Bilog na Kalag na Pag-atang ki Jehova

“An gabos na guiniguibo nindo, guibohon nindo nin sa puso [“bilog na kalag,” NW], na siring kun sa Kagurangnan.”​—COL. 3:23.

1-3. (a) An kagadanan daw ni Jesus sa hariging pasakitan nangangahulogan na bako nang kahagadan sa sato ni Jehova an ano man na atang? Ipaliwanag. (b) Anong hapot an minalataw dapit sa mga atang ngonyan?

KAN enot na siglo C.E., ihinayag ni Jehova sa saiyang banwaan na tinapos na kan atang na pantubos ni Jesus an Ley ni Moises. (Col. 2:​13, 14) An gabos na pag-atang na ginigibo kan mga Judio sa laog nin ginatos na taon dai na kaipuhan asin mayo na nin ano man na halaga. Naotob na kan Ley an katuyohan kaiyan bilang “paratokdo na minagiya pasiring ki Cristo.”​—Gal. 3:​24, NW.

² Dai ini nangangahulogan na an mga Kristiano dai na interesado sa mga atang. Sa katunayan, si apostol Pedro nagsambit dapit sa pangangaipo na “magdolot nin magña atang na espiritual na maaako nin Dios huli ki Jesu-Cristo.” (1 Ped. 2:5) Dugang pa, lininaw ni apostol Pablo na an buhay nin nagdusay na Kristiano​—an lambang aspekto kaiyan​—angay sanang ibilang na “atang.”​—Roma 12:1.

³ Kun siring, an sarong Kristiano nag-aatang ki Jehova, magsalang paagi sa pagdolot o pagsakripisyo nin nagkapirang bagay para sa saiya. Basado sa aram niato manongod sa kahagadan kaidto sa mga Israelita, paano kita makakasegurado na an gabos niatong atang ngonyan inaako ni Jehova?

SA AROALDAW NA BUHAY

 4. Ano an dapat niatong girumdomon manongod sa pang-aroaldaw na mga aktibidad sa buhay?

⁴ Mantang ginigibo niato an satong pang-aroaldaw na mga aktibidad, garo baga depisil saboton an koneksion kaiyan sa pag-atang niato ki Jehova. An gibohon sa harong saka eskuelahan, an sekular na trabaho, pamamakal, asin kaagid kaiyan na mga aktibidad garo baga mayong koneksion sa espirituwal na mga bagay. Minsan siring, kun idinusay mo na an saimong buhay ki Jehova o nagmamawot kang gibohon iyan sa dai na mahahaloy na panahon, mahalaga an saboot mo sa pang-aroaldaw na mga aktibidad. Mga Kristiano kita 24 oras kada aldaw. An mga prinsipyo sa Biblia dapat na iaplikar sa gabos na aspekto kan satong buhay. Huli kaini, si Pablo nagsadol sa sato: “An gabos na guiniguibo nindo, guibohon nindo nin sa puso [“bilog na kalag,” NW], na siring kun sa Kagurangnan.”​—Basahon an Colosas 3:​18-24.

5, 6. Anong mga bagay an maninigong makaapektar sa satong aroaldaw na pagbado asin paggawe?

⁵ An aroaldaw na mga aktibidad nin sarong Kristiano bakong kabtang kan saiyang sagradong paglilingkod. Pero, an katunayan na sinasadol kita ni Pablo na gibohon an satong mga aktibidad nin “bilog na kalag” na para ki Jehova nagpapahiro sa sato na horophoropon an bilog na pamumuhay niato. Kaya paano niato ini ikakaaplikar sa satong sadiri? An sato daw na paggawe asin pagbado pirmeng maninigo sa sarong Kristiano? O kun ginigibo niato an satong pang-aroaldaw na mga aktibidad, nasusupog daw kitang magpamidbid bilang Saksi ni Jehova huli sa paggawe o pagbado niato? Nungka logod na mangyari iyan! Dai mamawoton nin mga lingkod ni Jehova na gumibo nin ano man na makakaraot sa ngaran nin Dios.​—Isa. 43:10; 2 Cor. 6:​3, 4, 9.

⁶ Siyasaton niato kun paano an pagmawot na gibohon an gabos na bagay nin “bilog na kalag” na para ki Jehova may epekto sa dakol na laen-laen na aspekto nin buhay. Sa pagsiyasat niato, girumdomon na an gabos na atang kan mga Israelita ki Jehova kaipuhan na iyo an pinakamarahay na yaon sa sainda.​—Ex. 23:19.

