Si Jehova an Sakong Paratabang

“Magkaigwa kita nin kapusoan asin magsabi: ‘Si Jehova an sakong paratabang; dai ako matatakot. Ano an magigibo nin tawo sa sako?’ ”—HEBREO 13:6.

1, 2. (a) An salmista asin si apostol Pablo kapuwa nagpahayag nin anong pananarig ki Jehova? (b) Anong mga hapot an minalataw?

SI Jehova Dios an dai nasusudyang pinaghahalean nin tabang. Aram kan salmista ini hale sa eksperyensia asin kaya nakapagsabi: “Si Jehova nasa kampi ko; dai ako matatakot. Ano an magigibo sako nin daganon na tawo?” (Salmo 118:6) An kaagid na mga saboot ipinahayag ni apostol Pablo kan isinurat nia an saiyang ipinasabong na banal na surat sa Hebreong mga Kristiano.

² Maliwanag na nagkokotar sa mga tataramon kan salmista hale sa Griegong Septuagint, sinabi ni Pablo sa Hebreong mga kapagtubod: “Magkaigwa kita nin kapusoan asin magsabi: ‘Si Jehova an sakong paratabang; dai ako matatakot. Ano an magigibo nin tawo sa sako?’ ” (Hebreo 13:6) Taano ta nagsurat an apostol sa paaging ini? Asin ano an puwede niatong manodan hale sa konteksto?

Nangangaipo kan Tabang ni Jehova

 3. (a) Sa irarom nin anong mga kamugtakan napatunayan na si Jehova an Paratabang ni Pablo? (b) Taano ta an Hebreong mga Kristiano nangongorognang nangaipo ki Jehova bilang saindang Paratabang?

³ Si Pablo sarong nagsasakripisyo sa sadiring saksi na may patotoo na si Jehova an saiyang Paratabang. Tinabangan nin Dios an apostol sa atubang nin kadakol na kasakitan. Si Pablo nabilanggo, hinampak, asin ginapo. Sa mga pagbiyahe nia bilang Kristianong ministro, nakaeksperyensia siang malunod siring man nin kadakol pang ibang peligro. Aram niang gayo an kapagalan, pagkapirot, gutom, paha, asin minsan ngani kahubaan. “Laen pa sa mga bagay na nasa luwas,” an sinabi nia, “igwa nin minapurisaw sako aroaldaw, an paghadit para sa gabos na kongregasyon.” (2 Corinto 11:24-29) Nagkaigwa si Pablo nin siring na paghadit para sa Hebreong mga Kristiano. Nabibilang na an mga aldaw kan Jerusalem, asin an Judiong mga tugang na lalaki asin babae kan apostol sa Judea makakaatubang nin dakulang mga pagbalo sa pagtubod. (Daniel 9:24-27; Lucas 21:5-24) Kaya kaipuhan nanggad ninda si Jehova bilang saindang Paratabang.

 4. Anong pangenot na sadol an inatubang sa bilog na surat sa mga Hebreo?

⁴ Sa pagbukas kan saiyang surat sa Hebreong mga Kristiano, ipinaheling ni Pablo na an banal na tabang maeeksperyensiahan sana kun magdangog sinda sa Aki nin Dios, si Jesu-Cristo. (Hebreo 1:1, 2) Pinahiwas an puntong ini sa surat. Bilang halimbawa, tanganing idoon an sadol na ini, ipinagirumdom kan apostol sa saiyang mga parabasa na pinadusahan an mga Israelitas huli sa saindang kasumbikalan sa kapatagan. Dai nanggad madudulagan kan Hebreong mga Kristiano an padusa kun sayumahan ninda an sinabi nin Dios sainda paagi ki Jesus asin nagin mga apostata na nagdadanay sa Mosaikong Pagboot na hinale na paagi kan atang ni Cristo!—Hebreo 12:24-27.

An Pagkamoot sa Tugang Nasa Paghiro

 5. (a) Ano pang ibang sadol an itinao kan surat sa mga Hebreo? (b) Ano an sinabi ni Pablo manongod sa pagkamoot?

