Dagkahon sa Pagkamoot Asin sa Marahay na mga Gibo​—Paano?

“Konsideraron niato an lambang saro tanganing mandagka sa pagkamoot asin sa marahay na mga gibo, . . . na magpakinosogan kita, asin lalo na ta naheheling nindo na an aldaw harani na.”​—HEBREO 10:​24, 25.

1, 2. (a) Taano ta importante na an enot na mga Kristiano makakua nin karangahan asin pampakosog sa saindang pagtorotiripon? (b) Anong hatol ni Pablo an nagdoon kan pangangaipong magtorotiripon?

NAGHIRELINGAN sinda sa hilom, nagtiripon sa laog nin kuwartong barat an mga pinto. Sa luwas, an peligro nagtatago sa gabos na lugar. An saindang Poon, si Jesus, bago pa sanang gadanon sa publiko, asin pinatanidan nia an saiyang mga parasunod na sinda tatrataron nin arog man kan ginibo sa saiya. (Juan 15:20; 20:19) Alagad mantang sinda nagtataram sa maluyang boses mapadapit sa saindang namomotan na si Jesus, an pagigin magkairiba sierto na kisuerra nagpangyaring sinda makamateng mas ligtas.

² Sa pag-agi nin mga taon, an mga Kristiano napaatubang sa gabos na klase nin pagbalo asin paglamag. Arog kan enot na mga disipulong idto, sinda nakakua nin karangahan asin pampakosog sa pagtorotiripon. Kaya, si apostol Pablo nagsurat sa Hebreo 10:​24, 25: “Konsideraron niato an lambang saro tanganing mandagka sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magpakinosogan kita, asin lalo na ta naheheling nindo na an aldaw harani na.”

3. Taano ta masasabi nindo na an Hebreo 10:​24, 25 labi pa sa pagboot sana na an mga Kristiano magtorotiripon?

³ An mga tataramon na iyan labi pa sa pagboot sana na padagos na magtorotiripon. Iyan nagtatao nin ipinasabong nin Dios na pamantayan para sa gabos na Kristianong pagtiripon​—asin sa totoo, para sa ano man na okasyon na an mga Kristiano nag-iiriiriba. Ngonyan orog kisa kasuarin pa man, na satong malinaw na naheheling na harani na an aldaw ni Jehova, nin huli sa mga pangigipit asin peligro sa maraot na palakaw na ini kaipuhan na an satong mga pagtiripon magin arog sa ligtas na tagoan, sarong gikanan nin kakosogan asin pampakosog para sa gabos. Ano an puwede niatong gibohon tanganing masierto ini? Bueno, maingat niatong siyasaton an mga tataramon ni Pablo, na igwa nin tolong pangenot na hapot: Ano an boot sabihon kan “konsideraron an lambang saro”? Ano an boot sabihon kan ‘dagkahon an lambang saro sa pagkamoot asin sa marahay na mga gibo’? An ultimo, paano kita ‘magpapakinosogan’ sa masakit na mga panahon na ini?

‘Konsideraron an Lambang Saro’

4. Ano an boot sabihon kan ‘konsideraron an lambang saro’?

⁴ Kan sadolon ni Pablo an mga Kristiano na ‘konsideraron an lambang saro,’ ginamit nia an berbo sa Griego na ka·ta·no·eʹo, sarong mas madoon na porma kan ordinaryong terminong “mansayon.” An Theological Dictionary of the New Testament nagsasabi na iyan nangangahulogan na “idirehir an bilog na isip nin saro sa sarong bagay.” Sono ki W. E. Vine, iyan puwede man na mangahulogan nin “lubos na saboton, horophoropon nin marhay.” Kaya kun an mga Kristiano ‘kinokonsiderar an lambang saro,’ bako sanang hiniheling ninda an panluwas kundi ginagamit ninda an gabos nindang kakayahan nin pag-isip asin hinihingoang humeling nin mas hararom.​—Ikomparar an Hebreo 3:1.

