Kaya Nindong Magtagal Sagkod sa Katapusan

“Dumalagan kita na may pakatagal sa paorumbasan na nasa atubangan ta.”—HEBREO 12:1.

1, 2. Ano an boot sabihon kan magtagal?

“KAIPUHAN nindo an pakatagal,” an isinurat ni apostol Pablo sa mga Kristianong Hebreo kan enot na siglo. (Hebreo 10:36) Idinodoon an importansia kan kualidad na ini, si apostol Pedro nagsadol man sa mga Kristiano: “Idagdag sa saindong pagtubod . . . an pakatagal.” (2 Pedro 1:5, 6) Alagad ano man nanggad an pakatagal?

² An sarong leksiko na Griego-Ingles tinatawan nin kahulogan an berbo sa Griego para sa “magtagal” na “magdanay imbes na dumulag . . . tumindog nin marigon, dai sumuko.” Mapadapit sa nombre sa Griego para sa “pakatagal,” an sarong reperensia nagsasabi: “Iyan an espiritu na kayang tioson an mga bagay, bakong sa pagsuko sana, kundi may malaad na paglaom . . . Iyan an kualidad na nagpapahiro sa tawo na magdanay na tindog paatubang sa doros. Iyan an marahay na ugale na kayang liwaton an pinakamasakit na pagbalo na magin kamurawayan ta sa ibong kan kolog natatanaw kaiyan an pasohan.” Kun siring, an pakatagal nagpapangyari sa saro na makatindog nin marigon sa atubangan nin mga balakid asin kasakitan asin dai mawaran nin paglaom. Siisay nangorogna an nangangaipo kan kualidad na ini?

3, 4 (a) Siisay an nangangaipo nin pakatagal? (b) Taano ta dapat kitang magtagal sagkod sa katapusan?

³ An gabos na Kristiano sa piguratibong paagi yaon sa sarong paorumbasan na nagkakaipo nin pakatagal. Kan mga taon 65 C.E., isinurat ni apostol Pablo sa saiyang kapwa trabahador asin fiel na kaibaiba sa pagbiahe na si Timoteo an nag-aasegurar liwat na mga tataramon na ini: “Nakipaglaban ako kan marahay na pakilaban, natapos ko an paorumbasan, naingatan ko an pagtubod.” (2 Timoteo 4:7) Sa pagsabing “natapos ko an paorumbasan,” ibinabaing ni Pablo an saiyang buhay bilang Kristiano sa sarong paorumbasan, na may itinalagang direksion asin sagkodan. Kan panahon na idto, si Pablo mapangganang padangadang na sa katapusan kan paorumbasan, asin kompiadong inaantisipar nia an pag-ako kan balos. “Poon ngonyan,” an padagos niang sinabi, “igwa na nin nakatagama para sa sako na korona nin katanosan, na itatao sa sako kan Kagurangnan, an matanos na hokom, bilang balos sa aldaw na iyan.” (2 Timoteo 4:8) Segurado si Pablo na kakamtan nia an balos ta nagtagal sia sagkod sa katapusan. Kumusta man kita?

⁴ Tanganing parigonon an boot kan mga nag-entra sa paorumbasan, si Pablo nagsurat: “Dumalagan kita na may pakatagal sa paorumbasan na nasa atubangan ta.” (Hebreo 12:1) Bilang mga Kristiano, minalaog kita sa paorumbasan na ini nin pakatagal kun idinudusay ta an satong sadiri ki Jehova Dios paagi ki Jesu-Cristo. Importante an marahay na pagpopoon sa dalan nin pagigin disipulo, alagad an mahalaga sa katapustapusi iyo an matapos niato an dalagan. Si Jesus nagsabi: “An makatagal sagkod sa katapusan iyo an maliligtas.” (Mateo 24:13) Buhay na daing katapusan an premyong naghahalat sa mga mapangganang makatatapos sa paorumbasan! Huli kaini, mantang may pasohan na nasa isip, dapat kitang magtagal sagkod sa katapusan. Ano an matabang sa sato na maabot an pasohan na iyan?

