Pahalagahan na Marhay an Pribilehiyo Mong Magsamba sa Espirituwal na Templo ni Jehova

 1. Ano an sinasabi nin sarong anghel, asin ano an kahulugan kaiyan para sa sato?

KUN kaulayon ka nin sarong anghel, dadangugon mo daw an sasabihon niya? Sa ngunyan, may sinasabi an sarong anghel “sa lambang nasyon asin tribo asin lengguwahe saka banwaan.” Ano an sinasabi niya? “Magkaigwa kamo nin pagkatakot sa Diyos asin pamurawayon nindo siya . . . Sambahon nindo an Saro na naggibo kan langit asin kan daga.” (Kap. 14:6, 7) Si Jehova an iyo sanang tunay na Diyos na dapat sambahon kan gabos. Nagpapasalamat nanggad kita ta tinawan niya kita nin mahalagang marhay na oportunidad na sambahon siya sa saiyang dakulang espirituwal na templo!

 2. Ano an espirituwal na templo ni Jehova? (Hilingon man an kahon na “Kun sa Ano Iyan Dai Nanunungod.”)

² Ano man nanggad an espirituwal na templo, asin sain ta makukua an mga detalye na nagpapaliwanag manungod diyan? An espirituwal na templo bakong sarong literal na edipisyo. Iyo iyan an areglo ni Jehova para sa pagdulot nin inaakong pagsamba na nakabasar sa atang na pantubos ni Jesus. Ipinaliwanag ni apostol Pablo an areglong ini sa saiyang surat sa inot na siglong mga Kristiyanong Hebreo na nakaistar sa Judea.b

3-4. Ano an mga nahiling ni Pablo na diyan kaipuhan na tabangan an mga Kristiyanong Hebreo sa Judea, asin paano niya sinda tinabangan?

³ Taano ta nagsurat si Pablo sa mga Kristiyanong Hebreo sa Judea? Posibleng marhay na huli sa duwang dahilan. Inot, para pakusugon sinda. Kadaklan sa sainda nagdakula sa relihiyon nin mga Judio. Tibaad tinuya-tuya sinda kan dati nindang mga lider nin relihiyon huling nagin mga Kristiyano sinda. Taano? Huling an mga Kristiyano mayong magayon na templo para dumanan ninda sa pagsamba, mayo nin altar na diyan makakapag-atang sinda sa Diyos, asin mayo nin mga saserdoteng malingkod sa sainda. Puwedeng nakapadisganar ini sa mga disipulo ni Cristo asin nakapaluya sa pagtubod ninda. (Heb. 2:1; 3:12, 14) Tibaad natentaran pa ngani an nagkapira sa sainda na magbalik sa Judaismo.

⁴ Ikaduwa, idinuon ni Pablo sa mga Kristiyanong Hebreo na dai sinda naghihinguwang masabutan an mga bago o mas hararom na espirituwal na mga katukduan, an “matagas na kakanon” na yaon sa Tataramon nin Diyos. (Heb. 5:11-14) Minalataw na an nagkapira sa sainda nagsusunod pa man giraray sa Katugunan ni Moises. Alagad, ipinaliwanag ni Pablo na an mga atang na hinahagad kan Katugunan dai lubos na makakahali nin kasalan. Dahil diyan, an Katugunan ‘ipinagilid’ na. Kaya nagtukdo si Pablo nin nagkapirang mas hararom na mga katotoohan. Ipinagirumdom niya sa mga kapwa niya Kristiyano an “mas marahay na paglaom” na nakabasar sa atang ni Jesus na talagang makakatabang sa sainda na ‘makarani sa Diyos.’​—Heb. 7:18, 19.

 5. Ano an kaipuhan niyatong masabutan sa libro kan Bibliya na Hebreo, asin taano?

⁵ Ipinaliwanag ni Pablo sa saiyang mga tugang na Hebreo kun taano ta an saindang Kristiyanong pagsamba nakakalabing marhay sa pagsamba ninda kaidto. An mga paagi nin pagsamba kan relihiyon nin mga Judio “anino [sana] kan mga bagay na maabot, pero an talagang tunay iyo an Cristo.” (Col. 2:17) An anino nin sarong bagay kabilugan na korte sana kan tunay na bagay na pinaghahalian kan anino. Kaagid kaiyan, an suanoy na paagi nin pagsamba kan mga Judio anino sana kan talagang tunay na maabot. Kaipuhan tang masabutan an areglo na itinao ni Jehova sa sato para mapatawad an satong mga kasalan tanganing masamba niyato siya sa paaging inaako niya. Ikumparar ta an “anino” (an suanoy na paagi nin pagsamba kan mga Judio) sa “talagang tunay” (an paagi nin pagsamba kan mga Kristiyano), arog kan ipinaliwanag sa Hebreo. Paagi kaiyan, mas masasabutan ta an espirituwal na templo asin kun paano kita kalabot diyan.