5. Ano an nagkapirang ugale nin saro na tibaad dai tolos naheheling, asin taano ta maninigo niatong konsideraron iyan?

⁵ Kaipuhan niatong girumdomon na igwa nin orog pa dapit sa sarong tawo kisa sa tibaad ihinahayag kan panluwas na pagheling sa saiyang itsura, mga gibo, o personalidad. (1 Samuel 16:7) Parate na an toninong na panluwas itinatago an hararom na mga saboot o kawiliwiling kuwalidad na magpangisi. Dangan, an mga pinaghalean nagkakalaenlaen man na marhay. An iba makatatakot an inagihan sa saindang buhay; an iba nagtatagal ngonyan mismo sa mga situwasyon na madedepisilan kitang imahinaron. Parate nanggad na an satong pagkauyam sa sarong palaen na ugale nin sarong tugang na lalaki o babae nawawara mantang orog niatong naaaraman an manongod sa pinaghalean o mga kamugtakan nin saro.​—Talinhaga 19:11.

6. Ano an nagkapirang paagi na orog niatong mamimidbid an lambang saro, asin anong karahayan an puwedeng ibunga?

⁶ Siyempre, dai boot sabihon kaini na, minsan dai imbitado, maninigo kitang makiaram sa personal na mga ginigibo nin iba. (1 Tesalonica 4:11) Pero tunay na makakapaheling kita nin personal na interes sa lambang saro. An kalabot digdi labi pa sa pagtaratara sana sa Kingdom Hall. Taano ta dai pumili nin saro na gusto nindong mamidbid nin orog asin hingoahon na makapag-olay-olay nin nagkapirang minuto bago o pakatapos kan pagtiripon? Orog pang kapakipakinabang, “magin parapasakat” paagi sa pag-imbitar nin saro o duwang katood sa saindong harong para sa simpleng merindal. (Roma 12:13) Magpaheling nin interes. Maghinanyog. An paghapot sana kun paano si Jehova namidbid asin namotan nin sarong indibiduwal puwedeng maghayag nin dakol. Alagad puwedeng dakol pa an saindong manodan paagi sa pag-ibanan sa ministeryo sa harong-harong. An pagkonsiderar sa lambang saro sa siring na mga paagi matabang sato na makapatalubo nin tunay na pakikipagkapwa, o pakikidamay.​—Filipos 2:4; 1 Pedro 3:8.

‘Dagkahon an Lambang Saro’

7. (a) Paano an pagtotokdo ni Jesus nakaapektar sa mga tawo? (b) Ano an guminibo sa saiyang pagtotokdo na magin mapuwersang marhay?

⁷ Kun kinokonsiderar niato an lambang saro, mas andam kita na dagkahon, sadolon an lambang saro na humiro. An Kristianong mga magurang partikularmente na igwa nin pangenot na kabtang sa bagay na ini. Manongod sa sarong panahon na si Jesus nagtaram sa publiko, satong mababasa: “Napangalas an kadaklan sa saiyang paagi nin pagtotokdo.” (Mateo 7:28) Sa saro pang pangyayari pati an nagkapirang soldados na isinugong umarestar sa saiya naghale na an sabi: “Dai pa nin tawong nagtaram nin arog kaini.” (Juan 7:46) Ano an guminibo sa pagtotokdo ni Jesus na magin mapuwersang marhay? Mga pagpaheling daw nin emosyonalismo? Dai; si Jesus nagtaram na may dignidad. Pero, permi niang hinihingoa na aboton an puso kan mga naghihinanyog sa saiya. Huling kinonsiderar nia an mga tawo, aram nanggad nia kun paano sinda momotibaron. Naggamit sia nin malinaw, simpleng mga ilustrasyon na nagpapaheling kan mga katunayan nin pan-aroaldaw na buhay. (Mateo 13:34) Sa kaagid na paagi, an mga may asignasyon sa satong mga pagtiripon maninigong arogon si Jesus paagi sa pagtao nin mainit, entusiastikong mga presentasyon na nakamomotibar. Arog ni Jesus, puwede kitang magmaigot sa paghanap nin mga ilustrasyon na angay sa mga nagdadangog sa sato asin nakakaabot sa saindang puso.