Tamang Pagkakan—Kaipuhan Nanggad

5, 6. (a) Tanganing makatagal sa paorumbasan para sa buhay, ano an dapat niatong tawan nin atension? (b) Anong espirituwal na mga probisyon an dapat niatong aprobetsaran, asin taano?

⁵ Harani sa siudad nin Corinto, Grecia, yaon an lugar na ginigibohan kan bantog na Karawat sa Istmus kan suanoy na mga panahon. Daing duda na aram ni Pablo na an mga tugang sa Corinto pamilyar sa atletikong mga kontest asin iba pang kompetisyon na ginigibo duman. Ginagamit an aram na ninda, ipinagirumdom nia sa sainda an paorumbasan para sa buhay na dian kabtang sinda: “Dai kamo nakakaaram na an mga paradalagan sa paorumbasan gabos nagdadalagan, alagad ta saro sana an nag-aako kan premyo? Dumalagan kamo sa paagi na kamtan nindo iyan.” Idinoon ni Pablo an importansia nin pagdadanay sa paorumbasan asin paghingoang magpadagos sagkod na matapos. Alagad ano an matabang sa sainda na magibo iyan? “An gabos na nakikipagdaogan sa karawat mapagpogol sa gabos na bagay,” an sinabi pa nia. Iyo, an mga partisipante sa suanoy na karawat nag-agi nin masakit na pagsasanay, nag-ingat na marhay sa saindang kinakakan asin iniinom, asin nagkontrol sa gabos nindang aktibidad tanganing manggana.—1 Corinto 9:24, 25.

⁶ Kumusta man an paorumbasan na linaogan kan mga Kristiano? “Kaipuhan nindong tawan nin atension an saindong espirituwal na kinakakan tanganing makatagal kamo sa paorumbasan para sa buhay,” an sabi nin sarong magurang sa kongregasyon kan Mga Saksi ni Jehova. Horophoropa an espirituwal na kakanon na itinatao sa sato ni Jehova, “an Dios . . . na nagtatao nin pakatagal.” (Roma 15:5) An satong pangenot na pinagkukuanan nin espirituwal na pagkakan iyo an saiyang Tataramon, an Biblia. Bako daw na maninigo kitang magpadanay nin marahay na iskedyul nin pagbasa sa Biblia? Paagi sa “fiel asin madonong na oripon,” itinao man ni Jehova an napapanahon na mga babasahon na An Torrengbantayan asin Awake! patin iba pang publikasyon na basado sa Biblia. (Mateo 24:45) An mahigos na pagbasa kaini magpaparigon sa sato sa espirituwal. Iyo, kaipuhan niatong tumao nin panahon—‘tuboson an angay na panahon’—para sa personal na pag-adal.—Efeso 5:16.

 7. (a) Taano ta dai kita maninigong manigoan sa pakaaram sana kan pundamental na Kristianong mga doktrina? (b) Paano kita ‘makapapadagos sa pagkamaygurang’?

⁷ Tanganing magdanay sa dalan nin Kristianong pagigin disipulo, kaipuhan kitang lumampas pa sa pundamental na “enot na katokdoan” asin ‘magpadagos sa pagkamaygurang.’ (Hebreo 6:1) Kaya kaipuhan kitang magpatalubo nin interes sa “lakbang asin laba asin langkaw patin rarom” kan katotoohan asin kumakan kan “matagas na kakanon [na] para sa mga maygurang.” (Efeso 3:18; Hebreo 5:12-14) Helinga, halimbawa, an apat na masasarigan na pagkasaysay kan buhay ni Jesus digdi sa daga—an Ebanghelyo ni Mateo, Marcos, Lucas, asin Juan. Paagi sa maingat na pag-adal sa mga rekord na ini kan Ebanghelyo, bako sanang maaaraman niato an mga ginibo ni Jesus asin kun anong klaseng tawo sia kundi mamamansayan man niato an kaisipan na nagmotibar sa saiyang mga ginibo. Kun siring kita ‘magkakaigwa kan kaisipan ni Cristo.’—1 Corinto 2:16.

