Pirming Magtiwala ki Jehova!

1-3. Paano napakusog an pagtitiwala ni Pablo ki Jehova? (Hilingon an ritrato sa itaas.)

PELIGROSO an magin Kristiyano kaidto sa Roma. Huling sinahutan an mga parasunod ni Cristo na iyo an dahilan sa nangyaring kasulo sa siyudad kan 64 C.E. asin na nauungis daa sinda sa mga tawo, nagin puntirya sinda nin grabeng pagpersegir. Kun saro kang Kristiyano kan panahon na idto, posibleng arestaron ka ano man na aldaw asin pasakitan nin grabe. An iba sa mga tugang mo sa espirituwal, lalaki asin babayi, puwedeng rinarangót na nin mga hayop o ipinako na sa harigi dangan sinulong buhay tanganing magserbing ilaw sa banggi.

² Posibleng marhay na sa delikadong panahon na iyan an ikaduwang pagkabilanggo ki apostol Pablo sa Roma. Tatabangan daw siya kan mga kapwa niya Kristiyano? Tibaad naisip iyan ni Pablo huling nagsurat siya ki Timoteo: ‘Sa inot kong pagsimbag dai ni saro na suminurog sako, kundi pinabayaan ako kan gabos, dai lugod iyan ipanungod na saindang utang.’ Pero dawa arog kaiyan an nangyari, may ibang nagtabang ki Pablo. Siya nagsurat: ‘Alagad sinurog ako kan Kagurangnan, asin pinakusog ako.’ Iyo, tinawan si Pablo kan Kagurangnan na si Jesus nin kusog na kinakaipuhan niya. Nakatabang daw talaga iyan ki Pablo? Mangnuhon an nagin resulta: ‘Ilinigtas ako sa nguso nin leon.’​—2 Tim. 4:16, 17.a

³ Siyertong nakapakusog ki Pablo an paggirumdom sa eksperyensiyang iyan, asin nakatabang iyan sa saiya na magtiwalang papakusugon siya ni Jehova na matagalan an mga pagbalo na inaatubang na niya asin an mga aatubangon pa niya. Sa katunayan, nasabi niya tulos: ‘An Kagurangnan malikay sako sa gabos na gibong maraot.’ (2 Tim. 4:18) Iyo, nanudan ni Pablo na dawa sa mga sitwasyon na dai siya matatabangan nin mga tawo, makakapagtiwala siyang tatabangan siya ni Jehova asin kan saiyang Aki!

4, 5. (a) Kiisay ka pirming makakaasa nin tabang? (b) Paano mo mapapakusog an saimong relasyon ki Jehova?

⁴ Kun minsan, namamatian mo daw na solo mong inaatubang an masakit na mga sitwasyon? Tibaad mayo ka nin trabaho, ginigipit ka sa eskuwelahan, igwa kang hilang, o nasa iba pang masakit na sitwasyon. Tibaad naghagad ka nin tabang sa iba, pero nadisganar ka huli ta dai ninda naitao an tabang na kaipuhan mo. Iyo, may mga problema talaga na dai masosolusyunan sa tabang sana nin tawo. Sa arog kaiyan na sitwasyon, makakatabang daw talaga an sadol kan Bibliya na “magtiwala ka ki Jehova”? (Tal. 3:5, 6, NW) Talagang iyo! Dakul kitang mababasang istorya sa Bibliya na magpapatunay na totoong nagtatabang si Jehova.

⁵ Kaya, imbes na maghinanakit kun garo baga kulang an tabang na naitatao kan iba, arugon kun paano minansay ni apostol Pablo an siring na mga sitwasyon​—mga oportunidad iyan tanganing ipahiling an lubos na pagtitiwala ki Jehova asin mamatian mismo an saiyang mamumuton na pag-ataman. Mapapakusog kaini an pagtitiwala mo sa saiya asin mas magigin totoo nanggad an relasyon mo sa saiya.