8. Paano si Jesus nandagka paagi sa halimbawa, asin paano niato puwedeng arogon sia sa bagay na ini?

⁸ Sa paglilingkod sa satong Dios, kita gabos puwedeng dagkahon an lambang saro paagi sa halimbawa. Tunay na dinagka ni Jesus an mga naghihinanyog sa saiya. Namotan nia an gibohon na Kristianong ministeryo asin pinamuraway an ministeryo. Sinabi nia na iyan siring sa kakanon para sa saiya. (Juan 4:34; Roma 11:13) An siring na entusiasmo puwedeng makaolakit. Puwede man daw nindong ipaheling an saindong kagayagayahan sa ministeryo? Minsan ngani maingat na linilikayan na magin mahambog, ihiras an saindong magayon na mga eksperyensia sa iba sa kongregasyon. Kun inaagda nindo an iba na umiba sa saindo, helingon kun matatabangan nindo sinda na makanompong nin tunay na kawilihan sa pakipag-olay sa iba manongod sa satong Dakulang Kaglalang, si Jehova.​—Talinhaga 25:25.

9. (a) Ano an nagkapirang paagi nin pagdagka sa iba na bobooton niatong likayan, asin taano? (b) Ano an maninigong magmotibar sato na idusay an satong sadiri sa paglilingkod ki Jehova?

⁹ Alagad, mag-ingat na dai dagkahon an iba sa salang paagi. Halimbawa, tibaad daing pagmamaan na mapangyari niato na makamate sinda nin kasalan manongod sa dai paggibo nin orog pa. Tibaad dai tinutuyo na mapasopog ta sinda paagi sa bakong marahay na pagkomparar sainda sa iba na risang mas aktibo, o tibaad pa ngani magbugtak kita nin estriktong mga pamantayan asin menuson an mga dai nakakaabot. An arin man sa mga paaging ini puwedeng magpahiro sa iba sa halipot na panahon, alagad ta si Pablo dai nagsurat na, ‘Mandagka sa pakamate nin kasalan asin marahay na mga gibo.’ Dai, dapat kitang mandagka sa pagkamoot, dangan masunod an mga gibo huli sa marahay na motibo. Mayo nin siisay man na sa pangenot maninigong motibaron nin pag-isip sa tibaad honaon kan iba sa kongregasyon manongod sa saiya kun dai sia haros nakakaabot sa mga linalaoman.​—Ikomparar an 2 Corinto 9:​6, 7.

10. Taano ta maninigo niatong girumdomon na bako kitang mga kagurangnan kan pagtubod nin iba?

¹⁰ An pagdagka sa lambang saro dai nangangahulogan nin pagkontrol sa lambang saro. Minsan ngani igwa sia nin dakol na itinao nin Dios na autoridad, mapakumbabang pinagirumdom ni apostol Pablo an kongregasyon sa Corinto: ‘Bako kami an mga kagurangnan kan saindong pagtubod.’ (2 Corinto 1:24) Kun arog nia mapakumbaba niatong sinasabot na bako tang obligasyon na determinaran kun gurano an maninigong gibohon kan iba sa paglilingkod ki Jehova, o kontrolon para sa sainda an saindang konsensia sa ibang personal na mga desisyon, lilikayan niato na magin “labi-labi kamatanos,” daing kagayagayahan, estrikto, negatibo, o makiregulasyon. (Eclesiastes 7:16) An siring na mga kuwalidad dai nakadadagka; iyan nandadaogdaog.

11. Ano an nagpahiro sa pagtao nin mga kontribusyon kan mga aldaw na itinotogdok an tabernakulo sa Israel, asin paano iyan puwedeng magin totoo sa satong aldaw?

