Si Jehova—An Satuyang Irukan

1, 2. Ano an pagmati kan mga lingkod nin Diyos sa presenteng sistema nin mga bagay, asin taano ta masasabi na sinda igwa nin irukan?

PAMUGTAK daw an buot mo sa kinaban na ini, na garo baga yaon ka sa harong? Kun dai, bako sana ika an nakakamati kaiyan! Puon pa kan suanoy, an gabos na tunay na namumuot ki Jehova nakamati na sinda garo mga estranghero, o dayuhan, sa sistemang ini nin mga bagay. Halimbawa, kan magpaburubalyo nin istaran sa Canaan, an maimbod na mga parasamba nin Diyos ‘nagpahayag sa publiko na sinda mga estranghero asin temporaryong residente.’—Heb. 11:13, NW.

² An linahidan na mga parasunod ni Jesus, na an ‘pagkasiyudadano nasa langit,’ ibinilang man an saindang sadiri na “mga dayuhan asin temporaryong residente” sa presenteng sistema nin mga bagay. (Fil. 3:20; 1 Ped. 2:11, NW) An ‘ibang mga karnero’ man ni Cristo ‘bakong sa kinaban, siring ki Jesus na bakong sa kinaban.’ (Juan 10:16; 17:16) Minsan siring, an banwaan nin Diyos talagang igwa nin harong, o irukan. Sa katunayan, protektado kita kan pinakaligtas asin pinakamamumuton na irukan na maiimahinar ta, na nahihiling paagi sa mata nin pagtubod. Si Moises nagsurat: ‘KAGURANGNAN, ika an samuyang irukan sa gabos na henerasyon.’ (Sal. 90:1, BPV)a Paano si Jehova nagin tunay na ‘irukan’ para sa maimbod na mga lingkod niya kan suanoy na mga panahon? Sa anong paagi siya tunay na ‘irukan’ para sa banwaan niya ngunyan na inaapod sa saiyang ngaran? Asin paano siya magigin an solamenteng ligtas na irukan sa maabot na panahon?

 3. Sa Salmo 90:1, ano an mahihiling niyato na pinag-uulayan, ladawan, asin pagkakaagid?

³ Arog kan dakul na ilustrasyon sa Bibliya, an Salmo 90:1 igwa nin pinag-uulayan, ladawan, asin pagkakaagid. An pinag-uulayan iyo si Jehova. An ladawan iyo an irukan, o istaran. Igwa nin dakulang pagkakaagid si Jehova sa siring na lugar. Halimbawa, si Jehova nagtatao nin proteksiyon sa saiyang banwaan. Kauyon ini kan katotoohan na siya iyo an mismong personipikasyon nin pagkamuot. (1 Juan 4:8) Siya man Diyos nin katuninungan, na ‘pinapairok sa katiwasayan’ an mga maimbod sa saiya. (Sal. 4:8, BPV) Halimbawa, isip-isipa an pagtratar niya sa maimbod na mga patriyarka, magpuon ki Abraham.

4, 5. Paano an Diyos nagin tunay na ‘irukan’ para ki Abraham?

⁴ Puwede niyatong maimahinar an namatian ni Abraham, na kaidto inaapod na Abram, kan si Jehova magsabi sa saiya: ‘Humali ka sa daga mo asin sa mga kapag-arakian mo, pasiring sa dagang itutukdo ko saimo.’ Kun si Abraham nakamati nin ano man na kahaditan, siyertong nawara iyan kan magsabi pa si Jehova: ‘Magibo ako saimo nin dakulang nasyon, asin ta bebendisyunan taka, asin papadakulaon ko an saimong ngaran. Asin ta bebendisyunan ko an mga mahihirak saimo; asin susumpaon ko an mga magsusumpa saimo.’—Gen. 12:1-3.