⁵ An surat sa mga Hebreo nagtao nin sadol sa may paglaom na magin mga paramana kan langitnon na Kahadean kun paano sunodon an saindang Halimbawa, si Jesu-Cristo, ‘na magtao nin banal na paglilingkod na may diosnon na pagkatakot asin paghanga,’ asin magin Paratabang ninda si Jehova. (Hebreo 12:1-4, 28, 29) Dinagka ni Pablo an mga kapagtubod na regular na magtiripon asin ‘magpasaradolsadol sa lambang saro sa pagkamoot asin sa marahay na mga gibo.’ (Hebreo 10:24, 25) Ngonyan isinadol nia: “Papagdanayon nindo an pagkamoot sa tugang.”—Hebreo 13:1.

 6. Sa anong sentido tinawan ni Jesus an saiyang mga parasunod nin “bagong togon” manongod sa pagkamoot?

⁶ Kahagadan ni Jesus an siring na pagkamoot sa saiyang mga parasunod, huli ta sinabi nia: “Tinatawan ko kamo nin bagong togon, na kamo magkaminorootmootan; siring sa pagkamoot ko sa saindo, na kamo man magkaminorootmootan. Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:34, 35) Ini “bagong togon” huli ta ini naghahagad nin orog pa kisa sa Mosaikong Pagboot, na nagsabi: “Mamotan mo an saimong kapuwa [o, kataed] nin siring sa saimo man sana.” (Levitico 19:18) An “bagong togon” naggibo nin orog pa kisa sa paghagad na mamotan nin tawo an saiyang kataed nin siring sa pagkamoot nia sa saiya man sana. Nangangaipo ini nin nagsasakripisyo sa sadiring pagkamoot sagkod sa punto na itao an buhay nin saro para sa iba. An buhay asin kagadanan ni Jesus nagpaheling nin halimbawa kan klaseng iyan nin pagkamoot. Sinambit ni Tertullian an nagpapamidbid na tandang ini kan kinotar nia an mga komento kan kinabanon na mga tawo manongod sa mga Kristiano asin nagsabi: “ ‘Helinga,’ an sabi ninda, ‘na namomotan nanggad ninda an lambang saro . . . asin kun paanong andam sinda na magadan para sa lambang saro.’ ”—Apology, kapitulo XXXIX, 7.

 7. Paano naheling an pagkamoot sa mga tugang pakatapos kan Pentecostes 33 C.E.?

⁷ Naheling an pagkamoot sa mga tugang sa tahaw kan mga disipulo ni Jesus pakatapos kan Pentecostes 33 C.E. Tanganing palawigon kan kadakol na bagong nabautismohan na paratubod an saindang pag-ontok sa Jerusalem asin makanood nin orog pa manongod sa probisyon nin Dios para sa kaligtasan paagi ki Cristo, “an gabos na nagin mga paratubod iribang nagkaigwa kan gabos na bagay, asin ipinabakal ninda an saindang mga rogaring asin idinistribuwir an kabaklanan sa gabos, siring sa kaipuhan kan lambang saro.”—Gibo 2:43-47; 4:32-37.

 8. Ano an patotoo na an pagkamoot sa mga tugang nag-eeksister sa tahaw kan mga Saksi ni Jehova ngonyan?

⁸ An siring na pagkamoot sa mga tugang nag-eeksister sa tahaw kan mga Saksi ni Jehova sa satong panahon. Bilang halimbawa, pakatapos kan Guerra Mundial II, an siring na pagkamoot nagpahiro sa banwaan ni Jehova tanganing isagibo an duwa may kabangang taon nin kampanya sa pagtabang. An mga Saksi sa Canada, Sweden, Switzerland, an Estados Unidos, asin iba pang kadagaan nagdonar nin mga gubing asin kuwarta tanganing ibakal nin kakanon para sa mga kapagtubod sa may guerrang mga nasyon nin Austria, Belgium, Bulgaria, Tsina, Czechoslovakia, Denmark, Inglaterra, Finland, Pransia, Alemania, Grecia, Hungaria, Italia, an Netherlands, Norway, an Pilipinas, Polandia, asin Romania. Halimbawa sana ini, huli ta kasuarin sana an mga oripon nin Dios nagpaheling nin siring na pagkamoot para sa mga Kristianong biktima nin linog sa Peru asin Mejico, bagyo sa Jamaica, asin kaagid na kalamidad saen man. Sa paaging ini asin sa kadakol pang ibang paagi, an banwaan ni Jehova ‘nagpapadanay kan saindang pagkamoot sa mga tugang.’