 8. Paano kita tinatabangan kan Kristianong mga pagtiripon na makatagal sa paorumbasan para sa buhay?

⁸ Sinadol ni Pablo an mga kapagtubod: “Konsideraron niato an lambang saro tanganing mandagka sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magparinigonan nin boot, asin lalo na ta naheheling nindo na an aldaw harani na.” (Hebreo 10:24, 25) Kanigoan na gikanan nin pamparigon sa boot an Kristianong mga pagtiripon! Asin abaa kanakarerepresko na makaibanan an mamomoton na mga tugang na lalaki asin babae na interesado sa sato asin boot na tabangan kitang makatagal sagkod sa katapusan! Dai niato puedeng ibilang na basta-basta sana an mamomoton na probisyon na ini hale ki Jehova. Paagi sa satong mahigos na personal na pag-adal asin regular na pag-atender sa pagtiripon, “magin [kitang] maygurang sa mga kapangyarihan nin pagsabot.”—1 Corinto 14:20.

Nagheheriling na Magdadagka sa Saindo

9, 10. (a) Sa anong paagi na an nagheheriling puedeng magin gikanan nin pamparigon sa boot sa sarong paorumbasan nin pakatagal? (b) Ano an ‘dakulang panganoron nin mga saksi na nakapalibot sa sato’ na nasambitan sa Hebreo 12:1?

⁹ Minsan siring, gurano man kapreparadong marhay an sarong paradalagan, may mga puedeng mangyari sa dalan na puedeng magpaluya sa saiya. “Kamo kaidto nagdadalagan nin marahay. Siisay an nag-olang sa saindo sa padagos na pagkuyog kan katotoohan?” an hapot ni Pablo. (Galacia 5:7) Minalataw na an nagkapirang Kristiano sa Galacia nagkaigwa nin maraot na kairibaiba asin, bilang resulta, naparayo an atension sa saindang pakipag-umbasan para sa buhay. Sa ibong na kampi, an pagsuportar asin pagparigon nin boot kan iba puedeng magpangyari na magin mas pasil na tagalan an paorumbasan. Arog nanggad ini sa puedeng magin epekto sa mga partisipante kan nagheheriling sa sarong karawat. Dinudugangan kan entusiastikong mga tawo an gana nin boot na nagpapadanay sa mga partisipante na motibado poon sa kapinonan sagkod na matapos. An kurahaw kan nagheheriling, na parateng may kaibang makosog na musika asin urupakan, makatatao nin dugang pang pag-enganyar sa mga partisipante na kaipuhan ninda mantang sinda paparani sa sagkodan. Tunay nanggad, an madinamayon na nagheheriling puedeng magkaigwa nin positibong impluwensia sa mga nakikipag-umbasan.

¹⁰ Sa paorumbasan para sa buhay na linaogan nin mga Kristiano, sairisay an nagheheriling? Pakatapos na saro-saroon an fiel na mga saksi ni Jehova kaidtong mga panahon bago kan mga Kristiano, na nasusurat sa ika-11 kapitulo kan Hebreo, si Pablo nagsurat: “Kaya, kun siring, huli ta napalilibotan kita nin dakulang panganoron nin mga saksi, . . . dumalagan kita na may pakatagal sa paorumbasan na nasa atubangan ta.” (Hebreo 12:1) Sa paggamit kan metaporang panganoron, dai ginamit ni Pablo an termino sa Griego na naglaladawan sa sarong malinaw an pagkapormang panganoron na may depinidong sokol asin korte. Imbes, naggamit sia nin termino na segun sa leksikograpong si W. E. Vine “nangangahulogan nin madampog, daing korteng panganoron na nakatatahob sa kalangitan.” Malinaw nanggad, nasa isip ni Pablo an sarong dakulang kaburunyogan nin mga saksi—kadakol-dakol kaya siring sinda sa panganoron.

11, 12. (a) Paano kita garo baga makukurahawan kan fiel na mga saksi kaidtong mga panahon bago kan mga Kristiano na dumalagan sa paorumbasan na may pakatagal? (b) Paano kita mas lubos na makikinabang sa “dakulang panganoron nin mga saksi”?

