“Nahiling” Ninda an mga Panuga

 1. Paano kita makikinabang sa abilidad tang maimahinar an mga bagay na dai ta nahihiling? (Hilingon an ritrato sa itaas.)

SARONG regalo hali sa Diyos an abilidad ta na maimahinar an mga bagay na dai ta nahihiling. Huli kaiyan, nakakagibo kita nin madunong na mga plano asin naaantisipar ta an magagayon na mangyayari sa maabot. Kaya ni Jehova na aramon an mga mangyayari sa maabot. Sa parati, patiinot na niyang sinasabi sa sato sa Kasuratan kun ano an mangyayari, asin kaya tang imahinaron an mga iyan. Sa katunayan, an abilidad niyato na maimahinar an mga bagay na dai nahihiling nakakatabang sa sato na magkaigwa nin pagtubod.​—2 Cor. 4:18.

2, 3. (a) Taano ta mahalaga na may basehan an satong mga iniimahinar? (b) Anong mga hapot an pag-uulayan ta sa artikulong ini?

² Iyo, kun minsan may mga bagay kitang iniimahinar na bakong basado sa kun ano an totoo. Halimbawa, sarong pantasya sana kun iniimahinar nin sarong aking babayi na nakasakay siya sa sarong kulibangbang (butterfly). Pero kan iniimahinar ni Hana an mangyayari pag dinara na niya an saiyang aking si Samuel sa tabernakulo tanganing maglingkod duman, may basehan siya para isipon iyan. Basado iyan sa napagdesisyunan na niyang gibuhon, asin nakatabang iyan sa saiya na makapagpokus sa plano niya. (1 Sam. 1:22) Kun iniimahinar ta an mga ipinanuga nin Diyos na gigibuhon niya, iniisip ta an mga bagay na talagang mangyayari.​—2 Ped. 1:19-21.

³ Sigurado kita na dakul na maimbod na karakter sa Bibliya an inimahinar an mga ipinanuga nin Diyos. Paano sinda nakinabang sa pag-imahinar kan mga bendisyon na itatao sa sainda? Asin paano kita makikinabang pag iniimahinar ta man an magagayon na bagay na ipinanuga nin Diyos sa masinunod na katawuhan?

 4. Ano an basehan ni Abel kan imahinaron niya an mangyayari sa maabot?

⁴ “Nahiling” daw kan inot na tawong maimbod na si Abel an arin man sa ipinanuga ni Jehova? Dai ta masasabi kun patiinot nang aram ni Abel kun paano mauutob an sinabi nin Diyos sa halas: “Pag-iiwalon taka asin an babayi saka an saimong banhi asin an saiyang banhi. Rurunuton niya an saimong payo, asin lulugadon mo siya sa buol.” (Gen. 3:14, 15, NW) Pero, posibleng inisip-isip ni Abel an panugang iyan asin nasabutan niya na may saro na ‘lulugadon sa buol’ tanganing maibalik an pagigin perpekto kan mga tawo, arog ni Adan asin Eva kaidtong bago sinda magkasala. Ano man an inimahinar ni Abel manungod sa mangyayari sa maabot, ibinasar niya sa panuga nin Diyos an saiyang pagtubod, kaya inako ni Jehova an saiyang atang.​—Basahon an Genesis 4:3-5; Hebreo 11:4.

 5. Taano ta puwedeng nakapakusog ki Enoc an pag-imahinar kan mangyayari sa maabot?

⁵ Nagtubod sa Diyos an maimbod na si Enoc dawa napapalibutan siya nin mga tawong nagtataram nin labi-labi karaot na bagay tumang sa Diyos. Pinasabngan si Enoc na maghula na si Jehova maabot “kaibanan an saiyang manampulong ribong banal na anghel, tanganing maghukom tumang sa gabos, asin tanganing patunayan na nagkasala an gabos na bakong diyosnon mapadapit sa gabos nindang bakong diyosnon na gibo na saindang ginibo sa bakong diyosnon na paagi, asin mapadapit sa gabos na labi-labi karaot na bagay na itinaram kan bakong diyosnon na mga parakasala tumang sa saiya.” (Jud. 14, 15, NW) Huling igwa nin pagtubod si Enoc, posibleng inimahinar niya an sarong kinaban na mayo nang karatan.​—Basahon an Hebreo 11:5, 6.