KUN ANO AN EPEKTO SA SAIMONG BUHAY

 7. Ano an kalabot sa Kristianong pagdusay?

⁷ Kan idusay mo an saimong buhay ki Jehova, bako daw na ginibo mo iyan na mayo nin pagduwaduwa? Garo man sana sinabi mo na eenoton mo si Jehova sa gabos na aspekto kan saimong buhay. (Basahon an Hebreo 10:7.) Marahay na desisyon iyan. Daing duwa-duwa na naheling mong marahayon an mga resulta kun inaaram mo an kabotan ni Jehova sa sarong bagay dangan pinagmamaigotan na humiro kaoyon kaiyan. (Isa. 48:​17, 18) An mga lingkod nin Dios banal asin magayagaya huling ipinapabanaag ninda an mga kualidad kan Saro na nagtotokdo sa sainda.​—Lev. 11:44; 1 Tim. 1:​11, NW.

 8. Taano ta mahalagang girumdomon niato na an suanoy na mga atang ibinibilang ni Jehova na banal?

⁸ An mga atang kan mga Israelita ki Jehova ibinibilang na banal. (Lev. 6:25; 7:1) An Hebreong termino na trinadusir na “kabanalan” nangangahulogan nin pagigin siblag, o pagigin eksklusibo sa Dios. Tanganing akoon ni Jehova an satong mga atang, iyan dapat na siblag asin mayong digta kan kinaban. Dai niato puedeng mamotan an ano man na ikinakaongis ni Jehova. (Basahon an 1 Juan 2:​15-17.) Malinaw nanggad, ini nangangahulogan na kaipuhan niatong likayan an ano man na pakikiasosyar o pakikikabtang na puedeng makadigta sa sato sa pagheling nin Dios. (Isa. 2:4; Kap. 18:4) Nangangahulogan man ini na dai niato totogotan an satong mata na magparaheling sa maati o imoral, ni magpapantasia kita manongod sa siring na mga bagay.​—Col. 3:​5, 6.

 9. Gurano kaimportante an pagtratar nin sarong Kristiano sa iba, asin taano?

⁹ Si Pablo nagsadol sa mga kapagtubod: “An pagguibo nin marahay asin an pakisumaro [“paghiras nin mga bagay sa iba,” NW] dai nindo pagligñawan: huli ta an siring na magña atang naooyonan nin Dios.” (Heb. 13:16) Kaya an pagigin marahay asin paggibo nin marahay sa iba bilang paagi nin pamumuhay minamansay ni Jehova bilang inaakong atang sa saiya. An mamomoton na pagmakolog sa iba sarong nagpapamidbid na tanda nin tunay na mga Kristiano.​—Juan 13:​34, 35; Col. 1:10.

MGA ATANG SA PAGSAMBA

10, 11. Paano minamansay ni Jehova an satong Kristianong ministeryo asin pagsamba, asin ano an maninigong magin epekto kaini sa sato?

¹⁰ An saro sa pinakarisang mga paagi na naggigibo kita nin marahay sa iba iyo an “pagpapahayag sa publiko kan satong paglaom.” Inaaprobetsaran daw nindo an lambang oportunidad na makapagpatotoo? Inapod ni Pablo an mahalagang marhay na Kristianong aktibidad na ini na ‘atang nin pag-omaw, na iyo an bunga nin mga ngabil na nagtutuga kan ngaran’ nin Dios, o nagpapahayag kaiyan sa publiko. (Heb. 10:​23, NW; 13:15; Os. 14:2) Dakol kitang puedeng horophoropon dapit sa panahon na ginagamit niato sa paghuhulit kan maogmang bareta kan Kahadean​—sa kalidad kaiyan asin kun gurano iyan kadakol​—asin dakol na kabtang sa Pagtiripon sa Paglilingkod an dinisenyo tanganing mapag-isipan niato ini. Minsan siring, huling an paglilingkod niato sa langtad asin an impormal na pagpapatotoo ‘atang nin pag-omaw,’ na kabtang kan satong pagsamba, an atang na iyan maninigong iyo an pinakamarahay na ikakadolot niato. Minsan ngani nagkakalaenlaen an mga kamugtakan, sa parate an panahon na ginagamit niato sa pagpahayag kan maogmang bareta nagpapaheling kun gurano an satong pagpapahalaga sa espirituwal na mga bagay.

