Pakosogon an Saindong Pagtitiwala ki Jehova

Sarong pakana na may intension na gumadan an naponan na. An gabos na haralangkaw na opisyal kan nasyon nag-orolay asin nagkaoroyon na magproponer nin sarong bagong ley. Gusto nindang gibohon na kasalan na an padusa kagadanan para sa siisay man na magsagibo nin pagsamba na bakong aprobado kan Estado.

GARO pamilyar daw ini? An kasaysayan pano nin mga halimbawa nin mga tawo na guminamit nin pagpakana nin danyos paagi sa ley. An nasambitan sa enotan nangyari sa Imperyo nin Persia kan kaaldawan ni propeta Daniel. An ley, na talagang ginibo ni Hadeng Dario, nagsabi: ‘An siisay man na umarang nin kahagadan sa siisay man na dios o tawo sa laog nin tolong polong aldaw apuera sa hade maninigong iapon sa lungib kan mga leon.’​—Daniel 6:7-9.

Ano an gigibohon ni Daniel sa irarom kan huma nin kagadanan? Mapadagos daw sia sa pagtitiwala sa saiyang Dios, si Jehova, o sia makompromiso asin masunod sa pagboot kan hade? An rekord nagsasabi sa sato: “Si Daniel, kaidto tolos na maaraman nia na an kasuratan pinirmahan na, naglaog sa saiyang harong, asin, mantang an mga bintana sa saiyang kuarto sa bubongan bukas para sa saiya paatubang sa Jerusalem, tolong beses kada aldaw sia nagluluhod asin namimibi patin nagdodolot nin pag-omaw sa atubangan kan saiyang Dios, arog kan dayaday niang ginigibo bago kaini.” (Daniel 6:10) An iba pang kabtang kan estorya aram na marhay. Si Daniel iinapon sa lungib kan mga leon huli sa saiyang pagtubod, alagad “tinikom [ni Jehova] an ngoso nin mga leon” asin ilinigtas an saiyang maimbod na lingkod.—Hebreo 11:33; Daniel 6:16-22.

Panahon Para sa Pagsiyasat sa Sadiri

Ngonyan, an mga lingkod ni Jehova nabubuhay sa sarong bakong makikatood na kinaban, na napapaatubang sa dakol na huma sa saindang pisikal asin espirituwal na ikararahay. Halimbawa, sa mabangis na pagputok nin rasyal na pagkaongis sa nagkapirang nasyon, dakol na Saksi an nagadan. Sa iba pang lugar, napaatubang an mga lingkod ni Jehova sa kakulangan nin kakanon, kasakitan sa pagbuhay, natural na mga kalamidad, seryosong helang, asin iba pang mga kamugtakan na nagsasapeligro sa buhay. Dugang pa, kaipuhan nindang tagalan an paglamag, pangigipit sa trabaho, asin manlaenlaen na sugot na maggibo nin sala, na gabos puedeng magsapeligro kan saindang espirituwalidad. Tunay nanggad, desidido an dakulang Kaiwal, si Satanas, na gadanon an mga lingkod ni Jehova sa ano man na paagi na puedeng mag-aser.​—1 Pedro 5:8.

Kun mapaatubang sa siring na mga kamugtakan, ano an puede niatong gibohon? Mantang natural sanang makaeksperyensia nin pagkatakot kun an buhay nin saro namemeligro, puede niatong girumdomon an nakapakokosog liwat sa boot na mga tataramon ni apostol Pablo: “[Si Jehova] nagsabi: ‘Sa ano man na paagi dai taka babayaan ni sa ano man na paagi pababayaan taka.’ Tanganing magin makosog an boot niato asin magsabi: ‘Si Jehova an sakong paratabang; dai ako matatakot. Ano an magigibo nin tawo sa sako?’” (Hebreo 13:​5, 6) Makakokompiar kita na arog man kaiyan an pagmate ni Jehova sa mga lingkod nia ngonyan. Minsan siring, an pakaaram kan mga panuga ni Jehova bakong kapareho kan pagigin kombensido na sia mahiro para sa sato. Kun siring importanteng-importante na siyasaton niato an basehan kan pagtitiwala ki Jehova asin na gibohon niato an gabos na makakaya niato na pakosogon asin papagdanayon an pagtitiwala na iyan. Kun gigibohon niato iyan, “an katoninongan nin Dios na minalampas sa gabos na kaisipan mag-iingat kan [satong] puso asin kan [satong] mga pag-isip paagi ki Cristo Jesus.” (Filipos 4:7) Dangan kun talagang umabot an mga pagbalo, makakapag-isip kita nin malinaw asin maaatubang iyan sa madonong na paagi.