¹¹ Boot niato na an gabos na paghihingoa sa paglilingkod ki Jehova gibohon sa espiritu na kapareho kaidtong sa suanoy na Israel kan kaipuhan an mga donasyon para sa pagtogdok kan tabernakulo. An Exodo 35:21 nagsasabi: “Dangan sinda nagdaratong, an gabos na pinahiro kan saiyang puso, asin sinda nagdara, an gabos na pinukaw kan saiyang espiritu, nin kontribusyon ki Jehova para sa paggibo.” Mayo nin panluwas na puwersang nagpahiro sainda kundi napahiro sinda gikan sa laog, gikan sa puso. Sa katunayan, an Hebreo sa literal nagsasabi digdi na “an kada saro na an puso pinaogma sia” naggibo nin siring na mga regalo. (Samo an italiko.) Sa paggibo nin orog pa, pagmaigotan niato na paogmahon an puso kan lambang saro kun kita nagkakatiripon. Kayang gibohon kan espiritu ni Jehova an ano pa man na kaipuhan.

“Magpakinosogan”

12. (a) Ano an nagkapirang kahulogan kan termino sa Griego na trinadusir na “pakosogon”? (b) Paano an kairiba ni Job dai nakapakosog sa saiya? (c) Taano ta maninigo niatong likayan na maghusgar sa lambang saro?

¹² Kan sumurat si Pablo na maninigo kitang “magpakinosogan,” ginamit nia an sarong porma kan termino sa Griego na pa·ra·ka·leʹo, na puwede man na mangahulogan na ‘parigonon, rangahon.’ Sa bersion na Griegong Septuagint, an tataramon man sanang ini ginamit sa Job 29:​25, kun saen si Job ilinadawan bilang saro na nagraranga sa mga nagtatangis. Kabaliktaran sa linalaoman, kan si Job mismo makuring binabalo, dai sia nag-ako nin siring na pagpakosog. An saiyang tolong “pararanga” sibot na marhay sa paghusgar sa saiya asin sa pagsermon saiya kaya dai ninda nagibong saboton o damayan sia. Sa katunayan, sa bilog nindang pagparataram, ni sarong beses na si Job inapod ninda sa ngaran. (Ipaheling an kalaenan kan Job 33:​1, 31.) Malinaw na mas minansay ninda sia bilang problema kisa bilang sarong persona. Bakong makangangalas na si Job nagkagsing sa sainda sa pagkadisganar: “Kun an saindong kalag nag-eksister sana kutana sa namumugtakan kan sakong kalag”! (Job 16:4) Siring man ngonyan, kun may gusto kamong pakosogon, makidamay kamo! Dai kamo maghusgar. Arog kan sabi sa Roma 14:​4, “siisay ka na naghohokom sa oripon nin iba? Sa saiyang kagurangnan sia nagtitindog o napupukan. Sa katotoohan, sia patitindogon, huli ta mapatitindog sia ni Jehova.”

13, 14. (a) Manongod sa anong pundamental na katotoohan kaipuhan niatong makombensir an satong mga tugang na lalaki asin babae tanganing maranga sinda? (b) Paano si Daniel pinakosog nin sarong anghel?

¹³ An sarong porma nin pa·ra·ka·leʹo asin an nombre na konektado dian tinatradusir na “rangahon” sa 2 Tesalonica 2:​16, 17: “Dugang pa, logod an satong Kagurangnan na si Jesu-Cristo mismo asin an Dios na satong Ama, na namoot sato asin nagtao nin daing katapusan na karangahan asin marahay na paglaom paagi sa dai na kutana maninigong kabootan, rangahon an saindong puso asin parigonon kamo sa gabos na marahay na gibo asin tataramon.” Mangnohon na an ideya na maranga an satong puso ikinonektar ni Pablo sa pundamental na katotoohan na si Jehova namomoot sato. Kaya puwede niatong pakosogon asin rangahon an lambang saro paagi sa pagpatunay sa importanteng katotoohan na iyan.

¹⁴ Sa sarong pangyayari naribok na marhay an boot ni propeta Daniel pakaheling sa sarong makatatakot na bisyon kaya sia nagsabi: “An sako mismong dignidad naribayan sa sako nin pagkalaglag, asin mayong natadang kosog sa sako.” Si Jehova nagsugo nin anghel na nagkapirang beses na nagpagirumdom ki Daniel na sia “namomotan na gayo” sa mga mata nin Dios. An resulta? Sinabihan ni Daniel an anghel: “Pinakosog mo ako.”​—Daniel 10:​8, 11, 19.