 6. Pagkatapos kan Baha, ano an tibaad inisip-isip ni Noe?

⁶ Nakaligtas si Noe sa Delubyo huli sa saiyang pagtubod. (Heb. 11:7) Pagkatapos kan Baha, pinahiro siya kan saiyang pagtubod na mag-atang nin mga hayop. (Gen. 8:20) Arog ni Abel, daing duda na nagtubod siya na maabot an panahon na mapapatalingkas an katawuhan sa pagkauripon sa kasalan asin kagadanan. Pagkatapos kan Baha, nagin maraot giraray an kinaban asin namahala si Nimrod na sarong paratumang ki Jehova, pero nagdanay na may pagtubod asin paglaom si Noe. (Gen. 10:8-12) Posibleng marhay na napakusog siya kan iniisip-isip niya an panahon na an katawuhan mapapatalingkas na sa mapang-aping pamamahala, minanang kasalan, asin kagadanan. Puwede man niyatong “mahiling” an magayunon na panahon na iyan, na talagang madali nang mangyari!​—Roma 6:23.

 7. Anong mangyayari sa maabot an posibleng “nahiling” ni Abraham, Isaac, asin Jacob?

⁷ Posibleng inimahinar ni Abraham, Isaac, asin Jacob an sarong magayunon na puturo huling ipinanuga nin Diyos sa sainda na paagi sa saindang banhi, magkakamit nin bendisyon an gabos na nasyon sa daga. (Gen. 22:18; 26:4; 28:14) Madakul an mga magikan sa mga patriyarkang iyan asin maistar sinda sa Dagang Panuga na itatao nin Diyos. (Gen. 15:5-7) Huli sa pagtubod, garo man sana “nahihiling” kan may takot sa Diyos na mga lalaking ini na nakaistar na an saindang mga makuapo sa dagang iyan. An totoo, puon kan mawara an pagigin perpekto kan tawo, siniyerto ni Jehova sa saiyang maimbod na mga lingkod na ibabalik niya man giraray an mga bendisyon na naiwara ni Adan.

 8. Ano an nakatabang ki Abraham na magpahiling nin pambihirang pagtubod?

⁸ Posibleng marhay na nakatabang ki Abraham na magpahiling nin pambihirang pagtubod an abilidad na maimahinar an mga ipinanuga nin Diyos. Sinasabi kan Kasuratan na dawa ngani si Abraham asin an iba pang maimbod na lingkod nin Diyos ‘dai nagkamit kan mga panuga’ kan nabubuhay pa sinda, ‘natanaw ninda iyan sa harayo’ asin maugmang linauman iyan. (Basahon an Hebreo 11:8-13.) Dakul an basehan ni Abraham na magtubod na mauutob an gabos na ipinanuga ni Jehova kaya garo man sana nahihiling niya an mga bagay na dai man niya talaga nahihiling!

 9. Paano nakinabang si Abraham sa pagtubod sa mga panuga nin Diyos?

⁹ An pagtubod ni Abraham sa mga panuga nin Diyos nagpakusog sa determinasyon niya na gibuhon an kabutan nin Diyos. Huli sa pagtubod, naghali siya sa siyudad nin Ur asin dai nagmawot na mamirmihan sa arin man na siyudad nin Canaan. Arog kan Ur, aram niya na an mga siyudad na ini dai magdadanay huling an mga namamahala diyan dai naglilingkod ki Jehova. (Jos. 24:2) Sa bilog na buhay ni Abraham, “hinahalat niya an siyudad na may tunay na mga pundasyon, na an nagdisenyo asin nagtugdok iyo an Diyos.” (Heb. 11:10, NW) “Nahiling” ni Abraham an saiyang sadiri na nakaistar sa sarong permanenteng lugar na pinamamahalaan ni Jehova. Si Abel, Enoc, Noe, Abraham, asin an iba pang arog ninda nagtubod na bubuhayon liwat an mga gadan asin naglaom sinda na mabuhay digdi sa daga sa irarom kan pamamahala kan Kahadian nin Diyos, “an siyudad na may tunay na mga pundasyon.” An hararom na pag-isip-isip dapit sa mga bendisyon na iyan, nagpakusog sa saindang pagtubod ki Jehova.​—Basahon an Hebreo 11:15, 16.

10. Paano posibleng nakinabang si Sara sa pag-imahinar niya kan mangyayari sa maabot?

¹⁰ Isipon si Sara, an agom ni Abraham. Dawa 90 anyos na siya asin dai pa nagkakaaki, napagdanay niya an saiyang pagtubod huling linauman niya an panahon na magkakaaki siya. Garo man sana nahiling niya an saiyang mga gikan na nakakamtan na an mga bendisyon na ipinanuga ni Jehova. (Heb. 11:11, 12) Taano ta nagkaigwa siya nin arog kaiyan na paglaom? Huli ta sinabi ni Jehova sa agom niya: ‘Bebendisyunan ko [si Sara], asin tatawan taka saiya nin aki, asin ta magigin siyang ina nin mga nasyon; gigikanan siya nin mga hadi nin mga banwaan.’ (Gen. 17:16) Kan ipangaki ni Sara si Isaac, nagin basehan niya ini tanganing imahinaron an kautuban kan iba pang panuga nin Diyos ki Abraham. Dakulang regalo nanggad sa sato an abilidad tang maimahinar an mga ipinanuga nin Diyos, na siguradong mangyayari!