⁵ Paagi sa mga tataramon na idto, nanuga si Jehova na siya magigin ligtas na irukan para ki Abraham asin sa mga magikan sa saiya. (Gen. 26:1-6) Inutob ni Jehova an saiyang panuga. Halimbawa, dai niya tinugutan si Faraon kan Ehipto asin si Hading Abimelec kan Gerar na gibuhan nin maraot si Sara asin gadanon si Abraham. Prinotektaran niya si Isaac asin Rebeca sa kaparehong paagi. (Gen. 12:14-20; 20:1-14; 26:6-11) Mababasa niyato: ‘Dai nagtugot [si Jehova] na igwang mag-api sainda; an mga hadi saiyang pinatanidan huli sainda. Nagtaram siya, “Dai nindo pagdutaan an sakong mga linahidan, an sakong mga propeta dai nindo pagkulugan.”’—Sal. 105:14, 15, BPV.

 6. Ano an ipinagibo ni Isaac ki Jacob, asin ano an posibleng namatian ni Jacob?

⁶ Kabilang sa mga propetang idto an makuapo ni Abraham na si Jacob. Kan panahon na para ki Jacob na mag-agom, sinabi kan ama niyang si Isaac: ‘Dai ka mag-agom sa mga babaying taga Canaan. Lakaw, dumuman ka sa Padan-aram, sa harong ni Betuel, na ama kan saimong ina, asin ta umagom ka duman sa mga aki ni Laban.’ (Gen. 28:1, 2) Tulos-tulos na sinunod ni Jacob si Isaac. Binayaan ni Jacob an seguridad sa kaibahan kan saiyang pamilya, na nakaistar sa Canaan, tanganing magbaklay nin ginatos na kilometro, na minalataw na solo, pasiring sa Haran. (Gen. 28:10) Posibleng inisip niya: ‘Gurano kahaloy ako mawawara? Mauugma daw an sakong amaon na akuon ako asin tawan nin agom na may takot sa Diyos?’ Kun nagkaigwa si Jacob nin siring na mga kahaditan, daing duda na nawara iyan kan siya makaabot sa Luz, mga 100 na kilometro hali sa Beer-seba. Ano an nangyari sa Luz?

 7. Paagi sa pangaturugan, paano inasegurar nin Diyos si Jacob?

⁷ Sa Luz, si Jehova nagpahiling ki Jacob sa pangaturugan asin nagsabi: ‘Hilinga ta yaon ako sa saimo, asin ta babantayan taka minsan sain ka pumaduman, asin ta ibabalik taka digdi sa dagang ini; huli ta dai taka pababayaan sagkod na dai ko pa nagigibo an sakuyang sinabi sa saimo.’ (Gen. 28:15) Siyertong naasegurar asin naranga si Jacob kan mabuot na mga tataramon na iyan! Naiimahinar mo daw siya na marikas asin haralagwat na maglakaw, na gustong-gusto nang mahiling kun paano uutubon nin Diyos an Saiyang sinabi? Kun ika naghali sa saindong harong, tibaad tanganing maglingkod sa ibang nasyon, posibleng marhay na nasasabutan mo an namatian ni Jacob. Pero, daing duda na nahiling mo an ebidensiya kan pag-ataman sa saimo ni Jehova.

8, 9. Sa anong mga paagi si Jehova nagin tunay na ‘irukan’ para ki Jacob, asin ano an manunudan ta digdi?

⁸ Kan makaabot si Jacob sa Haran, maugma siyang inako kan saiyang amaon na si Laban asin paghaloy-haloy itinao sa saiya si Lea asin Raquel bilang agom. Pero, uminabot an panahon na dai nagin makatanusan si Laban, huling sampulong beses niyang liniwat an kabayadan ki Jacob! (Gen. 31:41, 42) Alagad, tinagalan ni Jacob an siring na inhustisya, na may kompiyansa na padagos siyang aatamanon ni Jehova—asin iyo man nanggad! Sa katunayan, kan pinapabalik na nin Diyos si Jacob sa Canaan, igwa na siya nin ‘dakul na hayop, uripon, kamelyo asin asno.’ (Gen. 30:43, BPV) Huli sa hararom na pag-apresyar, si Jacob namibi: ‘Bako akong maninigo kan danay mong pagkamuot asin kan pagkamaimbod na ipinahiling mo sako, na saimong uripon. Binalyo ko an Jordan na sugkod sana an dara alagad ngunyan nagbalik ako na may kaiba nang duwang grupo.’—Gen. 32:10, BPV.