 6. Paano ginamit kaidto an tabernakulo?

⁶ An anino. An paliwanag ni Pablo ibinasar niya sa tabernakulo na pinatindog ni Moises kan 1512 B.C.E. (Hilingon an tsart na “An Anino​—An Talagang Tunay.”) An tabernakulo sarong garo toldang estruktura na pigdadara-dara kaidto kan mga Israelita pag nagbuburubalyo sinda nin lugar. Ginamit ninda iyan nin haros 500 na taon sagkod na maitugdok an permanenteng templo sa Jerusalem. (Exo. 25:8, 9; Bil. 9:22) An “tolda nin pakipagtagbuan” na ini iyo an lugar kun sain nagtitiripon an mga Israelita para magdulot kan saindang mga atang asin sambahon an Diyos. (Exo. 29:43-46) Minsan siring, an tabernakulo nagrerepresentar man sa sarong mas marahay na bagay na maabot para sa mga Kristiyano.

 7. Kasuarin nagpuon na mag-eksister an espirituwal na templo?

⁷ An talagang tunay. An suanoy na tabernakulo sarong “anino kan langitnon na mga bagay,” asin nagladawan iyan sa dakulang espirituwal na templo ni Jehova. Sinabi ni Pablo na ‘an tolda [o, tabernakulo] na ini sarong ilustrasyon para sa presenteng panahon.’ (Heb. 8:5; 9:9) Kaya kan panahon na magsurat siya sa mga Hebreo, an espirituwal na templo nagin tunay na o nag-eeksister na para sa mga Kristiyano. Nag-eksister iyan kan 29 C.E. Kan taon na iyan, nabawtismuhan si Jesus, linahidan nin banal na espiritu, asin nagpuon na maglingkod bilang “nangungurog na halangkaw na saserdote” ni Jehova sa espirituwal na templo.c​—Heb. 4:14; Gibo 10:37, 38.

8-9. Uyon sa Hebreo 7:23-27, ano an dakulang pagkakalain kan mga halangkaw na saserdote sa Israel asin kan nangungurog na Halangkaw na Saserdote, si Jesu-Cristo?

⁸ An anino. An halangkaw na saserdote inawtorisaran na irepresentar an banwaan sa atubangan nin Diyos. An inot na halangkaw na saserdote kan Israel, si Aaron, ninombrahan ni Jehova kan idedikar an tabernakulo. Alagad, arog kan ipinaliwanag ni Pablo, “dakul an kinakaipuhan na magin saserdote para iyo an magsalida huling inuulang sinda kan kagadanan na magpadagos sa paglilingkod.”d (Basahon an Hebreo 7:23-27.) Asin huling bakong perpekto an mga halangkaw na saserdoteng idto, kaipuhan nindang magdulot nin mga atang para sa saindang mga kasalan. Mahihiling niyato digdi an dakulang pagkakalain kan mga halangkaw na saserdote sa Israel asin kan nangungurog na Halangkaw na Saserdote, si Jesu-Cristo.

⁹ An talagang tunay. Bilang satong Halangkaw na Saserdote, si Jesu-Cristo “sarong lingkod . . . sa tunay na tolda, na pinatindog ni Jehova, asin bako nin tawo.” (Heb. 8:1, 2) Ipinaliwanag ni Pablo na “huling nagdadanay [si Jesus na] buhay sagkod lamang, an saiyang pagkasaserdote dai nangangaipo nin mga kasalida.” Sinabi pa ni Pablo na si Jesus “daing digta, suway sa mga parakasala” saka bakong arog kan mga halangkaw na saserdote kan Israel, “dai niya kaipuhan na aroaldaw na magdulot nin mga atang” para sa saiyang mga kasalan. Hilingon ta ngunyan an pagkakalain kan altar saka atang sa anino asin kan altar saka atang sa talagang tunay.

10. Ano an irinepresentar kan mga atang sa altar na tanso?

¹⁰ An anino. Sa luwas kan entrada kan tabernakulo yaon an sarong altar na tanso kun sain an mga atang na hayop idinudulot ki Jehova. (Exo. 27:1, 2; 40:29) Alagad, an mga atang na idto dai makakatao nin lubos na kapatawadan nin mga kasalan sa mga tawo. (Heb. 10:1-4) An dagos-dagos na pag-atang nin mga hayop sa tabernakulo nagrepresentar sa sarong atang na lubos na makakabalukat sa katawuhan.

