Mga Paraataman na Nagpapastor sa Aripumpon

SA PANAHON kan ministeryo ni Jesus digdi sa daga, pinatunayan niya na siya “an marahay na pastor.” (Juan 10:11) Kan mahiling niya an dakul na tawo na sigeng surunod sa saiya, “nahirak siya sa sainda, huli ta sinda naanitan asin napabayaan arog nin mga karnero na daing pastor.” (Mat. 9:36) Nahiling ni Pedro asin kan iba pang mga apostol an saiyang pagkamuot asin pagmakulog. Ibang-iba si Jesus sa bakong tunay na mga pastor kan Israel, na nagpabayang marhay sa aripumpon mala ta an mga karnero nagkawararak asin nagkagurutom sa espirituwal! (Ezeq. 34:7, 8) Dahil sa marahay na halimbawa niya sa pagtutukdo saka pag-ataman sa mga karnero, na suminagkod pa ngani sa pagsakripisyo niya kan saiyang buhay para sa sainda, nakanuod an mga apostol kun paano tatabangan an mga may pagtubod na bumalik ki Jehova, an “pastor asin paraataman kan [saindang] kalag.”—1 Ped. 2:25.

² Sarong beses, kan kinakaulay ni Jesus si Pedro, idinuon niya an kahalagahan kan pagpakakan asin pagpastor sa mga karnero. (Juan 21:15-17) Daing duda na napahiro nanggad kaini si Pedro, kaya pag-abot nin panahon sinadol niya an kamagurangan sa inot na Kristiyanong kongregasyon: “Pasturan nindo an aripumpon nin Diyos na nasa pangangataman nindo, na naglilingkod bilang mga paraataman, bako sa paaging napipiritan, kundi ginigibo iyan nin gikan sa buot sa atubangan nin Diyos; bako dahil sa pagkamuot sa materyal na pakinabang, kundi dahil gusto talaga nindo; asin dai dinodominar an mga sadiri nin Diyos, kundi nagigin mga halimbawa sa aripumpon.” (1 Ped. 5:1-3) An mga tataramon ni Pedro aplikado man sa mga paraataman sa kongregasyon ngunyan. Bilang pag-arog ki Jesus, talagang gusto kan mga elder na maglingkod nin gikan sa buot bilang mga halimbawa sa aripumpon asin nanginginot sinda sa paglilingkod ki Jehova.—Heb. 13:7.

³ Nagpapasalamat kita na may mga paraataman sa kongregasyon na pignombrahan kan banal na espiritu. Dakul na pakinabang an naitatao sato kan pangangataman ninda. Halimbawa, nagtatao sinda nin pampakusog asin nagmamalasakit sa gabos na nasa kongregasyon. Kada semana, naghihinguwa sindang marhay para manginot sa mga pagtiripon kan kongregasyon, na diyan napapakusog an gabos na may pagtubod. (Roma 12:8) Tiwasay kita huli ta hinihinguwa nindang protektaran an aripumpon sa nakakadanyar na mga elemento, arog baga kan maraot na mga tawo. (Isa. 32:2; Tito 1:9-11) An panginginot ninda sa ministeryo sa langtad nakakadagka sa sato na padagos na magin aktibo asin regular sa paghuhulit kan maugmang bareta kada bulan. (Heb. 13:15-17) Itinao ni Jehova an “mga balaog na tawo” na ini para pakusugon an kongregasyon.—Efe. 4:8, 11, 12.

⁴ Para masiyerto na napapangatamanan nin tama an kongregasyon, an mga lalaki na pignonombrahan bilang paraataman dapat na nakakaabot sa mga kahagadan na nasa Tataramon nin Diyos. Kun kuwalipikado na sinda, saka sana masasabi na pignombrahan sinda kan banal na espiritu. (Gibo 20:28) Totoo, halangkaw an mga pamantayan kan Kasuratan para sa Kristiyanong mga paraataman, ta seryosong paninimbagan an pagigin paraataman. Pero bako man halangkawon iyan na dai na kayang abuton kan Kristiyanong mga lalaki na may tunay na pagkamuot ki Jehova asin andam na magpagamit sa saiya. Dapat na hiling-hiling kan gabos na an mga paraataman nag-aaplikar kan konseho kan Bibliya sa saindang pang-aroaldaw na buhay.

⁵ Isinurat ni apostol Pablo an pundamental na mga kahagadan kan Kasuratan para sa mga paraataman sa inot niyang surat ki Timoteo asin sa surat niya ki Tito. Sa 1 Timoteo 3:1-7, mababasa ta: “Kun an siisay man naghihinguwang maabot an katungdan nin pagigin sarong paraataman, marahay na bagay an saiyang minamawot. Kun siring, an paraataman dapat na daing katuyawan, agom nin sarong babayi, balanse sa paggawi asin pag-uugali, tultol an isip, disente, mapag-istimar, kuwalipikadong magtukdo, bakong buratsero, bakong bayolente, kundi rasonable, bakong parapakiiwal, bakong mamumuton sa kuwarta, saro na nanginginot sa saiyang pamilya sa mahusay na paagi, na igwa nin mga aking masinunod asin disiplinado (huling kun dai aram nin saro kun paano panginginutan an sadiri niyang pamilya, paano niya papangatamanan an kongregasyon nin Diyos?), bakong bago pa sanang makumbertir, ta tibaad makamati siya nin sobrang pag-orgulyo asin akuon niya an paghukom na kapareho kan inako kan Diyablo. Dugang pa, dapat man na igwa siya nin marahay na reputasyon sa mga taga luwas tanganing dai siya matuyaw nin mga tawo asin mahulog sa silo kan Diyablo.”