 6. Taano ta tibaad bakong madali na magtiwala ki Jehova kun igwa kita nin nakakapurisaw na problema?

⁶ Pagkatapos mong sabihon ki Jehova sa pamibi an sarong nakakapurisaw na problema, magigin trangkilo ka na daw huling aram mong ginibo mo na an gabos na makakaya mo asin siya na an bahala sa iba pang bagay? Iyo nanggad! (Basahon an Salmo 62:8; 1 Pedro 5:7.) An pakanuod na magtiwala sa saiya mahalaga sa pagkaigwa nin relasyon ki Jehova. Pero, tibaad bakong madali na magtiwala na itatao ni Jehova an saimong kaipuhan. Taano? Tibaad an sarong dahilan iyo na kun minsan dai tulos sinisimbag ni Jehova an saimong mga pamibi.​—Sal. 13:1, 2; 74:10; 89:46; 90:13; Hab. 1:2.

 7. Taano ta kun minsan dai tulos sinisimbag ni Jehova an satong mga pamibi?

⁷ Taano ta bakong gabos na hinahagad niyato itinatao tulos ni Jehova? Girumdumon na iinagid niya an satong relasyon sa saiya sa relasyon nin aki sa saiyang ama. (Sal. 103:13) Bakong tama na asahan nin sarong aki na itatao sa saiya kan saiyang ama an gabos na hinahagad niya o na itatao niya tulos iyan. An iba sa mga hinahagad kan aki tibaad dai man talaga niya kaipuhan. An iba kaiyan tibaad bako pang panahon para itao. An iba tibaad bako man para sa pinakaikakarahay kan aki o kan ibang tawo. Saro pa, kun pirming itatao tulos kan ama an kada hagadon kan aki, an relasyon ninda magigin siring na sa relasyon nin kagurangnan asin uripon, na an nagigin kagurangnan iyo an aki. Kaagid kaiyan, para sa satong ikakarahay, tibaad palipason nguna ni Jehova an panahon bago ta mahiling an simbag niya sa satong mga pamibi. Deretso iyan ni Jehova bilang an satong madunong na Kaglalang, mamumuton na Kagurangnan, asin Ama sa langit. Mababaliktad an satong relasyon sa saiya kun itatao niya tulos an gabos tang hinahagad.​—Ikumparar an Isaias 29:16; 45:9.

 8. Ano an ipinanuga ni Jehova mapadapit sa sato mismong mga limitasyon?

⁸ An saro pang bagay iyo na aram na marhay ni Jehova an satong mga limitasyon. (Sal. 103:14) Dai niya inaasahan na makakatagal kita sa sadiri ta sanang kusog kaya itinatao niya sa sato an saiyang tabang bilang Ama. Siyempre, kun minsan, mamamatian niyato na garo dai ta na kaya. Pero sinisiyerto sa sato ni Jehova na dai niya tutugutan na magsakit an mga lingkod niya nin labi pa sa kaya nindang tagalan. Iyo, ‘matao siya nin luluwasan.’ (Basahon an 1 Corinto 10:13.) Kaya, igwa kita nin makusog na dahilan na magtiwala na aram ni Jehova kun sagkod sain an kaya tang tagalan.

 9. Ano an dapat tang gibuhon kun dai tulos mag-abot an tabang na hinagad ta sa satong pamibi?

⁹ Kun dai tulos mag-abot an tabang na hinagad ta sa satong pamibi, halaton niyato an Saro na nakakaaram kun nuarin an tamang panahon na humiro para sa sato. Tandaan na siya man nagpapasensiya huling gustong-gusto na niyang tabangan kita. ‘Si Jehova mahalat sa pagkahirak sa saindo, asin [siya matindog] tanganing siya magkaigwa sa saindo nin pagkahirak. Huli ta si Jehova, Diyos nin hatol. [Maugma] an gabos na naghahalat sa saiya.’​—Isa. 30:18.

10-12. (a) Ano an puwedeng mas magpadipisil sa sitwasyon nin sarong Kristiyano na nag-aataman nin sarong kapamilya na may malalang hilang? (b) Kun magtitiwala ka ki Jehova dawa sa dipisil na mga sitwasyon, ano an magigin epekto kaini sa relasyon mo sa saiya? Magtao nin halimbawa.