11. Sa anong altar idinulot ni Jesus an saiyang sadiri bilang atang? (Hebreo 10:5-7, 10)

¹¹ An talagang tunay. Aram ni Jesus na isinugo siya ni Jehova sa daga para idulot an saiyang buhay bilang tawo para magin atang na pantubos sa katawuhan. (Mat. 20:28) Kaya, sa saiyang bawtismo, iprinesentar ni Jesus an saiyang sadiri para gibuhon an kabutan ni Jehova. (Juan 6:38; Gal. 1:4) Idinulot ni Jesus an saiyang sadiri sa piguratibong altar na nagrepresentar sa “kabutan” nin Diyos para sa saiyang Aki na iatang an saiyang perpektong buhay bilang tawo. Idinulot ni Jesus an saiyang buhay “nin saro sanang beses para sa gabos na panahon” para bayadan, o permanenteng tahuban, an mga kasalan kan lambang saro na nagpapahiling nin pagtubod ki Cristo. (Basahon an Hebreo 10:5-7, 10.) An sunod na aramon ta iyo an kahalagahan kan panglaog na mga parte kan tabernakulo.

12. Siisay an puwedeng lumaog sa lambang kuwarto kan tabernakulo?

¹² An anino. An tabernakulo asin an mga templo na itinugdok kan huri sa Jerusalem magkaagid na marhay an pagkadisenyo. An laog kaiyan igwa nin duwang kuwarto​—an “Banal na Lugar” asin an “Kabanal-banali”​—na naseseparar nin binurdahan na kurtina. (Heb. 9:2-5; Exo. 26:31-33) Sa laog kan Banal yaon an bulawan na kandelero, an altar na pigtututungan nin insenso, asin an lamesa nin tinapay na pandulot. An “linahidan na mga saserdote” sana an puwedeng maglaog sa Banal para gibuhon an saindang sagradong mga paninimbagan. (Bil. 3:3, 7, 10) Yaon sa Kabanal-banali an bulawan na kaban kan tipan na nagrerepresentar sa presensiya ni Jehova. (Exo. 25:21, 22) An halangkaw na saserdote sana an puwedeng magbalyo sa partisyon na kurtina pasiring sa Kabanal-banali kada taon sa Aldaw nin Pagbayad sa Kasalan. (Lev. 16:2, 17) Taon-taon, naglalaog siya na may darang dugo nin mga hayop para ipambayad sa mga kasalan niya saka kan bilog na nasyon. Pag-abot nin panahon, lininaw ni Jehova paagi kan saiyang banal na espiritu an tunay na kahalagahan kan mga parteng ini kan tabernakulo.​—Heb. 9:6-8.e

13. Sa ano nagrerepresentar an Banal saka an Kabanal-banali kan tabernakulo?

¹³ An talagang tunay. Sarong limitadong bilang nin mga disipulo ni Cristo an linahidan nin banal na espiritu, asin igwa sinda nin espesyal na relasyon ki Jehova. An 144,000 na ini maglilingkod bilang mga saserdote sa langit kaiba ni Jesus. (Kap. 1:6; 14:1) An Banal kan tabernakulo nagrerepresentar sa saindang kamugtakan bilang pinaniaki sa espiritu mantang nasa daga bilang mga aki nin Diyos. (Roma 8:15-17) An Kabanal-banali nagrerepresentar sa langit, kun sain nag-iirok si Jehova. An “kurtina” na nagseseparar sa Banal asin sa Kabanal-banali nagrerepresentar sa pisikal na hawak ni Jesus na ulang sa paglaog niya sa langit bilang an nangungurog na Halangkaw na Saserdote kan espirituwal na templo. Paagi sa pagtao kan saiyang pisikal na hawak bilang atang para sa katawuhan, binuksan ni Jesus an dalan pasiring sa buhay sa langit para sa gabos na linahidan na Kristiyano. Dapat man nindang itao an saindang pisikal na hawak para mag-ako kan saindang balos sa langit. (Heb. 10:19, 20; 1 Cor. 15:50) Pakatapos na buhayon liwat si Jesus, naglaog siya sa Kabanal-banali kan espirituwal na templo, kun sain pag-abot nin panahon maiba sa saiya an gabos na linahidan.