Magin Mapagpasakat

 9. (a) Anong diosnon na kuwalidad an sinambit sa Hebreo 13:2? (b) Paano an iba dai nag-aaram na ‘nakapagpasakat nin mga anghel’?

⁹ Sunod na sinambit ni Pablo an saro pang kuwalidad na ipinaheling kan mga parasunod ni Cristo, ‘na makapagtao nin banal na paglilingkod na may diosnon na pagkatakot asin paghanga,’ asin magin Paratabang ninda si Jehova. Nagsadol sia: “Dai nindo paglingawan an pagigin mapagpasakat, huli ta paagi kaini an nagkapira, na dai nag-aaram, nakapagpasakat nin mga anghel.” (Hebreo 13:2) Siisay an dai nag-aaram na “nakapagpasakat nin mga anghel”? Bueno, an patriarkang si Abraham nagin kag-imbitar sa tolong anghel. (Genesis 18:1-22) An duwa sainda naghale, asin inimbitaran kan saiyang sobrinong si Lot an mismong mga estranyong ini sa saiyang harong sa Sodoma. Alagad, bago sinda makapagpahingalo, pinalibotan nin kadaklan an harong ni Lot, “magpoon sa aking lalaki sagkod sa gurang na lalaki.” Hinagad ninda ki Lot na itao sainda an saiyang mga bisita para sa inmoral na mga katuyohan, alagad marigon siang nagsayuma. Minsan siring na dai ini aram ni Lot kan enot, nakapagpasakat sia nin mga anghel, na pakatapos nagtabang saiya asin sa saiyang mga aking babae tanganing makadulag sa kagadanan kan ‘pinaoranan ni Jehova nin kalayo asin asupre hale sa langit an Sodoma asin Gomora.’—Genesis 19:1-26.

10. Anong mga bendisyon an naaako kan mapagpasakat na mga Kristiano?

¹⁰ An mapagpasakat na mga Kristiano nagkakaigwa nin kadakol na bendisyon. Nakadadangog sinda nin nakakaparigon na mga eksperyensia na ineestorya kan saindang mga bisita asin nakikinabang huli sa saindang kapakipakinabang sa espirituwal na pakikiiba. Tinawan nin komendasyon si Gayo huli sa pagigin mapagpasakat sa mga kapagtubod, “asin mga estranyo pa ngani,” siring kan pagpasakat kan kadaklan sa banwaan ni Jehova ngonyan sa nagbibiyaheng mga paraataman. (3 Juan 1, 5-8) An pagigin mapagpasakat sarong kuwalipikasyon sa pagnombrar sa saro bilang paraataman. (1 Timoteo 3:2; Tito 1:7, 8) Risang gayo man na nanuga si Jesus sa arog karnerong mga indibiduwal nin mga bendisyon sa Kahadean sa mapagpasakat na naggibo nin marahay sa saiyang linahidan na “mga tugang.”—Mateo 25:34-40.

Girumdomon an mga Linalamag

11. Taano ta angay an sadol sa Hebreo 13:3?

¹¹ An mga nagmamawot na magkaigwa kan tabang ni Jehova asin tanganing ‘makapagtao nin banal na paglilingkod na may diosnon na pagkatakot asin paghanga’ maninigong dai paglingawan an mga kapagtubod na nagsasakit. Nasabotan ni Pablo an mga kasakitan na tinitios kan minaltratong mga Kristiano. Dai pa gayong naghahaloy, an mga disipulo nagkawararak huli sa paglamag, asin an saiyang katrabahong si Timoteo binutasan pa sana sa bilanggoan. (Hebreo 13:23; Gibo 11:19-21) An Kristianong mga misyonero nagbibiyahe man na nag-oorganisar nin bagong mga kongregasyon o nagpapakosog sa mga nag-eeksister na sa espirituwal na paagi. Mantang an kadaklan kan mga tugang na lalaki asin babae kaidto na naglilingkod mga Hentil, an ibang Hebreong Kristiano tibaad dai gayong nahahadit manongod sainda. Angay kun siring an pagirumdom: “Girumdomon idtong mga nagagapos sa bilanggoan siring sa kun kamo nagagapos kairiba ninda, asin idtong mga minamaltrato, mantang kamo man nasa hawak pa.”—Hebreo 13:3.