¹¹ Puede daw na magin literal na nagheheriling sa presenteng aldaw an fiel na mga saksi kaidtong mga panahon bago kan mga Kristiano? Dai nanggad. Sinda gabos natotorog sa kagadanan, na naghahalat na buhayon liwat. Minsan siring, sinda man mismo mapangganang paradalagan kan buhay pa, asin an saindang halimbawa buhay na marhay sa mga pahina kan Biblia. Mantang pinag-aadalan ta an Kasuratan, an mga fiel na ini nagigin buhay sa satong isip asin garo baga makakukurahaw sa sato na taposon an paorumbasan.—Roma 15:4.a

¹² Halimbawa, kun nasusugotan kita nin kinabanon na mga oportunidad, bako daw na an paghorophorop sa kun paano sinayumahan ni Moises an mga kamurawayan nin Egipto nagmomotibar sa sato na magdanay sa pagdalagan? Kun an sarong pagbalo na napapaatubang sa sato garo baga masakit na marhay, an paggirumdom sa masakit na pagbalo na inatubang ni Abraham kan sabihan sia na idolot an saiyang aking si Isaac sierto nanggad na magpaparigon sa boot niato na dai sumuko sa kontest nin pagtubod. Kun sagkod saen kita nadadagka sa arog kaining paagi kan “dakulang panganoron” nin mga saksing ini minadepende sa kun gurano kalinaw niato sindang naheheling paagi sa satong mga mata nin pagsabot.

13. Sa anong paagi kita dinadagka kan mga Saksi ni Jehova sa presenteng panahon sa paorumbasan para sa buhay?

¹³ Napalilibotan man kita nin kadakol-dakol na Saksi ni Jehova sa presenteng mga panahon. Kanigoan karahay na mga halimbawa nin pagtubod an ipinaheling kan linahidan na mga Kristiano siring man kan mga lalaki asin babae na kabilang sa “dakulang kadaklan”! (Kapahayagan 7:9) Mababasa niato sa panapanahon an estorya kan saindang buhay sa magasin na ini asin iba pang publikasyon kan Watch Tower.b Mantang hinohorophorop niato an saindang pagtubod, naparirigon an satong boot na magtagal sagkod sa katapusan. Asin kanigoan karahay na magkaigwa kan pagsuportar kan dayupot na mga katood asin paryente na fiel man na naglilingkod ki Jehova! Iyo, kadakol kan magdadagka sa sato sa paorumbasan para sa buhay.

Madonong na Establisaron an Saindong Rikas

14, 15. (a) Taano ta importanteng madonong na establisaron an satong rikas? (b) Taano ta maninigo kitang magin makatanosan sa pagbugtak nin mga pasohan?

¹⁴ Kun nagdadalagan sa halawig na paorumbasan, arog baga nin maraton, dapat na madonong na establisaron nin paradalagan an saiyang rikas. “An pagpoon nin marikason tibaad magresulta sa pagkasudya nindo,” an sabi kan magasin na New York Runner. “An posibleng resulta magsalang halawig na kapagalan sa ultimong nagkapirang milya o pagpondo.” Natatandaan nin sarong paramaraton: “An espiker sa sarong lektura na inatenderan ko bilang preparasyon sa paorumbasan malinaw na nagpatanid: ‘Dai makipaglapagan sa mas marikas na mga paradalagan. Dumalagan sa sadiri nindong rikas. Ta kun dai mapapagal kamo asin tibaad kaipuhan na pumondo.’ An paghimate sa sadol na ini nakatabang sa sako na matapos an paorumbasan.”