11, 12. Paano napatalubo ni Moises an pagkamuot ki Jehova?

¹¹ Si Moises an saro pa sa mga nagpahiling nin pagtubod ki Jehova. Asin namutan niya si Jehova nin urog sa gabos. Mantang kabilang kaidto an hoben na si Moises sa maharlikang pamilya nin Ehipto, dai harayong mangyari na magkaigwa siya nin pagkamuot sa kapangyarihan asin kayamanan. Pero malinaw na nanudan ni Moises sa saiyang tunay na mga magurang an dapit ki Jehova asin sa katuyuhan Niya na patalingkason sa pagkauripon an mga Hebreo asin itao sa sainda an Dagang Panuga. (Gen. 13:14, 15; Ex. 2:5-10) Kun parating iniisip-isip ni Moises an mga bendisyon na naghahalat sa banwaan nin Diyos, arin sa paghuna mo an matalubo sa puso niya​—pagkamuot sa kapangyarihan asin kayamanan o pagkamuot ki Jehova?

¹² Sinasabi sa sato kan Kasuratan: “Huli sa pagtubod si Moises, kan dakula na, nagsayuma na apudon na aki kan aking babayi ni Faraon, na pinagmarahay pa na maapi kaibanan kan banwaan nin Diyos kisa magkamit kan temporaryong pag-ugma sa kasalan, huli ta an katuyawan bilang Linahidan ibinilang niya na mas dakulang kayamanan kisa sa mga kayamanan kan Ehipto; huli ta siya nakaturuhok na marhay sa itataong balos.”​—Heb. 11:24-26, NW.

13. Paano nakinabang si Moises sa hararom na pag-isip-isip sa mga panuga nin Diyos?

¹³ Mantang iniisip-isip ni Moises an ipinanuga ni Jehova sa mga Israelita, mas nagkusog an pagtubod asin pagkamuot niya sa Diyos. Arog kan ibang mga tawo na may takot sa Diyos, posibleng inisip-isip niya an panahon na papatalingkason na ni Jehova an katawuhan sa kagadanan. (Job 14:14, 15; Heb. 11:17-19) Kaya bakong makangangalas kun taano ta napahiro si Moises na mamutan an Diyos na may pagmalasakit sa mga Hebreo asin sa bilog na katawuhan. Nakatabang ki Moises an pagtubod asin pagkamuot na padagos na maglingkod ki Jehova sa bilog niyang buhay. (Deut. 6:4, 5) Dawa tinakot ni Faraon na gagadanon niya si Moises, an pagtubod, pagkamuot sa Diyos, asin posibleng marhay, an pag-imahinar ni Moises kan magayon na mangyayari sa maabot, nakapakusog sa saiya na atubangon na may kusog nin buot an peligrong iyan.​—Ex. 10:28, 29.

14. Anong klaseng kaisipan an talagang pantasya sana?

¹⁴ Dakul na tawo ngunyan an nag-iimahinar nin mga bagay na imposibleng mangyari. Halimbawa, may mga pobre na nangangarap na magin mayaman na marhay asin mayo nang ikinakahadit, maski ngani sa totoo, an buhay nin tawo ngunyan pano nin ‘kasakitan asin kamunduan.’ (Sal. 90:10, An Marahay na Bareta Biblia) Iniimahinar ninda an saindang sadiri na namumuhay na mayong ikinakahadit sa irarom nin gobyerno nin tawo, mantang sinasabi kan Bibliya na an Kahadian nin Diyos sana an tunay na paglaom kan katawuhan. (Dan. 2:44) Iniisip nin dakul na dai man lalaglagon nin Diyos an maraot na sistemang ini nin mga bagay, pero kabaliktaran diyan an sinasabi kan Bibliya. (Sof. 1:18; 1 Juan 2:15-17) Mga pantasya sana an mga linalauman na iyan kan mga tawong binabaliwala an katuyuhan ni Jehova para sa maabot na panahon.

15. (a) Paano nakikinabang an mga Kristiyano sa pag-imahinar ninda kan saindang paglaom? (b) Magsambit nin sarong bagay na linalauman mong mangyari pag inutob na nin Diyos an saiyang mga panuga.