⁶ Nagsurat si Pablo ki Tito: “Iwinalat taka sa Creta tanganing maasikaso mo an mga bagay na kaipuhan itanos asin makapagnombra nin mga magurang sa kongregasyon sa kada siyudad, siring kan instruksiyon ko sa saimo: kun igwa nin siisay man na lalaki na laban sa saiya mayo nin mairereklamo, agom nin sarong babayi, igwa nin mga aking nagtutubod na dai mairereklamo nin pagigin delingkuwente asin rebelyoso. Huli ta bilang katiwala nin Diyos, an sarong paraataman dapat na mayo nin mairereklamo laban sa saiya, bakong arogante, bakong arangguton, bakong buratsero, bakong bayolente, bakong mahanab sa materyal na pakinabang, kundi mapag-istimar, may pagkamuot sa karahayan, tultol an isip, matanos, maimbod, may pagpupugol sa sadiri, na nangangapot nin higot sa mapagkakatiwalaan na tataramon kun manungod sa saiyang paagi nin pagtutukdo, tanganing sa siring makapagpakusog siya paagi sa pagtukdo kan marahay na mensahe asin magibo niyang magsaway sa mga nagkokontra.”—Tito 1:5-9.

⁷ Minsan ngani sa primero tibaad garo baga dipisilon maabot an mga kahagadan kan Kasuratan para sa mga paraataman, dai dapat mag-alangan an Kristiyanong mga lalaki na maghinguwang abuton iyan. Kun ipinapahiling ninda an marahay na Kristiyanong mga kuwalidad na kahagadan sa mga paraataman, nadadagka ninda an iba pa sa kongregasyon na arugon sinda. Isinurat ni Pablo na an siring na “mga balaog na tawo” itinao “para tabangan an mga banal na maglakaw sa tamang dalan, para magsagibo nin paglilingkod, para pakusugon an hawak kan Cristo, sagkod na maabot niyato gabos an pagkasararo sa pagtubod asin sa tamang kaaraman mapadapit sa Aki nin Diyos, sagkod na kita magin siring sa adulto, na naaabot an pagigin lubos kan mga kuwalidad kapareho kan sa Cristo.”—Efe. 4:8, 12, 13.

⁸ An mga paraataman bakong mga hoben o bagong makumbertir na mga lalaki. Imbes, sinda mga indibidwal na eksperyensiyado na sa Kristiyanong pamumuhay, mahiwas an kaaraman sa Bibliya, hararom an pakasabot sa Kasuratan, asin may tunay na pagkamuot sa kongregasyon. Makusog an buot ninda na magtaram asin itanos an mga nagkasala para maprotektaran an mga karnero sa siisay man na maaprobetsar sa sainda huli sa makasadiring intensiyon. (Isa. 32:2) An mga paraataman midbid na marhay kan gabos sa kongregasyon bilang mga tawong maygurang sa espirituwal, na may tunay na malasakit sa aripumpon nin Diyos.

⁹ An mga kuwalipikadong nombrahan bilang mga paraataman nagpapahiling nin praktikal na kadunungan sa buhay ninda. Kun may agom, sinusunod niya an Kristiyanong pamantayan sa pag-agom, an buot sabihon, siya agom nin sarong babayi asin nanginginot sa saiyang pamilya sa mahusay na paagi. Kun an paraataman igwa nin mga aking nagtutubod na masinunod asin disiplinado saka dai mairereklamo nin pagigin delingkuwente o rebelyoso, an kongregasyon may kumpiyansang makakadulok sa saiya para maghagad nin konseho asin sadol manungod sa buhay pampamilya saka Kristiyanong pamumuhay. Siring man, an paraataman daing katuyawan asin mayo nin mairereklamo laban sa saiya saka may marahay na reputasyon dawa sa mga taga luwas. Dai nin balidong dahilan para maakusaran siya nin salang paggawi na makakaraot sa reputasyon kan kongregasyon. Bako siyang bago pa sanang masagwi huli sa magabat na pagkakasala. An iba sa kongregasyon napapahirong arugon an marahayon na halimbawa niya asin nauugmang ipagkatiwala sa pangangataman niya an espirituwal na kapakanan ninda.—1 Cor. 11:1; 16:15, 16.

¹⁰ An siring na kuwalipikadong mga lalaki nakakapaglingkod sa Kristiyanong kongregasyon sa katungdan na kapareho kan sa kamagurangan sa Israel na ilinadawan bilang “madunong, mapagmansay, saka eksperyensiyado.” (Deut. 1:13) Bakong perpekto an Kristiyanong mga elder, pero midbid sinda sa kongregasyon asin komunidad bilang matanos saka may takot sa Diyos. Naipahiling na ninda sa pag-agi nin panahon na sinda namumuhay kauyon kan diyosnon na mga prinsipyo. Huling mayo nin maitutuyaw sainda, dai sinda nag-aalangan na magtaram sa atubangan kan kongregasyon.—Roma 3:23.

¹¹ An mga lalaki na kuwalipikadong nombrahan bilang mga paraataman balanse sa paggawi asin pag-uugali saka sa pagtratar sa iba. Bako sindang panatiko. Imbes, mahihiling sa saindang pamumuhay na sinda balanse asin may pagpupugol sa sadiri. Ipinapahiling ninda an pagigin balanse sa mga bagay na arog kan pagkakan, pag-inom, pag-aling-aling, mga kinahihiligan, asin paglilibang. Tama sana an pag-inom ninda nin mga inumon na de-alkohol tangani na dai sinda masahutan nin pagburat (o, pagbuyong) o nin pagigin buratsero. Pag an saro impluwensiyado nin nakakaburat na inumon, madali siyang mawaran nin pagpupugol sa sadiri asin dai niya mababantayan an espirituwal na kapakanan kan kongregasyon.