¹⁰ Pag nag-aagi kita nin grabeng kasakitan, tibaad mamatian ta man an arog kan namatian ni Pablo​—na garo baga kita nasa ‘nguso nin leon’ o haranihon na kita diyan. Ini an panahon na dipisilon an magtiwala ki Jehova pero kaipuhan tang marhay na gibuhon iyan. Halimbawa, ipamugtak na inaataman mo an sarong namumutan na kapamilya na may malalang hilang. Tibaad namibi ka ki Jehova na tawan ka nin kadunungan asin kusog.b Pagkatapos mong gibuhon iyan, bako daw na nakakamati ka na nin katrangkiluhan huling aram mong nahihiling ka ni Jehova asin itatao niya an kaipuhan mo para maimbod kang makatagal?​—Sal. 32:8.

¹¹ Pero, tibaad huli sa mga nangyayari, mamatian mong garo baga dai ka tinatabangan ni Jehova. Tibaad nagkokorontrahan an mga opinyon kan mga doktor. O an mga paryente na linalauman mo kutanang maranga sa saimo iyo pa lugod an nakakapagabat sa sitwasyon. Padagos na magtiwala ki Jehova para sa kusog. Padagos na rumani sa saiya. (Basahon an 1 Samuel 30:3, 6.) Pag nahiling mo kun paano ka tinatabangan ni Jehova, mas mákusog an relasyon mo sa saiya.

¹² Naeksperyensiyahan ni Lindac kun gurano ini katotoo pakalihis nin pirang taon na pagtabang sa pag-ataman sa saiyang may hilang na mga magurang sa huring mga taon kan saindang buhay. “Mantang nasa sitwasyon na iyan, sa parati dai mi aram kan agom ko saka kan sakong tugang na lalaki kun ano an gigibuhon mi. Kun minsan pagmati mi dai na kami nin maginibo. Pero, pag ginigirumdom mi su mga nangyari, mas nagigin malinaw sa samo kun paano kami tinabangan ni Jehova. Pinakusog niya kami asin itinao sa samo kun ano an talagang kaipuhan mi, dawa ngani garo baga mayo na kaming mapagpipilian na solusyon.”

13. Paano an pagtitiwala ki Jehova nakatabang sa sarong sister na makayanan an sunod-sunod na mga trahedya?

¹³ An lubos na pagtitiwala ki Jehova makakatabang man kun may mag-abot na mga trahedya. Kan panahon na mag-file nin diborsiyo an bakong Saksing agom ni Rhonda, an tugang niyang lalaki na-diagnose man na may lupus, sarong hilang na puwedeng ikagadan. Pakalihis nin pirang bulan, nagadan an agom kan tugang niyang lalaki. Kan medyo nakakabawi na si Rhonda sa nakakatraumang mga pangyayaring ini, nagregular payunir siya. Dai nahaloy pagkatapos kaiyan, nagadan an saiyang ina. Ano an nakatabang ki Rhonda na makayanan an gabos na ini? Sinabi niya: “Aroaldaw akong nakikipag-ulay ki Jehova, maski sa saradit na desisyon. Pag ginigibo ko iyan, mas nagigin totoo sa sako si Jehova. Tinukduan ako kaiyan na magsarig sa saiya imbes na sa sadiri ko o sa ibang tawo. Talagang tinabangan niya ako asin itinao sako an gabos na kaipuhan ko. Huli kaiyan, namatian kong nagtatabangan kami ni Jehova.”

14. Sa ano makakapagtiwala an sarong maimbod na Kristiyano na igwa nin natiwalag na kapamilya?

¹⁴ Pag-isipan an saro pang sitwasyon. Ipamugtak na natiwalag an sarong namumutan mong kapamilya. Sa napag-adalan mo sa Bibliya, aram mo kun paano dapat trataron an sarong natiwalag. (1 Cor. 5:11; 2 Juan 10) Pero tibaad may mga pagkakataon na garo dipisilon o imposible pa nganing suportaran an desisyon sa pagtitiwalag.d Magtitiwala ka daw na itatao sa saimo kan saimong Ama sa langit an kusog nin buot na kaipuhan mo tanganing magin determinadong magsunod sa pagbuot kan Bibliya dapit sa pagtitiwalag? Ibibilang mo daw na sarong oportunidad ini tanganing mas pakusugon an saimong relasyon ki Jehova paagi sa urog na pagrani sa saiya?