12. Paano niato puwedeng iaplikar an sadol na girumdomon an minamaltratong mga kapagtubod?

¹² An mga Hebreo “nagpahayag nin pakikidamay sa mga nasa bilanggoan” alagad dai dapat lingawan an siring na maimbod na kapuwa mga parasamba, magsalang mga Judio o Hentil. (Hebreo 10:34) Alagad kumusta kita? Paano niato puwedeng ipaheling na nagigirumdoman niato an minamaltratong mga Kristiano? Sa ibang kamugtakan tibaad angay na mag-apelar kita sa mga autoridad kan gobyerno paagi sa surat sa pagmamaigot na tabangan an mga kapagtubod na nabilanggo huli sa saindang pagtubod sa kadagaan kun saen ibinawal an gibohon na paghuhulit kan Kahadean. Nangongorognang maninigo niatong girumdomon sinda sa satong mga pamibi, na sinasambit pa ngani an ngaran kan nagkapira, kun posible. An paglamag sainda nakakaapektong gayo sa sato, asin dinadangog ni Jehova an satong maigot na mga kahagadan sa kapakanan ninda. (Salmo 65:2; Efeso 6:17-20) Mantang mayo kita sa iyo man sanang selda sa bilanggoan, garo nagagapos kita na kairiba ninda asin nakaaalok nin tabang asin panpakosog. An pinaniaki sa espiritung mga Kristiano sierto nanggad na nakikidamay sa minamaltratong mga linahidan. (Ikomparar an 1 Corinto 12:19-26.) Igwa man sinda kan kaagid na kahaditan para sa saindang linalamag na mga kairiba na may daganon na paglaom, na nagtitios man nin kadakol na klase nin pagmaltrato sa mga kamot kan mga paralamag. Angay an siring na pakikidamay, mantang kita gabos nasa laman na hawak pa asin posibleng magtios nin mga kasakitan asin paglamag bilang mga parasamba ni Jehova.—1 Pedro 5:6-11.

Maninigong Magin Kagalang-galang an Pag-aragoman

13. Sa pinakasustansia, ano an sinabi ni Pablo sa Hebreo 13:4?

¹³ An pagsunod sa halimbawa ni Cristo asin ‘pagtatao nin banal na paglilingkod ki Jehova na may diosnon na pagkatakot asin paghanga’ maninigong makaapektar sa satong paghadit para sa iba sa kadakol na paagi. Sa pagsabi na “kamo man nasa hawak pa,” sinambit ni Pablo an relasyon kan pagkakaigwa nin hawak, o pisikal, na kamugtakan na nagtao nin oportunidad na magpaheling nin tamang pagmakolog sa iba. (Hebreo 13:3) Itinao nia sa Hebreong mga Kristiano an sadol na ini: “Magin logod kagalang-galang sa gabos an pag-aragoman, asin dai pagdigtaan an higdaan, huli ta hohokoman nin Dios an mga parapakisaro asin parasambay.” (Hebreo 13:4) Angay nanggad an sadol na ini, huli ta lakop an seksuwal na inmoralidad sa Romanong Imperyo! An mga Kristiano sa presenteng panahon kaipuhan man na magkuyog sa mga tataramon na ini huli sa hababang moral na mga pamantayan kan kinaban asin sa katunayan na rinibo kada taon an natitiwalag hale sa kongregasyon huli sa seksuwal na inmoralidad.