¹² Para mapangatamanan an kongregasyon, an sarong lalaki kaipuhan na disente. An marahay na ugali niya nahihiling sa saiyang itsura, sa saiyang harong, asin sa saiyang mga aktibidad aroaldaw. Dai siya nagpapaliman-liman; nahihiling niya kun ano an kaipuhan asin nagpaplano para diyan. Nagsusunod siya sa mga prinsipyo sa Bibliya.

¹³ An paraataman dapat na rasonable. Dapat na tatao siyang makipagtabangan sa grupo nin kamagurangan asin makikooperar sa sainda. Dapat na balanse an paghiling niya sa sadiri asin bakong mapaghanap sa iba. Bilang rasonableng tawo, dai niya ipinipirit an sadiri niyang opinyon, na ibinibilang iyan na nakakalabi kisa sa mga kapwa niya elder. Posibleng may mga kuwalidad o abilidad an iba na mas nakakalabi sa saiya. Rasonable an sarong elder kun ibinabasar nanggad niya sa Kasuratan an mga desisyon niya asin nagmamaigot na arugon an halimbawa ni Jesu-Cristo. (Fil. 2:2-8) Siya bakong parapakiiwal o bayolente kundi nagpapahiling nin maninigong respeto sa iba, na ibinibilang sinda na mas halangkaw kisa sa saiya. Siya bakong arogante, na pirming ipinipirit sa iba an saiyang mga paagi o an saiyang punto de vista. Siya bakong arangguton, kundi mapagpatuninong sa saiyang pagtratar.

¹⁴ Siring man, an saro na kuwalipikadong maglingkod bilang paraataman sa kongregasyon tultol an isip. Nangangahulugan ini na siya kalmado, bakong pabigla-bigla sa paghusgar. Malinaw an pakasabot niya sa mga prinsipyo ni Jehova asin sa pag-aplikar kaiyan. An saro na tultol an isip naghihimati sa konseho asin paggiya. Bako siyang mapagsagin-sagin.

¹⁵ Ipinagirumdom ni Pablo ki Tito na an paraataman may pagkamuot sa karahayan. Dapat na siya matanos asin maimbod. Mahihiling an mga kuwalidad na ini sa saiyang pagtratar sa iba saka sa makusog na paninindugan niya sa kun ano an tama asin marahay. Makusog an debosyon niya ki Jehova asin pirming sinusuportaran an matanos na mga prinsipyo. Mapagkakatiwalaan siya sa kumpidensiyal na bagay. Talagang mapag-istimar man siya, na bukas-palad na ginagamit an saiyang panahon, kusog, asin mga pagsadiri para sa kapakinabangan nin iba.—Gibo 20:33-35.

¹⁶ Tanganing makapaglingkod nin epektibo, an paraataman kaipuhan na kuwalipikadong magtukdo. Sigun sa mga tataramon ni Pablo ki Tito, an paraataman “nangangapot nin higot sa mapagkakatiwalaan na tataramon kun manungod sa saiyang paagi nin pagtutukdo, tanganing sa siring makapagpakusog siya paagi sa pagtutukdo kan marahay na mensahe asin magibo niyang magsaway sa mga nagkokontra.” (Tito 1:9) Kaya niyang mangatanusan, magpresentar nin ebidensiya, masimbag an mga pagkontra, asin iaplikar an Kasuratan sa paaging makukumbinsir an iba saka mapapakusog an pagtubod ninda. Ipinapahiling kan paraataman an siring na abilidad sa pagtutukdo trangkilo man o masakit an panahon. (2 Tim. 4:2) Igwa siya kan pasensiyang kaipuhan para sagwion sa mabuot na paagi an sarong nasala o kumbinsiron an nagdududa asin motibaron siyang gumibo nin marahay basado sa pagtubod. An pagigin kuwalipikadong magtukdo sa atubangan man nin dakul na nagdadangog o sa sarong indibidwal nagpapatunay na naaabot niya an importanteng kahagadan na ini.

¹⁷ Mahalaga na an mga elder maigot sa ministeryo. Sa gibuhon na ini, dapat mahiling man na nagmamaigot sindang arugon si Jesus, na ginibong priyoridad an paghuhulit kan maugmang bareta. Interesado si Jesus sa saiyang mga disipulo, asin tinabangan sindang magin epektibong mga ebanghelisador. (Mar. 1:38; Luc. 8:1) Huli sa kaigutan kan mga elder na makikabtang sa ministeryo dawa sibot sinda, napapahiro an bilog na kongregasyon na magin maigot man. Asin pag naghuhulit an mga elder kaiba an pamilya ninda saka mga kakongregasyon ninda, napapakusog ninda an buot kan iba asin sinda napapakusog man kan iba.—Roma 1:11, 12.

¹⁸ Dahil sa mga kahagadan na ini, tibaad maisip ta na garo grabe an inaasahan sa sarong paraataman. Siyerto na daing paraataman na perpektong makakaabot sa halangkaw na pamantayan sa Bibliya, pero dapat na daing elder na mahihilingan nin sobrang kakulangan kan arin man sa mga kuwalidad na iyan, na maibibilang nang grabeng katuyawan sa saiya. An ibang elder tibaad may pambihirang mga kuwalidad, mantang an iba man tibaad mas mahusay sa ibang bagay. An resulta iyo na an grupo nin kamagurangan sa kabilugan magkakaigwa kan gabos na marahay na kuwalidad na kaipuhan sa tamang pangangataman sa kongregasyon nin Diyos.