14. Uyon sa Hebreo 9:12, 24-26, taano ta nakakalabi an areglo kan espirituwal na templo ni Jehova?

¹⁴ Malinaw na mahihiling ta digdi an pagigin nakakalabi kan areglo ni Jehova para sa tunay na pagsamba na nakabasar sa atang na pantubos asin sa pagkasaserdote ni Jesu-Cristo. An halangkaw na saserdote sa Israel naglaog sa gibo nin tawo na Kabanal-banali na may darang dugo nin mga atang na hayop, pero si Jesus naglaog “sa langit mismo,” an pinakabanal na lugar sa gabos, para umatubang ki Jehova. Duman iprinesentar niya an halaga kan saiyang perpektong buhay bilang tawo alang-alang sa sato “tanganing paraon an kasalan paagi sa pag-atang kan saiyang sadiri.” (Basahon an Hebreo 9:12, 24-26.) An atang ni Jesus iyo sana an lubos na makakapara kan kasalan sagkod lamang. Arog kan sunod na manunudan ta, sa langit man o sa daga an satong paglaom, gabos kita puwedeng sumamba ki Jehova sa saiyang espirituwal na templo.

15. Siisay an naglilingkod sa patyo kan tabernakulo?

¹⁵ An anino. An tabernakulo igwa nin sarong patyo​—sarong nakukudalan na mahiwas na lugar kun sain ginigibo kan mga saserdote an saindang mga paninimbagan. Yaon sa patyo an dakulang altar na tanso para sa dulot na pigtututong asin an tansong planggana nin tubig na ginagamit kan mga saserdote para sa paglinig kan saindang sadiri bago ninda gibuhon an saindang sagradong paglilingkod. (Exo. 30:17-20; 40:6-8) Alagad, an mga templo na itinugdok kan huri igwa man nin patyong nasa luwas kun sain puwedeng magtindog asin magsamba sa Diyos an mga bakong saserdote.

16. Sairisay an naglilingkod sa lambang patyo kan espirituwal na templo?

¹⁶ An talagang tunay. Bago maglingkod bilang mga saserdote sa langit kaiba ni Jesus, an natatada kan linahidan na mga tugang niya maimbod na naglilingkod sa daga sa patyong nasa laog kan espirituwal na templo. An pagkaigwa nin dakulang planggana nin tubig sarong mahalagang pagirumdom sa sainda, siring man sa gabos na Kristiyano, na magdanay na malinig sa moral asin espirituwal. Kun siring, sain naglilingkod an “dakulang kadaklan” na maimbod na nagsusuportar sa linahidan na mga tugang ni Cristo? Nahiling sinda ni apostol Juan na “nakatindog sa atubangan kan trono,” na katumbas digdi sa daga kan patyong nasa luwas, kun sain “nagtatao sinda [sa Diyos] nin sagradong paglilingkod aldaw asin banggi sa saiyang templo.” (Kap. 7:9, 13-15) Pinapahalagahan tang marhay an pagkaigwa niyato nin lugar sa areglo ni Jehova para sa dalisay na pagsamba!

17. Anong mga atang an pribilehiyo tang idulot ki Jehova?

¹⁷ Sa ngunyan, an gabos na Kristiyano igwa nin pribilehiyo na magdulot nin mga atang ki Jehova paagi sa paggamit kan saindang panahon, kusog, asin materyal na mga pagsadiri para pauswagon an intereses kan Kahadian nin Diyos. Arog kan sinabi kan apostol sa mga Kristiyanong Hebreo, magigibo niyato na “[pirming] magdulot sa Diyos nin atang nin pag-umaw, an buot sabihon, an bunga kan satuyang mga ngabil na hayagan na nagpapahayag sa mga tawo manungod sa saiyang pangaran.” (Heb. 13:15) Maipapahiling niyato na pinapahalagahan tang marhay an satong pribilehiyo na sambahon si Jehova paagi sa pagdulot sa saiya kan satong pinakamarahay na mga atang.

18. Sigun sa Hebreo 10:22-25, ano an dai ta dapat nuarin man pagpabayaan asin dai dapat nuarin man paglingawan?

¹⁸ Basahon an Hebreo 10:22-25. Sa pagtatapos kan saiyang surat sa mga Hebreo, sinambit ni Pablo an manlain-lain na aspekto kan satong pagsamba na dai ta dapat nuarin man pagpabayaan. Kaiba digdi an pagdulok ki Jehova sa pamibi, hayagan na pagpatotoo mapadapit sa satuyang paglaom, pagtiripon bilang sarong kongregasyon, asin pagpakusog sa lambang saro “lalo na ta nahihiling [niyato] na an aldaw [ni Jehova] paparani na.” Sa pagtatapos kan rekord kan Kapahayagan, bilang pagduduon, duwang beses na sinambit kan anghel ni Jehova an mga tataramon na ini: “Sambahon mo an Diyos!” (Kap. 19:10; 22:9) Lugod na dai ta nuarin man paglingawan an hararom na espirituwal na katotoohan na ini mapadapit sa dakulang espirituwal na templo ni Jehova asin an satong mahalagang marhay na pribilehiyo na sambahon an satong makapangyarihan na Diyos!