14. Taano ta masasabi nindo na kagalang-galang an pag-aragoman?

¹⁴ Kabilang sa dai nagpaheling nin halangkaw na paggalang sa pag-aragoman an mga Essenes kan panahon ni Pablo. Kadaklan sainda an daing agom, siring kan iba sa grupo nin mga klerigo ngonyan na salang gayong hinohona na mas banal an dai pag-agom kisa sa pag-agom. Alagad, paagi kan sinabi ni Pablo sa Hebreong mga Kristiano, malinaw na ipinaheling nia na kagalang-galang an pag-aragoman. An halangkaw na paggalang para kaini maheheling kan ipahayag ni Noemi an saiyang pagmawot para sa nabalo niang mga manugang na babae, si Rut asin si Orpa: “Tawan logod kamo nin balaog ni Jehova, asin makanompong kamo nin kapahingaloan an balang saro sa harong kan saiyang agom na lalaki.” (Rut 1:9) Sa ibang lugar, itinokdo mismo ni Pablo na ‘sa huring mga panahon an nagkapira masuhay sa pagtubod, na ipinangangalad an pag-agom.’—1 Timoteo 4:1-5.

15. Sairisay an inaapod na mga parapakisaro asin parasambay sa Hebreo 13:4, asin paano sinda hohokoman nin Dios?

¹⁵ An mga Hebreo na kaidto nasa irarom kan Pagboot alagad dinara na sa bagong tipan nakaaram kan pagboot: “Dai ka magsambay.” (Exodo 20:14) Alagad yaon sinda sa inmoral na kinaban asin nangangaipo kan patanid: “Logod . . . dai pagdigtaan an higdaan, huli ta hohokoman nin Dios an mga parapakisaro asin parasambay.” Kairiba sa mga parapakisaro an daing agom na mga tawo na nakikikabtang sa seksuwal na pagdorog. An mga parasambay orog na partikular an may agom na mga indibiduwal na nakikidorog sa mga bako ninda agom, na dinidigtaan an saindang higdaan. Mantang an dai nagbabakleng mga paragibo nin pakikisaro asin pagsambay angay sa bakong paborableng paghokom nin Dios, dai man sinda aakoon sa langitnon na Bagong Jerusalem ni magkaigwa nin buhay na daing katapusan sa daga sa irarom kan pamamahala kan Kahadean. (Kapahayagan 21:1, 2, 8; 1 Corinto 6:9, 10) An patanid na ini na dai pagdigtaan an higdaan maninigo man na magpahiro sa mga Kristianong may agom na likayan an nakakadigtang seksuwal na paggawe sa saindang agom, minsan siring na mayong maati manongod sa tamang pisikal na pagdayupot sa pag-aragoman.—Helingon an The Watchtower, Marso 15, 1983, pahina 27-31.

Kontento sa Presenteng mga Bagay

16, 17. Ano an sinabi sa Hebreo 13:5, asin taano ta kaipuhan kan mga Hebreo an sadol na ini?

¹⁶ Makakanompong kita nin pagkakontento kun susunodon niato an satong Halimbawa asin ‘makapagtao nin banal na paglilingkod na may banal na katakotan asin paghanga,’ na nananarig na si Jehova an satong Paratabang. An labi-labing pagkaokupado sa materyalistikong mga pasohan puwedeng magin sugot. Alagad an mga Kristiano dai dapat na magpadara digdi. Sinabihan an mga Hebreo: “An saindo logod na pamumuhay ligtas sa pagkamoot sa pirak, mantang kamo naninigoan na sa mga bagay na yaon. Huli ta sia an nagsabi: ‘Sa ano man na paagi dai ta ka babayaan ni sa ano man na paagi dai ta ka pababayaan.’ ” (Hebreo 13:5) Taano ta kaipuhan kan mga Hebreo an sadol na ini?

¹⁷ Tibaad an mga Hebreo labi-labing nahadit manongod sa kuwarta huli ta nagirumdoman ninda an “dakulang gutom” kan pamamahala ni Claudio Cesar kan (41-54 C.E.). Grabe an gutom na idto kaya an mga Kristiano saen man nagpadara nin tabang na mga probisyon sa saindang mga tugang sa Judea. (Gibo 11:28, 29) Sono sa Judiong historyador na si Josephus, an gutom naglawig nin tolong taon o labi pa, na nagin dahelan kan mapan-aping kadaihon sa Judea asin Jerusalem.—Antiquities of the Jews, XX, 2, 5; 5, 2.