¹¹ An mga Kristiano regular na nagtatao nin panahon para sa pagsamba mantang nasa harong o kaiba an kongregasyon. Kahagadan iyan sa sato ni Jehova. Totoo, dai na niato kaipuhan na sunodon an pagpahingalo kun Sabbath, ni regular na magbiahe para sa mga kapiestahan sa Jerusalem. Minsan siring, an suanoy na mga kaugalean na idto igwa nin mga kapareho sa buhay nin Kristiano. Inaasahan pa man giraray kita nin Dios na pumondo sa gadan na mga gibo asin mag-adal kan Tataramon nia, mamibi, asin mag-atender sa Kristianong mga pagtiripon. Asin an mga payo nin Kristianong pamilya naggigibo nin paagi tanganing mapangenotan an pampamilyang pagsamba sa mga kasararo ninda sa harong. (1 Tes. 5:17; Heb. 10:​24, 25) Mapadapit sa espirituwal na mga aktibidad niato, marahay na ihapot niato sa satong sadiri, ‘Mapapaoswag ko daw an kalidad kan sakong pagsamba?’

12. (a) Sa ano puedeng ikomparar ngonyan an pagdolot nin insenso na ginigibo sa suanoy na pagsamba? (b) Ano an maninigong magin epekto kan pagkomparar na ini sa mga sinasambit niato sa satong mga pamibi?

¹² Si Hadeng David nag-awit ki Jehova: “An pamibi ko logod andamon na siring sa insenso sa atubangan mo.” (Sal. 141:​2, NW) Isip-isipa an saimong mga pamibi​—an kalidad asin pagigin regular kaiyan. “An magña pamibi nin magña banal” iinaagid kan libro nin Kapahayagan sa insenso huling an inaakong mga pamibi minaitaas pasiring ki Jehova arog nin mahamot na parong. (Kap. 5:8) Sa suanoy na Israel, an insenso na regular na idinodolot sa altar ni Jehova dapat na andamon nin maingat asin tama. Inaako idto ni Jehova solamente kun idinodolot idto kaoyon kan mga susundon na inestablisar nia. (Ex. 30:​34-37; Lev. 10:​1, 2) Kun arog man kaiyan an satong odok sa pusong mga pamibi, makakasegurado kita na aakoon iyan ni Jehova.

PAGTAO ASIN PAG-AKO

13, 14. (a) Ano an ginibo ni Epafrodito asin kan kongregasyon sa Filipos para ki Pablo, asin ano an saboot kan apostol manongod dian? (b) Paano niato maaarog an halimbawa ni Epafrodito asin kan kongregasyon sa Filipos?

¹³ An pinansial na mga kontribusyon para sa pambilog na kinaban na gibohon puedeng iagid sa atang, baga man dakol o dikit an itinatao niato. (Mar. 12:​41-44) Kan enot na siglo C.E., si Epafrodito isinugo kan kongregasyon sa Filipos na magduman sa Roma tanganing asikasohon an pisikal na mga pangangaipo ni Pablo. Minalataw na an representanteng ini kan mga taga Filipos may darang regalong kuarta hale sa kongregasyon. Bako ini an enot na pagkakataon na nagin matinao an mga taga Filipos ki Pablo. Ginibo ninda an kabootan na ini huling habo nindang maghadit si Pablo dapit sa panggastos, tanganing mas dakol na panahon an magamit nia sa ministeryo. Paano minansay ni Pablo an regalo? Inapod nia iyan na “alimio nin mahamot na parong, sarong atang na maaako, makakapaogma sa Dios.” (Basahon an Filipos 4:​15-19.) Tunay nanggad na an kabootan kan mga taga Filipos pinahalagahan ni Pablo, pati ni Jehova.

¹⁴ Ngonyan man, pinapahalagahan na marhay ni Jehova an satong mga kontribusyon sa pambilog na kinaban na gibohon. Dugang pa, sia nanunuga na kun padagos niatong eenoton sa satong buhay an intereses kan Kahadean, itatao nia an gabos niatong pangangaipo sa espirituwal asin pisikal.​—Mat. 6:33; Luc. 6:38.

IPAHELING AN SAINDONG PAGPAPAHALAGA

15. Ano an nagkapira sa mga bagay na ipinagpapasalamat nindo ki Jehova?

¹⁵ Dakolon an dahelan niato na magpasalamat ki Jehova. Bako daw na maninigo niato siang pasalamatan aroaldaw sa regalo na buhay? Itinatao nia an gabos na kaipuhan niato tanganing masusteniran an satong sadiri​—kakanon, bado, asin istaran saka an kada hinangos niato. Dugang pa, an satong pagtubod, na basado sa tamang kaaraman, nagtatao sa sato nin paglaom. Angay sanang sambahon niato si Jehova asin magdolot kita nin mga atang nin pag-omaw sa saiya, huli sa kun siisay sia asin kun ano an ginigibo nia para sa sato.​—Basahon an Kapahayagan 4:11.