15. Paano an pagtatanos maninigong timbangan nin komendasyon kan mga magurang asin nagbibiyaheng mga paraataman?

¹⁵ Kaya uya an saro pang paagi nin pagpakosog sa iba. Tawan sinda nin komendasyon! Madalion maholog sa mapagtatsar, maisog na ugale. Totoo, may mga panahon na puwedeng kaipuhan na gibohon an pagtatanos, nangorogna kan mga magurang asin nagbibiyaheng mga paraataman. Pero marahay para sa sainda kun sinda nagigirumdoman huli sa saindang nakaoogma sa pusong pagpakosog imbes na sa pagkaigwa nin ugaleng pagparahanap nin sala.

16. (a) Kun nagpapakosog sa mga may makuring kamondoan, taano ta sa parate bakong igo na sadolon sana sindang gumibo nin orog pa sa paglilingkod ki Jehova? (b) Paano tinabangan ni Jehova si Elias kan sia may makuring kamondoan?

¹⁶ An mga may makuring kamondoan partikularmenteng nangangaipo nin pagpakosog, asin si Jehova linalaoman kita bilang mga kapwa Kristiano na magin gikanan nin tabang​—nangorogna kun kita mga magurang. (Talinhaga 21:13) Ano an satong magigibo? An simbag tibaad bakong arog kasimple nin pagsabi sainda na gumibo nin orog pa sa paglilingkod ki Jehova. Taano? Huli ta iyan puwedeng magpasentido na an makuring kamondoan ninda huli sa dai ninda paggibo nin igo. Bako iyan permi an kamugtakan. Si propeta Elias sarong beses nagkaigwa nin makuring kamondoan na gusto na niang magadan; pero nangyari ini sa panahon na sia labi-labi kasibot sa saiyang paglilingkod ki Jehova. Ano an ginibo sa saiya ni Jehova? Nagsugo sia nin anghel tanganing tumao nin praktikal na tabang. Binuksan ni Elias ki Jehova an saiyang puso, na ihinahayag na an pagmate nia arog sia kadaing halaga kan saiyang gadan nang mga apoon, na an saiyang gibo gabos nasayang, asin na sia biyong nagsosolo. Hininanyog asin rinanga sia ni Jehova paagi sa makangingirhat na mga pagpaheling kan Saiyang kapangyarihan asin sa mga pagpakosog sa boot na sia dai nanggad nagsosolo asin na an gibohon na saiyang pinonan matatapos. Si Jehova nanuga man na tatawan si Elias nin sarong kaiba tanganing sanayon na sa katapustapusi masalihid sa saiya.​—1 Hade 19:​1-21.

17. Paano puwedeng mapakosog nin magurang an saro na labi-labi an pagkritika sa saiyang sadiri?

¹⁷ Nakapakokosog nanggad! Logod pakosogon man niato an mga kaiba niato na may emosyonal na problema. Pagmaigotan na saboton sinda paagi sa paghinanyog! (Santiago 1:19) Tumao nin Makakasuratan na ranga na ibinabagay sa saindang indibiduwal na mga pangangaipo. (Talinhaga 25:11; 1 Tesalonica 5:14) Tanganing mapakosog an mga labi-labi an pagkritika sa saindang sadiri, an mga magurang puwedeng may kabootan na magtao nin Makakasuratan na ebidensia na si Jehova namomoot asin nagpapahalaga sa sainda.a An pagpaliwanag kan pantubos puwedeng magin mapuwersang paagi sa pagpakosog sa mga nakakamateng dai nin halaga. Tibaad kaipuhan na ipaheling sa saro na nagmomondo huli sa sarong nakaaging kasalan na nalinigan na sia kan pantubos kun sia tunay na nagsolsol asin nagbakle sa ano man na siring na gibo.​—Isaias 1:18.