¹⁵ Sa paorumbasan para sa buhay, an mga lingkod nin Dios dapat na maghingoa nin maigot. (Lucas 13:24) Minsan siring, si disipulo Santiago nagsurat: “An kadonongan hale sa itaas . . . makatanosan.” (Santiago 3:17) Minsan ngani an marahay na halimbawa kan iba puedeng makaenkaminar sa sato na gumibo nin orog pa, tatabangan kita kan pagigin makatanosan na magbugtak nin realistikong mga pasohan sono sa satong mga kakayahan asin kamugtakan. An Kasuratan nagpapagirumdom sa sato: “Patunayan nin lambang saro an saiyang gibo, dangan may dahelan na siang mag-ogma dapit sa saiya sana, asin bakong sa pagkomparar sa ibang tawo. Huli ta an lambang saro magpapasan kan saiyang sadiring pasan.”—Galacia 6:4, 5.

16. Paano kita tinatabangan kan kababaan nin boot sa pag-establisar kan satong rikas?

¹⁶ Sa Miqueas 6:8, ini an nakapupukaw nin isip na ihinahapot sa sato: “Anong balos an hinahagad sa saimo ni Jehova kundi . . . na magin hababa an boot sa paglakaw sa kaibahan kan saimong Dios?” Kabale sa kababaan nin boot an pakaaram kan satong mga limitasyon. Nalimitaran daw nin nagluluyang salud o kagurangan an satong nagigibo sa paglilingkod sa Dios? Dai manluya an satong boot. Inaako ni Jehova an satong mga paghihingoa asin pagsasakripisyo ‘sono sa kun ano an nasa sato, bakong sono sa kun ano an mayo sa sato.’—2 Corinto 8:12; ikomparar an Lucas 21:1-4.

Itorohok an Saindong mga Mata sa Premyo

17, 18. An padagos na pagtanaw sa ano nakatabang ki Jesus na matagalan an hariging pasakitan?

¹⁷ Sa pagdodoon sa mga Kristiano sa Corinto kan pangangaipong magtagal sa paorumbasan para sa buhay, sinambit ni Pablo an saro pang aspekto kan Karawat sa Istmus na maninigo nindang tawan nin atension. Mapadapit sa mga partisipante sa karawat na idto, si Pablo nagsurat: “Siempre, ngonyan sinda [nagdadalagan] tangani na sinda makakua nin koronang matutunawon, alagad kita nin bakong matutunawon. Kun siring, an paagi kan sakong pagdalagan bakong daing kasiertohan; an paagi kan sakong mga pagsuntok bakong tanganing sumuntok sa doros.” (1 Corinto 9:25, 26) An premyo sa nanggagana sa suanoy na karawat na idto sarong korona, o sinalapid na korona, na gibo sa mga dahon nin palutsina o iba pang tinanom, o pinaalang na kadlaganon na seleri pa ngani—tunay na sarong “koronang matutunawon.” Pero ano an nakatagama sa mga Kristiano na nakatatagal sagkod sa katapusan?

¹⁸ Sa pagsambit sa satong Arogan, si Jesu-Cristo, si apostol Pablo nagsurat: “Huli kan kagayagayahan na ibinugtak sa atubangan nia tinios nia an hariging pasakitan, hinamak an kasopganan, asin nagtukaw sa too kan trono nin Dios.” (Hebreo 12:2) Si Jesus nagtagal sagkod sa katapusan kan saiyang buhay bilang tawo paagi sa pagtanaw nin lihis pa sa hariging pasakitan sa saiyang balos, na kabale an kagayagayahan na yaon sa saiya sa pagkontribwir sa pagsantipikar kan ngaran ni Jehova, sa pagtubos sa pamilya nin tawo hale sa kagadanan, asin sa pamamahala bilang Hade asin Halangkaw na Saserdote mantang ibinabalik nia an makinuyog na mga tawo sa daing katapusan na buhay sa sarong paraisong daga.—Mateo 6:9, 10; 20:28; Hebreo 7:23-26.