15. Taano ta sinuway ni Adan an pagbuot na itinao ni Jehova sa Eden?

¹⁵ Mapadapit sa bagay na ini, pag-isipan an manungod sa inot na tawong si Adan. Naniwala daw talaga si Adan na dai siya magagadan dawa suwayon niya si Jehova? Dai, huling sinasabi sa sato kan Kasuratan na si Adan ‘dai nadaya.’ (1 Tim. 2:14) Pero, taano ta nagsuway siya? Kinakan ni Adan an bunga na itinao sa saiya ni Eva huli ta mas namutan niya an saiyang agom kisa ki Jehova. Dinangog niya an saiyang agom imbes na an saiyang Diyos na si Jehova.​—Gen. 3:6, 17.

16. Siisay an dapat na pinakanamumutan ta, asin taano?

¹⁶ Ipinapahiling daw kaini na dai ta dapat mamutan na marhay an satong mga kapamilya? Siyempre dai! Pero dapat na si Jehova an pinakanamumutan niyato. (Basahon an Mateo 22:37, 38.) An totoo, para ini sa ikakarahay kan satong mga kapamilya, baga man naglilingkod sinda ngunyan ki Jehova o dai. Kaya padagos na pakusugon an pagkamuot asin pagtitiwala mo ki Jehova. Asin kun nahahadit ka huli sa kapamilya mong natiwalag, sabihon ki Jehova an nasa puso mo paagi sa pamibi.e (Roma 12:12; Fil. 4:6, 7) Ibilang mo an makamumundong marhay na sitwasyon na ini na pagkakataon para mas pakusugon an saimong relasyon ki Jehova. Dangan, makakatabang ini sa saimo na umasa ki Jehova para sa pinakamarahay na resulta.

17. Paano ipinapahiling kan pagdadanay tang sibot sa paghuhulit na nagtitiwala kita ki Jehova?

¹⁷ Taano ta ‘ilinigtas sa nguso nin leon’ si Pablo? Sinabi niya: ‘Tanganing huli sa sako an bareta ikabalangibog nin marahay, asin na an gabos na Hentil makadangog.’ (2 Tim. 4:17) Arog ni Pablo, kun magdadanay kitang sibot sa paghuhulit, ipinapahiling ta na nagtitiwala kita na sisiyertuhon ni Jehova na an gabos na iba pang bagay na kaipuhan ta “idadagdag” sa sato. (Mat. 6:33) Bilang mga parahulit kan Kahadian, ‘ipinagkatiwala sa sato an maugmang bareta,’ asin ibinibilang kita ni Jehova na “mga kapwa trabahador” niya. (1 Tes. 2:4, NW; 1 Cor. 3:9, NW) Paagi sa pagigin aktibo sa gibuhon nin Diyos sagkod sa mapupuwede, mas magigin madali para sa sato na halaton an simbag sa satong mga pamibi.

18. Sa anong mga paagi ta mapapakusog an satong pagtitiwala ki Jehova asin an relasyon ta sa saiya?

¹⁸ Kaya, gamiton ta an panahon ngunyan tanganing pakusugon an satong relasyon sa Diyos. Kun igwa nin sitwasyon na nagigin dahilan kan satong paghadit, ibilang iyan na sarong oportunidad na magin mas harani ki Jehova. Iyo, paagi sa maigot na pag-adal kan Tataramon nin Diyos, padagos na pagpamibi, asin pagigin sibot sa espirituwal na mga aktibidad, mapapakusog ta an satong pagtitiwala na kaya asin tatabangan kita ni Jehova na malampasan an satong mga problema ngunyan asin sa maabot.