¹⁹ Kun an grupo nin kamagurangan marekomendar nin mga lalaki na nonombrahan bilang mga paraataman, dapat nindang isaisip an sinabi ni apostol Pablo: “Sinasabihan ko an lambang saro diyan sa saindo na dai magin sobra an hiling sa sadiri, kundi ipahiling nindo na igwa kamo nin tultol na isip, uyon sa pagtubod na itinao nin Diyos sa kada saro sa saindo.” (Roma 12:3) Dapat na ibilang nin lambang elder an saiyang sadiri na mas hababa sa iba. Dai dapat magin “sobra kamatanos” pag sinisiyasat an mga kuwalipikasyon nin iba. (Ecl. 7:16) Mantang malinaw na isinasaisip an mga kahagadan sa Kasuratan para sa mga paraataman, dedeterminaran kan grupo nin kamagurangan kun baga an brother na irerekomendar nakakaabot, sa rasonableng lebel, sa mga pamantayan na iyan. Pag iniisip kan mga elder na mayo nin perpektong tawo asin mayo sindang pagpaurog saka pagsagin-sagin, makakapagrekomendar sinda sa paagi na nagpapahiling nin maninigong paggalang sa matanos na mga pamantayan ni Jehova asin para sa ikakarahay kan kongregasyon. Pag-uulayan ninda na may kaibang pamibi an kada rekomendasyon asin susunudon ninda an paggiya kan banal na espiritu nin Diyos. Saro ini sa seryosong mga paninimbagan ninda, asin dapat na gibuhon ninda iyan kauyon kan sadol ni Pablo: “Dai ka nanggad maghidali sa pagpatong kan saimong mga kamot sa sarong lalaki.”—1 Tim. 5:21, 22.

²⁰ Dapat mahiling sa mga lalaking may espirituwal na kuwalipikasyon na ginigiyahan sinda kan banal na espiritu, asin ipinapahiling ninda sa saindang buhay an bunga kaiyan. Ilinista ni Pablo an siyam na aspekto kan bunga kan espiritu na iyo an “pagkamuot, kagaya-gayahan, katuninungan, pakatios, kabuutan, karahayan, pagtubod, kahuyuan, pagpupugol sa sadiri.” (Gal. 5:22, 23) An siring na mga paraataman nakakapaginhawa sa mga tugang asin nakakatabang na magkasararo an kongregasyon sa sagradong paglilingkod. An paggawi ninda asin an mga bunga kan saindang pagpapagal nagpapahiling na sinda nombrado kan banal na espiritu.—Gibo 20:28.

²¹ Mahalagang marhay na an mga elder magtarabangan para sa pagkasararo sa kongregasyon. Tibaad magkakalain na marhay an personalidad ninda, pero pinapagdanay ninda an pagkasararo kan grupo nin kamagurangan paagi sa magalang na paghinanyog sa lambang saro, dawa tibaad dai sinda nagkakauruyon sa nagkapirang bagay na pinag-uulayan ninda. Sagkod na dai nin nababalgang prinsipyo sa Bibliya, an lambang saro dapat andam na magpahunod asin suportaran an pinal na desisyon kan grupo nin kamagurangan. An pagigin mapagpahunod nagpapahiling na an saro ginigiyahan kan “kadunungan na gikan sa itaas,” na “mapagpatuninong, rasonable.” (Sant. 3:17, 18) Dai dapat mag-isip an siisay man na elder na siya nakakalabi sa iba, asin dai siya dapat magin dominante. An totoo, an mga elder nakikikooperar ki Jehova pag sinda nagkokooperar bilang sarong grupo para sa ikakarahay kan kongregasyon.—1 Cor., kap. 12; Col. 2:19.

²² An maygurang na Kristiyanong mga lalaki dapat magmawot na magin mga paraataman. (1 Tim. 3:1) Pero an paglilingkod bilang elder nangangaipo nin pagpapagal asin pagsasakripisyo. Nangangahulugan iyan na andam siyang maglingkod para sa mga pangangaipo kan mga tugang asin asikasuhon an espirituwal na kapakanan ninda. An paghihinguwang maabot an pagigin paraataman nangangahulugan nin pagmamaigot na maabot an mga kuwalipikasyon na nasa Kasuratan.

²³ An sarong brother na haloy nang maimbod na naglilingkod tibaad magkahilang o limitado na an magigibo huli sa kondisyon kan hawak. Tibaad huli sa edad, dai na niya kayang asikasuhon an mga paninimbagan bilang paraataman. Dawa siring, dapat pa man giraray siyang igalang asin mansayon bilang elder sagkod na siya nombrado. Dai niya kaipuhan na butasan an pagigin elder dahil sa saiyang mga limitasyon. Angay pa man giraray siya sa dobleng onra na itinatao sa gabos na mahigos na elder na nagpapastor sa aripumpon sagkod sa pinakamakakaya ninda.

²⁴ Pero kun sa pagmati nin sarong brother pinakamarahay na butasan na niya an pribilehiyo dahil sa nagbagong personal na mga kamugtakan na nakakalimitar sa kakayahan niyang maglingkod, puwede man niyang gibuhon iyan. (1 Ped. 5:2) Dapat na igalang pa man giraray siya. Dakula an maitatabang niya sa kongregasyon, dawa ngani mayo na siya nin mga asignasyon asin paninimbagan na pang-elder.

²⁵ Iba-iba an paninimbagan nin mga elder sa kongregasyon. Igwa nin koordineytor kan grupo nin kamagurangan, sekretaryo, paraataman sa paglilingkod, nagkokondukta nin Pag-adal sa Torrengbantayan, asin paraataman sa Pagtiripon na Pamumuhay Asin Ministeryo. Dakul na elder an naglilingkod bilang paraataman nin grupo. Daing espesipikong lawig nin panahon kun sagkod nuarin sinda maglilingkod sa mga katungdan na ini. Siyempre, kun an sarong elder maglipat nin kongregasyon, o dai na kayang asikasuhon an saiyang mga paninimbagan huli sa salud, o madiskuwalipikar huling dai na niya naaabot an mga kahagadan na nasa Kasuratan, mapili nin ibang elder na maasikaso kan katungdan niya. Sa mga kongregasyon na kulang an mga paraataman, tibaad kaipuhan na an sarong elder magkapot nin labi sa sarong katungdan sagkod na makuwalipikar an ibang brother na magin elder.