18. An sadol sa Hebreo 13:5 nagtatao nin anong leksion sa sato?

¹⁸ Igwa daw nin adal ini para sa sato? Iyo, huli ta minsan gurano pa kita kapobre, dai kita dapat na mamoot sa kuwarta o labi-labing mahadit manongod kaini. Imbes na magparahadit dapit sa materyal na seguridad, posible nganing nagigin maara, maninigo kitang magin “kontento na sa presenteng mga bagay.” Sinabi ni Jesus: “Kaya padagos na hanapon nguna an kahadean asin an saiyang [nin Dios] katanosan, asin ini gabos na ibang bagay idadagdag na sana sa saindo.” (Mateo 6:25-34) Ipinaheling nia man na maninigo kitang magkonsentrar sa pagigin “mayaman sa Dios” huli ta ‘an satong buhay dai minagikan sa mga bagay na satong nasasadirihan.’ (Lucas 12:13-21) Kun an pagkamoot sa kuwarta nagsasapeligro kan satong espirituwalidad, kun siring, sunudon niato an sadol ni Pablo sa mga Hebreo asin girumdomon man na an “diosnon na debosyon kaiba an pagigin naninigoan sa sadiri” iyan “an may dakulang pakinabang.”—1 Timoteo 6:6-8.

Manarig ki Jehova

19. Anong kasegurohan an itinao nin Dios ki Josue, asin paano ini maninigong makaapekto sa sato?

¹⁹ Bilang mga parasunod ni Jesus na nagmamawot na ‘makapagtao nin banal na paglilingkod na may diosnon na pagkatakot asin paghanga,’ maninigo niatong ibugtak an satong pagsarig bakong sa kuwarta kundi sa satong langitnon na Ama, na an tabang nia mahalaga. Ano man an mga problemang inaatubang niato, maninigo niatong girumdomon an saiyang paneneguro: “Sa ano man na paagi dai ta ka babayaan ni sa ano man na paagi dai ta ka pababayaan.” (Hebreo 13:5) Sinambit digdi ni Pablo an mga tataramon nin Dios ki Josue: “Dai ta ka babayaan ni pababayaan man.” (Josue 1:5; ikomparar an Deuteronomio 31:6, 8.) Nungka na pinabayaan ni Jehova si Josue, asin dai Nia kita pababayaan kun nananarig kita sa Saiya.

20. (a) Ano an teksto kan taon para sa 1990? (b) Mayong takot, ano an maninigo niatong padagos na gibohon?

²⁰ An dai nasusudyang tabang nin Dios idodoon sa tahaw kan mga Saksi ni Jehova sa mga bulan sa enotan, huli ta an saindang teksto kan taon sa 1990 nagsasabi: “Magkaigwa kita nin kapusoan asin magsabi: ‘Si Jehova an sakong paratabang.’ ” An mga tataramon na ini manonompongan sa Hebreo 13:6, kun saen kinotar ni Pablo an salmista asin sinabihan an mga Hebreo: “Tanganing magkaigwa kita nin kapusoan asin magsabi: ‘Si Jehova an sakong paratabang; dai ako matatakot. Ano an magigibo nin tawo sako?’ ” (Salmo 118:6) Minsan linalamag, dai kita natatakot, huli ta an mga tawo dai makagigibo nin orog sa itinotogot nin Dios. (Salmo 27:1) Minsan pa kita magadan bilang mga nagdadanay nin integridad, igwa kita nin paglaom na pagkabuhay liwat. (Gibo 24:15) Kaya padagos niatong sunudon an satong Halimbawa sa ‘pagtatao nin banal na paglilingkod na may diosnon na pagkatakot asin paghanga,’ na nananarig na si Jehova an satong Paratabang.

Paano Kamo Masimbag?

◻ Taano ta nangongorognang kaipuhan kan Hebreong mga Kristiano an tabang ni Jehova?

◻ Paano ‘pinagdadanay an pagkamoot ninda sa tugang’ kan banwaan ni Jehova?

◻ Taano ta magin mapagpasakat?

◻ Ano an puwede niatong gibohon tanganing ipaheling na ginigirumdom niato an minamaltratong mga kapagtubod?

◻ Taano ta maninigong pagdanayon na kagalang-galang an pag-aragoman?