18. Paano maninigong gamiton an katokdoan manongod sa pantubos sa pagpakosog sa saro na biniktima nin iba, arog baga nin panlulugos?

¹⁸ Siyempre, hohorophoropon nin magurang an partikular na kaso tanganing magamit nin tama an katokdoan na iyan. Horophoropa an sarong halimbawa: An pantubos na atang ni Cristo ipinanganino kan mga atang na hayop sa Mosaikong Pagboot, na hinahagad para sa kapatawadan kan gabos na kasalan. (Levitico 4:​27, 28) Alagad mayo nin kondisyon na an sarong biktima nin panlulugos kaipuhan na gumibo kan siring na dolot manongod sa kasalan. An pagboot nagsasabi na sinda ‘dai maggibo nin ano man’ sa pagpadusa saiya. (Deuteronomio 22:​25-27) Kaya ngonyan, kun an sarong tugang na babae sinalakay saka linugos asin ini nagpangyari saiya na makamateng maramog asin daing halaga, angay daw na idoon an pangangaipo nia sa pantubos tanganing malinigan sia sa kasalan na iyan? Bako nanggad. Dai sia nagkasala ta sinalakay sia. An paralugos an nagkasala asin nagkakaipong linigan. Alagad, an pagkamoot na ipinaheling ni Jehova asin ni Cristo sa pagtao kan pantubos puwedeng gamiton na ebidensia na sa mga mata nin Dios sia dai nadigtaan kan kasalan nin iba kundi na sia mahalaga ki Jehova asin nagdadanay sa saiyang pagkamoot.​—Ikomparar an Marcos 7:​18-23; 1 Juan 4:16.

19. Taano ta dai niato maninigong laoman na an gabos na pakikiasosyar sa satong mga tugang na lalaki asin babae magigin nakapakokosog, alagad ano an maninigong magin desisyon niato?

¹⁹ Iyo, ano man an tibaad situwasyon sa buhay nin sarong indibiduwal, ano man na makolog na mga kamugtakan an tibaad nagpadiklom sa saiyang nakaagi, maninigo siang makanompong nin pagpakosog sa kongregasyon kan banwaan ni Jehova. Asin talagang mapapakosog sia kun bilang indibiduwal kita naghihingoang konsideraron an lambang saro, dagkahon an lambang saro, asin pakosogon an lambang saro kun kita nagtotorotiripon. Alagad huling bakong sangkap, kita gabos dai nakakagibo kaiyan kun beses. Dai nalilikayan na nakapadidisganar kita sa lambang saro asin sa panapanahon nakakokolog pa ngani sa lambang saro. Hingoahon na dai magkonsentrar sa mga pagkukulang nin iba manongod sa bagay na ini. Kun makonsentrar kamo sa mga pagkukulang, namemeligro kamong magin labi-labi kamapagtatsar sa kongregasyon asin puwede pa nganing maholog sa mismong siod na galaga si Pablo na tabangan kitang malikayan, arin na baga, an pagpabaya sa satong pagtorotiripon. Nungka man logod na mangyari iyan! Mantang an daan na palakaw na ini nagigin orog na peligroso asin maringis, magin kita marigon na determinadong gibohon an satong makakaya na gibohon na nakapakokosog an satong pakikiasosyar sa mga pagtiripon​—asin lalo na ta naheheling niato na an aldaw ni Jehova harani na!

[Nota sa Ibaba]

Ano an Saindong Simbag?

◻ Taano ta mahalaga na an satong mga pagtiripon asin pakikiasosyar magin nakapakokosog sa huring mga aldaw na ini?

◻ Ano an boot sabihon kan konsideraron an lambang saro?

◻ Ano an boot sabihon kan dagkahon an lambang saro?

◻ Ano an kalabot sa pagpakosog sa lambang saro?

◻ Paano puwedeng mapakosog an mga may makuring kamondoan asin nanluluya an boot?

[Retrato sa pahina 16]

An pagkamapagpasakat tinatabangan kitang orog na magkamiridbidan

[Retrato sa pahina 18]

Kan makuri an kamondoan ni Elias, may kabootan na rinanga sia ni Jehova