²⁶ An koordineytor kan grupo nin kamagurangan an naglilingkod bilang tsirman sa mga miting kan grupo nin kamagurangan. Bilang tsirman, mapakumbaba siyang nakikipagtabangan sa iba pang elder sa pangangataman sa aripumpon nin Diyos. (Roma 12:10; 1 Ped. 5:2, 3) Dapat na mahusay siyang mag-organisar asin mahigos na nanginginot.—Roma 12:8.

²⁷ An sekretaryo an nag-aasikaso kan mga rekord kan kongregasyon asin iniimpormaran niya an mga elder manungod sa importanteng mga surat o mensahe. Kun kaipuhan, puwedeng asignaran an saro pang elder o may kakayahan na ministeryal na lingkod na tumabang saiya.

²⁸ An mga areglo para sa paglilingkod sa langtad asin iba pang bagay may koneksiyon sa paghuhulit nasa superbisyon kan paraataman sa paglilingkod. Nag-iiskedyul siya nin regular na pagdalaw sa gabos na grupo sa paglilingkod sa langtad. Kada bulan, nagdadalaw siya sa sarong grupo sa sarong puro kan semana (weekend). Sa mas saradit na kongregasyon na pira sana an grupo sa paglilingkod, puwede niyang dalawon an kada grupo nin duwang beses kada taon. Sa saiyang pagdalaw, siya an mamamayo sa mga pagtiripon bago maglingkod sa langtad, maiba siya sa grupo sa pagmiministeryo, asin tatabangan niya an mga parahayag sa saindang mga pagdalaw liwat saka pagkondukta nin mga pag-adal sa Bibliya.

²⁹ An saro sa marahayon na mga pribilehiyo sa kongregasyon iyo an paglilingkod bilang paraataman nin grupo. Kaiba sa mga paninimbagan niya an (1) pagigin interesadong marhay sa espirituwalidad kan kada saro sa grupo sa paglilingkod sa langtad; (2) pagtabang sa kada saro sa grupo na magin regular, maigot, asin maugma sa ministeryo; saka (3) pagtabang asin pagsasanay sa ministeryal na mga lingkod sa grupo na maghinguwang umabot nin pribilehiyo asin makuwalipikar para sa mga paninimbagan sa kongregasyon. An grupo nin kamagurangan an madesisyon kun sairisay na mga brother an pinakakuwalipikadong makakagibo kan gabos na responsabilidad na iyan.

³⁰ Huli sa mga responsabilidad na kalabot, an mga paraataman nin grupo dapat na mga elder, sagkod na posible. Puwede man gamiton an may kakayahan na ministeryal na lingkod sagkod na may puwede nang sumalidang elder. An ministeryal na lingkod na ginagamit sa katungdan na ini inaapod na lingkod sa grupo (group servant), ta bako man siyang paraataman sa kongregasyon. Imbes, nasa superbisyon siya kan mga elder sa pag-asikaso sa paninimbagan niya.

³¹ An sarong importanteng gibuhon kan paraataman nin grupo iyo an panginginot sa ministeryo sa langtad. Mapapakusog an mga kagrupo niya kun siya regular, maigot, asin entusiyastiko sa ministeryo. Napapahalagahan kan mga parahayag an pagpakusog asin tabang na nakukua pag nag-iiriba-iba, kaya marahay na magkaigwa nin iskedyul nin pagpapatotoo bilang grupo na kumbenyente sa kadaklan. (Luc. 10:1-16) Kaipuhan na siguraduhon kan paraataman na pirming may bastanteng teritoryo. Sa parati, siya an mamamayo sa pagtiripon bago maglingkod sa langtad asin maorganisar sa mga parahayag para sa paglilingkod sa aldaw na iyan. Kun dai siya puwede, dapat na mag-asignar siya nin ibang elder, o nin ministeryal na lingkod o, kun parehong mayo, nin sarong kuwalipikadong parahayag para may maggiya sa grupo.

³² An paraataman nin grupo dapat na magplano para sa maabot na dalaw kan paraataman sa paglilingkod. Dapat niyang ipaisi iyan sa grupo niya asin pakusugon an saindang pag-antisipar sa mga pakinabang kaiyan. Pag aram kan gabos sa grupo an areglo sa dalaw, maugma nindang masusuportaran iyan.

³³ An kada grupo sa paglilingkod talagang pinagdadanay na sadit. Nakakatabang ini sa paraataman nin grupo na mamidbid na marhay an gabos na kagrupo niya. Bilang mamumuton na pastor, interesado siyang marhay sa lambang saro. Hinihinguwa niyang personal sindang tabangan asin dagkahon na makikabtang sa ministeryo sa langtad saka sumuportar sa mga pagtiripon kan kongregasyon. Hinihinguwa man niyang gibuhon an ano man na angay na gibuhon para matabangan an lambang saro na magdanay na makusog sa espirituwal. An mga may hilang o nade-depress makikinabang sa pagdalaw niya. An nakakapakusog sa buot na suhestiyon o konseho tibaad makamotibar sa nagkapira na maghinguwang umabot nin dagdag na mga pribilehiyo sa kongregasyon asin sa siring urog pang makatabang sa mga tugang ninda. Sa panginot, an paraataman nin grupo nakapokus sa pagtabang sa mga kagrupo niya. Minsan siring, bilang elder asin pastor, mamumuton siyang nagmamalasakit sa gabos na nasa kongregasyon saka andam na tumabang sa siisay man na nangangaipo.—Gibo 20:17, 28.

