na ika-20 siglo, an Mga Saksi ni Jehova pinagtuyatuya man, ibinilanggo, ipinagprohibir, ginadan pa ngani, mantang fiel na ipinababanaag ninda an liwanag ni Jehova. Sa nakaagi pa sanang mga taon, an mga kalaban guminamit na nin pagpalakop nin mga kaputikan sa media manongod sa mga nagpapabanaag kan liwanag nin Dios. An nagkapira gustong papaniwalaon an mga tawo na an Mga Saksi ni Jehova peligroso asin maninigong bugtakan nin restriksion o iprohibir. Nagin mapanggana daw an siring na mga kontra?

13. Ano an nagin resulta kan marahay an paghusgar na pag-atubang sa media kan mga katotoohan may labot sa satong gibohon?

¹³ Dai. Kun saen angay, an Mga Saksi ni Jehova nagdolok sa media tanganing ipaliwanag an mga katotoohan. Bilang resulta, an ngaran ni Jehova napublikar na marhay sa mga diaryo saka magasin asin sa radyo saka telebisyon. Ini nagkaigwa nin marahay na mga resulta sa paghuhulit. Sa Dinamarca, halimbawa, may sarong programa sa nasyonal na TV mapadapit sa temang “Kun taano ta nagrururo an pagtubod kan mga Danes.” Kabilang nin iba pa, ininterbio an mga Saksi ni Jehova. Pagkatapos, an sarong babae na nakadalan kan programa nagkomento: “Malinawon kun siisay an igwa kan espiritu nin Dios.” Naponan an sarong pag-adal sa saiya.

14. Sa kasusupgan ninda, ano an dai na mahahaloy mapipiritan na rekonoseron nin mga kontra?

¹⁴ Aram kan Mga Saksi ni Jehova na dakol sa kinaban na ini an makontra sa sainda. (Juan 17:14) Pero, napakokosog sinda kan hula ni Isaias: “Madorolok sa saimo an mga aki kan mga nagpapasakit sa saimo, na naghuhuruhod; asin an gabos na dai nagpapaheling nin paggalang sa saimo maluhod sa mismong dapan kan saimong mga bitis, asin aapodon ka nindang an siudad ni Jehova, an Sion kan Banal kan Israel.” (Isaias 60:14) Sa kasusupgan ninda, dai na mahahaloy kaipuhan na rekonoseron nin mga kontra na sinda garo man sana sa Dios mismo nakikilaban. Siisay baga an manggagana sa siring na ralaban?

15. Paano an Mga Saksi ni Jehova ‘nagsususo sa gatas kan mga nasyon,’ asin paano ini nahayag sa saindang gibong pagtotokdo asin pag-ebanghelyo?

¹⁵ Ipinanunuga pa ni Jehova: “Ibubugtak taka pa ngani na bagay na ikakapag-orgolyo sagkod sa daing talaan na panahon . . . Totoong sususuhon mo an gatas kan mga nasyon, asin masuso ka sa daghan nin mga hade; asin sierto na mamimidbid mo na ako, si Jehova, an saimong Paraligtas.” (Isaias 60:​15, 16) Iyo, si Jehova an Paraligtas kan saiyang banwaan. Kun sinda mananarig sa saiya, sinda magdadanay “sagkod sa daing talaan na panahon.” Asin “sususuhon [ninda] an gatas kan mga nasyon,” na ginagamit an kayamanan na yaon para sa pagpaoswag sa tunay na pagsamba. Halimbawa, an madonong na paggamit nin teknolohiya sa komputer saka komunikasyon ginigibong pasil an durungan na pagpublikar kan An Torrengbantayan sa 121 lenguahe asin kan Awake! sa 62. An sarong espesipikong programa sa komputer dinisenyo tanganing makatabang sa pagtradusir kan New World Translation sa bagong mga lenguahe, asin an siring na traduksion nagtatao nin dakulang kagayagayahan. Kan iluwas an bersion na Croata kan Kristianong Griegong Kasuratan kan 1999, rinibo an napaluha huli sa kagayagayahan. An sarong may edad nang tugang na lalaki nagsabi: “Haloyon kong hinalat an Bibliang ini. Ngonyan puede na akong magadan na toninong!” An sirkulasyon kan New World Translation, bilog man o kabtang sana, labi nang 100 milyones sa 34 lenguahe.

Halangkaw na mga Pamantayan sa Moral

16, 17. (a) Minsan ngani depisil, taano ta mahalagang marhay na papagdanayon an halangkaw na mga pamantayan ni Jehova? (b) Anong eksperyensia an nagpapaheling na an mga hoben makalilikay na maramogan kan kinaban?