⁹ Iyo, totoo nanggad an pamibi ni Moises: ‘KAGURANGNAN, ika an samuyang irukan sa gabos na henerasyon’! (Sal. 90:1, BPV) An mga tataramon na iyan totoo man sa ngunyan, huling si Jehova, na ‘dai nin pagliwat-liwat,’ nagpapadagos bilang mamumuton asin ligtas na irukan para sa mga maimbod sa saiya. (Sant. 1:17) Pag-ulayan ta kun paano.

10. Taano ta makakasiguro kita na si Jehova danay na magigin ligtas na irukan para sa saiyang mga lingkod?

¹⁰ Imahinara ini: Nagtetestigo ka sa korte laban sa sarong internasyonal na organisasyon nin mga kriminal. An lider kaiyan grabe katuso, makapangyarihan, asin daing hirak na putikon saka paragadan. Ano an mamamatian mo pagluwas mo sa korte pagkatapos kan aldaw na iyan? Ligtas? Dai nanggad! Iyo, igwa ka nin marahay na rason na maghagad nin proteksiyon. Iniilustrar kan senaryong ini an situwasyon kan mga lingkod ni Jehova, na pusuan na nagpapatotoo para ki Jehova asin daing takot na ibinubuyagyag an saiyang maringis na panginot na kaiwal, si Satanas! (Basahon an Kapahayagan 12:17.) Pero, napasilensiyo daw ni Satanas an banwaan nin Diyos? Dai! Sa katunayan, kita padagos na nag-uuswag sa espirituwal—sarong katotoohan na saro sana an eksplikasyon: Si Jehova pa man giraray an satong pailihan, an tunay na ‘irukan’ niyato, nangurugna sa huring mga aldaw na ini. (Basahon an Isaias 54:14, 17.) Minsan siring, si Jehova dai magigin ligtas na irukan para sa sato kun tutugutan ta si Satanas na akiton kita parayo sa satong irukan.

11. Anong leksiyon an manunudan ta sa mga patriyarka?

¹¹ May saro pa kitang manunudan sa mga patriyarka. Dawa ngani sinda nakaistar sa Canaan, nagdanay sindang siblag sa mga tawo sa dagang iyan, na an maraot saka imoral na pamumuhay ikinaungis ninda. (Gen. 27:46) Sinda mga lalaking may prinsipyo na dai nangangaipo nin halabang listahan nin mga susundon na magiya sa sainda. An aram ninda manungod ki Jehova asin sa saiyang personalidad igo na sa sainda. Huling siya an saindang irukan, habo nindang rumani sa kinaban sagkod sa punto na sa hiling ninda puwedeng gibuhon. Imbes, nagdanay sindang harayo diyan sagkod sa mapupuwede. Marahayon nanggad na halimbawa an itinao ninda sa sato! Nagmamaigot ka daw na arugon an maimbod na mga patriyarka kun dapit sa pagpili nin kairiba asin aling-alingan? Makamumundo, mahihiling sa nagkapira sa laog kan Kristiyanong kongregasyon na medyo pamugtak an buot ninda sa kinaban ni Satanas. Kun nakakamati ka nin siring, dawa kadikit, ipamibi an bagay na iyan. Girumdumon na an kinaban na ini ki Satanas. Mahihiling diyan an kawaran nin pagmalasakit asin pagkamakasadiri niya.—2 Cor. 4:4; Efe. 2:1, 2.