³⁴ Paninimbagan man kan paraataman nin grupo na tumabang sa pagkolekta kan mga report nin paglilingkod sa langtad kan mga kagrupo niya. Itinatao ini sa sekretaryo. Matatabangan kan lambang parahayag an paraataman kan grupo paagi sa pagtao tulos kan report ninda. Puwede nindang direktang itao iyan sa paraataman kan grupo sa katapusan kan kada bulan o ihulog sa kahon sa Kingdom Hall na para sa mga report nin paglilingkod sa langtad.

³⁵ May partikular na mga paninimbagan an Komite sa Paglilingkod kan Kongregasyon, na kompuwesto kan koordineytor kan grupo nin kamagurangan, sekretaryo, asin paraataman sa paglilingkod. Halimbawa, an komite sa paglilingkod an nag-aaprubar kan paggamit kan Kingdom Hall para sa mga diskurso sa kasal asin diskurso sa gadan, saka sinda an may paninimbagan sa pag-asignar nin mga parahayag sa mga grupo nin paglilingkod sa langtad. An komite man na ini an nag-aaprubar kan mga aplikasyon para sa pagregular asin pag-auxiliary payunir saka kan iba pang mga klase nin paglilingkod. An komite sa paglilingkod nasa superbisyon kan grupo nin kamagurangan.

³⁶ An espesipikong mga paninimbagan kan mga brother na ini—kaiba na an para sa nagkokondukta nin Pag-adal sa Torrengbantayan, paraataman sa Pagtiripon na Pamumuhay Asin Ministeryo, asin iba pa na kabilang sa grupo nin kamagurangan—itinatao kan sangang opisina.

³⁷ Sa pana-panahon, nagmimiting an grupo nin kamagurangan sa kada kongregasyon para pag-ulayan an mga bagay may koneksiyon sa espirituwal na pag-uswag kan kongregasyon. Apuwera sa miting kan mga elder pag dalaw kan paraataman nin sirkito, nagmimiting man an mga elder mga tulong bulan pagkatapos kan kada dalaw. Siyempre, puwedeng magmiting an mga elder sa ibang pagkakataon kun kaipuhan.

³⁸ Bakong perpekto an mga paraataman; pero sinasadol an gabos sa kongregasyon na magin mapagpasakop sa sainda huli ta areglo iyan ni Jehova. Maninimbag sa saiya an mga paraataman sa mga ginigibo ninda. Sinda an mga representante niya asin kan saiyang teokratikong pamamahala. An Hebreo 13:17 nagsasabi: “Magin masinunod sa mga nanginginot sa saindo asin magin mapagpasakop, huli ta binabantayan ninda kamo asin ibinibilang nindang kargo ninda kamo, na sa siring magibo ninda ini na may kaugmahan asin dai nagagabatan, huli ta makakadanyar ini sa saindo.” Kun paanong ginagamit ni Jehova an banal na espiritu para nombrahan an sarong lalaki, gagamiton man Niya an iyo man sanang banal na espiritu para halion an sarong lalaki sa paglilingkod bilang paraataman kun dai na ini nagpapahiling kan bunga kan espiritu asin an pamumuhay kaini dai na nakakaabot sa mga kahagadan na nasa Kasuratan.

³⁹ Pinapahalagahan nanggad niyato an pagpapagal asin marahay na halimbawa kan mga paraataman sa kongregasyon. Sinadol ni Pablo an mga tugang kan magsurat siya sa kongregasyon sa Tesalonica: “Mga tugang, nakikiulay kami sa saindo na magpahiling kamo nin paggalang sa mga nagpapagal diyan sa saindo asin nanginginot sa saindo sa paglilingkod sa Kagurangnan saka nagsasadol sa saindo; asin na tawan sinda nin mas urog na pagpapahalaga na may pagkamuot huli kan saindang trabaho.” (1 Tes. 5:12, 13) Huli sa pagpapagal kan mga paraataman sa kongregasyon, nagigin mas pasil asin mas nakakaugma an satong paglilingkod sa Diyos. Siring man, sa inot na surat ni Pablo ki Timoteo, sinambit niya an dapat na magin kaisipan kan mga nasa kongregasyon dapit sa mga paraataman: “An mga magurang sa kongregasyon na mahusay an panginginot dapat na ibilang na maninigo sa dobleng onra, urog na idtong mga nagpapahiling nin kaigutan sa saindang pagpahayag asin pagtutukdo.”—1 Tim. 5:17.

⁴⁰ Kun beses, may piniling mga elder na pignombrahan na maglingkod bilang mga miyembro kan mga Patient Visitation Group. An iba naglilingkod bilang miyembro kan mga Hospital Liaison Committee asin nagdadalaw sa mga ospital saka mga doktor para enkaminaron sinda na ipadagos an pagbulong sa mga Saksi ni Jehova na dai naggagamit nin dugo asin purbaran man an iba pang mga paagi nin pagbulong na dai naggagamit nin dugo. Nasusuportaran man kan iba pang paraataman an intereses kan Kahadian paagi sa pagtabang sa pagtugdok nin mga Kingdom Hall asin Assembly Hall o paagi sa paglilingkod bilang miyembro nin Convention Committee. An kahigusan asin sakripisyo kan mga brother na ini pinapahalagahan na marhay kan gabos na nasa organisasyon. Iyo, ‘padagos niyatong pinapahalagahan an mga tugang na arog ninda.’—Fil. 2:29.