Basehan kan Pagtitiwala ki Jehova

Tunay nanggad na dakol kitang dahelan na magtiwala sa satong Kaglalang, si Jehova. Enot sa gabos iyo an katunayan na si Jehova sarong mamomoton na Dios na tunay na nagmamakolog sa saiyang mga lingkod. Nakarekord sa Biblia an dai mabilang na mga pangyayari na nagsasaysay kan mamomoton na pagmakolog ni Jehova sa saiyang mga lingkod. Ilinaladawan an mga ginibo ni Jehova sa saiyang piniling banwaan, an Israel, si Moises nagsurat: “Nakua nia sia sa sarong kaawagan, asin sa daing laog, nag-uungal na desierto. Pinalibotan nia sia, tanganing atamanon sia, tanganing ingatan sia siring sa tawo-tawo kan saiyang mata.” (Deuteronomio 32:10) Sa presenteng panahon, padagos na inaataman ni Jehova an saiyang mga lingkod, bilang sarong grupo sagkod bilang mga indibiduwal. Halimbawa, kan an nagkapirang Saksi nakaeksperyensia nin labi-labing kakulangan nin kakanon durante kan guerra sibil sa Bosnia, sinierto ni Jehova na sinda makaresibi nin kaipuhan na marhay na suplay paagi sa makosog an boot na paghihingoa kan saindang mga tugang hale sa Croatia asin Austria, na isinapeligro an saindang buhay tanganing magbiahe sa sobra kapeligrosong teritoryo tanganing magdara nin materyal na ayuda sa saindang mga tugang.a

Mantang si Jehova Dios an Makakamhan sa gabos, tunay nanggad na sia may kakayahan na protehiran an saiyang mga lingkod sa ano man na kamugtakan. (Isaias 33:22; Kapahayagan 4:8) Alagad dawa kun itinotogot ni Jehova an nagkapira kan saiyang lingkod na patunayan an pagigin fiel sagkod sa kagadanan, sinususteniran nia pa man giraray sinda tanganing mapagdanay ninda an saindang integridad, na pinapangyayaring magdanay sindang marigon, magayagaya, asin kalmado sagkod sa katapusan. Puede kita kun siring na magkaigwa nin kaparehong kompiansa arog kan salmista: “An Dios pailihan asin kosog para sa sato, sarong tabang na danay na makukua sa panahon nin mga kasakitan. Kaya ngani dai kita matatakot, minsan pa maliwat an daga asin minsan pa an kabukidan lumundag sa kairaroman kan mahiwas na kadagatan.”​—Salmo 46:​1, 2.

Ihinahayag man kan Biblia na si Jehova iyo an Dios nin katotoohan. Nangangahulogan ini na pirme niang inootob an saiyang mga panuga. Sa katunayan, ilinaladawan sia kan Biblia bilang sarong Dios na “dai makakapagputik.” (Tito 1:2) Mantang paorootro nang sinabi ni Jehova an saiyang pagigin andam na protehiran asin iligtas an saiyang mga lingkod, puede nanggad kitang makasierto na bako sanang kaya nia kundi andam man niang otobon an saiyang mga panuga.​—Job 42:2.

Mga Paagi Tanganing Pakosogon an Satong Pagtitiwala

Minsan ngani igwa kita kan gabos na dahelan na magtiwala ki Jehova, dai niato dapat ipamugtak na pirmeng yaon an pagtitiwala na iyan. Ini huli ta an kinaban sa pankagabsan kakadikit an pagtubod sa Dios, asin an siring na aktitud madaling makapaluya sa satong pagtitiwala ki Jehova. Kun siring, kaipuhan niatong maigot na maghingoa na pakosogon asin papagdanayon an pagtitiwalang iyan. Aram nanggad ini ni Jehova, asin nagtao sia nin mga paagi tanganing magibo niato ini.

Enot sa gabos, itinao nia an saiyang nasusurat na Tataramon, an Biblia, na nasusuratan kan balakid na makakamhan na ginibo nia para sa saiyang mga lingkod. Isip-isipa nanggad, guranong kompiansa an puede nindong itao sa sarong tawo kun an aram sana nindo iyo an ngaran nia? Kakadikit na marhay gayod, kun igwa man. Kaipuhan na maaraman nindo an saiyang mga paagi asin an saiyang mga nahaman tanganing magkaigwa nin kompiansa sa saiya, bako daw? Mantang binabasa asin hinohorophorop niato an siring na mga pagkasaysay sa Biblia, minararom an satong kaaraman dapit ki Jehova asin sa saiyang makangangalas na mga paagi, asin mas lalo pa niatong naaapresyar kun gurano sia kamapagtitiwalaan. Sa siring an satong kompiansa sa saiya napakokosog. An salmista nagpaheling nin marahayon na halimbawa kan sinabi nia sa odok na pamibi sa Dios: “Gigirumdomon ko an mga gibo ni Jah; ta gigirumdomon ko an makangangalas na ginibo mong aksion kan suanoy. Asin hohorophoropon ko nanggad an gabos mong aktibidad, asin tatawan ko nin atension an saimong mga ginibo.”—Salmo 77:11,12.