19. Sa ano kita maninigong magtorohok mantang kita nagpapadagos sa dalan nin Kristianong pagigin disipulo?

¹⁹ Horophoropa an kagayagayahan na nasa atubangan niato mantang kita nagpapadagos sa dalan nin Kristianong pagigin disipulo. Itinao sa sato ni Jehova an nakakokontentong marhay na gibohon na paghuhulit kan maogmang bareta kan Kahadean nin Dios asin paghiras sa iba kan nagliligtas-buhay na kaaraman sa Biblia. (Mateo 28:19, 20) Kanigoan kanakaoogma na makanompong nin interesado sa tunay na Dios asin na matabangan an sarong iyan na lumaog sa paorumbasan para sa buhay! Asin ano man an reaksion kan mga tawo na hinuhulitan niato, sarong pribilehio an magkaigwa nin kabtang sa gibohon na konektado sa pagsantipikar kan ngaran ni Jehova. Kun kita nagtatagal sa ministeryo sa ibong kan pagkaindiperente o pagtumang kan mga tawo sa hinuhulitan niatong teritoryo, yaon sa sato an kagayagayahan na paogmahon an puso ni Jehova. (Talinhaga 27:11) Asin an dakulaon na balos na panuga nia sa sato buhay na daing katapusan. Kanigoan na kagayagayahan iyan! Kaipuhan kitang padagos na magtanaw sa mga bendisyon na ini asin magdanay sa paorumbasan.

Mantang Orog na Naghaharani an Katapusan

20. Paano tibaad magin mas masakit an paorumbasan para sa buhay mantang orog na naghaharani an katapusan kaiyan?

²⁰ Sa paorumbasan para sa buhay, kaipuhan kitang makilaban sa satong pangenot na kaiwal, si Satanas na Diablo. Mantang kita parani sa katapusan, sia daing ontok sa paghihingoang singkogon o paluwayon kita. (Kapahayagan 12:12, 17) Asin bakong pasil na magpadagos bilang fiel, dusay na mga parabalangibog kan Kahadean huli sa mga guerra, gutom, peste, asin gabos na iba pang kasakitan na tanda kan “panahon kan katapusan.” (Daniel 12:4; Mateo 24:3-14; Lucas 21:11; 2 Timoteo 3:1-5) Saro pa, an katapusan tibaad kun beses garo baga mas harayo pa kisa linaoman niato, partikularmente kun naglaog kita sa paorumbasan kaidto pang dakol nang dekada an nakaagi. Pero, sinisierto sa sato kan Tataramon nin Dios na madatong an katapusan. An sabi ni Jehova dai iyan mahuhuri. Natatanaw na an katapusan.—Habacuc 2:3; 2 Pedro 3:9, 10.

21. (a) Ano an maparigon sa sato mantang kita nagpapadagos sa paorumbasan para sa buhay? (b) Ano an maninigo na magin determinasyon niato mantang orog na naghaharani an katapusan?

²¹ Kun siring, tanganing magin mapanggana sa paorumbasan para sa buhay, kaipuhan kitang kumua nin kosog hale sa mamomoton na probisyon ni Jehova para sa satong espirituwal na pagkakan. Kaipuhan man niato an gabos na pagparigon sa boot na makukua niato sa regular na pakikiasosyar sa satong mga kapagtubod, na nagdadaralagan man sa paorumbasan. Dawa kun magin mas masakit an satong pakipag-umbasan huli sa grabeng pagtumang asin mga pagkanorongod, kaya niatong magtagal sagkod sa katapusan huli ta itinatao ni Jehova “an kosog na lihis sa ordinaryo.” (2 Corinto 4:7) Kanigoan kanakapakokosog liwat sa boot na maaraman na gusto ni Jehova na makatapos kita na mapanggana! May marigon na determinasyon, “dumalagan kita na may pakatagal sa paorumbasan na nasa atubangan ta,” na lubos na kompiado na “sa talaan na kapanahonan kita mag-aani kun kita dai mapagal.”—Hebreo 12:1; Galacia 6:9.

[Mga Nota sa Ibaba]

Nagigirumdoman daw Nindo?

◻ Taano ta dapat kitang magtagal sagkod sa katapusan?

◻ Anong mga probisyon ni Jehova an maninigo na dai niato pabayaan?

◻ Taano ta importante na madonong na establisaron an satong rikas?

◻ Anong kagayagayahan an nasa atubangan niato mantang kita nagpapadagos sa paorumbasan?

[Retrato sa pahina 18]

Kumua nin pamparigon sa boot sa Kristianong mga pagtiripon