⁴¹ An Namamahalang Grupo an nagnonombra nin kuwalipikadong mga elder na maglilingkod bilang mga paraataman nin sirkito. Inaasignaran sinda kan sangang opisina na magdalaw sa mga kongregasyon na kaiba sa saindang sirkito, na sa parati duwang beses kada taon. Dinadalaw man ninda sa pana-panahon an mga payunir sa harayong mga teritoryo. Pinaplano ninda an saindang iskedyul nin pagdalaw asin haloy pa pinapaisi na ninda iyan sa kada kongregasyon tanganing makinabang na marhay an mga tugang.

⁴² An koordineytor kan grupo nin kamagurangan an nanginginot sa pag-organisar kan mga bagay-bagay tanganing an dalaw magin nakakaginhawa sa espirituwal para sa gabos. (Roma 1:11, 12) Pag maresibi na an notisya kan dalaw saka an impormasyon dapit sa personal na pangangaipo kan paraataman nin sirkito asin kan saiyang agom (kun igwa), an koordineytor magibo nin mga areglo, sa tabang kan nagkapirang brother, para sa dadagusan saka iba pang mga bagay na kaipuhan. Sinisiyerto niya na maimpormaran an gabos, pati an paraataman nin sirkito, manungod sa mga areglong ini.

⁴³ Kokontakon kan paraataman nin sirkito an koordineytor kan grupo nin kamagurangan mapadapit sa iskedyul kan mga pagtiripon, kaiba na an mga pagtiripon bago maglingkod sa langtad. Gigibuhon ini uyon sa mga suhestiyon kan paraataman nin sirkito asin sa instruksiyon hali sa sangang opisina. Kaipuhan na maimpormaran an gabos antes pa mapadapit sa mga oras asin lugar kan mga pagtiripon kan kongregasyon, pakikipagmiting sa mga payunir, pakikipagmiting sa mga elder saka ministeryal na lingkod, pati an oras saka lugar kan mga pagtiripon bago maglingkod sa langtad.

⁴⁴ Martes na hapon sinisiyasat kan paraataman nin sirkito an Congregation’s Publisher Records, rekord kan bilang nin mga nag-aatender sa mga pagtiripon, rekord kan teritoryo, asin accounts. Nakakatabang ini na mahiling niya an posibleng pangangaipo kan kongregasyon asin kun paano siya makakatabang sa mga may paninimbagan na mag-asikaso sa mga rekord na ini. Dapat na siguraduhon kan koordineytor kan grupo nin kamagurangan na ikatao nin amay sa paraataman nin sirkito an mga rekord.

⁴⁵ Sa panahon kan dalaw kan paraataman nin sirkito, nagtatao siya nin panahon na saro-sarong makaulay an mga tugang sagkod na magigibo niya—sa mga pagtiripon, paglilingkod sa langtad, mga oras nin pagkakan, asin sa iba pang mga panahon. Saro pa, nakikipagmiting siya sa mga elder asin ministeryal na lingkod tanganing magtao nin angay na mga konseho suno sa Kasuratan, mga suhestiyon, asin pampakusog para maasikaso an saindang mga paninimbagan na pasturan an aripumpon na nasa pangangataman ninda. (Tal. 27:23; Gibo 20:26-32; 1 Tim. 4:11-16) Nakikipagmiting man siya sa mga payunir para pakusugon sinda sa saindang gibuhon asin tabangan sinda mapadapit sa ano man na problemang tibaad inaatubang ninda sa ministeryo.

⁴⁶ Kun may iba pang kaipuhan tawan nin atensiyon, matabang an paraataman nin sirkito sagkod sa mapupuwede sa semanang iyan kan dalaw. Kun dai iyan kayang tapuson sa semanang iyan, puwedeng tabangan kan paraataman nin sirkito an mga elder o indibidwal na kalabot na mag-reseach nin aplikadong mga instruksiyon na basado sa Kasuratan. Kun may iba pang aksiyon na kaipuhan gibuhon an sangang opisina, matao siya asin an mga elder nin detalyadong report sa sangang opisina manungod sa bagay na iyan.

⁴⁷ Mantang nagdadalaw sa kongregasyon an paraataman nin sirkito, nag-aatender siya sa regular na mga pagtiripon kan kongregasyon. Sa pana-panahon tibaad magkaigwa nin pagbabago sa mga ini kauyon kan mga instruksiyon hali sa sangang opisina. Matao siya nin mga pahayag na an katuyuhan magpakusog, magpahiro, asin magtukdo sa kongregasyon. Pinagmamaigutan niyang tabangan sinda na kamutan si Jehova, si Jesu-Cristo, asin an organisasyon.

⁴⁸ An saro sa mga katuyuhan kan pagdalaw kan paraataman nin sirkito iyo na pakusugon an mga tugang na magin maigot sa ministeryo asin magtao sainda nin praktikal na mga suhestiyon. Dakul na tugang an puwedeng ika-adjust an iskedyul ninda tanganing lubos na makasuportar sa paglilingkod sa langtad sa semanang iyan asin tibaad makapag-auxiliary payunir sa bulan kan dalaw kan paraataman nin sirkito. Puwedeng magpaiskedyul an mga gustong makapartner siya o an saiyang agom sa ministeryo. Dakula an maitatabang saimo kun iiiba mo an paraataman nin sirkito o an agom niya sa mga tinutukduan sa Bibliya asin pagdalaw liwat. Talagang pinapahalagahan an dagdag na paghihinguwa mo na lubos na suportaran an ministeryo sa semana kan dalaw.—Tal. 27:17.