Apuera sa Biblia, igwa kita nin abundang gikanan nin espirituwal na kakanon sa mga publikasyon sa Biblia na pinoprodusir kan organisasyon ni Jehova. Kabilang sa iba pang bagay, an mga publikasyon na ini parateng may nakapupukaw sa boot na mga estorya kan mga lingkod nin Dios sa presenteng mga panahon, na ipinaheheling kun paano nakapagtao si Jehova nin tabang asin pakaginhawa kan sinda mapaatubang sa desesperadong mga kamugtakan. Halimbawa, si Martin Poetzinger, na sa huri nagin miembro kan Namamahalang Grupo kan Mga Saksi ni Jehova, nagkahelang nin grabe mantang naglilingkod bilang payunir sa sarong lugar sa Europa na harayo sa saiyang dagang tinuboan. Mayo sia nin kuarta, asin mayong doktor na gusto siang bolongon. Alagad dai sia binayaan ni Jehova. Sa katapustapusi, nakaolay an mayor na espesyalista kan lokal na ospital. Huling marigon na nagtutubod sa Biblia, inataman kan maboot na lalaking ini si Tugang na Poetzinger siring sa pag-ataman sa sadiri niang aki, na ginigibo ini na daing bayad. An pagbasa sa siring na personal na mga estorya tunay nanggad na puedeng makapakosog kan satong pagtitiwala sa satong langitnon na Ama.

An saro pang mahalagang marhay na tabang na itinatao ni Jehova tanganing pakosogon an satong pagtitiwala sa saiya iyo an mahalagang marhay na pribilehio nin pamibi. Mamomoton na sinasabi sa sato ni apostol Pablo: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan.” (Filipos 4:6) Puedeng kaiba “sa gabos na bagay” an satong mga saboot, pangangaipo, pagkatakot, asin kahaditan. Mientras na mas dayaday asin odok sa puso an satong mga pamibi, mas makosog man an satong pagtitiwala ki Jehova.

Kan si Jesu-Cristo yaon sa daga, kun beses solo sana siang minaduman sa sarong lugar na harayo sa mga tawo tanganing mamibi na daing disturbo. (Mateo 14:23; Marcos 1:35) Bago gumibo nin magabat na mga desisyon, magdamlag pa ngani siang namibi sa saiyang Ama. (Lucas 6:​12, 13) Bakong makangangalas na an pagtitiwala ni Jesus ki Jehova makosogon kaya nakaya niang tioson an pinakamakatatakot na pagbalo na inagihan nin siisay man. An saiyang huring mga tataramon sa hariging pasakitan iyo an: “Ama, sa saimong mga kamot ipinagkakatiwala ko an sakong espiritu.” An kapahayagan na iyan nin kompiansa nagpapaheling na sagkod sa katapusan an saiyang pagtitiwala sa saiyang Ama dai luminuya, dawa ngani dai nag-interbenir si Jehova tanganing iligtas sia.​—Lucas 23:46.

An saro pang paagi tanganing mapatalubo an satong pagtitiwala ki Jehova iyo an regular na pakikiasosyar sa mga nagtitiwala sa saiya nin bilog na puso. Pinagbotan ni Jehova an saiyang banwaan na magtiripon nin regular tanganing makanood nin dugang pa manongod sa saiya asin tanganing magparinigonan nin boot. (Deuteronomio 31:12; Hebreo 10:​24, 25) An siring na pakikiasosyar nagpapakosog kan saindang pagtitiwala ki Jehova, na pinapangyaring matagalan ninda an kritikal na pagbalo sa pagtubod. Sa sarong nasyon sa Aprika na prohibido an paghuhulit, an Mga Saksi ni Jehova dai tinawan nin proteksion nin pulis, mga dokumento sa pagbiahe, sertipiko sa kasal, pagbolong sa ospital, asin trabaho. Kan pumutok an guerra sibil sa sarong lugar, an 39 miembro, kaiba an mga aki, kan kaharaning kongregasyon nag-istar sa laog nin mga apat na bulan sa irarom nin sarong hababang tulay sa desierto tanganing makadulag sa pambobomba sa saindang banwaan. Sa irarom kan siring kagrabeng kasakitan, an saindang pag-orolay sa sarong teksto sa Biblia aroaldaw asin iba pang mga pagtiripon an nagtao sa sainda nin dakulang kosog. Sa siring nakaya nindang tagalan an sakit na dai naano an saindang espirituwalidad. Malinaw nanggad na ipinaheheling kan eksperyensiang ini an halaga kan regular na pagtiripon kaiba kan banwaan ni Jehova.