16. Ano an maninigong magin reaksion niato sa atang na pantubos ni Cristo?

¹⁶ Arog kan naaraman niato sa sinundan na artikulo, an mahalagang marhay na regalo nin Dios sa katawohan iyo an atang na pantubos ni Cristo. Marahayon na kapahayagan ini kan pagkamoot nin Dios sa sato. (1 Juan 4:10) Ano an angay na reaksion niato digdi? Sinabi ni Pablo: “Pinipirit kami kan pagkamoot ni Cristo; huli ta siring an samong paghokom, na an saro nagadan manogñod sa gabos, . . . asin sia nagadan manogñod sa gabos, tagñaning an magña nabubuhay dai na mabuhay manogñod sa sainda man sana, kundi manogñod kaidtong nagadan asin nabuhay liwat dahel sainda.” (2 Cor. 5:​14, 15) Garo man sana sinabi ni Pablo na kun pinapahalagahan ta an dai na kutana maninigong kabootan nin Dios, gagamiton niato an satong buhay sa pagtao nin onra sa Saiya asin sa Aki Nia. Ikinakapahayag niato an pagkamoot asin pagpapahalaga sa Dios asin ki Cristo paagi sa pagkuyog asin sa pagmawot niato na maghulit asin gumibo nin mga disipulo.​—1 Tim. 2:​3, 4; 1 Juan 5:3.

17, 18. Sa anong mga paagi dinugangan nin nagkapira an saindang atang nin pag-omaw ki Jehova? Magtao nin halimbawa.

¹⁷ Puede daw nindong paoswagon an saindong atang nin pag-omaw sa Dios? Pakatapos na horophoropon an gabos na karahayan ni Jehova sa sainda, dakol an napahiro na organisaron an saindang panahon asin mga aktibidad tanganing orog na makikabtang sa paghuhulit kan Kahadean o iba pang teokratikong aktibidad. May mga nakakapag-auxiliary payunir nin sarong bulan o labi pa kada taon, mantang an iba nagin regular payunir. An iba pa nakikikabtang sa pang-Kahadean na mga proyekto sa pagtogdok. Bako daw na marahayon na mga paagi ini na ikapaheling nin saro an saiyang pagpapahalaga? Kun ginigibo ini na may tamang motibo​—tanganing ipaheling an pagigin mapagpasalamat​—aakoon nin Dios an mga gibong ini nin sagradong paglilingkod.

¹⁸ Dakol na Kristiano an nakamate nin utang na boot ki Jehova asin namotibar kaiyan. An saro iyo si Morena. May mga hapot sia dapit sa Dios, asin hinanap nia an simbag sa dinakulaan niang relihion na Katolisismo, asin sa pilosopiyang gikan sa Asia. Alagad dai nia nanompongan sa arin man dian an nakakakontentong mga simbag. Nanigoan sana an saiyang espirituwal na pagkapaha kan sia makipag-adal sa Biblia sa mga Saksi ni Jehova. Nagpapasalamat na marhay si Morena huli sa basado sa Kasuratan na simbag sa gabos na hapot nia asin huling napamugtak na an isip nia, kaya minawot niang pasalamatan si Jehova paagi sa paggamit kan bilog niang kosog sa paglilingkod sa Saiya. Pakapabautismo nia, sia tolos-tolos na nag-auxiliary payunir nin regular, asin kan puede na siang magregular payunir, ginibo nia iyan. Ngonyan, pakalihis nin 30 taon, si Morena nasa bilog na panahon na paglilingkod pa man giraray.

19. Paano mo madudugangan an saimong mga atang ki Jehova?

¹⁹ Siempre, dakol na maimbod na lingkod ni Jehova an mayo sa kamugtakan na makapagpayunir. Ano man an magigibo niato sa paglilingkod ki Jehova, gabos kita makakatao sa saiya nin inaakong espirituwal na mga atang. Sa satong paggawe, kaipuhan niatong sunodon nin maingat an matanos na mga prinsipyo, na isinasaisip na sa gabos na panahon irinerepresentar niato si Jehova. Sa pagpaheling nin pagtubod, lubos kitang nagtitiwala sa kaotoban kan mga katuyohan nin Dios. Sa marahay na mga gibo, nagtatabang kita sa pagpalakop kan maogmang bareta. Huli sa kapanoan kan satong puso asin sa pag-apresyar niato sa gabos na ginibo ni Jehova para sa sato, magpadagos kita sa bilog na kalag na pag-atang ki Jehova.

[Blurb sa pahina 25]

Namomotibar ka daw kan karahayan ni Jehova na paoswagon an saimong atang nin pag-omaw?

[Ritrato sa pahina 23]

Inaaprobetsaran mo daw an lambang oportunidad na magpatotoo?