⁴⁹ Taon-taon, may duwang pansirkitong asembleya sa kada sirkito. An paraataman nin sirkito an may paninimbagan sa pag-organisar kan mga asembleyang ini. Nagnonombra siya nin sarong assembly overseer asin sarong assistant assembly overseer. Makikipagtabangan sinda sa saiya sa pag-asikaso kan asembleya. Paagi kaini, makakapokus an paraataman nin sirkito sa programa kan asembleya. Nagpipili man siya nin ibang may kakayahan na mga lalaki na maasikaso sa iba-ibang departamento. Ipinapa-audit man niya an accounts kan sirkito pagkatapos kan kada asembleya. Sa sarong pansirkitong asembleya kada taon, sarong representante kan sangang opisina an maglilingkod bilang nagdadalaw na ispiker. May mga sirkito na harayo o sadit an pasilidad kaya binabanga iyan sa mga seksiyon na an kada seksiyon igwa nin sadiring pansirkitong asembleya.

⁵⁰ Ipinapadara kan paraataman nin sirkito an saiyang report nin paglilingkod sa langtad sa sangang opisina sa katapusan kan kada bulan. Kun may rasonableng kantidad na nagastos—arog baga kan gastos sa pagbiyahe, kakanon, istaran, asin iba pang mga bagay na kaipuhan sa saiyang gibuhon—asin dai iyan na-reimburse kan kongregasyon na pinaglingkudan niya, puwede niyang ipa-reimburse iyan sa sangang opisina. Nagtitiwala an nagbibiyaheng mga representante na kun iinuton ninda an intereses kan Kahadian ni Jehova, itatao an materyal na mga pangangaipo ninda, arog kan ipinanuga ni Jesus. (Luc. 12:31) Dapat na mamatian kan mga kongregasyon an pribilehiyo ninda na mag-istimar sa maimbod na mga elder na ini na naglilingkod sa sainda.—3 Juan 5-8.

⁵¹ Sa kada sangang opisina kan Mga Saksi ni Jehova sa bilog na kinaban, tulo o labi pang maygurang na brother, na may espirituwal na kuwalipikasyon, an naglilingkod bilang Komite kan Sangay na nangangataman sa paghuhulit sa nasyon o mga nasyon na sakop kaiyan. An saro sa mga miyembro kan komite naglilingkod bilang koordineytor kan Komite kan Sangay.

⁵² An mga miyembro kan Komite kan Sangay an nag-aasikaso kan mga bagay-bagay may koneksiyon sa gabos na kongregasyon na nasa teritoryo kan sangay. An komite an may superbisyon sa paghuhulit kan maugmang bareta kan Kahadian sa bilog na teritoryo kan sangay asin nag-oorganisar iyan nin mga kongregasyon saka sirkito para maasikaso an mga pangangaipo sa langtad. An Komite kan Sangay iyo man an nag-aasikaso sa gibuhon kan mga misyonero asin kan mga espesyal, regular, saka auxiliary payunir. Pag may mga asembleya saka kumbensiyon, an komite an naggigibo nin mga areglo asin nagtatao nin mga asignasyon tanganing ‘magibo an gabos na bagay sa kagalang-galang asin aregladong paagi.’—1 Cor. 14:40.

⁵³ Sa nagkapirang nasyon, nagnonombra nin Country Committee na nasa pangangataman nin Komite kan Sangay sa ibang nasyon. Paagi kaini, mas natatawan nin superbisyon an gibuhon sa lugar na sakop kan Country Committee. Iyan an nag-aasikaso sa mga Bethel Home asin Bethel Office, mga surat asin report, saka sa mga gibuhon sa langtad. An Country Committee nakikikooperar sa Komite kan Sangay para sa ikakauswag kan intereses kan Kahadian.

⁵⁴ An Namamahalang Grupo an nagnonombra sa gabos na naglilingkod bilang mga miyembro kan Komite kan Sangay asin Country Committee.

⁵⁵ Sa pana-panahon, may ginigibong areglo an Namamahalang Grupo na dalawon nin kuwalipikadong mga brother an kada sangay sa bilog na kinaban. An brother na ini inaapod na representante kan headquarters. An panginot na gibuhon niya iyo na parigunon an pamilyang Bethel asin tabangan an Komite kan Sangay sa mga problema o hapot dapit sa gibuhon na paghuhulit saka paggibo nin mga disipulo. An brother na ini nakikipagmiting man sa piniling mga paraataman nin sirkito, asin sa pana-panahon, sa mga misyonero sa langtad. Kinakaulay niya sinda manungod sa saindang mga problema asin pangangaipo, asin nagtatao nin kinakaipuhan na pampakusog mapadapit sa pinakaimportanteng aktibidad ninda na paghuhulit kan Kahadian asin paggibo nin mga disipulo.

⁵⁶ Interesadong marhay an representante kan headquarters sa nagigibo sa teritoryo kan sangay kun dapit sa paghuhulit kan Kahadian asin iba pang aktibidad kan mga kongregasyon. Kun may panahon pa, puwede man niyang dalawon an mga remote translation office. Pag nagdadalaw siya sa sarong sangay, nakikikabtang man siya sa paghuhulit kan Kahadian sagkod sa mapupuwede.

⁵⁷ Talagang nakikinabang kita sa pagpapagal asin mamumuton na pangangataman kan maygurang na Kristiyanong mga lalaki. Mantang padagos kitang nagpapasakop sa nombradong mga paraataman na tinawan nin paninimbagan na magpastor sa aripumpon, nagigin kasaro kita kan Payo kan kongregasyon, si Cristo Jesus. (1 Cor. 16:15-18; Efe. 1:22, 23) Bilang resulta, an espiritu nin Diyos naghihiro sa gabos na kongregasyon sa bilog na kinaban, asin an Tataramon nin Diyos nagseserbing giya sa gibuhon sa bilog na daga.—Sal. 119:105.