Sa katapustapusi, tanganing pakosogon an satong pagtitiwala ki Jehova, kaipuhan na magin aktibo kita sa paghuhulit kan Kahadean, na pirmeng andam na ihiras sa iba an maogmang bareta. Pinatunayan ini kan sarong nakapupukaw sa boot na eksperyensia nin sarong maigot na hoben na parahayag sa Canada na may ikagagadan na helang na leukemia. Sa ibong kan grabeng helang nia, gusto niang magin regular payunir, an boot sabihon, sarong bilog na panahon na ministro. Durante kan halipot na temporaryong pagrahay kan saiyang helang, nagrahay nin igo an saiyang kondisyon tanganing magamit an sarong bulan sa ministeryo bilang sarong auxiliary payunir. Dangan naggrabe an saiyang kondisyon, asin sia nagadan pakalihis nin pirang bulan. Pero, nagdanay siang makosog sa espirituwal sagkod sa katapusan, na an saiyang pagtitiwala ki Jehova nungkang nag-urong-sulong dawa sa kadikit na panahon. Nagigirumdoman kan saiyang ina: “Sagkod sa katapusan, mas inisip nia an iba kisa an sadiri nia. Ineenkaminar nia sinda na mag-adal sa Biblia, na sinasabi sa sainda, ‘Magkakairibanan kita sa Paraiso.’”

Pagpapatunay kan Satong Pagtitiwala ki Jehova

“Kun paanong an hawak na daing espiritu gadan, siring man an pagtubod na daing mga gibo gadan.” (Santiago 2:26) An sinabi ni Santiago manongod sa satong pagtubod sa Dios puede man na masabi sa satong pagtitiwala sa Saiya. Gurano man kadakol na sabihon niato na nagtitiwala kita sa Dios, iyan daing kahulogan kun dai niato pinatutunayan an pagtitiwalang iyan paagi sa satong mga gibo. Si Abraham lubos na nagtiwala ki Jehova asin pinatunayan an pagtitiwalang iyan paagi sa pagkuyog na daing pagduda sa saiyang mga pagboot, dawa sagkod sa pagigin andam na iatang an saiyang aki, si Isaac. Huli sa siring kapambihirang pagtitiwala asin pagkuyog, si Abraham namidbid bilang katood ni Jehova.​—Hebreo 11:8-10, 17-19; Santiago 2:23.

Dai na niato kaipuhan na halaton pang umabot an sarong grabeng pagbalo bago niato ipaheling an satong pagtitiwala ki Jehova. Sinabihan ni Jesus an saiyang mga disipulo: “An fiel sa kadikit fiel man sa dakol, asin an bakong matanos sa kadikit bako man na matanos sa dakol.” (Lucas 16:10) Maninigo kitang makanood na magtiwala ki Jehova sa gabos niatong aktibidad sa aroaldaw, na sinusunod sia dawa sa mga bagay na garo baga bakong gayong mahalaga. Kun naheheling niato an mga pakinabang na bunga kan siring na pagkuyog, an satong pagtitiwala sa satong langitnon na Ama napakokosog, na pinapangyaring maatubang niato an mas dakula o mas magabat na mga pagbalo.

Mantang nagrarani na an kinaban sa kapahapahamak na katapusan kaiyan, an banwaan ni Jehova seguradong makaeeksperyensia nin orog pang mga pagbalo asin peligro. (Gibo 14:22; 2 Timoteo 3:12) Paagi sa pagpatalubo nin makosog asin lubos na pagtitiwala ki Jehova ngonyan, makalalaom kitang maligtas pasiring sa ipinanuga niang bagong kinaban​—magsalang paagi sa pagkatadang buhay sa dakulang kahorasaan o paagi sa pag-ako nin pagkabuhay liwat. (2 Pedro 3:13) Nungka logod niatong togotan an ano man na kadaihan nin pagtitiwala sa kabtang niato na makaraot sa satong mahalagang marhay na relasyon ki Jehova. Dangan, an sinabi manongod ki Daniel pakatapos na sia iligtas sa lungib nin mga leon puede man na sabihon manongod sa sato: “Mayo man lamang nin lugad saiya, huli ta sia nagtiwala sa saiyang Dios.”​—Daniel 6:23.

[Nota sa Ibaba]

[Ritrato sa pahina 9]

An pagbasa sa mga estorya kan fiel na mga lingkod ni Jehova, arog ni Martin Poetzinger, nakapakokosog sa pagtubod