¹⁵ Sa ibong na lado, bilang mga Kristiyano, dinadagka kita na imahinaron an satong paglaom, sa langit man iyan o sa daga. Naiimahinar mo daw an saimong sadiri na nakakamtan na an mga panuga nin Diyos? Siguradong mauugma ka kun iisip-isipon mo an mga magigibo mo pag inutob na ni Jehova an mga panuga niya. Siguro “nahihiling” mo na nakaistar ka digdi sa daga sagkod lamang. Isipon mo na nagtatabang ka na sa iba tanganing gibuhon na paraiso an daga. Arog mo, namumutan man kan mga pagtaraid mo si Jehova. Marahay an saimong salud, mabagsik, saka mayo kang ikinakahadit. Tunay na nagmamakulog sa saimo an mga nanginginot sa pagbabalik kan Paraiso, kaya maugmahon an buhay mo. Asin nauugma ka sa paggamit kan mga talento asin kakayahan mo huling an gabos na ginigibo mo nakakatabang sa iba asin nagtataong onra sa Diyos. Halimbawa, tinatabangan mo an mga bagong buhayon liwat na mamidbid si Jehova. (Juan 17:3; Gui. 24:15) Dai, bako ining pangaturugan. An magayon na pag-imahinar na ini nakabasar sa mga katotoohan na sinasabi kan Bibliya mapadapit sa mga mangyayari sa maabot na panahon.​—Isa. 11:9; 25:8; 33:24; 35:5-7; 65:22.

16, 17. Paano kita makikinabang kun ipinapakipag-ulay ta an satong paglaom?

¹⁶ Mas maiimahinar niyato nin malinaw an satong paglaom sa maabot na panahon pag ipinapakipag-ulay ta sa ibang mga tugang an mga gusto tang gibuhon mantang inuutob na ni Jehova an saiyang mga panuga. Totoo, dai ta eksaktong aram kun ano an mangyayari sa lambang saro sa sato sa bagong kinaban, pero kun ipinapakipag-ulay ta an mga posibleng mangyari sa sato duman, napapakusog ta an lambang saro asin naipapahayag ta an satong pagtubod na magkakatotoo an ipinanuga nin Diyos. Kan magdalaw si apostol Pablo sa mga tugang sa Roma, siguradong nagpasalamat sinda sa ‘pagpapakinurusog-kusugan’ na nangyari sa sainda, na kaipuhan ta man sa masakit na mga panahon na ini.​—Roma 1:11, 12.

¹⁷ An pag-imahinar sa mga mangyayari sa maabot na panahon nakakatabang man sa sato na dai pagparaisipon an mga problema niyato ngunyan. Tibaad arog man kaiyan an nasa isip ni apostol Pedro kan sabihon niya ki Jesus: ‘Uya, binayaan mi na an gabos, asin nagsunod saimo, ano ngani an kakamtan mi?’ Tanganing tabangan si Pedro asin an iba pang yaon duman na imahinaron an mangyayari sa maabot, si Jesus nagsimbag: ‘Sa katotoohan ako nagsasabi saindo, na kamo na nagsurunod sako, sa pagbago kan gabos, kun an Aki nin tawo tumukaw na sa trono nin saiyang kamurawayan, kamo man maturukaw sa 12 trono, na maghuhukom kan 12 tribo nin Israel. Asin an siisay man na nagbaya nin mga harong, o mga tugang na lalaki, o mga tugang na babayi, o ama, o ina, o mga aki, o mga daga, dahil sa pangaran ko, maako nin mananggatos, asin magmamana kan buhay na daing katapusan.’ (Mat. 19:27-29) Kaya, puwedeng isip-isipon ni Pedro asin kan iba pang disipulo an magigin papel ninda sa gobyerno na mamamahala sa daga asin madara nin marahayon na mga bendisyon sa masinunod na katawuhan.

18. Paano kita makikinabang ngunyan kun iniisip-isip ta an kautuban kan mga panuga nin Diyos?

¹⁸ An pag-isip-isip sa kautuban kan mga panuga ni Jehova pirming nakakatabang sa mga lingkod Niya digdi sa daga. Igo na an aram ni Abel manungod sa katuyuhan nin Diyos tanganing maimahinar niya an magayon na mangyayari sa maabot na panahon, magpahiling nin pagtubod, asin maantisipar an sarong masasarigan na paglaom. Nakapahiling si Abraham nin pambihirang pagtubod huling “nahiling” niya an kautuban kan hula nin Diyos manungod sa ipinanugang “banhi.” (Gen. 3:15) Si Moises “nakaturuhok na marhay sa itataong balos,” huli kaiyan huminiro siya na may pagtubod asin kuminusog an pagkamuot niya ki Jehova. (Heb. 11:26, NW) Lugod na lalong kumusog an satong pagtubod asin pagkamuot sa Diyos mantang ginagamit ta an satong abilidad na maimahinar an kautuban kan mga panuga ni Jehova. Pag-uulayan sa masunod na artikulo kun paano ta magagamit sa pinakamarahay na paagi an regalong ini hali sa Diyos.