¹⁶ Sinabi ni Jesus: “An nagsasagibo nin marigsok na mga bagay naoongis sa liwanag.” (Juan 3:20) Sa ibong na lado, an mga nagdadanay sa liwanag namomoot sa halangkaw na mga pamantayan ni Jehova. Si Jehova, paagi ki Isaias, nagsasabi: “Kun manongod sa saimong banwaan, sinda gabos magigin matanos.” (Isaias 60:​21a) Puedeng magin kadepisilan an magpadanay nin matanos na mga pamantayan sa sarong kinaban na lakop na marhay an seksuwal na inmoralidad, pagputik, kahanaban, asin kapalangkawan. Halimbawa, sa nagkapirang nasyon, biglang asenso an mga ekonomiya asin pasil na malingling sa determinadong paghanap nin kayamanan. Minsan siring, nagpatanid si Pablo: “Idtong mga determinadong yumaman nahoholog sa sugot asin sa siod patin sa dakol na rungaw asin nakararaot na mawot, na nagdadara sa mga tawo sa kalaglagan asin kapahamakan.” (1 Timoteo 6:9) Abaa kamakaturotriste kun an saro mapalabot na marhay sa mga negosyo na isinasakripisyo na nia an tunay na mahahalagang bagay, arog baga kan Kristianong pakikiasosyar, sagradong paglilingkod, moral na mga prinsipyo, asin mga paninimbagan sa pamilya!

¹⁷ An pagpapadanay sa matanos na mga pamantayan puedeng magin nangorognang depisil para sa mga hoben, mantang kadakol sa mga kaedad ninda an napapalabot sa pagdodroga asin inmoralidad. Sa Suriname, an sarong 14 anyos na daragita dinolok nin sarong guapong solterito sa eskuelahan asin inagdang makidorog sa saiya. Nagsayuma sia, na ipinaliliwanag na ipinangangalad kan Biblia an siring na mga bagay sa luwas nin pag-agoman. An ibang daragita sa eskuelahan tinuyatuya sia asin hiningoang impluwensiahan sia na liwaton an saiyang isip, na sinasabing gabos gustong makidorog sa solteritong iyan. Pero, nanindogan nin marigon an daragita. Pakalihis nin pirang semana, an solterito nadiskobreng may HIV asin nagkahelang nin grabe. Naogma an daragita na kinuyog nia an pagboot ni Jehova na ‘lumikay sa pakikisaro.’ (Gibo 15:​28, 29) Ipinag-oorgolyong marhay kan Mga Saksi ni Jehova an mga hoben sa tahaw ninda na naninindogan nin marigon para sa tama. An pagtubod ninda, asin kan saindang mga magurang, ‘nakapamumuraway’​—nagtatao nin onra​—sa ngaran ni Jehova Dios.​—Isaias 60:​21b.

Itinao ni Jehova an Pag-aumento

18. (a) Anong dakulang bagay an ginibo ni Jehova para sa saiyang banwaan? (b) Ano an ebidensia na magpapadagos pa an pag-oswag, asin anong mamuraway na mga oportunidad an naghahalat sa mga nagdadanay sa liwanag?

¹⁸ Iyo, tinatawan ni Jehova nin liwanag an saiyang banwaan, na binebendisyonan sinda, ginigiyahan sinda, asin pinakokosog sinda. Durante kan ika-20 siglo, naheling ninda an kaotoban kan mga tataramon ni Isaias: “An sadit mismo magigin sangribo, asin an sadangoton magigin makosog na nasyon. Ako mismo, si Jehova, maparikas kaiyan sa kapanahonan kaiyan.” (Isaias 60:22) Hale sa nagkapira kaidtong 1919, “an sadit” nagin labi sa “sangribo.” Asin dai pa natatapos an pagdakol na iyan! Kan sarong taon 14,088,751 an nag-atender sa selebrasyon kan Memorial kan kagadanan ni Jesus. An dakol sa mga ini bakong aktibong mga Saksi. Naoogma kita na nag-atender sinda sa importanteng selebrasyon na iyan, asin inaagda niato sinda na padagos na rumani sa liwanag. Sagkod ngonyan si Jehova maliwanag an pagsirang sa saiyang banwaan. Bukas pa an pinto palaog sa saiyang organisasyon. Kun siring, logod na an gabos magin determinado na magdanay sa liwanag ni Jehova. Kanigoan na mga bendisyon an ibinubunga kaiyan para sa sato ngonyan! Asin kanigoan na kagayagayahan an itatao kaiyan sa ngapit na an gabos na linalang nag-oomaw ki Jehova asin naggagayagaya sa gayon kan saiyang kamurawayan!​—Kapahayagan 5:​13, 14.

Ikapaliliwanag daw Nindo?

• Sairisay an nagpabanaag kan kamurawayan ni Jehova sa huring mga aldaw na ini?

• Ano an nagpaparisa na dai nainaan an kaigotan kan banwaan ni Jehova?

• Sa anong nagkapirang marahay na gibo sibot an Mga Saksi ni Jehova?

• Sa ibong nin maringis na pagkontra, sa ano kita kompiado?

[Tsart sa pahina 17-20]

REPORT KAN 1999 TAON NIN PAGLILINGKOD KAN MGA SAKSI NI JEHOVA SA BILOG NA KINABAN

(Hilingon an publikasyon)

[Mga ritrato sa pahina 15]

Sagkod ngonyan nagbuburunyog an mga tawo palaog sa organisasyon ni Jehova

[Ritrato sa pahina 16]

Naoogma kita na pinapagdadanay ni Jehova na bukas na bukas an pinto para sa mga namomoot sa liwanag