12. (a) Paano si Jehova nagtatao nin probisyon sa saiyang mga lingkod? (b) Ano an sabuot mo sa mga probisyon na ini?

¹² Tanganing malabanan an mga pakana ni Satanas, kaipuhan tang lubos na aprobetsaran an espirituwal na mga probisyon ni Jehova para sa may pagtubod na mga lingkod niya, na ginigibo siyang irukan. Kaiba sa mga probisyon na ini an Kristiyanong mga pagtiripon, pampamilyang pagsamba, asin “balaog” na mga lalaki—mga pastor na ninombrahan nin Diyos tanganing rangahon asin tabangan kita mantang inaatubang niyato an mga problema sa buhay. (Efe. 4:8-12) Si Brother George Gangas, na miyembro kan Namamahalang Grupo sa laog nin dakul na taon, nagsurat: “Kun ako nasa kaibahan [kan banwaan nin Diyos], pagmati ko nasa harong ako kaiba kan sakong pamilya, sa espirituwal na paraiso.” Arog man daw kaiyan an namamatian mo?

13. Anong mahalagang leksiyon an manunudan ta sa Hebreo 11:13?

¹³ An saro pang kuwalidad kan mga patriyarka na maninigo tang arugon iyo an saindang pagigin andam na mapalain sa mga tawong nakapalibot sa sainda. Arog kan sinambit sa parapo 1, sinda ‘nagpahayag sa publiko na sinda mga estranghero asin temporaryong residente sa daga.’ (Heb. 11:13, NW) Determinado ka daw na mapalain? Totoo, an paggibo kaiyan bakong pirming pasil. Pero, sa tabang nin Diyos asin sa suporta kan mga kapwa mo Kristiyano, magigibo mo iyan. Girumdumon na dai ka nagsosolo. An gabos na gustong maglingkod ki Jehova kaipuhan na makipaglaban! (Efe. 6:12) Pero, kaya tang manggana sa laban na iyan kun nagtitiwala kita ki Jehova asin ginigibo ta siya na satong ligtas na irukan.

14. Anong “siyudad” an hinalat kan mga lingkod ni Jehova?

¹⁴ Importante man ini: Arugon si Abraham paagi sa pagpapadanay kan saimong mata na nakaturuhok sa premyo. (2 Cor. 4:18) Si apostol Pablo nagsurat na si Abraham ‘naghahalat sa siyudad na may tunay na mga pundasyon, na an paratugdok asin kaggibo kan siyudad na iyan iyo an Diyos.’ (Heb. 11:10, NW) An “siyudad” na iyan iyo an Mesiyanikong Kahadian. Siyempre, kinaipuhan ni Abraham na halaton an “siyudad” na iyan. Pero kita masasabing dai na. Namamahala na iyan sa langit. Saro pa, dakul na ebidensiya an nagpapatunay na dai na mahahaloy, iyan lubos nang mamamahala sa daga. Tunay daw sa saimo an Kahadian na iyan? May epekto daw iyan sa pananaw mo sa buhay, sa pagmansay mo sa presenteng kinaban, asin sa mga priyoridad mo?—Basahon an 2 Pedro 3:11, 12.

15. Anong puturo an naghahalat sa mga nagtitiwala sa presenteng kinaban?

¹⁵ Mantang nagrarani an katapusan kan kinaban ni Satanas, magrabe an ‘mga kasakitan.’ (Mat. 24:7, 8) Siyertong magrabe pa an situwasyon pag-abot kan dakulang kahurasaan. Mabaragsak an mga imprastraktura, asin an mga tawo magkakatarakot na magadan. (Hab. 3:16, 17) Sa grabeng pagkadesperado, sinda mapaili, sabi ngani, ‘sa mga lungib asin sa mga gapo nin kabukidan.’ (Kap. 6:15-17) Pero dawa an literal na lungib o arog-bukid na politikal asin komersiyal na mga organisasyon dai makakatao nin ano man na proteksiyon.

16. Paano niyato maninigong mansayon an Kristiyanong kongregasyon, asin taano?

¹⁶ Minsan siring, an banwaan ni Jehova padagos na magigin ligtas sa saindang tunay na ‘irukan,’ si Jehova Diyos. Arog ni propeta Habacuc, sinda ‘mag-uugma ki Jehova.’ Sinda ‘maggagaya-gaya sa Diyos nin saindang kaligtasan.’ (Hab. 3:18) Sa anong mga paagi si Jehova magigin tunay na ‘irukan’ sa panahon na iyan nin grabeng kasakitan? Kaipuhan kitang maghalat tanganing mahiling ta. Pero makakasiyerto kita sa bagay na ini: Arog kan mga Israelita durante kan lagduan na pagharali sa Ehipto, an “dakulang kadaklan” magdadanay na organisado, pirming alistong sumunod sa instruksiyon nin Diyos. (Kap. 7:9; basahon an Exodo 13:18.)b An instruksiyon na iyan itatao sa teokratikong paagi, posibleng paagi sa kongregasyon. Sa katunayan, minalataw na an rinibong kongregasyon sa bilog na kinaban konektado sa nagpoprotektar na ‘panglaog na mga kuwarto’ na ihinula sa Isaias 26:20. (Basahon.)c Pinapahalagahan mo daw an mga pagtiripon kan kongregasyon? Tulos-tulos ka daw na minahiro sigun sa instruksiyon na itinatao ni Jehova paagi sa kongregasyon?—Heb. 13:17.

17. Paano masasabi na si Jehova tunay na ‘irukan’ dawa sa saiyang maimbod na mga lingkod na nagadan na?

¹⁷ Dawa an mga maimbod na tibaad magadan bago pa an dakulang kahurasaan magdadanay na ligtas ki Jehova, an saindang tunay na ‘irukan.’ Paano man? Pakalihis nin halawig na panahon pagkagadan kan maimbod na mga patriyarka, si Jehova nagsabi ki Moises: ‘Ako an Diyos ni Abraham, an Diyos ni Isaac, asin an Diyos ni Jacob.’ (Ex. 3:6) Pagkatapos na kutaron an mga tataramon na iyan, sinabi ni Jesus: “Siya Diyos, bakong kan mga gadan, kundi kan mga buhay, huli ta sinda gabos buhay para sa saiya.” (Luc. 20:38, NW) Iyo, para ki Jehova, an mga lingkod niya na nagadan na maimbod sa saiya garo man sana buhay; an saindang pagkabuhay liwat sigurado.—Par. 7:1.

18. Sa bagong kinaban, paano si Jehova magigin tunay na ‘irukan’ para sa saiyang banwaan sa espesyal na paagi?

¹⁸ Sa bagong kinaban na haranihon na, si Jehova magigin tunay na ‘irukan’ para sa saiyang banwaan sa saro pang paagi. An Kapahayagan 21:3 nagsasabi: ‘Uya, an tabernakulo nin Diyos nasa mga tawo, asin siya mag-iirok sa kaibahan ninda.’ Sa primero, si Jehova mag-iirok sa kaibahan kan saiyang daganon na mga sakop paagi ki Cristo Jesus bilang representante niya. Sa katapusan kan sangribong taon, itatao ni Jesus sa saiyang Ama an Kahadian pagkatapos na lubos na mautob an katuyuhan nin Diyos para sa daga. (1 Cor. 15:28) Sa panahon na iyan, dai na kakaipuhanon kan perpekto nang katawuhan si Jesus bilang parapangultanan; si Jehova mapapasa kaibahan ninda. Marahayon nanggad na paglaom an naghahalat sa sato! Miyentras tanto, magmaigot kita na arugon an maimbod na mga henerasyon kan suanoy—gibuhon si Jehova na satong tunay na ‘irukan.’